ߞߊ߲ߞߊ߲߫ ߞߕߌ߫ ߡߛߊߦߌ߲ߘߊ ߣߐ߬ ߥߛߎߟߊߘߋ߲ ߠߎ߬ ߟߊ߫ ߛߐ߰ߓߌ߫ ߂߄ ߠߋ߬ ߘߐߕߟߊ߫ ߟߊ߫ ߥߛߎߖߌ߲ߓߊ ߞߣߐ߫߸ ߞߵߏ߬ ߞߍ߫ ߞߏߟߊߕߐ߲ ߞߏ߬ߛߊ ߘߌ߫߸ ߞߵߊ߬ ߘߏ߲߬ ߥߛߎߟߊߘߋ߲ ߠߎ߬ ߞߊ߲ߠߊ߫.

ߛߙߊ߬ߣߎ߲ ߕߊ߬ߣߍ߲ ߝߘߏ߬ߓߊ߬ ߞߕߌߞߊ߲ߘߊ ߓߟߏ߫߸ ߡߊߙߑߥߊߣ ߓߊߟߑߘߋ߬߸ ߊ߬ ߓߊ߯ߙߊ ߣߌ߲߬ ߞߎ߲߭ ߢߊߝߐ߫߸ ߏ߬ ߡߍ߲ ߠߊߥߟߌ߬ߣߍ߲߫ ߖߡߊ߬ߣߊ ߡߊߘߍ߬ߡߍ߲ ߡߊ߬ ߞߍߕߊ ߟߎ߬ ߘߐ߫: <<ߊ߬ ߦߴߊ߲ ߞߊ߲߬ ߛߋ߲ߛߋߘߋ߲ ߠߋ߬ ߘߌ߫߸ ߞߏ ߡߍ߲ ߠߎ߬ ߞߍߣߍ߲߫ ߞߘߐ ߦߋ߫ ߖߡߊ߬ߣߊ ߞߣߐ߫߸ ߞߵߊ߲ ߛߋߞߏ ߞߍ߫ ߏ߬ ߟߎ߬ ߡߊߞߊ߬ߝߏ ߘߐ߫، ߏ߬ ߟߋ ߜߎ ߦߋ߫ ߜߘߍߛߌ߯ߟߌ ߛߌߟߊ߫ ߞߍ߲ߘߍ ߘߌ߫߸ ߊ߬ ߣߌ߫ ߖߌ߬ߣߍ߬ ߞߊ߲ߓߍ߲ ߞߕߌ߫ ߞߏ ߟߎ߬ ߢߊߞߎߘߦߊ ߕߊ߯ߛߌߟߊ ߘߌ߫.>> ߊ߬ ߞߵߏ߬ ߦߌ߬ߘߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߡߙߌߦߊ ߣߌ߲߬ ߞߍߕߐ߫ ߛߊߓߎ߫ ߟߋ߬ ߘߌ߫߸ ߞߊ߬ ߥߛߎߟߊߘߋ߲ ߠߎ߬ ߟߊ߫ ߥߛߎߟߊߘߏ߲ ߛߌ߰ߝߊߘߌ ߘߐߦߟߍ߬ߡߊ߲߬߸ ߞߵߊ߬ ߦߌ߬ߘߊ߬ ߞߏ߫ ߤߊߞߍ ߘߏ߫ ߦߋ߫ ߥߛߎߟߊߘߋ߲ ߠߎ߬ ߝߣߊ߫ ߓߟߏ߫߸ ߡߍ߲ ߦߴߊ߬ߟߎ߬ ߡߊߛߊ߲߬ߛߊ߲߬ ߠߊ߫ ߖߡߊ߬ߣߊ ߛߊ߬ߙߌ߬ߦߊ ߞߣߐ߫.

ߛߊ߬ߙߌ߬ߦߊ߬ߓߊ߰ߙߊ߬ߟߊ߫ ߡߊߙߑߥߊߣ ߓߊߟߑߘߋ߬ ߞߵߊ߬ ߦߌ߬ߘߊ߬߸ ߞߏ߫ ߕߣߐ߬ߓߊ߫ ߟߋ߬ ߦߋ߫ ߥߛߎߟߊߘߋ߲ ߠߎ߬ ߟߊ߫ ߛߐ߰ߓߌ ߢߌ߲߬ ߠߊ߫ ߟߊ߬ߞߊ߲߬ߘߊ߬ߟߌ ߡߊ߬ߘߎ߮ ߘߐ߫.

<<ߥߛߎߟߊߘߋ߲ ߠߎ߬ ߟߊߘߊ߬ߙߏ ߥߛߎ ߞߘߐ߫߸ (ߝߊ߰ߣߌ߲ ߢߌ߲߬ ߘߌ߫ ߞߍ߫ ߕߙߎ߬ ߘߌ߫) ߞߵߊ߬ߟߎ߫ ߕߊ߲߬ߞߊ߫ ߔߘߏ߬ߞߟߏ߬ߡߊ߬ߟߌ ߡߊ߬، ߝߣߊ߫߸ ߣߴߊ߬ ߡߊ߫ ߢߊ߬ ߞߏ߫ ߞߕߌ ߘߏ߫ ߟߎ߫ ߟߊߓߌ߬ߟߊ߬ߣߍ߲߫ ߠߋ߬ ߓߍ߯ ߦߋ߫߸ ߝߊ߰ߣߌ߲ ߢߌ߲߬ ߘߴߊ߬ ߞߍ߫߸ ߥߛߎߟߊߘߋ߲ ߠߎ߬ ߕߍ߫ ߛߴߊ߬ߟߎ߬ ߡߎߣߎ߲ߧߊ߫ ߟߊ߫ ߡߐ߱ ߕߐ߭ ߟߎ߬ ߘߐ߫ ߞߵߊ߬ߟߎ߫ ߔߘߏ߬ߞߟߏ߬ߡߊ߫ ߞߊ߬ ߥߊ߫ ߞߕߌ߫ ߥߊ߯ߕߌ߫ ߛߎ߮ ߏ߬ ߟߎ߬ ߟߊ߫ ߛߐ߲߬.>> ߊ߬ ߞߵߏ߬ ߝߣߊ߫ ߦߌ߬ߘߊ߬.

ߒ߬ߓߊ߬߸ ߥߛߎߟߊߘߋ߲ ߠߎ߬ ߓߊ߯ ߦߋ߫ ߡߎ߬ߕߎ߲߬ ߌߞߘߐ߫ ߞߊ߲ߞߊ߲߫߸ ߊ߬ ߘߌ߫ ߟߐ߫ ߝߊߘߌߦߊߓߐ ߣߌ߲߬ ߡߊ߬، ߏ߬ ߟߋ ߘߏ߲߬ ߦߋ߫ ߔߘߏ߬ߞߟߏ߬ߡߊ߬ߟߌ ߡߙߌߦߊ ߡߊߕߊ߲߬ߞߊ߬ ߢߊ ߘߌ߫߸ ߊ߬ ߣߴߊ߬ ߘߌ߫ ߞߍ߫ ߕߙߎ߬ ߘߌ߫ ߞߊ߬ ߥߛߎߓߏ߲ ߥߛߊ߬ߘߊ߬ߕߌ߮ ߟߎ߬ ߟߊ߫ ߓߊ߯ߙߊ ߟߊߣߐ߰ߦߴߊ߬ߟߎ߬ ߓߟߏ߫.

ߞߊ߲ߞߊ߲߫ ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ߸ ߝߊߙߌ߲߫ ߊ߬ߟߌ ߓߊߘߊ߬ߙߊ߫ ߞߡߊ߬ߙߊ߬ ߛߍߥߊ߫ ߘߊ߫ ߣߌ߲߬ ߞߏ ߟߊ߫ ߞߏߛߓߍ߫߸ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߦߋ߫ ߞߓߊߞߏ ߖߍ߬ߘߍ ߟߋ߬ ߘߌ߫: <<ߊ߬ ߛߋ߲߬ߢߊ߬ ߝߟߐ ߟߋ߬ ߘߐ߬ߝߐ ߞߣߐ߫ ߣߌ߲߬߸ ߞߊ߬ ߖߡߊ߬ߣߊ߬ߘߋ߲ ߦߋ߫߸ ߡߍ߲ ߝߣߊ߫ ߘߌ߫ ߛߋ߫ ߡߌ߬ߣߊ߬ ߟߊ߫ ߞߵߊ߬ ߟߊߘߏ߲߬ ߥߛߎ ߟߊ߫߸ ߏ߬ ߦߋ߫ ߓߌ߲߬ߓߊ߬ߥߏ߬ߟߌ߬ ߞߏߛߊ ߘߌ߫ ߥߛߎߟߊߘߋ߲ ߠߎ߬ ߡߊ߬.>> ߊ߬ ߞߵߏ߬ ߦߌ߬ߘߊ߬.

ߊ߬ߟߋ ߞߊ߬ ߣߌ߲߬ ߦߋ߫ ߞߏ߫ ߟߋ߬ ߘߌ߫߸ ߡߍ߲ ߦߋ߫ ߥߛߎߟߊߘߋ߲ ߠߎ߬ ߟߊ߲߬ߓߋ ߞߘߐߕߊ߬ ߟߊ߫، ߞߊ߬ ߦߋߞߏ߫ ߢߌߡߊ ߘߌ߫ ߥߛߎ ߖߍ߬ߘߍ ߝߣߊ߫ ߡߊ߬.

ߞߊ߲ߞߊ߲߫ ߥߛߎߖߌ߲ߓߊ ߡߊߡߙߊ߬ߓߊ߮߸ ߝߏߘߋ߬ ߡߎߛߊ߫ ߡߏ߬ߙߌ߬ߓߊ߫ ߞߡߊ߬ߙߊ߬߸ ߏ߬ ߞߵߊ߬ ߦߌ߬ߘߊ߬ ߞߏ߫ ߘߌߒߡߊߟߌ ߣߌ߲߬ ߦߋ߫ ߢߐ߲߰ߦߋ߬ߓߊߟߌ ߟߋ߬ ߘߌ߫: <<ߊ߬ ߛߋ߲߬ߢߊ߬ ߝߟߐ ߟߋ߬ ߕߋ߲߬߸ ߞߊ߬ߦߌ߯ ߒ ߞߊ߬ ߥߛߎ߫ ߡߊߡߙߊ ߘߊߡߌ߬ߣߊ߬߸ ߒ ߡߊ߫ ߣߌ߲߬ ߢߐ߲߰ ߦߋ߫، ߞߘߐ߬ߡߊ߲߫߸ ߝߊ߬ߛߏ ߥߛߎ߫ ߡߊߡߙߊߟߌ ߗߋߕߌ߯ߘߊ ߟߋ߬ ߘߋ߬ߙߌ߬ߣߍ߲߫ ߣߌ߲߬ ߛߎ߮ ߟߊ߫.>> ߊ߬ ߞߵߏ߬ ߦߌ߬ߘߊ߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߥߊߟߢߌߡߊߟߐ߲ ߦߋ߫ ߛߋ߫ ߟߊ߫ ߝߘߏ߬ߓߊ߬ ߞߕߌߓߋߟߋ߲ ߡߊ߬߸ ߡߙߌߦߊ߫ ߛߊߣߌ߲ ߣߌ߲߬ ߕߊ߭ ߘߐ߫ ߞߵߊ߬ ߞߍ߫ ߥߛߎߟߊߘߋ߲ ߠߎ߬ ߦߋ߫.

ߥߛߎߟߊߘߋ߲ ߠߎ߬ ߟߊ߫ ߛߐ߰ߓߌ߬ ߞߏ ߡߍ߲ ߦߋ߫ ߣߌ߲߬߸ ߊ߬ ߦߋ߫ ߖߌ߬ߣߍ߬ ߞߕߌߘߊ ߦߋߝߊߘߌ ߣߴߊ߬ ߕߐ߮ ߟߊߓߘߍ߬ߦߊ߬ ߛߌߟߊ ߘߏ߫ ߟߋ߬ ߘߌ߫߸ ߞߊ߬ ߡߐ߰ߦߊ ߤߊߞߍ ߡߊߓߏ߲߬ߧߊ ߦߌ߬ߘߊ߬ ߥߛߎߟߊߘߋ߲ ߠߎ߬ ߞߊ߲߬߸ ߞߵߊ߬ߟ߫ ߟߌ߬ߤߟߊ ߟߊߢߊ߬.