ߝߊ߬ߙߊ߲߬ߛߌ߫ ߞߊ߬ߝߏ߬ ߞߎ߲߬ߕߌ߰ ߞߘߐ ߣߌߞߏߟߊ߫ ߛߊߙߑߞߏߖ߭ߌ߫ ߕߍ߬ߘߍ߫ ߔߊ߬ߙߌ߬ ߞߕߌ߫ ߡߛߊߦߌ߲ߘߊ ߟߊ߫ ߓߌ߬߸ ߊ߬ ߟߊ߫ ߞߕߌ ߞߊ߲ߡߊ߬ ߞߊ߬ ߓߍ߲߬ ߟߓߌߞߊ ߟߎ߬ ߟߊ߫ ߥߊߘߌ ߘߏ߫ ߘߏ߲߭ ߡߵߊ߬ ߟߊ߫ ߂߀߀߇ ߞߊ߲ߕߌ߯ߦߊ߫ ߢߌߣߌ߲ ߓߙߊߡߊߖߊ߲ߓߊ߲߫ ߞߏ ߘߐ߫، ߞߕߌ ߏ߬ ߡߍ߲ ߓߘߊ߫ ߕߐ߮ ߛߐ߬ߘߐ߲߬߸ ߊ߬ ߞߎߡߊ ߦߋ߫ ߓߍ߯ ߘߊ߫، ߏ߬ ߝߣߊ߫ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߊ߬ ߞߊ߬ ߓߘߍ߬ߓߘߍ߬ߟߌ ߞߍߢߊ߫ ߖߎ߮ ߡߍ߲ ߛߌ ߝߏ߬ߦߌ߫ ߝߘߊ߬ߝߌ߲߬ߠߊ߬ ߞߣߐ߫߸ ߏ߬ ߛߋߣߍ߲߫ ߕߍ߫ ߓߐ߫ ߟߊ߫ ߝߘߊ߬ߝߌ߲ ߠߎ߬ ߦߟߌ߫ ߟߊ߫ ߤߊߟߌ߬ߛߊ߫.

ߞߕߌ ߘߊߡߌ߬ߣߊ߬ ߘߊ߫ ߞߕߌ߫ ߟߊߝߟߐߘߊ ߟߋ߬ ߟߊ߫ ߂߀߂߅ ߕߎߟߊߝߌ߲ ߠߊ߫߸ ߝߊ߬ߙߊ߲߬ߛߌ߬ ߞߕߌߘߊ ߞߵߊ߬ ߦߌ߬ߘߊ߬ ߞߏ߫ ߞߊ߲ߕߌ߯ ߞߘߐ ߣߌ߲߬ ߛߐ߲߭ ߦߋ߫ ߞߏ ߘߏ߫ ߘߐ߫߸ ߣߴߏ߬ ߦߋ߫ ߣߊ߲߬ߝߟߏ ߢߌߣߌ߲ ߘߌ߫ ߡߎ߬ߥߊ߬ߡߊߙ ߞߘߊߝߌ߫ ߟߊ߫ ߡߙߊ߬ߞߊ߲ ߠߊ߫ ߞߵߏ߬ ߞߍ߫ ߊ߬ ߞߎ߲߬ߞߏ ߘߌ߫، ߞߕߌߘߊ ߞߏ߬ߣߌ߲ ߡߊ߫ ߝߋ߲߫ ߝߐ߫߸ ߣߌ߫ ߥߊߘߌ ߛߋ߫ ߘߴߊ߬ ߕߍ߯ ߞߘߐ߫߸ ߥߟߴߊ߬ ߡߊ߫ ߛߴߊ߬ ߕߍ߯ ߞߘߐ߫، ߊ߬ ߞߏ߬ߣߌ߲߸ ߊ߬ߟߎ߫ ߞߊ߬ ߛߊ߲߬ ߟߏ߯ߟߎ߫ ߥߛߎ ߟߴߊ߬ ߞߎ߲߬߸ ߊ߬ ߞߵߏ߬ ߥߊ߯ߕߌ߫ ߞߎߘߎ߲ߣߍ߲߫ ߞߍ߫ ߥߛߎߓߏ߲ ߞߣߐ߫߸ ߞߣߊ߬ߕߏ߫ ߓߟߏߓߐ߫ ߟߴߊ߬ ߘߐ߫ ߞߊ߬ ߞߕߍ߫ ߡߛߊߦߌ߲ ߡߊߞߐ߬ߣߐ߲߬.

ߞߕߌߖߌ߲ ߢߊߞߘߐ߫߸ ߣߌߟߊߞߏߟߊ ߛߊߙߑߞߏߖ߭ߌ߫ ߞߵߊ߬ ߞߐߛߊ߬ߦߌ߲߫ ߊ߬ ߟߊ߫ ߖߘߍ߬ ߡߞߊ߬ߘߊ߲߬ ߞߎߡߊ ߟߎ߫ ߞߊ߲߬ ߕߎ߲߯߸ ߞߵߊ߬ ߛߐ߬ߛߐ߬ ߞߏ ߣߌ߲߬ ߓߍ߯ ߟߊ߫ ߞߋߟߋ߲ߘߌ߫ ߝߋߝߋ߫߸ ߞߏ߫ ߊ߬ ߛߋ߲߬ ߛߌ߫ ߕߍ߫ ߣߌ߲߬ ߞߏ ߘߐ߫، ߊ߬ ߞߊ߲߫ ߞߏ߫ <<ߕߎ߬ߢߊ ߦߋ߫ ߡߍ߲ ߘߌ߫߸ ߒߠߋ ߡߊ߫ ߘߙߐߡߍ߫ ߞߋߟߋ߲ ߛߐ߬ߘߐ߲߬ ߟߓߌ߫ ߡߙߊ߬ߞߊ߲ ߠߊ߫ ߞߵߊ߬ ߞߍ߫ ߒ ߠߊ߫ ߓߙߊߡߊߖߊ߲ߓߊ߲ ߣߊ߲߬ߝߟߏ߬ߦߊ߬ ߝߋ߲ ߘߌ߫.>> ߊ߬ ߞߵߏ߬ ߝߐ߫߸ ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊߝߌ߲߭ ߠߵߌ ߘߐ߫ ߝߎ߮ ߞߎ߲߬ߠߊ߫ ߦߋ߲߬ ߕߋ߲߬ ߝߎ߯ߝߊߕߌ߫.

ߞߕߌߞߊ߲ߘߊ ߟߎ߬ ߝߣߊ߫ ߣߐ߬ ߞߊ߲߫ ߜߘߍ߫ ߟߋ߬ ߝߐ߫ ߟߊ߫߸ ߊ߬ߟߎ߬ ߡߊ߫ ߛߊߙߑߞߏߖ߭ߌ߫ ߖߍ߬ߘߍ ߡߊߝߌ߲߬ ߘߋ߬߸ ߓߊ߬ߙߌ߬ ߞߏ߫ ߞߊ߲ߕߌ߯ ߞߘߐ ߞߙߍ߬ߝߍ߬ ߡߐ߮ ߟߎ߬ ߣߌ߫ ߟߓߌ߫ ߝߊ߰ߡߊ ߟߎ߬ ߞߎߡߊ߫ ߘߊ߫ ߘߊߘߐߖߊߥߏ ߘߏ߫ ߟߎ߫ ߘߐ߫߸ ߞߊ߬ ߓߍ߲߬ ߣߊ߲߬ߝߟߏ߬ߦߊ߬ߟߌ߬ ߞߏ ߘߏ߫ ߡߊ߬߸ ߞߵߏ߬ ߝߊ߬ߟߋ߲ ߞߍ߫ ߡߎ߲߬ ߘߌ߫߸ ߞߏ߫ ߣߌ߫ ߟߓߌ߫ ߞߊ߬ ߥߊߘߌ ߏ߬ ߘߌ߫߸ ߊ߬ߟߎ߬ ߘߴߏ߬ ߞߍ߫ ߞߊ߬ ߓߍ߲߭ ߠߊߘߏ߲߬ ߞߘߊߝߌ߫ ߣߌ߫ ߘߎߢߊ߫ ߖߡߊ߬ߣߊ ߕߐ߭ ߟߎ߬ ߕߍ߫ ߕߍߓߊ߯ߦߊ߫ ߓߟߏ ߡߊ߬، ߓߊߏ߬߸ ߕߎ߬ߡߊ ߏ߬ ߞߵߊ߬ ߛߐ߬ߘߐ߲߫ ߠߋ߬ ߞߐߞߊ߲߫ ߖߡߊߣߊ ߛߌߦߊߡߊ߲߫ ߓߘߊ߫ ߞߘߊߝߌ߫ ߡߊ߲߬ߜߏ߬ߦߊ߬ ߘߎߢߊ߫ ߢߊߝߍ߬.

ߊ߬ ߟߊ߫ ߞߕߌ ߣߌ߲߬ ߟߊ߬ߥߟߍ߬ߟߌ ߞߎ߲߬ߕߊ߮ ߘߐ߫߸ ߞߏߕߐ ߘߏ߫ ߟߎ߫ ߣߊ߬ ߘߊ߫ ߞߎߡߊ߫߸ ߞߏ߫ ߞߊ߬ ߡߍ߲ ߠߎ߬ ߛߐ߬ߘߐ߲߫ ߡߙߊ߬ߒ߬ߡߊ߬ߟߌ ߘߏ߫ ߟߎ߫ ߘߐ߫߸ ߣߴߊ߬ߟߎ߬ ߦߋ߫ ߘߍ߬ߡߍ߲߬ߘߌ߬ ߟߊ߫ ߟߓߌ߫ ߟߊ߫، ߏ߬ ߞߊ߬ ߞߕߌ ߡߌ߬ߛߌ߲ ߥߙߊ߬ ߞߏߛߓߍ߫߸ ߝߊߦߌߘߊ߫ ߞߊ߬ ߝߊ߲߬ߞߊ߬ ߘߴߏ߬ ߡߊ߬߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߟߓߌ߫ ߖߎ߯ߡߊ߲߫ ߕߘߍ߬، ߣߌߞߏߟߊ߫ ߛߊߙߑߞߏߖ߭ߌ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߣߌ߫ <<ߟߓߌ߫ ߞߎ߲߬ߠߊ߬ߛߌ߮ ߟߎ߬ ߡߊ߫ ߟߊ߬ߤߘߌ߫ ߕߊ߬ ߢߐ߲߯ ߦߋ߫߸ ߞߎߡߊߕߍ߫ ߞߵߊ߬ߟߎ߫ ߛߊ߬ߥߏ ߞߍ߫.>>

ߞߕߌ߫ ߞߏ ߣߌ߲߬ ߓߊ߯ ߕߍ߰ ߛߌߛߍ߲߬ ߞߵߏ߬ ߓߐ߫ ߊ߬ ߟߊ߫߸ ߊ߲ ߘߴߊ߬ ߦߋ߫ ߞߏ߫ ߞߕߌ ߣߌ߲߬ ߓߘߊ߫ ߣߊ߬ ߞߏ߫ ߞߎߘߊ߫ ߟߊߥߟߌ߬߸ ߞߊ߲ߕߌ߯ ߞߘߐ ߣߌ߲߬ ߞߊ߬ ߡߍ߲ ߞߍ߫ ߝߘߊ߬ߝߌ߲ ߠߎ߬ ߟߊ߸ ߊ߬ ߟߊ߫ ߞߊ߲ߕߌ߯ߦߊ ߥߎ߬ߛߎ ߞߣߐ߫، ߞߊ߬ߕߎ߲߯߸ ߊ߬ ߞߊ߬ ߓߋߟߋ߲ߠߊ ߘߏ߫ ߞߍ߫ ߘߊ߬ߞߊ߯ߙߎ߫߸ ߝߘߊ߬ߝߌ߲߬ߠߊ߬ ߦߟߌߞߌߛߍߕߌ߮ ߛߌߦߊߡߊ߲߫ ߞߵߊ߬ ߟߊ߫ ߞߎߡߊ ߏ߬ ߦߋ߫ ߛߌߦߊߥߟߏߡߊ߫ ߞߎߡߊ ߟߋ߬ ߘߌ߫߸ ߡߍ߲ ߡߊ߫ ߘߌߦߊ߫ ߡߐ߰ ߛߌߦߊߡߊ߲߫ ߦߋ߫، ߤߊߟߌ߬ ߣߊ߲߬ߕߌ߮ ߟߎ߬ ߟߊߕߊ߮ ߡߍ߲ ߞߍ߫ ߘߊ߫ ߞߘߊߝߌ߫ ߞߊ߲ߡߊ߬ ߟߓߌ߫ ߂߀߁߁ ߠߊ߫߸ ߏ߬ ߞߍ߫ ߘߴߊ߬ ߕߋ߬ߟߋ ߟߋ߬ ߘߐ߫߸ ߊ߬ ߓߘߊ߫ ߦߋ߫ ߟߊ߬ߞߙߐ߬ߛߟߌ߬ߟߊ ߟߎ߬ ߓߟߏ߫߸ ߞߏ߫ ߊ߬ ߞߊ߬ ߝߘߊ߬ߝߌ߲߬ߠߊ߬ ߘߐߞߟߦߊ ߛߌ ߓߙߎ߬ߞߎ߫ ߊ߬ ߕߋ߬ߟߋ ߘߐ߫ ߞߏߛߓߍ߫߸ ߞߊ߬ ߓߊ߰ߓߊ߰ߟߌ ߛߌ ߝߏ߬ߦߌ߫ ߞߌ߬ߢߍ߬ߞߏ߲ߞߏ߫ ߞߊ߲߬߸ ߞߵߏ߬ ߟߎ߬ ߘߊߝߘߌ߫ ߢߐ߲߮ ߘߐ߫߸ ߏ߬ ߟߎ߬ ߦߴߏ߬ ߥߢߊߞߊ߫ ߖߌ ߕߍߡߊ߬ ߤߊߟߌ߬ߛߊ߫.

ߊ߬ ߟߊ߫ ߞߏ ߟߎ߬ ߡߊߝߟߍ ߖߌ߫ ߢߡߊߟߐ߬ߣߍ߲߬ ߞߘߐ߫߸ ߌ ߘߴߊ߬ ߦߋ߫ ߞߏ߫ ߊ߬ ߡߊ߫ ߢߌ߬ߡߊ߬ ߞߍ߫ ߝߘߊ߬ߝߌ߲ ߠߊ߫߸ ߊ߬ ߘߏ߲߬ ߡߊ߫ ߢߌ߬ߡߊ߫ ߥߊ߬ߣߌ߲߬ߞߋ߫ ߝߘߊ߬ߝߌ߲߬ߠߊ߬ ߦߋ߫، ߊ߬ ߖߐ߬ ߘߊ߫ ߝߘߊ߬ߝߌ߲߬ߠߊ߫ ߡߊ߬ ߞߎ߲߬ ߛߌߦߊߡߊ߲߫ ߣߌ߫ ߢߊ߫ ߛߌߦߊߡߊ߲߫ ߡߊ߬߸ ߞߵߊ߬ ߟߊ߫ ߕߋߙߌߦߊ ߓߍ߯ ߞߍ߫ ߓߍ߲߬ߒ߬ߛߋ߲߬ߡߊ߬ ߢߌߣߌ߲ ߠߊ߫ ߡߙߊ߬ߞߊ߲ ߘߏ߫ ߟߎ߫ ߝߍ߬ ߝߘߊ߬ߝߌ߲߬ߠߊ߫.

ߊ߬ ߟߊ߫ ߞߕߌ ߣߌ߲߬ ߘߌߣߊ߬ ߘߊߓߊ߲߫ ߥߊ߬ߛߌ߬ߥߙߊ ߕߋ߬ߟߋ߫ ߃ ߣߊ߬ߕߐ ߣߌ߲߬ ߡߊ߬، ߛߌ߰ ߞߍߕߐ߫ ߏ߬ ߟߏ߲ ߠߋ߬ ߞߊ߬ ߞߕߌ߫ ߕߍ߮ ߡߊߞߐ߬ߣߐ߲߬، ߣߴߊ߬ ߕߏ߫ ߘߴߊ߬ ߖߊ߲߬ߞߌ ߡߊ߬߸ ߞߊ߲ߕߌ߯ ߞߘߐ ߣߌ߲߬ ߓߍߣߊ߬ ߛߊ߲߬ ߕߊ߲߫ ߢߐ߲߰ ߞߍ߫ ߥߛߎ ߟߊ߫߸ ߥߟߴߊ߬ ߘߌ߫ ߛߎ߬ߘߎ߲߬ߧߊ߫ ߏ߬ ߘߐ߫.