ߞߊ߲ߞߊ߲߫ ߤߐߛ߭ ߡߌߣ ߟߊ߬ߘߍ߬ ߝߏ߮ ߞߣߐ߫߸ ߒߞߏ ߛߊ߲߬ߞߎ߲߬ߓߍ߲ ߇߇߲ ߓߏ߬ߙߌ߬ ߘߊ߫ ߞߍ߲ߘߍߦߊ ߟߋ߬ ߞߊ߲߬، ߏ߬ ߡߍ߲ ߡߙߌߦߊ ߝߘߊߣߍ߲߫ ߒߞߏ ߞߙߎߝߓߊ ߟߊ߫߸ ߊ߬ߟߎ߬ ߟߊ߫ ߟߊ߬ߞߐ߰ߟߌ ߏ߬ ߡߍ߲ ߦߋ߫ ߟߊߥߟߌ߬ ߟߊ߫ ߝߘߊ߬ߝߌ߲߬ ߓߊ߬ߛߌ߬ߓߐ߬ߟߊ ߟߎ߫ ߟߌ߬ߤߟߊ ߡߊߝߊ߬ߟߋ߲߬ ߞߊ߲ߡߊ߬ ߘߊߞߎ߲߫ ߛߌߦߊߡߊ߲߫ ߘߐ߫߸ ߣߴߊ߬ ߛߋ߲߬ߢߊ߬ ߁߆߲ ߦߋ߫ ߢߌ߬ߣߊ߲߬ ߕߊ ߣߌ߲߬ ߘߌ߫، ߞߊ߬ߕߎ߯߸ ߊ߬ߟߎ߫ ߣߐ߬ ߕߟߋ߬ ߣߊ߯ߣߌ߲߫ ߠߋ߬ ߛߎߥߊ߲ߘߌ߫ ߟߊ߫߸ ߞߊ߬ ߟߊ߬ߞߐ߰ߟߌ ߞߍ߫ ߘߊߞߎ߲߫ ߛߌߦߊߡߊ߲߫ ߞߊ߲߬، ߊ߬ ߘߏ߲߬߸ ߊ߬ߟߎ߬ ߟߊ߫ ߟߊ߬ߞߐ߰ߟߌ ߣߌ߲߬ ߢߣߊߓߊ߮ ߟߎ߬ ߘߐ߫߸ ߞߍ߲ߘߍߦߊ ߞߎ߲߬ߠߊ߬ߛߌ߮ ߟߎ߫ ߕߘߍ߬ ߞߣߍ ߞߊ߲߬߸ ߊ߬ ߕߘߍ߬ߒ߬ߘߐ߬ߓߊ߮ ߟߎ߬ ߓߐߣߍ߲߫ ߝߊ߲߬ ߛߌߦߊߡߊ߲߫ ߠߋ߬ ߘߐ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߘߐ߫ ߦߊ߲߬߸ ߊ߬ ߣߌ߫ ߖߌ߬ߣߍ߬ ߛߏ߫ ߞߎ߲ߓߊ ߛߌߦߊߡߊ߲߫ ߠߊ߫.

ߒߞߏ ߛߓߍߛߎ߲ ߛߌ߲ߘߌ߫ ߘߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߟߋ߬ ߓߟߏ߫ ߁߉߄߉ ߟߊ߫߸ ߛߓߍߛߎ߲ ߏ߬ ߡߍ߲ ߓߘߊ߫ ߞߏ߫ ߛߌߦߊߡߊ߲߫ ߢߊ߬ ߝߘߊ߬ߝߌ߲ ߣߌ߫ ߝߘߊ߬ߝߌ߲߬ߧߊ ߡߊ߬ ߟߐ߲ߠߌ߲ ߞߊߡߊ߲ ߞߣߐ߫߸ ߊ߬ ߕߌ߯ߕߌ߯ ߓߊߛߌߦߊ ߡߊ߬ߘߎ߮ ߘߐ߫.

ߞߏ߲ߞߏߘߓߌ ߕߟߋ߬ ߃߀ ߣߊ߬ߕߐ ߟߋ߬ ߞߍߕߐ߫ ߒߞߏ ߛߊ߲߬ߞߎ߲߬ߓߍ߲߬ ߓߟߋߓߟߋ ߘߌ߫ ߞߊ߲ߞߊ߲߫ ߞߣߐ߫، ߞߊ߬ ߞߐ߲߰ ߏ߬ ߢߍ߫߸ ߘߊ߲ߘߊߟߌߟߊ ߟߎ߬ ߓߘߊ߫ ߥߟߌ߬ ߡߎߣߎ߲߬߸ ߞߊ߬ ߛߌߟߊ ߟߊߞߐ߲߰߸ ߞߊ߬ ߞߎ߲߬ߠߊ߬ߛߌ߮ ߟߊ߫ ߘߊ߲ߘߊߟߌߟߊ ߟߎ߬ ߛߊ߲ߞߊߢߐ߲߯ߦߊ߫ ߟߐ߲ߠߌ߲߫ ߓߟߋߓߟߋ ߟߎ߬ ߘߌ߫.

ߞߙߎߝߓߊ ߟߊ߫ ߟߊ߬ߞߐ߰ߟߌ ߁߆߲ ߡߍ߲ ߦߋ߫ ߕߋ߲߬߸ ߊ߬ ߟߊ߬ߞߐ߰ߟߌ߬ߟߊ ߦߋ߫ ߞߏ߲߬ߓߏ ߡߊߡߎ߬ߘߎ ߞߏߕߍߓߊ߲߫ ߞߡߊ߬ߙߊ߫ ߟߋ߬ ߘߌ߫، ߊ߬ߟߋ߫ ߞߊ߬ ߟߊ߬ߞߐ߰ߟߌ ߣߌ߲߬ ߕߐ߬ߣߐ ߢߊߝߐ߫. 

<<ߞߙߎߝߓߊ ߟߊ߫ ߓߊ߯ߙߊ ߦߋ߫ ߡߍ߲ ߘߌ߫߸ ߏ߬ ߟߋ ߞߊ߬ ߡߐ߱ ߟߎ߫ ߞߊ߬ߙߊ߲߬ ߓߊߛߌߦߊ ߟߊ߫߸ ߖߊ߲߬ߞߊߙߏ ߟߎ߬ ߟߐ߲߫ ߢߊ߸ ߖߊ߲߬ߞߊߙߏ ߟߎ߫ ߡߐ߰ ߡߌ߬ߣߊ߬ ߢߊ߸ ߖߊ߲߬ߞߊߙߏ ߟߎ߫ ߕߐ߰ߡߊ߬ߛߙߋ߸ ߖߊ߲߬ߞߊߙߏ ߟߎ߬ ߘߌߡߌ߲ߛߙߋ߸ ߊ߬ ߣߴߊ߬ߟߎ߬ ߘߌߡߌ߲ߢߍߓߌߟߊ߸ ߊ߲ ߠߊ߫ ߓߊ߯ߙߊ ߦߋ߫ ߏ߬ ߟߋ ߘߌ߫، ߞߊ߬ ߡߐ߱ ߟߎ߫ ߞߊ߬ߙߊ߲߫ ߏ߬ ߟߊ߫߸ ߊ߬ߟߎ߬ ߦߋ߫ ߛߋ߫ ߘߏ߫ ߢߊ߬ ߟߊ߫ ߓߊߘߋ߲ ߠߎ߬ ߡߊ߬߸ ߞߵߊ߬ߟߎ߬ ߓߐ߫ ߞߣߐ߬ߘߐ߬ߝߟߌ ߘߐ߫.>> ߊ߬ ߞߵߏ߬ ߦߌ߬ߘߊ߬ ߞߎߡߊ ߘߐ߫.

ߕߟߋ߬ ߣߊ߯ߣߌ߲߫ ߟߊ߬ߞߐ߰ߟߌ ߣߌ߲߬ ߞߍߕߐ߫ ߘߊߞߎ߲߫ ߛߌߦߊߡߊ߲߫ ߠߋ߬ ߞߊ߲߬߸ ߓߊߛߌߦߊ ߣߌ߫ ߘߊ߲ߘߊߟߌ ߦߴߊ߬ ߘߐ߫߸ ߟߊ߬ߕߙߎ ߦߴߊ߬ ߘߐ߫߸ ߣߴߏ߬ ߦߋ߫ ߞߌ߬ߢߍ߬ߟߊ ߘߌ߫߸ ߞߵߏ߬ ߟߊ߫ ߥߊߟߌߝߦߊ ߞߊ߲߬، ߞߏߕߍߓߊ߲߫ ߞߊ߬ ߢߊߝߐߟߌ߫ ߞߍ߫ ߏ߬ ߘߐ߫ ߞߊ߬ ߓߍ߲߬ ߟߊ߬ߞߐ߰ߟߌ߬ ߘߊߢߌ߲߬ ߠߎ߫ ߡߊ߬߸ ߡߍ߲ ߘߏ߫ ߟߎ߫ ߓߍߣߊ߬ ߞߍ߫ ߘߋ߲ߣߍ߲ ߠߎ߬ ߟߊ߫ ߥߎߟߊߦߋߘߐߓߎߘߎ߲ ߘߌ߫߸ ߊ߬ ߣߌ߫ ߛߏ߬ߙߏ߲߬ߘߏ߬ߝߛߊ߬ ߓߣߊ ߦߋ߫ ߘߏ߫ ߘߌ߫߸ ߡߐ߰ ߛߌߦߊߡߊ߲߫ ߦߴߏ߬ ߡߍ߲ ߖߊ߬ߕߋ߬ ߟߊ߫ ߞߏ߭ߞߏ߭ ߘߌ߫ ߛߐ߲߬.

<<ߘߊߞߎ߲߫ ߓߟߋߓߟߋ߫ ߛߊ߬ߓߊ߫ ߟߋ߬ ߕߊ߬ߣߴߊ߲ ߓߟߏ߫ ߢߌ߬ߣߊ߲߫ ߟߊ߬ߞߐ߰ߟߌ ߣߌ߲߬ ߞߣߐ߫، ߏ߬ ߖߊ߲߬ߞߊߙߏ ߟߎ߬ ߝߟߐߝߟߐ ߦߋ߫ ߡߍ߲ ߘߌ߫߸ ߏ߬ ߟߋ ߦߋ߫ ߛߊߦߌߓߣߊ ߘߌ߫، ߝߌߟߊߣߊ߲߸ ߏ߬ ߟߋ ߦߋ߫ ߛߏ߬ߙߏ߲߬ߘߏ߬ߝߛߊ߬ ߓߣߊ ߘߌ߫߸ ߏ߬ ߦߋ߫ ߓߏ߭ ߓߐ߫ ߦߙߐ ߟߊ߫ ߖߊ߲߬ߞߊߙߏ ߟߋ߬ ߘߌ߫، ߖߊ߲߬ߞߊߙߏ ߛߓߊߣߊ߲ ߛߊ߫߸ ߏ߬ ߟߋ ߢߟߊߓߎ߲߯ ߓߣߊ ߟߎ߬ ߘߌ߫ ߘߋ߲ߣߍ߲ ߠߎ߬ ߟߊ߫ ߞߎ߲߬ߠߊ߫، ߟߊ߬ߞߐ߰ߟߌ ߘߊߞߎ߲߫ ߝߌߟߊߣߊ߲ ߞߍߣߍ߲߫ ߥߊߟߌߝߦߊ ߟߋ߬ ߘߌ߫߸ ߛߴߊ߲ ߘߌ߫ ߛߴߊ߲ ߠߊ߫ ߓߊ߯ߙߊ ߣߌ߲߬ ߛߌ߲߬ߝߏ߲߬ߧߊ߬ ߟߊ߫ ߢߊ߫ ߡߊ߬߸ ߛߴߊ߲ߠߎ߬ ߘߌ߫ ߟߊߝߙߍ߫߸ ߞߊ߬ ߓߣߊ߬ߓߊ߰ߕߐ ߟߎ߬ ߝߣߊ߫ ߟߊߝߙߍ߫، ߟߊ߬ߞߐ߰ߟߌ ߓߏߟߏ߲߫ ߓߟߋߓߟߋ ߛߓߊߣߊ߲ ߦߋ߫ ߟߊ߬ߕߙߎ ߟߋ߬ ߘߌ߫߸ ߣߌ߫ ߘߏ ߟߎ߬ ߞߊ߲߫ ߊ߬ ߡߊ߬ ߞߏ߫ ߞߌ߬ߢߍ߬ߟߊ.>>

ߟߊ߬ߞߐ߰ߟߌ ߘߊߡߌߣߊ߫ ߟߏ߲ ߣߌ߲߬ ߘߐ߫߸ ߓߊߛߌߦߊ ߟߊ߬ߞߐ߰ߟߌ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߊ߬ߟߎ߫ ߞߊ߬ ߒߞߏ ߕߐ߬ߣߐ ߢߊߝߐ߫، ߞߏߕߍߓߊ߲߫ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫ ߞߏ߫ : <<ߝߘߊ߬ߝߌ߲ ߠߊ߫ ߦߋߟߋ߲ ߕߎ߲߬ ߕߍ߫ ߊߙߊߓߎ߫ ߛߓߍߟߌ ߘߌ߫߸ ߝߘߊ߬ߝߌ߲ ߠߊ߫ ߦߋߟߋ߲ ߕߎ߲߬ ߕߍ߫ ߝߊ߬ߙߊ߲߬ߛߌ߬ ߛߓߍߟߌ ߘߌ߫߸ ߝߘߊ߬ߝߌ߲ ߠߊ߫ ߦߋߟߋ߲ ߦߴߊ߬ ߖߘߍ߬ߞߊ߬ߣߌ߲߬ ߛߓߍߟߌ ߟߋ߬ ߘߌ߫.>> ߞߏߕߍߓߊ߲߫ ߞߡߊ߬ߙߊ߫ ߟߋ߬ ߞߊ߲߫ ߕߋ߲߬.

ߞߊ߬ ߓߍ߲߬ ߕߍߜߟߍߦߊ ߡߍ߲ ߦߋ߫ ߝߘߊ߬ߝߌ߲߬ ߓߊ߬ߛߌ߬ߓߐ߬ߟߊ ߟߎ߬ ߣߌ߫ ߞߊ߬ߞߎߘߊ ߘߊ߲ߘߊߟߌߟߊ ߟߎ߬ ߕߍ߫ ߛߐ߲߬߸ ߞߏߕߍߓߊ߲߫ ߞߵߏ߬ ߓߛߊߞߟߌߕߋ߫، <<ߡߍ߲ ߠߎ߬ ߦߋ߫ ߘߊ߲ߘߊߛߏ ߟߎ߬ ߟߊ߫߸ ߞߊ߬ߞߎߘߊ ߘߊ߲ߘߊߟߌ ߞߊ߲߬߸ ߊ߬ ߣߌ߫ ߦߋߢߐ߲߯ߠߊ ߘߊ߲ߘߊߟߌߟߊ ߦߴߊ߲ߠߎ߬ ߡߍ߲ ߠߎ߬ ߘߌ߫، ߊ߲ ߓߍ߯ ߟߊߘߍ߬ߣߍ߲ ߦߋ߫ ߡߌ߬ߙߌ߲߬ߘߌ ߟߊ߫ ߖߊ߲߬ߞߊߙߏ ߟߋ߬ ߓߊߛߌ߫ ߞߏ ߘߐ߫߸ ߞߵߊ߬ߟߎ߬ ߟߊߝߙߍ߫߸ ߞߊ߬ ߡߐ߱ ߟߎ߫ ߡߊ߬ߞߏߢߊ߬، ߣߴߊ߬ ߘߏ߲߬ ߕߏߣߴߏ߬ ߟߋ ߡߊ߬߸ ߊ߲ߠߎ߬ ߡߊ߲߫ ߞߊ߲߫ ߞߊ߬ ߞߍ߫ ߢߐ߲߮ ߛߌ߬ߣߊ߬ ߘߌ߫، ߊ߲ ߞߊ߫ ߞߊ߲߫ ߞߊ߬ ߞߍ߫ ߓߊ߯ߙߊߢߐ߲߯ߡߊ ߟߋ߬ ߘߌ߫߸ ߊ߲ ߞߊ߫ ߞߊ߲߫ ߞߵߊ߲ ߓߟߏ ߟߋ߬ ߘߏ߲߬ ߢߐ߲߮ ߓߟߏ߫ ߓߊ߯ߙߊ ߣߌ߲߬ ߞߣߐ߫߸ ߛߊ߫ ߖߌ߬ߣߍ߫ ߡߌ߬ߙߌ߲߬ߘߌ ߘߌ߫ ߟߊߝߙߍ߫ ߢߊ ߡߍ߲ ߡߊ߬߸ ߊ߬ߟߎ߬ ߟߊ߫ ߖߊ߲߬ߞߊߙߏ ߞߣߐ߫.>>

ߞߏ߲߬ߓߏ ߝߊ߬ߞߏߟߌ߫ ߞߙߏ߬ߡߊ߫ ߕߘߍ߬ ߞߣߍ ߞߊ߲߬߸ ߊ߬ߟߋ ߡߍ߲ ߞߊ߬ ߞߊ߲ߞߊ߲߫ ߜߋߙߋ߲ߜߋߙߋ߲ߧߊ ߗߋߕߌ߯ߘߊ ߞߐߦߌ߬ߘߊ߫ ߟߊ߬ߞߐ߰ߟߌ߬ ߘߊߞߎ߲ ߣߌ߲߬ ߘߐ߫߸ ߏ߬ ߞߊ߬ ߡߙߌߦߊ ߣߌ߲߬ ߝߏ߬߸ ߞߵߊ߬ߟߎ߬ ߞߎߟߎ߲ߖߋ߫߸ ߓߊߏ߬ ߞߏ߫ ߊ߬ ߕߐ߬ߣߐ ߞߊ߫ ߓߏ߲߬ ߡߌ߬ߙߌ߲߬ߘߌ ߡߊ߬، ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߕߣߐ߬ߓߊ߫ ߟߋ߬ ߦߋ߫ ߝߘߊ߬ߝߌ߲߬ ߓߊ߬ߛߌ߬ߓߐ߬ߟߊ ߟߎ߬ ߣߌ߫ ߞߎ߬ߞߎߘߊ ߘߊ߲ߘߊߟߌߟߊ ߟߎ߬ ߟߊ߫ ߞߏߟߊߘߍߢߐ߲߯ߦߊ ߟߊ߫، ߞߊ߬ߕߎ߲߯߸ ߞߊߘߌߓߊ߯ߕߐ ߛߌߦߊߡߊ߲߫ ߠߋ߬ ߦߋ߫ ߕߊ߯ ߟߊ߫ ߘߊ߲ߘߊߛߏ ߟߎ߬ ߟߊ߫߸ ߏ߬ ߟߎ߬ ߘߌ߫ ߓߊ߲߫ ߞߵߊ߬ߟߎ߬ ߞߐߛߊ߬ߦߌ߲߬ ߦߋߢߐ߲߯ߠߊ ߘߊ߲ߘߊߟߌߟߊ ߟߎ߫ ߡߊ߬߸ ߏ߬ ߘߏ߲߬ ߝߊ߲߬ߓߊ ߦߋ߫ ߞߍ߲ߘߍߦߊ߫ ߟߊ߫.

<<ߓߌ߭ߓߌ߭ ߡߍ߲߬ ߘߐ߫߸ ߤߊߟߌ߬ ߘߊ߲ߘߊߛߏ ߟߋ߬߸ ߡߐ߰ ߛߌߦߊߡߊ߲߫ ߦߴߊ߬ ߝߐ߫ ߟߊ߫ ߦߋ߲߬߸ ߊ߲ ߧߋ߫ ߥߊ߫߸ ߘߊ߲ߘߊߛߏ߫ ߟߊ߫ ߖߊ߲ߞߊߙߏ߫ ߕߍ߫، ߊ߬ߟߎ߬ ߓߊ߯ ߥߊ߫ ߏ߬ ߘߐ߫߸ ߊ߲ ߧߴߊ߬ ߦߋ߫ ߟߊ߫߸ ߊߟߎ߬ ߦߋ߫ ߞߍ߲ߘߍߦߊ ߛߐ߬ߘߐ߲߬ ߠߊ߫، ߏ߬ ߘߐ߫߸ ߊ߲ ߘߌ߫ ߓߊߙߌߞߊ߫ ߓߌ߬ߟߴߊ߬ߟߎ߬ ߦߋ߫. ߊ߬ ߓߍ߯ ߟߊߣߍ߲߫ ߡߍ߲ ߞߊ߲߬߸ ߊ߬ߟߴߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߊ߬ߟߎ߬ ߦߋ߫ ߓߍ߲߬، ߊ߬ߟߎ߬ ߓߍ߯ ߦߋ߫ ߡߌ߬ߙߌ߲߬ߘߌ߬ ߞߋߟߋ߲ ߢߌ߲߬ ߠߋ߬ ߟߊ߫ ߡߞߊߘߊ߲߫ ߠߊ߫.>>

ߛߟߊߕߌ߯ ߖߊ߲߬ߕߎ߬ ߡߘߎ ߞߐ߲ߘߍ߫ ߟߋ߬ ߦߋ߫ ߞߙߎߝߓߊ ߞߊ߲ߕߌ߮ ߘߌ߫߸ ߏ߬ ߞߊ߬ ߢߊߝߐߟߌ߫ ߞߍ߫ ߞߊ߬ ߓߍ߲߬ ߞߙߎߝߓߊ ߟߊ߫ ߟߊ߬ߞߐ߰ߟߌ߬ ߞߏ ߣߌ߲߬ ߘߊߡߌ߬ߣߊ߬ ߢߊ ߡߊ߬. 

<<ߝߘߊ߬ߝߌ߲߬ ߓߊ߬ߛߌ߬ߓߐ߬ߟߊ߫ ߕߎ߲߬ ߕߴߦߋ߲߬߸ ߡߍ߲ ߠߎ߬ ߕߘߍ߬ ߢߐ߲߮ ߠߊߞߐ߯ ߟߊ߫، ߓߍ߯ ߕߘߍ߬ ߊ߬ ߞߊ߲߬ ߦߋ߲߬ ߕߋ߲߬ ߠߋ߬߸ ߒ ߞߵߊ߬ ߡߍ߲߫ ߒ ߝߊ߬ ߟߋ߬ ߟߊ߫߸ ߒ ߞߵߊ߬ ߡߍ߲߫ ߒ ߓߋ߲ߓߊ߫ ߟߋ߬ ߟߊ߫، ߒߠߋ ߖߍ߬ߘߍ ߞߵߊ߬ ߕߊ߬ ߗߍ ߟߋ߬ ߘߐ߫߸ ߏ߬ ߟߋ ߕߍ߬ߘߍ߫ ߦߋ߲߬.>>

ߓߊ߬ߙߌ߬߸ ߊ߬ߟߋ ߟߊ߫ ߛߍ߬ߘߏ߲ ߞߏߛߐ߲߬߸ ߟߊ߬ߞߐ߰ߟߌ ߛߋ߫ ߘߊ߫ ߘߊߡߌ߬ߣߊ߬ ߟߊ߫ ߝߘߊ߬ߝߌ߲߬ ߓߊ߬ߛߌ߬ߓߐ߬ߟߊ ߟߎ߬ ߣߌ߫ ߢߐ߲߯ ߕߍ߫، ߊ߬ߟߋ߬ ߟߊ߬ߞߐ߰ߟߌ ߘߏ߲߬ ߓߘߊ߫ ߞߍ߫ ߕߙߎ߬ ߘߌ߫߸ ߊ߬ ߕߘߍ߬ߒ߬ߘߐ߬ߓߊ߮ ߟߎ߬ ߓߍ߯ ߓߘߊ߫ ߛߴߊ߬ߟߎ߫ ߖߘߍ߬ ߞߘߐ߫، ߏ߬ ߘߐ߫߸ ߞߙߎߝߓߊ ߟߊ߫ ߟߊ߬ߞߐ߰ߟߌ ߕߊߟߊ߲ ߓߊ߯ ߜߊ߬ߛߌ߫ ߝߊ߲߬ ߛߌ߫߸ ߓߍ߯ ߘߌ߫ ߛߐ߬ߘߐ߲߫ ߊ߬ ߘߐ߫.

ߞߊ߲ߞߊ߲߫ ߞߣߐ߫ ߏ߬ ߘߐ߫ ߕߋ߲߬߸ ߞߎߡߊ߫ ߝߌ߬ߟߊ߬ ߕߍ߫߸ ߞߋߟߋ߲߫ ߔߋ߫ ߟߋ߬: ߞߊ߬ ߛߋ߫ ߦߋߢߐ߲߯ߠߊ߫ ߞߘߐ߬ߡߊ߲ ߠߎ߬ ߦߟߍ߬ߡߊ߲߬ ߠߊ߫ ߞߵߊ߬ߟߎߎ߫ ߓߍ߲߬ ߘߎߢߊ߫ ߛߌ߰ߝߊߘߌ ߡߊ߬߸ ߞߊ߬ ߛߋ߫ ߦߋߢߐ߲߯ߠߊ ߘߊ߲ߘߊߟߌ ߞߍ߫ ߟߊ߫ ߝߘߊ߬ߝߌ߲߬ ߘߊ߲ߘߊߟߌ ߘߌ߫߸ ߛߊ߫ ߞߍ߲ߘߍߦߊ ߘߌ߫ ߟߊߕߊ߲߬ߞߊ߬ ߢߊ߫ ߡߊ߬߸ ߡߍ߲ ߣߌ߫ ߞߊ߬ߞߎߘߊ ߘߊ߲ߘߊߟߌ ߘߌ߫ ߥߊ߫ ߢߐ߲߯ ߝߍ߬.