ߞߊ߲ߞߊ߲߫ ߞߣߐ߫߸ ߖߌߥߎ߫ ߞߏߖߊ߫ ߓߊ߲ߓߊߟߌ ߓߘߊ߫ ߞߍ߫ ߓߍ߯ ߛߍ߰ ߝߋ߲ ߘߌ߫ ߟߏ߲ ߓߍ߯، ߊ߬ ߣߊ߬ߕߐ߫ ߞߊߙߏ߫ ߝߌ߬ߟߊ ߟߋ߬ ߡߊ߬ ߕߋ߲߬߸ ߡߐ߱ ߟߎ߬ ߦߋ߫ ߕߋ߬ߟߋ ߝߊ߲߬ ߞߋߟߋ߲ ߣߌ߫ ߛߎ ߝߊ߲߬ ߞߋߟߋ߲ ߓߊ߲߫ ߠߊ߫ ߕߋ߬ߟߋ ߟߋ߬ ߞߘߐ߫ ߖߌߥߎߘߊ ߟߎ߬ ߟߊ߫߸ ߛߴߊ߬ߟߎ߬ ߘߌ߫ ߘߏ߫ ߛߐ߬ߘߐ߲߬ ߞߵߊ߬ ߞߍ߫ ߊ߬ߟߎ߫ ߞߎ߲߬، ߌ ߓߊ߯ ߛߏ߬ߙߌ߬ ߢߊ߫ ߛߌ߫ ߡߊ߬ ߸ߌ ߘߌ߫ ߥߊ߫ ߡߐ߱ ߟߎ߫ ߛߐ߬ߘߐ߲߬ ߖߌߥߎߘߊ ߟߊ߫، ߓߊ߬ߙߌ߬߸ ߏ߬ ߛߌߦߊߡߊ߲߫ ߠߋ߬ ߝߣߊ߫ ߦߴߊ߬ ߞߐߛߊ߬ߦߌ߲߬ ߠߊ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߡߊ߫ ߝߋ߲߫ ߛߐ߬ߘߐ߲߬، ߌ ߓߊ߯ ߛߋ߫ ߛߌߟߓߊߘߊ ߟߎ߬ ߟߊ߫߸ ߟߐ߯ߝߌ߲ ߠߎ߬ ߘߐ߫߸ ߖߋߥߎ ߕߘߍ߬ ߦߋ߫ ߟߊ߫ ߏ߬ ߟߎ߬ ߡߍ߲ ߠߎ߬ ߘߐ߫߸ ߝߋ߲߫ ߕߍ߫ ߦߋ߫ ߟߴߏ߬ ߟߎ߬ ߘߐ߫ ߡߎ߬ߕߎ߲߬، ߌ ߘߏ߲߬ ߓߊ߯ ߓߍ߲߬ ߡߍ߲ ߡߊ߬ ߥߏ߬ߣߍ߲ ߘߏ߫ ߟߊ߫߸ ߌ ߣߴߏ߬ ߕߌ߱ ߦߋ߫ ߓߍ߲߬ ߠߴߏ߬ ߘߐ߫ ߖߌ߬ߣߍ߬ ߕߊߡߊ߲ ߂߀ ߀߀߀ ߤߊ߲߯ ߂߅ ߀߀߀ ߟߋ߬ ߘߐ߫߸ ߊ߬ ߖߍ߬ߘߍ ߦߋ߫ ߛߌߦߊߦߊ߫ ߟߴߏ߬ ߘߌ߫ ߛߐ߲߬.

ߌ ߓߊ߯ ߛߋ߫ ߖߌߥߎߘߊ ߟߎ߬ ߟߊ߫߸ ߛߍ߱ ߕߍ߫ ߘߏ߲߰ ߝߋ߲߫ ߘߌ߫ ߦߋ߲߬߸ ߓߍ߯ ߢߊߘߐߓߊ߲ߣߍ߲ ߦߋ߫ ߛߍ߱ ߓߟߏ߫، ߘߏ߫ ߟߎ߫ ߦߋ߫ ߓߐ߫ ߟߊ߫ ߥߎߟߊ߫ ߖߊ߲ ߠߋ߬ ߟߊ߫ ߞߊ߬ ߣߊ߬߸ ߞߊ߬ ߓߐ߫ ߛߏ߫ ߟߊ߫ ߖߍ߬ߘߍ߸ ߞߊ߬ ߣߊ߬ ߛߏ߫ ߟߊ߫ ߞߎߘߍ߫ ߦߙߌߞߊ߫ ߟߊ߫، ߣߎ߲߬ߞߍ ߞߐ߲ߘߍ߫ ߦߴߏ߬ ߡߐ߱ ߘߏ߫ ߟߋ߬ ߘߌ߫߸ ߡߍ߲ ߦߋ߫ ߓߐ߫ ߟߊ߫ ߜߙߍߞߐ߫߸ ߛߎߡߊ߲ߞߐ߬ߦߌ߬ ߞߐߝߍ߬، <<ߞߊ߬ߦߌ߯ ߛߐ߰ߡߊ߬ߘߊ ߇ߕߎߡߊ߸ ߊ߲ ߧߋ߫ ߦߊ߲߬، ߊ߲ ߧߴߊ߲ ߞߊ߲ߠߊߘߌ߫ ߟߊ߫ ߞߎ߲߬ߠߊ߬ߛߌ߮ ߡߊ߬߸ ߊ߬ߟߎ߬ ߦߴߊ߲ ߘߍ߬ߡߍ߲߬ ߖߌߥߎ߫ ߞߏߖߊ ߣߌ߲߬ ߘߐ߫، ߣߴߏ߬ ߕߍ߫߸ ߊ߬ ߓߘߊ߫ ߞߍ߫ ߛߍ߱ ߘߌ߫ ߡߐ߱ ߟߎ߫ ߞߊ߲߬ ߘߋ߬، ߝߏߦߌ߬ ߘߏ߲߬ ߕߴߛߋ߫ ߢߊߓߐ߫ ߟߊ߫߸ ߣߌ߫ ߖߌߥߎ ߕߍ߫.>> ߊ߬ ߞߵߏ߬ ߟߊߛߙߋߦߊ߫، ߊ߬ ߞߊ߲߫ ߞߏ߫ ߊ߬ ߦߋ߫ ߞߎߘߍ߫ ߁߄ ߤߊ߲߯ ߞߎߘߍ߫ ߁߅ ߟߋ߬ ߓߏ߬ߙߌ߬ ߟߊ߫ ߞߊ߬ ߣߊ߬ ߖߌߥߎ߫ ߞߏ ߘߐ߫، <<ߞߎߣߎ߲߬߸ ߊ߲ ߕߍ߬ߘߍ߫ ߦߊ߲߬߸ ߝߋ߲߫ ߡߊ߫ ߛߐ߬ߘߐ߲߬، ߓߌ߬ ߝߣߊ߫߸ ߞߵߊ߬ ߕߊ߬ ߊ߲ ߣߊ߭ ߡߊ߬ ߤߊ߲߯ ߕߋ߲߬߸ ߝߋ߲߫ ߡߊ߫ ߛߐ߬ߘߐ߲߬.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߣߴߌ ߛߋ߫ ߘߊ߫ ߞߊ߲ߞߊ߲߫ ߡߕߋߥߏ ߖߌߥߎߘߊ ߟߊ߫߸ ߎߛߑߡߊߣߌ߲߬ ߞߏ߬ߣߊ߬ߕߍ߫ ߞߵߊ߬ ߦߌ߬ߘߊ߬ ߞߏ߫ ߖߌߥߎ߫ ߞߏߖߊ ߣߌ߲߬ ߡߊ߲߬ߕߙߐ ߓߘߊ߫ ߛߋ߫ ߤߊߟߌ߬ ߞߊ߬ߙߊ߲߬ߘߋ߲ ߠߎ߬ ߝߣߊ߫ ߡߊ߬، <<ߊ߲ ߧߋ߫ ߜߟߍ߬ߦߊ ߡߍ߲ ߘߐ߫ ߕߋ߲߬߸ ߣߴߌ ߞߵߊ߬ ߝߐ߫ ߞߏ߫ ߌ ߘߴߊ߬ ߝߐ߫߸ ߊ߬ ߕߍ߫ ߓߍ߲߬، ߞߊ߬ߦߌ߯ ߛߐ߰ߡߊ߬ߟߊ ߆ߕߎߡߊ߸ ߒ ߧߋ߫ ߦߊ߲߬߸ ߒ ߡߊ߫ ߖߌߥߎ߫ ߛߐ߬ߘߐ߲߬.>> ߊ߬ ߞߵߏ߬ ߦߌ߬ߘߊ߬، ߊ߬ߟߋ ߟߊ߫ ߝߐߟߌ߫ ߘߐ߫߸ ߖߌߥߎ߫ ߞߏߖߊ ߣߌ߲߬ ߓߘߊ߫ ߡߐ߱ ߟߎ߫ ߛߋ߲߬ߠߊߛߘߌ߬، <<ߊ߲ ߧߴߊ߲ ߞߊ߲ߠߊߘߌ߫ ߟߊ߫ ߞߊ߲ߞߊ߲߫ ߡߙߊ߬ߓߊ߮ ߡߊ߬߸ ߊ߬ ߘߊ߲߭ߛߌ߰ ߣߌ߲߬ ߞߏ ߟߊ߫߸ ߡߍ߲ ߓߘߴߊ߬ ߣߐ߭ ߟߴߊ߲ ߠߊ߫ ߞߏ ߓߍ߯ ߞߊ߲߬ ߕߋ߲߬، ߊ߬ ߡߊߝߟߍ߫߸ ߒߠߋ ߦߋ߫ ߞߊ߬ߙߊ߲߬ߘߋ߲ ߠߋ߬ ߘߌ߫߸ ߣߴߊ߬ ߝߐ߫ ߘߊ߫ ߞߏ߫ ߒߠߋ ߡߊ߫ ߛߋ߫ ߥߊ߫ ߟߊ߫ ߞߊ߬ߙߊ߲߬ߕߊ ߟߊ߫ ߖߌߥߎ߫ ߞߏߏߖߊ ߡߊ߬߸ ߏ߬ ߞߊ߫ ߜߍ߬ߟߍ߲߫ ߘߋ߬، ߝߊ߰ߡߊ ߟߎ߬ ߞߊ߫ ߞߊ߲߫ ߞߵߊ߬ߟߎ߬ ߢߊ ߟߐ߬ ߣߌ߲߬ ߞߏ ߘߐ߫߸ ߓߊߏ߬ ߖߡߊ߬ߣߊ ߕߐ߯ ߘߌߦߊ߫ ߞߏ߫ ߕߴߊ߬ ߘߌ߫.>>

ߡߎߛߑߕߊ߬ߝߊ߫ ߖߊ߰ߓߌ ߡߍ߲ ߦߋ߫ ߞߕߊ߬ߞߕߊ߬ߣߍ߲߬ ߓߏ߬ߙߌ߬ߟߊ߫ ߘߌ߫߸ ߊ߬ ߛߊ߲߭ ߛߊ߬ߓߊ ߦߴߏ߬ ߡߍ߲ ߞߊ߲߬ ߕߋ߲߬߸ ߏ߬ ߞߊ߲߫ ߞߏ߫ ߊ߬ߟߋ ߦߋ߫ ߖߡߊ߬ߣߊ߬ߘߋ߲ ߠߎ߫ ߖߍ߬ߘߍ ߟߋ߬ ߖߙߊ߬ߞߌ߬ ߟߊ߫߸ ߡߍ߲ ߠߎ߬ ߦߋ߫ ߥߊ߫ ߟߊ߫ ߖߌߥߎ ߕߊ߬ ߟߊ߫ ߖߌߥߎߘߊ ߟߊ߫߸ ߞߊ߬ ߣߵߊ߬ ߝߋ߬ߙߋ߫ ߛߐ߲߬ߞߐ߬ ߜߍߟߍ߲ ߠߊ߫، <<ߘߏ߫ ߟߎ߫ ߦߴߊ߬ ߝߍ߬ ߟߋ߬߸ ߖߌߥߎ߫ ߞߏߖߊ ߣߌ߲߬ ߦߋ߫ ߓߊ߲߫، ߘߏ߫ ߜߘߍ߫ ߟߎ߫ ߓߍ߫߸ ߏ߬ ߟߎ߬ ߕߴߊ߬ ߝߍ߬ ߊ߬ ߦߋ߫ ߓߊ߲߫، ߞߵߊ߲ ߕߏ߫ ߢߊ ߏ߬ ߡߊ߬߸ ߕߟߊ߫ ߕߴߊ߬ ߞߏ ߘߐ߫ ߝߋߎ߫.>> ߊ߬ ߞߵߏ߬ ߝߐ߫، ߞߣߊ߬ߕߏ߫ ߊ߬ ߝߙߊ߬ ߟߴߊ߬ ߞߊ߲߬߸ ߞߏ߫: <<ߘߏ߫ ߟߎ߫ ߦߋ߫ ߣߊ߬ ߟߴߊ߬ߟߎ߬ ߟߊ߫ ߥߋ߲߬ߛߋ߲߬ߓߘߊ ߟߝߊ߫ ߟߊ߫ ߟߋ߬߸ ߊ߬ߟߎ߬ ߟߊ߫ ߔߏߔߏ ߥߟߊ߫ ߞߐ߲߬ߛߏ߸ ߞߵߊ߬ ߕߊ߬ ߞߊ߬ ߥߴߊ߬ ߝߋ߬ߙߋ߫ ߛߐ߲߬ߞߐ߬ ߜߍߟߍ߲ ߠߊ߫߸ ߂߀ ߀߀߀ ߥߟߊ߫ ߂߅ ߀߀߀، ߣߴߊ߬ ߥߊ߫ ߘߊ߫ ߢߊ ߏ߬ ߡߊ߬߸ ߊ߬ߟߋ߬ ߖߌߥߎ߫ ߞߏߖߊ ߕߍߣߊ߬ ߓߊ߲߫ ߠߊ߫.>>

ߗߍ߬ߡߐ߮ ߞߐ߲ߘߍ߫ ߡߍ߲ ߦߋ߫ ߓߐ߫ ߟߊ߫ ߓߘߊ߬ߞߐ߫߸ ߏ߬ ߝߣߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߥߊ߯ߕߌ߫ ߦߙߌߞߊ߫ ߖߊ߲ ߠߋ߬ ߕߋ߬ߟߋ ߟߊ߫ ߕߋ߲߬߸ ߊ߬ ߡߊ߫ ߖߌߥߎ߫ ߛߐ߬ߘߐ߲߬، <<ߣߴߊ߲ ߞߵߊ߬ ߝߐ߫ ߞߏ߫ ߜߟߍ߬ߦߊ߬ ߕߍ߫ ߞߊ߲ߞߊ߲߫ ߕߋ߲߬ ߓߊ߬߸ ߊ߲ ߓߘߊ߫ ߥߎߦߊ ߝߐ߫، ߞߊ߬ߦߌ߯ ߛߐ߰ߡߊ߬ߟߊ ߆ߕߎߡߊ߸ ߒ ߧߋ߫ ߦߊ߲߬߸ ߊ߲ ߔߋ߫ ߁߃ߕߎߡߊ ߟߋ߬ ߘߐ߫ ߣߌ߲߬߸ ߊ߲ ߡߊ߫ ߖߌߥߎ߫ ߛߐ߬ߘߐ߲߬ ߤߊߟߌ߬ߛߊ߫.>> ߊ߬ ߞߵߏ߬ ߢߊߝߐ߫. ߊ߬ߟߋ ߟߊ߫ ߝߐߟߌ߫ ߘߐ߫߸ ߖߌߥߎ߫ ߞߏߖߊ ߣߌ߲߬ ߓߘߊ߫ ߘߌ߯ ߊ߬ߟߎ߬ ߟߊ߫ ߛߏ ߟߊ߫ <<ߊ߲ ߧߋ߫ ߓߐ߫ ߟߴߊ߲ ߓߘߊ ߟߋ߬ ߞߊ߬ ߣߊ߬ ߖߌߥߎ߫ ߞߏ ߘߐ߫ ߦߊ߲߬߸ ߣߴߊ߲ ߡߊ߫ ߝߋ߲߫ ߛߐ߬ߘߐ߲߬߸ ߊ߲ ߠߊ߫ ߓߊ߯ߙߊ ߓߍ߯ ߟߋ߬ ߟߐ߬ߣߍ߲߫ ߏ߬ ߘߌ߫، ߜߟߍ߬ߦߊ ߡߍ߲ ߦߴߊ߲ ߞߊ߲߬ ߓߌ߬߸ ߊߟߊ߫ ߞߋߟߋ߲߫ ߠߋ߬ ߞߵߊ߬ ߟߐ߲߫.>>

ߊ߬ ߞߎߡߊ߫ ߘߊ߫ ߖߌߥߎ߫ ߛߐ߲ߞߐ ߟߊ߫ ߜߟߍ߬ߦߊ ߝߣߊ߫ ߞߊ߲߬߸ ߘߓߌ߬ߘߓߌ߬ ߖߎߟߦߊ ߘߐ߫، <<ߞߊ߲ߞߊ߲߫ ߞߣߐ߫ ߕߋ߲߬߸ ߣߴߌ ߦߋ߫ ߕߏ߲ߜߊ߫ ߞߋߟߋ߲ ߞߐ߫߸ ߝߏ߫ ߌ ߦߋ߫ ߂߅ ߀߀߀ ߤߊ߲߯ ߃߀ ߀߀߀ ߟߋ߬ ߛߙߊ߬߸ ߣߴߌ ߘߴߊ߬ ߛߐ߬ߘߐ߲߬، ߣߴߏ߬ ߡߴߏ߬ ߓߐ߫ ߓߊ߬߸ ߌ ߕߴߊ߬ ߛߐ߬ߘߐ߲߬ ߝߋߎ߫.>> ߊ߬ ߞߵߏ߬ ߦߌ߬ߘߊ߬، ߊ߬ ߞߵߊ߬ ߞߊ߲ߠߊߘߌ߫ ߛߏ ߝߊ߰ߡߊ ߟߎ߫ ߡߊ߬ <<ߊ߲ ߞߏ߬ߣߌ߲ ߓߘߊ߫ ߖߌ߰ ߞߊ߲ߞߊ߲߫ ߝߊ߰ߡߊ ߟߎ߬ ߟߊ߫ ߝߋߎ߫، ߊ߲ ߞߊߣߵߊ߲ ߠߊ߫ ߕߙߐߦߊ ߘߏ߲߰ ߘߋ߬߸ ߊ߬ߟߎ ߟߋ߬ ߞߊ߫ ߞߊ߲߫ ߞߵߊ߬ߟߎ߫ ߖߊ߲߬ߕߏ߫ ߛߏ߫ ߞߣߐ߫ ߡߐ߮ ߟߎ߬ ߘߐ߫، ߊ߬ ߡߊߝߟߍ߫߸ ߞߊ߬ߦߌ߯ ߛߐ߱ߡߊ߬ ߤߊ߲߯ ߕߋ߲߬߸ ߊ߲ ߧߋ߫ ߕߋ߬ߟߋ ߞߘߐ߫ ߦߊ߲߬ ߝߎ߮ ߞߎ߲߬ߠߊ߫.>>

ߖߌߥߎ߫ ߞߏߖߊ ߣߌ߲߬ ߘߏ߲߬ ߣߴߊ߬ ߟߊ߫ ߜߟߍ߬ߦߊ߸ ߞߊ߲ߞߊ߲ߞߊ ߟߎ߬ ߞߊ߲߫ ߞߏ߫ ߝߊ߰ߡߊ ߟߎ߬ ߡߊ߫ ߝߏߦߌ߬ ߝߐ߫ ߊ߬ ߞߏ ߘߐ߫ ߡߎߣߎ߲߬߸ ߊ߬ߟߎ߬ ߡߴߊ߬ ߞߎ߲߬ ߝߐ߫߸ ߊ߬ߟߎ߬ ߡߊ߫ ߓߟߏߘߐߓߍ߲߫ ߝߣߊ߫ ߞߍ߫ ߊ߬ ߟߊ߫ ߛߊ߫ ߘߊ߲߬ ߘߌ߫ ߛߌ߰ ߊ߬ ߟߊ߫، ߞߊ߲ߞߊ߲߫ ߕߋ߲߬߸ ߖߌߥߎ ߛߐ߬ߘߐ߲ ߓߘߊ߫ ߞߍ߫ ߓߊ߲߬ߓߊ߬ ߓߏ߬ ߟߊ߬ߦߟߍ ߘߌ߫߸ ߊ߬ ߘߊ ߜߍ߬ߟߍ߲߬ߡߊ߲߫߸ ߊ߬ ߕߍ߫ ߛߐ߬ߘߐ߲߬ ߠߊ߫.