ߘߐ߲߬ߞߌ߲߬ ߛߊߟߌ ߢߊߞߘߐߟߊ ߣߌ߲߬ ߘߐ߫߸ ߞߊ߲ߞߊ߲߫ ߡߙߊ߬ߓߊ߮ ߝߊߙߌ߲߫ ߡߏ߬ߤߊ߬ߡߍߘ ߢߊ߲ߜ߭ ߞߊ߬ ߝߋ߲߫ ߛߌߦߊߡߊ߲߫ ߛߐ߲߬ߞߐ ߟߊ߫ ߜߟߍ߬ߦߊ ߟߊߞߊ߬ߟߌ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߍߣߊ߬ ߓߟߏߘߐߓߍ߲߫ ߖߐ߲ߖߐ߲ ߠߎ߬ ߞߍ߫߸ ߖߐ߲߰ߛߊ߫ ߘߊߥߎ߲ߕߊ ߡߍ߲ ߠߎ߬ ߛߐ߲߬ߞߐ ߞߍ ߦߴߌߘߐ߫ ߛߏ߬ ߛߐ߲ߞߐ ߘߌ߫߸ ߏ߬ ߟߎ߬ ߘߌ߫ ߓߟߏߞߊ߬ ߢߊ ߡߍ߲ ߡߊ߬.

ߊ߬ ߢߌ߬ߣߌ߲߬ߞߊ߬ ߘߊ߫ ߝߐ߰ߓߍ߬ߦߊ߬ߟߊ ߟߎ߫ ߟߋ߬ ߓߟߏ߫ ߓߌ߬߸ ߞߵߊ߬ ߛߐ߬ߘߐ߲߬ ߊ߬ ߣߌ߫ ߛߏ ߞߟߊߕߍ߮ ߟߎ߬ ߦߋ߫ ߢߐ߲߯ߦߋ߫ ߞߊ߲߬ ߞߊ߲ߞߊ߲߫ ߛߊߣߌ߲ߧߊ߫ ߞߏ ߞߊ߲߬ ߘߐ߲߬ߞߌ߲ ߢߊߞߘߐߟߊ ߣߌ߲߬ ߘߐ߫، ߡߙߊ߬ߓߊ߮ ߞߵߊ߬ ߦߌ߬ߘߊ߬ ߞߏ߫ ߝߏ߫ ߝߊ߰ߡߊ ߟߎ߫ ߟߋ߬ ߖߡߊ߬ߣߊ߬ߘߋ߲ ߠߎ߬ ߟߊߕߊ߲߬ߞߊ߫ ߞߵߊ߬ߟߎ߬ ߞߛߌ߫ ߝߋ߲ ߠߎ߬ ߛߐ߲߬ߞߐ߬ ߦߟߍ߫ ߘߊ߲߬ߠߊߕߊ߬ߡߌ߲߬ߣߍ߲ ߣߌ߲߬ ߡߊ߬.

<<ߛߐ߲߬ߞߐ߬ ߦߟߍ ߡߍ߲ ߦߋ߫ ߕߋ߲߬߸ ߊ߬ ߛߋ߲߬ߢߊ߬ ߝߟߐ߫ ߕߍ߫ ߣߌ߲߬، ߒ ߓߘߴߊ߬ ߝߐ߫ ߞߘߐ߬ߡߊ߲߬߸ ߖߏ߲߬ߖߏ߲ ߠߋ߬ ߞߋߟߋ߲߫ ߦߋ߫ ߦߟߍ߬ ߟߊ߫ ߖߌ߬ߣߍ߬ ߞߣߐ߫ ߦߊ߲߬߸ ߞߊ߬ ߓߊ߲߫ ߞߊ߬ ߖߌ߰، ߓߊ߬ߙߌ߬ ߕߐ߭ ߟߎ߬ ߓߊ߬߸ ߣߴߏ߬ ߟߎ߫ ߦߟߍ߬ ߘߊ߫߸ ߡߐ߱ ߟߎ߬ ߘߴߊ߬ߟߎ߫ ߖߊ߬ ߊ߬ߟߎ߫ ߣߐ߭ ߘߐ߫ ߞߋ߲߫߸ ߞߵߊ߬ߟߎ߫ ߓߊ߲߬ ߖߌ߰ ߟߊ߫.>> ߝߊߙߌ߲߫ ߡߏ߬ߤߊ߬ߡߍߘ ߢߊ߲ߜ߭ ߞߵߏ߬ ߦߌ߬ߘߊ߬.

ߡߙߊ߬ߓߊ߮ ߟߊ߫ ߖߊ߬ߕߋ߬ ߘߐ߫߸ ߝߊ߰ߡߊ ߟߎ߫ ߖߍ߬ߘߍ ߟߊ߫ ߝߍ߭ ߟߋ߬߸ ߏ߬ ߟߎ߬ ߡߍ߲ ߠߎ߬ ߟߊ߫ ߓߊ߯ߙߊ ߦߋ߫ ߘߎ߰ߘߋ߲ ߠߎ߬ ߟߊߕߊ߲߬ߞߊ ߘߌ߫ ߞߵߊ߬ߟߎ߬ ߞߛߌ߫ ߖߎ߬ߟߊ ߟߎ߬ ߟߊ߫ ߘߊ߲߬ߠߕߊ߬ߡߌ߲߬ ߥߊߟߋ ߓߍ߯ ߡߊ߬.

<<ߝߊ߰ߡߊ ߟߎ߫ ߖߍ߬ߘߍ ߟߊ߫ ߝߍ߭ ߟߋ߬ ߦߴߊ߬ ߓߊߖߎ ߘߌ߫߸ ߓߊߏ߬ ߊ߲ ߞߊ߫ ߞߊ߲߫ ߞߵߊ߲ ߢߊ ߕߏ߫ ߊ߲ ߘߎ߰ߘߋ߲߬ߢߐ߲߮ ߠߎ߬ ߟߊ߫ ߞߍߒߘߌߦߊ ߝߍ߬ ߟߋ߬.>> ߊ߬ ߞߵߏ߬ ߦߌ߬ߘߊ߬.

ߝߊߙߌ߲߫ ߡߏ߬ߤߊ߬ߡߍߘ ߢߊ߲ߜ߭ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߣߴߌ ߞߊ߬ ߛߏ߬ߓߏ ߛߐ߲߬ߞߐ ߡߊߝߟߍ߫ ߞߊ߲ߞߊ߲߫ ߞߣߐ߫߸ ߏ߬ ߡߍ߲ ߕߎ߲߬ ߓߘߊ߫ ߦߍ߬ߟߍ߫ ߕߋ߬ߟߋߝߌ߬ߟߊ ߣߌ߲߬ ߘߐ߫.

<<ߊ߲ ߓߊ߯ ߟߊߒߡߊ ߕߊ߬ ߛߏ߬ߓߏ ߡߊ߬ ߛߌߛߍ߲߬߸ ߏ߬ ߡߍ߲ ߕߍ߬ߘߍ߫ ߝߙߋ߬ ߟߊ߫ ߖߕ ߅߀ ߀߀߀ ߟߊ߫، ߘߏ߫ ߟߎ߫ ߞߵߏ߬ ߞߍ߫ ߝߏ߯ ߈߀ ߀߀߀ ߘߌ߫ ߦߊ߲߬، ߏ߬ ߦߋ߫ ߏ߬ ߦߋ߫ ߖߘߍ߬ߛߊ߬ߥߏ߬ߦߊ ߘߝߊߣߍ߲ ߠߋ߬ ߘߌ߫.>> ߊ߬ ߞߵߏ߬ ߦߌ߬ߘߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߕߍ߮ ߞߍ߫ ߘߊ߫ ߛߓߏ߬ ߖߎߟߊ ߛߌߦߊߡߊ߲߫ ߘߐ߫߸ ߡߍ߲ ߠߎ߬ ߡߊ߫ ߛߐ߲߬ ߝߋ߲߫ ߓߐ߫ ߟߴߊ߬ߟߎ߬ ߕߊ ߛߐ߲߬ߞߐ ߟߊ߫.

<<ߘߏ߫ ߟߎ߫ ߖߍ߬ߘߍ ߞߊ߬ ߥߊ߯ߕߌߣߍ߲߫ ߞߍ߫ ߟߋ߬ ߕߐ߲ߓߟߏߡߊߛߏ ߟߊ߫، ߞߊ߬ߕߎ߲߯߸ ߊ߬ߟߎ߫ ߞߵߊ߬ߟߎ߫ ߖߘߍ߬ ߞߍ߫ ߛߐ߲߬ߞߐ߬ ߟߊ߬ߦߟߍ߬ߟߊ߫ ߟߋ߬ ߘߌ߫ ߘߊ߲߬ߠߕߊ߬ߡߌ߲߬ ߓߟߏ ߡߊ߬، ߟߊ߬ߓߊ߲ ߘߐ߫ ߛߊ߫߸ ߊ߬ߟߎ߫ ߛߐ߲߬ ߘߊ߫ ߓߐ߫ ߟߊ߫ ߖߕ߈߀ ߀߀߀ ߘߐ߫߸ ߞߊ߬ ߣߊ߬ ߆߅ ߘߐ߫ (ߓߎ߬ߡߊ ߛߐ߲߬ߞߐ ߘߌ߫)߸ ߞߊ߬ ߞߟߏߡߊ ߝߙߋ߬ ߆߀ ߀߀߀ ߟߊ߫.>> ߡߙߊ߬ߓߊ߮ ߞߵߏ߬ ߢߊߝߐ߫.

ߊ߬ߟߋ߬ ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫߸ ߡߙߌߘߐ ߏ߬ ߕߊ߬ ߘߴߊ߬ߟߎ߬ ߛߌߦߊߡߊ߲߫ ߠߊ߫ ߓߍ߲߬ߘߐ ߟߋ߬ ߟߊ߫߸ ߡߍ߲ ߞߍ߫ ߘߊ߫ ߖߎ߬ߟߊ߬ߦߊ ߞߏߕߌ߯ߘߊ ߞߐߦߌߘߊ ߢߣߊ߫߸ ߞߟߏߝߋ߲ߧߊ ߞߏߕߌ߯ߘߊ ߞߐߦߌߘߊ ߢߣߊ߫߸ ߊ߬ ߣߌ߫ ߓߊ߯ߙߊ߫ ߘߊߞߎ߲ ߡߍ߲ ߘߐ߱ߘߏ߲߬ߣߍ߲߫ ߛߏ߬ߓߏ ߟߎ߬ ߣߌ߫ ߓߌߦߊ߲ ߠߎ߬ ߟߊ߫ ߞߏ ߟߊ߫.

ߡߙߊ߬ߓߊ߰ ߟߊ߫ ߝߐߟߌ߫ ߘߐ߫߸ ߛߐ߲߬ߞߐ߬ ߟߊ߬ߦߟߍ ߣߌ߲߬ ߛߌߦߊߡߊ߲ ߦߋ߫ ߞߍ߫ ߟߊ߫ ߛߊߟߌ߫ ߢߊߞߘߐߟߊ ߟߋ߬ ߘߐ߫ ߛߐ߲߬߸ ߡߐ߱ ߟߎ߫ ߡߊ߬ߞߏ ߦߋ߫ ߛߌߦߊߦߊ߫ ߥߊ߯ߕߌ ߏ߬ ߡߍ߲ ߠߊ߫ ߞߊ߬ߣߌ߲߬.

<<ߊ߲ ߓߘߴߊ߬ ߟߊߞߙߐ߬ߛߌ߬߸ ߞߏ߫ ߊ߬ ߦߴߊ߬ߟߎ߬ ߓߟߏ߫ ߛߊ߲ߞߊߥߟߌ ߟߋ߬ ߘߌ߫، ߛߊߟߌ ߓߊ߯ ߛߋ߫ ߛߐ߲߬߸ ߊ߬ߟߎ߬ ߘߌ߫ ߞߐ߲߰ ߛߊߟߌ ߢߍ߫ ߞߊ߬ ߘߏ߫ ߟߊ߫ ߝߋ߲ ߠߎ߬ ߛߐ߲߬ߞߐ ߞߊ߲߬، ߞߊ߬ߕߎ߲߯߸ ߊ߬ߟߎ߫ ߞߵߊ߬ ߟߐ߲߫ ߞߏ߫ ߡߐ߱ ߟߎ߬ ߓߘߊ߫ ߥߊ߫ ߤߖߌ ߟߊ߫߸ ߡߐ߱ ߟߎ߬ ߦߋ߫ ߘߐ߲߬ߞߌ߲ ߟߌ߬ߦߊ߲߬ ߞߏ ߓߟߏߘߐߓߍ߲ ߠߎ߬ ߝߣߊ߫ ߞߊ߲߬߸ ߛߘߊߞߊ߫ ߛߌߦߊߡߊ߲߫ ߓߐ ߡߊ߬ߞߏ ߦߋ߫ ߛߏ߬ߓߏ ߟߊ߫.>> ߊ߬ ߞߵߏ߬ ߝߐ߫ ߊ߬ ߟߊ߫ ߛߙߊ߬ߣߎ߲ ߘߐ߫.

ߝߊߙߌ߲߫ ߡߏ߬ߤߊ߬ߡߍߘ ߢߊ߲ߜ߭ ߞߵߊ߬ ߦߌ߬ߘߊ߬ ߞߏ߫ ߝߊ߰ߡߊ ߟߎ߬ ߘߴߊ߬ߟߎ߬ ߢߊ ߕߏ߫ ߝߋ߲ ߠߎ߬ ߛߐ߲߬ߞߐ ߝߍ߬߸ ߛߊ߫ ߕߊ߲߬ߞߊ߬ ߘߌ߫ ߞߍ߫ ߘߊ߲߬ߠߕߊ߬ߡߌ߲߬ ߛߐ߲ߞߐ ߟߎ߫ ߡߊ߬ ߛߐ߲߬.

<<ߊ߲ ߕߍ߫ ߛߐ߲߬ ߝߋߎ߫߸ ߊ߬ߟߎ߬ ߦߴߊ߬ߟߎ߫ ߛߊ߬ߥߏ ߞߍ߫، ߊ߲ ߘߴߊ߲ ߖߊ߲߬ߕߏ߫ ߛߐ߲߬ߞߐ߬ ߞߏ ߘߐ߫߸ ߛߊ߫ ߓߎ߬ߘߎ߲ ߞߊߣߊ߬ ߘߏ߲߬ ߊ߬ ߘߐ߫، ߞߊ߬ߕߎ߲߯߸ ߊ߬ ߕߍ߫ ߡߍ߲߫ ߛߌߛߍ߲߬߸ ߛߊ߰ߖߌ߮ ߡߍ߲ ߠߎ߬ ߖߍ߬ߘߍ ߡߊ߲߫ ߞߊ߲߫ ߞߊ߬ ߛߊ߲߬ ߞߋ߲߬ߥߟߎ߬ ߆ ߣߌ߫ ߆ ߟߊ߫߸ ߏ߬ ߟߎ߬ ߘߌ߫ ߞߍ߫ ߞߋ߲߬ߥߟߎ߬ ߇߸ ߈߸ ߤߊ߲߯ ߉ ߓߍ߯ ߘߌ߫ ߖߌ߬ߣߍ߬ ߕߊߡߊ߲ ߘߐ߫، ߏ߬ ߘߏ߲߬ ߦߋ߫ ߜߟߍ߬ߦߊ ߟߋ߬ ߘߌ߫ ߛߏ߫ ߞߣߐ߫ ߡߐ߮ ߟߎ߫ ߡߊ߬.>> ߊ߬ ߞߵߏ߬ ߟߊ߬ߛߏ߬ߓߌ߬ߟߌ ߞߍ߫.

ߡߙߊ߬ߓߊ߮ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߣߴߌ ߞߊ߬ ߣߊ߬ߡߛߊ ߡߊߝߟߍ߫ ߓߌ߬߸ ߖߎ߬ߟߊ ߟߎ߬ ߓߘߴߊ߬ߟߎ߫ ߓߊ߲߬ ߣߊ߬ߡߛߊ߬ ߞߘߎ ߝߙߋ߬ ߟߊ߫߸ ߞߵߊ߬ ߕߏ߫ ߛߣߌߥߊ ߟߎ߬ ߟߊ߫ ߞߍߞߌߦߊ ߡߊ߬، ߏ߬ ߦߋ߫ ߡߎ߲߬ ߘߌ߫߸ ߏ߬ ߟߋ ߞߌߘߊ߫ ߞߏ ߘߌ߫، ߡߙߊ߬ߓߊ߮ ߘߏ߲߬ ߡߴߏ߬ ߦߋ߫ ߞߏ߫ ߢߣߊߡߊ߫ ߘߌ߫، ߓߊߏ߬߸ ߊ߬ ߞߊ߲߫ ߞߏ߫ ߣߊ߬ߡߛߊ߬ ߟߐ߮ ߦߋ߫ ߡߍ߲ ߠߎ߬ ߟߊ߫߸ ߣߴߊ߬ߟߎ߫ ߡߊ߬ߞߏ߬ ߕߍ߫ ߞߌߘߊ߫ ߞߋߟߋ߲ ߓߍ߯ ߟߊ߫߸ ߏ߬ ߟߎ߬ ߦߴߊ߬ ߞߍ߫ ߟߊ߫ ߘߌ߬.

ߘߐ߲߬ߞߌ߲ ߡߊ߬ߛߎߘߎ߲ߧߊ ߣߌ߲߬ ߘߐ߫߸ ߞߊ߲ߞߊ߲߫ ߝߊ߰ߡߊ ߟߎ߬ ߞߊ߲߫ ߞߏ߫ ߊ߬ߟߎ߬ ߘߌ߫ ߖߎ߬ߟߊ ߟߎ߬ ߞߐߜߊ߬ ߢߊ ߓߍ߯ ߡߊ߬߸ ߖߐ߲߰ߛߊ߫ ߘߊ߲߬ ߘߌ߫ ߛߌ߰ ߘߊ߲߬ߠߕߊ߬ߡߌ߲߬ ߛߐ߲߬ߞߐ߬ ߞߏ ߟߊ߫.