ߛߌ߬ߣߌ߲߬ߟߏ߲ ߣߌ߲߬ ߡߊ߬ ߂߀߂߆ ߘߓߊ߬ߕߊ ߕߟߋ߬ ߀߁߭߸ ߞߏ߲ߞߏߘߐ ߥߎߢߊ߲ߖߍ߲ߛߍ߲ ߞߊ߬ ߞߟߊ߬ߓߋ ߞߍ߫߸ ߞߊ߬ ߓߍ߲߬ ߡߊ߬ߡߌ߬ߣߊ߬ߟߌ߬ߟߊ ߟߎ߬ ߟߊ߫ ߕߊ߬ߡߌ߲߬ߕߊߡߌ߲ ߓߐ߫ ߢߐ߲߯ ߞߘߐ ߡߊ߬ ߓߙߊߡߊߖߊ߲ߓߊ߲ ߝߐ߰ߓߍ ߘߐ߫.

ߏ߬ ߟߋ ߖߊ߲߬ߖߏ߲ ߞߍ߫ ߘߊ߫ ߛߌ߯ߙߌ߲߫ ߞߏ߲ߞߏߘߐߕߊ ߥߎߢߊ߲ߖߍ߲ߛߍ߲ ߠߊ߫߸ ߞߵߊ߬ ߛߐ߬ߘߐ߲߬ ߖߋ߬ߕߌ߰ߘߊ ߞߎ߲߬ߕߌ߮ ߢߊ ߕߘߍ߬ ߜߍ ߘߐ߫߸ ߊ߬ ߣߌ߫ ߢߍߥߟߊ߫ ߞߎ߲ߕߌ߮ ߕߊ߬ߣߍ߲ ߞߵߊ߬ ߟߊ߫ ߛߙߍߘߍ߫ ߝߌ߬ߟߊ ߞߐߦߌߘߊߓߊ߮ ߟߎ߫ ߞߊ߲߬߸ ߜߊ߬ߛߊ ߦߋ߫ ߡߍ߲ ߠߎ߬ ߣߌ߫ ߢߐ߲߯ ߕߍ߫، ߊߟߎ߫ ߦߴߊ߬ ߟߐ߲߫߸ ߛߙߍߘߍ߫ ߝߌ߬ߟߊ ߏ߬ ߟߎ߫ ߟߋ߬ ߥߞߓ ߘߌ߫ (ߥߙߎߞߌ ߣߌ߫ ߞߊ߬ߞߎ߬ߘߦߊ߬ߟߌ ߓߐ߲ߛߐ߲ߢߐ߲߯ߦߊ)߸ ߊ߬ ߣߌ߫ ߛߌ߯ߙߌ߲߫ ߛߏߞߎߘߊ ߢߌߣߌ߲ߞߏ߫ ߞߎߘߊ߫ ߕߏ߰ߝߏ (ߛߢߞߕ)، ߖߊ߲߬ߖߏ߲ ߣߌ߲߬ ߡߊ߫ ߝߐ߫ ߓߌ߬ߟߊ߬ߢߐ߲߰ߡߊ ߞߏߟߊߕߍ߯ ߛߊ߲ߘߐ ߜߋ߬ߟߎ߲߬ߠߌ߲߬ߠߊ ߞߐ߫߸ ߊ߬ߟߋ ߡߍ߲ ߦߋ߫ ߝߐ߰ߓߍ߬ߦߊ߬ߟߌ ߞߎ߬ߙߎ߲߬ߘߎ ߡߊߓߏ߲߬ߧߊ ߓߟߏߡߊ ߘߌ߫ ߢߣߊߕߊߟߌ ߥߎ߬ߛߎ ߣߌ߲߬ ߞߣߐ߫.

ߖߊ߲߬ߖߏ߲ ߘߊߡߌߣߊ ߘߐ߫ ߌߞߘߐ߫߸ ߝߊ߬ߛߋ߬ߟߌ߬ ߞߐ߲ߘߍ߫ ߡߍ߲ ߦߋ߫ ߞߏ߲ߞߏߘߐߕߊ ߥߎߢߊ߲ߖߍ߲ߛߍ߲ ߗߋߕߌ߮ ߘߌ߫߸ ߏ߬ ߞߊ߬ ߛߙߊ߬ߣߎ߲ ߕߊ߬߸ ߞߊ߬ ߕߘߍ߬ߒ߬ߘߐ߬ߓߊ߮ ߟߎ߬ ߞߎߟߎ߲ߖߋ߫.

<<ߕߘߍ߬ߒ߬ߘߐ߬ߓߊ߮ ߓߍ߯ ߟߊߘߍ߬ߣߍ߲ ߣߌ߫ ߛߣߍ߫ ߢߣߊߕߊߟߌ ߛߋ߲߬ߕߊ ߣߌ߲߬ ߘߐ߫، ߣߌ߲߬ ߦߋ߫ ߛߋ߲߬ߕߊ߫ ߕߣߐ߬ߡߊ߬ߓߊ߫ ߟߋ߬ ߘߌ߫، ߞߊ߬ߕߎ߲߯߸ ߞߟߊ߬ߓߐ ߢߌ߲߬ ߞߎ߲߭ ߠߋ߬ ߡߊ߬ߡߌ߬ߘߊ߬ߟߌ߬ߟߊ ߓߍ߯ ߡߌ߬ߣߊ߬ ߢߊ ߘߐߞߢߊ ߘߌ߫ ߕߎߕߋߟߋ߲ ߠߊ߫، ߒ ߘߴߊ߬ ߦߌ߬ߘߊ߬ ߒ ߞߏ߫ ߝߘߏ߬ߓߊ߬ ߝߐ߰ߓߍ߬ߘߊ ߟߎ߬ ߥߊ߫ ߢߊ ߟߋ߬ ߜߍߦߊ ߘߌ߫߸ ߓߍ߯ߦߊ ߘߌ߫߸ ߊ߬ ߣߌ߫ ߞߌ߬ߓߊ߬ߙߏ ߟߊߛߐ߬ߘߐ߲ ߘߐ߫ ߕߍߕߋߟߋ߲ ߠߊ߫ ߡߊ߬ߡߌ߬ߘߊ߬ߟߌ߬ߟߊ ߓߍ߯ ߦߋ߫.>> ߊ߬ ߞߵߏ߬ ߦߌ߬ߘߊ߬.

ߛߋߞߎ߬ ߞߎߙߟߊ߫ ߞߋߕߊ߬ ߡߍ߲ ߦߋ߫ ߢߍߥߟߊ߫ ߞߎ߲ߕߌ߮ ߘߌ߫ ߞߏ߲ߞߏߘߐߕߊ ߥߎߢߊ߲ߖߍ߲ߛߍ߲ ߠߊ߫߸ ߏ߬ ߞߎߡߊ߫ ߘߊ߫ ߞߟߊ߬ߓߐ ߛߙߊߕߌ ߟߎ߫ ߞߊ߲߬߸ ߞߊ߬ ߕߐ߲ ߠߎ߬ ߢߊߝߐ߫߸ ߊ߬ ߣߌ߫ ߢߍߥߟߊ ߡߍ߲ ߠ߬ߎ ߦߋ߫ ߦߋ߲߬ ߓߙߊߡߊߖߊ߲ߓߊ߲ ߞߎߡߊ ߟߎ߬ ߟߊߕߊ߬ߡߌ߲߬ ߞߊ߲ߡߊ߬، ߊ߬ ߞߵߊ߬ ߦߌ߬ߘߊ߫ ߕߘߍ߬ߒ߬ߘߐ߬ߓߊ߮ ߟߎ߬ ߟߊ߫߸ ߞߏ߫ ߓߘߊߟߊߝߛߊߓߊߟߌߦߊ߸ ߊ߬ ߣߴߊ߬ߟߎ߫ ߓߌ߬ߟߊ ߊ߬ߟߎ߫ ߛߊ߬ߥߏ߬ ߘߐ߫߸ ߛߋߒߞߏߟߊ ߟߎ߬ ߕߊ߬ߣߌ߲ ߞߵߊ߬ ߟߊ߫ ߝߐ߰ߓߍ߬ߦߊ߬ߟߊ ߟߎ߫ ߞߊ߲߬߸ ߏ߬ ߟߎ߬ ߘߴߊ߬ߟߎ߫ ߓߌ߬ߟߴߊ߬ߟߎ߫ ߛߊ߬ߥߏ߬ ߘߐ߫ ߢߊ ߓߍ߯ ߡߊ߬߸ ߞߵߊ߬ߟߎ߬ ߟߊ߫ ߞߏ ߟߎ߬ ߟߊߕߊ߬ߡߌ߲߬ ߦߏ߫ ߊ߬ ߝߐߣߍ߲߫ ߢߊ ߡߍ߲ ߡߊ߬.

ߞߟߊ߬ߓߋ ߘߊߡߌ߬ߣߊ߬ ߘߊ߫ ߡߊ߬ߝߊ ߟߋ߬ ߘߐ߫߸ ߜߍߦߊ ߟߋ߬ ߞߣߐ߫߸ ߊ߬ ߣߌ߫ ߓߍ߯ ߟߊ߫ ߘߌ߬ߢߍ ߞߣߐߡߊ߬، ߟߊ߬ߘߍ ߣߌ߲߬ ߘߐ߫߸ ߥߞߓ ߟߋ߬ ߞߍ߫ ߘߊ߫ ߟߕߊ߬ߡߌ߲߬ߕߊ߬ ߝߟߐ ߘߌ߫߸ ߞߊ߬ ߛߌ߯ߙߌ߲߫ ߢߌߣߌ߲ߞߏ߫ ߞߎߘߊ (ߛߢߞ) ߕߎ߲߰ ߏ߬ ߟߊ߫ ߛߏߞߎߙߊ ߟߊ߫.

ߟߊ߬ߓߊ߲ ߘߐ߫߸ ߡߊ߬ߡߌ߬ߘߊ߬ߟߌ߬ ߛߙߍߘߍ߫ ߝߌ߬ߟߊ ߢߌ߲߬ ߠߎ߫ ߞߵߊ߬ߟߎ߬ ߟߊ߫ ߛߍߥߊ ߣߴߊ߬ߟߎ߬ ߟߊ߫ ߥߊ߬ߛߊ ߟߋ߬ ߦߌ߬ߘߊ߬߸ ߞߊ߬ ߓߍ߲߬ ߦߙߍߞߍߟߌ ߕߊ߬ߡߌ߲߬ ߢߊ ߡߵߊ߬ ߢߎ߬ߡߊ ߟߊ߫، ߊ߬ߟߎ߫ ߞߊ߬ ߕߊ߲߬ߘߏ߬ߟߌ ߞߍ߫ ߜߍߦߊ ߟߊ߫߸ ߖߌ߬ߓߌ߬ߦߊ߬ߟߌ ߟߊ߫߸ ߢߊߟߐ߲ ߠߊ߫߸ ߞߊ߬ ߓߍ߲߬ ߞߟߊ߬ߓߋ ߣߌ߲߬ ߛߌ߲߬ߝߏ߲߬ߧߊ߬ ߞߏ߬ߢߌ߲ ߡߊ߬. ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߊ߬ߟߎ߬ ߘߌ߫ ߛߊ߬ߙߌ߬ߦߊ߬ ߝߐߣߍ߲ ߠ߬ߎ ߡߊߓߏ߲߬ ߧߊ߫ ߞߵߊ߬ ߓߐ߫ ߊ߬ ߛߌߟߊ ߝߍ߬߸ ߖߐ߲߰ߛߊ߫ ߓߙߊߡߊߖߊ߲ߓߊ߲ ߘߌ߫ ߕߊ߬ߡߌ߲߫ ߡߊ߬ߝߊ ߣߌ߫ ߖߛߎ߬ߛߎߡߊ ߘߐ߫ ߢߊ ߡߍ߲ ߡߊ߬.

ߖߊ߲߬ߖߏ߲ ߞߎ߲߭ߝߊ߰ ߘߊ߫ ߢߐ߲߯ ߢߊߦߋ ߟߋ߬ ߞߣߐ߫߸ ߝߐ߰ߓߍ߬ߦߊ߬ߟߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߘߴߊ߬ߟߎ߫ ߖߊ߲߬ߕߏ߫ ߖߐ߲߰ߛߊ߫ ߞߏ ߟߎ߬ ߘߌ߫ ߕߊ߬ߡߌ߲߫ ߊ߬ ߢߌ߬ߡߊ ߟߊ߫ ߢߊ ߡߍ߲ ߡߊ߬߸ ߓߙߊߡߊߖߊ߲ߓߊ߲ ߦߋ߫ ߞߍ߫ ߡߊ߬ߝߊ ߘߝߊߣߍ߲ ߘߐ߫.