ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߕߌߓߋߟߋ߲ ߓߘߊ߫ ߞߕߌ߫ ߞߏ ߘߐ߬ߛߏ߰ߙߋ߬ߟߌ ߘߏ߫ ߛߌ߰ ߛߋ߲߬ߠߊ߫߸ ߞߊ߬ߙߌߝߊ߬ ߞߐ߲ߘߍ߫ ߝߊ߰ߣߍ߲ ߞߐ ߘߐ߫߸ ߊ߬ߟߋ ߡߍ߲ ߛߊ߲߭ ߂߂ ߕߎ߲߬ ߦߋ߫ ߣߌ߲߬߸ ߣߴߊ߬ ߕߍ߬ߘߍ߫ ߟߊ߬ߓߏ߬ߙߟߌ߬ߟߊ߫ ߘߌ߫، ߊ߬ ߝߊ߰ ߘߊ߫ ߛߌ߬ߣߌ߲߬ߟߏ߲ ߢߌ߲߬ ߠߋ߬ ߡߊ߬ ߂߀߂߆ ߘߓߊ߬ߕߊ ߕߋ߬ߟߋ߫ ߂߂߸ ߞߵߊ߬ ߛߐ߬ߘߐ߲߬ ߕߐ߲ߓߟߏߡߊ ߟߎ߬ ߦߴߊ߬ ߞߐߜߍ߲ ߞߊ߲߬߸ ߏ߬ ߟߎ߬ ߟߊ߫ ߘߎ߰ߞߎߟߎ߲ ߠߋ߬ ߥߊ߫ ߘߊ߫ ߦߍ߬ߟߍ߫ ߊ߬ ߞߊ߲߬߸ ߞߵߊ߬ ߓߐ߬ߣߐ߫ ߊ߬ ߣߌ ߘߐ߫، ߡߊ߬ߛߎߓߊ ߏ߬ ߟߋ ߞߍߣߍ߲߫ ߕߙߎ߬ ߘߌ߫߸ ߞߊ߬ ߟߊ߬ߡߊ߮ ߟߊߘߏ߲߬ ߛߏ ߞߣߐ߫߸ ߝߏ߫ ߘߋ߲ߡߌߛߍ߲ ߠߎ߬ ߓߐ߫ ߘߊ߫ ߞߊ߬ ߛߌߟߊ ߕߍ߰߸ ߞߊ߬ ߞߐ߲߬ߡߊ߬ߘߊ ߟߎ߫ ߖߋ߬ߣߌ߲߫ ߓߐ߬ߙߑߘߏ߫ ߛߍ߲߫ ߝߟߐ ߟߊ߫، ߞߊ߲ߓߍ߲ ߞߕߌߞߊ߲ߘߊ ߝߏߘߋ߬ ߓߌ߲ߕߎ߬ ߞߋߕߊ߬ ߞߵߊ߬ ߦߌ߬ߘߊ߬ ߞߍ߲ߘߍߟߏ߲ ߣߌ߲߬ ߡߊ߬߸ ߞߏ߫ ߛߌߞߊߒߡߊߓߊ߯ߕߐ߫ ߝߟߐ ߓߘߊ߫ ߛߋ߫ ߓߟߏߘߐ߫߸ ߏ߬ ߦߋ߫ ߢߟߊߥߛߎ ߟߊ߫ ߕߋ߲߬، ߕߍ߮ ߞߍ߫ ߘߊ߫ ߡߐ߰ ߞߐ߬ߣߐ߲߬ߘߐ ߡߍ߲ ߝߣߊ߫ ߘߐ߫ ߔߊߞߌߛߦߊ ߕߎ߬ߡߊ ߟߊ߫߸ ߊ߬ ߞߵߏ߬ ߟߎ߫ ߓߌ߬ߟߊ߬ ߞߏ ߖߊ߬ߡߊߙߌ ߘߌ߫߸ ߞߏ ߟߎ߬ ߓߘߊ߫ ߘߐߛߎߡߊ߫ ߏ߬ ߘߐ߫ ߕߋ߲߬ ߞߏߛߓߍ߫.

ߛߌ߬ߣߌ߲߬ߟߏ߲ ߥߎ߬ߙߊ߬ ߕߟߋ߬ߟߌ߬ߖߌ߰ ߕߎߡߊ ߟߋ߬ ߟߊ߫߸ ߘߓߊ߬ߕߊ ߕߋ߬ߟߋ߫ ߂߂߸ ߡߊ߬ߛߎ߬ߓߊ߬ ߞߏ ߘߏ߫ ߕߍ߰ ߘߊ߫ ߞߊ߲ߞߊ߲߫، ߞߊ߬ߙߌߝߊ߬ ߞߐ߲ߘߍ߫ ߟߊ߫ ߟߊ߫ ߛߦߊ߬ ߞߏ ߘߌ߫߸ ߊ߬ߟߋ ߡߍ߲ ߛߌ߬ߞߛߊߓߌ ߦߋ߫ ߛߊ߲߭ ߂߂ ߘߐ߫߸ ߣߴߊ߬ ߟߐ߲ߓߊ߮ ߛߌߦߊߡߊ߲߫ ߦߴߊ߬ ߞߟߌ߫ ߟߊ߫ ߞߏ߫ <<ߙߊߛߑߕߊ߬>>߸ ߊ߬ ߝߊ߰ ߘߊ߫ ߕߐ߲ߓߟߏߡߊ ߟߎ߬ ߟߎ߬ ߟߊ߫ ߞߐߜߍ߲ߠߌ߲ ߕߎ߬ߡߊ ߟߋ߬ ߟߊ߫، ߊ߬ ߞߘߐ߬ߞߍ߫ ߊߘߡߊ߫ ߓߙߋߕߋ߫߸ ߏ߬ ߞߊ߬ ߖߊ߲߬ߖߏ߲ ߕߊ߬ߡߌ߲߬ ߢߊ ߝߐ߫ ߕߊ߲߬: <<ߕߐ߲ߓߟߏߡߊ ߟߎ߬ ߥߊߣߍ߲߫ ߦߟߍ߬ ߟߊ߫ ߒ ߘߐ߯ߞߍ߫ ߟߋ߬ ߞߊ߲߬ ߞߵߊ߬ ߝߊ߰، ߊ߬ ߡߊ߫ ߝߏߦߌ߬ ߞߍ߫، ߡߐ߱ ߟߋ߬ ߞߵߊ߬ ߡߊߞߊ߬ߛߌ߫ ߊ߬ߟߎ߫ ߞߊ߲߬߸ ߊ߬ߟߎ߬ ߕߏ߫ ߘߴߊ߬ ߜߍ߲ ߠߊ߫߸ ߊ߬ߟߎ߫ ߞߊ߬ ߘߊ ߟߊߞߊ߬ ߞߵߊ߬ ߜߊ߬ߛߌ߬߸ ߊ߬ ߓߋ߭߸ ߊ߬ߟߎ߫ ߞߊ߬ ߘߎ߰ߞߎߟߎ߲ ߠߊߦߍ߬ߟߍ߫ ߊ߬ ߞߊ߲߬ ߞߵߊ߬ ߝߊ߰.>>

ߖߊ߲߬ߖߏ߲ ߢߌ߲߬ ߠߛߊߙߌ ߛߌ߬ߣߌ߲߬ߟߏ߲ ߡߊ߬߬ ߌߞߘߐ߫߸ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ߸ ߝߏߘߋ߬ ߓߌ߲ߕߎ߬ ߞߋߕߊ߬ ߕߊ߯ ߛߊ߬ߓߊ߰ߕߐ ߟߊ߫ ߟߎ ߞߣߐ߫߸ ߞߊ߬ ߥߴߊ߬ ߕߊ߫ ߝߏ߬ߟߌ ߟߊ߫߸ ߊ߬ ߣߌ߫ ߞߊ߬ ߟߌ߬ߤߟߊ ߘߏ߫ ߟߎ߫ ߛߐ߬ߘߐ߲߬.

ߞߍ߲ߘߍߟߏ߲ ߁߀ߕߎߡߊ ߣߴߊ߬ ߁߃ߕߎߡߊ ߕߍߟߊ ߟߋ߬ ߞߍ߫ ߘߊ߫ ߓߐ߬ߙߑߘߏ߫ ߛߍ߲߫ ߝߟߐߡߊ ߞߟߊߦߊ߫ ߕߎߡߊ ߘߌ߫߸ ߞߛߌ߬ߘߎ߰ ߛߌߟߊ ߟߊ߫، ߘߋ߲ߡߌߛߍ߲߫ ߦߙߌߞߊ߫ ߓߐ߫ ߘߊ߫߸ ߡߍ߲ ߠߎ߬ ߡߐߣߍߣߍ߲߫ ߞߊ߬ߙߌߝߊ߬ ߞߐ߲ߘߍ߫ ߝߊ߰ ߢߊ ߘߐ߫߸ ߞߊ߬ ߛߌߟߊ ߕߍ߰߸ ߞߊ߬ ߓߊ߲߫ ߞߊ߬ ߕߊ ߛߎ߫ ߞߐ߲߬ߡߊ߬ߘߊ ߟߎ߬ ߟߊ߫߸ ߞߊ߬ ߡߐ߱ ߟߎ߬ ߟߊ߫ ߞߎߟߎ߲ߞߎߟߎ߲ߠߌ߲ ߓߟߏߕߍ߰.

ߞߟߍ߬ߡߐ߰ߘߊ ߝߣߊ߫ ߥߟߌ߬ ߢߊ ߟߋ߬ ߞߍߣߴߏ߬ ߘߌ߫ ߞߊ߬ ߕߊ߯ ߞߏ ߟߎ߬ ߛߌ߰ ߞߊ߲ߡߊ߬ ߞߟߊ߬ ߞߋߟߋ߲߫ ߞߊ߲߬߸ ߞߊ߬ ߝߘߏ߬ߓߊ߬߬ ߛߌߟߊ ߟߊߓߌ߬ߟߊ߬߸ ߛߊ߫ ߡߐ߱ ߟߎ߬ ߘߴߊ߬ߟߎ߬ ߟߊ߫ ߖߌ߰ߣ߬ߦߟߍ ߞߍ߫ ߊ߬ ߢߌ߬ߡߊ ߟߊ߫، ߕߍ߮ ߞߍ߫ ߘߊ߫ ߔߊߞߌߛߦߊߟߊ߫ ߡߐ߰ ߞߐ߬ߣߐ߲߬ߘߐ߫ ߟߋ߬ ߘߐ߫ ߦߋ߲߬، ߝߊ߰ߓߊ߰ߕߐ ߛߐ߬ߘߐ߲߬߸ ߏ߬ ߡߍ߲ ߖߍ߬ߘߍ ߝߣߊ߫ ߕߊ߯ ߘߊ߫ ߔߊߞߌߛߦߊ߫ ߦߙߐ ߣߌ߲߬ ߘߐ߫ ߘߋ߲ߡߌߛߍ߲ ߠߎ߬ ߡߊߛߓߊߙߌ߫ ߞߊ߲ߡߊ߬߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ <<ߊ߲ ߧߋ߫ ߞߊߦߌߙߊ ߟߋ߬ ߝߍ߬ ߛߏ ߣߌ߲߬ ߞߣߐ߫߸ ߊ߬ ߕߌ߯ߕߌ߯ ߛߊߟߌ߫ ߢߊߞߘߐ ߣߌ߲߬ ߘߐ߫߸ ߊ߲ ߕߍ߫ ߡߊ߲߬ߞߊ߲߫ ߝߍ߬.>> ߊ߬ ߞߵߏ߬ ߦߌ߬ߘߊ߬.

ߞߊ߬ߙߌߝߊ߬ ߝߎ߬ߙߋ ߘߌ߫ ߘߴߊ߬ ߟߊ߫ ߡߐ߱ ߟߎ߫ ߡߊ߬ ߞߍ߲ߘߍߟߏ߲ ߛߐ߱ ߢߌ߲߬ ߠߋ߬ ߡߊ߬߸ ߞߕߌߞߊ߲ߘߊ ߓߐߣߍ߲ ߞߐ ߘߐ߫ ߘߊ߲ߘߊߛߏ ߛߎ߬ߓߏ߲ ߠߊ߫߸ ߞߊ߬ ߛߎ߭ ߟߊߢߌߣߌ߲߫ ߘߊ߲ߘߊߟߌߟߊ ߟߎ߬ ߟߊ߫، ߛߎ߬ߘߏ߲ ߝߣߊ߫ ߞߍ߫ ߘߊ߫ ߛߐ߰ߡߊ߬ߘߊ ߏ߬ ߟߋ ߟߊ߫، ߛߎ߬ߣߎ߲ ߥߊ߬ߙߊ ߣߴߊ߬ ߕߊ߫߸ ߛߊ߬ߦߊ ߞߍߣߍ߲߫ ߘߋ߲ߓߦߊ ߡߍ߲ ߡߊ߬߸ ߏ߬ ߡߊ߫ ߛߐ߲߬ ߞߏ ߢߌ߲߬ ߠߊߖߎ߯ߦߊ߫ ߟߊ߫ ߢߊ߫ ߛߌ߫ ߡߊ߬.

ߛߏ߬ߟߏ߫ ߝߌ߲߬ߡߊ߲ ߡߍ߲ ߦߋ߫ ߝߊ߰ߓߊ߰ߕߐ ߝߊ߭ߘߐ߰ߣߍ߲߬ ߘߌ߫߸ ߏ߬ ߞߎߡߊ߫ ߘߊ߫ ߘߋ߲ߓߦߊ ߕߐ߯ ߘߐ߫: <<ߊ߲ߠߎ߬ ߓߘߴߊ߲ ߓߟߏߞߍ߫ ߊߟߊ߫ ߟߊ߫߸ ߊ߬ ߣߌ߫ ߞߕߌߞߊ߲ߘߊ ߟߊ߫، ߊ߲ ߧߴߊ߬ ߢߌߣߌ߲߫ ߠߊ߫ ߞߊ߲ߞߊ ߟߎ߫ ߝߍ߬߸ ߊ߬ߟߎ߬ ߦߴߊ߬ߟߎ߬ ߛߓߊߙߌ߫߸ ߞߊ߬ ߕߏ߫ ߛߊ߬ߙߌ߬ߦߊ߬ ߞߐ߫߸ ߓߊߏ߬ ߛߊ߬ߙߌ߬ߦߊ߫ ߟߋ߬ ߓߍ߯ ߛߊ߲ߝߍ߬، ߏ߬ ߘߐ߫߸ ߊ߲ ߞߊߣߵߊ ߝߐ߫ ߞߏ߫ ߊ߲ ߘߴߊ߲ ߖߘߍ߬ߡߊ߬ ߞߕߌߕߍ߰߸ ߣߴߏ߬ ߕߍ߫ ߊ߬ ߘߌ߫ ߟߊߓߊ߲߫ ߝߍ߭ ߞߍߟߌ ߡߊ߬.>>

ߞߊ߲ߡߋߙߋ߲ ߛߐ߬ߘߐ߲߬ ߝߊ߸ ߊ߬ߟߋ ߡߍ߲ ߛߎ߬ߣߎ߲߬ߣߍ߲߫ ߕߘߍ߬ ߞߏߛߓߍ߫߸ ߊ߬ ߝߣߊ߫ ߞߵߊ߬ ߡߙߌߦߊ ߘߌ߫ ߘߊߞߎ߲ ߣߌ߲߬ ߘߐ߫، <<ߞߊ߬ߦߌ߯ ߒ ߓߌ߬ߟߊ߬ ߘߊ߫߸ ߒ ߓߘߊ߫ ߡߍ߲߫ ߡߐ߰ ߝߊ߰ ߞߏ ߡߍ߲߫ ߠߊ߫، ߞߏ߬ߣߌ߲߬߸ ߞߊ߬ ߡߐ߱ ߜߍ߲߫ ߡߐ߲ߓߟߌ ߟߊ߫߸ ߞߵߊ߬ ߟߊߦߍ߬ߟߍ߫ ߊ߬ ߞߊ߲߬ ߞߵߊ߬ ߝߊ߰߸ ߒ ߕߎ߲߬ ߡߴߏ߬ ߡߍ߲߫߸ ߒ ߕߎ߲߬ ߡߴߏ߬ ߦߋ߫߸ ߊ߬ ߝߟߐ ߟߋ߬ ߞߍߣߍ߲߫ ߒߠߋ ߕߊ ߣߌ߲߬ ߘߌ߫.>> ߊ߬ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ ߊ߬ ߞߵߊ߬ ߛߋߞߏ ߞߍ߫ ߡߐ߱ ߟߎ߬ ߡߛߊߓߊߙߌ ߘߐ߫߸ ߛߊ߫ ߘߋ߲ߡߌߛߍ߲ ߠߎ߬ ߘߌ߫ ߘߏ߲߬ ߞߊ߬ ߡߊ߲߬ߞߊ߲ ߘߊߓߌ߬ߟߊ߬߸ ߏ߬ ߖߍ߬ߘߍ ߞߵߊ߬ߟߋ ߞߊ߲ ߠߊߝߊ߰ ߟߋ߬، ߊ߬ ߞߏ߬ߣߌ߲ ߛߍߥߊ߫ ߘߊ߫ ߞߕߌߞߊ߲ߘߊ ߞߍ ߘߐ߫ ߊ߬ߟߎ߫ ߝߍ߬ ߦߋ߲߬ ߞߏߛߓߍ߫.

ߕߟߋ߬ ߘߐ߬ ߝߊ߲ ߠߋ߬ ߝߍ߬߸ ߞߊ߲ߓߍ߲ ߞߕߌߞߊ߲ߘߊ ߝߏߘߋ߬ ߓߌ߲ߕߎ߬ ߞߋߕߊ߬ ߕߊ߯ ߘߴߊ߬ ߢߊ ߟߊ߫ ߘߋ߲ߓߦߊ ߞߊ߲߬߸ ߛߊ߬ߦߊ ߞߍߣߍ߲߫ ߡߍ߲ ߠߎ߬ ߡߊ߬، ߞߵߊ߬ ߦߌ߬ߘߴߊ߬ߟߎ߬ ߟߊ߫ ߞߏ߫ ߊ߬ߟߎ߬ ߓߘߊ߫ ߞߕߌ ߘߐ߬ߛߏ߰ߙߋ߬ߟߌ ߛߌ߰ ߛߋ߲߬ߠߊ߫߸ ߕߍ߮ ߓߘߊ߫ ߞߍ߫ ߛߌߞߊߒߡߊߓߊ߯ߕߐ ߝߟߐߡߊ ߘߐ߫: <<ߛߌߞߊ߫ ߞߍߣߍ߲߫ ߡߐ߰ ߝߟߐ ߡߍ߲ ߡߊ߬ ߣߌ߲߬ ߞߏ ߘߐ߫߸ ߕߍ߮ ߓߘߊ߫ ߞߍ߫ ߏ߬ ߘߐ߫، ߊ߬ ߦߋ߫ ߢߊߢߌߣߌ߲ߠߌ߲ ߓߙߌߝߐߝߐ ߟߊ߫ ߕߋ߲߬߸ ߘߐ߬ߛߏ߰ߙߋ߬ߟߌ ߘߏ߲߬ ߓߘߊ߫ ߘߊߡߌ߬ߣߊ߬.>>

ߊ߬ ߞߵߊ߬ ߦߌ߬ߘߊ߬ ߞߏ߫ ߖߡߊ߬ߣߊ ߕߐ߲ߓߟߏߡߊ ߓߍ߯ ߞߎ߲߬ߕߌ߮ ߦߋ߫ ߞߟߍ߬ߕߌ߯ ߖߣߍ߬ߓߊ߬ ߛߏߙߌ ߡߍ߲ ߘߌ߫߸ ߏ߬ ߞߵߊ߬ ߞߟߌ߫ ߟߋ߬ ߞߙߍߞߙߍ߫ ߓߟߏ ߡߊ߬ ߝߋߎ߫. <<ߞߵߊ߬ ߟߊ߫ ߛߦߊ߬ ߝߏߟߌ ߞߍ߫ ߘߋ߲ߓߦߊ߫ ߢߊߖߌߞߎߘߎ߲ߕߐ ߡߊ߬.>> ߞߊ߬ ߓߊ߲߫ ߞߊ߬ <<ߖߡߊ߬ߙߌ߬ ߜߍߟߍ߲ ߘߌ߫ ߕߐ߲ߓߟߏߡߊ ߟߎ߬ ߟߊ߫ ߗߋߕߌ߯ ߕߌ߲߬ߞߎ߬ߘߎ߲߬ߠߊ߬ߞߊ ߡߊ߬߸ ߡߐ߰ ߛߌ߫ ߛߐ߲߬ ߓߊ߯ ߦߋ߫ ߊ߬ ߞߏ ߘߐ߫߸ ߞߵߏ߬ ߡߌ߬ߣߊ߬، ߊ߬ ߦߋ߫ ߘߊ߫ ߞߏ߫ ߡߍ߲ ߺ ߍ ߺ ߡߍ߲߫ ߛߐ߲߭ ߦߋ߫ ߡߐ߰ ߝߊ߰  ߞߏ ߣߌ߲߬ ߘߐ߫ ߞߊ߬ߣߌ߲߬.>>

ߛߊ߬ߙߌ߬ߦߊ߬ߓߊ߰ߙߊ߬ߟߊ ߞߵߊ߬ ߦߌ߬ߘߊ߬߸ ߞߏ߫ <<ߣߌ߫ ߕߌߢߍߟߌ ߞߍ߫ ߘߊ߫ ߞߊ߬ ߡߐ߱ ߓߐ߬ߣߐ߫ ߊ߬ ߣߌ ߘߐ߫߸ ߓߐ߬ߣߐ ߘߏ߲߬ߣߍ߲߫ ߖߡߊ߬ߣߊ ߟߋ߬ ߝߟߐ߫ ߞߎ߲߬ ߏ߬ ߘߌ߫، ߓߊߏ߬߸ ߖߡߊ߬ߣߊ ߟߋ߬ ߓߣߐ߬ߣߴߊ߬ ߘߎ߰ߘߋ߲ ߘߏ߫ ߟߊ߫، ߡߍ߲ ߘߌ߫ ߛߋ߫ ߞߍ߫ ߟߊ߫ ߖߡߊ߬ߣߊ ߡߊ߬ߞߟߐ ߘߏ߫ ߘߌ߫ ߛߌߣߌ߲߫، ߞߊ߬ߕߎ߲߯߸ ߡߍ߲ ߝߊ߰ߣߍ߲߫߸ ߊ߬ ߕߘߍ߬ ߓߊ߯ߙߊ߫ ߟߊ߫߸ ߊ߬ ߘߏ߲߬ ߡߊ߫ ߡߐ߰ ߝߊ߰.>>

ߌߞߏߡߌ߲߬ ߔߊߞߌߛߦߊ ߕߎ߬ߡߊ ߟߊ߫߸ ߕߍ߮ ߞߍ߫ ߘߊ߫ ߡߐ߱ ߘߏ߫ ߟߎ߫ ߘߐ߫߸ ߞߕߌߞߊ߲ߘߊ ߞߊ߬ ߟߊ߬ߤߘߌ ߕߊ߬ ߞߏ߫ ߊ߬ ߘߴߏ߬ ߟߎ߬ ߟߊߓߐ߫، ߒ߬ߓߊ߬߸ ߞߊ߬ ߓߍ߲߬ ߟߊ߬ߤߘߌ ߏ߬ ߓߐ ߡߊ߬ ߜߍߟߊ߫߸ ߞߕߌߞߊ߲ߘߊ ߞߵߊ߬ ߛߌ߲߫ ߞߟߍ߬ߡߐ߰ߘߊ ߟߊ߫ ߌߞߘߐ߫، ߕߍ߮ ߞߍ߫ ߘߊ߫ ߡߐ߰ ߞߐ߬ߣߐ߲߬ߘߐ ߡߍ߲ ߠߎ߬ ߘߐ߫ ߛߐ߱ߡߊ߬߸ ߞߵߏ߬ ߟߎ߫ ߓߌ߬ߟߊ߬، ߡߊ߬ߝߊ ߞߏ߬ߣߌ߲ ߓߘߊ߫ ߘߏ߲߬ ߛߏ ߞߣߐ߫ ߕߋ߲߬ ߞߏߛߓߍ߫.

ߛߎ߬ߕߌ߮ ߟߎ߬ ߟߊ߫ ߛߎ߬ߣߎ߲ ߣߴߊ߬ ߕߊ߫߸ ߞߊ߬ߙߌߝߊ߬ ߞߐ߲ߘߍ߫ ߟߊ߫ ߡߐ߱ ߟߎ߬ ߞߊ߬ ߕߋ߬ߟߋ ߓߊ߲߫ ߠߋ߬߸ ߊ߬ߟߎ߬ ߦߋ߫ ߘߋ߲ߡߌߛߍ߲ ߠߎ߬ ߞߟߌ ߞߊ߲߬ ߡߊ߬ߝߊ ߡߊ߬. ߛߏ߬ߟߏ߫ ߝߌ߲߬ߡߊ߲ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫߸ ߞߏ߫: <<ߊߟߊ߫ ߓߘߊ߫ ߓߊ߲߫ ߊ߬ ߟߊ߫ ߓߊ߯ߙߊ ߟߊ߫߸ ߊ߲ ߘߋ߫ ߓߘߊ߫ ߛߊ߬߸ ߞߵߊ߬ ߛߊߓߎ ߞߍ߫ ߡߐ߱ ߟߊ߫ ߝߊ߰ߟߌ ߘߌ߫، [...] ߞߕߌߞߊ߲ߘߊ ߢߌ߲߬ ߠߊߣߊ߬ߣߍ߲߫ ߊ߲ߠߎ߬ ߟߋ߬ ߞߎ߲߬ߡߊߝߌ߲߬ߝߊ߲߬ ߞߊ߲ߡߊ߬߸ ߊ߲ ߠߊ߫ ߝߊ߬ߞߊ ߟߋ߬ ߊ߬ߟߎ ߘߌ߫߸ ߊ߲ ߠߊ߫ ߛߋ ߟߋ߬ ߊ߬ߟߎ ߘߌ߫، ߏ߬ ߘߐ߫߸ ߘߎ߰ߘߋ߲ ߓߍ߯ ߦߋ߫ ߕߏ߫ ߝߊ߰ߡߊ ߟߎ߬ ߞߐߝߍ߬߸ ߓߍ߯ ߦߴߊ߬ ߛߓߊߙߌ߫.>> ߊ߬ ߞߵߏ߬ ߦߌ߬ߘߊ߬.

ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߎߡߊ߫ ߟߊߓߊ߲߫ ߘߐ߫߸ ߞߏ߫: <<ߟߊߒߠߦߊߓߊߟߌߦߊ ߦߋ߫ ߘߎߢߊ߫ ߥߊ߫ ߢߊ ߟߋ߬ ߘߌ߫، ߒ߬ߞߊ߬߸ ߒߠߋ ߘߌ߫ ߕߡߊ߬ߖߌ ߓߐ߫ ߓߍ߯ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߲ ߘߴߊ߲ ߠߊ߫ ߓߊ߯ߙߊ ߞߍ߫߸ ߦߏ߫ ߛߊ߬ߙߌ߬ߦߊ߫ ߞߵߊ߬ ߝߐ߫ ߢߊ ߡߍ߲ ߡߊ߬.>> ߞߵߊ߬ ߦߌ߬ߘߊ߬ ߞߏ߫ ߕߌ߲߬ߞߎߘߎ߲ ߕߐ߲ߓߟߏߡߊ ߟߎ߬ ߘߌ߫ <<ߓߌ߬ߟߊ߫ ߛߊ߬ߙߌ߬ߦߊ߫ ߛߊ߬ߥߏ߬ ߘߐ߫߸ ߖߐ߲߰ߛߊ߫ ߣߌ߲߬ ߞߏ ߘߌ߫ ߟߊߕߐ߲߫߸ ߊ߬ ߢߐ߲߰ ߜߘߍ߫ ߞߊߣߊ߬ ߞߍ߫ ߖߌ߬ߣߍ߫ ߡߎ߰ߡߍ ߟߋ߬ ߞߣߐ߫ ߡߎ߬ߕߎ߲߬߸ ߞߎߡߊߕߍ߫ ߞߊ߲ߞߊ߲߫ ߡߊ߬.>>

ߛߊ߬ߙߌ߬ߦߊ߫ ߞߏ߬ߣߌ߲߬ ߓߘߊ߫ ߟߊ߬ߤߘߌ ߕߊ߬߸ ߞߏ߫ ߊ߬ߟߎ߬ ߘߌ߫ ߣߌ߲߬ ߞߏ ߟߊߕߐ߲߫ ߊ߬ ߟߊߕߐ߲߫ ߢߊ ߡߊ߬߸ ߞߊ߬ ߓߊ߲߫ ߞߊ߬ ߝߌߘߊ ߓߐ߫ ߞߊ߬ߙߌߝߊ߬ ߞߐ߲ߘߍ߫ ߝߊ߰ ߢߊ ߢߍߡߊ߬ ߝߋߎ߫، ߞߏ߬ߣߌ߲߬߸ ߢߌ߬ߣߌ߲߬ߞߊ߬ߟߌ ߦߋ߫ ߦߙߐ ߡߍ߲ ߘߐ߫ ߛߊ߫߸ ߊ߬ߝߐ߫ ߣߌ߲߬ ߞߐ ߘߌ߫ ߞߍ߫ ߕߙߎ߬ ߘߌ߫ ߓߊ߬߸ ߞߊ߬ ߦߟߍ߬ߡߊ߲ ߖߍ߬ߘߍߖߍ߬ߘߍ ߟߊߘߏ߲߬ ߞߊ߲ߞߊ߲߫ ߕߐ߲ߓߟߏߡߊ ߟߎ߬ ߞߏߟߊߕߊ߯ߡߊ߫ ߢߊ ߘߐ߫؟