ߎ߳ߍߡߑߔߋ ߗߋߦߊߟߌ ߥߟߌ߬ ߘߊ߫ ߞߊ߬ ߛߎߡߊ߲ߞߐ߬ߦߌ߫ ߟߋ߬ ߡߊߜߍ߲߫ ߂߀߂߆ ߘߓߊ߬ߕߊ ߕߋ߬ߟߋ߫ ߂߈ ߣߌ߲߬ ߡߊ߬߸ ߞߊ߬ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲߬ ߖߐ߲ߖߐ߲߫ ߞߍ߫ ߦߋ߲߬߸ ߦߋ߲߬ ߡߍ߲ ߦߋ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߝߊ߬ ߓߘߊ ߘߌ߫߸ ߒߞߏ ߛߌ߲ߘߌߓߊ߮، ߟߊ߬ߢߌߣߌ߲ ߡߍ߲ ߕߎ߲߬ ߦߋ߫ ߢߐ߲߯ߦߋ ߢߌ߲߬ ߠߊ߫߸ ߏ߬ ߟߋ ߝߊ߬ߛߏ߬ ߞߊ߲ ߠߎ߬ ߟߊ߫ ߛߋ߲߬ߕߊ߬ ߞߍߣߍ߲ ߠߎ߬ ߢߊߝߐ ߘߌ߫߸ ߊ߬ ߣߌ߫ ߞߊ߬ ߛߎߡߊ߲ߞߐߦߌߞߊ ߟߎ߬ ߘߐߛߎ߫ ߘߊ߲߬ߛߊ ߣߴߊ߬ ߟߊ߫ ߖߊ߬ߡߊ ߛߎߥߊ߲ߘߌ ߡߊ߬ ߝߊ߬ߛߏ߬ ߛߙߍߘߍ ߞߊ߲߬߸ ߛߊ߫ ߓߊ߯ߙߊ߫ ߓߟߋߓߟߋ ߡߍ߲ ߠߎ߬ ߘߊߡߌ߬ߣߊ߬ߣߍ߲߫߸ ߏ߬ ߟߎ߬ ߦߋ߫ ߛߋ߫ ߘߊߓߊ߲߫ ߠߊ߫ ߢߊ ߡߍ߲ ߡߊ߬.

ߛߙߊ߬ߣߎ߲ ߕߊ߬ߣߍ߲ ߛߘߊߡߊߘߌߦߊ߫ ߡߊ߬ߡߊ߬ߘߌ߫ ߞߙߏ߬ߡߊ߬ ߓߟߏ߫߸ ߊ߬ߟߋ ߡߍ߲ ߦߋ߫ ߗߋߘߋ߲ ߘߌ߫ ߞߊ߬ ߝߘߊ߫ ߎ߳ߍߡߑߔߋ ߟߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߡߊ߫ ߣߊ߬ ߘߊ߲߬ߕߍ߰ߟߌ ߣߌ߲߬ ߞߍ߫ ߛߎߡߊ߲ߞߐ߬ߦߌ߬ ߜߊ߲ߛߊ߲߫ ߘߋ߬߸ ߞߎ߲߬ ߖߐ߲ߖߐ߲߫ ߠߋ߬ ߦߴߏ߬ ߟߊ߫.

<<ߛߎߡߊ߲ߞߐ߬ߦߌ߫ ߦߋ߫ ߒߞߏ ߛߌ߲ߘߌߓߊ߮ ߥߟߏߛߟߎ ߟߋ߬ ߘߌ߫، ߞߏ ߺ ߏ ߺ ߞߏ߫ ߓߊ߯ ߞߍ߫ ߒߞߏߞߏ ߘߐ߫ ߏ߬ ߘߐ߫߸ ߏ߬ ߘߊ߲߬ߕߍ߰ߟߌ ߞߊ߫ ߞߊ߲߫ ߞߊ߬ ߞߍ߫ ߛߎߡߊ߲ߞߐߦߌߞߊ ߟߎ߬ ߦߋ߫ ߟߋ߬.>>

ߊ߬ ߟߊ߫ ߝߐߟߌ߫ ߘߐ߫߸ ߊ߬ߟߎ߫ ߣߊ߬ߣߍ߲߫ ߘߊ߲߬ߕߍ߰ߟߌ ߟߋ߬ ߞߊ߲ߡߊ߬߸ ߒߞߏ ߦߋ߫ ߢߍߕߊ߮ ߡߍ߲ ߞߊ߲߬ ߘߎߢߊ߫ ߞߊߓߋ ߟߊ߫߸ ߞߊ߬ ߣߵߏ߬ ߢߊߝߐ߫ ߛߎߡߊ߲ߞߐߦߌߞߊ ߟߎ߬ ߦߋ߫، ߝߊ߬ߛߏ߬ ߞߊ߲ ߠߎ߬ ߓߘߊ߫ ߡߐ߬ߟߐ߲ ߡߍ߲ ߛߐ߬ߘߐ߲߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߋ߬ߟߋ ߣߌ߲߬ ߘߐ߫، ߦߏ߫ ߟߊ߬ߕߍ߰ߦߊ ߡߍ߲ ߠߊߓߐ߫ ߘߊ߫ ߞߏ߲ߞߏߘߓߌ ߕߟߋ߬ ߁߇ ߡߊ߬߸ ߣߌ߫ ߝߊ߬ߛߏ߬ ߞߊ߲ ߠߎ߬ ߟߊߘߏ߲߬ ߘߊ߫ ߞߊ߲ߕߌ߯ߘߊ ߟߊ߬ߟߐ߲߬ߠߌ߲߬ߦߊ߬ߟߌ ߞߏߢߊ ߓߍ߯ ߘߐ߫.

ߊ߬ ߞߎߡߊ߫ ߘߊ߫ ߞߊ߬ ߞߏߕߌ߯ ߝߟߐ ߊߡߊߘߎ߫ ߎ߯ߙߌ߬ ߓߊ ߝߣߊ߫ ߝߏ߬߸ ߊ߬ ߞߍ ߘߐ߫ ߞߊ߬ ߝߊ߬ߛߏ߬ ߞߊ߲ ߠߎ߬ ߓߌ߬ߟߊ߬ ߞߏߕߌ߯ߝߟߐߘߊ ߞߍߦߙߐ ߞߊ߲߬߸ ߒߞߏ ߛߓߍߟߌ ߘߐ߫߸ ߞߊ߬ ߝߐ߰ߓߍ߬ߝߐ߯ߓߍ ߘߏ߫ ߝߣߊ߫ ߓߌ߬ߟߊ߬ ߒߞߏ ߘߐ߫ ߞߏߕߌ߯ߝߟߐߘߊ ߟߌ߬ߤߟߊ ߟߎ߬ ߟߊߛߐ߬ߘߐ߲߬ ߞߊ߲ߡߊ߬، ߊ߬ ߣߌ߫ ߘߐ߬ߕߊߡߌ߲ ߞߏߟߊߕߍ߯ߘߊ߫ ߝߊ߬ߛߏ߬ߟߊ߬ߞߊ ߞߊ߲ߕߌ߯ ߞߘߐ߸ ߘߊ߲߬ߛߊ߫ ߞߙߏ߬ߡߊ߬، ߏ߬ ߡߍ߲ ߝߣߊ߫ ߟߊ߫ ߓߊ߯ߙߓߊ ߞߐߝߟߌ ߞߍߣߍ߲߫ ߝߊ߬ߛߏ߬ ߞߊ߲ ߠߎ߬ ߟߊߘߏ߲߭ ߘߌ߫ ߛߌ߰ߞߊ߲ ߞߣߐ߫.

<<ߊ߬ߟߎ߬ ߓߘߊ߫ ߒߞߏ ߕߊ߬ ߞߵߊ߬ ߓߌ߬ߟߊ߫ ߖߌ߬ߣߍ߫ ߛߌ߰ߞߊ߲ ߘߐ߫߸ ߞߵߊ߬ ߦߌߘߊߞߊ߬ ߞߏ߫ ߝߊ߬ߛߏ߬ ߞߊ߲ ߠߎ߬ ߣߌ߫ ߝߊ߬ߙߊ߲߬ߛߌ߬ ߞߊ߲ ߓߍ߯ ߓߘߊ߫ ߟߊߞߢߊ߫، ߊ߲ ߞߊߣߊ߬ ߛߌߞߴߊ߲ ߠߊ߫ ߞߊ߲ ߝߐ߫ ߟߊ߫ ߝߊ߲߭ ߺ ߊ ߺ ߝߊ߲߬ ߡߎ߬ߕߎ߲߬.>> ߊ߬ ߞߵߏ߬ ߦߌ߬ߘߊ߬.

ߗߋߘߋ߲ ߠߎ߬ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߓߊ ߡߍ߲ ߠߎ߬ ߘߊߡߌ߬ߣߊ߬ߣߍ߲߫ ߏ߬ ߘߌ߫߸ ߏ߬ ߟߎ߫ ߕߐ߭ ߟߋ߬ ߟߊߓߊ߲ߕߊ ߦߋ߫، ߏ߬ ߘߏ߲߬ ߕߴߛߋ߫ ߞߍ߫ ߟߊ߫߸ ߝߏ߫ ߢߣߊߕߊߟߌ߫ ߣߊ߬ߕߐ ߢߌ߲߬ ߠߋ߬ ߦߋ߫ ߓߊ߲߫، ߏ߬ ߘߏ߫ ߟߋ߬ ߟߊ߬ߞߟߏ߬ߞߟߏ߬ߟߌ ߟߊߛߌ߲ ߛߊ߬ߙߌ߬ߦߊ߬ߛߎ߲ ߘߌ߫߸ ߊ߬ ߣߌ߫ ߖߌ߬ߣߍ߬ ߞߊ߲ߓߍ߲ ߞߊ߲߫ ߞߏ ߛߊ߬ߙߌ߬ߦߊ߬ߛߎ߲. ߏ߬ ߟߎ߬ ߡߍ߲ ߠߎ߬ ߞߍߕߐ߫ ߕߙߎ߬ ߘߌ߫߸ ߒߞߏ ߘߌ߫ ߟߊߘߏ߲߬ ߞߊ߬ߙߊ߲߬ߕߊ ߟߎ߬ ߟߊ߫߸ ߒߞߏ ߞߊߙߊ߲ߡߐ߮ ߟߎ߬ ߝߣߊ߫ ߘߌ߫ ߛߙߊ߬ ߕߊ ߘߊߡߌ߬ߣߊ߬ ߞߊߙߏ ߟߊ߫.

ߢߐ߲߯ߦߋ ߣߌ߲߬ ߘߐ߫߸ ߎ߳ߍߡߑߔߋ ߟߊ߫ ߗߋߘߋ߲ ߞߊ߬ ߢߣߊߓߊ߮ ߟߎ߬ ߞߟߌ߫߸ ߞߏ߫ ߊ߬ߟߎ߬ ߦߋ߫ ߊ߬ߟߎ ߟߋ߬ ߛߎߥߊ߲ߘߌ߫ ߢߣߊߕߊߟߌ ߘߐ߫، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߘߊ߲߬ߛߊ ߦߋ߫ ߞߙߎ ߡߍ߲ ߘߐ߫߸ ߏ߬ ߞߐߦߌ߬ߘߊ߬ߣߍ߲߫ ߓߎߓߞߊߙ ߛߘߌߞߌ߬ ߖߊߟߏ߫ ߟߋ߬ ߓߟߏ߫ ߛߙߍߘߍ ߞߊ߲߬߸ ߏ߬ ߟߋ ߖߌ߬ߦߊ߬ߓߍ ߦߋ߫ ߦߋ߲߬߸ ߝߙߍߕߍ߫ ߆߲ ߠߊ߫.

ߗߋߘߋ߲ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߣߌ߲߬ ߢߐ߲߰ ߕߊ߯ߡߊ߫ ߞߍ߫ ߖߌ߬ߣߍ߫ ߘߎ߰ ߛߌߦߊߡߊ߲߫ ߞߣߐ߫߸ ߦߏ߫ ߞߌ߲ߘߌߦߊ߫߸ ߡߊ߯ߡߎ߲߫߸ ߞߙߎ߬ߛߊ߫߸ ߞߊ߲ߞߊ߲߫߸ ߡߊ߲߬ߖߊ߲߬ߠߊ߫߸ ߞߐ߬ߖߊߙߊ߲߫߸ ߊ߬ ߣߌ߫ ߞߌ߬ߢߍ߬ߙߊ߲߬.

ߛߎߡߊ߲ߞߐߦߌߞߊ ߟߎ߬ ߛߍߥߊ߫ ߘߊ߫ ߢߐ߲߯ߦߋ ߢߌ߲߬ ߠߊ߫ ߟߋ߬ ߞߏߛߓߍ߫، ߒ.ߢ.ߦ.ߘ ߘߊ߯ߕߌ߮ ߡߍ߲ ߦߋ߲߬߸ ߖߌ߬ߓߙߌ߬ߟߊ߫ ߞߊ߬ߓߊ߸ ߏ߬ ߞߵߊ߬ ߟߊ߫ ߛߍߥߊ ߦߌ߬ߘߊ߫ ߣߌ߲߬ ߞߏ ߟߊ߫.

<<ߎ߳ߍߡߑߔߋ ߟߊ߫ ߣߊ߬ߟߌ ߞߍߣߴߊ߲ ߡߊ߬ ߛߊ߲ߖߌ߫ ߞߎߣߊ ߟߋ߬ ߘߌ߫߸ ߊ߬ ߓߘߊ߫ ߓߍ߲߬ ߊ߲ ߡߊ߬ ߞߊ߬ ߘߌߦߴߊ߲ ߢߍ߫، ߊ߲ ߘߌ߫ ߎ߳ߍߡߑߔߋ ߛߎߥߊ߲ߘߌ߫߸ ߖߡߊ߬ߣߊ ߟߊ߫ ߢߝߍߕߊ߮ ߞߏߛߐ߲߬߸ ߛߎߡߊ߲ߞߐ߬ߦߌ߬ ߣߴߊ߬ ߡߌ߬ߙߌ߲߬ߘߌ ߓߍ߯.>> ߊ߬ ߞߵߏ߬ ߦߌ߬ߘߊ߬.

ߢߐ߲߯ߦߋ ߞߎ߲߭ߝߊ߰ ߘߊ߫ ߕߌ߲ߞߌ ߟߋ߬ ߡߊ߬ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߝߎ߬ߙߋ ߦߋ߫߸ ߊ߬ ߣߴߊ߬ ߝߊ߬ ߛߎߡߊ߲ߞߐ߬ߦߌ߬ ߊߡߙߊ߫ ߣߴߊ߬ ߓߊߘߋ߲ ߠߎ߬.