ߘߐ߲߬ߞߌ߲߬ ߛߊߟߌ ߓߍ߲߬ߒ߬ߛߋ߲߬ߡߊ ߞߏߛߐ߲߬߸ ߖߌ߬ߣߍ߫ ߘߏ߲߬ߛߏ ߟߎ߬ ߟߊ߫ ߘߍ߭ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߝߣߊ߫ ߦߋ߫ ߘߏ߫ ߞߍ߫ ߝߊ߰ߡߊ ߟߎ߫ ߞߍ߬ߙߍߝߍ߬߸ ߞߵߊ߬ߟߎ߬ ߡߊߘߍ߬ߡߍ߲߫ ߟߊ߬ߞߊ߲߬ߘߊ߬ߟߌ ߘߊߞߎ߲ ߘߐ߫߸ ߊ߬ ߣߌ߫ ߖߛߎ߬ߛߎߡߊ ߟߊߛߓߊ߬ߕߌ ߘߐ߫ ߖߡߊ߬ߣߊ ߞߣߐ߫، ߏ߬ ߟߋ ߞߏߛߐ߲߬߸ ߊ߬ߟߎ߬ ߟߊ߫ ߞߊ߲ߕߌ߯ ߛߙߍߞߍ߫ ߝߊ߬ߛߏ߬ߟߊ߬ߞߊ ߡߎߛߊ߫ ߞߎ߬ߟߌߓߊ߬ߟߌ߫ ߞߊ߬ ߓߍ߲߬ߒ߬ߛߋ߲߬ߡߊ߫ ߘߌ߫ ߝߐ߰ߓߍ߬ߦߊ߬ߟߊ ߟߎ߫ ߡߊ߬߸ ߊ߬ ߛߋ߫ ߘߴߊ߬ ߡߙߌߦߊ ߘߏ߫ ߟߎ߫ ߦߌ߬ߘߊ߬ ߟߊ߫ ߡߍ߲ ߘߐ߫، ߞߊ߬ ߘߏ߲߬ߛߏ ߟߎ߫ ߟߐ߬ߘߎ߮ ߣߴߊ߬ߟߎ߫ ߕߐ߬ߣߐ ߝߐ߫ ߖߡߊ߬ߣߊ ߞߣߐ߫߸ ߊ߬ߟߎ߬ ߦߋ߫ ߓߊ߯ߙߊ ߡߍ߲ ߞߍ߫ ߟߊ߫ ߡߐ߱ ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊߞߊ߲ߘߊ ߘߐ߫߸ ߊ߬ ߞߊ߬ ߘߏ߫ ߝߐ߫ ߏ߬ ߞߊ߲߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߞߊ߬ߦߌ߯ ߊ߬ߟߎ߬ ߟߊ߫ ߞߊ߲ߕߌ߯ ߞߎߘߊ ߢߌ߲߬ ߠߊߛߌ߰ ߘߊ߫߸ ߣߴߏ߬ ߦߋ߫ ߖߌ߬ߣߍ߫ ߘߏ߲߬ߛߏ ߟߎ߬ ߟߊ߫ ߘߍ߭ ߞߊ߲ߕߌ߯ ߝߊ߬ߛߏ߬ߟߊ߬ߞߊ ߘߌ߫߸ ߡߏ߬ߙߌ߬ߓߊ߫ ߘߊ߲߬ߕߟߌ߫ ߞߋߕߊ߬߸ ߏ߬ ߓߘߊ߫ ߦߟߍ߬ߡߊ߲ ߘߏ߲߬ ߞߏ߫ ߛߌߦߊߡߊ߲߫ ߠߋ߬ ߘߐ߫، ߡߙߌߦߊ߫ ߜߘߍ߫ ߕߴߏ߬ ߡߍ߲ ߣߴߊ߬ ߟߊ߫ ߖߊ߬ߡߊ ߟߊ߫߸ ߞߊ߬ ߓߋ߲ߓߊ ߟߎ߬ ߞߐߛߌߟߊ ߡߐ߬ߟߐ߲ ߣߴߊ߬ ߟߊ߲߬ߓߋ ߞߘߐߕߊ߬߸ ߞߊ߬ ߖߡߊ߬ߣߊ ߟߊ߫ ߢߝߍߕߊ߮ ߣ߬ߊ߬ ߟߊ߫ ߖߛߎ߬ߛߎߡߊ ߓߌ߬ߟߊ߬ ߢߍߝߍ߬߸ ߞߊ߬ ߓߊߛߌ߮ ߟߊߘߏ߲߬.

ߡߎߛߊ߫ ߞߎ߬ߟߌߓߊ߬ߟߌ߫ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫ ߞߏ߫: <<ߊ߲ ߠߊ߫ ߟߊ߲߬ߘߊ߬ ߞߘߐ ߟߎ߬ ߕߘߍ߬ ߕߎߣߎ߲ ߠߋ߬ ߞߊ߲߬، ߞߏ߬ߣߌ߲߬ ߓߌ߬߸ ߊ߲ ߧߋ߫ ߓߊ߯ߙߊ߫ ߟߊ߫ ߞߊ߬ ߖߛߎ߬ߛߎߡߊ ߟߊߘߏ߲߬߸ ߞߊ߬ ߓߍ߲߭ ߠߊߘߏ߲߬.>> ߊ߬ ߞߵߊ߬ ߟߊ߫ ߞߎߡߊ߫ ߞߋߟߋ߲ ߏߏ߬ ߞߍ߫ ߓߍ߲߬ߒ߬ߛߋ߲߬ߡߊ߬ ߘߌ߫߸ ߞߊ߬ ߛߊߟߌߡߊߝߏߟߌ ߟߊߛߋ߫ ߘߏ߲߬ߛߏ ߓߍ߯ ߟߊߣߍ߬ߘߍ߲ ߡߊ߬ ߖߡߊ߬ߣߊ ߞߣߐ߫.

ߘߏ߲߬ߛߏ ߟߎ߬ ߟߊ߫ ߘߍ߭ ߞߎ߲߬ߕߌ߮ ߢߌ߲߬ ߠߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߟߊ߬ߢߌߣߌ߲ ߦߋ߫ ߟߋ߬߸ ߞߊ߬ ߘߏ߲߬ߛߏ ߟߎ߬ ߣߌ߫ ߖߡߊ߬ߣߊ ߛߌ߲߬ߝߏ߲߬ߘߊ ߟߎ߬ ߓߟߏߘߏ߲߬ ߢߐ߲߯ ߓߟߏ߫߸ ߞߵߊ߬ߟߎ߬ ߕߍߟߊ ߖߎ߬ߟߎ ߘߐߞߙߊ߫، ߊ߬ ߞߊ߲߫ ߞߏ߫ ߘߏ߲߬ߛߏ ߟߎ߬ ߦߋ߫ ߖߡߊ߬ߣߊ ߞߣߐ߫ ߟߊ߬ߞߊ߲߬ߘߊ߬ߟߌ ߛߏ߬ߝߊ߬ߘߋ߲߬ ߥߣߊ ߟߎ߫ ߟߋ߬ ߘߌ߫߸ ߞߏ߫ ߣߴߌ ߖߍ߬ߘߍ ߞߊ߬ ߞߏ߲ߞߏ߫ ߞߣߐߟߊ ߟߎ߬ ߡߊߝߟߍ߫߸ ߦߋ߲߬ ߠߎ߬ ߡߍ߲ ߠߎ߬ ߟߊ߫ ߞߏ ߜߍ߬ߟߍ߲߬ߡߊ߲߬ߓߊ ߦߋ߫߸ ߘߏ߲߬ߛߏ ߟߎ߬ ߦߴߊ߬ߟߎ߬ ߛߋߞߏ ߞߍ߫ ߟߊ߫ ߏ߬ ߟߎ߬ ߓߍ߯ ߟߋ߬ ߟߊߞߊ߲ߘߊ ߘߐ߫.

<<ߊ߲ ߘߴߊ߬ ߦߌ߬ߘߊ߫ ߝߊ߰ߡߊ ߟߎ߬ ߟߊ߫߸ ߞߏ߫ ߊ߲ ߓߌߣߍ߲߫ ߛߎ ߣߌ߫ ߕߋ߬ߟߋ߸ ߞߵߊ߬ߟߎ߬ ߡߊߘߍ߬ߡߍ߲߫ ߊ߬ߟߎ߬ ߟߊ߫ ߓߊ߯ߙߊ ߟߎ߬ ߘߐ߫، ߊ߬ ߘߌߡߊ߲ ߊ߲ ߧߋ߫ ߟߋ߬ ߘߐߙߐ߲߫߸ ߕߟߏ ߦߋ߫ ߛߋ߫ ߡߊߟߐ߬ ߟߴߊ߲ ߠߊ߫߸ ߞߵߊ߲ ߡߊߘߍ߬ߡߍ߲߬߸ ߞߵߊ߲ ߞߐߡߊߓߌ߲ߓߌ߲߫߸ ߛߴߊ߲ ߘߌ߫ ߛߴߊ߲ ߠߊ߫ ߘߊ ߟߊߓߐ߫ ߟߊ߫ ߖߡߊ߬ߣߊ ߓߊ߯ߙߊ ߘߐ߫.>> ߊ߬ ߞߵߏ߬ ߦߌ߬ߘߊ߬.

ߡߎߛߊ߫ ߞߎ߬ߟߌߓߊ߬ߟߌ߬ ߕߊ߫ ߖߊ߬ߕߋ߬ ߘߐ߫߸ ߘߏ߲߬ߛߏ ߟߎ߬ ߡߊ߲߫ ߞߊ߲߫ ߞߊ߬ ߦߋ߫ ߓߋ߲ߓߊ ߟߎ߬ ߞߘߐ߬ߡߊ߲ ߠߎ߬ ߟߊߛߓߊ߬ߕߌ߬ߟߊ ߘߐߙߐ߲߫ ߘߌ߫ ߘߋ߬߸ ߝߏ߫ ߊ߬ ߦߋ߫ ߟߐ߲߫ ߞߏ߫ ߘߏ߲߬ߛߏ ߟߎ߬ ߦߋ߫ ߡߌ߬ߙߌ߲߬ߘߌ ߟߊߕߊ߲߬ߞߊ߬ߓߊ߮ ߣߴߊ߬ ߟߊߞߊ߲ߘߊߓߊ߮ ߟߋ߬ ߘߌ߫߸ ߞߊ߬ ߖߎ߯ߡߊ߲ ߓߍ߯ ߢߍߓߍ߲߬.

<<ߘߏ߲߬ߛߏ ߟߎ߬ ߦߋ߫ ߞߎ߲߬ߠߊ߬ߛߌ߮ ߘߍ߬ߢߐ߲߮ ߣߴߊ߬ ߕߋߙߌ ߟߋ߬ ߘߌ߫ ߟߊߞߊ߲ߘߓߊߟߌߦߊ ߞߍ߬ߟߍ ߘߐ߫߸ ߊ߬ ߣߌ߫ ߞߏ߫ ߟߎ߫ ߞߍ߬ߟߍ ߘߐ߫߸ ߡߍ߲ ߠߎ߬ ߦߋ߫ ߖߐ߬ߘߐ ߘߌ߫ ߖߡߊ߬ߣߊ߬ߘߋ߲ ߠߎ߬ ߞߊ߲߬.>> ߊ߬ ߞߵߏ߬ ߝߣߊ߫ ߝߐ߫.

ߘߏ߲߬ߛߏ ߟߎ߬ ߟߊ߫ ߘߍ߭ ߞߊ߲ߕߌ߯ ߛߙߍߞߍ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߘߏ߲߬ߛߏ ߟߎ߬ ߦߋ߫ ߓߊ߯ߙߊ߫ ߟߊ߫ ߖߡߊ߬ߣߊ߬ߘߋ߲ ߠߎ߫ ߟߋ߬ ߦߋ߫، ߞߊ߬ ߡߐ߱ ߟߎ߬ ߟߊߞߊ߲ߘߊ߲߫߸ ߞߵߊ߬ߟߎ߬ ߓߟߏߝߋ߲ ߠߎ߬ ߟߊߞߊ߲ߘߊ߫߸ ߞߊ߬ ߖߛߎ߬ߛߎߡߊ ߟߊߕߊ߲߬ߞߊ߬߸ ߊ߬ߟߎ߫ ߘߏ߲߬ ߦߴߏ߬ ߓߊ߯ߙߊ ߟߎ߫ ߞߊ߲߬ ߖߡߊ߬ߣߊ ߝߊ߲߬ ߛߌߦߊߡߊ߲߫ ߘߐ߫.

<<ߊ߲ ߠߊ߫ ߗߋߦߊߟߌ ߦߋ߫ ߡߍ߲ ߝߟߐߝߟߐ ߘߌ߫ ߡߎߣߎ߲߬߸ ߏ߬ ߟߋ ߖߡߊ߬ߣߊ߬ߘߋ߲ ߠߎ߬ ߘߌ߫، ߊ߲ ߧߋ߫ ߓߊ߯ߙߊ߫ ߟߊ߫ ߟߋ߬߸ ߞߊ߬ ߖߡߊ߬ߣߊ߬ߘߋ߲ ߠߎ߬ ߟߊߕߊ߲߬ߞߊ߬߸ ߞߵߊ߬ߟߎ߬ ߓߟߏߝߋ߲ ߠߎ߬ ߟߊߞߊ߲ߘߊ߫߸ ߞߊ߬ ߖߛߎ߬ߛߎߡߊ ߟߊߘߊ߬ߙߏ߬، ߊ߲ ߧߋ߫ ߓߊ߯ߙߊ߫ ߟߊ߫ ߖߊ߬ߡߊ ߟߊ߫ ߣߊ߬ߝߊ ߟߋ߬ ߦߋ߫߸ ߖߡߊ߬ߣߊ ߛߊ߬ߙߌ߬ߦߊ ߟߎ߬ ߡߊߓߏ߲߬ߧߊ ߞߊ߲߬.>> ߊ߬ ߞߵߏ߬ ߢߊߝߐ߫.

ߘߏ߲߬ߛߏ ߟߎ߬ ߟߊ߫ ߓߊ߯ߙߓߊ ߣߌ߲߬ ߓߍ߯ ߣߴߊ߬ ߕߊ߫߸ ߊ߬ߟߎ߬ ߦߋ߫ ߓߊ߯ߙߊ ߡߍ߲ ߞߊ߲߬ ߟߊ߬ߞߊ߲߬ߘߊ߬ߟߌ ߡߊ߬ߘߎ߮ ߘߐ߫߸ ߊ߬ߟߎ߬ ߞߊ߲߫ ߞߏ߫ ߜߟߍ߬ߦߊ ߘߏ߫ ߟߎ߫ ߦߴߊ߬ߟߎ߫ ߞߊ߲߬߸ ߊ߬ߟߎ߬ ߟߊ߫ ߓߊ߯ߙߊ ߏ߬ ߟߎ߫ ߖߍ߬ߘߍ ߞߍ߫ ߕߎߡߊ ߟߊ߫ ߝߋߎ߫.

ߡߎߛߊ߫ ߞߎ߬ߟߌߓߊ߬ߟߌ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߞߊ߬ߛߌ߬ ߟߊ߫ ߡߍ߲ ߞߐ߫߸ ߏ߬ ߟߋ ߊ߬ߟߎ߬ ߘߊ߲ߞߎ߲ ߘߌ߫، ߓߊߏ߬߸ ߢߊ߫ ߕߍ߫ ߟߐ߬ ߟߴߊ߬ߟߎ߬ ߘߐ߫߸ ߊ߬ߟߎ߬ ߕߍ߫ ߘߊ߲ߞߎ߲߫ ߠߊ߫ ߖߡߊ߬ߣߊ ߥߛߊ߬ߘߊ߬ߕߌ߮ ߘߏ߫ ߟߎ߫ ߓߟߏ߫ ߞߣߍ ߞߊ߲߬، ߊ߬ߟߋ ߢߣߊ߫߸ ߏ߬ ߦߋ߫ ߞߏ߫ ߟߋ߬ ߘߌ߫߸ ߡߍ߲ ߦߋ߫ ߛߌߟߊ ߕߍ߰ ߟߊ߫ ߘߏ߲߬ߛߏ ߟߎ߬ ߦߋ߫߸ ߛߋ ߡߍ߲ ߓߍ߯ ߦߴߊ߬ߟߎ߬ ߦߋ߫߸ ߊ߬ߟߎ߬ ߕߍ߫ ߛߋ߫ ߟߴߏ߬ ߓߍ߯ ߟߊߓߐ߫ ߟߊ߫.

<<ߊ߲ ߧߋ߫ ߖߌ߬ߣߍ߫ ߘߎ߰ߘߋ߲ ߠߋ߬ ߘߌ߫߸ ߦߏ߫ ߕߐ߭ ߟߎ߬ ߦߋ߫ ߢߊ ߡߍ߲ ߖߐ߫، ߊ߲ ߧߋ߫ ߘߏ߫ ߞߍ߫ ߟߊ߫ ߖߡߊ߬ߣߊ ߟߊߞߊ߲ߘߊ ߘߐ߫، ߊ߲ ߧߴߊ߬ ߝߍ߬ ߟߋ߬ ߏ߬ ߘߐ߫߸ ߢߊ ߦߋ߫ ߟߐ߬ ߊ߲ ߝߣߊ߫ ߘߐ߫߸ ߛߴߊ߲ ߘߌ߫ ߞߍ߫ ߢߐ߲߮ ߝߊ߲߬ߞߊ ߘߌ߫߸ ߘߏ߲߬ߛߏ ߟߎ߬ ߟߊ߫ ߞߎ߲߬ߠߊ߬ߛߌ߮ ߦߋ߫ ߘߏ߲߬ ߢߐ߲߮ ߘߐ߫.>> ߊ߬ ߞߵߏ߬ ߡߞߊ߬ߛߌ߬ߟߌ ߞߍ߫.

ߘߐ߲߬ߞߌ߲߬ ߛߊ߬ߟߌ߬ ߞߋߟߋ߲ ߣߌ߲߬ ߝߍ߬߸ ߡߎߛߊ߫ ߞߏ߬ߟߌߓߊ߬ߟߌ߫ ߞߵߊ߬ ߞߊ߲ߠߊߘߌ߫ ߖߌ߬ߣߍ߫ ߡߙߊ߬ߘߓߊ߬ ߃߃ ߓߍ߯ ߘߏ߲߬ߛߏ ߟߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߓߐ߫߸ ߞߊ߬ ߓߍ߲߭ ߠߊߛߓߊ߬ߕߌ߫ ߘߏ߲߬ߛߏ ߟߎ߬ ߕߍ߫ ߖߡߊ߬ߣߊ ߞߣߐ߫. ߊ߬ ߞߵߊ߬ ߦߌ߬ߘߊ߬ ߞߏ߫ ߘߏ߲߬ߛߏ ߟߎ߬ ߦߋ߫ ߖߡߊ߬ߣߊ߬ߘߋ߲ ߠߎ߬ ߟߊ߫ ߓߊ߯ߙߊ ߡߍ߲ ߠߊ߫߸ ߏ߬ ߛߌ߰ߣߍ߲߫ ߓߊߘߋ߲ߧߊ ߘߐߞߙߊ ߟߋ߬ ߡߊ߬߸ ߣߌ߫ ߛߎ߯ߟߊߝߛߊ ߡߙߌߦߊ߫ ߕߍ߫߸ ߓߘߊߟߊߝߛߊ߫ ߝߣߊ߫ ߕߍ߫ ߘߏ߲߬ߛߏ ߟߎ߫ ߘߏ߬ߣߌ߲ ߘߐ߫.

<<ߓߊ߯ߙߊ ߡߍ߲ ߦߴߊ߲ ߠߊ߫߸ ߊ߲ ߕߍߣߵߏ߬ ߟߊߟߐ߬ ߟߊ߫، ߏ߬ ߘߏ߲߬ ߕߍ߫ ߘߏ߫ ߜߘߍ߫ ߘߌ߫߸ ߞߊ߬ ߖߡߊ߬ߣߊ߬ߘߋ߲ ߠߎ߬ ߟߊߕߊ߲߬ߞߊ߬߸ ߞߵߊ߲ ߛߋߞߏ ߞߍ߫ ߖߡߊ߬ߣߊ ߟߊ߫ ߓߊߛߌ߮ ߘߐ߫߸ ߣߌ߫ ߢߣߊߕߐߡߐ߲ߠߌ߲߫ ߕߍ߫ ߛߌߦߊ߫ ߞߏ߫ ߣߌ߫ ߓߐ߫ ߦߙߐ߫ ߞߏ߫ ߘߐ߫.>> ߊ߬ ߞߵߏ߬ ߝߐ߫.

ߊ߬ ߟߊ߫ ߞߎߡߊ ߢߌ߲߬ ߘߐ߫߸ ߖߌ߬ߣߍ߫ ߘߏ߲߬ߛߏ ߟߎ߬ ߟߊ߫ ߘߍ߭ ߓߘߴߊ߬ ߦߌ߬ߘߊ߬ ߞߏ߫ ߓߋ߲ߓߊ ߟߎ߬ ߞߐ߫ ߛߌߟߊ ߕߊ߯ߡߊ ߦߋ߫ ߖߛߎ߬ߛߎߡߊ ߛߌߟߊ ߟߋ߬ ߘߌ߫߸ ߞߊ߬ ߛߌ߱ ߘߐߘߌߦߊ߫ ߖߡߊ߬ߣߊ߬ߘߋ߲ ߠߎ߬ ߕߍ߫، ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ ߞߊ߫ ߘߴߊ߬ߟߎ߬ ߦߋ߫ ߟߋ߬߸ ߞߎ߲߬ߠߊ߬ߛߌ߮ ߟߎ߬ ߣߌ߫ ߘߏ߲߬ߛߏ ߟߎ߬ ߦߴߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߞߊ߬ ߛߌ߫ ߟߊ߬ߞߊ߲߬ߘߊ߬ߟߌ ߜߟߍ߬ߦߊ ߟߎ߬ ߞߐ ߞߊߘߌ߫ ߟߊ߫.