ߞߏߕߌ߯ ߟߊߘߍ ߟߋ߬ ߕߎ߲߬ ߦߴߌߘߐ߫ ߜ߭ߊߓߐ߲߫ ߖߡߊ߬ߣߊ ߞߣߐ߫߸ ߣߴߊ߬ ߟߊ߬ߘߍ ߞߎ߲߬ߠߊߛߌ߰ߣߍ߲߫ ߕߘߍ߬ ߞߊ߲ߕߌ߮ ߓߟߏ߫߸ ߓߙߌߛ ߞߑߟߏߕߍߙ ߏߟߖߌ߫ ߒߖߋߡߊ߫، ߒ߬ߓߊ߬߸ ߓߍ߲߬ ߞߍ߫ ߘߴߊ߬ ߡߊ߬ ߦߋ߲߬ ߠߋ߬߸ ߞߏ߫ ߞߊ߬ ߝߘߊ߬ߝߌ߲߬ ߝߊߘߌߦߊߓߐ ߘߏ߲߭ ߞߍ߫ ߘߌߦߊߜߏߦߊ ߘߌ߫ ߛߌ߬ߣߌ߲߬ߟߏ߲ ߓߍ߯ ߡߊ߬ ߖߡߊ߬ߣߊ ߓߊ߯ߙߊ߫ ߘߌ߲ߞߌߙߊ ߟߎ߬ ߘߐ߫ ߜ߭ߊߓߐ߲߫ ߞߣߐ߫.

ߞߊ߬ ߓߍ߲߬ ߛߌ߰ߞߊ߲ ߕߐ߲ߛߋ߲ ߉߅߲ ߡߊ߬߸ ߟߊ߬ߕߍ߰ߦߊ ߘߏ߫ ߟߊߓߐ߫ ߘߊ߫ ߞߊ߬ ߖߡߊ߬ߣߊ ߟߐ߲ߠߌ߲ߦߊ ߟߎ߬ ߛߊ߲ߞߘߐߕߊ߭ ߞߍ߫ ߛߋ߲ߛߋߘߋ߲ ߘߌ߫ ߝߘߏ߬ߓߊ߬ ߡߊ߬ߡߙߊ߬ߟߌ߬ߘߊ ߟߎ߫ ߞߊ߲߬، ߟߊ߬ߛߋ߬ߟߌ߬ ߟߊ߬ߓߊ߲ ߦߴߊ߬ ߦߌ߬ߘߊ߬ ߟߊ߫߸ ߞߏ߫ ߡߙߌߘߐ ߣߌ߲߬ ߕߊ߬ ߞߎ߲ ߠߋ߬ <<ߞߊ߬ ߖߡߊ߬ߣߊ ߝߊߘߌߦߊߓߐ ߟߎ߫ ߓߌ߬ߟߊ߬ ߓߊ߫ ߘߐ߫߸ ߊ߬ ߣߌ߫ ߜ߭ߊߓߐ߲߫ ߟߐ߲ߠߌ߲ߦߊ ߟߎ߬>> ߊ߬ ߣߌ߫ ߞߊ߬ ߖߡ߬ߊߣߊ ߝߊ߰ߣߌ߲߬ ߓߊ߰ߙߊ߬ߟߊ ߟߎ߬ ߝߣߊ߫ ߟߊ߫ ߓߊ߯ߙߊ ߘߌߦߊߘߏ߲߬ ߊ߬ߟߎ߬ ߘߐ߫ ߞߵߊ߬ߟߎ߬ ߞߟߊߓߎߘߏ߲߬.

ߟߊ߬ߕߍ߰ߦߊ ߣߌ߲߬ ߡߊ߫ ߘߊ߲߬ ߊ߬ ߝߐ ߡߊ߬ ߕߋ߲߬ ߘߋ߬߸ ߞߏ߫ ߞߊ߬ ߓߘߊ߫ ߝߊ߯ߣߌ߲ ߠߎ߫ ߟߋ߬ ߘߏ߲߬، ߊ߬ ߞߊ߬ ߝߊ߰ߣߌ߲ ߛߎ߯ߦߊ ߟߎ߬ ߝߣߊ߫ ߘߊ߲߬ߠߊߕߍ߰߸ ߛߊ߫ ߕߊ߲߬ߞߊ߬ ߘߌ߫ ߞߍ߫ ߢߋ߰ߓߎ߬ ߞߏ ߟߎ߬ ߡߊ߬ ߢߊ ߡߍ߲ ߡߊ߬، ߣߌ߫ ߗߍ߭ ߟߋ߬߸ ߏ߬ ߕߊ ߦߋ߫ ߘߙߌ߬ߞߌ ߣߌ߫ ߞߙߎ߬ߛߌ ߟߋ߬ ߞߙߊߣߍ߲ ߘߌ߫߸ ߞߊ߲ߘߐߖߊ߫ ߞߏ߫ ߕߴߊ߬ ߘߐ߫، ߊ߬ ߘߌ߫ ߛߋ߫ ߞߍ߫ ߟߊ߫ ߘߙߌ߬ߞߌ߬ߓߊ ߘߌ߫߸ ߥߟߊ߫ ߞߊ߬ ߡߊ߬ߢߍ߯ߙߍ߫ ߟߎ߫ ߓߌ߬ߟߴߊ߬ ߟߊ߫߸ ߡߍ߲ ߠߎ߬ ߣߌ߫ ߝߊ߰ߣߌ߲ ߘߌ߫ ߥߊ߫، ߓߐ߰ߟ߲ߊ ߘߌ߫ ߛߋ߫ ߘߏ߲߬ ߠߊ߫߸ ߘߊߟߌߓߊ ߟߎ߬ ߣߌ߫߸ ߥߊߞߑߛߌ، ߣߌ߫ ߡߏ߬ߛߏ ߟߎ߫ ߟߋ߬ ߘߏ߲߬ ߦߋ߫߸ ߦߊߦߏ ߛߐ߰ߣߍ߲߬ ߞߏ߬ߢߌߡߊ߸ ߡߛߏ߬ ߝߊ߯ߣߌ߲ ߞߊ߲߬ߓߍ߲ ߕߊ߰ߝߋ ߣߴߊ߬ ߘߙߌ߬ߞߌ، ߖߊ߬ߟߊ ߡߍ߲ ߠߎ߬ ߦߋ߫ ߝߘߊ߬ߝߌ߲߬ ߕߊ ߟߎ߬ ߘߌ߫߸ ߏ߬ ߟߎ߬ ߝߣߊ߫ ߟߊߘߌ߬ߢߍ߬ߣߍ߲߬.

 ߝߘߊ߬ߝߌ߲߬ ߝߊ߰ߣߌ߲߬ ߘߏ߲ ߣߌ߲߬ ߘߐ߫߸ ߖߡߊ߬ߣߊ ߛߏ߬ߙߌ߬ߡߊ߬ߘߋ߲ ߠߎ߬ ߕߴߊ߬ ߘߐ߫߸ ߥߛߊ߬ߘߊ߬ߕߌ߮ ߡߍ߲ ߠߎ߬ ߖߊߙߋߣߍ߲߫ ߝߊ߰ߣߌ߲߬ ߛߎ߯ ߞߋߟߋ߲߫ ߘߏ߲߭ ߠߊ߫߸ ߏ߬ ߟߎ߬ ߕߴߊ߬ ߘߐ߫.

ߊ߬ ߦߌ߬ߘߊ߬ߣߍ߲߫ ߞߏ߫ ߢߊ ߡߊߖߌ߰ߕߐ߫ ߊ߬ ߝߍ߬ ߟߋ߬ ߞߵߊ߬ ߜߋ߬ߟߎ߲߬ ߕߍߕߍߕߍ߫، <<ߗߋߢߊ߫ ߞߎ߲ߕߌ߮ ߟߎ߬߸ ߗߋߕߌ߮ ߟߎ߬߸ ߝߘߏ߬ߓߊ߬ ߗߋߕߌ߮ ߟߎ߬߸ ߏ߬ ߟߎ߫ ߟߋ߬ ߞߊ߫ ߞߊ߲߫ ߞߵߊ߬ߟߎ߬ ߢߊ ߕߏ߫ ߟߊ߬ߕߍ߰ߦߊ ߣߌ߲߬ ߞߣߐ߫ ߞߎߡߊ ߟߥߊߟߌ ߘߐ߫ ߛߎߡߍߛߎߡߍ߫߸ ߓߍ߯ ߦߴߊ߬ ߖߊ߲߬ߕߏ߫ ߊ߬ ߘߐ߫ ߊ߬ ߟߊ߫ ߓߊ߯ߙߊ߫ ߦߌߟߊ߫ ߘߐ߫.>> ߏ߬ ߝߐߣߍ߲߫ ߟߊ߬ߛߋ߬ߟߌ ߣߌ߲߬ ߞߣߐ߫.

ߟߊ߬ߕߍ߰ߦߊ ߣߌ߲߬ ߞߏ߬ߣߌ߲ ߕߊ߬ߣߍ߲߫ ߠߋ߬߸ ߞߵߊ߬ ߛߐ߬ߘߐ߲߬ ߓߊ߯ߙߊ߫ ߦߙߐ ߘߏ߫ ߟߎ߫ ߖߍ߬ߘߍ ߕߎ߲߬ ߓߘߴߊ߬ ߘߊߡߌ߬ߣߊ߬، ߜ߭ߊߓߐ߲߫ ߞߎ߲߬ߠߊ߬ߛߌ߮ ߞߏ߬ߣߌ߲ ߞߵߊ߬ ߟߊߥߟߌ߬ ߡߍ߲ ߡߊ߬߸ ߏ߬ ߟߋ ߖߡߊ߬ߣߊ ߟߐ߲ߠߌ߲ߦߊ ߟߎ߬ ߘߐߘߌߦߊ ߘߌ߫، ߝߏ߫ ߊ߬ߟߎ߬ ߓߘߊ߫ ߜߊ߬ߛߊ߫ ߛߌ߰ ߛߋ߲߬ߠߊ߫ ߝߘߊ߬ߝߌ߲߬ߠߊ߫ ߦߋߢߐ߲߯ߠߊ ߝߊߘߌߦߊߓߐ ߟߎ߬ ߟߊߘߊ߲ ߘߐ߫ ߖߡߊ߬ߣߊ ߞߣߐ߫.