ߕߎ߬ߡߊ߬ߙߋ߲߬ ߘߊ߲ߘߐ߫ ߟߋ߬ ߘߐ߲߬ߞߌ߲߬ ߛߊߟߌ ߟߊ߫ ߡߎ߬ߕߎ߲߬߸ ߛߌ߬ߟߊ߬ߡߊ ߟߎ߬ ߦߋ߫ ߦߙߐ ߟߎ߬ ߘߐߥߟߏߡߊ ߞߊ߲߬ ߟߌ߬ߦߊ߲߬ ߢߌߣߌ߲ ߠߊ߫߸ ߞߊ߬ ߓߍ߲߬ ߘߌ߯ߣߊ ߟߊ߫ ߟߐ߬ߒ߬ߞߋ߬ߟߊ ߖߍ߬ߘߍ ߡߊ߬ ߓߌߦߊ߲߫ ߓߐߣߍ߲߫ ߢߐ߲߰ ߡߊ ߟߎ߬ ߘߐ߫ ߛߋߞߏ߫ ߓߍ߬ߙߍ ߘߌ߫.

ߓߌߦߊ߲߫ ߜߘߋ ߡߍ߲ ߦߋ߫ ߦߋ߫ ߋߣߍߙߑߖ߭ߌ߫ ߞߌ߲߬ߘߊ ߟߊ߫߸ ߞߊ߬ ߕߊ߬ߡߌ߲߫ ߕߟߋ߬ߟߊ߬ߖߌ߯ ߣߌ߫ ߡߊ߲ߞߏߙߏ߲ߕߎߓߊ ߝߍ߬߸ ߊ߲ ߠߊ߫ ߞߐߦߌߘߊߓߊ߮ ߞߊ߬ ߦߋ߲߬ ߘߐߦߊ߯ߟߊ߫ ߟߋ߬ ߓߌ߬ ߞߐ߬ߟߏ߲ ߣߌ߲߬ ߡߊ߬ ߂߀߂߆ ߘߓߊ߬ߕߊ ߕߋ߬ߟߋ߫ ߂߆.

ߊ߲ ߞߐߦߌߘߊߓߊ߮ ߣߌ߲߬ ߛߋ߫ ߘߊ߫ ߜ߭ߙߊߓߊߟ ߘߋ߬ ߟߊߜ߭ߙߋߡߊ߲߫߸ ߏ߬ ߡߍ߲ ߦߋ߫ ߋߣߍߙߑߖ߭ߌ߫ ߞߌ߲߬ߘߊ ߟߊ߫߸ ߊ߬ߓߎ߫ ߞߡߊ߬ߙߊ߫ ߣߊ߬ߣߍ߲߫ ߛߊ߰ ߛߊ߲߬ ߞߊ߲ ߠߋ߬ ߡߵߊ߬ ߝߊ߬ ߟߊ߫ ߟߌ߬ߦߊ߲ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߫ ߓߊ߬ߟߌ߬ߣߍ߲߫ ߠߋ߬ ߢߌ߬ߣߊ߲߫ ߛߐ߲߬ߞߐ߬ ߦߟߍ ߣߌ߲߬ ߘߐ߫.

<<ߊ߲ ߣߊ߬ߣߍ߲߫ ߒ ߝߊ߬ ߟߊ߫ ߟߌ߬ߦߊ߲߬ ߛߊ߮ ߟߋ߬ ߛߊ߲߬ ߞߊ߲ߡߊ߬߸ ߓߊ߬ߙߌ߬ ߊ߬ ߛߐ߲߬ߞߐ ߟߎ߬ ߦߋ߫ ߘߊߞߓߊߣߊ߲ߞߏ ߟߋ߬ ߘߌ߫، ߛߊ߱ ߡߍ߲ ߞߊ߫ ߓߏ߲߬߸ ߏ߬ ߦߋ߫ ߝߙߋ߬ ߟߊ߫ ߖߌ߬ߣߍ߬ ߕߊߡߊ߲ ߉ ߀߀߀ ߀߀߀ ߤߊ߲߯ ߖߕ ߁߃ ߀߀߀ ߀߀߀ ߕߍߟߊ ߟߋ߬ ߘߐ߫߸ ߡߍ߲ ߠߎ߬ ߘߐ߯ߡߊ߲߫߸ ߏ߬ ߟߎ߬ ߦߋ߫ ߖߕ ߃ ߀߀߀ ߀߀߀ ߤߊ߲߯ ߖߕ ߇ ߀߀߀ ߀߀߀، ߊ߲ ߥߊߕߐ߫ ߡߌ߲߬ ߏ߬ ߘߐ߫؟>> ߊ߬ ߞߵߊ߬ ߖߍ߬ߘߍ߫ ߢߌ߬ߣߌ߲߬ߞߊ߫ ߏ߬ ߞߊ߲߬.

ߟߊ߬ߞߙߐ߬ߛߟߌ߬ ߞߋߟߋ߲ ߏ߬ ߢߐ߲߰ ߠߋ߬ ߞߍ߫ ߘߊ߫ ߡߊ߲ߞߏߙߏ߲ߕߎߓߊ ߞߘߐ߫߸ ߓߌߟߌ߬ ߘߎ߲ߓߎߦߊ߫ ߝߣߊ߫ ߣߊ߬ߣߍ߲߫ ߕߍ߬ߘߍ߫ ߣߛߌ߬ ߛߊ߲߬ ߞߊ߲ ߠߋ߬ ߡߊ߬ ߞߵߊ߬ ߞߍ߫ ߟߌ߬ߦߊ߲ ߘߌ߫߸ ߏ߬ ߞߊ߬ ߛߐ߲߬ߞߐ߬ ߦߟߍ߬ ߞߋߟߋ߲ ߢߌ߲߬ ߠߊߞߙߐ߬ߛߌ߫ ߊ߬ ߢߊ ߡߊ߬.

<<ߣߌ߬ߛߌ ߘߏ߫ ߦߋ߫ ߦߊ߲߬߸ ߖߕ ߄߀ ߀߀߀ ߀߀߀ ߠߵߏ߬ ߘߌ߫ ߢߌ߬ߣߊ߲߬، ߒ ߧߋ߫ ߒ ߖߘߍ߬ ߡߊߢߌ߬ߣߌ߲߬ߞߊ߬ ߟߊ߫ ߟߋ߬߸ ߒ ߞߏ߫ ߊ߲ߠߎ߬ ߓߟߏߞߏߟߏ߲ ߠߎ߬ ߞߍߕߐ߫ ߡߎ߲߬ ߞߍ߫ ߟߊ߫، ߛߐ߲߬ߞߐ ߟߎ߬ ߦߋ߫ ߖߕ ߁߀ ߀߀߀ ߀߀߀ ߤߊ߲߯ ߞߵߊ߬ ߛߌ߰ ߄߀ ߀߀߀ ߀߀߀ ߠߊ߫، ߣߌ߫ ߝߊ߰ߡߊ ߟߎ߬ ߡߴߊ߬ߟߎ߫ ߟߐ߬ ߊ߬ߟߎ߫ ߟߐ߬ ߦߌߟߊ߸ ߊ߬ ߕߍ߫ ߓߍ߲߬، ߓߟߏߞߏߟߏ߲ ߠߎ߬ ߟߋ߬ ߞߏ߬ߣߌ߲ ߛߍ߰ߕߐ߫ ߥߍ߫.>> ߊ߬ ߣߡߌߛߊߣߍ߲ ߞߵߏ߬ ߦߌ߬ߘߊ߬.

ߊߓߘߎߟߊߦߌ߬ ߘߎ߲ߓߎߦߊ߫ ߡߍ߲ ߝߣߊ߫ ߦߋ߫ ߥߊ߬ߦߌ߬ߦߊ ߟߊ߫߸ ߊ߬ ߣߌ߫ ߣߛߌ߬ ߖߎߟߊ ߟߋ߬ ߝߣߊ߫ ߦߴߊ߬ ߘߌ߫߸ ߏ߬ ߞߊ߬ ߞߎ߲߬ ߛߌߦߊߡߊ߲߫ ߝߐ߫ ߛߐ߲߬ߞߐ߬ ߞߏ ߣߌ߲߬ ߘߐ߫.

<<ߞߎ߲߬ ߛߌߦߊߡߊ߲߫ ߠߋ߬ ߛߐ߲߬ߞߐ߲߬ ߦߟߍ߬ߓߊ ߢߌ߲߬ ߠߊ߫ ߢߌ߬ߣߊ߲߬: ߊ߬ ߝߟߐ ߟߋ߬ ߡߊ߬ߟߌ ߞߍ߬ߟߍ ߘߌ߫߸ ߞߵߏ߬ ߟߊ߫ ߛߍߝߊ ߝߊ߬ߟߋ߲ ߦߍ߬ߟߍ ߞߊ߲߬ ߖߌ߬ߣߍ߬ ߕߊߡߊ߲ ߛߊ߲ߘߐ߫ ߔߏ߲߫، ߊ߬ ߣߌ߫ ߝߣߊ߫߸ ߛߊߟߌ ߓߊ߯ ߓߍ߲߬ ߕߟߋ߬ߡߊ ߡߊ߬߸ ߣߌ߬ߛߌ ߟߎ߬ ߟߊ߫ ߘߊߥߎ߲ߠߌ߲߫ ߞߏ ߞߊ߫ ߜߍ߬ߟߍ߲߬ߓߊ ߟߋ߬ ߥߊ߯ߕߌ ߏ߬ ߟߊ߫، ߏ߬ ߟߋ ߓߍ߯ ߦߋ߫ ߣߊ߬ ߟߊ߫ ߛߐ߲߬ߞߐ߬ ߜߟߍߦߊ ߣߌ߲߬ ߘߌ߫، ߏ߬ ߘߐ߫߸ ߡߍ߲ ߘߌ߫ ߣߌ߲߬ ߞߏ ߘߊ߲ߘߊ߫߸ ߏ߬ ߟߋ ߣߌ߬ߛߌ ߛߐ߬ߘߐ߲ ߘߌ߫ ߊ߲ ߓߘߊ ߦߊ߲߬߸ ߦߏ߫ ߡߊ߬ߟߌ ߦߴߊ߬ ߞߍ߫ ߟߊ߫ ߢߊ ߡߍ߲ ߡߊ߬.>> ߊ߬ ߞߵߏ߬ ߦߌ߬ߘߊ߬.