ߛߣߍ߬ߜ߭ߊ߬ߟߌ߬ ߞߊ߲ߕߌ߮߸ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߓߘߊ߫ ߝߌߘߊ ߓߐ߫ ߊ߬ ߟߊ߫ ߞߎ߲߬ߠߊ߬ߛߌ߰ ߞߎߘߊ ߕߐ߮ ߢߍߡߊ߬ ߞߐ߬ߓߊ߬ߟߏ߲ ߣߌ߲߬ ߡߊ߬߸ ߂߀߂߆ ߥߊ߬ߛߌ߬ߥߙߊ߬ ߕߟߋ߬ ߁߭߸ ߡߍ߲ ߠߎ߬ ߟߊ߫ ߞߎ߲߬ߧߊ ߦߋ߫ ߊߤߑߡߊߘߎ߫ ߊ߬ߟ ߊߡߌߣߎ ߡߏ߬ߤߊ߬ߡߍ߬ߘ ߟߏ ߓߟߏ߫، ߞߎ߲߬ߠߊ߬ߛߌ߰ ߞߎߘߊ ߢߌ߲߬ ߠߎ߬ ߕߐ߮ ߟߊߛߋ߫ ߘߊ߫ ߛߣߍ߬ߜ߭ߊߟߌ߫ ߝߊ߬ߛߏ ߖߌ߬ߦߊ߬ߞߊ߲߬ߛߏ߬ߓߊ ߝߙߍߕߍ߫ ߁߭ ߟߋ߬ ߟߊ߫߸ ߞߵߊ߬ ߛߐ߬ߘߐ߲߬ ߔߊߛߑߕߍߝ ߞߙߎߞߊ ߣߌ߫ ߞߊ߲ߕߌ߯ߘߊ ߕߍ߫ ߓߍ߲߬ߓߊ߫ ߘߐ߫߸ ߊ߬ߟߋ ߡߍ߲ ߦߋ߫ ߖߡߊ߬ߣߊ ߓߘߍ߬ߓߘߍ߬ߟߌ߬ ߞߙߎߞߊ ߟߎ߬ ߘߐ߫ ߓߏ߲߬ߓߊ ߘߌ߫ ߕߋ߲߬߸ ߊ߬ ߣߌ߫ ߛߋߓߊ߯ߦߊ ߖߍ߬ߘߍ ߟߊ߫ ߢߌ߲߬ߢߊ ߞߐߞߟߏ.

ߞߙߎ߫ ߞߎߘߊ ߡߍ߲ ߦߋ߫ ߣߌ߲߬߸ ߞߏߕߌ߯ ߃߀ ߟߋ߬ ߦߴߊ߬ ߞߣߐ߫، ߊ߬ ߝߐߣߴߊ߬ߟߋ ߟߋ߬ ߡߊ߬߸ ߞߏ߫ ߞߎ߲߬ߠߊ߬ߛߌ߰ ߞߎߘ߫ߊ ߣߌ߲߬ ߦߋ߫ <<ߛߓߍߘߟߊߛߋߒߞߏߟߊ ߣߌ߫ ߓߘߍ߬ߓߘߍ߬ߟߌ>> ߞߙߎ ߟߋ߬ ߘߌ߫ ߝߛߊߦߌ߫، ߞߊ߬ߕߎ߲߯߸ ߞߊ߲ߕߌ߯ ߣߴߊ߬ ߣߐ߬ߟߊ ߦߴߊ߬ ߞߊ߲߬ ߞߵߊ߬ߟߎ߬ ߟߊ߫ ߞߏ ߟߎ߬ ߟߋ߬ ߕߵߊ߬ߟߎ߬ ߟߊ߫ ߟߊ߬ߕߍ߰ ߞߎߟߎ߲ ߞߣߐ߫ ߣߌ߲߬߸ ߊ߬ߟߎ߬ ߣߌ߫ ߎߛߑߡߊߣߌ߲߫ ߛߐ߲ߞߏ߫ ߟߊ߫ ߜߐ߬ߛߐ߲߬ߞߐ ߞߐ ߣߌ߲߬ ߘߐ߫߸ ߏ߬ ߡߍ߲ ߓߘߊ߫ ߞߍ߫ ߝߊ߬ߛߏ߬ ߜߙߊ ߞߊ߲ߕߌ߮ ߘߌ߫.

ߎߛߑߡߊߣ ߛߐ߲ߞߏ߫ ߣߌ߫ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߞߊ߬ ߢߐ߲߯ߦߋ ߡߍ߲ ߞߍ߫߸ ߓߍ߲߬ ߡߊ߫ ߞߍ߫ ߞߋߟߋ߲߫ ߘߐ߫ ߦߋ߲߬، ߔߊߛߑߕߍߝ ߞߵߊ߬ ߟߊߛߋ߫ ߏ߬ ߘߐ߫߸ ߞߏ߫ ߊ߬ߟߎ߬ ߟߊ߫ ߡߐ߰ ߛߌ߫ ߕߍߣߊ߬ ߛߐ߬ߘߐ߲߬ ߠߊ߫ ߞߎ߲߬ߠߊ߬ߛߌ߰ ߞߎߘߊ߫ ߛߏ߯ߙߏߕߊ ߘߐ߫، ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߡߐ߰ ߞߎ߲߬ߞߋߟߋ߲ ߡߍ߲ ߠߎ߬ ߘߏ߲߬ ߝߣߊ߫ ߓߊ߯ ߛߐ߬ߘߐ߲߫ ߊ߬ ߘߐ߫߸ ߞߙߎߞߊ ߞߊ߲ߞߕߐߡߊ߬߸ ߏ߬ ߦߴߏ߬ ߞߋߟߋ߲߫ ߞߎ߲߬ߞߏ ߟߋ߬ ߘߌ߫߸ ߞߙߎߞߊ ߣߴߊ߬ ߞߣߐ߫ ߖߡߊ ߣߍ߬ ߛߌ߫ ߕߴߏ߬ ߘߐ߫.

ߔߊߛߑߕߍߝ ߟߊ߫ ߜߍ߫ ߘߐ߫ ߞߎߡߊ ߏ߬ ߓߍ߯ ߣߴߊ߬ ߕߊ߫߸ ߊ߬ߟߎ߬ ߟߊ߫ ߡߐ߰ߘߐ߬ߜߍ߬ ߛߌߦߊߡߊ߲߫߸ ߥߟߊ߫ ߡߐ߰ ߘߴߊ߬ ߝߐ߫ ߊ߬ߟߎ߬ ߟߊ߫ ߞߙߎߞߊ ߡߊߛߎ߬ߘߎ߲߬ߧߊ߬ ߡߐ߰ ߛߌߦߊߡߊ߲߫߸ ߏ߬ ߟߎ߬ ߕߐ߮ ߦߋ߫ ߞߎ߲߬ߠߊ߬ߛߌ߰ ߞߎߘߊ ߣߌ߲߬ ߛߙߍߘߍ ߘߐ߫، ߦߏ߫ ߦߊ߲ߞߏߓߊ߫ ߖߡߋ߬߸ ߏ߬ ߡߍ߲ ߞߍߣߍ߲߫ ߣߊ߲߬ߕߌ߰ ߝߊ߲ߞߊ ߟߎ߬ ߞߏߕߌ߮ ߘߌ߫، ߌߓߙߊߤߌߡߊ߬ ߛߌ ߓߌ߬ߟߊ߬ߣߍ߲߫ ߜߋߙߋ߲ߜߋߙߋ߲ߧߊ ߟߋ߬ ߞߎ߲߬ߠߊ߫߸ ߞߊ߬ ߡߎߛߊ߫ ߓߊ߬ߟߊ ߝߏߝߣߊ߫ ߓߌ߬ߟߊ߬ ߛߏߟߐ ߞߎ߲߬ߠߊ߫߸ ߞߊ߬ ߓߊ߲߫ ߞߊ߬ ߊߓߑߘߎߟ ߊߤߊߘ ߒߖߊߦߌ߬ ߓߌ߬ߟߊ߬ ߛߊ߲ߡߟߊ ߣߌ߫ ߘߎ߰ߡߊ߬ߟߊ ߡߊ߬ߘߏ߬ߣߌ߲߬ߠߌ߲ ߞߎ߲߬ߠߊ߫، ߡߐ߱ ߡߍ߲ ߠߎ߬ ߦߋ߫ ߣߌ߲߬߸ ߊ߬ߟߎ߬ ߓߘߴߊ߬ߟߎ߫ ߖߘߍ߬ ߦߋ߫ ߓߘߍ߬ߓߘߍ߬ߟߌ ߝߙߋߞߋ ߟߋ߬ ߕߍߡߊ߬ ߏ߬ ߘߌ߫، ߓߊߏ߬߸ ߞߙߎߞߊ ߞߊ߲߫ ߞߏ߫ ߊ߬ߟߎ߬ ߞߊߣߊ߬ ߛߐ߬ߘߐ߲߫ ߊ߬ ߘߐ߫߸ ߊ߬ߟߎ߬ ߓߘߊ߫ ߛߐ߬ߘߐ߲߫ ߊ߬ ߘߐ߫ ߊ߬ߟߎ߫ ߖߘߍ߬ߞߊߣߌ߲ ߡߙߌߦߊ ߟߊ߫.

ߞߙߎ߫ ߞߎߘߊ ߢߌ߲߬ ߠߎ߬ ߘߐ߫߸ ߞߏߕߌ߯ߘߊ ߡߍ߲ ߡߐ߬ߟߐ߲ ߓߏ߲߬ߓߴߊ߬ ߓߍ߯ ߘߌ߫ ߝߊߦߌߘߊ߫߸ ߏ߬ ߟߋ ߦߋ߫ ߛߐ߬ߘߐ߲ ߣߌ߫ ߣߊ߲߬ߝߟߏ߬ߦߊ߬ߟߌ ߞߏߕߌ߯ߘߊ߸ ߊ߬ ߣߌ߫ ߞߓߊߕߟߎ ߣߌ߫ ߜߟߐߡߌ߲، ߊ߬ ߘߏ߲߬߸ ߛ߭ߍߞ ߘߌߓߊ߬ ߟߋ߬ ߦߋ߫ ߡߊ߬ߞߐ߬ߙߐ߲߬ߞߐ߫߬ߙߐ߲߬ߠߌ߲ ߣߌ߫ ߝߊ߲߬ߝߘߊ߬ߦߊ߬ߟߌ ߣߌ߫ ߣߊ߲߬ߝߟߏ߬ߦߊ߬ߟߌ ߞߎ߲߬ߠߊ߫߸ ߊߓߘߎߙߊߤߑߡߊߣߌ߲߬ ߖߎߝ ߡߍ߲ ߦߋ߫ ߞߏߥߊߟߛߌߦߐ߲ ߖߏ߬ߡߊߦߌ߬ ߔߑߙߋߖ߭ߌߘߊ߲ ߛߌ߲߬ߝߏ߲ ߘߏ߫ ߘߌ߫߸ ߏ߬ ߟߋ ߦߋ߫ ߜߟߐߡߌ߲ ߣߌ߫ ߞߓߊߕߟߎ ߞߎ߲߬ߠߊ߫، ߊ߬ߟߎ߬ ߓߘߊ߫ ߢߣߊߕߐߡߐ߲ߠߌ߲ ߏ߬ ߞߍ߫߸ ߞߵߊ߬ ߛߐ߬ߘߐ߲߬ ߛߣߍ߬ߜ߭ߊߟߌ߫ ߦߴߊ߬ ߝߍ߬ ߞߵߊ߬ ߟߊ߫ ߘߎ߰ߘߐ߬ ߝߋ߲ ߠߎ߬ ߕߣߐ߬ߓߐ ߘߊߡߌ߬ߣߊ߬ ߓߘߍߓߘߍߞߍ߬ ߥߊߦߌ߲ ߣߌ߫ ߞߓߊߕߟߎ ߟߎ߬ ߘߐ߫߸ ߊ߬ ߣߴߊ߬ߟߎ߬ ߣߌ߫ ߘߎߢߊ߫ ߡߊߣߊ߲ߞߎ߲ߘߊ ߝߣߊ߫ ߦߋ߫ ߘߊߘߐߖߊߥߏ߫ ߞߊ߲߬ ߞߊ߬ ߓߍ߲߬ ߊ߬ߟߎ߬ ߟߊ߫ ߖߟߎ߬ ߞߏ߬ ߜߟߍߦߊ ߣߌ߲߬ ߡߌ߬ߣߊ߬ ߢߊ ߡߊ߬.

 ߡߊߞߑߕߊߙ ߛߌ߬ߛߋ߫ ߟߋ߬ ߓߌ߬ߟߊ߬ߣߍ߲߫ ߞߣߐߟߊ ߣߌ߫ ߝߘߏ߬ߓߊ߬ ߟߊ߬ߞߊ߲߬ߘߊ߬ߟߌ ߞߎ߲߬ߠߊ߫߸ ߢߊ ߦߴߏ߬ ߝߣߊ߫ ߝߍ߫߬ ߣߌ߲߬ ߞߏ ߘߐ߫ ߞߏߛߓߍ߫، ߊ߬ߟߋ ߦߋ߫ ߞߏߕߌ߯ ߞߘߐ ߟߋ߬ ߘߌ߫ ߡߊߞߌ߫ ߛߊߟ ߕߋ߬ߟߋ ߘߐ߫، ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߞߏߕߌ߯ ߞߎߘߊ ߢߌ߲߬ ߠߎ߬ ߛߏ߯ߙߏߣߍ߲߫ ߝߊ߬ߘߌ߬ ߛߌߦߊߡߊ߲߫ ߠߋ߬ ߘߐ߫߸ ߛߋߒߞߏߟߦߊ ߘߝߊߣߍ߲ ߠߊ߫.

ߡߐ߰ ߜߘߍ߫ ߝߣߊ߫ ߦߋ߫ ߞߏߕߌ߮ ߢߌ߲߬ ߠߎ߬ ߘߐ߫߸ ߡߍ߲ ߠߎ߬ ߡߊ߫ ߓߐ߫ ߊ߬ߟߎ߫ ߣߐ߭ ߘߐ߫، ߦߏ߫ ߡߎߛߑߕߊ߬ߝߊ߫ ߖߌ߬ߙߊ߬ߛߌ߫߸ ߏ߬ ߕߎ߲߬ ߦߋ߫ ߡߊ߬ߡߌ߬ߘߊ߬ߟߌ߬ߟߊ ߟߋ߬ ߘߌ߫ ߂߀߂߄ ߞߊ߲ߕߌ߯ ߢߣߊߕߊߟߌ ߝߍ߬߸ ߦߊ߬ߣߴߊ߬ ߦߋ߫ ߔߊߛߑߕߍߝ ߞߐߡߊߓߌ߲ߓߌ߲߫، ߊ߬ߟߋ ߕߏ߫ ߘߴߊ߬ ߣߐ߭ ߘߐ߫ ߝߊ߬ߛߏ ߟߊ߬ߞߟߏ߬ߞߟߏ߬ߟߌ ߞߏߕߌ߯ߘߊ ߟߊ߫. ߛ߭ߍߞ ߕߌ߬ߖߊߣ ߖߍߦߋ߬߸ ߏ߬ ߝߣߊ߫ ߦߋ߫ ߔߊߛߑߕߍߝ ߞߐߡߊߓߌ߲ߓߌ߲ߓߊ߮ ߘߏ߫ ߟߋ߬ ߘߌ߫ ߞߊ߲ߕߌ߯ ߢߣߊߕߊߟߌ߫ ߕߊ߬ߡߌ߲߬ߣߍ߲ ߝߍ߬߸ ߏ߬ ߝߣߊ߫ ߕߏ߫ ߘߴߊ߬ ߣߐ߭ ߘߐ߫ ߛߊߣߌ߲ߧߊ ߣߌ߫ ߥߋ߲߬ߛߋ߲ ߠߎ߬ ߞߏߕߌ߯ߘߊ ߟߊ߫.

ߞߎ߲߬ߠߊ߬ߛߌ߰ ߞߎߘߊ ߡߍ߲ ߦߋ߫ ߣߌ߲߬߸ ߡߛߏ߬ ߣߊ߯ߣߌ߲߫ ߠߋ߬ ߦߴߊ߬ ߘߐ߫: ߡߊ߬ߙߌ ߊ߲߬ߖ߭ߋ߬ߟߌߞ ߡߊߡ ߛߍߟߑߓߋ ߖߎߝ߸ ߏ߬ ߦߋ߫ ߞߐߙߍ ߟߎ߫ ߞߎ߲߬ߠߊ߫߸ ߖߌߙߍ߬ߦ ߞߑߟߏߕߌߟߘ ߞߏߟߌ߫ ߦߋ߫ ߘߋ߲ߡߌߛߍ߲ߧߊ߫ ߣߌ߫ ߝߊ߬ߘߌ߬ߡߊ߬ߞߟߏ ߞߎ߲߬ߠߊ߫߸ ߊߡߌ߬ ߡߊ߰ߙߊ ߦߋ߫ ߡߐ߲ߠߌ߲ ߞߎ߲߬ߠߊ߫߸ ߊ߬ ߣߌ߫ ߞߎ߲߬ߓߊ߬ ߖߐߔ ߝߣߊ߫ ߦߋ߫ ߟߐ߲ߠߌ߲ߦߊ ߣߌ߫ ߝߊ߬ߗߍ߫ ߘߝߐ߬ߡߊ ߟߎ߫ ߞߎ߲߬ߠߊ߬.

ߊ߬ ߓߘߊ߫ ߦߌ߬ߘߊ߬ ߞߏ߫ ߞߏߕߌ߯ ߞߎߘߊ ߢߌ߲߬ ߠߎ߬ ߟߊ߫ ߞߏߕߌ߯ ߟߊߘߍ߫ ߝߟߐ ߓߍߣߊ߬ ߞߍ߫ ߛߌ߬ߣߌ߲߬ߟߏ߲ ߂߀߂߆ ߥߊ߬ߛߌ߬ߥߙߊ ߕߟߋ߬ ߅، ߊ߬ߟߎ߬ ߟߊ߫ ߟߊ߬ߘߍ ߏ߬ ߟߋ ߞߍߕߐ߫ ߞߎ߲߬ߠߊ߬ߛߌ߰ ߞߎߘߊ ߟߊ߫ ߞߍߕߊ߫ ߖߏߣߊ ߟߎ߬ ߝߐ߫ ߟߊ߫ ߛߐ߬ߘߐ߲ ߛߌߟߊ ߝߍ߬߸ ߜߟߐߡߌ߲ ߛߌߟߊ ߝߍ߬߸ ߡߊ߬ߙߊ ߛߌߟߊ ߝߍ߬߸ ߞߵߊ߬ ߛߐ߬ߘߐ߲߬ ߓߍ߲߬ߓߊ߫ ߕߍ߫ ߞߊ߲ߕߌ߯ߘߊ ߣߌ߫ ߔߊߛߑߕߍߝ ߕߍ߫.