ߝߛߎߞߎ ߣߌ߫ ߣߊ߲߬ߝߟߏ߬ߦߊ߬ߟߌ ߣߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߏߕߌ߮߸ ߓߐ߬ߟߐ߲߬ߞߊ߫ ߡߊߙߌߦߊߡ ߛߌߙߋ߬ ߛߌ߬ߟߊ ߣߐ߬ ߞߏ߲߬ߘߏ߬ߓߏ߲ ߞߊ߬ߙߌ߬ߝߊ߬ߘߊ ߟߎ߬ ߖߋ߬ߕߌ߰ߘߊ ߟߋ߬ ߘߊߦߟߍ߬ ߟߊ߫ ߞߊ߲ߞߊ߲߫ ߓߌ߬ ߞߍ߲ߘߍߟߏ߲ ߣߌ߲߬ ߡߊ߬ ߂߀߂߆ ߥߊ߬ߛߌ߬ߥߙߊ ߕߟߋ߬ ߁߃ ߡߊ߬، ߦߙߐ ߡߍ߲ ߘߊ ߟߊߞߊ߬ߣߍ߲߫ ߣߌ߲߬߸ ߊ߬ߟߋ ߟߋ߬ ߞߍߕߐ߫ ߕߙߎ߬ ߘߌ߫߸ ߞߎ߲߬ߠߊ߬ߛߌ߮ ߟߊ߫ ߓߊ߯ߙߊ߫ ߦߙߐ ߡߍ߲ ߠߎ߬ ߦߋ߫ ߞߊ߲ߞߊ߲߫߸ ߏ߬ ߟߎ߬ ߘߌ߫ ߛߴߊ߬ߟߎ߬ ߟߊ߫ ߥߊߘߌ ߟߎ߬ ߡߊߡߙߊ߬ ߟߴߊ߬ߟߎ߫ ߖߘߍ߬ ߦߋ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߡߊ߫ ߕߊ߬ߡߌ߲߬ ߞߐߣߊߞߙߌ߫ ߝߍ߬ ߘߌߦߊߜߏߦߊ߫ ߓߟߏ ߡߊ߬.

ߣߌ߲߬ ߢߐ߲߱ ߘߏ߫ ߓߘߊ߫ ߟߊߞߊ߬ ߓߏ߬ߞߋ߫߸ ߞߌ߲ߘߌߦߊ߫߸ ߊ߬ ߣߌ߫ ߡߊ߯ߡߎ߲߫، ߒ߬ߓߊ߬߸ ߞߊ߲ߞߊ߲߫ ߝߣߊ߫ ߓߘߊ߫ ߤߊ߬ߙߌ߬ߖߍ߯ ߊ߬ ߕߊ ߏ߬ ߟߋ ߟߊ߫ ߣߌ߲߬߸ ߣߊߟߌ߬ߡߎ߲߫ ߞߏ߲߬ߘߏ߬ߓߏ߲ ߞߊ߬ߙߌ߬ߝߊ߬ߘߊ ߟߎ߬ ߖߋ߬ߕߌ߰ߘߊ ߘߌ߫ (ߞߎ߲߬ߠߊ߬ߛߌ߮ ߟߊ߫ ߓߊ߯ߙߊ߫ ߘߌ߲ߞߌߙߊ ߟߎ߬ ߦߴߊ߬ߟߎ߬ ߟߊ߫ ߥߊߘߌ ߟߎ߬ ߟߊߘߊ߬ߙߏ߬ ߟߊ߫ ߦߋ߲߬ ߠߋ߬߸ ߞߵߊ߬ ߡߊߡߊ߬ߙߊ߫ ߦߋ߲߬). ߓߐ߬ߟߐ߲߬ߞߊ߫ ߡߊߙߌߦߊߡ ߛߌߙߋ߬ ߛߌ߬ߟߊ ߛߐ߰ ߘߊ߫ <<ߝߏ߬ߟߌ߬ ߞߙߍߞߙߍߣߍ߲>> ߠߋ߬ ߟߊߛߋ ߡߊ߬ ߞߊ߲ߓߍ߲ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߬ ߡߎߣߎ߲߬߸ ߊ߬ ߣߌ߫ ߞߏߕߌ߯ ߝߟߐ ߊߡߊߘߎ߫ ߎ߯ߙߌ߬ ߓߊ߸ ߏ߬ ߟߎ߬ ߡߍ߲ ߠߎ߬ ߞߵߊ߬ ߣߴߊ߬ ߞߐߓߌߟߊߘߋ߲ ߠߎ߬ ߞߋߟߊ߫߸ ߞߵߊ߬ߟߎ߬ ߟߊߣߊ߬ ߞߊ߲ߞߊ߲߫، ߞߏߕߌ߯ ߡߛߏ ߢߌ߲߬ ߠߊ߫ ߝߐߟߌ߫ ߘߐ߫߸  ߦߙߐ ߣߌ߲߬ ߘߟߊߞߊ߬ ߞߎ߲ ߠߋ߬ ߞߊ߲ߞߊ߲߫߸ ߞߎ߲߬ߠߊ߬ߛߌ߮ ߣߐ߬ ߞߊ߲ߞߋߦߊ ߡߍ߲ ߠߎ߬ ߟߊߘߊ߲߫ ߠߊ߫߸ ߛߊ߫ ߝߘߏ߬ߓߊ߬ ߥߊߘߌ ߟߎ߬ ߘߌ߫ ߛߋ߫ ߡߊߡߙߊ߬ ߟߊ߫ ߞߵߊ߬ߟߎ߬ ߟߊߓߊ߯ߙߊ߫ ߊ߬ ߢߌ߬ߡߊ ߟߊ߫߸ ߖߋ߬ߕߌ߰ߘߊ ߣߌ߲߬ ߦߴߏ߬ ߘߏ߫ ߟߋ߬ ߘߌ߫߸ ߊ߬ ߟߊߞߊ߬ ߞߎ߲ ߠߋ߬ ߝߣߊ߫ ߦߴߏ߬ ߘߌ߫، ߊ߬ߟߎ߬ ߦߴߊ߬ ߝߐ߫ ߟߴߏ߬ ߡߍ߲ ߡߊ߬ ߞߏ߫ <<ߞߏ߲߬ߘߏ ߖߊ߬ߕߋ߬ߘߊ߫ ߞߎ߲߬ߞߋߟߋ߲.>>

ߓߐ߬ߟߐ߲߬ߞߊ߫ ߡߊߙߌߦߊߡ ߛߌߙߋ߬ ߛߌ߬ߟߊ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫ ߞߏ߫: <<ߞߏ߲߬ߘߏ߬ߓߏ߲ ߠߎ߬ ߞߊ߬ߙߌ߬ߝߊ߬ߘߊ ߟߎ߬ ߖߋ߬ߕߌ߰ߘߊ ߡߍ߲ ߘߟߊߞߊ߬ߣߍ߲߫ ߣߌ߲߬ ߓߌ߬߸ ߟߊ߬ߢߌߣߌ߲߫ ߝߌ߬ߟߊ߫ ߟߋ߬ ߦߴߊ߬ ߟߊ߫: ߞߊ߬ ߞߏ߲߬ߘߏ ߖߊ߬ߕߋ߬ߘߊ߫ ߞߎ߲߬ߞߋߟߋ߲ ߞߣߐ ߘߐߘߎ߲߬ߧߊ߫߸ ߊ߬ ߣߌ߫ ߞߊ߬ ߞߏ߲߬ߘߏ ߞߊ߬ߙߌ߬ߝߊ߬ߘߊ ߟߊߖߌ߰ ߖߡߊ߬ߣߊ ߝߊ߲߭ ߠߎ߬ ߘߐ߫.>> ߊ߬ ߞߵߏ߬ ߦߌ߬ߘߊ߬.

ߖߋ߬ߕߌ߰ߘߊ ߣߌ߲߬ ߠߊߞߊ߭ ߟߋ߬ ߞߍߕߐ߫ ߛߊߓߎ߫ ߘߌ߫߸ ߞߎ߲߬ߠߊ߬ߛߌ߮ ߟߊ߫ ߓߊ߯ߙߊ߫ ߘߌ߲ߞߌߙߊ ߟߎ߬ ߟߊ߫ ߖߊ߬ߕߋ߬ߘߊ ߡߍ߲ ߠߎ߬ ߟߊߞߊ߬ߣߍ߲߫ ߕߊ߲ߓߊ߲߫ ߜߍߓߏ߲ ߠߊ߫߸ ߊ߬ ߣߌ߫ ߖߎ߬ߟߦߊ߬ ߜߍߓߏ߲ ߠߎ߬ ߟߊ߫߸ ߏ߬ ߟߎ߬ ߘߌ߫ ߘߊߕߎ߲߯ ߡߎ߬ߕߎ߲߬، ߏ߬ ߟߎ߬ ߞߍߕߐ߫ ߊ߬ߟߎ߬ ߟߊ߫ ߖߊ߬ߕߋ߬ߘߊ ߟߊߞߊ߬ ߟߊ߫ ߞߏ߲߬ߘߏ߬ߓߏ߲ ߖߋ߬ߕߌ߰ߘߊ ߢߌ߲߬ ߠߋ߬ ߟߊ߫߸ ߡߍ߲ ߠߎ߬ ߦߋ߫ ߞߊ߲ߞߊ߲߫ ߕߌ߲߬ߞߎߘߎ߲ ߘߐ߫ ߦߊ߲߬߸ ߏ߬ ߟߎ߬ ߓߍ߯ ߣߊ߬ߕߐ߫ ߊ߬ߟߎ߬ ߕߊ ߘߌ߫ ߦߋ߲߬ ߠߋ߬، ߊ߬ߟߎ߬ ߟߊ߫ ߥߊߘߌ ߡߍ߲ ߦߴߊ߬ߟߎ߬ ߟߊ߫ ߖߊ߬ߕߋ߬ߘߊ߬ ߞߘߐ ߟߊ߫߸ ߏ߬ ߟߎ߬ ߘߌ߫ ߟߊߦߟߍ߬ߡߊ߲߬ ߞߎߘߊ ߣߌ߲߬ ߞߣߐ߫߸ ߊ߬ߟߎ߬ ߘߴߊ߬ߟߎ߬ ߟߊ߫ ߥߊߘߌ߫ ߟߊߟߏ߲ ߣߴߊ߬ ߟߊߓߐ ߓߍ߯ ߞߍ߫ ߝߣߊ߫߸ ߣߌ߫ ߜߟߍ߬ߦߊ߬ ߕߍ߫، ߞߏߕߌ߯ ߡߛߏ ߞߵߊ߬ ߦߌ߬ߘߊ߬ ߞߏ߫ ߞߎߡߊ ߏ߬ ߘߏ߲߬ ߝߣߊ߫ ߓߍ߲߬ߣߍ߲߫ ߠߋ߬ ߣߊ߲߬ߝߟߏ߬ߦߊ߬ߟߌ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߕߐ߲ߛߋ߲ ߇߁߲ ߡߊ߬߸ ߏ߬ ߡߍ߲ ߦߋ߫ ߞߎߡߊ߫ ߟߊ߫ ߞߎ߲߬ߠߊ߬ߛߌ߮ ߟߊ߫ ߝߘߏ߬ߓߊ߬ ߞߏ߲߬ߘߏ߬ ߞߏ ߞߊ߲߬، ߞߏ߫ ߞߎ߲߬ߠߊ߬ߛߌ߮ ߟߊ߫ ߥߊߘߌ ߓߍ߯ ߞߊ߫ ߞߊ߲߫ ߞߊ߬ ߟߊߘߊ߬ߙߏ߫ ߖߊ߬ߕߋ߬ߘߊ߬ ߞߋߟߋ߲߫ ߠߋ߬ ߟߊ߫߸ ߡߍ߲ ߠߊߞߊ߬ߣߍ߲߬ ߕߊ߲ߓߊ߲߫ ߜߍߓߏ߲ ߠߊ߫.

ߞߏߕߌ߯ ߡߛߏ ߞߵߊ߬ ߝߐ߫ ߝߣߊ߫߸ ߖߋ߬ߕߌ߰ߘߊ ߡߍ߲ ߘߊߦߟߍ߬ߣߍ߲߬ ߞߊ߲ߞߊ߲߫ ߣߌ߲߬߸ ߞߎ߲߬ߠߊ߬ߛߌ߮ ߟߊ߫ ߓߊ߯ߙߊ߫ ߦߙߐ ߟߎ߬ ߥߊߘߌ ߓߍ߯ ߟߊߘߊ߬ߙߏ߬ߕߐ߫ ߦߋ߲߬ ߠߋ߬߸ ߞߊ߬ߝߏ߬ߙߋ߲ ߕߊ ߟߎ߬ ߓߊ߬߸ ߖߊ߬ߕߋ߬ߘߐ߬ߛߌ߮ ߟߎ߫ ߓߊ߬߸ ߊ߬ ߣߌ߫ ߕߐ߬ߡߊ ߓߍ߯ ߟߊߘߍ߬ߣߍ߲ ߞߐߘߍ߫.

<<ߊ߬ ߦߴߊ߲ ߞߊ߲߬ ߛߋ߲ߛߋߘߋ߲ ߠߋ߬ ߘߌ߫߸ ߞߊ߬ ߛߋ߫ ߛߌ߲߬ߝߏ߲߬ߘߊ߬ ߓߊ߲ߓߊ߲ߣߍ߲߫ ߛߌ߰ ߟߊ߫ ߛߋ߲߬ߠߊ߫߸ ߡߍ߲ ߘߌ߫ ߖߡߊ߬ߣߊ ߣߊ߲߬ߝߟߏ ߟߎ߬ ߡߊߡߙߊ߬ ߞߏ߬ߢߌߡߊ ߞߍ߫ ߓߌ߬ ߣߌ߫ ߛߌߣߌ߲߫ ߘߐ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬.>> ߊ߬ ߞߵߏ߬ ߦߌ߬ߘߊ߬ ߞߵߊ߬ ߟߴߊ߬ ߞߊ߲߬ ߞߏ߫ ߊ߬ߟߎ߬ ߦߴߊ߬ ߞߊ߲߬ ߞߊ߬ ߓߐ߫ ߛߌߟߊ߫ ߟߎ߫ ߘߌ߫߸ ߞߎ߲߬ߠߊ߬ߛߌ߮ ߟߊ߫ ߥߊߘߌ ߟߎ߬ ߦߋ߫ ߛߋ߫ ߛߙߊ߬ ߟߊ߫ ߢߎߡߍߙߋ߲߫ ߛߌߟߊ ߝߍ߬.

ߝߘߏ߬ߓߊ߬ ߞߏ߲ߘߏ ߗߋߕߌ߮ ߦߛߎߝ ߛߎߡߊ߬ ߞߵߊ߬ ߦߌ߬ߘߊ߬ ߞߏ߫ ߖߋ߬ߕߌ߰ߘߊ ߡߍ߲߬ ߘߊߦߍ߬ߟߍ ߞߊ߲ߞߊ߲߫߸ ߏ߬ ߦߋ߫ ߞߏ߫ ߓߘߍߓߊ߫ ߟߋ߬ ߘߌ߫، ߞߵߏ߬ ߞߎ߲߭ ߞߍ߫ ߞߊ߲ߞߊ߲߫ ߖߌߘߊ߲ ߘߌ߫ ߛߐ߬ߘߐ߲ ߣߌ߫ ߡߊ߬ߡߙߊ߬ߟߌ ߘߊߞߎ߲ ߘߐ߫، ߊ߬ ߞߊ߲߫ ߞߏ߫ ߊ߬ ߟߊߞߊ߭ ߘߌ߫ ߞߍ߫ ߕߙߎ߬ ߘߌ߫ <<ߞߊ߬ ߞߎ߲߬ߠߊ߬ߛߌ߮ ߡߊߣߊ߲ߞߎ߲ ߠߊߞߊ߲ߘߊ߫>>، ߊ߬ ߞߵߊ߬ ߦߌ߬ߘߊ߬ ߌߞߐ߫ ߞߊ߲ߞߊ߲߫ ߓߘߊ߫ ߛߋ߫ ߘߊߞߎ߲ ߡߍ߲ ߘߐ߫ ߣߌ߲߬߸ <<ߢߊ߬ ߕߴߛߋ߫ ߞߍ߫ ߟߊ߫ ߖߋ߬ߕߌ߰ߘߊ ߣߌ߲߬ ߞߐ߫>> ߕߘߍ߬ ߝߋߎ߫.

ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߝߊߙߌ߲ ߊ߬ߟߌ߫ ߓߊߘߊ߬ߙߊ ߞߡߊ߬ߙߊ߬ ߝߣߊ߫ ߞߊ߬ ߣߌ߲߬ ߞߏ ߕߊ߲߬ߘߏ߬ ߓߘߍߓߘߍߞߍ߬߸ ߞߵߊ߬ ߦߌ߬ߘߊ߬ ߞߏ߫ ߞߎ߲߬ߠߊ߬ߛߌ߮ ߦߴߊ߬ ߞߊ߲߬ ߠߋ߬ ߣߌ߲߬߸ ߞߊ߬ ߝߘߏ߬ߓߊ߬ ߣߊ߲ߝߟߏ ߟߎ߬ ߡߊ߬ߡߙߊ߬ߟߌ ߡߊߘߏ߲߬ ߓߍ߯ ߟߊ߫، ߊ߬ߟߋ ߞߵߊ߬ ߦߌ߬ߘߊ߬ ߞߏ߫ <<ߣߌ߲߬ ߘߌ߫ ߞߍ߫ ߕߙߎ߬ ߘߌ߫ ߞߊ߬ ߓߊ߯ߙߊ ߟߊߛߣߐ߬ߦߊ߫߸ ߞߊ߬ ߥߊߘߌ߫ ߞߏ ߖߍ߬ߘߍ ߝߣߊ߫ ߟߊߞߊ߲ߘߊ߫ ߝߛߊߦߌ߫.>> ߊ߬ ߞߵߏ߬ ߦߌ߬ߘߊ߬.

ߞߊ߲ߞߊ߲߫ ߕߊ ߣߌ߲߬ ߞߐߝߍ߬߸ ߖߋ߬ߕߌ߰ߘߊ ߣߌ߲߬ ߛߎ߮ ߞߊ߫ ߞߊ߲߫ ߞߊ߬ ߟߊߞߊ߬ ߒߛߙߍߜߘߍ߬߸ ߟߊߓߋ߬߸ ߊ߬ ߣߌ߫ ߝߙߊߣߊ߫.