ߝߏߘߋ߫ ߟߊ߲߱ߛߌ߬ߣߍ߬ ߞߋߕߊ߬ ߡߍ߲ ߦߋ߫ ߞߟߌ߫ ߟߊ߫ ߞߏ߫ ߡߊ߲߬ߘߋ߲߬ ߝߏߘߋ߫߸ ߝߙߋߞߋ ߟߋ߬ ߦߴߏ߬ ߣߌ߫ ߡߙߊߡߊ߫ ߛߙߋ߫ ߞߊ߬ߓߊ ߕߍ߫߸ ߊ߬ߟߋ ߡߍ߲ ߝߣߊ߫ ߦߋ߫ ߞߟߌ߫ ߟߊ߫ ߞߏ߫ ߟߊ߬ ߟߌߦߐߣ، ߒ߬ߓߊ߬߸ ߏ߬ ߟߋ ߞߕߌ ߕߎ߲߬ ߦߴߌߘߐ߫ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߊ߫߸ ߏ߬ ߟߎ߫ ߣߐ߬ ߏ߬ ߟߋ ߞߕߌ ߕߍ߰ ߟߊ߫ ߓߌ߬ ߛߌ߬ߣߌ߲߬ߟߏ߲ ߣߌ߲߬ ߡߊ߬ ߂߀߂߆ ߞߊ߬ߙߌ߬ߝߐ ߕߋ߬ߟߋ߫ ߃، ߞߕߌߘߊ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߘߋ߲߬ ߝߏߘߋ߫ ߛߐ߲߬ ߡߊ߫ ߦߋ߫ ߟߊ߬ ߟߌߦߐߣ ߕߐ߯ߕߌߢߍ߫ ߞߏ ߘߐ߫.
ߊߟߎ߫ ߦߴߊ߬ ߟߐ߲߫߸ ߓߌ߬ߟߊ߬ ߞߍ߫ ߘߊ߫ ߡߊ߲߬ߘߋ߲߬ ߝߏߘߋ߫ ߞߐ߫ ߊ߬ ߟߊ߫ ߘߐ߲߬ߞߟߌ ߘߏ߫ ߟߋ߬ ߟߊߓߐ ߞߐߝߍ߬߸ ߡߍ߲ ߕߐ߯ ߊ߬ ߓߟߏ߫ ߞߏ߫ <<ߞߊߙߑߕߌߦߋ ߟߊ߬ ߜ߭ߑߙߊ߲ߘ>>، ߘߐ߲߬ߞߟߌ ߏ߬ ߟߋ ߘߐ߫߸ ߊ߬ ߦߋ߫ ߡߛߏ߬ ߝߘߎߓߊߟߌ ߟߎ߬ ߟߊߟߌ߫ ߟߊ߫߸ ߊ߬ ߣߌ߫ ߘߋ߲ߡߛߏߣߍ߲ ߡߍ߲ ߠߎ߬ ߕߍ߫ ߛߍ߬ߓߍ߫ ߡߌ߬ߣߊ߬ ߟߊ߫، ߊ߬ ߟߊ߫ ߘߐ߲߬ߞߟߌ ߏ߬ ߟߋ ߘߐ߫ ߛߍߣߍ߲߬߸ ߊ߬ ߞߵߊ߬ ߝߐ߫ ߞߏ߫ <<ߓߊߖߍ߯ ߟߊߞߘߎ>> ߏ߬ ߟߋ ߞߎߡߊ ߡߊ߫ ߟߊ߫ ߟߊ߬ ߟߌߦߐߣ ߞߊ߲߬߸ ߏ߬ ߞߊ߬ ߘߐ߲߬ߞߟߌ ߦߙߐ ߘߏ߫ ߟߎ߫ ߖߌ߰ ߊ߬ߟߋ ߞߏ߫ ߘߌ߫، ߏ߬ ߞߏߛߐ߲߬߸ ߊ߬ ߞߵߊ߬ ߡߊߞߊ߬ߛߌ߫ ߡߊ߲߬ߘߋ߲߬ ߝߏߘߋ߫ ߞߊ߲߬.
ߞߎߡߊ߫ ߛߌߦߊߡߊ߲ ߠߎ߬ ߞߐ ߘߐ߫߸ ߦߏ߫ ߊ߲ ߠߊ߫ ߝߐ߰ߓߍ߫ ߕߊ߬ߡߌ߲߬ߣߍ߲ ߠߎ߬ ߞߵߏ߬ ߟߎ߬ ߢߊߝߐ߫ ߊߟߎ߫ ߦߋ߫ ߢߊ ߡߍ߲ ߡߊ߬، ߒ߬ߓߊ߬߸ ߓߌ߬ ߛߌ߬ߣߌ߲߬ߟߏ߲ ߞߕߌ ߝߍ߬߸ ߡߞߊ߬ߛߌ߬ߓߊ߰ߕߐ߫ ߟߊ߬ ߟߌߦߐߣ ߢߊ ߡߊ߫ ߓߐ߫ ߜߍ ߘߐ߫.
ߞߵߊߟߎ߫ ߦߟߌߓߌ߬ߟߊ߬߸ ߞߕߌ ߡߍ߲ ߞߍ߫ ߘߊ߫ ߥߊ߬ߛߌ߬ߥߙߊ ߕߟߋ߬ ߃߀ ߕߊ߬ߡߌ߲߬ߣߍ߲ ߡߊ߬߸ ߡߊߙߌߦߡߊ߫ ߛߌߙߋ߫ ߞߊ߬ߓߊ ߞߵߊ߬ ߟߊ߫ ߓߟߏߓߐߟߌ߫ ߛߓߍ ߦߌ߬ߘߊ߫ ߟߋ߬ ߦߋ߲߬߸ ߞߊ߲ߞߊ߲߫ ߘߋ߲ߡߌߛߍ߲ ߘߏ߫ ߟߎ߫ ߟߊ߫ ߕߍߝߐ ߞߐ ߘߐ߫.
ߏ߬ ߓߍ߯ ߣߴߊ߬ ߕߊ߫߸ ߞߕߌ ߡߊ߫ ߟߊߟߐ߬، ߒ߬ߓߊ߬߸ ߞߕߌ ߏ߬ ߟߋ ߕߍ߰ߣߍ߲߫ ߓߌ߬߸ ߞߊ߬ ߓߍ߲߬ <<ߖߏ߯ߘߏ߲ ߞߕߌ>> ߡߊ߬߸ ߞߕߌߘߊ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߘߋ߲߬ ߝߏߘߋ߫ <<ߛߐ߲߬ ߡߊ߫ ߦߋ߫ ߕߐ߯ߕߌߢߍߟߌ߫ ߞߏ ߘߐ߫߸ ߏ߬ ߡߍ߲ ߘߏ߬ߣߌ߲ ߛߌ߰ߣߍ߲߫ ߕߍ߬ߘߍ߫ ߊ߬ ߞߎ߲߬، ߏ߬ ߘߐ߫߸ ߣߐ߬ߝߍ߬ߜߍ߲߬ߠߌ߲߬ ߞߏ ߓߘߊ߫ ߛߴߊ߬ ߘߊ߲߭ ߠߊ߫߸ ߞߵߏ߬ ߞߎ߲߭ ߞߍ߫ ߘߊ߬ߟߎ߫ ߛߐ߬ߘߐ߲߬ߓߊߟߌߦߊ ߘߴߊ߬ ߡߊ߬.>> ߏ߬ ߝߐ߫ ߘߊ߫ ߞߕߌߕߍ߯ߟߊ ߟߋ߬ ߓߟߏ߫߸ ߡߊߡߊߘߎ߫ ߛߋߟߎ߬ ߖߊߟߏ߫.
ߞߕߌߘߊ ߞߵߊ߬ ߦߌ߬ߘߊ߬ ߞߏ߫ ߟߊ߬ ߟߌߦߐߣ ߞߵߊ߬ ߓߟߏߓߐ ߡߍ߲ ߞߍ߫ ߞߏߢߊ ߘߐ߫߸ ߊ߬ߟߎ߬ ߓߘߴߏ߬ ߡߌ߬ߣߊ߬، ߊ߬ߟߎ߬ ߓߊ߲߫ ߘߊ߫ ߞߊ߬ ߕߟߋ߬ ߕߊ߲ߣߌߟߏ߯ߟߎ߫ ߘߌ߫ ߓߍ߯ ߡߊ߬߸ ߣߌ߫ ߡߍ߲ ߡߊ߫ ߓߍ߲߬ ߞߕߌ ߡߊ߬߸ ߏ߬ ߘߌ߫ ߛߋ߫ ߞߕߌ ߡߊߛߊ߬ߦߌ߲߬ ߞߏ ߟߊߢߌߣߌ߲߫ ߠߊ߫.
ߞߕߌ ߕߍ߱ ߣߐ߬ ߞߟߊߡߊ߲ ߏ߬ ߘߐ߫߸ ߝߘߏ߬ߓߊ߬ ߞߏߕߌ߯ߘߊ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊ߫ ߓߍ߲߬ ߞߕߌ ߡߊ߬، ߡߊߡߊߘߎ߫ ߛߊߟߌߥߎ߬ ߓߊ ߡߍ߲ ߦߋ߫ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߣߐ߬ߞߊ߲߬ߛߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊ߫ ߓߍ߲߬ ߞߕߌߕߍ߯ߟߊ ߟߊ߫ ߞߕߌ ߕߌ߰ ߢߊ ߡߊ߬.
<<ߊ߲ ߓߘߊ߫ ߞߕߌ ߡߊߛߊ߬ߦߌ߲߬ ߞߏ ߟߊߢߌߣߌ߲߫ ߡߙߌߘߐ߫ ߕߊ߬ߣߍ߲ ߞߊ߲ߡߊ߬، ߟߏ߲߫ ߣߊ߬ߕߐ ߟߎ߬ ߘߐ߫߸ ߛߌߞߊ߫ ߕߴߊ߬ ߘߐ߫ ߞߕߌ ߘߌ߫ ߡߊߛߊ߬ߦߌ߲߬ ߞߵߊ߬ ߟߊߛߋ߫ ߞߕߌ߫ ߡߛߊߦߌ߲ߘߊ ߟߊ߫.>>
ߞߕߌߞߊ߲ߘߊ ߣߐ߬ߞߊ߲߬ߛߌ߮ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ ߝߐ ߞߏ߫ ߡߙߊߡߊ߫ ߛߙߋ߫ ߕߐ߯ ߡߊ߫ ߝߐ߫߸ ߏ߬ ߡߊ߫ ߘߊ߬ߟߎ߬ ߓߐ߫ ߕߐ߯ߕߌߢߍߟߌ ߞߎ߲߬ߞߏ߬ߕߐ߬ߦߊ ߘߐ߫ ߘߋ߬، ߓߊߏ߬߸ ߊ߬ߟߋ ߟߊ߫ ߝߐߟߌ߫ ߘߐ߫߸ ߣߌ߫ ߞߎߡߊ߫ ߝߐߣߍ߲ ߞߍ߫ ߘߊ߫ ߛߊߓߎ߫ ߘߌ߫߸ ߡߐ߱ ߟߎ߬ ߞߊ߬ ߡߐ߱ ߟߊߞߏߟߐ߲߫ ߊ߬ ߘߐ߫ ߞߵߊ߬ ߟߐ߲߫ ߥߟߊ߫ ߞߵߊ߬ ߝߐ߫ ߞߏ߫ ߞߊ߬ߘߌ߬ߛߊ߫ ߟߋ߬ ߞߏ߫ ߦߋ߫߸ ߏ߬ ߦߋ߫ ߕߐ߯ߕߌߢߍߟߌ ߘߊ߲ߟߎ ߟߋ߬ ߘߌ߫.
<<ߡߊ߬ߞߏ ߦߋ߫ ߡߍ߲ ߠߊ߫߸ ߟߊ߬ߡߍ߲߬ߠߌ߲߬ߠߊ ߟߎ߬߸ ߥߟߊ߫ ߘߐ߬ߞߙߊ߲߬ߠߌ߲߬ߠߊ ߟߎ߬ ߓߊ߯ ߡߐ߰ ߞߘߐߡߊߕߍ߰ߣߍ߲ ߟߐ߲߫ ߊ߬ ߘߐ߫ ߌߞߘߐ߫߸ ߊ߬ߟߋ ߟߵߏ߬ ߘߌ߫.>>
ߊ߬ ߞߵߊ߬ ߦߌ߬ߘߊ߬ ߞߏ߫ ߓߟߐߟߐ߫ ߞߊ߲߫ ߡߐ߮ ߟߎ߬ ߣߌ߫ ߡߊ߲߬ߘߋ߲߬ ߝߏߘߋ߫ ߞߊ߬ߣߌ߲߬ߓߊ߮ ߘߏ߫ ߟߎ߫ ߘߏ߲߬ ߕߎ߲߬ ߓߘߊ߫ ߘߐ߲߬ߞߟߌ ߣߌ߫ ߡߙߊߡߊ߫ ߛߙߋ߫ ߖߌ߬ߦߊ߬ߓߍ ߣߙߊ ߘߊߡߌ߬ߣߊ߬ ߢߐ߲߮ ߠߊ߫ ߊ߬ߟߎ߬ ߟߊ߫ ߟߊ߬ߖߍ߲߬ߛߍ߲߬ߠߌ߲ ߠߎ߬ ߘߐ߫، ߏ߬ ߟߋ ߘߐ߫߸ ߞߕߌߓߋߟߋ߲ ߞߊ߲߫ ߘߊ߬ߟߎ߫ ߟߋ߬ ߏ߬ ߟߎ߬ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߘߋ߲ߡߛߏ ߟߋ߬ ߕߐ߮ ߕߌߢߍߣߍ߲߫.
<<ߊ߲ ߡߊ߫ ߛߐ߲߬ ߡߙߌߘߐ߫ ߕߊ߬ߣߍ߲ ߡߊ߬، ߊ߲ ߘߏ߲߬ ߟߊߣߴߊ߬ ߟߊ߫߸ ߣߌ߫ ߞߕߌ ߥߊ߫ ߘߊ߫ ߟߊ߫ ߛߊ߬ߙߌ߬ߦߊ߬ߓߊ߰ߙߟߊ߬ ߜߘߍ߫ ߢߊߞߘߐ߫ ߝߋߎ߫߸ ߞߏ ߘߌ߫ ߥߟߏ߫ ߊ߬ ߢߊߖߎ߮ ߡߊ߬.>>
ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߞߕߌ ߡߊ߫ ߓߊ߲߫ ߡߎߣߎ߲߬ ߝߋߝߋ߫، ߊ߬ ߞߊ߫ ߞߊ߲߫ ߞߊ߬ ߘߐߢߌߣߌ߲߫ ߞߕߌ߫ ߡߛߊߦߌ߲ߘߊ ߟߊ߫ ߡߎߣߎ߲߬.
ߡߊ߬ߞߊ߲߬ߞߊ߲߬ߠߌ߲߬ߠߊ ߟߎ߬ ߟߊ߫ ߞߎ߲߬ߠߊ߫߸ ߞߊ߬ߙߊ߲߬ߡߐ߯ ߡߏ߬ߤߊ߬ߡߍߘ ߂߲ ߞߙߎ߬ߡߊ߬ ߡߍ߲ ߦߋ߫ ߟߊ߬ߝߛߊ߬ߟߌ߬ߟߊ߫ ߘߌ߫ ߖߌ߬ߣߍ߫ ߟߊ߬ߝߛߊ߬ߟߌ߬ ߕߐ߲ ߘߐ߫߸ ߏ߬ ߡߴߊ߬ ߟߊ߫ ߛߍߥߊ ߘߏ߲߰ ߣߌ߲߬ ߞߏ ߘߐ߫.
<<ߣߌ߲߬ ߦߋ߫ ߛߍߥߊ ߣߌ߫ ߞߎ߲߬ߠߊ߬ߦߋߙߋ߲ ߠߋ߬ ߘߌ߫، ߞߕߌ ߣߌ߲߬ ߘߐ߫߸ ߊ߬ ߟߊߓߊ߲ߣߍ߲߫ ߛߊ߬ߙߌ߬ߦߊ ߕߊ ߟߋ߬ ߡߊ߬، ߞߕߌ ߕߍ߰ߣߍ߲߫ ߢߊ ߡߍ߲ ߡߊ߬߸ ߛߊ߬ߙߌ߬ߦߊ߫ ߞߵߊ߬ ߝߐ߫ ߕߋ߲߬ ߠߋ߬.>>
ߟߊ߬ߝߛߊ߬ߟߌ߬ߟߊ ߞߵߊ߬ ߦߌ߬ߘߊ߬ ߞߏ߫ ߞߕߌ ߣߌ߲߬ ߘߐ߫ <<ߡߙߌߘߐ߫ ߖߐ߲ߖߐ߲>> ߠߋ߬ ߕߊ߬ ߘߊ߫ ߝߋߝߋ߫߸ ߊ߬ ߣߌ߫ <<ߡߐ߰ ߘߌ߫ ߞߕߌ ߕߍ߰ ߢߊ ߕߊ߲߬ߘߏ߬>>، ߏ߬ ߟߋ ߘߐ߫߸ ߊ߬ ߞߊ߬ ߞߕߌߕߍ߯ߟߊ߫ ߡߊߡߊߘߎ߫ ߛߊߟߌߥߎ߬ ߖߊߟߏ߫ ߝߏ߬߸ ߊ߬ ߣߊ߬ ߘߊ߫ ߕߏ߫ ߝߏ߬ߟߌ ߟߊߛߋ߫ ߟߴߊ߬ ߘߍ߬ߢߐ߲߯ ߝߌ߬ߟߊ ߡߊ߬ ߡߞߊ߬ߘߊ߲߬ߠߌ߲ ߢߌ߲߬ ߘߐ߫߸ ߣߊߟߌ߬ߡߎ߲߫ ߞߊ߬ߙߊ߲߬ߡߐ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߌ߫ ߞߌ߬ߣߊ ߌߓߙߊߤߌߡߊ߫ ߞߊߟߌߟ ߞߊ߲ߕߍ߫ ߘߌ߫߸ ߊ߬ߟߎ߬ ߟߊ߫ ߘߏ߫ ߞߍ ߞߏߛߐ߲߬ ߞߕߌ ߣߌ߲߬ ߘߐ߫.
ߞߕߌ ߞߐ ߘߐ߫߸ ߡߊ߲߬ߘߋ߲߬ ߝߏߘߋ߫ ߓߐ ߡߍ߲ ߞߍ߫ ߘߊ߫߸ ߊ߬ ߝߣߊ߫ ߞߵߊ߬ ߟߊ߫ ߛߍߥߊ ߦߌ߬ߘߊ߬:
<<ߊߟߊ߫ ߓߊߙߌߞߊ߫߸ ߊ߬ ߞߏ ߓߘߊ߫ ߓߊ߲߫، ߊ߰ ߝߐ߫ ߟߊ߫ ߞߏ߫ ߞߏ߫ ߕߍ߫ ߟߐ߲߫߸ ߣߌ߫ ߞߏ߫ ߡߊ߫ ߞߍ߫، ߊ߲ ߓߘߊ߫ ߞߊ߲ߞߊ߲߫ ߟߐ߲߫߸ ߞߊ߬ ߞߊ߲ߞߊ߲ߞߊ ߟߎ߫ ߥߊ߬ߣߌ߲߬ߞߋ ߟߐ߲߫߸ ߞߊ߬ ߓߍ߲߬ ߕߋߟߋ߲ߓߊߟߌߦߊ ߞߍ߬ߟߍ ߡߊ߬، ߊ߲ ߧߋ߫ ߓߍ߯ ߟߊߘߍ߬ߣߍ߲ ߝߏ߬ ߟߊ߫.>> ߊ߬ ߞߵߏ߬ ߦߌ߬ߘߊ߬.
ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߡߊ߲߬ߘߋ߲߬ ߝߏߘߋ߫ ߞߊ߲߫ ߞߏ߫ ߣߌ߲߬ ߞߏ ߓߘߊ߫ ߓߊ߲߫߸ ߓߊ߬ߙߌ߬ ߛߊ߬ߙߌ߬ߦߊ߬ ߞߊ߲߫ ߞߏ߫ ߊ߬ ߞߏ ߦߴߊ߬ ߡߊ߬ ߡߎߣߎ߲߬، ߓߊߏ߬߸ ߞߕߌߞߊ߲ߘߊ ߡߊ߫ ߓߍ߲߬ ߞߕߌ ߡߊ߬߸ ߊ߬ ߞߏ ߓߍߣߊ߬ ߟߊߘߏ߲߬ ߞߕߌ߫ ߡߛߊߦߌ߲ߘߊ ߟߊ߫.
Aucun commentaire pour le moment.