ߖߌ߬ߣߍ߬ ߞߊ߲ߓߍ߲ ߞߊ߲ߕߌ߮߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߎߡߊߣߍ߲߫ ߠߋ߬ ߞߊ߯ߙߌ ߢߌ߲߬ ߡߊ߬߸ ߂߀߂߆ ߞߊ߬ߙߌ߬ߝߐ ߕߟߋ߬ ߁߉߸ ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߞߊߝߏ ߟߎ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߍ߬ߓߊ (ߛߘߋߦߊߥߏ) ߟߊ߫ ߞߊ߬ߝߏ߬ ߞߎ߲ߕߌ߮ ߟߎ߬ ߟߊ߫ ߘߋ߬ߙߌ߬ߣߊ߲߬ ߜߙߊ ߞߍߞߏ߫ ߆߉߲ ߞߣߍ ߞߊ߲߬߸ ߡߍ߲ ߛߌ߲߬ߝߏ߲߬ߧߊ߬ߣߍ߲߫ ߛߙߊ߬ߟߏ߲߫ ߖߡߊ߬ߣߊ ߞߊ߲߬، ߟߊ߬ߘߍ ߣߌ߲߬ ߦߋ߫ ߞߎߡߊ߫ ߟߊ߫ ߖߐ ߟߋ߬ ߞߊ߲߬߸ ߞߎ߲߬ߠߊ߬ߛߌ߰ߟߌ߬ ߞߏ߬ߢߌߡߊ߸ ߊ߬ ߣߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߐߢߌߡߌ߲߫ ߢߐ߲߰ ߝߍ߸ ߞߵߏ߬ ߟߊ߫ ߖߎ߬ߟߊ߬ߦߊ ߣߌ߫ ߥߙߎߞߌ ߞߏߢߊ ߟߎ߫ ߞߊ߲߬ ߕߟߋ߬ߓߋ߬ ߊߝߙߌߞߌ߬ ߞߣߐ߫.

ߒ߬ߓߊ߬߸ ߞߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߛߌ߰ߣߍ߲ ߕߏ߫ ߊ߬ ߞߊ߲ߕߌ߯ ߢߐ߲߮ ߠߎ߬ ߕߍߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߝߐߢߐ߲߯ߞߐ ߞߟߍ߬ ߢߊ߬ ߓߘߍ ߡߍ߲ ߦߋ߲߬߸ ߏ߬ ߟߋ ߓߍߍ߯ ߘߏ߲߭ ߘߌ߫ ߘߊ߫ ߞߋߟߋ߲߫ ߠߊ߫، <<ߝߘߊ߬ߝߌ߲߬ߠߊ߫ ߟߊߞߊ߬ߝߏ ߟߋ߬ ߞߋߟߋ߲߫ ߦߋ߫ ߥߙߎߞߌ ߛߌߟߊ߫ ߜߍ ߘߌ߫߸ ߊ߬ ߣߌ߫ ߞߊ߬ ߞߍ߬ߟߍ ߡߊߕߊ߲߬ߞߊ߫ ߊ߲ ߜߊ߲߰ߛߊ߲ ߣߌ߫ ߢߐ߲߯ ߕߍ߫.>> ߊ߬ ߞߵߏ߬ ߦߌ߬ߘߊ߬.

ߖߌ߬ߣߍ߬ ߞߊ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߛߘߋߦߊߥߏ ߛߌ߲ߘߌ߫ ߘߊ߫ ߁߉߇߅ ߘߓߊ߬ߕߊ ߕߋ߬ߟߋ߫ ߂߈ ߡߊ߬ ߞߎ߲߭ ߡߍ߲ ߠߎ߬ ߞߏߏߛߐ߲߬߸ ߏ߬ ߘߐ߫ ߓߏ߲߬ߓߊ ߦߋ߫ ߛߐ߬ߘߐ߲ ߣߌ߫ ߖߎ߬ߟߊ߬ߦߊ ߞߏߢߊ ߟߎ߫ ߟߋ߬ ߘߌ߫، ߊ߬ߟߋ ߟߊ߫ ߝߐߟߌ߫ ߘߐ߫߸ ߡߍ߲ ߠߎ߬ ߞߊ߬ ߛߘߋߦߊߥߏ ߟߊߘߊ߲߫߸ ߏ߬ ߟߎ߬ ߤߊߡߌ߲ ߕߘߍ߬ ߡߍ߲ ߘߌ߫߸ ߝߘߊ߬ߝߌ߲߬ߠߊ߫ ߕߟߋ߬ߓߋ ߦߋ߫ ߝߘߏ߬ߓߊ߬ ߟߐ߯ߝߍ ߛߐ߬ߘߐ߲߬߸ ߡߍ߲ ߘߌ߫ ߛߋ߫ ߥߙߎߞߌ ߟߊߣߐ߰ߦߊ߬ ߟߊ߫߸ ߞߊ߬ ߛߐ߬ߘߐ߲ ߓߊߛߌ߰߸ ߞߵߊ߬ߟߎ߬ ߛߋߞߏ ߞߍ߫ ߖߐ ߣߌ߫ ߖߛߎ߬ߛߎߡߊ ߘߐ߫.

ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߊ߲߫ ߘߊ߫ ߝߣߊ߫ ߞߊ߬ ߞߎߡߊ߫ ߓߌ߲߬ߓߊ߬ߥߏ߬ ߞߏ ߞߊ߲߬߸ ߓߌ߲߬ߓߊߥߏ ߡߍ߲ ߦߋ߫ ߕߊ߬ ߟߊ߫ ߖߡߊ߬ߣߊ ߘߏ߫ ߟߎ߫ ߞߊ߲ߡߊ߬ ߛߐ߲߬ ߞߊ߬ߣߌ߲߬، ߊ߬ ߞߊ߲߫ ߞߏ߫ <<ߓߌ߲߬ߓߊ߬ߥߏ߬ ߞߏ ߣߌ߲߬ ߕߍ߫ ߓߐߘߊ߫ ߘߌ߫.>> ߊ߬ ߞߵߏ߬ ߦߌ߬ߘߊ߬߸ ߞߵߊ߬ ߟߴߊ߬ ߞߊ߲߬ ߞߏ߫ ߓߌ߲߬ߓߊߥߏ ߞߊ߫ ߞߊ߲߫ ߞߊ߬ ߓߌ߬ߟߊ߬ ߟߊ߬ߓߊ߲ ߠߋ߬ ߟߊ߫߸ ߒ ߡߴߊ߬ ߞߍߢߊ߫ ߟߐ߲ ߞߐߝߍ߬ ߝߋߎ߫، ߓߊ߬ߙߌ߬߸ ߛߐ߰ ߡߊ߲߫ ߞߊ߲߫ ߞߊ߬ ߞߍ߫ ߓߌ߲߬ߓߊ߬ߥߏ߬ ߞߏ ߡߊ߬.

ߖߌ߬ߣߍ߬ ߞߊ߲ߕߌ߮ ߟߊ߫ ߝߐߟߌ߫ ߘߐ߫߸ ߓߌ߲߬ߓߊߥߏ ߣߌ߲߬ ߞߐߝߟߌ ߦߋ߫ ߛߐ߰ ߟߊ߫ ߘߋ߲ߣߍ߲ ߠߎ߫ ߟߋ߬ ߡߊ߬ ߞߊ߬ߙߊ߲߬ߕߊ ߟߎ߬ ߟߊ߫߸ ߡߏ߬ߛߏ ߟߎ߫ ߟߋ߬ ߡߊ߬ ߟߐ߯ߝߍ ߟߎ߬ ߘߐ߫߸ ߛߣߍ߬ߞߍ߬ߟߊ ߟߎ߫ ߟߋ߬ ߡߊ߬ ߝߏ߬ߘߏ ߟߎ߬ ߘߐ߫߸ ߓߊ߯ߙߊߞߍߟߊ ߟߎ߫ ߡߊ߬ ߓߊ߯ߙߊ߫ ߘߊߞߎ߲ ߠߎ߬ ߘߐ߫߸ ߊ߬ ߣߌ߫ ߖߊ߲߬ߞߊ߬ߙߏ߬ߕߐ ߟߎ߫ ߟߋ߬ ߡߊ߬ ߛߋߒߕߊ߲ߧߊ ߘߐ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߓߊߛߌ߫ ߕߍ߫ ߘߊ߲ߘߊߛߏ ߟߎ߬ ߟߊ߫߸ ߓߊߟߏ߫ ߞߏ ߟߎ߫ ߜߍ߬ߟߍ߲߬ߡߊ߲߬߸ ߐ߲߬ߤߐ߲߫߸ ߣߌ߫ ߕߊ߯ߡߊ ߣߌ߫ ߖߌ߰ߣߌ߬ߦߟߍ ߘߐߜߟߍ߬ߦߊ߬ ߘߊ߫ ߖߡߊ߬ߣߊ ߟߎ߬ ߕߍ߫ ߏ߬ ߘߐ߫߸ ߞߊ߬ ߓߊ߲߫ ߞߊ߬ ߛߐ߬ߘߐ߲ ߓߌ߲߬ߓߊߥߏ ߟߊ߫ ߏ߬ ߘߟߊ߫߸ ߦߴߊ߬ ߟߐ߲߫ ߜߟߍ߬ߦߊ ߟߋ߬ ߟߊߣߍ߲߫ ߜߟߍ߬ߦߊ ߞߊ߲߬ ߏ߬ ߘߌ߫ ߘߋ߬.

ߒ߬ߓߊ߬߸ ߟߊ߬ߘߍ ߞߎ߲߬ߝߊ߮ ߟߋ߬ ߞߍߕߐ߫ ߊ߬ ߦߌ߬ߘߊ߬ ߟߊ߫ ߛߊ߫߸ ߞߊ߲ߕߌ߮ ߣߐ߬ ߞߎߡߊ ߡߍ߲ ߠߎ߬ ߝߐ߫ ߟߊ߫߸ ߞߊ߬ ߓߎ߲߬ ߘߊߘߐߖߊߥߏ ߝߊ߲߬ߞߊߘߏ߲߬ ߞߏ ߡߊ߬߸ ߊ߬ ߣߌ߫ ߣߊ߲߬ߝߟߏ߬ߦߊ߬ߟߌ ߣߌ߫ ߛߐ߬ߘߐ߲ ߞߏߢߊ ߟߎ߬ ߘߊߘߐߓߍ߲߬ ߞߊ߲ߡߊ߬߸ ߣߴߏ߬ ߞߎߡߊ ߟߎ߬ ߘߌ߫ ߕߊ߬ ߓߊ߫ ߘߐ߫ ߛߘߋߦߊߥߏ ߓߟߏ߫߸ ߥߟߴߊ߬ ߕߍ߫ ߕߊ߬߸ ߏ߬ ߟߐ߲ߕߐ߫ ߟߊ߬ߘߍ ߞߎ߲߬ߝߊ߮ ߟߋ߬ ߘߐ߫.