ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߣߌ߬ ߞߕߌ ߟߋ߬ ߕߍ߰ ߟߊ߫ ߞߐ߬ߓߊ߬ߟߏ߲ ߢߌ߲߬ ߡߊ߬߸ ߂߀߂߆ ߘߓߊ߬ߓߌߟߊ ߕߟߋ߬ ߃߁߸ ߞߕߌ ߏ߬ ߡߍ߲ ߕߘߍ߬ ߌߓߙߊߤߌߡߊ߫ ߛߏߙߌ߬ ߞߡߊ߬ߙߊ߫ ߞߎ߲߭ ߞߊ߲߬߸ ߣߴߊ߬ ߡߊߟߐ߲ߣߍ߲߫ ߓߍ߯ ߓߟߏ߫ ߞߏ߫ ߛߏ߬ߙߌ߬ ߖߌߣߊߕߌ߮. ߊ߬ߟߋ ߟߊ߫ ߞߕߌ ߕߎ߲߬ ߦߴߌߘߐ߫ ߞߊ߬ ߓߍ߲߬ ߞߏߡߊߦߟߍߡߊ߲ ߠߋ߬ ߡߊ߬߸ ߊ߬ ߣߌ߫ ߞߘߎ߬ߟߌ ߣߌ߫ ߡߊ߬ߘߌ߬ߡߌ߲߬ߠߌ߲ ߛߋ߲߬ߘߏ߲߬ߢߐ߲߰ߦߊ، ߛߊ߬ߙߌ߬ߦߊ߫ ߣߐ߬ ߊ߬ ߣߐ߬ߝߍ߬ߜߍ߲߫ ߠߊ߫ ߏ߬ ߟߎ߫ ߟߋ߬ ߞߏߛߐ߲߬.

ߞߕߌ ߣߌ߲߬ ߞߐ ߘߐ߫߸ ߊ߬ ߦߌ߬ߘߊ߬ ߘߊ߫ ߞߏ߫ ߛߏ߬ߙߌ߬ ߖߌߣߊߕߌ߮ ߛߐ߲߬ ߕߍ߫ ߞߏߡߊߦߟߍߡߊ߲߫ ߞߏ ߘߐ߫، ߞߏ߬ߣߌ߲߬߸ ߞߕߌߘߊ ߓߍ߲߬ ߘߴߊ߬ ߡߊ߬ ߞߏ߫ ߊ߬ ߛߐ߲߭ ߦߋ߫ ߞߘߎ߬ߟߌ ߣߌ߫ ߡߊ߬ߘߌ߬ߡߌ߲߬ߠߌ߲ ߛߋ߲߬ߘߏ߲߬ߢߐ߲߰ߦߊ ߘߐ߫.

ߏ߬ ߟߋ ߞߏߛߐ߲߬ ߏ߬ ߘߐ߫߸ ߊ߬ ߖߊ߲߬ߞߌ߲߬ ߘߊ߫ ߞߊ߬ ߞߊߙߏ߫ ߟߏ߯ߟߎ߫ ߥߛߎ߫ ߘߐ߲ߘߐ߫ ߊ߬ ߡߊ߬߸ ߊ߬ ߣߌ߫ ߞߏ߫ ߊ߬ ߦߋ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߞߋߟߋ߲߫ ߛߊ߬ߙߊ߫ ߢߍ߬ߢߌ߲߬ߘߐ߬ߓߍ߲ ߘߌ߫.

ߞߕߌߘߊ ߞߵߊ߬ ߝߐ߫ ߊ߬ ߦߋ߫ ߝߣߊ߫߸ ߞߏ߫ ߊ߬ ߞߊߣߵߊ߬ ߟߊ߫ ߖߌߣߊ߫ ߡߌߣߊ ߣߌ߲߬ ߞߍ߫ ߜߍ ߘߐ߫ ߤߊ߲߯ ߛߊ߲߬ ߞߋߟߋ߲߫߸ ߊ߬ ߘߏ߲߬ ߞߊߣߵߊ߬ ߟߊߖߍ߲ߛߍ߲߫ ߘߍ߬ߞߙߏߝߏ ߞߊ߲߬ ߝߣߊ߫، ߞߏ߫ ߛߌ߫ ߟߐ߬ߣߍ߲߬ ߖߌߣߊ߫ ߡߌߣߊ ߣߌ߲߬ ߡߊ߬߸ ߊ߬ ߞߊߣߵߏ߬ ߟߊߖߍ߲ߛߍ߲߫.

ߦߊ߬ߣߌ߫ ߞߕߌ ߦߋ߫ ߕߍ߰߸ ߞߕߌߞߊ߲ߘߊ ߟߊ߫ ߡߌ߬ߣߊ߬ߞߊ߲߬ߝߐ ߘߐ߫߸ ߝߘߏ߬ߓߊ߬ ߞߏߕߌ߯ߘߊ ߞߵߊ߬ ߝߐ߫ ߟߋ߬ ߞߏ߫ ߞߊ߬ ߛߊ߲߭ ߝߌ߬ߟߊ߬ ߥߛߎ߫ ߘߐ߲ߘߐ߫ ߛߏ߬ߙߌ߬ ߖߌߣߊߕߌ߮ ߡߊ߬߸ ߊ߬ ߣߴߊ߬ ߦߋ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߛߊ߬ߓߊ߫ ߛߊ߬ߙߊ߫ ߢߍ߬ߢߌ߲߬ߘߐ߬ߓߍ߲ ߘߌ߫.

ߛߏ߬ߙߌ߬ ߟߊ߫ ߞߕߌ ߣߌ߲߬ ߞߍߣߍ߲߫ ߠߋ߬߸ ߟߊ߬ߝߛߊ߬ߟߌ߬ߟߊ߫ ߡߊ߫ ߕߊ߬߸ ߊ߬ ߞߊ߬ ߦߝߊ߬ ߕߙߊ ߞߍ߫ ߛߊ߬ߙߌ߬ߦߊ߫ ߝߍ߬߸ ߊ߬ ߣߌ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߕߍ߫ ߣߌ߲߬ ߢߐ߲߰ ߞߍ߫ ߡߎ߬ߕߎ߲߬.

ߞߵߊߟߎ߫ ߦߟߌߓߌ߬ߟߊ߬߸ ߖߌ߬ߦߊ߬ߖߟߎ ߘߏ߫ ߟߋ߬ ߟߊߖߍ߲ߛߍ߲ߣߍ߲ ߦߋߣߍ߲߫ ߘߍ߬ߞߙߏߝߏ ߞߊ߲߬߸ ߖߌ߬ߦߊ߬ߖߟߎ ߣߌ߲߬ ߘߐ߫߸ ߛߏ߬ߙߌ߬ ߖߌߣߊߕߌ߮ ߦߋ߫ ߓߐ߫ ߟߊ߫߸ ߖߡߊ߬ ߛߌߦߊߡߊ߲߫ ߦߴߊ߬ ߟߊߡߌߣߌ߲ ߘߐ߫، ߒ߬ߓߊ߬߸ ߘߏ߫ ߟߋ߬ ߡߏ߬ߛߏ ߘߏ߫ ߥߊ߬ߟߏ߲߬ ߠߊ߫ ߦߋ߲߬ ߛߊ߫߸ ߏ߬ ߟߋ ߖߌ߬ߦߊ߬ߖߟߎ ߣߐ߬ ߛߏ߬ߙߌ߬ ߟߊߛߋ߫ ߟߊ߫ ߛߊ߬ߙߌ߬ߦߊ߬ ߟߊ߫.

ߊ߬ ߟߊ߫ ߞߏ ߘߐߢߌߡߌ߲ ߞߐߝߍ߬߸ ߊ߬ߟߎ߫ ߞߵߊ߬ ߦߋ߫ ߞߏ߫ ߛߏ߬ߙߌ߬ ߡߊ߫ ߜߊ߬ߛߟߌ߬ ߞߍ߫ ߛߊ߫߸ ߓߊ߬ߙߵߊ߬ ߛߓߊߓߎ ߞߍߣߍ߲߫ ߊ߬ߟߋ ߟߋ߬ ߘߌ߫، ߏ߬ ߟߋ ߞߏߛߐ߲߬߸ ߊ߬ ߛߐ߲߭ ߦߴߏ߬ ߘߐ߫، ߞߏ߬ߣߌ߲߬߸ ߞߏߡߊߦߟߍߡߊ߲ ߣߌ߫ ߣߊ߲߬ߞߙߊ߬ߓߊ߬ߦߊ ߛߊ߫߸ ߛߏ߬ߙߌ߫ ߛߐ߲߬ ߡߊ߫ ߦߴߏ߬ ߘߐ߫ ߡߎ߰ߡߍ߫.