ߦߊ߬ߣߌ߫ ߞߊ߬ߙߊ߲߬ߝߊ ߦߋ߫ ߘߏ߲߬ ߞߊ߲ߞߊ߲߫ ߛߏ ߞߣߐ߫߸ ߊ߬ ߟߊߓߍ߲߬ߓߊ߮ ߟߎ߬ ߓߐ߫ ߘߊ߫ ߟߋ߬ ߞߵߊ߬ ߡߊߞߐ߬ߣߐ߲߬، ߒߞߏ ߛߍ߬ߘߏ߲߬ߠߊ߬ ߛߌߦߊߡߊ߲߫߸ ߊ߬ ߟߊ߫ ߞߊ߬ߝߊ ߞߊ߬ߙߊ߲߬ߓߊ߮ ߟߎ߬߸ ߊ߬ ߞߊ߬ߣߌ߲߬ߓߊ߮ ߟߎ߬߸ ߏ߬ ߟߎ߫ ߞߵߊ߬ߟߎ߬ ߥߟߌ߫ ߞߵߊ߬ߟߎ߬ ߞߍ߫ ߕߐ߲߬ߕߐ߲ ߘߌ߫߸ ߞߊ߬ ߥߊ߫ ߞߟߊ߬ߘߏ߲ߛߏ߲ ߟߊߓߍ߲߬، ߡߍ߲ ߠߎ߬ ߕߎ߲߬ ߡߴߊ߬ ߦߋ߫ ߝߟߐ߫߸ ߏ߬ ߟߎ߬ ߕߊ߯ ߘߴߊ߬ ߦߋ߫ ߞߊ߲ߡߊ߬، ߏ߬ ߘߏ߲߬ ߝߣߊ߫ ߞߍ߫ ߘߊ߫ ߛߍߥߓߊ߫ ߘߌ߫ ߖߐ߲߬ߡߊߛߌߣߌ߲ߟߐ߲߫ ߖߍ߬ߘߍ ߡߊ߬߸ ߊ߬ ߞߵߏ߬ ߡߍ߲ ߦߋ߫ ߥߊߟߢߌߡߊߟߐ߲߫ ߞߘߐ߬ߡߊ߲ ߘߌ߫.

<<ߛߍߥߊߣߊ߲߫ ߞߊ߲ ߡߌ߲ ߓߍ߫ ߒ ߓߟߏ߫ ߓߌ߬ ߞߵߊ߬ ߝߐ߫߸ ߏ߬ ߦߋ߫ ߛߍߥߊߣߊ߲߫ ߞߊ߲߫ ߞߘߐ߬ߟߋ߲ ߠߋ߬ ߘߌ߫߸ ߞߵߊ߬ ߟߊߞߎߘߊߞߎߘߦߊ߫ ߘߐߙߐ߲߫.>> ߊ߬ ߞߵߏ߬ ߦߌ߬ߘߊ߬، ߊ߬ ߞߊ߲߫ ߞߏ߫ ߏ߬ ߕߍ߫ ߘߏ߫ ߜߘߍ߫ ߘߌ߫߸ <<ߒߞߏ ߞߊߙߊ߲ߘߋ߲ ߠߎ߬ ߟߊ߫ ߢߐ߲߯ ߞߊߣߎ߲߸ ߊ߬ ߣߴߊ߬ߟߎ߬ ߟߊ߫ ߢߐ߲߯ ߠߊߘߌߦߊߢߍ߸ ߊ߬ ߣߴߊ߬ߟߎ߬ ߟߊ߫ ߞߏ߫ ߘߌߦߊߘߏ߲߬ ߢߐ߲߯ ߓߟߏ.>> ߊ߬ ߞߵߏ߬ ߦߌ߬ߘߊ߬ ߞߊ߬ ߒߞߏ ߞߊߙߊ߲ߠߊ ߟߎ߫ ߝߏ߬ ߞߏߛߓߍ߫.

ߊ߬ ߟߊߓߍ߲߬ ߘߊ߫ ߥߎߟߊ߫ ߖߊ߲ ߠߋ߬ ߟߊ߫߸ ߛߏ ߘߏ߲߬ߘߊ ߟߊ߫ ߞߐߣߊߞߙߌ߫ ߛߌߟߊߞߎ߲ ߠߊ߫، ߡߐ߰ ߛߌߦߊߡߊ߲߫ ߠߋ߬ ߕߊ߯ ߘߊ߫ ߟߊ߬ߓߍ߲߬ߠߌ߲ ߢߌ߲߬ ߘߐ߫، ߞߟߊ߬ߘߏ߲ߛߏ ߞߊ߲߫ ߞߏ߫ ߟߊ߬ߓߍ߲߬ߠߌ߲ ߞߍߢߊ ߣߌ߲߬ ߝߣߊ߫ ߞߍ߫ ߘߊ߫ ߘߊ߬ߟߎ߬ ߞߎߘߊ߫ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߞߏ ߞߊ߫ ߜߌߟߌ߲߫ ߝߊ߬ߛߏ߬ ߞߊ߲ ߛߍ߬ߘߏ߲߬ߠߊ ߟߎ߬ ߓߟߏ߫߸ ߊ߬ ߣߌ߫ ߒߞߏ ߘߏ߲߬ߞߏ ߟߎ߬ ߓߟߏ߫.

<<ߥߎߟߊ߫ ߦߴߊ߲ ߣߌ߫ ߞߊ߲ߞߊ߲߫ ߕߍ߫߸ ߊ߬ ߘߌ߫ ߞߎߘߍ߫ ߕߊ߲߫ ߓߐ߫، ߒ߬ߞߊ߬߸ ߡߐ߱ ߟߎ߬ ߓߐ߫ ߘߊ߫ ߞߊ߬ߦߌ߯ ߥߊ߯ߕߌ߫ ߖߏߣߊ ߟߊ߫߸ ߞߊ߬ ߣߵߊ߲ ߡߊߞߐ߬ߣߐ߲߬. ߏ߬ ߦߋ߫ ߞߏߓߊ߫ ߟߋ߬ ߘߌ߫.>> ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߟߌߡߊߞߏ ߟߋ߬ ߓߏ߲߬ߧߊ߬ ߛߎ߮ ߣߌ߲߬ ߘߌ߫ ߞߊ߲ߞߊ߲ߞߊ ߟߎ߬ ߟߊ߫ ߞߎ߲߬ߠߊ߫߸ ߓߊߏ߬߸ ߊ߬ߟߎ߬ ߗߋ ߟߋ߬ ߦߴߊ߬ ߘߌ߫ ߞߘߐ߬ߡߊ߲߬.

ߊ߬ ߟߊ߫ ߕߊ߯ߡߊ߫ ߛߌߟߊ ߟߊ߫߸ ߓߏ߲߬ߧߊ ߡߍ߲ ߟߊ߫ ߘߴߊ߬ ߞߊ߲߲߬ ߓߡߊ߬ߞߐ߫ ߞߵߊ߬ ߛߌ߰ ߞߐߣߊߞߙߌ߫ ߟߊ߫߸ ߏ߬ ߥߙߊ߬ ߘߴߊ߬ ߡߊ߬ ߞߏߛߓߍ߫، ߓߊߏ߬߸ ߊ߬ ߞߊ߲߫ ߞߏ߫ ߡߐ߱ ߟߎ߫ ߞߊ߬ ߘߎ߱ ߕߟߊ߫ ߊ߬ ߝߍ߬ ߟߋ߬ ߞߐߣߊߞߙߌ߫߸ ߊ߬ ߡߊߞߐ߬ߣߐ߲ ߦߴߌߘߐ߫ ߖߌ߬ߣߍ߬ ߞߎߓߋߘߊ ߟߊ߫.

<<ߞߊ߬ߓߌ߯ ߊ߲ ߓߐ߫ ߘߊ߫ ߓߡߊ߬ߞߐ߫ ߞߊ߬ ߣߵߊ߬ ߛߌ߰ ߞߐߣߊߞߙߌ߫߸ ߡߐ߱ ߟߎ߫ ߞߵߊ߬ ߕߊ߲ ߊ߲ ߡߊߞߐ߬ߣߐ߲ ߠߊ߫ ߞߐߣߊߞߙߌ߫ ߞߎߣߎ߲߬ ߝߏ߫ ߂߂ߙߋ߲ ߤߊ߲߯ ߂߃ ߙߋ߲، ߏ߬ ߦߋ߫ ߞߏߓߊ߫ ߟߋ߬ ߘߌ߫، ߞߵߊ߬ ߛߐ߬ߘߐ߲߬߸ ߒߠߋ ߘߏ߲߬ ߕߍ߫ ߘߏ߫ ߜߘߍ߫ ߘߌ߫߸ ߝߏ߫ ߊߟߎ߫ ߟߊ߫ ߞߊ߬ߙߊ߲߬ߘߋ߲.>> ߊ߬ ߞߵߏ߬ ߦߌ߬ߘߊ߬.

ߊ߬ ߓߌ߬ߟߊ߬ߛߌ߬ߟߊ߬ ߕߎߡߊ ߞߊ߬ ߖߌ߰ߦߊ߬ߘߊ ߡߊߜߍ߲߫߸ ߛߊ߲ ߓߙߊ߬ ߘߊ߫ ߕߐ߲߬ߕߐ߲ ߘߐ߫، ߓߊ߬ߙߌ߬߸ ߊ߬ ߞߊ߬ߣߌ߲ ߞߏߛߐ߲߬߸ ߓߍ߯ ߞߊ߬ ߛߊ߲ߖߌ߫ ߞߘߐߟߊ ߓߍ߬ߙߍ߲߬ߓߍ߬ߙߍ߲߬߸ ߞߊ߬ ߛߌߟߊ ߘߊߓߊ߲߫.

ߟߊ߬ߛߣߍ߬ߟߌ ߖߊ߲߬ߖߏ߲ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߡߏߙߌ߫ ߞߊ߬ߡߙߊ߫ ߖߐ߲߬ߡߊߛߌߣߌ߲ߟߐ߲߫ ߞߊ߬ ߘߏ߫ ߝߐ߫ ߊ߬ ߟߊ߫ ߞߓߊߞߏ߫ ߦߋߣߍ߲ ߠߎ߬ ߞߊ߲߬ ߤߖߌ ߕߊ߯ߡߊ ߘߐ߫، ߊ߬ ߞߊ߬ ߤߌ߬ߖߊ߬ߖߌ߬ ߖߡߊߣߊ ߣߌ߫ ߖߌ߬ߣߍ߬ ߛߎ߲ߞߎ߲ ߟߊ߫ ߢߐ߲߮ ߡߊ߬، ߊ߬ ߞߊ߬ ߞߏ ߡߍ߲ ߠߎ߬ ߦߋ߫ ߡߞߊ߫ ߣߌ߫ ߡߊ߬ߘߌ߬ߣߊ߫߸ ߊ߬ ߞߵߏ߬ ߟߊ߫ ߖߌ߬ߣߍ߬ ߝߣߊ߫ ߡߊ߬ ߛߎ߲ߞߎ߲ ߕߊ߫ ߝߊ߲߭ ߝߍ߬. ߓ

<<ߞߊ߬ ߓߐ߫ ߞߐߣߊߞߙߌ߫ ߞߊ߬ ߣߊ߬ ߞߊ߲ߞߊ߲߫߸ ߥߎߟߊ߫ ߘߐߞߏߟߏ߲߫ ߕߴߊ߬ ߘߐ߫، ߊ߬ ߓߍ߯ ߕߎ߫߸ ߊ߬ ߓߍ߯ ߞߙߎ߬߸ ߊ߬ ߓߍ߯ ߓߌ߲߫ ߞߍ߲ߘߍ߫.>> ߊ߬ ߞߵߏ߬ ߦߌ߬ߘߊ߬، ߊ߬ ߞߵߊ߬ ߦߌ߬ߘߊ߬ ߞߏ߫ <<ߒߠߋ ߓߐ߫ ߘߊ߫ ߡߊ߬ߘߌ߬ߣߊ߫ ߞߊ߬ ߣߊ߬ ߡߞߊ߫߸ ߊ߲ ߡߊ߫ ߓߌ߲߫ ߞߍ߲ߘߍ߫ ߞߋߟߋ߲ ߝߍߘߍ߲ߣߍ߲ ߦߴߊ߲ ߢߊ ߟߊ߫.>> ߊ߬ ߞߵߏ߬ ߞߍ߫ ߟߊߒߡߊ߫ ߘߌ߫ ߞߵߊ߬ ߦߌ߬ߘߊ߬߸ ߞߏ߫ ߡߐ߱ ߡߊ߲߫ ߞߊ߲߫ ߞߊ߬ ߢߌ߬ߣߊ߬ ߌ ߕߊ ߞߐ߫߸ ߞߵߊ߬ ߞߍ߫ ߦߏ߫ ߌ ߡߊ߫ ߛߐ߫ ߝߋ߲߫ ߠߊ߫، ߓߊߏ߬߸ ߊߟߊ߫ ߡߊ߫ ߡߐ߰ ߖߊ߲߬.

ߊ߬ ߞߊ߬ ߞߏߟߊߒߞߏߟߊ ߏ߬ ߞߍ߫ ߟߋ߬߸ ߞߵߊ߬ ߦߌ߬ߘߊ߬ ߞߏ߫ ߊߟߊ߫ ߡߊ߫ ߖߐ߲߬ ߖߊ߲߬، ߞߊ߬ߙߊ߲߬ߝߊ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߤߖߌ ߞߎ߲߬ߕߊ߮ ߞߣߐ߫߸ ߊ߬ ߞߊ߬ ߘߎ߬ߥߊ߬ߥߎ߬ ߛߌߦߊߡߊ߲߫ ߞߍ߫ ߒߞߏ ߛߓߍߟߌ ߦߋ߫߸ ߒߞߏ ߛߍ߬ߘߏ߲߬ߠߊ ߟߎ߬ ߦߋ߫߸ ߊ߬ ߣߌ߫ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߖߍ߬ߘߍ.

<<ߊ߲ ߘߎߓߊ߫ ߘߊ߫ ߒߞߏ ߦߋ߫߸ ߒߞߏ ߓߊ߯ߙߟߊ ߟߎ߬ ߦߋ߫߸ ߢߌ߬ߣߊ߫ ߘߏ߲߬ ߡߊ߫ ߞߍ߫ ߛߌߟߊߓߐߛߐ߯ߣߊ߫ ߞߐ߫߸ ߊߟߴߊ߬ߟߎ߬ ߞߎ߲߫ ߞߋߟߋ߲߫ ߘߐ߫.>> ߊ߬ ߞߵߏ߬ ߞߍ߫ ߞߎߡߊ ߞߎ߲߬ߝߊ߮ ߘߌ߫.