ߛߍ߲߬ߞߍ߬ߝߙߊ߬ ߃߲ ߦߋ߫ ߞߊ߲ߞߊ߲߫ ߛߏߞߣߐߟߊ ߞߌ߲߬ߘߊ ߘߏ߫ ߟߋ߬ ߘߌ߫، ߒ߬ߓߊ߬߸ ߛߊ߬ߝߌ߬ߣߊ߬ ߓߊ߰ߙߊ߬ ߦߙߐ ߘߏ߫ ߟߋ߬ ߦߋ߲߬߸ ߡߍ߲ ߓߘߊ߫ ߡߊ߲߬ߕߙߐ ߟߊߛߋ߫ ߊ߬ ߟߊߡߌߣߌ߲ ߡߐ߱ ߟߎ߫ ߡߊ߬߸ ߝߏ߫ ߊ߬ ߛߌߦߊߡߊ߲߫ ߓߘߴߊ߬ ߘߡߊߞߊ߬ߛߌ߬، ߞߊ߬ߕߎ߲߯߸ ߊ߬ߟߎ߬ ߦߋ߫ ߕߟߎ ߞߍ߫ ߟߊ߫ ߝߌߓߊ ߘߏ߫ ߟߋ߬ ߞߣߐ߫߸ ߞߊ߬ ߟߐ߮ ߛߏ߲ߛߙߏߡߊ߫ ߏ߬ ߞߣߐ߫ ߞߊ߬ ߕߊ ߞߍ߫ ߏ߬ ߘߐ߫، ߒ߬ߓߊ߬߸ ߕߟߎ ߖߋ߬ߣߌ߲߬ ߕߎߡߊ ߏ߬ ߟߋ ߛߎߡߊ ߖߎ߯ߡߊ߲ߓߊ ߦߋ߫߸ ߛߌ߰ߢߐ߲߮ ߠߎ߬ ߟߊ߫ ߝߐߟߌ߫ ߘߐ߫ ߞߊ߬ߣߌ߲߬.


ߞߊ߬ߕߎ߲߯߸ ߛߎߡߊ ߏ߬ ߟߋ ߕߋ߬ ߟߊ߫ ߟߎ߫ ߞߣߐߟߊ ߟߎ߬ ߘߐ߫߸ ߦߙߐ ߓߍ߯ ߟߊߡߌ߬ߣߊ߬، ߛߌ߰ߢߐ߲߰ߦߊ ߞߊ߬ߛߌ ߡߊߕߊ߲߬ߞߊ ߣߌ߫ ߡߐ߰ߦߊ ߞߊ߬ߣߌ߲ ߞߏߛߐ߲߬߸ ߘߏ߫ ߟߎ߫ ߡߊ߫ ߛߐ߲߬ ߞߎߡߊ߫ ߟߊ߫ ߒ߬ ߠߊ߫ ߖߌ߬ߦߕߊ߬ߟߊ߲ ߢߊߞߘߐ߫ ߜߍ ߘߐ߫.

ߒ߬ߞߊ߬߸ ߦߋ߲߬ ߠߊߡߌߣߌ߲ ߡߐ߱ ߘߏ߫ ߞߎߡߊ߫ ߘߊ߫ ߜߎ߬ߕߙߎ ߞߣߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߕߎ߲߬ ߓߘߴߊ߬ ߝߙߋߞߋ ߢߊߝߐ߫ ߦߙߐ߫ ߕߌ߮ ߦߋ߫ ߞߘߐ߬ߡߊ߲߬.

<<ߦߙߐ ߣߌ߲߬ ߛߎߡߊ ߦߋ߫ ߡߊ߲߬ߕߙߐ ߟߊߛߋ߫ ߟߴߊ߲ ߡߊ߫ ߝߛߊߦߌ߫، ߓߊ߬ߙߌ߬߸ ߞߊ߬ ߓߍ߲߬ ߛߌ߰ߢߐ߲߰ߦߊ ߡߊ߬ ߛߊ߫߸ ߊ߲ ߞߵߊ߬ ߝߐ߫ ߦߙߐ߫ ߕߌ߮ ߦߋ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߘߌ߫ ߓߐߘߊ߫ ߢߌߣߌ߲߫ ߊ߬ ߟߊ߫߸ ߞߏ߬ߣߌ߲߬ ߤߊ߲߯ ߕߋ߲߬߸ ߝߏߦߌ߬ ߡߊ߫ ߞߍ߫.>> ߊ߬ ߞߵߏ߬ ߦߌ߬ߘߊ߬.


ߊ߬ ߟߊ߫ ߝߐߟߌ߫ ߘߐ߫߸ ߛߎߡߊ ߣߌ߲߬ ߦߋ߫ ߡߐ߰ ߛߌߦߊߡߊ߲߫ ߠߋ߬ ߕߙߐ߫ ߟߊ߫߸ ߊ߬ ߦߋ߫ ߛߊ߬ߛߊ ߓߌ߬ߟߊ߬ ߟߊ߫ ߘߏ߫ ߟߎ߫ ߟߊ߫، ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߖߌ ߘߏ߫ ߟߎ߫ ߦߋ߫ ߓߐ߫ ߟߊ߫ ߛߊ߬ߝߌ߬ߣߊ߬ ߓߊ߰ߙߊ߬ ߦߙߐ ߣߌ߲߬ ߘߐ߫߸ ߡߍ߲ ߦߋ߫ ߛߌ߰ߢߐ߲߮ ߠߎ߬ ߟߊ߫ ߞߐ߬ߟߐ߲ ߠߊߛߐ߬ߘߐ߲߬ ߠߊ߫߸ ߞߵߏ߬ ߞߊ߲߬ߞߊ߫ ߛߐ߲߬، ߊ߬ ߞߵߊ߬ ߦߌ߬ߘߊ߬ ߞߏ߫ ߝߙߋߞߋ ߏ߬ ߓߘߊ߫ ߘߊ߲ߘߊ߫߸ ߞߐ߬ߟߐ߲ ߝߋ߲߫ ߕߍ߫ ߞߊ߲߬ߞߊ߬ ߟߊ߫ ߕߋ߲߬، ߛߎߡߊ ߟߋ߬ ߘߐߙߐ߲߫ ߦߴߊ߬ߟߎ߫ ߛߍ߰ ߟߊ߫ ߛߍߣߍ߲߬.

<<ߖߊ߬ߡߊ ߞߊ߫ ߛߌߦߊ߫ ߦߊ߲߬، ߏ߬ ߘߐ߫߸ ߣߌ߫ ߓߊ߯ߙߊ߫ ߦߙߐ ߣߌ߲߬ ߛߋ߫ ߘߊ߫ ߟߊߦߟߍ߬ߡߊ߲߬ ߠߊ߫ ߦߙߐ߫ ߜߘߍ߫، ߏ߬ ߞߊ߫ ߢߌ߲߬ ߞߏߛߓߍ߫.>> ߊ߬ ߞߵߏ߬ ߘߌ߬ߢߍ߬ߟߊ߬ߢߌߣߌ߲ ߞߍ߫.

ߞߌ߲߬ߕߌ߮߸ ߊߓߘߎߙߊߤߑߡߊߣߌ߲߬ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊ߲߬ߕߙߐ ߦߋ߫ ߛߋ߫ ߟߊ߫ ߡߐ߱ ߟߎ߫ ߡߊ߬ ߝߋߎ߫، ߊ߬ߟߋ ߟߊ߫ ߟߎ ߢߊ ߓߍ߲߬ߣߍ߲߫ ߠߋ߬ ߦߙߐ ߣߌ߲߬ ߡߊ߬߸ ߊ߬ ߞߊ߲߫ ߞߏ߫ ߞߏ߫ ߊ߬ߟߋ ߟߋ߬ ߝߟߐ߫ ߦߋ߫ ߕߙߐߦߊ ߛߐ߬ߘߐ߲߬ ߠߊ߫ ߣߌ߲߬ ߞߏ ߘߐ߫ ߓߍ߯ ߦߋ߫.

<<ߛߊ߬ߝߌ߬ߣߊ߬ ߘߐ߬ߓߍ߲߬ ߦߙߐ ߣߌ߲߬ ߕߎ߲߰ߣߍ߲߫ ߒߠߋ ߟߊ߫ ߟߎߡߟߊ ߟߋ߬ ߟߊ߫ ߌߞߘߐ߫، ߏ߬ ߘߐ߫ߟ ߊ߬ ߡߊ߲߬ߕߙߐ ߡߍ߲ ߋ߫ ߟߊ߫ ߖߊ߬ߡߊ ߕߐ߭ ߡߊ߬߸ ߊ߰ ߛߋ߫ ߟߊ߫ ߒߠߋ ߝߟߐߝߟߐ߫ ߟߋ߬ ߡߊ߬.>> ߊ߬ ߞߵߏ߬ ߢߊߝߐ߫.

ߡߞߊ߬ߛߌ߬ߟߌ ߟߎ߬ ߞߐ ߘߐ߫߸ ߞߌ߲߬ߕߌ߮ ߞߵߊ߬ ߦߌ߬ߘߊ߬ ߞߏ߫ ߊ߬ ߥߊ߫ ߘߊ߫ ߦߙߐ߫ ߕߌ߮ ߘߋ߲ߞߍ߫ ߦߋ߫߸ ߏ߬ ߞߵߊ߬ ߢߊߝߐ߫ ߊ߬ ߦߋ߫ ߞߏ߫ ߊ߬ߟߎ߬ ߓߘߊ߫ ߦߙߐ߫ ߛߐ߬ߘߐ߲߬ ߛߊ߲ߝߌߣߊ߫߸ ߓߊ߯ߙߊ ߞߊ߫ ߞߊ߲߫ ߞߊ߬ ߟߊߦߟߍ߬ߡߊ߲߬ ߦߙߐ ߡߍ߲ ߘߐ߫߸ ߞߵߊ߬ ߓߐ߫ ߡߐ߱ ߟߎ߬ ߞߊ߲ߞߊ߲߬.

<<ߊ߬ ߞߵߊ߬ ߦߌ߬ߘߊ߬ ߒ ߠߊ߫ ߞߏ߫ ߊ߬ߟߎ߬ ߓߘߊ߫ ߓߟߏߘߐߓߍ߲ ߖߍ߬ߘߍߖߍ߬ߘߍ ߞߍ߫ ߊ߬ ߞߏ ߟߊ߫߸ ߞߏ߫ ߊ߬ߟߎ߬ ߓߘߊ߫ ߦߙߐ ߘߏ߫ ߘߐߓߍ߲߬ ߛߊ߲ߝߌߣߊ߫߸ ߞߏ߫ ߊ߬ߟߎ߬ ߦߴߊ߬ ߝߍ߬ ߞߏ߫ ߞߵߊ߬ ߟߊߕߊ߯ ߦߋ߲߬ ߠߋ߬، ߏ߬ ߘߐ߫ ߞߏ߫߸ ߊ߲ ߧߴߊ߲ ߖߎ߬ߛߎ ߛߎߡߊ߫.>> ߊߓߘߎߙߊߤߑߡߊߣ ߞߋߕߊ߬ ߟߋ߬ ߞߊ߲߫ ߕߋ߲߬.

ߞߌ߲߬ߕߌ߮ ߞߵߊ߬ ߦߌ߬ߘߊ߬ ߞߏ߫ ߊ߬ ߘߌ߫ ߟߊ߬ߤߘߌ ߕߊ߬ ߞߌ߲߬ߘߊ ߞߣߐ߫ ߡߐ߮ ߟߎ߬ ߦߋ߫߸ ߞߏ߫ ߊ߬ߟߋ ߟߊߛߌ߰ ߞߎ߲ ߦߴߊ߬ ߖߊ߲߬ߕߏ ߟߋ߬ ߘߌ߫ ߡߐ߱ ߟߎ߬ ߕߙߐߦߊ߫ ߞߏ ߟߎ߬ ߘߐ߫، ߏ߬ ߘߐ߫߸ ߞߏ߫ ߊ߬ ߘߴߊ߬ ߢߊ ߕߏ߫ ߣߌ߲߬ ߞߏ ߝߍ߬߸ ߤߊ߲߯ ߊ߬ ߝߐߣߍ߲߫ ߢߊ ߡߍ߲߸ ߊ߬ ߦߋ߫ ߞߍ߫ ߕߋ߲߬.

ߡߎߛߊ߫ ߞߊ߲ߕߍ߫ ߡߍ߲ ߦߋ߫ ߦߙߐ ߣߌ߲߬ ߕߌ߱ ߘߌ߫߸ ߊ߬ߟߋ ߖߍ߬ߘߍ ߞߵߊ߬ ߦߌ߬ߘߊ߬ ߞߏ߫ ߕߎ߫߬ߢߊ ߟߋ߬ ߝߋߎ߫߸ ߊ߬ ߟߊ߫ ߦߙߐ ߣߌ߲߬ ߡߊ߲߬ߕߙߐ ߦߋ߫ ߛߋ߫ ߟߊ߫ ߡߐ߱ ߟߎ߫ ߡߊ߬߸ ߊ߬ ߦߴߊ߬ ߛߌ߰ߢߐ߲߮ ߠߎ߫ ߛߍ߰ ߟߊ߫.

<<ߒ ߧߴߊ߬ ߞߊ߬ߟߊߡߊ߬ ߞߏ߫ ߒ ߧߋ߫ ߕߟߎ߫ ߖߋߣߌ߲ ߡߍ߲ ߞߍ߫ ߟߊ߫߸ ߏ߬ ߛߌ߬ߛߌ ߦߋ߫ ߡߐ߱ ߟߎ߬ ߕߙߐ߫ ߟߊ߫، ߕߟߎ߫ ߖߋߣߌ߲߫ ߛߌߛߌ ߦߋ߫ ߒ ߛߌ߰ߢߐ߲߮ ߠߎ߬ ߕߙߐ߫ ߟߊ߫، ߏ߬ ߟߋ ߞߏߛߐ߬ ߒ ߓߘߊ߫ ߥߟߌ߫ ߞߊ߬ ߥߊ߫ ߦߙߐ ߘߏ߫ ߟߊߘߊ߲߫ ߛߊ߲ߝߌߣߊ߫߸ ߖߐ߲߰ߛߊ߫ ߒ ߘߌ߫ ߕߙߐߦߊ ߓߐ߫ ߒ ߛߌ߰ߢߐ߲߮ ߠߎ߫ ߞߊ߲߬. ߓߊߏ߬߸ ߒ ߠߊ߫ ߢߌߣߌ߲ߠߌ߲߫ ߘߊߞߎ߲ ߠߋ߬߸ ߒ ߕߴߊ߬ ߝߍ߬ ߏ߬ ߦߋ߫ ߞߍ߫ ߡߐ߰ ߕߐ߬ߢߍ߰ ߦߙߐ߫ ߘߌ߫.>> ߊ߬ ߞߵߏ߬ ߟߊߛߋ߫.

ߦߙߐ߫ ߕߌ߮ ߞߵߊ߬ ߦߌ߬ߘߊ߬ ߞߏ߫ ߓߍ߯ ߦߴߊ߬ ߡߝߊ߫߸ ߞߏ߫ ߊ߬ ߓߐ ߦߙߐ ߏ߬ ߘߐ߫ ߞߊ߬ ߥߊ߫ ߛߊ߲ߝߌߣߊ߫߸ ߏ߬ ߜߏߡߊ߲߫ ߕߴߊ߬ ߦߋ߫ ߢߊ߫ ߛߌ߫ ߡߊ߬. ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߟߋ߬ ߝߟߐ߫ ߛߋ߫ ߘߊ߫ ߦߙߐ ߏ߬ ߘߐ߫ ߦߋ߲߬߸ ߞߵߊ߬ ߛߐ߬ߘߐ߲߬ ߖߡߊ߬ ߕߴߦߋ߲߬، ߊ߬ ߞߊ߲߫ ߞߏ߫ ߖߊ߬ߡߊ ߓߘߊ߫ ߣߊ߬ ߛߌߦߊߦߊ߫ ߞߐ ߢߌ߲߬ ߠߊ߫ ߏ߬ ߟߋ ߘߐ߫ ߣߌ߲߬، ߏ߬ ߟߋ ߘߐ߫߸ ߊ߬ߟߋ߫ ߖߍ߬ߘߍ ߛߐ߲߬ߣߴߊ߬ ߡߊ߬ ߞߏ߫ ߣߌ߫ ߖߊ߬ߡߊ ߛߌߦߊߦߊ߫ ߘߊ߫ ߦߙߐ ߘߐ߫߸ ߓߊ߯ߙߊ ߘߏ߫ ߟߎ߫ ߞߍ ߦߋ߫ ߜߟߍ߬ߦߊ߬ ߟߊ߫ ߟߋ߬.

<<ߒ ߛߋߣߍ߲߫ ߠߋ߬ ߦߊ߲߬߸ ߞߵߊ߬ ߕߘߍ߬ ߡߐ߰ ߕߴߦߊ߲߬، ߡߐ߱ ߟߎ߬ ߟߋ߬ ߓߌߣߍ߲߫ ߞߊ߬ ߒ ߕߍ߬ߘߍ߫ ߦߊ߲߬، ߏ߬ ߦߋ߫ ߤߙߍ ߟߋ߬ ߘߌ߫، ߤߊߟߵߊ߲ ߥߊߕߐ߫ ߦߙߐ ߡߍ߲ ߘߐ߫ ߣߌ߲߬߸ ߘߎߢߊ߫ ߟߏ߲ ߘߏ߫ ߘߌ߫ ߛߋ߫߸ ߡߐ߱ ߟߎ߬ ߘߌ߫ ߓߌ߫ ߞߵߊ߲ ߛߐ߬ߘߐ߲߫ ߦߋ߲߬ ߝߣߊ߫، ߡߐ߱ ߟߎ߫ ߘߏ߲߬ ߓߊ߯ ߛߋ߫ ߦߙߐ ߡߍ߲ ߘߐ߫߸ ߓߐߒߣߘߐ ߝߣߊ߫ ߦߋ߫ ߣߊ߬ ߟߊ߫ ߏ߬ ߢߊ ߟߋ߬ ߡߊ߬.>> ߊ߬ ߞߵߏ߬ ߝߐ߫.

ߊ߲ ߣߌ߫ ߡߎߛߊ߫ ߞߊ߲ߕߍ߫ ߥߟߌ߬ ߘߊ߫ ߞߊ߬ ߥߊ߫ ߛߋ߫ ߊ߬ ߟߊ߫ ߦߙߐ߫ ߞߏߝߐߣߍ߲ ߢߌ߲߬ ߘߐ߫ ߛߊ߲ߝߌߣߊ߫߸ ߊ߲ ߕߊ߯ ߘߴߊ߬ ߛߐ߬ߘߐ߲߬߸ ߊ߬ ߓߘߊ߫ ߞߏߞߏ߫ ߓߟߋߓߟߋ߫ ߟߐ߬ ߦߋ߲߬߸ ߊ߬ ߣߌ߲߫ ߓߏ߲ߓߊ߫ ߞߋߟߋ߲߫߸ ߊ߬ ߞߍߕߐ߫ ߊ߬ ߟߊ߫ ߓߊ߯ߙߊ ߟߎ߬ ߞߍ߫ ߟߊ߫ ߦߋ߲߬ ߠߋ߬ ߛߍߣߍ߲߬، ߊ߬ ߞߊ߲߫ ߞߏ߫ ߕߟߎ߫ ߖߋߣߌ߲ ߠߋ߬ ߓߍߣߊ߬ ߟߊߕߊ߯ ߦߋ߲߬߸ ߞߵߏ߬ ߓߐ߫ ߡߐ߱ ߟߎ߬ ߕߍߡߊ߬ ߛߍ߲߬ߞߍ߬ߝߙߊ߬ ߞߣߐ߫߸ ߞߊ߬ ߕߟߎ ߖߋ߬ߣߌ߫ ߦߋ߲߬ ߛߍߣߍ߲߬. ߓߊ߯ߙߊ ߞߏ߬ߣߌ߲ ߡߊ߫ ߘߊߡߌ߬ߣߊ߫ ߦߋ߲߬ ߡߎߣߎ߲߬.


ߕߎ߬ߡߊ ߘߏ߫ ߟߎ߫ ߟߊ߫߸ ߡߐ߱ ߟߎ߫ ߕߍ߬ߘߍ߫ ߊ߬ߟߎ߬ ߡߊߞߊ߬ߛߌ߬ ߟߊ߫ ߞߏ߫ ߖߌ ߡߍ߲ ߦߋ߫ ߓߐ߫ ߟߴߊ߬ ߟߊ߫ ߓߊ߯ߙߊ߫ ߦߌߟߊ ߘߐ߫߸ ߏ߬ ߕߙߐߦߊ ߦߋ߫ ߛߋ߫ ߟߊ߫ ߛߌ߰ߢߐ߲߮ ߠߎ߬ ߟߊ߫ ߞߐ߬ߟߐ߲ ߡߊ߬، ߡߎߛߊ߫ ߞߊ߲ߕߍ߫ ߞߵߊ߬ ߦߌ߬ߘߊ߬ ߞߏ߫ ߝߙߋߞߋ ߏ߬ ߦߋ߫ ߛߊ߲߬ ߟߏ߯ߟߎ߫ ߞߏ߫ ߟߋ߬ ߘߌ߫ ߡߎ߬ߕߎ߲߬߸ ߡߍ߲ ߓߘߊ߫ ߘߊ߲ߘߊ߫ ߊ߬ ߓߟߏ߫ ߞߊ߬ ߓߊ߲߫، ߞߏ߫ ߊ߬ ߓߘߊ߫ ߘߋ߲߬ߓߊ߬ ߓߟߋߓߟߋ߫ ߛߋ߲߬߸ ߡߍ߲ ߟߐ߭ ߦߋ߫ ߜߟߊ߬ߜߟߊ߬ ߣߊ߯ߣߌ߲߫ ߘߌ߫߸ ߊ߬ ߞߊ߲߬ߞߊ߲ ߦߋ߫ ߜߟߊ߬ߜߟߊ߫ ߛߓߊ߬ ߘߌ߫߸ ߊ߬ ߘߎ߲߬ߧߊ ߦߋ߫ ߜߟߊ߬ߜߟߊ߫ ߛߓߊ߬ ߣߌ߫ ߕߟߊ߫ ߘߌ߫، ߖߐ߲߰ߛߊ߫߸ ߓߟߏߟߊߞߏߖߌ ߟߎ߬ ߣߌ߫ ߛߊ߬ߝߌ߬ߣߊ߬ ߖߌ ߕߐ߭ ߟߎ߬ ߓߍ߯ ߘߌ߫ ߘߐߞߊ߬ ߦߋ߲߬.

<<ߕߙߏ߬ߞߏ ߦߋ߫ ߣߊ߬ ߟߴߊ߬ ߘߐߞߊ߬ ߟߊ߫ ߛߐ߲߬ ߞߊ߬ ߣߵߊ߬ ߖߌ ߕߊ߬، ߝߋ߲ ߺ ߋ ߺ ߝߋ߲߫ ߘߌ߫ ߞߊ߲߬ߞߊ߲߬߸ ߊ߬ ߓߍ߯ ߖߌ߰߰ ߟߊ߫ ߏ߬ ߟߋ ߞߣߐ߫߸ ߓߊ߯ߙߊߘߋ߲ ߠߎ߬ ߦߴߊ߬ߟߎ߬ ߡߊߞߏ߬ ߟߊ߫ ߦߋ߲߬߸ ߊ߬ ߖߌ ߞߋߟߋ߲߫ ߔߋ߫ ߕߍ߫ ߓߐ߫ ߟߊ߫ ߞߊ߬ ߓߋ߬ ߘߎ߱ ߡߊ߬ ߡߍ߲ ߘߌ߫ ߥߦߏ߬، ߛߊ߲ߖߌ߫ ߞߏ߬ߣߌ߲ ߓߊ߯ ߘߏ߲߬ ߦߊ߬߸ ߊ߬ ߘߌ߫ ߓߐ߫ ߞߣߍߡߊ߬߸ ߒ ߛߋ߫ ߘߐ߫ ߞߏ߫ ߕߴߏ߬ ߘߌ߫، ߓߊ߬ߙߌ߬߸ ߊ߲ߠߎ߬ ߦߋ߫ ߖߌ ߡߍ߲ ߠߊߓߐ߲߬ ߠߊ߫߸ ߏ߬ ߝߋ߲߫ ߕߍ߫ ߛߋ߫ ߟߊ߫ ߞߣߍߡߊ߬.>> ߊ߬ ߞߵߏ߬ ߢߊߝߐ߫.


ߛߍ߲߬ߞߍ߬ߝߙߊ߬ ߛߓߊߣߊ߲ ߞߣߐ߫ ߕߋ߲߬߸ ߞߌ߲߬ߘߊ ߞߣߐ߫ ߡߐ߮ ߟߎ߬ ߞߊ߲߫ ߞߏ߫ ߛߎߡߊ ߦߴߊ߬ߟߎ߫ ߛߍ߰ ߟߊ߫߸ ߞߏ߫ ߞߊ߬ ߓߊ߯ߙߊ߫ ߦߙߐ ߟߊߦߟߍ߬ߡߊ߲߬، ߞߌ߲߬ߕߌ߮ ߞߊ߲߫ ߞߏ߫ ߡߐ߱ ߟߎ߬ ߦߴߊ߬ߟߎ߬ ߛߓߊߙߌ߫߸ ߦߙߐ߫ ߕߌ߮ ߝߣߊ߫ ߞߊ߲߫ ߞߏ߫ ߊ߬ ߕߍ߫ ߡߍ߲߫ ߊ߬ ߘߌߣߊ߬ ߕߟߎ߬ ߖߋߣߌ߲ ߠߊߦߟߍ߬ߡߊ߲߬ ߛߊ߲ߝߌߣߊ߫، ߏ߬ ߘߐ߫߸ ߡߐ߱ ߟߎ߫ ߛߌ߰ߣߍ߲߫ ߛߍߣߍ߲߬ ߞߵߏ߬ ߟߋ ߡߊߞߐ߬ߣߐ߲߬߸ ߞߵߊ߬ ߟߐ߲߫ ߣߌ߫ ߟߊ߬ߤߘߌ߫ ߕߊ߬ߣߍ߲ ߘߌ߫ ߓߐ߫ ߊ߬ ߛߌߟߊ ߝߍ߬߸ ߥߟߊ߫ ߏ߬ ߛߌ߬ߣߊ.