ߖߌ߬ߣߍ߫ ߞߎ߲߬ߠߊ߬ߛߌ߮ ߟߊ߫ ߡߙߌߘߐ߫ ߛߌߦߊߡߊ߲߫ ߕߊ ߣߴߊ߬ ߕߊ߫ "ߔߏߞߑߟߍ߲߫" ߓߊ߯ߙߊ ߟߊߟߐ߬ ߞߏ ߘߐ߫ ߘߊ߬ߡߊ߲߬ߘߊ ߟߎ߬ ߟߊ߫߸ ߊ߬ ߞߏ ߞߢߊ߬ߣߍ߲߬ ߟߊߟߐ߬ ߟߊ߫ ߛߌ߯ߙߌ߲߫ ߞߣߐ߫ ߡߎߣߎ߲߬ ߤߊ߲߯ ߕߋ߲߬، ߏ߬ ߟߋ ߦߌ߬ߘߊ߬ ߘߊ߫ ߛߌ߯ߙߌ߲߫ ߠߊߥߙߎߞߌ ߘߋ߲ߡߌߛߍ߲ ߠߎ߬ ߟߊ߫ ߘߍ߭ ߓߟߏ߫߸ ߕߏ߰ߝߏ ߏ߬ ߡߍ߲ ߘߐ߰ߘߏ߲߬ߣߍ߲߬ߓߊ ߦߋ߫ ߘߊ߬ߡߊ߲ ߓߊ߯ߙߊ߫ ߢߊ߫ ߖߎ߮ ߣߌ߲߬ ߞߍ߬ߟߍ ߟߊ߫ ߝߊ߲߬ߞߣߐ ߏ߬ ߘߐ߫ ߦߋ߲߬.

ߒ߬ߓߊ߬߸ ߊ߲ ߠߊ߫ ߞߐߦߌߘߊߓߊ߮ ߡߍ߲ ߦߋ߫ ߛߌ߯ߙߌ߲߫߸ ߏ߬ ߘߌ߫ ߡߊ߭ߘߎ߬ ߝߌ߬ߣߊ߫ ߞߡߊ߬ߙߊ߫ ߓߊ߬ߘߏ߬ ߘߊ߫ ߂߀߂߆ ߘߓߊ߬ߕߊ ߕߟߋ߬ ߁߃ ߣߌ߲߬ ߡߊ߬߸ ߊ߬ߟߋ ߡߍ߲ ߦߋ߫ ߕߏ߰ߝߏ ߞߏߟߊߕߍ߮ ߘߏ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߕߙߏ߬ߞߏ߬ߓߊ ߢߌ߲߬ ߠߎ߬ ߟߊ߫ ߓߊ߯ߙߊ ߡߊ߫ ߟߊߟߐ߬ ߟߏ߲߫ ߞߋߟߋ߲߫߸ ߞߊ߲ߕߌ߮ ߟߊ߫ ߟߊ߬ߕߍ߰ߦߊ ߟߊߓߐ ߣߴߊ߬ ߕߊ߫߸ ߞߏߕߌ߮ ߟߎ߬ ߟߊ߫ ߟߊ߬ߛߋ߬ߟߌ ߣߴߊ߬ ߕߊ߫.

<<ߞߊ߲ߕߌ߮ ߟߊ߫ ߟߊ߬ߕߍ߰ߦߊ߫ ߝߌ߬ߟߊ ߣߴߊ߬ ߕߊ߫߸ ߞߏߕߌ߮ ߟߎ߬ ߟߊ߫ ߟߊ߬ߛߋ߬ߟߌ ߣߴߊ߬ ߕߊ߫߸ ߔߏߞߑߟߍ߲߫ ߕߙߏߞߏ ߟߊߓߊ߯ߙߊ ߡߊ߫ ߟߊߟߐ߬ ߛߌ߯ߙߌ߲߫ ߘߊ߬ߡߊ߲߬ߘߊ ߟߎ߬ ߟߊ߫ ߟߏ߲߫ ߞߋߟߋ߲߫ ߟߏ߲߫ ߕߟߊ߫، ߊ߲ߠߎ߬ ߛߌ߯ߙߌ߲ߞߊ ߟߎ߬ ߦߴߊ߬ ߝߍ߬ ߞߵߊ߬ ߟߐ߲߫߸ ߡߍ߲ ߓߊ߯ ߞߍ߫ ߓߊ߯ߙߊ ߣߌ߲߬ ߞߐߝߍ߬ ߛߍߣߍ߲߬.>> ߊ߬ ߞߵߏ߬ ߦߌ߬ߘߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߗߋߦߊߟߌ߫ ߛߌߦߊߡߊ߲߫ ߠߋ߬ ߓߘߊ߫ ߣߊ߬ ߞߊ߬ ߓߐ߫ ߞߐߣߊߞߙߌ߫߸ ߞߊ߬ ߣߊ߬ ߛߋ߫ ߘߊ߬ߡߊ߲߬ߘߊ߬ ߓߏߟߏ߲ ߠߎ߬ ߟߊ߫߸ ߞߊ߬ ߔߏߞߑߟߍ߲ ߠߊ߫ ߕߌߢߍߟߌ߫ ߣߐ ߟߎ߬ ߦߋ߫߸ ߊ߬ ߕߌ߯ߕߌ߯ ߛߣߌߥߊ ߟߎ߬ ߟߊ߫ ߓߊ߯ߙߊ߫ ߦߙߐ ߟߎ߬، ߞߏ߬ߣߌ߲߬ ߝߏߦߊ߲߫߸ ߞߌ߬ߛߍ߬ ߡߊ߫ ߦߋ߫ ߖߓߊ߬ ߘߐ߫ ߏ߬ ߟߎ߬ ߓߍ߯ ߞߐ ߘߐ߫.

<<ߒߠߋ ߖߍ߬ߘߍ ߓߘߊ߫ ߓߌ߬ߟߊ߬ ߗߋߦߊߟߌ ߡߍ߲ ߢߍ߫߸ ߣߴߊ߬ߟߎ߬ ߓߐ߫ ߘߊ߫ ߞߐߣߊߞߙߌ߫ ߞߊ߬ ߣߊ߬ ߘߏ߲߬ ߥߊ߭ ߞߣߐ߫߸ ߒ ߓߘߊ߫ ߓߌ߬ߟߊ߬ ߗߋߦߊߟߌ ߏ߬ ߕߊ߲ ߣߌ߫ ߛߊ߬ߓߊ߫ ߟߋ߬ ߢߍ߫߸ ߞߊ߬ ߥߊ߭ ߘߐߝߍߣߍ߲߫ ߞߊ߬ ߛߣߌߥߊ ߟߎ߬ ߟߊ߫ ߓߊ߯ߙߊ߫ ߦߙߐ ߟߎ߫ ߦߌ߬ߘߴߊ߬ߟߎ߬ ߟߊ߫، ߐ߲߬ߤߐ߲߫߸ ߗߋߦߊߟߌ ߏ߬ ߦߋ߫ ߦߊ߲߬ ߕߋ߲߬ ߝߛߊߦߌ߫߸ ߓߊ߬ߙߌ߬ ߛߋ߫ ߕߴߊ߬ߟߎ߬ ߦߋ߫ ߤߊ߲߫، ߓߊ߬ߏ߸ ߘߏ߬ߣߌ߲߬ߓߊ߬ߕߊ߫ ߞߊ߲ߓߋ߲ ߡߍ߲ ߠߎ߬ ߦߴߊ߬ߟߎ߬ ߓߟߏ߫߸ ߏ߬ ߦߋ߫ ߛߓߊ߬ ߔߋ߫ ߟߋ߬ ߘߌ߫، ߊ߬ߟߎ߬ ߘߌ߫ ߛߋ߫ ߞߎ߲߬ߢߐ߲߯ ߝߌ߬ߟߊ ߞߍ߫ ߟߊ߫ ߦߙߐ߫ ߞߋߟߋ߲ ߘߐ߫߸ ߊ߬ߟߎ߬ ߡߊ߫ ߓߊ߲߫ ߕߙߏ߬ߞߏ ߟߎ߫ ߕߊ߬ ߟߊ߫ ߞߵߊ߬ߟߎ߬ ߓߐ߫ ߦߋ߲߬.>> ߊ߬ ߞߵߏ߬ ߦߌ߬ߘߊ߬.

ߛߌ߯ߙߌ߲߫ ߠߊߥߙߎߞߌ ߘߋ߲ߡߌߛߍ߲ ߠߎ߬ ߟߊ߫ ߘߍ߭ ߣߌ߲߬ ߓߋߟߋ߲ߕߌ߮ ߞߊ߬ ߡߊ߬ߡߙߊ߬ߟߌ߬ ߞߏߟߊߕߍ߮ ߘߏ߫ ߟߎ߫ ߣߌ߫ ߓߘߍ߬ߓߘߍ߬ߟߌ߬ ߞߏߟߊߕߍ߮ ߘߏ߫ ߟߎ߫ ߡߊߝߌ߲߬ ߣߌ߲߬ ߞߏ ߘߐ߫߸ ߊ߬ߟߎ߬ ߢߊ ߡߊߛߌ߭ ߞߏߛߐ߲߬ ߓߊ߯ߙߊ ߣߌ߲߬ ߞߊ߲߬.

<<ߤߊߟߴߊ߬ߟߎ߬ ߓߊ߯ ߘߏ߬ߣߌ߲߬ߓߊ߬ߕߊ߫ ߞߊ߲ߓߋ߲߫ ߥߊ߯ ߞߋߟߋ߲߫ ߠߋ߬ ߟߊߣߊ߬ ߛߌ߯ߙߌ߲߫ ߞߣߐ߫߸ ߊ߬ߟߎ߬ ߕߍߣߊ߬ ߓߊ߲߫ ߠߊ߫ ߞߊߙߏ߫ ߝߌ߬ߟߊ ߞߣߐ߫، ߌ ߓߊ߯ ߛߞߍ߬ ߞߋߟߋ߲߫ ߔߋ߫ ߘߐ߫ ߡߎߣߎ߲߬߸ ߘߞߏ߫ ߡߙߊ ߘߐ߫߸ ߖߌ߫ ߛߌߟߊ߫ ߂߀߀ ߓߘߊ߫ ߘߐߕߌߢߍ߫ ߛߣߌߥߊ ߟߎ߬ ߟߊ߫ ߔߏߞߑߟߍ߲ ߓߟߏ߫ ߦߋ߲߬.>> ߊ߬ ߞߵߏ߬ ߝߣߊ߫ ߣߌߛߐߜߏߦߊ ߦߌ߬ߘߊ߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߔߏߞߑߟߍ߲߫ ߞߏ ߣߌ߲߬ ߞߐߝߟߌ ߡߍ߲ ߦߋ߫ ߛߋ߫ ߟߊ߫ ߟߊ߬ߡߌߣߌ߲ ߡߊ߬߸ ߏ߬ ߘߌ߫ ߡߐ߰ ߤߊߡߌ߲߫ ߕߋ߲߬߸ ߞߵߌ ߓߊ߬ߟߌ߬.

<<ߓߌ߬ ߢߐ߲߰ ߟߏ߲߫߸ ߛߌ߯ߙߌ߲߫ ߞߐ߭ ߟߎ߬ ߖߌ ߕߴߛߋ߫ ߟߊ߫ ߡߌ߲߬ ߠߊ߫ ߡߎ߬ߕߎ߲߬، ߤߊߟߌ߬ ߓߌߦߊ߲ ߠߎ߬߸ ߏ߬ ߟߎ߬ ߕߍ߫ ߛߋ߫ ߟߴߊ߬ߟߎ߫ ߡߌ߲߬ ߠߊ߫ ߡߎ߬ߕߎ߲߬.>> ߊ߬ ߞߵߏ߬ ߟߊ߫ ߞߎߡߊ ߞߊ߲߬.

ߟߊ߬ߡߌߣߌ߲ ߘߐߖߊߛߌ ߣߌ߲߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߡߊ߭ߘߎ߬ ߝߌ߬ߣߊ߫ ߞߡߊ߬ߙߊ߫ ߞߵߊ߬ ߦߌ߬ߘߊ߬ ߞߏ߫ ߔߏߞߑߟߍ߲߫ ߞߏ ߣߌ߲߬ ߡߊ߲߬ߕߙߐ߬ߓߊ߫ ߦߋ߫ ߛߋ߫ ߟߊ߫ ߛߐ߬ߘߐ߲ ߘߊߞߎ߲ ߡߊ߬، ߞߊ߬ߕߎ߲߯߸ ߖߌߥߎ߫ ߞߏ߫ ߝߙߋߞߋ߫ ߓߊ߲ߓߊߟߌ ߡߍ߲ ߦߋ߫ ߛߌ߯ߙߌ߲߫ ߡߙߊ߬ߘߊ߬ߓߊ ߞߣߐ߫߸ ߊ߬ߟߋ߬ ߓߊ߯ߙߟߊ߫ ߞߋߟߋ߲ ߢߌ߲߬ ߠߵߊ߬ ߕߎ߬ߙߎ ߘߌ߫ ߖߐ߫.

<<ߞߓߊߕߟߎ ߘߎ߲߫ ߞߋߟߋ߲ ߦߋ߫ ߕߙߍߡߍ߫ ߟߊ߫ ߖߌ߬ߣߍ߬ ߕߊߡߊ߲ ߅߀߀ ߀߀߀ ߣߌ߫ ߖߕ ߆߀߀ ߀߀߀ ߟߋ߬ ߕߍߟߊ ߘߐ߫، ߝߊ߯ߞߊ߲ߓߋ߲ ߡߍ߲ ߠߎ߬ ߦߋ߫ ߣߊ߬ ߟߊ߫ ߛߌ߯ߙߌ߲߫߸ ߊ߬ ߘߏ߫ ߟߎ߫ ߦߋ߫ ߥߊ߫ ߟߊ߫ ߛߣߌߥߊ ߟߎ߬ ߟߊ߫ ߓߊ߯ߙߊ߫ ߦߙߐ ߟߋ߬ ߘߐ߫ ߌߞߘߐ߫߸ ߞߊ߬ ߞߎ߲߬ ߣߌ߫ ߞߎ߲߬ ߛߐ߬ߘߐ߲߬.>> ߊ߬ ߞߵߏ߬ ߝߣߊ߫ ߦߌ߬ߘߊ߬.

ߞߊ߬ ߓߍ߲߬ ߣߌ߲߬ ߞߏ ߡߊ߬ ߏ߬ ߘߐ߫ ߛߊ߫߸ ߡߐ߱ ߢߌ߲߬ ߠߎ߫ ߞߵߊ߬ߟߎ߬ ߞߊ߲ߠߊߘߌ߫ ߛߌ߯ߙߌ߲߫ ߝߊ߰ߡߊ ߟߎ߫ ߡߊ߬߸ ߞߏ߫ ߓߍ߯ ߦߴߊ߬ ߤߊ߲ߞߟߌ ߘߊߦߍ߬ߟߍ߫ ߕߋ߲߬߸ ߞߊ߬ <<ߓߊ߯ߙߊ߫ ߖߎ߯ߓߊ>> ߣߌ߲߬ ߞߟߍ߬߸ ߊ߬ߟߋ߫ ߞߵߊ߬ ߦߋ߫ ߢߊ ߡߍ߲ ߡߊ߬ ߞߊ߬ߣߌ߲߬߸ ߛߊ߫ ߞߊ߬ ߓߐ߰ߝߍ ߟߊߞߛߌ߫ ߓߐ߲ߛߐ߲߫ ߣߊ߬ߕߐ ߟߎ߬ ߢߍ߫.