ߞߊ߲ߞߊ߲߫ ߂߀߂߆ ߓߊߘߎ߲ ߞߘߐߓߐߟߊ߲߫ ߝߟߐ ߘߟߊߞߊ߬ ߘߊ߫ ߞߐߛߑߣߊߞ ߞߊ߬ߙߊ߲߬ߕߊ ߟߋ߬ ߟߊ߫ ߥߊ߬ߛߌ߬ߥߙߊ ߕߋ߬ߟߋ߫ ߂߉ ߣߌ߲߬ ߡߊ߬، ߖߊ߬ߡߊߙߌ ߘߌ߫ ߘߊ߫ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߝߊߙߌ߲߫ ߊ߬ߟߌ ߓߊߘߊ߬ߙߊ ߞߡߊ߬ߙߊ߫ ߟߋ߬ ߓߟߏ߫߸ ߞߵߊ߬ ߛߐ߬ߘߐ߲߬ ߡߙߊ߬ߓߊ߮ ߣߌ߫ ߕߌ߲߬ߞߎߘߎ߲ ߣߌ߫ ߡߙߊ߬ߘߊ߬ߓߊ ߟߊ߬ߞߟߏ߬ߞߟߏ߬ߟߌ ߞߏߟߊߕߍ߯ ߛߌߦߊߡߊ߲߫ ߢߊ ߦߋ߫ ߜߍ ߘߐ߫߸ ߊ߬ ߣߌ߫ ߡߍ߲ ߠߎ߬ ߘߐ߱ߘߏ߲߬ߣߍ߲߬ ߞߘߐߓߐߟߌ ߜߋ߬ߟߎ߲߬ߠߌ߲ ߓߊ߯ߙߊ ߟߎ߬ ߟߊ߫.

ߞߊ߬ ߞߐ߲߰ ߥߟߊ߬ߘߊ ߟߎ߬ ߘߟߊߞߊ߭ ߢߍ߫߸ ߝߊ߰ߡߊ ߟߎ߫ ߛߐ߰ ߘߊ߫ ߡߊ߬ߡߌ߬ߣߊ߬ߟߌ߬ߟߊ ߟߎ߬ ߞߟߊߓߎߘߏ߲߭ ߠߋ߬ ߡߊ߬߸ ߞߏ߫ ߊ߬ߟߎ߬ ߦߋ߫ ߞߘߐߓߐߟߊ߲ ߠߎ߬ ߓߊ߯ߙߊ߫ ߛߍ߬ߓߍ ߟߊ߫߸ ߡߊ߬ߝߊ ߣߌ߫ ߖߏ߯ߘߏ߲ ߞߣߐ߫߸ ߊ߬ ߞߵߊ߬ ߟߐ߲߫ ߞߏ߫ ߡߐ߰ ߦߴߌ ߛߍ߲߫ ߠߴߌ ߣߐ߬ߜߍ ߟߋ߬ ߟߊ߫߸ ߌ ߞߎ߲߬ߜߍ ߕߍ߫، ߊ߬ߟߎ߬ ߓߍ߯ ߝߣߊ߫ ߞߵߊ߬ ߦߌ߬ߘߊ߬ ߞߏ߫ ߕߐ߲ ߡߍ߲ ߛߌ߰ߣߍ߲߫߸ ߕߐ߲߫ ߞߋߟߋ߲߫ ߔߋ߫: ߘߐ߬ߞߏ߬ߦߊ߬ߕߏ߬ߟߌ߬ ߕߴߊ߬ ߘߐ߫߸ ߓߍ߯ ߦߴߌ ߓߊ߫ ߓߟߏ߫، ߡߐ߰ ߛߌ߫ ߞߊ߬ ߞߊ߬ߙߏ߲ ߞߍ߫߸ ߦߝߊ߬ ߕߴߊ߬ ߘߐ߫ ߡߎ߰ߡߍ߫.

ߛߎ߬ߟߋ߬ߡߊߣ ߘߊ߬ߝߋ ߟߊ߫ ߝߐߟߌ߫ ߘߐ߫߸ ߊ߬ߟߋ ߡߍ߲ ߦߋ߫ ߞߊ߲ߞߊ߲߫ ߡߙߊ߬ߘߊ߬ߓߊ ߟߊ߬ߞߟߏ߬ߞߟߏ߬ߟߌ ߜߋ߬ߟߎ߲߬ߓߊ߮ ߘߌ߫߸ ߊ߬ ߞߵߊ߬ ߦߌ߬ߘߊ߬ ߢߌ߬ߣߊ߲߫ ߛߊ߲߭ ߢߌ߲߬ ߠߊ߫߸ ߞߘߐߓߐߟߌ߫ ߕߊ߲ߓߊ߲߫ ߁߅ ߟߋ߬ ߞߊ߲ߞߊ߲߫ ߞߣߐ߫߸ ߡߍ߲ ߠߎ߬ ߘߐߞߍߣߍ߲߫ ߡߊ߬ߡߌ߬ߣߊ߬ߟߌ߬ߟߊ߫ ߅ ߂߀߂ ߟߊ߫߸ ߡߛߏ߬ߡߊ߲߬ߣߍ߲߬ ߁ ߇߈߃ ߦߋ߫ ߡߍ߲ ߠߎ߬ ߕߍߡߊ߬.

ߏ߬ ߢߊߝߐߟߌ ߣߴߊ߬ ߞߣߐ ߘߐߕߋ߭ ߘߐ߫߸ ߟߐ߲ߞߏ߫ ߞߘߐߓߐߕߊ ߟߎ߬ ߟߋ߬ ߓߏߟߏ߲ ߞߊ߫ ߛߌߦߊ߫ ߓߍ߯ ߕߊ߫ ߘߌ߫ ߢߌ߬ߣߊ߲߬߸ ߏ߬ ߟߎ߬ ߛߓߍߣߍ߲ ߦߙߌߞߊ ߦߋ߫ ߂ ߃߇߀ ߟߋ߬ ߘߌ߫߸ ߡߛߏ߬ߡߊ߲߬ ߁ ߀߃߈ ߦߴߏ߬ ߘߐ߫، ߊߘߡߊߦߊ ߟߐ߲ߞߏ ߛߊ߫߸ ߏ߬ ߡߊ߬ߡߌ߬ߣߊ߬ߟߌ߬ߟߊ ߦߙߌߞߊ ߦߋ߫ ߁ ߄߀߀ ߠߋ߬ ߘߌ߫߸ ߡߛߏ߬ߡߊ߲߬ߣߍ߲߫ ߄߅߄߸ ߞߵߊ߬ ߛߐ߬ߘߐ߲߬ ߘߡߊ߬ߦߊ ߟߐ߲ߞߏ ߞߣߐߞߍߣߍ߲߫ ߡߊ߬ߡߌ߬ߣߊ߬ߟߌ߬ߟߊ߫ ߉߈߀ ߠߊ߫߸ ߡߛߏ߬ߡߊ߲߫ ߂߇߂ ߦߴߏ߬ ߘߐ߫، ߣߴߌ ߘߏ߲߬ ߥߊ߫ ߘߊ߫ ߝߊ߬ߙߊ߲߬ߛߌ ߣߴߊߙߊߓߎ ߘߊߞߎ߲ ߘߐ߫߸ ߏ߬ ߟߎ߬ ߡߍ߲ ߝߣߊ߫ ߟߊ߫ ߞߊ߬ߙߊ߲ ߦߋ߫ ߓߏߟߏ߲߫ ߝߌ߬ߟߊ߬ ߘߌ߫߸ ߊߘߡߊߦߊ ߟߐ߲ߞߏ ߣߌ߫ ߟߐ߲ߞߏ߫ ߞߘߐߓߐߕߊ ߟߎ߬߸ ߏ߬ ߟߎ߬ ߦߙߌߞߊ ߟߊߞߊ߬ߝߏ߬ߣߍ߲ ߦߋ߫ ߡߊ߬ߡߌ߬ߣߊ߬ߟߌ߬ߟߊ߫ ߃߅߂ ߟߋ߬ ߘߌ߫߸ ߡߛߏ߬ߡߊ߲߬ ߁߅ ߘߐߙߐ߲߫߸ ߞߊ߬ ߓߍ߲߬ ߡߟߗ ߟߊ߫ ߢߊߝߐߟߌ ߡߊ߬.

ߢߌ߬ߣߊ߲߬ ߕߊ ߣߌ߲߬ ߘߐ߫߸ ߟߊ߬ߞߟߏ߬ߞߟߏ߬ߟߌ ߝߊ߰ߡߊ ߟߎ߬ ߞߊ߲߫ ߞߏ߫ ߊ߬ߟߎ߬ ߓߘߊ߫ ߞߣߐ߬ߜߍ߲߬ߠߌ߲ ߣߌ߫ ߜߋ߬ߟߎ߲߬ߠߌ߲߬ ߖߋߞߎߖߋߞߎ ߛߌ߰ ߛߋ߲߬ߠߊ߫߸ ߞߵߊ߬ ߕߐ߲ ߘߐߖߊ߬، ߞߊ߬ߕߎ߲߯ <<ߢߌ߬ߣߊ߲߬߸ ߞߏ߫ ߞߎߘߊ ߡߍ߲ ߦߴߊ߬ ߘߐ߫߸ ߗߋߘߋ߲ ߓߍ߯ ߣߌ߫ ߣߍ߰ ߘߋ߬ߦߌ߬ߟߊ߲ ߠߋ߬، ߊ߬ߟߎ߬ ߘߌ߫ ߕߊ߬ߡߌ߲߬ ߘߊ߫ ߟߊ߫߸ ߞߊ߬ ߥߊ߫ ߘߊ߫ ߟߊ߫߸ ߞߊ߬ ߕߊ߬ߡߌ߲߬ ߞߏ߲ߕߏ߫ ߟߊ߫߸ ߞߊ߬ ߥߊ߫ ߞߏ߲ߕߏ߫ ߟߊ߫߸ ߖߐ߯ߙߊ߲߫ ߝߏߦߌ߬ ߣߴߊ߬ ߟߊߕߐ߲ߣߍ߲߫߸ ߊ߬ߟߎ߬ ߘߌ߫ ߘߋߦߌ߫ ߊ߬ ߓߍ߯ ߡߊ߬.>> ߛߎ߬ߟߋ߬ߡߊߣ ߘߊ߬ߝߋ ߟߋ߬ ߞߊ߲߫ ߕߋ߲߬.

ߡߟߗ ߞߵߊ߬ ߝߐ߫ ߞߵߊ߬ ߟߊߕߍ߰ ߝߣߊ߫߸ ߞߏ߫ ߞߣߐ߬ߜߍ߲߬ߠߌ߲߬ߠߊ ߟߎ߬ ߓߊ߬߸ ߓߊ߯ߙߟߊ߫ ߜߘߍ ߛߎ߯ ߺ ߎ ߺ ߛߎ߯ ߣߴߌߟߋ ߛߋ߲߬ ߦߋ߫ ߞߘߐߓߐߟߌ ߣߌ߲߬ ߞߏ ߟߎ߬ ߘߐ߫߸ ߏ߬ ߟߎ߬ ߓߍ߯ ߓߘߊ߫ ߟߊߞߐ߯ ߜߊߟߌߜߊߟߌߌ߫߸ ߞߊ߬ ߕߐ߲߫ ߛߌ߰ߣߍ߲ ߓߍ߯ ߢߊߝߐ߫ ߊ߬ߟߎ߬ ߦߋ߫. <<ߘߐ߬ߖߎ߰ߖߎ߰ߟߌ߬ ߓߊ߲ߓߊߟߌ ߘߏ߲߬ߘߊ ߟߊ߫߸ ߟߊ߬ߞߊ߲߬ߘߊ߬ߟߌ ߥߛߊ߬ߘߊ߬ߕߌ߮ ߟߎ߬ ߓߟߏ߫߸ ߞߟߍ߬ߡߐ߮ ߟߎ߬ ߣߌ߫ ߕߐ߲ߓߟߏߡߊ ߟߎ߬߸ ߞߵߏ߬ ߟߊ߫ ߘߐ߬ߖߎ߰ߖߎ߰ߟߌ ߞߊ߲߬ ߝߏ߮ ߞߣߐ߫ ߜߋ߬ߟߋ߲߬ߠߌ߲߬ߠߊ ߟߎ߬ ߓߟߏ߫߸ ߏ߬ ߖߊ߬ߡߊߙߌ ߘߌߣߍ߲߫ ߠߋ߬ ߢߊ ߓߍ߯ ߟߊߘߍ߬ߣߍ߲ ߡߊ߬.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߞߊ߲ߞߊ߲߫ ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ߸ ߝߊߙߌ߲߫ ߊ߬ߟߌ ߓߊߘߊ߬ߙߊ ߞߡߊ߬ߙߊ߬߸ ߏ߬ ߞߊ߬ ߡߊ߬ߡߌ߬ߘߊ߬ߟߌ߬ߟߊ ߟߎ߫ ߟߋ߬ ߝߏ߬ ߞߵߊ߬ߟߎ߫ ߕߊ߲߬ߘߏ߬߸ ߊ߬ ߣߌ߫ ߞߊ߬ ߞߊ߬ߙߊ߲߬ߡߐ߮ ߟߎ߬ ߝߣߊ߫ ߝߏ߬، <<ߓߍ߯ ߟߊߘߍ߬ߣߍ߲ ߓߘߴߊ߬ ߢߊߦߋ߫߸ ߞߏ߫ ߤߊߡߌ߲߫ ߜߘߍ߫ ߕߍ߫ ߡߊ߬ߡߌ߬ߣߊ߬ߟߌ߬ߟߊ ߢߌ߲߬ ߠߎ߬ ߟߊ߫߸ ߊ߬ߟߎ߬ ߦߴߊ߬ߟߎ߫ ߖߘߍ߬ ߦߋ߫ ߖߊ߯ߓߘߊ ߟߊ߫، ߏ߬ ߘߏ߲߬ ߦߋ߫ ߞߏ߫ ߕߊ߲߬ߘߏ߬ߕߊ ߟߋ߬ ߘߌ߫.>> ߊ߬ ߞߵߏ߬ ߦߌ߬ߘߊ߬.

ߞߎ߲߬ߠߊ߬ߛߌ߰ߟߊ ߓߊ߲߫ ߘߊ߫ ߞߵߊ߬ ߖߊ߬ ߦߙߐ߫ ߜߘߍ߫ ߝߣߊ߫ ߞߊ߲߬߸ ߏ߬ ߟߋ ߛߍ߬ߓߍ ߕߊ߭ ߘߌ߫ ߞߊ߬ߙߊ߲ ߘߐ߫، ߊ߬ߟߋ ߟߊ߫ ߝߐߟߌ߫ ߘߐ߫߸ ߡߊ߬ߡߌ߬ߣߊ߬ߟߌ߬ߟߊ ߟߎ߬ ߞߊ߫ ߞߊ߲߫ ߞߊ߬ ߓߊ߯ߙߊ߫ ߟߋ߬ ߊ߬ߟߎ߬ ߤߊ߲ߞߟߌ ߟߊ߫߸ ߞߊ߬ ߓߊ߯ߙߊ߫ ߞߵߊ߬ ߟߐ߲߫ ߞߏ߫ ߊ߬ߟߎ ߟߋ߬ ߞߊ߫ ߞߊ߲߫ ߞߊ߬ ߖߌ߬ߣߍ߫ ߡߎ߰ߡߍ ߞߐߦߌ߬ߘߊ߬. <<ߊ߲ ߞߵߊ߬ ߛߐ߬ߘߐ߲߬߸ ߡߊ߬ߡߌ߬ߣߊ߬ߟߌ߬ߟߊ ߓߍ߯ ߤߊ߲ߞߟߌ ߟߊߡߌ߲߬ߣߍ߲߫߸ ߞߵߊ߬ߟߎ߬ ߘߐߓߍ߲߬ ߞߏ߫ ߊ߬ߟߎ߬ ߞߍߕߐ߫ ߞߘߐߓߐߟߌ ߟߋ߬ ߞߍ߫ ߟߊ߫، ߊ߬ ߘߏ߲߬߸ ߝߏ߫ ߞߊ߬ ߓߊ߯ߙߊ ߞߍ߫ ߟߋ߬ ߛߍ߬ߓߍ ߟߊ߫.>> ߝߊߙߌ߲߫ ߊ߬ߟߌ ߓߊߘߊ߬ߙߊ ߞߡߊ߬ߙߊ߫ ߟߋ߬ ߞߊ߲߫ ߕߋ߲߬.

ߞߘߐߓߐߟߌ ߘߏ߲߬ߖߟߎ߬ߡߊ߬ߟߊ߫ ߝߊ߬ߛߏ߬ߟߊ߬ߞߊ ߕߎ߲߬ ߦߋ߫ ߕߌ߲߬ߞߎߘߎ߲ ߘߐ߫߸ ߔߌߦߍߙ ߕߎ߬ߙߋ߸ ߊ߬ߟߋ ߝߣߊ߫ ߞߊ߬ ߕߐ߲߫ ߛߌ߰ߣߍ߲ ߠߋ߬ ߡߊߜߟߍ߬ߦߊ߬ ߤߊߟߌ߬ߛߊ߫، <<ߞߎߡߊ߫ ߞߋߟߋ߲߫ ߕߍ߫ ߝߌ߬ߟߊ߬ ߕߍ߫߸ ߞߎߡߊ߫ ߞߘߐ ߟߋ߬ ߟߊߞߎߘߦߊ߫ ߟߊ߫ ߘߐߙߐ߲߫: ߘߐ߬ߞߏ߬ߦߊ߬ߕߏ߬ߟߌ߬ ߕߴߊ߬ ߘߐ߫߸ ߓߍ߯ ߦߴߌ ߓߊ߫ ߓߟߏ߫، ߊ߬ ߘߏ߲߬ ߓߘߊ߫ ߝߐ߫ ߓߍ߯ ߦߋ߫߸ ߞߏ߫ ߓߍ߯ ߦߋ߫ ߓߊ߯ߙߊ߫ ߛߍ߬ߓߍ ߟߊ߫߸ ߞߊ߬ ߢߣߊߕߐߡߐ߲ߠߌ߲ ߓߐ߫ ߊ߬ ߘߐ߫߸ ߛߊ߫ ߖߡߊ߬ߣߊ ߞߘߐߓߐߟߌ ߞߊߣߊ߬ ߡߊߣߐ߯ ߢߊ ߡߍ߲ ߡߊ߬߸ ߊ߬ ߦߋ߫ ߕߐ߯ ߘߌߡߊ߲߫ ߛߐ߬ߘߐ߲߬.>> ߊ߬ ߞߵߏ߬ ߦߌ߬ߘߊ߬.ߊ߬ ߟߊ߫ ߝߐߟߌ߫ ߘߐ߫߸ ߞߊ߲ߞߊ߲߫ ߕߌ߲߬ߞߎߘߎ߲ ߞߘߐߓߐߟߌ߫ ߕߊ߲ߓߊ߲ ߦߙߌߞߊ ߦߋ߫ ߃߀ ߟߋ߬ ߘߌ߫: ߁߅ ߦߋ߫ ߞߊ߲ߞߊ߲߫߸ ߁߀ ߦߋ߫ ߛߌ߯ߙߌ߲߫߸ ߂ ߦߋ߫ ߡߊ߲߬ߖߊ߲߬ߠߊ߫߸ ߂ ߦߋ߫ ߞߙߎ߬ߛߊ߬߸ ߊ߬ ߣߌ߫ ߁ ߦߋ߫ ߞߊߦߌߙߊߥߊ߯ߣߍ߲߫، ߊ߬ ߞߊ߬ ߛߍߥߊ߫ ߘߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߞߊ߬ߙߊ߲߬ߕߊ ߟߎ߬ ߦߋߝߊߘߌ ߟߊ߫. <<ߞߊ߬ߙߊ߲߬ߓߏ߲ ߓߍ߯ ߦߋߢߊ ߞߊ߫ ߢߌ߲߬߸ ߓߟߏ ߦߴߊ߬ߟߎ߬ ߞߘߐ߫߸ ߊ߬ߟߎ߬ ߟߊߞߊ߲ߘߊߣߍ߲߫߸ ߏ߬ ߘߏ߲߬ ߦߋ߫ ߜߋ߬ߟߎ߲߬ߠߌ߲߬ߠߊ ߟߎ߬ ߟߊ߫ ߓߊ߯ߙߊ ߟߊߛߣߐ߬ߦߊ߬ ߟߴߊ߬ߟߎ߫ ߡߊ߬ ߟߋ߬.>> ߊ߬ ߞߵߏ߬ ߦߌ߬ߘߊ߬.

ߞߊ߲ߞߊ߲߫ ߞߣߐ߫ ߏ߬ ߘߐ߫ ߕߋ߲߬߸ ߂߀߂߆ ߓߊߘߎ߲ ߕߟߋ߬ ߝߟߐ ߣߌ߲߬ ߘߊߡߌ߬ߣߊ߬ߣߍ߲߫ ߡߊ߬ߝߊ ߟߋ߬ ߞߣߐ߫߸ ߝߊ߰ߡߊ ߟߎ߬ ߓߘߊ߫ ߓߍ߯ ߖߌ߰ߡߝߊ߬، ߟߊ߬ߞߟߏ߬ߞߟߏ߬ߟߌ ߞߏߟߊߕߍ߮ ߟߎ߬ ߝߣߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߞߍߕߐ߫ ߊ߬ߟߎ߫ ߖߊ߲߬ߕߏ߬ ߟߊ߫ ߏ߬ ߢߊ߫ ߞߋߟߋ߲ ߠߋ߬ ߡߊ߬߸ ߊ߬ ߦߋ߫ ߕߏ߫ ߓߍ߬ߘߍ ߛߌߟߊ ߏ߬ ߞߊ߲߬ ߤߊ߲߯ ߞߘߐߓߐߟߌ ߦߋ߫ ߓߊ߲߫߸ ߖߐ߲߰ߛߊ߫ ߞߘߐߓߐߟߌ ߞߊߣߊ߬ ߡߊߣߐ߯ ߢߊ ߡߍ߲ ߡߊ߬߸ ߊ߬ ߦߋ߫ ߞߍ߫ ߜߍߦߊ ߞߣߐ߫.