ߖߌ߬ߣߍ߬ ߓߘߊ߫ ߂߀߂߆ ߣߌ߫ ߂߀߂߇ ߛߣߍ߬ߞߍ ߓߙߊߡߊߖߊ߲ߓߊ߲ ߕߊߟߊ߲ ߜߊ߬ߛߌ߬߸ ߏ߬ ߞߍ߫ ߘߊ߫ ߞߍ߲ߘߍߟߏ߲ ߢߌ߲߬ ߠߋ߬ ߡߊ߬ ߓߊ߲ߞߊߟߊ߲߫ ߘߎ߱ ߞߣߐ߫߸ ߞߊ߬ߙߌ߬ߝߊ߬ߡߘߎ߬ߦߊ߫ ߡߙߊ߬ߘߊ߬ߙߋ߲ ߘߐ߫߸ ߞߊ߲ߞߊ߲߫ ߡߙߊ߬ߘߊ߬ߓߊ ߞߣߐ߫߸ ߊߡߌߣߊߕߊ߬ ߞߊ߬ߓߊ ߟߊ߫ ߓߏ߲߬ߧߊ ߣߌ߫ ߜߟߌߦߊ ߣߴߊ߬ ߟߊ߫ ߞߎ߲߬ߠߊ߬ߛߌ߰ߟߌ ߞߣߐߡߊ߬߸ ߊ߬ߟߋ ߡߍ߲ ߦߋ߫ ߛߣߍ߬ߞߍ ߞߏߕߌ߮ ߘߌ߫، ߢߌ߬ߣߊ߲߬ ߕߊ ߣߌ߲߬ ߘߐ߫߸ ߞߐߙߐ߲ߘߌ߫ ߛߣߍ ߝߣߊ߫ ߕߊ߬ߣߍ߲߫ ߠߋ߬ ߓߊ߫ ߘߐ߫߸ ߏ߬ ߡߍ߲ ߦߋ߫ ߖߌ߬ߣߍ߬ ߜߍߞߊ߲ߠߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߓߊ߬ߙߏ߲߬ߡߊ ߘߏ߫ ߘߌ߫.

ߞߏߕߌ߮ ߟߋ߬ ߞߊ߬ ߖߊ߲߬ߖߏ߲ ߣߌ߲߬ ߞߎ߲߬ߠߊߛߌ߰߸ ߊ߬ ߞߵߊ߬ ߦߌ߬ߘߊ߬ ߞߏ߫ ߓߙߊߡߊߖߊ߲ߓߊ߲ ߡߍ߲ ߛߌ߰ߣߍ߲߫ ߛߋ߲߬ߠߊ߫ ߣߌ߲߬߸ ߖߡߊ߬ߣߊ ߡߎ߰ߡߍ ߕߊ ߓߘߊ߫ ߞߍ߫߸ ߏ߬ ߘߌ߫ ߞߎ߲߬ߢߐ߲߰ ߘߊ߲ߘߐ߫ ߓߐ߫، <<ߊ߬ ߞߎ߲߬ߢߐ߲߰ ߘߊ߲ߘߐ ߟߋ߬ ߕߋ߲߬߸ ߊ߲ ߣߌ߫ ߞߏߕߌ߯ ߝߟߐ ߞߊ߬ ߛߣߍ߬ߞߍ ߓߙߊߡߊߖߊ߲ߓߊ߲ ߘߊߡߌߣߊ ߛߌ߰ ߛߋ߲߬ߠߊ߫ ߞߐ߬ߓߊ߬>> ߊ߬ ߞߵߏ߬ ߦߌ߬ߘߊ߬߸ ߞߊ߬ ߓߊ߲߲߫ ߞߵߊ߬ ߝߐ߫ ߞߏ߫ ߜߍߞߊ߲ߠߊ ߓߙߊߖߊ߲ߡߊ߲ ߖߎ߬ߛߌ߮ ߢߌ߲߬ ߠߋ߬ ߞߍߕߐ߫ <<ߞߐߙߐ߲ߘߌ߫ ߛߣߍ>> ߝߣߊ߫ ߘߊߡߌߣߊ ߘߌ߫.

ߞߊ߬ߕߎ߲߯߸ ߞߐߙߐ߲ߘߌ߫ ߛߣߍ ߢߌ߲߬ ߕߘߍ߬ ߞߊ߲ߞߊ߲߫ ߕߌ߲߬ߞߎߘߎ߲ ߥߙߎߞߌ ߣߌߘߐ ߟߋ߬ ߘߌ߫߸ ߊ߬ ߕߎ߲߬ ߦߋ߫ <<ߤߙߊ ߣߌ߫ ߓߎ߲ߘߍ ߟߋ߬ ߘߌ߫ ߖߌ߬ߣߍ߬ ߜߍߞߊ߲ߠߊ ߘߐ߫>> ߡߍ߲ ߕߘߍ߬ ߓߊ߯ߙߊ ߘߌ߫ ߟߊ߫ ߡߐ߱ ߟߎ߫ ߡߊ߬߸ ߞߊ߬ ߟߊ߬ߥߟߏ߬ߟߌ ߣߌ߫ ߛߓߊ߬ߕߌ ߝߊ߲߲߬ߞߊߘߏ߲߬، <<ߏ߬ ߘߐ߫߸ ߝߏ߫ ߊ߲ ߧߋ߫ ߞߐߙߐ߲ߘߌ߫ ߕߣߐ߬ߡߊ ߏ߬ ߛߍ߬ߣߍ ߝߊ߲߬ߞߊߘߏ߲߬ ߠߋ߬>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߖߊ߲߬ߖߏ߲ ߣߌ߲߬ ߘߐ߫߸ ߡߊ߬ߡߙߊ߬ߟߌ ߞߏߟߊߕߍ߯ ߛߌߦߊߡߊ߲߫ ߕߘߍ߬ ߞߣߍ ߞߊ߲߬߸ ߊ߬ ߣߌ߫ ߛߍ߬ߣߍ ߓߊ߯ߙߟߊ ߟߎ߬߸ ߦߏ߫ ߛߣߍ߬ߞߍ ߓߏ߲ߘߋ߲ ߞߏߟߊߕߍ߮ ߟߎ߬ ߣߌ߫ ߞߊ߲ߞߊ߲߫ ߞߐߙߐ߲ߘߌ߫ ߛߣߍ߫ ߞߙߎߝߊ، ߞߏߕߌ߮ ߟߊ߫ ߝߐߟߌ߫ ߘߐ߫߸ ߖߊ߬ߡߊ ߟߊ߫ ߓߐߟߌ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߊ߬ߟߎ߬ ߓߘߊ߫ ߞߎ߲߬ߠߊ߬ߛߌ߮ ߟߊ߫ ߛߣߍ߬ߞߍ ߢߍߥߟߊ ߢߊߦߋ߫߸ ߏ߬ ߘߏ߲߬ ߣߌ߫ ߛߌߡߊ߲ߘߎ߯ ߂߀߄߀ ߢߍߥߟߊ ߓߍ߲߬ߣߍ߲߫ ߠߋ߬ ߢߐ߲߮ ߡߊ߬ ߕߋߙߎ߫.

ߊߡߌߣߊߕߊ߬ ߞߊ߬ߓߊ ߞߎߡߊ߫ ߘߊ߫ ߛߣߍ߬ߞߍ߬ߟߊ ߟߎ߫ ߝߍ߬߸ ߞߵߊ߬ ߦߌ߬ߘߴߊ߬ߟߎ߬ ߟߊ߫ ߞߏ߫ ߖߡߊ߬ߣߊ ߟߊ߫ ߓߊߟߞߏ ߢߊߓߐ ߘߍ߲ߣߍ߲߫ ߊ߬ߟߎ ߟߋ߬ ߟߊ߫، <<ߣߴߊ߲ ߧߴߊ߬ ߝߍ߬ ߞߊ߬ ߖߡߊ߬ߣߊ߬ߘߋ߲ ߠߎ߬ ߟߊ߫ ߓߊߟߞߏ ߢߊߓߐ߫߸ ߊ߲ ߞߊ߫ ߞߊ߲߫ ߞߊ߬ ߘߎ߰ߞߟߏ ߟߋ߬ ߓߊ߯ߙߊ߫.>> ߊ߬ ߞߵߏ߬ ߝߐ߫، ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߝߏ߫ ߞߊ߬ ߞߎ߲߬ߠߊ߬ߛߌ߮ ߟߊ߫ ߛߣߍ߬ߞߍ߬ ߡߎߙߊ߲ ߠߎ߫ ߟߋ߬ ߟߊߓߊ߯ߙߊ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߞߎ߲߬ߠߊ߬ߛߌ߮ ߓߘߊ߫ <<ߓߏ߲߬ߓߊ߬ ߞߍ߫>> ߛߣߍ߬ߞߍ߬ߟߊ ߟߎ߬ ߡߊߘߍ߬ߡߍ߲ ߘߐ߫߸ ߞߊ߬ ߓߌ߲ߝߊ߯ߟߊ߲ ߠߎ߫ ߓߌ߬ߟߴߊ߬ߟߎ߫ ߛߊ߬ߥߏ߬ ߘߐ߫߸ ߊ߬ ߣߌ߫ ߟߊ߬ߕߟߐ߬ߟߊ߲ ߣߌ߫ ߕߙߏ߬ߞߏ ߟߎ߬.

ߛߣߍ߬ߞߍ߬ ߞߏ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߞߏߕߌ߮ ߞߵߊ߬ ߦߌ߬ߘߊ߬ ߞߏ߫ ߞߐߙߐ߲ߘߌ߫ ߞߏ ߕߍ߫ ߞߏ߫ ߘߋ߲ߣߍ߲߫ ߘߌ߫ ߥߙߎߞߌ ߛߌߟߊ ߞߊ߲߬߸ ߊ߬ ߦߋ߫ <<ߛߣߍ߬ߝߋ߲߫ ߕߣߐ߬ߡߊ ߖߍ߬ߘߍߖߍ߬ߘߍ ߟߋ߬ ߘߌ߫>> ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߞߐߙߐ߲ߘߌ ߘߌ߫ ߛߋ߫ ߘߐߦߟߍ߬ߡߊ߲߬ ߠߴߊ߲ ߝߍ߬ ߦߊ߲߬߸ ߞߵߊ߬ ߞߍ߫ ߝߊ߰ߣߌ߲ ߘߌ߫߸ ߞߊ߬ ߕߟߎ ߣߌ߫ ߛߊ߬ߝߌߟߊ ߟߎ߬ ߓߐ߫ ߊ߬ ߘߐ߫߸ ߞߵߊ߬ ߥߟߏߒߘߐ߫ ߞߏ ߡߎ߰ߡߍ ߢߊߓߐ߫ ߞߵߏ߬ ߓߌ߬ߟߊ߬ ߟߐ߯ߝߍ ߘߐ߫ ߛߍߣߍ߲߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߞߐߙߐ߲ߘߌ߫ ߛߣߍ ߓߍ߲߬ߣߍ߲߫ ߠߋ߬߸ ߞߊ߬ ߕߏ߫ ߊ߬ ߣߌ߫ ߛߣߍ߬ߝߋ߲߬ ߜߘߍ߫ ߟߎ߫ ߓߊ߬ߛߊ߲߬ ߠߊ߫ ߛߐ߲߬߸ ߊ߬ ߞߋߟߋ߲߫ ߞߊߣߊ߬ ߕߏ߫ ߛߣߍ߬ ߟߊ߫ ߘߎ߰ ߞߋߟߋ߲ ߞߊ߲߬ ߞߘߊߎ߫، ߏ߬ ߟߋ ߘߌ߫ ߘߎ߱ ߟߊߕߊ߲߬ߞߊ߫ ߞߊ߬ ߓߐ߰ߝߍ ߟߊߕߊ߲߬ߞߊ߬߸ ߞߊ߬ ߘߎ߱ ߘߌߦߊߣߍ߲ ߕߏ߫ ߞߘߊߎ߫.

 ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߞߊ߬ ߛߙߊ߬ߣߎ߲ ߕߊ߬߸ ߝߊߙߌ߲߫ ߊ߬ߟߌ ߓߊߘߊ߬ߙߊ߫ ߞߡߊ߬ߙߊ߬߸ ߏ߬ ߞߊ߬ ߞߐߙߐ߲ߘߌ߫ ߛߣߍ ߕߐ߬ߣߐ ߝߐ߫ ߥߙߎߞߌ ߡߊ߬ߘߎ߮ ߘߐ߫، ߞߵߊ߬ ߦߌ߬ߘߊ߬ ߞߏ߫: <<ߞߐߙߐ߲ߘߌ߫ ߛߣߍ ߣߌ߲߬ ߦߋ߫ ߓߊ߯ߙߊ ߘߌ߫ ߟߊ߫ ߝߊ߲ߞߊߢߊ߲߫߸ ߊ߬ ߣߌ߫ ߢߊ߫ ߜߘߍ߫ ߡߊ߬߸ ߊ߬ ߦߋ߫ ߥߏ߬ߓߊ߫ ߟߋ߬ ߟߊߝߊ߰ ߟߊ߫ ߞߏ߲ߞߏ߫ ߞߣߐߟߊ ߟߎ߬ ߘߐ߫߸ ߞߊ߬ ߘߍ߬ߡߍ߲߬ ߞߍ߫ ߓߊ߯ߙߊ߫ ߛߌߦߊߡߊ߲߫ ߘߐ߫.>> ߊ߬ ߞߵߏ߬ ߦߌ߬ߘߊ߬߸ ߞߵߊ߬ ߦߌ߬ߘߊ߬ ߞߏ߫ ߞߐߙߐ߲ߘߌ߫ ߛߣߍ ߡߊߘߐ߯ߦߊ ߡߊ߫ ߘߌߦߴߊ߬ ߦߋ߫ ߛߊ߲߬ ߠߊ߬ߓߊ߲ ߢߌ߲߬ ߠߎ߬ ߞߘߐ߫ ߝߋߎ߫.

ߞߊ߲ߞߊ߲߫ ߞߐߙߐ߲ߘߌ߫ ߞߏߟߊߘߍ ߝߘߏ߬ߓߊ߬ ߗߋߕߌ߮ ߣߐ߬ ߛߙߊ߬ߣߎ߲ ߕߊ߬ ߟߊ߸ ߡߎߛߊ߫ ߘߎ߲ߓߎߦߊ߫߸ ߊ߬ߟߎ߫ ߞߵߊ߬ ߣߊ߬ߕߊ ߟߎ߫ ߟߋ߬ ߝߐ߫ ߓߙߊߡߊߖߊ߲ߓߊ߲ ߣߌ߲߬ ߘߐ߫: <<ߊ߲ ߧߴߊ߬ ߝߍ߬ ߓߋ߬ߝߘߍ߬ ߅ ߀߀߀ ߟߋ߬ ߦߋ߫ ߛߋ߫ ߛߣߍ߬ ߟߊ߫ ߞߐߙߐ߲ߘߌ ߘߐ߫߸ ߏ߬ ߦߋ߫ ߞߍ߫ ߕߏߒߡߕߊ ߘߌ߫߸ ߊ߬ ߣߴߊ߬ ߕߐ߬ߣߐ ߦߋ߫ ߥߙߊ߬.>> ߊ߬ ߞߵߏ߬ ߦߌ߬ߘߊ߬ ߞߵߊ߬ ߝߐ߫ ߝߣߊ߫ ߞߏ߫ ߕߣߐ߬ߓߊ߫ ߟߋ߬ ߞߐߙߐ߲ߘߌ߫ ߓߊ߯ߙߊ ߟߊ߫ ߊ߲ ߛߌ߰ ߘߌ߲ߞߌߙߊ ߟߎ߬ ߞߊ߲߬.

ߛߣߍ߬ߞߍ ߓߙߊߡߊߖߊ߲ߓߊ߲ ߡߍ߲ ߛߌ߰ߣߍ߲߫ ߛߋ߲߬ߠߊ߫ ߣߌ߲߬߸ ߖߌ߬ߣߍ߫ ߝߊ߰ߡߊ ߟߎ߬ ߦߴߊ߬ ߝߍ߬ ߟߋ߬ ߞߊ߬ ߖߌ߬ߣߍ߫ ߓߌ߬ߟߊ߫ ߝߊ߬ߘߌ߬ ߞߎߘߊ߫ ߘߐ߫߸ ߞߊ߬ ߖߡߊ߬ߣߊ ߟߊߘߏ߲߬ ߞߐߙߐ߲ߘߌ߫ ߛߣߍߟߓߊ ߟߎ߬ ߛߙߍߘߍ ߘߐ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߘߐ߫ ߦߊ߲߬.