ߞߐ߬ߟߏ߲ ߣߌ߲߬ ߡߊ߬߸ ߞߕߌߘߊ ߞߵߊ߬ ߟߊ߫ ߞߕߌߕߍ߰ ߞߊ߬ ߓߍ߲߬ ߛߑߕߋߝߊߣ ߊ߬ߜߙߋ߬ ߟߊ߫ ߞߏ ߡߊ߬߸ ߊ߬ߟߋ ߡߍ߲ ߡߊߟߐ߲ߣߍ߲߫ ߞߏ߫ ߊߔߎ߬ߗߎ߫ ߣߊ߬ߛߌߦߐߣߊߟ߸ ߊ߬ ߣߌ߫ ߟߌߦߐߣߍߟ ߊߞߏߓߋ߫߸ ߡߍ߲ ߝߣߊ߫ ߞߊ߲߬ߕߐ߮ ߦߋ߫ ߟߌߦߐߣߍߟ ߔߋ.ߛߋ.ߍߛ ߘߌ߫، ߡߐ߰ ߝߌ߬ߟߊ ߏ߬ ߟߎ߫ ߟߋ߬ ߖߊ߲߬ߞߌ߬ߣߍ߲߫ ߥߛߎߖߌ߲߫ ߓߊߟߊ߲ߣߍ߲ ߠߊ߫߸ ߞߵߊ߬ߟߎ߫ ߞߎ߲߬ߡߊ߬ߓߐ ߞߍ߫ ߓߌ߲߬ߓߊ߬ߥߏ߬ ߜߌߟߌ߲߫ ߛߊ߬ߙߊ ߘߌ߫ ߥߊߘߌߓߐ߫ ߜߏ߲ߛߊ߲ ߘߐ߫߸ ߊ߬ ߣߌ߫ ߡߙߌߘߐ߫ ߜߍߟߍ߲߫ ߛߌߦߊߡߊ߲߫.

ߊߔߎ߬ߗߎ߫ ߣߊߛߌߦߐߣߊߟ߸ ߛߊ߲߭ ߛߓߊ߬ ߥߛߎߖߌ߲߫ ߓߊߟߊߣߍ߲߫ ߠߋ߬ ߟߊߣߴߊ߬ߟߋ߫ ߞߎ߲߬߸ ߞߵߊ߬ ߟߴߊ߬ ߞߊ߲߬߸ ߊ߬ ߞߊ߫ ߞߊ߲߫ ߞߊ߬ ߛߍߝߊ ߞߋ߲߬ߥߟߎ߫ ߂߆߄ ߢߍ߬ߢߌ߲߬ߘߐ߬ߓߍ߲ ߠߋ߬ ߛߙߊ߬߸ߏ߬ ߡߍ߲ ߦߋ߫ ߓߍ߲߬ ߠߊ߫ ߖߌ߬ߣߍ߬ ߕߊߡߊ߲ ߄ ߁߇߀ ߇߃߅ ߀߀߀ ߡߊ߬، ߣߴߌ ߘߏ߲߬ ߞߊ߬ ߟߌߦߐߣߍߟ ߔߋ.ߛߋ.ߍߛ ߕߊ߬߸ ߊ߬ ߝߐߣߍ߲߫ ߞߏ߫ ߊ߬ߟߋ ߞߊ߫ ߞߊ߲߫ ߞߊ߬ ߛߊ߲߬ ߟߏ߯ߟߎ߫ ߥߛߎߖߌ߲߫ ߓߊߟߊ߲ߣߍ߲ ߠߋ߬ ߞߍ߫߸ ߊ߬ ߣߌ߫ ߊߔߎ߬ߗߎ ߟߊ߫ ߢߍ߬ߢߌ߲߬ߘߐ߬ߓߍ߲ ߓߍ߯ ߦߋ߫ ߞߋߟߋ߲߫߸ ߣߊߟߌ߬ߡߎ߲߫ ߛߍߝߊ ߞߋ߲߬ߥߟߎ߫ ߂߆߄ ߘߌ߫.

ߖߊ߲߬ߞߟߌ߬ߓߊ ߏ߬ ߟߎ߬ ߓߐߣߍ߲ ߊ߬ ߟߊ߫߸ ߞߕߌߘߊ ߞߵߊ߬ ߝߐ߫ ߝߣߊ߫߸ ߞߏ߫ ߞߵߊ߬ߟߎ߬ ߓߟߏߝߋ߲߫ ߛߌߦߊߡߊ߲߫ ߡߊߣߡߊߙߊ߫߸ ߡߐ߰ ߝߌ߬ߟߊ ߢߌ߲߬ ߠߎ߫ ߞߊ߬ߣߌ߲߬، ߟߌߦߐߣߍߟ ߔߋ.ߛߋ.ߍߛ ߡߍ߲ ߏ߬ ߘߌ߫߸ ߊ߬ߟߋ ߟߊ߫ ߞߐ߲߬ߛߏ߬ ߘߊߜߍߟߍ߲߫ ߛߊ߬ߓߊ߫ ߟߋ߬ ߡߌ߬ߣߊ߬ ߘߴߊ߬ ߟߊ߫ ߞߵߊ߬ ߝߙߋ߬ ߞߎ߲߬ߞߏ߬ߓߊ߬ߕߐ ߟߎ߬ ߓߟߏߝߋ߲ ߠߎ߬ ߡߊߡߊ߬ߙߊ ߣߴߊ߬ߟߎ߬ ߟߊߡߌ߬ߣߊ ߖߋ߬ߕߌ߰ߘߊ ߓߟߏ߫، ߊ߬ ߟߊ߫ ߜߍߓߏ߲ ߖߊ߬ߕߋ߬ߘߊ ߝߣߊ߫ ߡߊߣߡߊߙߊ߫ ߘߊ߫ ߟߋ߬.

ߞߕߌߘߊ ߓߊ߲߫ ߘߊ߫ ߝߣߊ߫߸ ߞߵߊ߬ ߖߊ߲߬ߞߌ߫߸ ߞߏ߫ ߊ߬ ߦߋ߫ ߛߍߝߊ ߞߋ߲߬ߥߟߎ߫ ߁߀߀ ߛߊ߬ߙߊ߫ ߞߵߏ߬ ߘߌ߫ ߜߋ߲ߞߐ߰ߖߌ߬ߘߊ ߞߎ߲߬ߠߊ߬ߛߌ߮ ߡߊ߬߸ ߊ߬ ߣߌ߫ ߛߍߝߊ ߞߋ߲߬ߥߟߎ߬ ߁߀߀ ߜߘߍ߫߸ ߞߵߏ߬ ߓߌ߬ߟߊ߬ ߟߏߣߊߛߌ ߟߊ߫ ߞߎ߲߬߸ ߏ߬߬ ߟߎ߬ ߡߍ߲ ߠߎ߬ ߦߋ߫ ߓߍ߲߬ ߠߊ߫ ߖߌ߬ߣߍ߬ ߕߊߡߊ߲ ߁ ߅߇߉  ߈߂߄ ߀߀߀ ߡߊ߬.

ߡߍ߲ ߓߍ߲߬ߣߍ߲߫ ߛߑߕߋߝߊߣ ߊ߬ߜߙߋ߬ ߕߊ߫ ߝߊ߲߭ ߡߊ߬߸ ߏ߬ ߝߣߊ߫ ߓߟߏߝߋ߲ ߠߎ߬ ߡߌ߬ߣߊ߬ ߘߊ߫߸ ߊ߬ ߟߊ߫ ߜߍߓߏ߲ ߖߊ߬ߕߋ߬ߘߊ߫ ߝߌ߬ߟߊ߸ ߊ߬ ߣߴߊ߬ ߟߊ߫ ߟߎ ߣߴߊ߬ ߟߊ߫ ߘߎ߱، ߞߊ߬ߕߎ߲߯߸ ߘߎ߱ ߝߌ߬ߟߊ߬ ߦߴߊ߬ ߓߟߏ߫ ߓߍ߲ߖ߭ߍߙߑߝ߭ߌߟ߸ ߞߋߟߋ߲߫ ߦߴߊ߬ ߓߟߏ߫ ߊߦߡߊ߫߸ ߊ߬ ߣߌ߫ ߞߋߟߋ߲߫ ߜߘߍ߫ ߝߣߊ߫ ߦߴߊ߬ ߓߟߏ߫ ߊߜߏߝ߭ߌߟ، ߊ߬ߟߋ ߝߣߊ߫ ߞߊ߫ ߞߊ߲߫ ߞߊ߬ ߛߍߝߊ ߞߋ߲߬ߥߟߎ߫ ߁߀߀ ߟߋ߬ ߛߊ߬ߙߊ߫ ߞߵߊ߬ ߘߌ߫ ߜߋ߲ߞߐ߰ߖߌ߬ߘߊ ߞߎ߲߬ߠߊ߬ߛߌ߮ ߡߊ߬߸ ߞߊ߬ ߞߋ߲߬ߥߟߎ߬ ߁߀߀ ߜߘߍ߫ ߝߣߊ߫ ߛߙߊ߬ ߞߵߏ߬ ߘߌ߫ ߟߏߣߊߛߌ ߡߊ߬.

ߊ߬ ߦߌ߬ߘߊ߬ ߘߊ߫ ߛߊ߬ߙߌ߬ߦߊ߬ ߓߟߏ߫ ߝߣߊ߫߸ ߞߏ߫ ߡߐ߰ ߝߌ߬ߟߊ ߢߌ߲߬ ߠߎ߬ ߟߊ߫ ߓߐߟߌ ߖߡߊ߬ߣߊ ߞߐߞߊ߲߬߸ ߏ߬ ߟߊߕߐ߲ߣߍ߲߫ ߠߋ߬ ߊ߬ߟߎ߫ ߡߊ߬߸ ߤߊ߲߯ ߛߊ߲߭ ߛߊ߬ߓߊ߫ ߖߊ߬ߕߋ߬، ߛߊ߲߭ ߛߊ߬ߓߊ ߏ߬ ߞߣߐ߫߸ ߊ߬ߟߎ߬ ߕߴߛߋ߫ ߢߣߊߕߊߟߌ߫ ߞߍ߫ ߟߊ߫߸ ߊ߬ߟߎ߬ ߕߴߛߋ߫ ߞߍ߫ ߟߊ߫ ߡߊ߬ߡߌ߬ߣߊ߬ߟߌ߬ߟߊ߫ ߝߣߊ߫ ߘߌ߫، ߏ߬ ߞߘߐ ߟߋ߬߸ ߊ߬ߟߎ߬ ߟߊ߫ ߘߎ߰ߘߋ߲߬ߧߊ ߤߊߞߍ ߣߌ߫ ߓߘߍ߬ߓߘߍ߬ߟߌ ߤߊߞߍ ߓߍ߯ ߟߋ߬ ߓߐߣߴߊ߬ߟߎ߬ ߓߟߏ߫.

ߡߙߌߘߐ߫ ߞߋߟߋ߲ ߣߌ߲߬ ߘߐ߫߸ ߛߊ߲߬ ߥߐ߯ߙߐ߫ ߞߣߐ߫߸ ߊ߬ߟߎ߬ ߕߴߛߋ߫ ߜߍߛߓߍ߫ ߞߍ߫ ߟߊ߫߸ ߊ߬ߟߎ߬ ߕߴߛߋ߫ ߞߍ߫ ߟߊ߫ ߟߊ߬ߓߊ߰ߙߊ߬ߟߌ߬ߟߊ߫ ߘߌ߫߸ ߊ߬ߟߎ߫ ߘߏ߲߬ ߕߍ߫ ߞߍ߫ ߗߋߕߌ߯ ߘߌ߫߸ ߞߎߡߊߕߍ߫ ߞߏ߫ ߊ߬ߟߎ߬ ߘߌ߫ ߛߋ߫ ߜߍߔߏ߲߫ ߔߍߔߘߍ ߘߏ߫ ߟߊߓߊ߯ߙߊ߫ ߟߊ߫.

ߞߕߌ ߣߌ߲߬ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߊ߬ ߦߌ߬ߘߊ߬ߣߍ߲߫ ߞߏ߫ ߡߐ߰ ߝߌ߬ߟߊ ߢߌ߲߬ ߠߎ߫ ߞߵߊ߬ ߟߊߢߌߣߌ߲߫ ߞߏ߫ ߊ߬ߟߎ߬ ߦߴߊ߬ ߝߍ߬ ߞߊ߬ ߞߕߌ ߣߌ߲߬ ߡߊߛߊ߬ߦߌ߲߬߸ ߞߕߌߡߛߊߦߌ߲ߘߊ ߟߊ߫، ߓߊߏ߬߸ ߊ߬ߟߎ߬ ߡߊ߫ ߓߍ߲߬ ߡߙߌߘߐ߫ ߕߊ߬ߣߍ߲ ߡߊ߬.