ߕߟߋ߬ ߘߊ߲ߘߐ߫ ߟߋ߬ ߕߏߣߍ߲߫ ߥߛߊ߬ߘߋ߲߬ ߢߣߊߕߊߟߌ ߟߊ߫ ߖߌ߬ߣߍ߬ ߞߣߐ߫ ߡߎ߬ߕߎ߲߬߸ ߓߍ߯ ߦߋ߫ ߟߊ߬ߡߊ߮ ߞߊ߲߬ ߊ߬ ߞߎ߲߬ߠߊ߫ ߏ߬ ߟߋ ߘߐ߫ ߣߌ߲߬߸ ߞߊ߬ ߞߣߍ ߡߊߡߌ߬ߣߊ߬، ߒ߬ߓߊ߬߸ ߎ߳ߍߡߑߔߋ ߥߛߊ߬ߓߊ߰ߦߊ ߡߍ߲ ߘߐ߱ߘߏ߲߬ߣߍ߲߫ ߟߊ߬ߥߊ߲߬ߞߊ߲߬ߠߌ߲ ߠߊ߫ ߒߞߏ ߘߐ߫߸ ߣߴߊ߬ߟߎ߬ ߣߌ߫ ߖ߭ߋߍߡߑߘߋ ߓߟߏ߫ ߦߋ߫ ߢߐ߲߯ ߓߟߏ߫ ߢߌ߲߬ߢߊ ߕߊ߫ ߓߟߏ ߡߊ߬߸ ߏ߬ ߟߎ߬ ߣߌ߫ ߝߊ߬ߛߏ߬ ߞߊ߲ ߛߍ߬ߘߏ߲߬ߠߊ ߟߎ߫ ߞߊ߬ ߢߐ߲߯ߦߋߓߊ߫ ߟߋ߬ ߞߍ߫ ߞߊ߲ߞߊ߲߫ ߞߣߐ߫ ߓߐ߬ߙߑߘߏ߫ ߞߌ߲߬ߘߊ ߟߊ߫߸ ߣߊ߲߬ߝߏ߯ ߌߛߎ߬ߡߊ߬ߌ߯ߟߊ߫ ߖߊ߰ߓߌ߬ ߓߘߊ߸ ߖߘߍ߬ߞߟߏ߬ߓߊ߰ߦߊ ߢߍߓߊ߮.

ߟߊ߬ߘߍ ߣߌ߲߬ ߘߐ߫߸ ߒߞߏ ߘߍߞߙߎ߫ ߞߏߟߊߕߍ߮ ߟߎ߬ ߣߴߊ߬ ߛߍ߬ߘߏ߲߬ߠߊ߬ ߛߌߦߊߡߊ߲߫ ߠߋ߬ ߕߘߍ߬ ߞߣߍ ߞߊ߲߬ ߦߋ߲߬߸ ߒߞߏ ߞߊ߲߬ߜߍ߬ߘߊ ߞߊ߲ߕߌ߮ ߖߍ߬ߘߍ ߢߊ ߕߘߍ߬ ߜߍ ߘߐ߫߸ ߟߊ߱ߖߌ߬ ߡߊ߬ߡߊ߬ߘߌ߫ ߛߎ߬ߥߊ߬ߙߋ߬.

ߛߙߊ߬ߣߎ߲ ߕߊ߬ߣߍ߲ ߗߋߦߊߟߌ ߛߌߟߊ߫ ߢߍߟߐ ߓߟߏ߫߸ ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫߸ ߊ߬ߟߋ߫ ߞߵߊ߬ߟߎ߬ ߟߊ߫ ߕߊ߯ߡߊ ߞߎ߲߭ ߢߊߝߐ߫ ߖߡߊ߬ߣߊ ߞߣߐ ߟߊ ߘߐ߫.

<<ߊ߲ ߧߋ߫ ߖߡߊ߬ߣߊ ߘߐߦߊ߯ߟߊ ߞߊ߲߬ ߠߋ߬߸ ߞߵߊ߬ ߦߌߘߊߞߊ߬ ߞߏ߫ ߊ߲ ߓߍ߯ ߦߋ߫ ߢߣߊߕߊߟߌ ߞߍ߫ ߎ߳ߍߡߑߔߋ ߢߍ߫، ߎ߳ߍߡߑߔߋ ߦߋ߫ ߖ߭ߋߍߡߑߘߋ ߢߌ߲߭ ߠߋ߬ ߘߌ߫ ߛߙߍߘߍ߫ ߝߊ߬ߛߏ߬ߟߊ߬ߞߊ ߞߊ߲߬، ߊ߲ ߣߊ߬ߣߍ߲߫ ߖߡߊ߬ߣߊ ߞߣߐߟߊ ߘߐ߫ ߏ߬ ߟߋ ߘߐ߫߸ ߞߊ߬ ߛߎߥߊ߲ߘߟߌ ߞߍߢߊ ߏ߬ ߢߊߝߐ߫߸ ߛߙߍߘߍ߫ ߞߎ߲ ߦߋ߫ ߓߎߓߞߊߙ ߛߘߌߞߌ߬ ߖߊߟߏ߫ ߟߋ߬ ߘߌ߫߸ ߊ߬ߟߋ ߟߋ߬ ߝߙߍߕߍ߫ ߆߲ ߘߌ߫ ߢߣߊߕߊߟߌ߫ ߕߍ߯ߟߍ߲ ߞߊ߲߬.>> ߊ߬ ߞߵߏ߬ ߦߌ߬ߘߊ߬.

ߊ߬ ߟߊ߫ ߛߙߊ߬ߣߎ߲ ߘߐ߫߸ ߊ߬ ߞߊ߬ ߘߏ߫ ߝߐ߫ ߖߡߊ߬ߣߊ ߝߊ߰ߡߊ ߟߎ߬ ߟߊ߫ ߘߐ߬ߖߊ߬ ߞߍߣߍ߲ ߠߎ߬ ߞߊ߲߬ ߘߐ߬ߕߊߡߌ߲ ߕߎ߬ߡߊ ߟߊ߫߸ ߊ߬ߟߎ߫ ߞߊ߬ ߛߌߦߊߡߊ߲߫ ߠߋ߬ ߞߍ߫ ߝߊ߬ߛߏ߬ ߞߊ߲ ߠߎ߬ ߦߋ߫.

<<ߊ߬ߟߎ߬ ߟߊ߫ ߘߐ߬ߖߊ ߞߏߛߐ߲߬߸ ߝߊ߬ߙߊ߲߬ߛߌ߬ ߞߊ߲ ߣߌ߫ ߝߊ߬ߛߏ߬ ߞߊ߲ ߠߎ߬ ߓߍ߯ ߓߘߊ߫ ߞߍ߫ ߖߌ߬ߣߍ߬ ߞߊ߲ߓߍ߲ ߞߎ߲߬ߠߊ߬ߛߌ߰ ߞߊ߲ ߘߌ߫، ߏ߬ ߦߋ߫ ߛߋ߲߬ߕߊ߬ ߓߟߋߓߟߋ߫ ߟߋ߬ ߘߌ߫.>> ߊ߬ ߞߵߏ߬ ߢߊߝߐ߫ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߦߋ߫ ߘߐ߬ߝߐ ߞߣߐ߫ ߞߏߓߊ߫ ߟߋ߬ ߘߌ߫߸ ߒߞߏ ߝߊ߯ߘߐߞߍ߫ ߝߟߐ ߟߎ߫ ߕߍ߬ߘߍ߫ ߛߌ߬ߓߏ߬ ߟߊ߫ ߞߏ ߡߍ߲ ߞߍߟߌ ߟߊ߫߸ ߏ߬ ߟߋ ߞߍߣߍ߲߫ ߞߎ߲߬ߠߊ߬ߛߌ߮ ߢߌ߲߬ ߠߎ߫ ߕߋ߬ߟߋ ߘߐ߫.

ߓߊ߯ߙߊ߫ ߞߍߣߍ߲ ߠߎ߬ ߟߎ߬ ߢߊߝߐ ߛߌߟߊ߫ ߞߋߟߋ߲ ߠߋ߬ ߝߍ߬߸ ߊ߬ ߞߵߊ߬ ߞߊ߲ߠߊߘߌ߫ ߝߊ߬ߛߏ߬ ߞߊ߲ ߓߊ߯ߙߟߊ ߟߎ߫ ߡߊ߬߸ <<ߊ߲ ߧߴߊ߲ ߞߊ߲ߠߊߘߌ߫ ߟߊ߫ ߝߊ߬ߛߏ߬ ߞߊ߲ ߓߊ߯ߙߟߊ ߓߍ߯ ߡߊ߬߸ ߒߞߏ ߓߊ߬߸ ߊߘߑߟߊߡ ߓߊ߬߸ ߞߏߙߋߛߓߍߟߌ ߓߊ߬߸ ߓߍ߯ ߦߋ߫ ߎ߳ߍߡߑߔߋ߫ ߖ߭ߋߍߡߑߘߋ ߛߎߥߊ߲ߘߌ߫، ߓߊߏ߬߸ ߡߐ߰ ߟߎ߫ ߟߋ߬ ߊ߬ߟߋ߫ ߞߎ߲߬ߠߊ߫߸ ߡߍ߲ ߠߎ߬ ߟߊ߫ ߓߊ߯ߙߊ ߦߋ߫ ߢߊߓߏ ߘߌ߫߸ ߓߊ߯ߙߊ߫ ߟߎ߫ ߝߣߊ߫ ߦߴߊ߬ߟߎ߫ ߞߓߊ߬ ߞߘߐ߫߸ ߡߍ߲ ߦߋ߫ ߛߌ߰ߞߊ߲ ߕߐ߲ߛߋ߲߫ ߅߲ ߞߣߐ߫ ߞߎߡߊ ߓߐ ߘߌ߫ ߜߍߟߊ߫.>>

 ߗߋߘߋ߲ ߠߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߕߊ߯ߡߊ ߣߌ߲߬ ߘߐ߫߸ ߊ߬ߟߎ߬ ߓߘߊ߫ ߖߡߊ߬ߣߊ ߕߌ߲߬ߞߎ߬ߘߎ߲߬ ߛߌߦߊߡߊ߲߫ ߠߋ߬ ߓߌ߬ߟߴߊ߬ߟߎ߫ ߛߋ߲߬ߞߘߐ߫߸ ߞߌ߲ߘߌߦߊ߫߸ ߡߊ߯ߡߎ߲߫߸ ߝߙߊߣߊ߫߸ ߊ߬ ߣߌ߫ ߞߊ߲ߞߊ߲߫ ߖߍ߬ߘߍ߸ ߞߊ߬ ߓߙߊߡߊߖߊ߲ߓߊ߲߫ ߛߌ߰ ߛߋ߲߬ߠߊ߫߸ ߞߊ߬ ߛߋ߫ ߡߐ߱ ߟߎ߬ ߟߊߛߐ߲߬ ߠߊ߫.

ߝߊ߬ߛߏ߬ ߛߙߍߘߍ ߞߐߡߊߓߌ߲ߓߌ߲߫ ߞߏ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫ ߞߵߊ߬ ߟߊ߫ ߞߎߡߊ ߞߣߐ ߘߐߘߎ߲߬ߧߊ߬: <<ߊ߲ ߧߋ߫ ߝߊ߬ߛߏ߬ ߞߊ߲ ߓߊ߯ߙߟߊ߫ ߡߊ߬ߡߌ߬ߣߊ߬ߟߌ߬ߟߊ ߓߍ߯ ߝߣߊ߫ ߞߐߡߊߓߌ߲ߓߌ߲߫ ߠߊ߫߸ ߊ߬ߟߎ߬ ߞߍ߫ ߘߊ߫ ߛߙߍߘߍ߫ ߕߐ߯ߞߋߟߋ߲ߡߊ ߞߊ߲߬ ߓߊ߬߸ ߥߟߊ߫ ߞߊ߬ߝߏ߬ߙߋ߲߬ ߢߣߊߕߊߟߌ ߛߙߍߘߍ߫ ߞߊ߲߬.>>

ߊ߬ ߟߊ߫ ߛߙߊ߬ߣߎ߲ ߛߋ߲߬ߕߊ߬ ߝߌߟߊߣߊ߲ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߕߣߐ߬ߓߊ߫ ߟߋ߬ ߡߐ߰ ߟߎ߬ ߞߐߡߊߓߌ߲ߓߌ߲ ߠߊ߫߸ ߡߍ߲ ߓߘߊ߫ ߘߏ߫ ߞߍ߫ ߝߊ߬ߛߏ߬ ߞߊ߲ ߦߋ߫߸ ߥߟߊ߫ ߡߍ߲ ߠߎ߬ ߦߋ߫ ߝߊ߬ߛߏ߬ ߞߊ߲ ߓߊ߯ߙߟߊ ߘߌ߫.

<<ߣߴߊߟߎ߫ ߞߵߊ߬ ߦߋ߫ ߓߌ߬߸ ߢߍߕߊ߯ ߛߎ߮ ߣߌ߲߬ ߓߘߊ߫ ߞߍ߫ ߝߊ߬ߛߏ߬ ߞߊ߲ ߠߎ߬ ߟߊ߫ ߞߏ ߘߐ߫߸ ߡߐ߱ ߘߏ߫ ߟߎ߫ ߟߋ߬ ߞߵߏ߬ ߞߍ߫، ߏ߬ ߘߐ߫߸ ߊ߲ ߧߴߏ߬ ߟߎ߬ ߞߐߡߊߓߌ߲ߓߌ߲߫ ߣߌ߲߬ߛߋ߲߭߸ ߖߐ߲߰ߛߴߊ߬ߟߎ߫ ߣߐ߬ ߓߊ߯ߙߊ ߡߍ߲ ߠߎ߬ ߘߊߡߌ߬ߣߊ߬ ߟ߫ߊ߸ ߊ߬ߟߎ߬ ߦߋ߫ ߛߴߏ߬ ߟߎ߬ ߘߊߓߊ߲߫ ߠߊ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߞߣߍ ߞߊ߲߬߸ ߝߊ߬ߛߏ߬ ߞߊ߲ ߛߍ߬ߘߏ߲߬ߠߊ ߟߎ߬ ߛߍߥߊ߫ ߘߊ߫ ߣߌ߲߬ ߞߏ ߟߊ߫ ߟߋ߬ ߞߏߛߓߍ߫، ߞߊ߬ߕߎ߲߯߸ ߣߊ߲߬ߝߏ߯ ߌߛߎ߬ߡߊ߬ߌ߯ߟߊ߫ ߖߊ߰ߓߌ ߞߊ߬ ߣߌ߲߬ ߞߏ ߦߋ߫ ߞߏ߫ ߓߘߍߓߊ߫ ߟߋ߬ ߘߌ߫߸ ߡߍ߲ ߘߌ߫ ߡߐ߰ ߛߍߥߊ߫߸ ߓߍ߯ ߞߊ߫ ߞߊ߲߫ ߞߵߊ߬ ߓߟߏ ߛߌ߰ ߡߍ߲ ߞߘߐ߫. <<ߊ߲ߠߎ߬ ߒߞߏ ߞߊߙߊ߲ߠߊ ߟߎ߫ ߕߍ߬ߘߍ߫ ߞߣߐ߬ߘߐ߬ߝߟߌ ߘߐ߫߸ ߥߛߊ߬ߘߋ߲߬ ߞߏ ߣߌ߲߬ ߘߐ߫߸ ߊ߲ ߠߊ߫ ߡߐ߱ ߖߍ߬ߘߍߖߍ߬ߘߍ ߦߋ߫ ߖߏ߲ ߘߌ߫߸ ߊ߲ ߕߍ߬ߘߍ߫ ߏ߬ ߢߊߢߌߣߌ߲ ߠߊ߫، ߒ߬ߞߊ߬߸ ߢߊߝߐߟߌ߫ ߓߘߊ߫ ߞߍ߫ ߊ߲ ߧߋ߫߸ ߞߊ߬ ߓߍ߲߬ ߘߊ߲߬ߛߊ߫ ߞߙߎ߬ߡߊ߬ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߡߊ߬ ߒߞߏ ߢߍ߫، ߊ߲ ߓߘߊ߫ ߢߊߐߝߟߌ߫ ߘߐߞߣߍߣߍ߲߫ ߛߐ߬ߘߐ߲߫ ߡߎ߬ߕߎ߲߬، ߊߐ ߓߍ߯ ߓߘߊ߫ ߓߍ߲߬ ߊ߬ ߡߊ߬߸ ߊ߲ ߞߍߕߐ߫ ߥߛߊ߬ߘߋ߲߫ ߠߋ߬ ߛߎߥߊ߲ߘߌ߫ ߟߊ߫߸ ߘߊ߲߬ߛߊ߫ ߞߵߊ߬ ߓߟߏ ߟߐ߬ ߡߍ߲ ߠߊ߫߸ ߣߊߟߌ߬ߡߎ߲߬ ߊߓߎߓߞߊߙ ߛߘߌߞߌ߬ ߖߊߟߏ߫ ߘߌ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߢߐ߲߯ߦߋ ߣߌ߲߬ ߕߐ߬ߣߐ ߥߙߊ߬ ߘߊ߫ ߞߏߛߓߍ߫߸ ߞߵߊ߬ ߦߌ߬ߘߊ߬ ߞߏ߫ ߝߊ߬ߛߏ߬ ߞߊ߲ ߠߎ߬ ߣߌ߬ߓߊ߫ ߦߋ߫ ߎ߳ߍߡߑߔߋ ߛߎߥߊ߲ߘߌ߫ ߞߏ ߘߐ߫.