ߛߌ߬ߣߌ߲߬ߟߏ߲ ߡߍ߲ ߓߍ߲߬ ߘߊ߫ ߘߓߊ߬ߕߊ ߕߟߋ߬ ߁߅ ߡߊ߬߸ ߡߊ߬ߝߌ߲߬ߠߌ߲ ߥߙߍߓߊߓߊ ߟߋ߬ ߦߋ߫ ߘߊ߫ ߘߏߣߊߟ ߕߑߙߐ߲ߔ ߣߐ߬ ߘߊ߫߸ ߊ߬ߟߋ ߡߍ߲ ߦߋ߫ ߊߡߙߌߞߌ߬ ߞߊ߲ߕߌ߮ ߘߌ߫، ߞߵߏ߬ ߞߎ߲߭ ߞߍ߫ ߘߐ߬ߛߙߋ ߘߏ߫ ߟߊߖߍ߲ߛߍ߲ ߘߌ߫ ߓߟߐߟߐ ߞߊ߲߬߸ ߡߍ߲ ߦߋ߫ ߥߊߘߌ߫ ߞߏ ߘߏ߫ ߟߎ߫ ߦߌ߬ߘߊ߬߸ ߡߍ߲ ߞߍߣߍ߲߫ ߕߑߙߐ߲ߔ ߖߍ߬ߘߍ ߕߐ߮ ߘߐ߫.

ߘߐ߬ߛߙߋ ߣߌ߲߬ ߡߍ߲ ߦߋ߫ ߘߊ߫ ߓߍ߯ ߓߟߏ߫ ߓߌߟߏ߲߸ ߊ߬ ߦߴߏ߬ ߞߣߐ߫ ߞߏ߫ ߕߑߙߐ߲ߔ ߞߊ߬ ߥߊߘߌ߫ ߟߥߊ ߡߍ߲ ߞߍ߫ ߏ߬ ߟߏ߲߸ ߊ߬ ߕߊ߬ߡߌ߲߬ߣߍ߲߫ ߠߋ߬ ߘߟߊ߫ ߥߊߘߌ ߞߋ߲߬ߥߟߎ߫ ߂߀߀ ߟߊ߫߸ ߘߎߢߊ߫ ߣߊ߲߬ߝߟߏ߬ߕߌ߰ ߥߊߟߌߘߊ ߟߎ߬ ߛߋ߲߬ ߦߋ߫ ߡߍ߲ ߘߐ߫߸ ߦߏ߫ ߊߡߊߖ߭ߏߣ߸ ߊߔߋ߳ߟ߸ ߡߊߦߌߞߙߏߛߐߝߕ߸ ߊ߬ ߣߌ߫ ߤߊߟߌ߬ ߓߏߦߌ߲ߜ߭.

ߓߍ߯ߦߊߟߞߊ ߟߎ߬ ߟߊ߫ ߞߊ߲߬ߜߍ߬ ߡߛߏ ߌߟߌߖ߭ߊߓߍߕ ߥߏߙߍ߲߫ ߞߊ߬ ߣߌ߲߬ ߞߏ ߞߎߡߊ ߞߏ߫ ߟߋ߬ ߘߍ߬ߞߙߏߝߏ߫ ߌߞߛ ߞߊ߲߬߸ ߞߵߊ߬ ߝߐ߫ ߞߏ߫ <<ߞߊ߲ߕߌ߮ ߟߊ߫ ߦߙߎ߬ߞߎ߬ߦߙߎߞߎ ߦߋ߫ ߜߊ߬ߟߏ߬ߡߊ߬ߦߌߘߊ ߟߋ߬ ߘߌ߫ ߖߡߊ߬ߣߊ ߟߊ߫ ߟߊ߬ߞߊ߲߬ߘߊ߬ߟߌ ߡߊ߬.>> ߊ߬ ߞߵߊ߬ ߘߊߣߐ ߕߏ߫ ߊ߬ ߡߊ߬ ߝߣߊ߫߸ ߞߏ߫ ߘߏߣߊߟ ߕߑߙߐ߲ߔ ߟߊ߫ ߣߊ߲߬ߝߟߏ ߦߋ߫ ߊ߲߬ߝ߭ߌߘߌ߬ߦߊ߬ ߥߊߟߌߘߊ ߓߊ߯ߙߊ ߘߏ߫ ߟߎ߫ ߘߐ߫߸ ߊ߬ ߟߊ߫ ߞߎ߲߬ߠߊ߬ߛߌ߮ ߞߊ߬ ߡߙߌߘߐ ߘߏ߫ ߟߎ߫ ߝߣߊ߫ ߕߊ߬߸ ߞߊ߬ ߖߊ߬ߡߊߙߌ ߘߌ߫ ߊ߲߬ߝ߭ߌߘߌ߬ߦߊ߬ ߥߊߟߌߘߊ ߡߊ߬߸ ߊ߬ߟߎ߬ ߦߴߊ߬ߟߎ߬ ߟߊ߫ ߥߟߏߒߘߐ ߟߎ߬ ߝߙߋ߬ ߛߌ߯ߣߌ߲߬ ߡߊ߬، ߡߙߌߦߊ ߏ߬ ߘߌߦߊ߫ ߘߊ߫ ߓߊߟߋ߬ ߊ߲߬ߝ߭ߌߘߌ߬ߦߊ߬ ߟߊ߫߸ ߓߊߏ߬߸ ߊ߬ߟߎ߬ ߟߊ߫ ߝߋ߬ߙߋ ߕߐ߬ߣߐ ߥߙߊ߬ ߘߊ߫߸ ߊ߬ߟߎ߬ ߟߊ߫ ߝߋ߲ ߠߎ߬ ߛߐ߲߬ߞߐ ߜߟߍ߬ߦߊ߬ ߘߊ߫.

ߏ߬ ߢߊ߫ ߞߋߟߋ߲ ߠߋ߬ ߝߣߊ߫ ߡߊ߬߸ ߌߟߌߣߎߥߊ߫ ߞߎ߲߬ߠߊ߬ߛߌ߰ߟߊ߸ ߖ߭ߊߦߌߓߌ߬ ߔߙߌߕߑߞߍߙ ߞߵߊ߬ ߝߐ߫ ߘߏߣߊߟ ߕߑߙߐ߲ߔ ߡߊ߬ ߞߏ߫ <<ߊߡߙߌߞߌ߬ ߘߐ߬ߝߐ ߡߎ߰ߡߍ ߞߣߐ߫߸ ߊ߬ ߢߐ߲߰ ߞߊ߲ߕߌ߯ ߕߌߢߍߣߍ߲߫ ߕߴߦߋ߲߬.>> ߊߡߙߌߞߌ߬ ߛߘߞ ߜߘߍ߫ ߝߣߊ߫ ߞߊ߬ ߞߊ߲ߓߍ߲ߠߞߊ ߟߎ߬ ߟߊ߫ ߥߟߎ߬ߡߊ߬ߕߌ߮ ߣߌ߲߬ ߡߊߓߎ߬ߙߎ߲߬ߕߌ߫ ߟߋ߬ <<ߞߊ߬ ߕߏ߫ ߞߏߣߍ߲ ߠߎ߬ ߓߍ߯ ߕߣߐ߬ߓߐ߬ ߟߴߊ߬ ߛߐ߲߬ ߞߵߊ߬ ߖߎߝߊ ߟߝߊ߫.>>

 ߊ߬ ߓߍ߲߬ ߡߊ߬ߞߕߌ߬ߟߌ߬ ߓߊ߲ߓߊߟߌ ߢߌ߲߬ ߠߋ߬ ߡߊ߬ ߓߟߐߟߐ ߞߊ߲߬ ߛߊ߫߸ ߘߏߣߊߟ ߕߑߙߐ߲ߔ ߘߋ߲ߞߍ߫ ߝߟߐ ߣߌ߫ ߞߐߙߍ ߗߍߕߊߓߊ߮ (ߡߍ߲ ߕߎ߰ߣߍ߲߬ ߕߑߙߐ߲ߔ ߟߊ߫ ߞߏ ߟߎ߬ ߡߊߡߊ߬ߙߊ ߘߐ߫ ߞߐߙߍ ߞߣߐ߫)߸ ߏ߬ ߞߵߊ߬ ߦߌ߬ߘߊ߬ ߞߏ߫ ߡߊ߬ߝߌ߲߬ߞߊ߲߬ߠߊ ߢߌ߲߬ ߠߎ߬ ߣߌ߫ ߕߎ߬ߢߊ ߡߊ߫ ߛߌ߬ ߓߏ߲߫ ߞߋߟߋ߲߫ ߠߊ߫. ߊ߬ ߞߵߊ߬ ߝߐ߫ ߞߏ߫ ߊ߬ߟߎ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߬ ߟߊ߫ ߣߊ߲߬ߝߟߏ߬ߦߊ߬ߟߌ߬ ߓߊ߯ߙߊ ߓߍ߯ ߡߊߡߙߊ߬ߣߍ߲߫ ߣߊ߲߬ߝߟߏ߬ߦߊ߬ߟߌ߬ ߛߌ߲ߝߏ߲ߘߊ ߘߏ߫ ߟߋ߬ ߓߟߏ߫ ߝߎߦߋ߲ ߠߎ߬ ߡߊߣߊ߲ߞߎ߲ߘߊ ߘߏ߫ ߛߌߟߊ ߝߍ߬߸ ߤߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߞߐߙߍ ߛߋ߲߬ ߛߌ߫ ߕߴߊ߬ ߞߏ ߟߎ߬ ߘߐ߫ ߞߊ߬ ߓߍ߲߬ ߣߊ߲߬ߝߟߏ߬ ߟߊ߬ߘߏ߲ ߡߙߌߘߐ ߟߎ߫ ߡߊ߬، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫ <<ߞߵߊ߬ ߖߌ߰ ߛߐ߲߬ ߞߏ߫ ߕߑߙߐ߲ߔ ߞߐߙߍ ߟߋ߬ ߡߙߌߘߐ ߕߊ߬ ߟߊ߫ ߞߊ߬ ߓߍ߲߬ ߝߋ߲ ߘߏ߫ ߛߊ߲߬ ߞߏ ߡߊ߬ ߥߟߊ߫ ߝߋ߲ ߘߏ߫ ߝߙߋ߬ ߞߏ ߡߊ߬߸ ߏ߬ ߦߋ߫ ߥߎߦߊߜߍ ߟߋ߬ ߘߌ߫.>> ߊ߬ ߞߵߏ߬ ߟߋ ߝߐ߫.

ߝߐߢߐ߲߯ߞߐ ߣߌ߲߬ ߘߏ߲߬ ߓߍ߯ ߦߴߌߘߐ߫߸ ߘߏߣߊߟ ߕߑߙߐ߲ߔ ߞߎ߲߬ ߣߊ߲ߝߟߏ ߦߋ߫ ߦߍ߬ߟߍ ߟߋ߬ ߞߊ߲߬ ߕߎ߲߫، ߝߐߙߓ ߝߐ߰ߓߍ߬ߝߐ߯ߓߍ ߟߊ߫ ߝߐߟߌ߫ ߘߐ߫߸ ߊ߬ ߟߊ߫ ߥߊߘߌ ߛߋ߫ ߘߊ߫ ߟߋ߬ ߘߟߊ߫ ߥߟߎ߬ߡߊ߬ ߆،߅ ߘߐ߫ ߕߙߊߓߊ ߟߊ߫، ߏ߬ ߞߘߐ ߟߋ߬߸ ߊ߬ ߦߟߍ߬ ߘߊ߫ ߥߟߎ߬ߡߊ߬ ߁،߄ ߢߐ߲߰ ߠߋ߬ ߟߊ߫ ߛߊ߲߬ ߞߋߟߋ߲ ߞߣߐ߫.

ߞߎߡߊ߫ ߛߎ߮ ߢߌ߲߬ ߠߎ߫ ߘߏ߲߬ ߦߴߊ߬ ߦߌ߬ߘߊ߬ ߟߊ߫ ߟߋ߬߸ ߞߏ߫ ߊ߬ߝߐ߫ ߕߑߙߐ߲ߔ ߕߴߊ߬ ߖߊ߲ߓߊ߲߫ ߠߴߊ߬ ߟߊ߫ ߞߊ߲ߕߌ߯ߦߊ ߟߋ߬ ߞߘߐ߫ ߓߊ߬ ߞߵߊ߬ ߖߎߝߊ߫ ߞߣߐߟߊ ߟߝߊ߫ ߞߵߊ߬ ߟߊ߫ ߕߐ߬ߣߐ ߟߊߥߙߊ߬، ߏ߬ ߘߏ߲߬ ߕߍ߫ ߓߍ߲߬، ߊ߬ ߘߏ߲߬߸ ߢߣߊߕߊߟߌ ߟߋ߬ ߦߋ߫ ߛߎ߬ߘߎ߲߬ߧߊ ߞߊ߲߬ ߕߋ߲߬.