ߘߋ߲ߡߛߏ߫ ߛߊ߲߭ ߡߎ߬ߥߊ߲߬ ߣߌ߫ ߞߐ ߘߏ߫ ߟߋ߬ ߓߣߐ߬ߣߴߊ߬ ߣߌ ߘߐ߫߸ ߊ߬ ߕߐ߯ ߞߏ߫ ߡߞߊߛߌ߬ߦߊ߬ ߕߙߊߥߟߋ߫߸ ߊ߬ ߛߊ߬ߣߍ߲߫ ߘߊ߲ߘߊߟߌ߫ ߓߊ߯ߙߊ ߘߏ߫ ߟߋ߬ ߞߐߝߍ߬ ߓߎ߬ߙߋ߬ ߟߊߘߌ߬ߢߍ߬ߓߊߟߌ ߘߏ߫ ߟߊ߫ ߘߞߏ߫߸ ߛߌ߯ߙߌ߲߫ ߡߙߊ߬ߘߊ߬ߓߊ ߘߐ߫، ߟߌ߬ߤߟߊ߬ ߝߟߐ ߡߍ߲ ߠߎ߬ ߛߐ߬ߘߐ߲߬ ߘߊ߫ ߘߊ߲ߘߊߟߌߟߊ߫ ߞߏ߲߬ߓߏ߫ ߊߓߘߎߟߊߦߌ߫ ߓߊߛߌߙߎ߬ ߞߐ߲ߘߍ߫ ߓߟߏ߫߸ ߊ߬ߟߋ ߡߍ߲ ߦߋ߫ ߞߟߌ߫ ߟߊ߫ ߞߏ߫ ߊߓߋ߬ߛߋ߸ ߊ߬ ߞߵߊ߬ ߦߌ߬ߘߊ߬ ߞߏ߫ ߘߋ߲ߡߛߏ ߟߊ߫ ߛߊ߬ߦߊ ߛߓߊߓߎ ߞߍߣߍ߲߫ ߓߊߛߌ ߟߋ߬ ߘߌ߫߸ ߡߍ߲ ߘߏ߲߬ߣߴߊ߬ ߟߊ߫ ߘߊ߲ߘߊߟߌߟߊ ߘߏ߫ ߓߟߏ߫߸ ߓߊߛߌ ߏ߬ ߟߋ ߦߋ߫ ߣߏߝ߭ߊߟߑߖ߭ߍ߲ ߘߌ߫.

ߊߓߘߎߟߊߦߌ߫ ߓߊߛߌߙߎ߬ ߞߐ߲ߘߍ߫ ߣߌ߲߬ ߦߋ߫ ߘߊ߲ߘߊߟߌߟߊ߫ ߘߊ߯ߕߌ߮ ߟߋ߬ ߘߌ߫߸ ߛߌ߯ߙߌ߲߫ ߘߊ߲ߘߊߛߏ ߘߐ߬ߓߛߏ߬ߟߌ߬ ߘߊ߲ߘߊߟߌ ߞߏ߫ ߘߐߜߊ߬ߣߍ߲ ߠߎ߬ ߓߟߏߡߊߘߍߡߍ߲ߠߊ߸ ߊ߬ ߞߊ߲߫ ߞߏ߫ ߊ߬ߟߋ ߝߣߊ߫ ߟߊߟߐ߲ߠߌ߲߫ ߘߊ߫ ߣߌ߲߬ ߞߏ ߟߊ߫ ߛߌ߯ߙߌ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߟߋ߬ ߓߟߏ߫߸ ߘߏߡߣߌߞ ߟߎ߬ߥߊ߬.

ߊ߬ ߟߊ߫ ߢߊߝߐߟߌ߫ ߘߐ߫߸ ߘߋ߲ߡߛߏ ߣߌ߲߬ ߦߋ߫ ߛߌ߱ ߘߐ߫ ߕߐ߲߬ߛߏ߫ ߟߊ߬߸ ߊ߬ ߖߊ߲߬ߞߊ߬ߙߏ߬ߕߐ ߕߍ߬ߘߍ߫ ߦߋ߲߬ ߠߋ߬، ߊ߬ ߓߐ߫ ߘߊ߫ ߦߋ߲߬ ߠߋ߬ ߛߊ߫ ߞߵߊ߬ ߞߎ߲߬ߛߌ߲߫ ߘߞߏ߫ ߟߊ߫߸ ߊ߬ ߘߊ߲ߘߊ߫ ߞߊ߲ߡߊ߬߸ ߓߊߏ߬ ߊ߬ ߟߊ߫ ߘߊ߲ߘߊߟߌߟߊ ߦߋ߫ ߦߋ߲߬ ߠߋ߬، ߞߏ߲߬ߓߏ ߊߓߋ߬ߛߋ ߞߵߊ߬ ߦߌ߬ߘߊ߬ ߞߏ߫ ߘߋ߲ߡߛߏ ߥߊ߫ ߘߊ߫ ߘߊ߲ߘߊߛߏ ߡߍ߲ ߠߊ߫߸ ߕߐ߯ ߕߍ߫ ߦߋ߲߬ ߠߊ߫߸ ߛߓߍ߫ ߝߣߊ߫ ߕߴߊ߬ ߟߊ߫.

<<ߓߎ߬ߙߋ ߡߍ߲ ߦߋ߫ ߣߌ߲߬߸ ߕߐ߯ ߕߴߊ߬ ߟߊ߫ ߝߏߦߌ߬، ߓߊ߬ߙߌ߬ ߒ ߟߊߣߴߊ߬ ߟߊ߫߸ ߊ߬ ߘߋ߬ߙߌ߬ߣߍ߲߫ ߊ߬ ߘߊ߲ߘߊ߫ ߟߊ߫ ߦߋ߲߬ ߥߍ߸ ߏ߬ ߟߋ ߞߏߛߐ߲߬ ߡߏ߬ߛߏ ߥߊ߫ ߘߊ߫ ߘߞߏ߫ ߊ߬ ߘߊ߲ߘߊ߫ ߞߊ߲ߡߊ߬ ߦߋ߲߬.>> ߞߏ߲߬ߓߏ ߊߓߘߎߟߊߦߌ߫ ߓߊߛߌߙߎ߬ ߞߐ߲ߘߍ߫ ߟߋ߬ ߞߊ߲߫ ߕߋ߲߬.

ߒ߬ߓߊ߬߸ ߡߏ߬ߛߏ ߓߊ߲ ߓߊߛߌ߫ ߕߊ ߟߊ߫ ߘߞߏ߫߸ ߊ߬ ߞߵߊ߬ ߞߐߛߊ߬ߦߌ߲߫ ߕߐ߲߬ߛߏ߫، ߊ߬ ߛߋ ߊ߬ ߡߊߞߍ߫ ߦߌߟߊ ߘߐ߫߸ ߊ߬ ߝߊ߬ߘߌ ߞߙߌ߬ߞߙߊ߬ ߘߊ߫߸ ߏ߬ ߟߋ ߞߍ߫ ߘߴߊ߬ ߕߊ߬ ߢߊ ߘߌ߫ ߞߊ߬ ߥߴߊ߬ ߘߌ߫ ߕߏ߲߬ߛߏ߬ ߘߊ߲ߘߊߟߌ߫ ߕߊ߲ߓߊ߲ ߠߊ߫، ߘߊ߲ߘߊߟߌߟߊ ߞߊ߲߫ ߞߏ߫ ߊ߬ ߛߋ ߦߋ߲߬߸ ߦߋ߲߬ ߡߐ߮ ߟߎ߫ ߞߵߊ߬ߟߎ߬ ߞߊߘߊ߲߫ ߞߊ߬ ߞߍߕߊ߫ ߖߏߣߊ ߟߎ߬ ߞߍ߫߸ ߞߊ߬ ߖߋ߬ߟߌ߬ߛߎ߲߫ ߞߐ߰ߡߊ ߘߏ߲߬ ߊ߬ ߟߊ߫߸ ߊ߬ ߣߌ߫ ߓߊߛߌ߫ ߛߎ߯ ߜߘߍ߫߸ ߣߴߊ߬ ߦߋ߫ ߘߍߜ߭ߑߖ߭ߊ ߘߌ߫.

ߘߊ߲ߘߊߟߌߟߊ߫ ߊߓߋ߬ߛߋ ߞߵߊ߬ ߦߌ߬ߘߊ߬߸ ߞߏ߫: <<ߣߏߝ߭ߊߟߑߖ߭ߍ߲ ߡߍ߲ ߦߋ߫ ߕߋ߲߬߸ ߊ߬ ߦߋ߫ ߓߊߛߌ߫ ߟߋ߬ ߘߌ߫߸ ߡߍ߲ ߓߘߊ߫ ߓߐ߫ ߖߌ߬ߣߍ߫ ߖߡߊ߬ߣߊ ߓߊߛߌ߫ ߕߊ߬ߕߊ ߟߎ߬ ߘߐ߫ ߝߋߎ߫، ߞߵߏ߬ ߞߎ߲߭ ߞߍ߫ ߊ߬ ߞߐߝߟߌ߫ ߖߎ߮ ߟߎ߬ ߘߌ߫߸ ߖߌ߬ߣߍ߬ ߞߍ߲ߘߍߦߊ ߝߊ߰ߡߊ ߟߎ߫ ߞߵߊ߬ߟߋ ߛߋ߲߬ߓߐ߫ ߛߙߍߘߍ ߘߐ߫.>> ߊ߬ ߞߵߏ߬ ߦߌ߬ߘߊ߬.

ߘߊ߲ߘߊߟߌߟߊ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߥߟߏߒߘߐ ߢߌ߲߬ ߘߌ߫ ߞߍ߫ ߕߙߎ߬ ߘߌ߫ ߞߊ߬ ߖߎ߯ߡߊ߲ ߠߊߛߋ߫ ߝߊ߬ߘߌ ߡߊ߬߸ ߊ߬ ߦߋ߫ ߜߦߐߞߟߐ߫ ߜߍߡߊ߲ ߠߋ߬ ߡߊ߬ߞߏߛߊ߬ ߟߊ߫ ߌߞߘߐ߫، ߣߴߏ߬ ߘߏ߲߬ ߞߍ߫ ߘߊ߫߸ ߊ߬ ߕߌ߱ ߦߋ߫ ߡߊ߲߬ߕߙߐ ߡߍ߲ ߛߐ߬ߘߐ߲߬ ߠߊ߫߸ ߣߴߊ߬ ߡߊ߫ ߞߍ߫ ߡߐ߰ ߘߊߝߍ߬ ߡߍ߲ ߟߐ߲ߞߏ ߦߴߊ߬ ߘߐ߫߸ ߊ߬ ߘߴߊ߬ ߓߐ߬ߣߐ߫ ߊ߬ ߣߌ ߘߐ߫، ߊ߬ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫ ߞߏ߫:

<<ߡߏ߬ߛߏ ߟߊ߫ ߛߊ߬ߦߊ ߛߓߊߓߎ ߞߍߣߍ߲߫ ߏ߬ ߟߋ ߘߌ߫، ߓߊߛߌ ߡߍ߲ ߞߍߣߴߊ߬ ߟߊ߫ ߣߴߏ߬ ߦߋ߫ ߣߏߝ߭ߊߟߑߖ߭ߍ߲ ߘߌ߫...>> ߞߏ߲߬ߓߏ ߊߓߘߎߟߊߦߌ߫ ߓߊߛߌߙߎ߬ ߞߵߏ߬ ߦߌ߬ߘߊ߬.

ߊ߬ ߞߊ߲߫ ߞߏ߫ ߘߊ߲ߘߊߟߌߟߊ ߡߍ߲ ߕߍ߬ߘߍ߫ ߕߐ߲߬ߛߏ߫ ߘߊ߲ߘߊߟߌ߫ ߕߊ߲ߓߊ߲ ߠߊ߫ ߦߋ߲߬ ߛߊ߫߸ ߏ߬ ߟߎ߫ ߞߊ߬ ߞߟߍ߬ߡߐ߰ߘߊ ߟߊߟߐ߲ߠߌ߲߫߸ ߞߏ߫ ߡߏ߬ߛߏ ߘߏ߫ ߣߐ߬ ߓߊߛߌ ߕߊ߬ ߟߊ߫ ߘߞߏ߫߸ ߡߍ߲ ߞߐ ߞߍߣߍ߲߫ ߝߙߋߞߋ ߘߌ߫، ߕߋ߲߭ߕߋ߲߭ ߣߌ߲߬ ߘߐ߫߸ ߘߊ߲ߘߊߟߌߟߊ ߡߍ߲ ߞߊ߬ ߓߊߛߌ ߞߍ߫ ߡߏ߬ߛߏ ߟߊ߫ ߘߞߏ߫߸ ߏ߬ ߦߋ߫ ߞߟߍ߬ߡߐ߰ߘߊ ߕߊ߫ ߓߟߏ ߡߊ߬ ߕߋ߲߬، ߊ߬ ߛߊ߬ ߘߊ߫ ߡߍ߲ ߠߎ߬ ߟߊ߫ ߘߊ߲ߘߊߟߌ߫ ߕߊ߲ߓߊ߲ ߠߊ߫߸ ߏ߬ ߟߎ߬ ߝߣߊ߫ ߘߊߘߐߢߌ߬ߣߌ߲߬ߞߊ ߦߴߌߘߐ߫߸ ߞߵߊ߬ ߟߐ߲߫ ߡߍ߲ ߕߊ߬ߡߌ߲߬ߣߍ߲߬ ߜߋ߲ߜߋ߲߫߸ ߖߐ߲߰ߛߴߊ߬ ߢߊߘߐߜߍ ߘߌ߫ ߟߐ߲߫.

ߘߊ߲ߘߊߟߌߟߊ ߞߵߊ߬ ߦߌ߬ߘߴߊ߬ ߟߊ߫ ߛߙߊ߬ߣߎ߲ ߘߐ߫ ߝߣߊ߫߸ ߞߏ߫ ߛߌ߯ߙߌ߲߫ ߞߕߌߞߊ߲ߘߊ ߟߊ߫ ߓߊ߯ߙߊ߫ ߝߟߐ ߞߍ߫ ߘߊ߫ ߡߍ߲ ߘߌ߫ ߊ߬ ߣߊ߬ ߕߎߡߊ ߟߊ߫߸ ߏ߬ ߟߋ ߞߍ߫ ߘߊ߫ ߓߎ߬ߙߋ ߟߎ߬ ߣߌ߫ ߓߊߛߌߓߏ߲ ߠߎ߬ ߡߊߝߟߍ ߘߌ߫ ߡߎߣߎ߲߬߸ ߞߵߊ߬ ߟߐ߲߫߸ ߡߍ߲ ߠߎ߬ ߦߋ߫ ߛߊ߬ߙߌ߬ߦߊ߬ ߞߣߐ߫߸ ߊ߬ ߣߌ߫ ߡߍ߲ ߠߎ߬ ߕߍ߫ ߛߊ߬ߙߌ߬ߦߊ߬ ߞߣߐ߫، ߊ߬ ߞߏ߬ߣߌ߲߸ ߣߌ߲߬ ߞߏ ߛߍ߲߬ߛߍ߲ ߦߴߌߘߐ߫ ߕߋ߲߬߸ ߓߊߏ߬ ߊ߬ ߓߘߊ߫ ߛߋ߫ ߞߕߌߘߊ ߕߊ߫ ߓߟߏ ߡߊ߬.