ߓߌ߬ ߓߌߟߏ߲ ߛߐ߰ߡߊ߬ߘߊ ߢߌ߲߬ ߠߊ߫ ߠߋ߬ ߞߍߣߍ߲߫ ߞߊ߲ߞߊ߲߫ ߞߊ߬ߝߏ߬ߙߋ߲ ߞߏߟߊߕߍ߮ ߟߎ߬ ߟߊߛߌ߰ ߟߏ߲ ߘߌ߫، ߉ߕߎߡߊ ߟߋ߬ ߟߊ߫߸ ߞߏߟߊߕߍ߯ ߛߎߥߊ߲ߘߌߓߊ߯ߕߐ ߟߎ߫ ߞߵߊ߬ߟߎ߫ ߞߎ߲߬ߛߌ߲߬ ߝߏ߯ ߟߊ߫߸ ߟߊ߬ߛߌ߰ߟߌ ߞߍߕߐ߫ ߝߏ߮ ߡߍ߲ ߞߣߐ߫߸ ߊ߬ ߣߌ߫ ߞߊ߬ߝߏ߬ߙߋ߲ ߡߙߊ߬ߓߊ߮ ߟߎ߬ ߛߎߥߊ߲ߘߌ ߣߌ߫ ߞߊ߬ߝߏ߬ߙߋ߲߬ߕߌ߮ ߖߍ߬ߘߍ ߟߊߛߌ߱ ߕߊ߬ߣߍ߲ ߞߵߊ߬ ߟߴߊ߬ ߛߙߍߞߍ ߟߎ߫ ߞߊ߲߬.
ߦߏ߫ ߊ߬ ߘߋ߬ߙߌ߬ߣߍ߲߬ ߞߍ߫ ߟߊ߫ ߢߊ ߡߍ߲ ߞߘߐ߬ߡߊ߲߬߸ ߝߐ߰ߓߍ߬ߦߊ߬ߟߊ ߟߎ߬ ߦߋ߫ ߛߐ߬ߘߐ߲߬ ߠߊ߫ ߟߋ߬ ߖߊ߲߬ߖߏ߲ ߣߌ߲߬ ߘߐ߫߸ ߞߵߏ߬ ߞߎ߲߭ ߞߍ߫ ߊ߬ ߕߐ߬ߣߐ ߘߌ߫ ߖߊ߬ߡߊ ߞߊ߲߬، ߓߊ߬ߙߌ߬߸ ߊ߬ ߕߍ߬ߘߍ߫ ߖߌ߰ ߟߊ߫ ߢߊ ߡߍ߲߸ ߊ߬ ߡߊ߫ ߦߋ߫ ߕߋ߲߬، ߓߊߏ߬߸ ߝߐ߰ߓߍ߬ߦߊ߬ߟߊ ߡߍ߲ ߠߎ߬ ߣߊ߬ߣߍ߲߫ ߕߘߍ߬ ߞߏ߫ ߞߊ߬ ߖߊ߲߬ߖߏ߲ ߛߍ߲߬ߛߍ߲߫ ߞߵߊ߬ ߟߊߞߊ߬ߟߌ߬߸ ߏ߬ ߟߎ߬ ߡߊ߫ ߘߏ߲߬ ߞߊ߬ߝߏ߬ߙߋ߲ ߓߏ߲ߓߊ ߟߋ߬ ߖߍ߬ߘߍ ߞߣߐ߫߸ ߞߎߡߊߕߍ߫ ߞߏ߫ ߊ߬ߟߎ߬ ߦߋ߫ ߘߏ߲߬ ߟߊ߬ߘߍ߬ ߝߏ߮ ߖߍ߬ߘߍ ߞߣߐ߫، ߕߎ߬ߡߊ߬ ߖߏߣߊ ߟߊ߫߸ ߊ߬ߟߎ߫ ߟߐ߬ߣߍ߲߫ ߕߘߍ߬ ߓߏ߲ߓߊ ߘߊߞߘߐߟߊ ߟߋ߬ ߘߐ߫، ߓߊ߬ߙߌ߬߸ ߏ߬ ߞߐߝߍ߬ ߕߎ߬ߡߊ߬ߣߍ߲߫ ߕߋ߲߬߸ ߕߐ߲߫ ߓߟߏߡߊ ߟߎ߫ ߣߊ߬ ߘߴߊ߬ ߟߊߢߌߣߌ߲߫ ߟߐ߬ߒ߬ߞߋ߬ߟߊ ߞߣߐ߫߸ ߞߏ߫ ߡߐ߰ ߛߌ߫ ߦߋ߫ ߦߋ߲߬߸ ߓߍ߯ ߦߋ߫ ߓߐ߫ ߞߏߞߏ ߞߐߞߊ߲߬߸ ߤߊߟߌ߬ ߝߐ߰ߓߍ߬ߦߊ߬ߟߊ ߟߎ߬߸ ߞߏ߫ ߓߍ߯ ߦߋ߫ ߓߐ߫، ߏ߬ ߟߋ ߞߍ߫ ߘߊ߫ ߝߐ߰ߓߍ߬ߦߊ߬ߟߊ ߟߎ߬ ߡߊߕߊ߯ ߢߊ ߘߌ߫ ߞߏ߫ ߕߣߐ߬ߡߊ߬ߓߊ ߢߌ߲߬ ߠߊ߫߸ ߣߊߟߌ߬ߡߎ߲߫ ߞߊ߬ߝߏ߬ߙߋ߲ ߞߏߟߊߕߍ߮ ߟߊߛߌ߱ ߘߌ߫.
ߟߊ߬ߛߌ߰ߟߌ ߣߌ߲߬ ߞߍߣߍ߲߫ ߢߣߊߕߊߟߌ߫ ߟߋ߬ ߞߐ ߘߐ߫߸ ߡߍ߲ ߞߍ߫ ߘߊ߫ ߂߀߂߆ ߘߓߊ߬ߕߊ ߕߟߋ߬ ߃߁ ߡߊ߬߸ ߣߊߟߌ߬ߡߎ߲߫ ߞߊ߬ߝߏ߬ߙߋ߲߬ ߢߣߊߕߊߟߌ ߘߌ߫، ߒ߬ߓߊ߬߸ ߏ߬ ߟߋ ߣߐ߬ ߘߊ߲߭ߛߌ߰ ߟߊ߫ ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߟߊ߫ ߓߊ߯ߙߊ ߟߊ߫߸ ߏ߬ ߟߎ߬ ߡߍ߲ ߠߎ߬ ߟߊߛߌ߰ ߘߊ߫ ߞߊ߲ߞߊ߲߫ ߞߎ߲߬ߠߊ߫ ߞߊ߬ߦߌ߯ ߂߀߂߄ ߞߏ߲ߞߏߘߓߌ ߟߊ߫߸ ߣߴߊ߬ߟߎ߬ ߢߍߡߌ߬ߣߊ߬ߣߍ߲߫ ߕߍ߬ߘߍ߫ ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߬ ߓߟߏ߫، ߊ߬ ߞߙߍߞߙߍ߫ ߘߊ߫ ߕߊ߲ߓߊ߲ߓߐߟߌ ߣߌ߫ ߘߎ߰ߞߣߍ ߡߊ߬ߡߙߊ߬ߟߌ ߞߏߕߌ߯ߘߊ ߓߟߏ߫߸ ߏ߬ ߡߍ߲ ߛߓߍ ߟߊߖߍ߲ߛߍ߲߫ ߘߊ߫ ߂߀߂߄ ߞߏ߲ߞߏߘߓߌ ߕߋ߬ߟߋ߫ ߉ ߡߊ߬، ߒ߬ߓߊ߬߸ ߕߟߋ߬ ߕߊ߲ߣߌ߬ߞߋߟߋ߲ ߠߋ߬ ߡߊ߬ ߂߀߂߄ ߞߏ߲ߞߏߘߓߌ ߕߋ߬ߟߋ߫ ߂߀߸ ߊ߬ߟߎ߬ ߟߊߛߌ߰ ߘߊ߫ ߞߵߊ߬ߟߎ߬ ߟߊ߫ ߓߊ߯ߙߊ ߘߊߡߌ߬ߣߊ߬߸ ߊ߬ߟߎ߬ ߦߙߌߞߊ ߕߍ߬ߘߍ߫ ߡߐ߰ ߁߁ ߠߋ߬ ߘߌ߫߸ ߡߏ߬ߛߏ߫ ߝߌ߬ߟߊ߫ ߕߘߍ߬ ߡߍ߲ ߘߐ߫.
ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߬ ߡߊ߫ ߞߍ߫ ߡߊ߬ߡߌ߬ߣߊ߬ߟߌ߬ߟߊ߫ ߘߌ߫ ߞߊ߬ߝߏ߬ߙߋ߲߬ ߢߣߊߕߊߟߌ߫ ߕߊ߬ߡߌ߲߬ߣߍ߲ ߘߐ߫߸ ߊ߬ ߓߘߊ߫ ߟߊ߬ߖߍ߲߬ߛߍ߲߬ߠߌ߲߬ ߞߍ߫ ߊ߬ ߟߊ߫ ߝߍߛߑߓߎߞ ߖߊ߬ߕߋ߬ߘߊ ߟߊ߫߸ ߞߵߏ߬ ߞߍ߫ ߊ߬ ߟߊ߫ ߛߙߊ߬ߒ߬ߞߊ߲߬ߠߊ ߘߌ߫.
ߊ߬ ߞߵߊ߬ ߟߊ߫ ߛߓߍߟߌ ߣߌ߲߬ ߞߍ߫ ߞߵߊ߬ ߟߐ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߋ߬ ߡߊ߬߬߸ ߊ߬ ߞߍ ߘߐ߫ ߞߵߊ߬ ߟߊ߫ ߟߊߒߠߦߊ ߟߴߊ߬ߟߋ ߘߐ߫߸ ߞߵߊ߬ ߞߍ߫ ߞߊ߲ߞߊ߲߫ ߞߊ߬ߝߏ߬ߙߋ߲߬ߕߌ߮ ߘߌ߫، ߊ߬ ߞߵߊ߬ ߦߌ߬ߘߊ߬ ߛߓߍߟߌ ߣߌ߲߬ ߞߣߐ߫ ߏ߬ ߟߋ ߘߐ߫ ߞߏ߫:
<<ߓߊ߯ߙߊ߫ ߡߍ߲ ߘߏ߲߬ ߘߊ߫ ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߓߟߏ߫߸ ߣߴߊߟߊ߫ ߞߵߊ߬ ߞߊ߲ߕߌ߯ߦߊ ߓߌ߬ߟߊ߬ ߒ ߤߊ߬ߙߌ߬ߖߍ߮ ߘߐ߫، ߒ ߠߊ߫ ߥߊߟߢߌߡߊߟߐ߲ ߣߌ߫ ߞߎߟߎ߲ߖߋߟߌ ߦߋ߫ ߛߋ߫ ߟߴߌ ߡߊ߬ ߏ߬ ߘߐ߫.>> ߊ߬ ߞߵߏ߬ ߛߓߍ߫ ߊ߬ ߟߊ߫ ߖߊ߬ߕߋ߬ߘߊ ߟߊ߫.
ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߞߊ߲ߕߌ߯ ߞߘߐ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߊ߬ ߣߴߊ߬ ߟߊ߫ ߖߊ߬ߡߊ ߟߊ߫ ߓߊ߯ߙߊ ߕߍ߬ߘߍ߫ ߞߎ߲߬ߠߊ߬ߛߌ߮ ߟߊ߫ ߓߊ߯ߙߊ ߘߊߓߊ߲ ߠߋ߬ ߘߌ߫߸ ߞߊ߬ ߓߟߏߘߏ߲߫ ߢߐ߲߰ ߓߟߏ ߟߊߛߓߊ߬ߕߌ߫ ߊ߬ ߟߊ߫ ߟߐ߬ߒ߬ߞߋ߬ߟߊ ߡߎ߰ߡߍ ߞߣߐ߫.
ߛߊ߲߭ ߝߌ߬ߟߊ߬ ߞߊߙߏ߫ ߝߌ߬ߟߊ߬ ߣߌ߫ ߕߟߋ߬ ߕߊ߲߫ ߞߍ ߞߐߝߍ߬ ߞߊ߲ߞߊ߲߫ ߞߊ߬ߝߏ߬ߙߋ߲ ߞߎ߲߬ߠߊ߫߸ ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߬ ߓߘߊ߫ ߓߊ߯ߙߊ ߟߊߕߊ߬ߡߌ߲߬ ߞߏߟߊߕߍ߯ ߞߎߘߊ ߢߌ߲߬ ߠߎ߫ ߡߊ߬ ߞߊ߬ߝߏ߬ߙߋ߲ ߞߏ ߟߎ߬ ߟߊߕߊ߯ߡߊ ߘߐ߫ ߡߎ߬ߕߎ߲߬.
ߘߐ߬ߝߐ ߞߏ߬ߣߌ߲ ߘߴߊ߬ ߟߊߞߊ߬ߟߌ߬߸ ߞߏ߫ ߝߐ߰ߓߍ߬ߦߊ߬ߟߊ ߟߎ߬ ߡߊߕߊ߯ ߘߊ߫ ߟߋ߬ ߞߏ߫ ߘߝߐ߬ߡߊ߬ߓߊ ߢߌ߲߬ ߠߊ߫߸ ߞߵߊ߬ ߛߐ߬ߘߐ߲߬ ߜߎ ߞߏ߫ ߟߋ߬߸ ߡߍ߲ ߕߐ߬ߣߐ ߦߋ߫ ߖߡߊ߬ߣߊ߬ߘߋ߲ ߠߎ߬ ߞߊ߲߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬.
Aucun commentaire pour le moment.