ߖߌ߬ߣߍ߫ ߘߏ߲߬ߛߏ ߟߎ߬ ߦߋ߫ ߝߐߢߐ߲߯ߞߐ ߟߋ߬ ߕߍߡߊ߬ ߕߋ߲߬߸ ߊ߬ߟߎ߫ ߜߊ߲߰ߛߊ߲ ߣߌ߫ ߢߐ߲߯ ߕߍ߫، ߞߊ߬ߕߎ߲߯߸ ߞߎ߲߬ߕߌ߰ ߞߎߘߊ ߟߋ߬ ߟߊߥߟߏߣߍ߲߫ ߞߊ߲ߞߊ߲߫ ߞߊ߬ ߛߓߍߘߊ߫ ߞߎߘߊ߫ ߟߊߛߌ߰߸ ߘߏ߫ ߟߎ߫ ߡߊ߫ ߓߍ߲߬ ߏ߬ ߟߋ ߡߊ߬.

ߒ߬ߓߊ߬߸ ߊ߲ ߣߌ߫ ߛߌ߲߬ߓߏ߲߫ ߡߊ߬ߡߊ߬ߘߌ߫ ߞߙߏ߬ߡߊ߬ ߟߊ߫ ߞߎߡߊߢߐ߲߯ߦߊ߫ ߘߐ߫߸ ߊ߬ߟߋ ߡߌ߲ ߦߋ߫ ߘߏ߲߬ߛߏ ߟߎ߬ ߟߊ߫ ߡߊ߬ߞߊ߲߬ߞߊ߲߬ߠߌ߲ ߛߌ߲߬ߝߏ߲ ߘߏ߫ ߘߌ߫߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߓߍ߲߭ ߠߋ߬ ߢߌߣߌ߲߫ ߠߊ߫ ߘߏ߲߬ߛߏ߬ߦߊ߬ ߞߣߐ߫߸ ߡߐ߰ ߜߘߍ ߡߍ߲ ߠߎ߬ ߓߘߴߊ߬ߟߎ߫ ߛߋ߲߭ߓߌ߬ߟߴߊ߬ ߘߐ߫߸ ߣߴߊ߬ߟߎ߬ ߦߴߊ߬ ߝߍ߬ ߞߊ߬ ߡߊ߲߬ߞߊ߲ ߠߊߘߏ߲߬ ߊ߬ߟߎ߬ ߣߌ߫ ߢߐ߲߯ ߕߍ߫߸ ߊ߬ ߞߵߏ߬ ߝߣߊ߫ ߞߎߡߊ ߝߐ߫.

ߊ߬ ߟߊ߫ ߢߊߝߐߟߌ߫ ߘߐ߫߸ ߡߙߌߘߐ ߕߊ߭ ߞߊ߬ ߞߎߟߎ߲ߝߊ߲߫ ߘߋ߲ߓߊ߫ ߞߡߊ߬ߙߊ߬ ߟߊߥߟߌ߬ ߞߵߊ߬ ߓߐ߫ ߞߊ߲ߕߌ߯ߦߊ ߟߊ߫߸ ߏ߬ ߞߍߣߍ߲߫ ߖߌ߬ߣߍ߫ ߡߙߊ߬ߘߓߊ߬ ߃߃ ߓߍ߯ ߟߋ߬ ߓߟߏ߫߸ ߏ߬ ߟߎ߬ ߡߍ߲ ߠߎ߬ ߓߍ߯ ߟߊߘߍ߬ߣߍ߲߫ ߕߘߍ߬ ߞߊ߲ߞߊ߲߫ ߟߊ߬ߘߍ ߘߏ߫ ߛߋ߲߭ߝߍ߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߡߙߊ߬ߘߓߊ߬ ߃߃ ߓߍ߯ ߟߋ߬ ߘߏ߲߬ߛߏ ߟߎ߬ ߓߍ߲߬ ߘߴߊ߬ ߡߊ߬߸ ߞߊ߬ ߡߎߛߊ߫ ߞߎ߬ߟߌߓߊ߬ߟߌ߬ ߛߎߥߊ߲ߘߌ߫߸ ߞߵߏ߬ ߞߍ߫ ߞߊ߲ߕߌ߯ ߞߎߘߊ ߘߌ߫߸ ߦߊ߬ߣߌ߫ ߞߎ߲߬ߕߌ߰ ߞߎߘߊ ߟߊߛߌ߰ߕߐ߫.

<<ߓߌ߬߸ ߊ߲ ߠߊ߫ ߟߊ߬ߢߌߣߌ߲ ߕߍ߫ ߘߏ߫ ߜߘߍ߫ ߘߌ߫߸ ߞߊ߬ ߘߏ߲߬ߛߏ ߓߍ߯ ߟߊߘߍ߬ ߞߵߊ߬ߟߎ߬ ߞߍ߫ ߞߋߟߋ߲߫ ߘߌ߫ [...] ߊ߲ ߓߍ߯ ߘߏ߲߬ ߦߋ߫ (ߡߎߛߊ߫ ߞߎ߬ߟߌߓߊ߬ߟߌ߬) ߞߐߝߍ߬ ߟߋ߬ ߜߡߊ߫.>> ߊ߬ ߞߵߏ߬ ߦߌ߬ߘߊ߬.

ߟߊ߬ߘߍ߫ ߘߏ߫ ߟߋ߬ ߞߍ߫ ߘߊ߫ ߞߊ߲ߞߊ߲߫ ߞߣߐ߫ ߕߙߊߓߊ ߕߋ߬ߟߋ߫ ߂߆ ߕߊ߬ߡߌ߲߬ߣߍ߲ ߡߊ߬߸ ߞߊ߬ ߓߍ߲߬ ߛߓߍߘߊ߫ ߞߘߐ ߟߊ߫ ߡߊ߬ߙߊ ߕߊ߬ߡߌ߲߬ ߢߊ ߘߐߢߌߡߌ߲ ߡߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߟߊ߬ߘߍ ߏ߬ ߞߵߊ߬ ߦߌ߬ߘߊ߬߸ ߞߏ߫ ߞߊ߲ߕߌ߯ ߞߘߐ ߣߴߊ߬ ߟߊ߫ ߛߓߍߘߊ ߡߍ߲ ߕߍ߬ߘߍ߫ ߦߋ߲߬߸ ߊ߬ ߦߋ߫ ߘߊ߫ ߞߏ߫ ߟߊߒߠߦߊ ߕߴߛߋ߫ ߟߊߞߎߘߦߊ߫ ߟߴߊ߬ߟߎ߬ ߘߐ߫ ߡߎ߬ߕߎ߲߬، ߏ߬ ߟߋ ߘߐ߫߸ ߛߊ߲߬ ߁߂ ߞߍ ߞߐߝߍ߬ ߊ߬ߟߎ߬ ߓߟߏ߫ ߘߏ߲߬ߛߏ߬ ߕߐ߲ ߞߎ߲߬ߠߊ߫߸ ߊ߬ ߣߴߊ߬ ߟߊ߫ ߛߓߍߘߊ ߓߍ߯ ߟߊߓߋ߬ ߘߊ߫ ߣߌ߲߬ ߟߏ߲، ߓߊߏ߬߸ ߡߐ߰ ߟߎ߫ ߛߐ߬ߘߐ߲߬ ߘߊ߫ ߞߣߍ ߞߊ߲߬ ߦߋ߲߬ ߛߓߍߘߊ ߛߌ߲߬ߝߏ߲߬ ߞߘߐ ߟߎ߬ ߘߐ߫߸ ߡߍ߲ ߠߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߕߍ߫ ߓߊ߯ߙߊ߫ ߟߊ߫ ߟߋ߬ ߝߋߎ߫.

ߛߌ߲߬ߓߏ߲߫ ߡߊ߬ߡߊ߬ߘߌ߫ ߞߙߏ߬ߡߊ߫ ߞߵߊ߬ ߦߌ߬ߘߊ߬ ߞߏ߫: <<ߡߙߊ߬ߘߓߊ߬ ߃߃ ߓߍ߯ ߘߏ߲߬ߛߏ ߟߎ߫ ߟߋ߬ ߓߍ߲߬ ߘߴߊ߬ ߡߊ߬ ߞߋߟߋ߲ߘߌ߫߸ ߞߏ߫ (ߞߎߟߎ߲ߝߊ߲߫ ߘߋ߲ߓߊ߫ ߣߴߊ߬ ߟߊ߫ ߖߊ߬ߡߊ) ߦߋ߫ ߥߊ߫.>> ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߞߎߡߊ ߏ߬ ߘߏ߲߬ ߡߊ߫ ߝߐ߫ ߞߎߟߎ߲ߝߊ߲߫ ߘߋ߲ߓߊ߫ ߞߐߝߍ߬߸ ߊ߬ ߞߍ߫ ߘߴߊ߬ ߣߴߊ߬ ߟߊ߫ ߡߐ߱ ߟߎ߬ ߢߣߊ߫ ߦߋ߲߬ ߖߐ߫.

ߛߓߍ߫ ߝߣߊ߫ ߦߴߊ߲ ߕߍ߯ ߞߘߐ߫߸ ߞߎߟߎ߲ߝߊ߲߫ ߘߋ߲ߓߊ߫ ߖߍ߬ߘߍ ߓߟߏߣߐ ߦߋ߫ ߡߍ߲ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߓߘߊ߫ ߛߐ߲߬ ߘߊ߲߬ߕߟߌ߬ ߞߋߕߊ߬ ߦߋ߫ ߓߌ߬ߟߴߊ߬ ߣߐ߭ ߘߐ߫ ߞߊ߲ߕߌ߯ߦߊ ߟߊ߫߸ ߘߏ߲߬ߛߏ ߟߎ߬ ߟߊ߫ ߘߍ߭ ߞߎ߲߬ߠߊ߫.

ߒ߬ߓߊ߬߸ ߛߌ߲߬ߓߏ߲߫ ߡߊ߬ߡߊ߬ߘߌ߫ ߞߙߏ߬ߡߊ߬ ߞߵߊ߬ ߦߌ߬ߘߴߊ߬ ߟߊ߫ ߛߙߊ߬ߣߎ߲ ߘߐ߫߸ ߞߏ߫ ߞߊ߲ߕߌ߯ ߞߘߐ߸ ߞߎߟߎ߲ߝߊ߲߫ ߘߋ߲ߓߊ ߛߋ ߡߍ߲ ߞߍ߫ ߘߊ߫ ߞߐߣߊߞߙߌ߫߸ ߘߐ߲߭ ߦߟߍ߬ߡߊ߲߬ ߘߊ߫ ߢߊߡߊ߲ ߞߘߐ߫ ߦߋ߲߬ ߠߋ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊߥߌ߬ߟߌ ߞߊ߲ߕߌ߯ߦߊ ߟߊ߫߸ ߊ߬ ߡߊ߫ ߓߍ߲߬ ߡߙߌߦߊ ߏ߬ ߡߊ߬.

ߡߊ߬ߡߊ߬ߘߌ߫ ߞߙߏ߬ߡߊ߬ ߞߊ߲߫ ߞߏ߫ ߣߴߌ ߘߏ߲߬ ߞߵߏ߬ ߞߍߣߍ߲ ߦߋ߫߸ ߞߊ߲ߕߌ߯ ߞߘߐ ߓߟߏߡߟߊߣߍ߲߫ ߞߏߕߌ߮ ߘߏ߫ ߟߎ߫ ߣߌ߫ ߖߡߊ߬ߣߊ ߟߐ߬ߘߎ߰ߕߌ߮ ߘߏ߫ ߟߎ߫ ߟߋ߬ ߟߊ߫ ߘߍ߬ߡߍ߲ ߡߊ߬߸ ߦߏ߫ ߘߎ߰ߞߣߍ ߡߊ߬ߡߙߊ߬ߟߌ ߣߌ߫ ߕߊ߲ߓߊ߲ߓߐߟߌ ߞߏߕߌ߮߸ ߌߓߙߊߤߌߡߊ߫ ߞߊߟߌߟ ߞߐ߲ߘߍ߫߸ ߊ߬ ߣߌ߫ ߡߊ߬ߞߟߐ߬ ߜߘߍ߫ ߝߣߊ߫ ߦߋ߫ ߞߏߕߌ߯ߝߟߐߘߊ ߟߊ߫، ߗߍ߭ ߞߵߊ߬ ߦߌ߬ߘߊ߬ ߞߏ߫ ߞߎߟߎ߲ߝߊ߲߫ ߘߋ߲ߓߊ߫ ߞߐ ߛߍ߲߬ߓߍ߬ߣߍ߲߫ ߏ߬ ߟߎ߫ ߟߋ߬ ߟߊ߫߸ ߞߵߊ߬ ߝߐߐ߫ ߡߎ߬ߕߎ߲߬ ߛߊ߫ ߞߏ߫ ߊ߬ ߡߊ߫ ߓߍ߲߬ ߊ߬ ߟߊߥߟߌ߬ ߞߏ ߡߊ߬، ߞߵߊ߬ ߛߐ߬ߘߐ߲߬߸ ߟߊ߬ߥߟߌ߬ߟߌ ߞߍ߫ ߘߊ߫ ߞߵߊ߬ ߖߍ߬ߘߍ ߢߊ ߡߊߞߊ߬ߣߍ߲ ߠߋ߬ ߕߏ߫ ߞߊ߲ߞߊ߲߫ ߟߊ߬ߘߍ߬ ߘߊߞߎ߲ ߘߐ߫ ߡߙߊ߬ߘߊ߬ߓߊ ߘߏ߲߬ߛߏ ߓߍ߯ ߢߣߊ߫ ߞߐߘߍ߫.

ߊ߬ ߞߵߊ߬ ߝߙߊ߬ ߞߎߡߊ ߞߊ߲߬ ߏ߬ ߟߋ ߘߐ߫ ߞߏ߫: <<ߊ߬ ߛߋ ߞߐ ߟߋ߬ ߘߐ߫ ߞߐߣߊߞߙߌ߫߸ ߊ߬ ߞߵߊ߬ ߝߐ߫ ߞߏ߫ ߊ߬ ߟߊߥߟߌ߬ ߞߏ߬ ߞߎߡߊ߸ ߊ߬ ߕߎ߲߬ ߡߊ߫ ߓߍ߲߬ ߏ߬ ߡߊ߬، ߓߊߏ߬߸ ߘߎ߰ߞߣߍ ߡߊ߬ߡߙߊ߬ߟߌ ߣߌ߫ ߕߊ߲ߓߊ߲ߓߐߟߌ ߞߏߕߌ߮ ߌߓߙߊߤߌߡߊ߫ ߞߊߟߌߟ ߞߐ߲ߘߍ߫ ߦߴߊ߬ ߞߐߝߍ߬.>>

ߛߌ߲߬ߓߏ߲߫ ߡߊ߬ߡߊ߬ߘߌ߫ ߞߙߎ߬ߡߊ߬ ߟߊ߫ ߞߎߡߊ ߢߌ߲߬ ߠߎ߬ ߡߊ߫ ߛߍ߲ߛߍ߲߫ ߒ߬ߠߎ߫ ߖߍ߬ߘߍ ߓߟߏ߫ ߡߎߣߎ߲߬ ߞߵߊ߬ ߕߎ߬ߢߊ߬ߦߊ ߟߐ߲߫ ߛߊ߫߸ ߏ߬ ߞߏ߬ߣߌ߲ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߣߊ߬ ߞߎߡߊ߫ ߛߌߦߊߡߊ߲ ߘߌ߫ ߘߏ߲߬ߛߏ ߟߎ߬ ߟߊ߫ ߘߍ߭ ߣߌ߲߬ ߞߣߐ߫ ߕߋ߲߬.

ߓߊߏ߬߸ ߛߌ߲߬ߓߏ߲߫ ߡߊ߬ߡߊ߬ߘߌ߬ ߟߊ߫ ߞߎߡߊ߫ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߞߏߕߌ߮ ߕߐ߮ ߓߌ߬ߟߊ ߞߏߢߊ ߣߌ߲߬ ߘߐ߫߸ ߏ߬ ߦߋ߫ ߡߐ߱ ߟߎ߬ ߘߍ߭ ߞߛߊ߫ ߞߏ ߟߋ߬ ߘߌ߫߸ ߡߍ߲ ߕߴߌ ߢߍߛߌߟߊ߫ ߘߐ߫، ߓߊߏ߬߸ ߞߏ߫ ߘߏ߲߬ߛߏ ߟߎ߬ ߟߊ߫ ߞߏ ߕߍ߫ ߡߐ߰ ߜߘߍ߫ ߓߟߏ߫߸ ߊ߬ ߦߋ߫ ߘߏ߲߬ߛߏ߬ߦߊ߫ ߖߍ߬ߘߍ ߟߋ߬ ߓߟߏ߫، ߏ߬ ߘߐ߫ߞ߸ ߓߍ߯ ߦߴߊ߬ ߖߘߍ߬ ߘߐߡߌ߬ߣߴߊ߬ ߞߏ ߟߎ߬ ߡߊ߬ ߖߊ߱ߣߌ߲߬.

<<ߞߏߕߌ߮ ߡߍ߲ ߠߎ߬ ߦߴߊ߬ߟߎ߬ ߟߊ߫ ߡߐ߱ ߟߎ߬ ߡߊߘߍ߬ߡߍ߲ ߞߊ߲߬߸ ߏ߬ ߟߎ߬ ߞߊ߫ ߞߊ߲߫ ߞߵߏ߬ ߟߊߟߐ߬ ߡߎ߬ߕߎ߲߬، ߞߊ߬ ߛߋ߫ ߘߏ߲߬ߛߏ ߟߎ߬ ߓߟߏ ߟߊ߫ ߟߊ߫ ߢߐ߲߮ ߞߊ߲߬، ߊ߲ ߠߊ߫ ߝߊ߲ߓߊ ߦߋ߫ ߞߊ߲ߞߊ߲߫ ߠߋ߬، ߊ߲ߠߎ߬ ߓߘߊ ߦߋ߲߬߸ ߓߊߘߋ߲ߧߊ߫ ߞߏ߫ ߞߎߡߊ߫ ߕߴߦߋ߲߬، ߘߏ߲߬ߛߏ߬ߦߊ ߛߌ߰ߣߍ߲߫ ߛߊ߬ߙߌ߬ߦߊ ߘߏ߫ ߟߎ߫ ߟߋ߬ ߞߊ߲߬߸ ߏ߬ ߟߋ ߓߋ߲ߓߊ ߟߎ߬ ߟߊ߫ ߛߌߟߊ߸ ߊ߬ ߣߌ߫ ߘߍ߬ߞߙߎ ߟߊߕߊ߯ߡߊ ߛߊ߬ߙߌ߬ߦߊ߬ ߜߘߍ߫ ߟߎ߫߸ ߡߍ߲ ߦߋ߫ ߟߊߞߎߘߦߊ߫ ߟߊ߫ ߛߊ߲߬ ߟߏ߯ߟߎ ߓߍ߯ ߡߊ߬ ߛߐ߲߬، ߊ߲ ߧߋ߫ ߓߊ߯ߙߊ߫ ߟߊ߫ ߡߊ߲߬ߘߋ߲߬ ߡߏߙߌ߫ ߟߊ߫ ߛߌߟߊ ߟߋ߬ ߡߊ߬، ߛߊ߲߬ ߟߏ߯ߟߎ߫ ߓߊ߯ ߕߊ߬ߡߌ߲߬ ߞߏߕߊ߲߫߸ ߊ߲ ߘߴߊ߲ ߠߊ߫ ߛߓߍߘߊ ߟߊߞߎߘߦߊ߫، ߣߴߌ ߞߊ߬ ߡߊ߬ߙߊ ߞߍ߫ ߊ߬ ߢߌ߬ߡߊ ߟߊ߫߸ ߌ ߘߌ߫ ߕߏ߫ ߊ߬ ߟߊ߫، ߓߊ߬ߙߌ߬ ߣߴߌ ߞߵߊ߬ ߞߍ߫ ߞߏ߫ ߟߎ߫ ߞߍ ߘߌ߫ ߡߍ߲ ߕߍ߫ ߓߍ߲߬ ߊ߲ ߠߊ߫ ߛߊ߬ߙߌ߬ߦߊ ߡߊ߬߸ ߌ ߘߌ߫ ߣߐ߬ߘߐߓߌ߬ߟߊ߬.>> ߊ߬ ߞߵߏ߬ ߦߌ߬ߘߊ߬ ߞߎߡߊ ߘߐ߫.

ߡߍ߲ ߟߐ߬ߣߍ߲߫ ߞߎߟߎ߲ߝߊ߲߫ ߘߋ߲ߓߊ߫ ߟߊߥߟߌ߬ ߞߏ߬ ߞߎߡߊ ߡߊ߬߸ ߛߌ߲߬ߓߏ߲߫ ߡߊ߬ߡߊ߬ߘߌ߬ ߡߴߏ߬ ߣߌ߫ ߕߡߊ߬ߖߌ߬ ߟߊߘߍ߬، ߊ߬ ߞߵߊ߬ ߦߌ߬ߘߊ߬ ߞߏ߫:

<<ߞߎߟߎ߲ߝߊ߲߫ ߘߋ߲ߓߊ߫ ߞߊ߬ ߘߏ߲߬ߛߏ ߟߎ߫ ߖߊ߲߬ߝߊ߫ ߟߋ߬، ߕߙߊߓߊ ߕߋ߬ߟߋ߫ ߂߆ ߕߊ߬ߡߌ߲߬ߣߍ߲ ߡߊ߬߸ ߊ߲ ߓߍ߯ ߥߊ߫ ߘߊ߫ ߞߊ߲ߞߊ߲߫߸ ߞߵߊ߬ ߝߐ߫ ߊ߬ ߦߋ߫ ߞߏ߫ ߊ߬ ߦߋ߫ ߢߊߝߐߟߌ߫ ߞߍ߫ ߊ߲ ߧߋ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߖߊ߬ߕߋ߬ߓߐ߬ ߕߴߊ߬ߟߋ߬ ߣߌ߫ ߡߐ߰ ߛߌ߫ ߕߍ߫، ߘߏ߲߬ߛߏ ߟߎ߬ ߝߣߊ߫ ߞߵߊ߬ ߦߌ߬ߘߴߊ߬ ߟߊ߫ ߞߏ߫ ߊ߬ ߡߊ߫ ߝߏߦߌ߬ ߞߍ߫ ߢߌ߬ߡߊ߬ ߘߐ߫߸ ߊ߬ ߟߊ߫ ߞߊ߲ߕߌ߯ߦߊ ߛߊ߲߬ ߁߂ ߞߘߐ߫߸ ߊ߬ ߘߌ߫ ߛߋ߫ ߕߏ߫ ߟߊ߫ ߦߋ߲߬ ߡߍ߲ ߞߏߛߐ߲߬، ߏ߬ ߟߋ ߘߐ߫߸ ߊ߲ ߞߊ߬ ߡߐ߰ ߜߘߍ߫ ߓߌ߬ߟߴߊ߬ ߟߐ߬ߘߎ߮ ߘߐ߫، ߊ߲ ߘߏ߲߬ ߓߍ߲߬ ߘߊ߫ ߡߍ߲ ߡߊ߬ ߏ߬ ߟߋ ߡߎߛߊ߫ ߞߎ߬ߟߌߓߊ߬ߟߌ߬ ߘߌ߫߸ ߞߵߏ߬ ߞߍ߫ ߞߊ߲ߕߌ߮ ߘߌ߫.>> ߊ߬ ߞߴߏ߬ ߦߌ߬ߘߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߡߐ߰ ߜߘߍ߫ ߟߊߛߌ߱ ߏ߬ ߡߊ߫ ߞߍ߫ ߞߎߟߎ߲ߝߊ߲߫ ߘߋ߲ߓߊ߫ ߞߐߝߍ߬ ߘߋ߬߸ ߊ߬ ߢߊ ߕߘߍ߬ ߜߍ ߘߐ߫ ߦߋ߲߬ ߝߛߊߦߌ߫.

ߞߊ߬ ߓߍ߲߬ ߏ߬ ߟߋ ߞߏߢߊ ߡߊ߬ ߛߊ߫߸ ߛߌ߲߬ߓߏ߲߫ ߡߊ߬ߡߊ߬ߘߌ߫ ߞߙߏ߬ߡߊ߫ ߞߵߊ߬ ߦߌ߬ߘߊ߬ ߞߏ߫ ߘߏ߲߬ߛߏ ߟߎ߬ ߕߴߊ߬ߟߎ߬ ߡߊߖߌ߰ ߟߊ߫ ߡߐ߰ ߜߘߍ߫ ߛߌ߫ ߞߘߐ߫ ߊ߬ߟߎ߫ ߜߊ߲߰ߛߊ߲ ߣߌ߫ ߢߐ߲߯ ߕߍ߫ ߞߏ ߟߎ߬ ߘߐ߫، ߏ߬ ߘߐ߫߸ ߊ߬ߟߎ߬ ߟߊ߫ ߞߎ߲߬ߕߌ߰ߦߊ ߞߏ ߦߴߊ߬ߟߎ߫ ߜߊ߲߰ߛߊ߲ ߠߋ߬ ߣߌ߫ ߢߐ߲߯ ߕߍ߫߸ ߦߏ߫ ߓߏ߲߫ ߞߣߐ߫ ߞߎߡߊ.

<<ߘߏ߲߬ߛߏ ߟߎ߫ ߖߍ߬ߘߍ ߟߵߊ߬ߟߎ߬ ߟߊ߫ ߞߊ߲ߕߌ߮ ߟߊߛߌ߰ ߟߊ߫߸  ߞߏߕߌ߯ ߕߴߏ߬ ߞߍ߫ ߟߊ߫߸ ߗߋߕߌ߯ ߕߴߏ߬ ߞߍ߫ ߟߊ߫.>> ߊ߬ ߞߵߏ߬ ߟߊߕߍ߰.

ߊ߬ ߞߵߊ߬ ߦߌ߬ߘߊ߬ ߞߏ߫ ߡߐ߰ ߜߘߍ߫ ߛߌ߫ ߕߴߛߋ߫ ߡߐ߰ ߟߊߛߌ߰ ߟߴߊ߬ߟߎ߫ ߞߎ߲߬ߠߊ߫ ߝߊ߲߬ߞߊ ߟߊ߫ ߥߟߊ߫ ߘߌߦߊߜߏߦߊ ߟߊ߫.

<<ߊߟߎ߫ ߕߴߛߋ߫ ߛߓߍ ߘߐߓߍ߲߬ ߠߊ߫ ߞߊ߬ ߓߐ߫ ߞߏߕߌ߯ߘߊ ߟߊ߫߸ ߞߵߏ߬ ߘߌ߫ ߡߐ߰ ߡߊ߬߸ ߞߵߏ߬ ߟߊߛߌ߰ ߘߏ߲߬ߛߏ ߟߎ߫ ߞߎ߲߬ߠߊ߬ ߘߌߦߊߜߏߦߊ ߟߊ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߕߴߊ߬ ߝߍ߬.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߣߴߌ ߘߏ߲߬ ߞߊ߬ ߝߐߢߐ߲߯ߞߐ ߣߌ߲߬ ߡߊߝߟߍ߫߸ ߊ߬ ߞߎ߲߭ ߞߊ߫ ߛߌߦߊ߫ ߓߊߟߋ߬، ߏ߬ ߘߏ߫ ߟߋ߬ ߞߎߟߎ߲ߝߊ߲߫ ߘߋ߲ߓߊ߫ ߓߊ߲߭ ߘߌ߫ ߖߊ߬ߕߋ߬ߓߐ߬ ߞߏ ߡߊ߬߸  ߛߊ߲߬ ߁߂ ߡߊ߬ߙߊ ߞߐߝߍ߬߸ ߞߵߊ߬ ߓߊ߲߬ ߖߊ߬ߕߋ߬ߓߐ߬ ߞߏ ߡߊ߬ ߝߊߦߌ߫، ߏ߬ ߞߍ߫ ߘߴߊ߬ ߟߊߥߟߌ߬ ߞߎ߲ ߘߏ߫ ߘߌ߫.

ߞߊ߬ߕߎ߲߯߸ ߡߊ߲߬ߘߋ߲߬ ߓߏߙߌ߫ ߕߊ߯ߛߌߟߊ ߡߊߓߏ߲߬ߧߊ ߦߋ߫ ߘߏ߫ ߟߋ߬ ߝߣߊ߫ ߘߌ߫.

ߊ߬ߟߎ߬ ߟߊ߫ ߘߍ߬ߞߙߎ ߛߌ߰ ߢߊ ߘߐ߫߸ ߛߓߍߘߊ ߦߋ߫ ߟߊߞߎߘߦߊ߫ ߟߋ߬ ߛߊ߲߬ ߟߏ߯ߟߎ ߓߍ߯ ߡߊ߬.

ߡߐ߰ ߞߎߘߊ ߡߍ߲ ߘߏ߲߬ ߠߊߛߌ߰ߣߍ߲߫ ߕߋ߲߬߸ ߏ߬ ߛߎߥߊ߲ߘߌߣߍ߲߫ ߖߌ߬ߣߍ߫ ߡߙߊ߬ߘߓߊ߬ ߃߃ ߓߍ߯ ߟߋ߬ ߓߟߏ߫ ߞߊ߲ߞߊ߲߫ ߞߣߐ߫ ߟߊ߬ߘߍ ߛߋ߲߭ߝߍ߬.

ߊ߬ ߦߌ߬ߘߊ߬ߣߍ߲߫ ߛߌ߲߬ߓߏ߲ ߠߊ߫ ߞߎߡߊ ߘߐ߫߸ ߞߏ߫ ߞߟߐ߬ߡߊ߲ ߠߋ߬ ߘߏ߲߬߬ߣߍ߲߫ ߣߏ߱ ߘߐ߫، ߓߊߏ߬߸ ߞߎ߲߬ߠߊ߬ߛߌ߰ ߓߏ߲ߘߊ ߘߏ߫ ߟߎ߫ ߦߋ߫ ߦߋ߲߬߸ ߡߍ߲ ߠߎ߬ ߦߋ߫ ߝߙߍ߬ ߜߘߍ߫ ߕߍ߱ ߞߊ߲߬߸ ߡߍ߲ ߕߍ߫ ߘߏ߲߬ߛߏ ߟߎ߫ ߘߌ߬ߢߍ߬ߡߊ߬ ߞߏ߫ ߘߌ߫.

ߘߏ߲߬ߛߏ ߟߎ߬ ߟߊ߫ ߞߎ߲߬ߕߌ߰ߦߊ߬ ߞߏ ߕߍ߫ ߞߎ߲߬ߠߊ߬ߛߌ߮ ߢߍߛߌߟߊ߫ ߘߐ߫، ߓߊ߬ߙߌ߬ ߣߴߌ ߞߊ߬ ߞߏߕߌ߯ߝߟߐߘߊ ߕߊ߬߸ ߝߊߕߎߡߊߕߊ߬ ߞߋߕߊ߬ ߓߘߴߊ߬ ߛߋ߲߭ ߓߌ߬ߟߊ߫ ߣߌ߲߬ ߞߏ ߘߐ߫߸ ߞߊ߬ ߘߏ߲߬ߛߏ ߟߎ߬ ߟߊ߫ ߞߏ ߛߌ߰ ߊ߬ ߞߎ߲߬ ߘߏ߬ߣߌ߲߬ ߘߌ߫ ߓߘߊߡߐ߯ ߟߊߝߛߊ ߣߌ߫ ߡߐ߰ ߡߊ߬ߞߊߘߊ߲ ߘߌ߫.

ߝߐߢߐ߲߯ߞߐ ߣߌ߲߬ ߞߏ߬ߣߌ߲ ߓߍ߯ ߣߴߊ߬ ߕߊ߫߸ ߛߌ߲߬ߓߏ߲߫ ߡߊ߬ߡߊ߬ߘߌ߫ ߞߙߏ߬ߡߊ߫ ߞߵߊ߬ ߦߌ߬ߘߊ߬ ߞߏ߫ ߘߏ߲߬ߛߏ ߟߎ߬ ߟߊ߫ ߓߊ߯ߙߊ ߕߍ߫ ߘߏ߫ ߜߘߍ߫ ߘߌ߫߸ ߞߊ߬ ߖߡߊ߬ߣߊ ߘߎ߰ߞߣߍ ߟߊߞߊ߲ߘߊ߫߸ ߞߊ߬ ߕߋ߰ߙߋ߬ߦߊ ߞߟߍ߬߸ ߞߵߊ߬ߟߎ߬ ߓߟߏ ߘߌ߫ ߖߡߊ߬ߣߊ ߣߊ߲߬ߕߌ߮ ߟߎ߫ ߡߊ߬. <<ߊ߲ ߟߐ߬ߣߍ߲߫ ߊ߲ ߠߊ߫ ߞߎ߲߬ߠߊ߬ߛߌ߮ ߞߐߝߍ߬ ߛߎ ߣߌ߫ ߕߋ߬ߟߋ߸ ߞߊ߬ ߖߡߊ߬ߣߊ ߡߊߘߍ߬ߡߍ߲߬.>> ߊ߬ ߞߵߏ߬ ߦߟߌߓߌߟߊߟߌ ߞߍ߫.

ߛߊ߫ ߝߙߋߞߋ ߢߌ߲߬ ߠߎ߬ ߘߌ߫ ߝߎߟߋ߲߫ ߢߊ ߡߍ߲ ߡߊ߬߸ ߊ߬ߟߎ߬ ߟߊ߫ ߟߊ߬ߘߍ߬ ߖߡߊ ߓߍ߲߬ ߘߴߊ߬ ߡߊ߬ ߝߘߏ߬ߓߊ߬ ߜߙߊ ߘߐ߫߸ ߞߊ߬ ߞߕߌߟߊߛߋߟߊ ߘߏ߫ ߟߐ߬ ߘߊߘߐߛߓߍ ߞߍ߫ ߟߊ߫߸ ߞߊ߬ ߟߊ߬ߓߋ߬ߟߌ߬ ߞߏߏ ߣߌ߫ ߢߣߊߕߊߟߌ߫ ߞߏ߫ ߞߎߡߊ ߟߊߘߌ߬ߢߍ߬.

ߊ߬ߟߎ߫ ߞߊ߬ ߗߋߛߓߌ ߘߏ߫ ߞߍ߫ ߞߵߊ߬ ߟߊߕߊ߯ ߞߏߕߌ߯ ߝߟߐ ߡߊ߬߸ ߖߐ߲߰ߛߴߊ߬ ߘߌ߫ ߞߎߡߊ߫ ߣߌ߲߬ ߞߏ ߘߐ߫ ߢߊ ߡߍ߲ ߡߊ߬߸ ߛߴߊ߬ ߞߏ ߞߊߣߊ߬ ߞߍ߫ ߡߊ߲߬ߞߊ߲ ߘߌ߫ ߢߊ ߡߍ߲ ߡߊ߬.

ߊ߬ߟߎ߫ ߞߵߊ߬ߟߎ߬ ߞߊ߲ߠߊߘߌ߫ ߖߡߊ߬ߣߊ ߞߊ߲ߕߌ߮ ߡߊ߬߸ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫߸ ߖߐ߲߰ߛߊ߫ ߘߏ߲߬ߛߏ߬ߦߊ߬ ߞߊߣߊ߬ ߡߊߣߐ߯ ߢߊ ߡߍ߲ ߡߊ߬߸ ߊ߬ ߣߌ߫ ߛߊ߫ ߓߍ߲߬ ߘߌ߫ ߖߌ߬ߣߍ߫ ߡߙߊ߬ߘߓߊ߬ ߃߃ ߓߍ߯ ߟߊ߫ ߓߍ߲߬ߡߊ߬ߞߊ߲ ߡߊ߬.

ߏ߬ ߘߐ߫߸ ߝߐߢߐ߲߯ߞߐ ߦߋ߫ ߘߏ߲߬ߛߏ ߟߎ߬ ߕߍ߫ ߞߊ߬ ߓߍ߲߬ ߊ߬ߟߎ߬ ߟߊ߫ ߞߎ߲߬ߕߌ߰ ߞߏ ߦߙߐ ߡߍ߲ ߡߊ߬߸ ߏ߬ ߟߋ ߢߊߝߐߣߍ߲߫ ߕߋ߲߬، ߊ߬ߟߎ߫ ߞߏ߬ߣߌ߲ ߓߘߴߊ߬ ߦߌ߬ߘߊ߬߸ ߞߏ߫ ߡߐ߰ ߛߌ߫ ߡߊ߲߫ ߞߊ߲߫ ߞߵߊ߬ ߛߋ߲߭ ߓߌ߬ߟߴߊ߬ߟߎ߫ ߜߊ߲߰ߛߊ߲ ߕߍߟߊ߫ ߞߏ ߘߐ߫߸ ߞߏ߫ ߣߌ߲߬ ߦߴߊ߬ߟߎ߬ ߟߊ߫ ߓߏ߲ߞߣߐ߫ ߞߎߡߊ ߟߋ߬ ߘߌ߫߸ ߊ߬ߟߎ߫ ߜߊ߲߰ߛߊ߲ ߠߋ߬ ߣߴߊ߬ ߢߊߓߐ ߦߊ߫ ߞߊ߲߫.