ߊ߲ ߞߊ߬ ߒߞߏ ߘߎ߲ߓߎ ߟߊ߫ ߛߘߊߟߊߟߌ ߘߏ߫ ߟߊߛߋ߫ ߞߊ߲ ߡߍ߲߫ ߛߌߟߊߓߐߛߐ߯ߣߊ߫ ߞߊ߲߬߸ ߘߎ߲ߓߎ ߢߊߝߐߣߍ߲߫ ߏ߬ ߞߣߐ߫߸ ߞߵߊ߬ ߦߌ߬ߘߊ߬ ߒߞߏ ߘߐ߫ ߞߏ߫ ߘߎ߲ߓߎ ߦߋ߫ <<ߞߊ߲ ߣߴߊ߬ ߡߟߋߞߎߦߊ ߟߊߢߊ߭ ߣߌ߫ ߞߘߐߝߐߟߊ߲߫ ߡߞߊߝߏ>> ߓߊ߯ߙߊ ߟߋ߬ ߘߌ߫߸ ߊ߬ ߣߌ߫ <<ߞߊ߬ ߞߊ߲ ߝߐߞߊ߲߫ ߘߌߡߊ߲ ߠߎ߬ ߣߌ߫ ߝߐߣߐ߲߮ ߠߎ߬ ߣߌ߫ ߞߎߡߊߘߋ߲߫ ߞߐߢߌ߬ߣߊ߬ߣߍ߲ ߠߎ߬ ߜߊ߲ߜߊ߲߫ ߞߘߐߝߐߟߊ߲ ߞߣߐ߫.>> ߏ߬ ߟߵߊ߬ ߦߌ߬ߘߊ߬ ߟߊ߫߸ ߣߌ߫ ߡߐ߰ ߣߐ߬ ߞߍ߫ ߘߴߊ߬ ߢߊߦߋ߫ ߟߊ߫߸ ߞߏ߫ ߘߎ߲ߓߎ ߦߋ߫ ߦߟߌߡߊߛߙߋ߫ ߛߌ߲ߝߏ߲ߘߊ ߟߋ߬ ߘߌ߫߸ ߡߍ߲ ߘߐ߱ߘߏ߲߬ߣߍ߲߫ ߞߊ߲ ߞߊ߬ߙߊ߲߲ ߠߊ߫߸ ߊ߬ ߟߊߕߊ߲߬ߞߊ ߟߊ߫߸ ߊ߬ ߟߊߥߙߎߞߌ ߟߊ߫߸ ߊ߬ ߣߌ߫ ߞߊ߲ ߞߎߡߊߘߋ߲ ߠߎ߬ ߖߍ߬ߘߍ ߛߌ߲߬ߝߏ߲߬ߧߊ ߟߊ߫ ߞߏߓߍ߲߬.
ߊ߲ ߘߴߊ߬ ߟߐ߲߫ ߏ߬ ߝߣߊ߫ ߡߊ߬߸ ߞߏ߫ ߡߐ߰ ߜߍ߲ߛߍ߲ߞߍߙߍ߲ ߘߏ߫ ߟߎ߫ ߘߴߊ߬ߟߎ߫ ߥߟߌ߬߸ ߞߊ߬ ߘߍ߬ߞߙߎ ߘߏ߫ ߟߊߘߊ߲߫ ߞߵߊ߬ ߝߐ߫ ߏ߬ ߡߊ߬ ߞߏ߫ ߘߎ߲ߓߎ߸ ߞߊ߬ ߓߍ߲߬ ߖߡߊ߬ߣߊ ߛߊ߬ߙߌ߬ߦߊ ߡߊ߬، ߓߊ߬ߙߌ߬߸ ߣߴߊ߬ ߛߐ߬ߘߐ߲߬ ߘߊ߫ ߞߏ߫ ߘߎ߲ߓߎ߫ ߖߐ߲ߖߐ߲ ߠߋ߬߸ ߡߍ߲ ߦߋ߫ ߞߊ߲ ߜߋ߬ߟߎ߲߬ߓߊ߮ ߣߴߊ߬ ߛߌ߲߬ߝߏ߲߬ߧߊ߬ߓߊ߮ ߘߌ߫߸ ߏ߬ ߕߴߛߋ߫ ߞߍ߫ ߟߊ߫ ߝߋߎ߫߸ ߝߏ߫ ߞߏ߫ ߘߊ߲ߘߐ߫ ߦߋ߫ ߘߝߊ߫ ߘߎ߲ߓߎ ߞߣߐ߫߸ ߊ߬ ߛߌ߲߬ߝߏ߲ ߠߎ߬ ߘߐ߫:
- ߞߊ߲ߟߐ߲ߠߊ ߟߎ߬߸ ߟߞߊ߬ߙߊ߲߬ߠߌ߲߬ߠߊ ߟߎ߬߸ ߛߓߍߦߟߊ ߟߎ߬߸ ߕߌߙߌ߲ߠߌ߲ߠߊ߫ ߓߟߏߡߊߞߊ߬ߣߍ߲ ߠߎ߬.
- ߖߡߊ߬ߣߊ ߟߎ߬ ߦߋ߫ ߞߐ߬ߦߌ߬ߘߴߊ߬ ߞߣߐ߫߸ ߕߌ߲߬ߞߎߘߎ߲ ߠߎ߬ ߦߋ߫ ߞߐߦߌ߬ߘߴߊ߬ ߞߣߐ߫߸ ߞߊ߲ ߡߍ߲ ߘߎ߲ߓߎ ߦߋ߫߸ ߏ߬ ߦߋ߫ ߝߐ߫ ߟߊ߫ ߘߌ߲߬ߞߌߙߊ ߡߍ߲ ߠߎ߬ ߘߐ߫߸ ߏ߬ ߟߎ߬ ߦߋ߫ ߞߐߦߌ߬ߘߴߊ߬ ߞߣߐ߫.
- ߊ߬ ߓߊ߯ߙߊ ߦߋ߫ ߞߍ߫ ߜߍߦߊ ߞߊ߲߬߸ ߛߍ߬ߓߍ ߟߊ߫߸ ߣߌ߫ ߢߣߊߕߐߡߐ߲ߠߌ߲߫ ߕߍ߫، ߊ߬ ߘߏ߲߬ ߦߋ߫ ߞߍ߫ ߖߊ߬ߡߊ ߓߍ߲߬ߡߊ߬ ߘߎ߲ߓߎ߫ ߘߌ߫.
ߊ߲ ߘߴߊ߬ ߢߊߦߋ߫ ߦߙߐ ߏ߬ ߝߣߊ߫ ߡߊ߬߸ ߞߏ߫ ߘߎ߲ߓߎ ߟߊ߫ ߓߊ߯ߙߊ ߟߎ߬ ߘߐ߫߸ ߊ߬ ߦߋ߫ ߞߏ߫ ߘߊ߲ߘߐ߫ ߟߋ߬ ߓߟߏߘߐߓߍ߲ ߞߍ߫ ߟߊ߫ ߞߘߊߎ߫:
- ߞߘߐߝߐߟߊ߲߫ ߡߞߊߝߏ
- ߞߊ߲ߡߊߛߙߋ ߣߌ߫ ߞߊ߲ߜߍ ߣߌ߫ ߡߊ߲߬ߕߊ߰ߦߊ ߛߊ߬ߙߌ߬ߦߊ ߟߎ߬.
- ߝߐߞߎߘߊ ߟߎ߬ ߟߊߘߊ߲ ߞߎ߲߬ߕߐ߰ ߞߏ ߡߊ߬ߘߎ߮ ߘߐ߫.
- ߟߞߊ߬ߙߊ߲߬ߠߌ߲ ߢߍߥߟߊ ߟߎ߬
- ߞߊ߬ ߕߌߙߌ߲ߠߌ߲ ߠߎ߬ ߘߐߘߎ߲߬ߧߊ߬ ߞߊ߲ ߞߊ߲߬߸ ߞߵߏ߬ ߟߎ߬ ߟߊߖߍ߲ߛߍ߲߫߸ ߞߊ߬ ߞߊ߲ ߠߊ߫ ߢߎߡߍߙߋ߲ߧߊߟߌ ߝߊ߲߬ߞߊߘߏ߲߬.
ߏ߬ ߘߐ߫߸ ߢߍߥߟߊ߫ ߖߐ߲ߖߐ߲ ߠߋ߬ ߘߎ߲ߓߎߓߊ ߟߎ߬ ߓߟߏ߫߸ ߞߊ߬ ߞߏ ߟߎ߬ ߞߍ߫ ߞߊ߬ ߓߍ߲߬ ߡߌ߬ߙߌ߲߬ߘߌ ߟߊ߫ ߞߎߣߎ߲ ߣߌ߫ ߞߊ߲ ߠߊ߫ ߜߛߋߓߦߊ ߣߴߊ߬ ߟߊ߫ ߥߙߎߞߌ ߞߊߓߋ ߡߊ߬.
ߏ߬ ߘߐ߫߸ ߘߎ߲ߓߎ ߕߴߛߋ߫ ߡߌ߬ߙߌ߲߬ߘߌ߬ ߖߡߊ ߟߊ߫ ߞߊ߲ ߞߍ߫ ߟߴߊ߬ ߘߎ߲߬ߘߎ߬ߡߊ ߘߌ߫، ߊ߬ ߕߴߛߋ߫ ߡߙߌߘߐߕߊ߬ ߟߊ߫ ߞߊ߲ ߏ߬ ߘߐ߫ ߡߌ߬ߙߌ߲߬ߘߌ ߝߊ߲߬ ߞߋߟߋ߲ ߞߊ߲ߞߕߐߡߊ߬، ߖߡߊ߬ߣߊ ߕߐ߭ ߟߎ߬ ߞߊ߲ߟߐ߲ߠߊ ߟߎ߬ ߣߴߊ߬ ߞߟߊ߬ߡߊ߬ߓߊ߮ ߟߎ߬ ߕߴߛߋ߫ ߣߍ߰ߓߐ߬ ߟߴߊ߬ ߘߐ߫، ߛߓߍߟߌ ߞߎ߬ߙߎ߲߬ߘߎ߬ ߛߌ߫ ߕߴߛߋ߫ ߡߊߝߊ߬ߟߋ߲߬ ߠߊ߫ ߛߐ߬ߛߐ߬ߟߌ ߞߊ߲߬߸ ߞߵߊ߬ ߝߐ߫ ߞߏ߫ ߕߐ߭ ߟߎ߬ ߘߌ߫ ߞߍ߫ ߊ߬ߟߎ߬ ߘߐ߫، ߘߍ߬ߞߙߎ߬ ߜߊ߲ߛߊ߲ ߠߎ߬ ߣߌ߫ ߘߎ߲ߓߎ ߕߍ߫ ߞߋߟߋ߲߫ ߘߌ߫، ߓߊߏ߬߸ ߘߎ߲ߓߎ ߦߋ߫ ߟߐ߲ߞߏ߫ ߕߐ߲ ߠߋ߬ ߘߌ߫.
ߏ߬ ߘߐ߫߸ ߒߞߏ ߘߎ߲ߓߎ ߓߊ߯ ߓߌ߬ߟߊ߫ ߖߊ߭ ߟߊ߫ ߣߌ߲߬ ߢߊ߸ ߊߟߎ߫ ߦߴߊ߬ ߦߋ߫ ߟߊ߫ ߘߌ߬ ߏ߬ ߘߐ߫؟ ߓߊߏ߬߸ ߘߎ߲ߓߎ ߛߌ߲ߘߌ ߓߘߊ߫ ߛߊ߲߭ ߂߀ ߘߝߊ߫߸ ߏ߬ ߢߊ߰ߢߊ߮ ߟߋ߬ ߞߊ߫ ߞߊ߲߫ ߕߋ߲߬ ߞߊ߬ ߞߍ߫߸ ߊߟߎ߫ ߦߋ߫ ߡߎ߲߬ ߦߋ߫ ߟߴߏ߬ ߘߐ߫߸ ߣߌ߫ ߞߊ߬ ߛߐ߬ߘߐ߲߬ ߞߏ߫ ߘߎ߲ߓߎ߫ ߟߋ߬߸ ߖߊ߬ߡߊ ߓߍ߲߬ߡߊ߬ ߘߎ߲ߓߎ.
ߓߊߏ߬߸ ߞߎߡߊ߫ ߞߋߟߋ߲߫ ߞߊ߬ ߒ ߓߊ߬ߟߌ߬ ߘߎ߲ߓߎ߫ ߞߏ ߣߌ߲߬ ߘߐ߫߸ ߊ߬ ߝߐ߫ ߘߊ߫ ߘߊ߬ߟߎ߬ ߞߍ߲ߘߍ ߝߙߍߕߍ߫ ߂߲ ߘߐ߫ ߊ߬ߟߎ߬ ߓߟߏ߫߸ ߞߏ߫ ߊ߬ߟߎ߬ ߕߍ߫ ߒߞߏ ߘߎ߲ߓߎ߫ ߞߏ ߝߊ߰ߡߎ߲߬ߓߊߟߌ ߛߌ߫ ߖߋ߬ߓߌ߬ ߟߊ߫ ߖߎ߯ߡߊ߲߫ ߠߊ߫߸ ߓߊߏ߬߸ ߞߏ߫ ߞߏ߫ ߞߎߘߊ ߓߍ߯ ߦߋ߫ ߕߋ߲߬ ߠߋ߬، ߊ߬ߝߐ߫ ߟߐ߲ߞߏ ߛߌ߲ߘߟߌ ߞߏ߫ ߞߎߘߊ ߣߌ߫ ߞߊ߲ ߛߌ߲߬ߝߏ߲߬ߧߊ ߞߏ߫ ߞߎߘߊ ߦߋ߫ ߞߋߟߋ߲߫ ߘߌ߫ ߓߊ߬؟
ߊ߬ ߦߋ߫ ߘߊ߬ߟߎ߬ ߞߍ߲ߘߍ ߝߐ߰ߓߍ ߝߙߍߕߍ߫ ߂߲ ߘߐ߫߸ ߞߏ߫: <<ߒߞߏ ߘߍ߬ߞߙߎ߬ ߞߋߟߋ߲ ߕߴߛߋ߫ ߞߍ߫ ߟߊ߫ ߘߎ߲ߓߎ ߘߌ߫ ߢߊ ߛߎ߯ ߺ ߎ ߺ ߛߎ߯ ߡߊ߬، ߓߊߏ߬߸ ߒߞߏ ߓߘߊ߫ ߛߋ߲߬ߕߊ ߡߍ߲ ߞߍ߫ ߞߌߢߍ߲߫ ߓߊ߲߬ߞߎ ߣߌ߲߬ ߞߊ߲߬ ߓߌ߬߸ ߡߐ߰ ߜߍ߲ߛߍ߲ߞߍߙߍ߲ ߡߊ߲߫ ߞߊ߲߫ ߞߊ߬ ߦߟߍ߬ߡߊ߲ ߘߏ߲߬ ߏ߬ ߞߎ߲߬ߙߎ߲߬ߘߎ߬ ߛߌ߫ ߘߐ߫߸ ߞߵߊ߬ ߕߘߍ߬ ߖߊ߬ߡߊ ߡߊ߫ ߓߍ߲߬ ߊ߬ ߡߊ߬. ߒߞߏ ߘߍߞߙߎ߫ ߞߋߟߋ߲ ߘߏ߲߬ ߦߋ߫ ߜߍ߲ߛߍ߲ߞߍߙߍ߲ ߠߋ߬ ߘߌ߫.>> ߏ߬ ߞߵߊ߬ ߦߌ߬ߘߊ߬ ߓߍ߯ ߟߊ߫߸ ߞߏ߫ ߘߍ߬ߞߙߎ߬ ߞߋߟߋ߲ ߕߴߛߋ߫ ߞߍ߫ ߟߊ߫ ߘߎ߲ߓߎ ߘߌ߫ ߢߊ߫ ߛߌ߫ ߡߊ߬.
ߊ߬ ߦߌ߬ߘߊ߬ ߘߊ߫ ߘߊ߬ߟߎ߬ ߞߍ߲ߘߍ ߝߙߍߕߍ߫ ߂߲ ߏ߬ ߟߋ ߞߣߐ߫ ߊ߬ߟߋ߬ ߞߎߡߦߊߛߋ߲߫ ߞߋߟߋ߲ ߘߐ߫ ߌߞߐ߫߸ ߞߏ߫: <<ߘߍ߬ߞߙߎ ߝߋ߲ ߺ ߋ ߺ ߝߋ߲߫ ߦߋ߫ ߞߌߢߍ߲߫ ߞߣߐ߫ ߓߌ߬߸ ߒߞߏ ߟߊߥߙߎߞߌ߫ ߞߊ߲ߡߊ߬߸ ߏ߬ ߓߍ߯ ߟߋ߬ ߣߵߊ߬ߟߎ߬ ߓߟߏ ߘߏ߲߬ ߠߊ߫ ߢߐ߲߮ ߓߟߏ߫ ߞߊ߬ ߘߎ߲ߓߎ ߛߏ߯ߙߏ߫ ߊ߬ߟߎ߫ ߛߌ߲߬ߝߏ߲ ߠߎ߬ ߟߊ߫.>> ߊ߲ ߞߵߊ߬ ߢߊߦߋ߫ ߘߌ߲߬ߞߌߙߊ ߏ߬ ߘߐ߫߸ ߞߏ߫ ߞߎߡߊ ߝߐߣߍ߲߫ ߟߊ߬ߞߊߟߌ ߘߝߊߣߍ߲ ߠߋ߬ ߘߐ߫، ߞߊ߬ߕߎ߲߯߸ ߊ߬ ߝߐ ߞߏ ߘߍ߬ߞߙߎ ߝߋ߲ ߺ ߋ ߺ ߝߋ߲߫ ߦߋ߫ ߞߌߢߍ߲߫ ߞߣߐ߫߸ ߞߵߊ߬ ߛߐ߬ߘߐ߲߬ ߞߌߢߍ߲߫ ߘߌ߲߬ߞߌ߬ߙߊ߬ ߞߋߟߋ߲߫ ߡߊ߫ ߟߊߕߍ߰߸ ߘߍ߬ߞߙߎ߬ ߡߊ߫ ߡߊߘߊ߲߫߸ ߏ߬ ߕߊ߬ߡߌ߲߬ ߘߴߊ߬ ߞߏߢߊ ߘߐߝߌ߲߬ ߠߊ߫ ߟߋ߬ ߡߌߡߐ߫.
ߏ߬ ߘߐ߫߸ ߦߊ߬ߣߴߊ߲ ߧߋ߫ ߞߎߡߊ߫ ߒߞߏ ߘߎ߲ߓߎ ߞߊ߲߬߸ ߊ߲ ߧߋ߫ ߛߊ߲߬ ߂߀߲ ߝߌ߬ߘߊ ߟߋ߬ ߡߊߞߐ߬ߣߐ߲߬ ߠߊ߫ ߡߎߣߎ߲߬߸ ߞߊ߬ ߘߎ߲ߓߎ ߟߊ߫ ߞߍߣߍ߲ ߠߎ߬ ߦߋ߫߸ ߞߵߊ߬ ߛߌ߲߬ߝߏ߲߬ߧߊ߬ ߢߊ ߦߋ߫، ߓߊߏ߬߸ ߊ߲ ߠߊ߫ ߕߌߙߌ߲ߠߌ߲ ߠߎ߬ ߞߵߊ߬ ߦߌ߬ߘߴߊ߲ ߠߊ߫߸ ߞߏ߫ ߘߎ߲ߓߎ ߛߓߍߘߊ߫ ߞߎߘߊ ߢߌ߲߬ ߣߐ߬ ߞߊ߬ߝߏ߬ ߖߊߛߏ߲ ߠߋ߬ ߞߍ߫ ߟߊ߫، ߘߊ߬ߟߎ߬ ߘߊ߲ߘߐ߫ ߞߏߛߐ߲߬:
ߡߎ߲߬ ߣߐ߬ ߞߊ߲ߕߌ߯ ߡߝߊߟߋ߲ ߓߌ߬ߟߊ߬ ߟߴߊ߬ ߘߐ߫ ߕߟߋ߬ߞߎ߬ߣߊ߬ߜߍ ߣߌ߲߬ ߘߐ߫߸ ߞߵߊ߬ ߛߐ߬ߘߐ߲߬ ߞߊ߲ߕߌ߮ ߓߘߊ߫ ߛߊ߲߭ ߂߀ ߞߍ߫߸ ߊߟߎ߫ ߡߴߊ߬ ߟߊ߫ ߛߕߊ ߓߊ߲߫ ߞߏ߫ ߝߐ߫؟
ߡߎ߲߬ ߞߏߛߐ߲߬߸ ߡߐ߰ ߦߋ߫ ߞߍ߫ ߟߊ߫ ߘߎ߲ߓߎ ߞߊ߲ߕߌ߮ ߘߌ߫߸ ߡߍ߲ ߠߊ߫ ߒߞߏ ߟߐ߲ ߞߎ߬ߙߎ߲߬ߘߎ ߜߍߣߍ߲߫ ߕߍ߫؟
ߒߞߏ ߘߎ߲ߓߎ ߛߓߍߘߊ ߛߋߕߐ߫ ߡߊߝߊ߬ߟߋ߲߬ ߠߊ߫ ߘߌ߬߸ ߒߞߏ ߞߟߊ߬ߡߊ߬ߓߊ߮ ߟߎ߬ ߕߴߊ߬ ߞߊ߬ߟߊߡߊ߬؟
ߊ߬ߟߎ߬ ߟߊ߫ ߘߍ߬ߞߙߎ ߡߍ߲ ߣߌ߲߬߸ ߞߏ߫ ߒߞߏ ߘߎ߲ߓߎ߸ ߊ߲ ߞߵߊ߬ ߟߐ߲߫ ߞߘߐ߬ߡߊ߲߬ ߞߏ߫ ߊ߬ ߞߐߦߌߘߊ ߦߋ߫ ߞߙߎ߬ߛߊ߬߸ ߞߊ߲ߞߊ߲߫߸ ߛߌ߯ߙߌ߲߫߸ ߡߊ߲߬ߖߊ߲߬ߠߊ߫߸ ߞߊߦߌߙߊߥߊ߯ߣߍ߲߫، ߓߊ߬ߙߌ߬߸ ߞߐߦߌߘߊ ߏ߬ ߟߎ߬ ߛߌ߫ ߡߊ߫ ߟߊߟߐ߲ߠߌ߲߫ ߛߓߍߘߊ߫ ߡߝߊߟߋ߲ ߠߊ߫، ߘߏ߫ ߟߎ߫ ߟߊߟߐ߲ߠߌ߲߫ ߘߴߊ߬ ߡߊߝߊ߬ߟߋ߲ ߞߐ ߟߋ߬ ߘߐ߫߸ ߘߏ߫ ߟߎ߫ ߖߍ߬ߘߍ ߡߊ߫ ߟߊߟߐ߲ߠߌ߲߫߸ ߝߏ߫ ߊ߬ߟߎ߫ ߞߵߊ߬ ߦߋ߫ ߓߟߐߟߐ ߟߋ߬ ߞߊ߲߬، ߏ߬ ߞߎ߲߭ ߦߋ߫ ߡߎ߲߬ ߘߌ߫؟
ߘߎ߲ߓߎ߫ ߜߙߊ߫ ߖߋ߬ߟߌ߫ ߟߋ߬ ߓߘߊ߫ ߞߍ߫ ߘߎ߲ߓߎ ߟߊ߫ ߛߊ߲߭ ߂߀ ߣߌ߲߬ ߞߣߐ߫؟ ߘߎ߲ߓߎ߫ ߜߙߊ ߏ߬ ߟߎ߬ ߢߣߊߓߊ߯ߦߊ߫ ߘߊ߫ ߖߐ߲߫ ߠߎ߫ ߓߟߏ߫؟ ߛߌ߲߬ߝߏ߲߬ ߞߘߐ ߡߍ߲ ߠߎ߬ ߓߐߣߍ߲߫ ߊ߬ ߘߐ߫߸ ߡߎ߲߬ ߞߏߛߐ߲߬ ߏ߬ ߟߎ߬ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߕߍ߫ ߞߏߝߐ߫ ߟߊ߫؟ ߡߎ߲߬ ߠߊ߫ ߘߎ߲ߓߎ ߛߌ߲߬ߝߏ߲߬ ߞߘߐ ߟߎ߬ ߕߐ߮ ߡߊ߫ ߓߌ߬ߟߴߊ߬ߟߎ߬ ߟߊ߫ ߞߍߣߍ߲ ߠߎ߬ ߘߐ߫؟
ߏ߬ ߘߐ߫߸ ߊ߲ ߧߋ߫ ߘߎ߲ߓߎ ߟߊ߫ ߛߊ߲߭ ߂߀ ߝߌ߬ߘߊ ߞߎ߲߬ߘߏ߲ ߡߊߞߐ߬ߣߐ߲ ߞߊ߲߬߸ ߞߊ߬ߝߏ߬ ߖߊ߬ߛߏ߲߬ ߛߓߍߘߊ ߓߊ߯ ߘߊ߲߬ߕߍ߰ߟߌ ߡߍ߲ ߠߎ߬ ߞߍ߫ ߦߋ߲߬ ߛߊ߫߸ ߊ߲ ߘߴߏ߬ ߟߎ߫ ߞߊ߬ߙߊ߲߫ ߞߵߊ߬ ߢߊߦߋ߫߸ ߞߊ߬ ߓߊ߲߫ ߞߵߊ߲ ߡߙߌߦߊ ߘߌ߫، ߞߊ߬ߕߎ߲߯߸ ߊ߬ ߘߌ߫ ߟߐ߲߫ ߏ߬ ߘߐ߫߸ ߣߌ߫ ߘߎ߲ߓߎ ߦߋ߫ ߒߞߏ ߘߐ߫ ߥߟߴߊ߬ ߕߴߊ߬ ߘߐ߫، ߓߊߏ߬߸ ߒߞߏ ߡߊ߬ߞߏ ߓߘߊ߫ ߛߋ߫ ߘߎ߲ߓߎ ߡߊ߬.
ߞߎߡߊ߫ ߟߊߓߊ߲߫ ߘߐ߫߸ ߕߐ߮ ߕߍ߫ ߘߎ߲ߓߎ ߞߍ߫ ߟߊ߫ ߘߎ߲ߓߎ ߘߌ߫߸ ߌ ߦߋ߫ ߞߊ߲ ߡߍ߲ ߘߎ߲ߓߎ ߘߌ߫߸ ߏ߬ ߡߌ߬ߙߌ߲߬ߘߌ ߟߊ߫ ߟߊߒߠߦߊ ߞߊߓߋ߸ ߞߵߊ߬ ߟߐ߬ ߘߎ߲ߓߎ ߡߊ߬߸ ߏ߬ ߟߋ ߘߎ߲ߓߎ ߟߊ߫ ߘߎ߲ߓߎߦߊ ߕߏ߫ ߟߴߊ߬ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
Aucun commentaire pour le moment.