ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߣߐ߬ ߞߕߌ ߟߋ߬ ߕߍ߰ ߟߊ߫ ߛߌ߬ߣߌ߲߬ߟߏ߲ ߂߀߂߆ ߞߊ߬ߙߌ߬ߝߐ ߕߟߋ߬ ߃߁ ߡߊ߬߸ ߡߍ߲ ߦߋ߫ ߡߊ߬ߛߎ߬ߓߊ߬ߞߏ߫ ߘߌ߫߸ ߊ߬ ߣߴߊ߬ ߦߋ߫ ߢߍ߬ߣߍ߲߬ߡߊ߬ ߘߌ߫، ߓߌ߬ߟߊ߬ ߞߍߣߍ߲߫ ߘߋ߲ߡߛߏ߫ ߛߊ߲߬ ߁߅ ߘߏ߫ ߟߋ߬ ߞߐ߫߸ ߞߏ߫ ߊ߬ ߣߐ߬ ߊ߬ ߗߍ߬ ߎߛߑߡߊ߯ߣ ߖߊ߰ߣߍ ߟߋ߬ ߝߊ߰ ߟߊ߫߸ ߞߵߊ߬ ߛߐ߬ߘߐ߲߬ ߊ߬ ߛߌ߬ߞߛߊߓߌ ߦߋ߫ ߛߊ߲߬ ߁߃ ߘߐ߫ ߥߊ߯ߕߌ ߏ߬ ߟߊ߫߸ ߂߀߂߄ ߠߊ߫، ߒ߬ߓߊ߬߸ ߛߊ߬ߙߌ߬ߦߊ߬ ߟߊ߫ ߞߕߌ߫ ߕߍ߮ ߘߐ߫߸ ߊ߬ߟߎ߫ ߞߊ߬ ߛߊ߲߭ ߂ ߥߛߎߖߌ߲߫ ߓߊߟߊ߲ߣߍ߲ ߠߋ߬ ߟߴߊ߬ ߞߎ߲߬.

ߞߕߌ ߘߊߡߌ߬ߣߊ߬ ߘߊ߫ ߞߐ߬ߓߊ߬ߟߏ߲ ߠߋ߬߸ ߞߊ߬ߙߌ߬ߝߐ ߕߋ߬ߟߋ߫ ߂߇ ߡߊ߬، ߞߕߌߘߊ ߢߊߞߘߐ߫߸ ߘߋ߲ߡߛߏ ߞߵߊ߬ ߗߍ߬ ߝߊ߰ ߢߊ ߢߊߝߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߝߘߎ ߡߊ߫ ߘߌߦߴߊ߬ ߦߋ߫ ߢߊ߫ ߛߌ߫ ߟߋ߬ ߡߊ߬߸ ߓߊ߬ߙߵߊ߬ߟߎ߫ ߞߵߊ߬ ߞߘߊߡߊ߫ ߞߵߊ߬ ߘߌ߫ ߗߍ߭ ߡߊ߬.

<<ߒ ߠߊ߫ ߡߐ߱ ߟߎ߫ ߞߊ߬ ߒ ߘߌ߫ ߗߍ߭ ߣߌ߲߬ ߡߊ߬ ߟߋ߬߸ ߞߵߊ߬ ߛߐ߬ߘߐ߲߬ ߝߘߎ߫ ߞߏ ߡߊ߲߫ ߘߌ߫ ߒ ߧߋ߫، ߂߀߂߄ ߏ߬ ߞߵߊ߬ ߛߐ߬ߘߐ߲߬߸ ߒ ߛߊ߲߬ ߁߃ ߟߋ߬، ߊ߬ ߞߍ߫ ߘߊ߫ ߘߌߦߊߜߏߦߊ߫ ߝߘߎ ߟߋ߬ ߘߌ߫، ߒ ߞߊ߬ ߕߟߋ߬ ߕߊ߲ߣߌߞߋߟߋ߲߫ ߠߋ߬ ߞߍ߫ ߊ߬ߟߋ߬ ߝߘߎ ߘߐ߫، ߒ ߝߣߊ߫ ߞߍߢߊ ߟߵߏ߬ ߘߌ߫ ߞߊ߬ ߡߎ߬ߙߎ ߕߊ߬߸ ߞߵߊ߬ߟߋ߬ ߗߍ߭ ߛߐ߰ ߊ߬ ߞߣߐ ߘߐ߫ ߞߵߊ߬ ߛߐ߬ߘߐ߲߬ ߊ߬ ߟߊߣߍ߲߫ ߛߎ߬ߣߐ߮ ߘߐ߫، ߒ ߕߎ߬ߵ ߕߴߊ߬ ߝߊ߰ ߞߏ߫ ߘߐ߫ ߘߋ߬߸ ߞߏ߬ߣߌ߲߬ ߒ ߕߍ߬ߘߴߊ߬ ߝߍ߬ ߟߋ߬߸ ߊ߬ߟߋ߬ ߝߘߎ߫ ߞߏ ߕߎ߲߬ ߦߋ߫ ߓߐ߫ ߊ߬ ߡߊ߬߸ ߊ߬ ߕߘߍ߬ ߒ ߝߘߎߛߊ߬..>> ߊ߬ ߞߵߏ߬ ߟߊߛߋ߫.

ߘߋ߲ߡߛߏ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߡߐ߱ ߟߎ߫ ߓߊ߬߸ ߗߍ߭ ߟߊ߫ ߡߐ߱ ߟߎ߫ ߓߊ߬߸ ߊ߬ ߞߵߊ߬ߟߎ߬ ߝߐ߫ ߊ߬ߟߎ߬ ߓߍ߯ ߦߋ߫ ߟߋ߬ ߞߏ߫ ߊ߬ ߕߍ߫ ߝߘߎ ߘߐ߫، ߓߊ߬ߙߌ߬߸ ߏ߬ ߟߎ߬ ߡߊ߫ ߛߐ߲߬ ߝߘߎ߫ ߞߏ ߓߐ߫ ߟߴߊ߬ ߡߊ߬ ߝߋߎ߫، ߊ߬ ߞߵߊ߬ ߝߐ߫ ߊ߬ ߟߊ߫ ߛߙߊ߬ߣߎ߲ ߘߐ߫ ߝߣߊ߫߸ ߞߏ߫ ߊ߬ ߞߊ߬ ߕߙߐߦߊ ߘߏ߫ ߟߎ߫ ߛߐ߬ߘߐ߲߬ ߊ߬ ߟߊ߫ ߕߟߋ߬ ߁߁ ߗߍ߬ߓߏ߲߬ߠߊ߬ߛߌ߮ ߏ߬ ߞߣߐ߫߸ ߝߊ߬ߘߌ߬ ߞߟߏ ߕߊ߫ ߓߟߏ ߡߊ߬߸ ߊ߬ ߣߌ߫ ߤߊߟߌ߬ ߓߏ߲ߠߊߛߌ߮ ߝߣߊ߫ ߕߊ߫ ߓߟߏ ߡߊ߬، ߊ߬ ߞߵߏ߬ ߡߍ߲ ߕߊ߬ߡߌ߲߬ ߢߊ ߟߎ߬ ߢߊߝߐ߫ ߊ߬ ߟߊ߫ ߞߕߌ ߞߎ߲߬ߕߊ߮ ߞߣߐ߫.

ߊ߬ ߞߎߡߊ߫ ߘߊ߫ ߞߵߊ߬ ߛߐ߬ߘߐ߲߬ ߊ߬ ߢߊߖߌ ߦߋ߫ ߓߐ߫ ߟߊ߫߸ ߞߊ߬ ߦߊ߬ߝߊ ߕߙߊ߫ ߞߕߌߘߊ ߝߍ߬: <<ߒ ߓߘߊ߫ ߣߡߌߛߊ߫ ߣߌ߲߬ ߞߏ ߘߐ߫ ߞߏߛߓߍ߫߸ ߒ ߧߋ߫ ߦߊ߬ߝߊ ߕߙߊ߫ ߟߊ߫ ߓߍ߯ ߟߊߘߍ߬ߣߍ߲ ߝߍ߬، ߛߊ߬ߙߌ߬ߦߊ߬ ߝߣߊ߫ ߦߋ߫ ߦߊ߬ߝߊ߫ ߒ ߡߊ߬.>>

ߘߋ߲ߡߛߏ ߟߊ߫ ߡߐ߱ ߘߏ߫ ߞߵߊ߬ ߦߌ߬ߘߊ߬߸ ߊ߬ ߝߐ߫ ߘߊ߫ ߞߏ߫ ߊ߬ ߓߏߙߌ߲ߗߍ߫ ߟߋ߬ ߗߍ߭ ߏ߬ ߘߌ߫، ߏ߬ ߞߊ߲߫ ߞߏ߫ ߘߋ߲ߡߛߏ ߘߐ߰ߡߊ߬ߣߍ߲ ߠߋ߬ ߡߊߡߌ߬ߣߊ߬ ߘߊ߫߸ ߞߊ߬ߦߌ߯ ߊ߬ ߛߐ߬ߘߐ߲߬ ߛߊ߲߬ ߞߎߘߊ߸ ߞߏ߫ ߊ߬ ߞߊ߫ ߞߊ߲߫ ߞߊ߬ ߘߌ߫ ߎߛߑߡߊߣߌ߲߬ ߖߊ߰ߣߍ ߟߋ߬ ߡߊ߬ ߝߘߎ߫ ߟߊ߫.

ߘߋ߲ߡߛߏ ߣߌ߲߬ ߦߋ߫ ߝߌ߬ߟߊ߬ߣߍ߲ ߠߋ߬߸ ߊ߬ ߓߐ߫ ߕߍ߬ߘߍ߫ ߗߍ߭ ߟߋ߬ ߘߌ߫، ߒ߬ߓߊ߬߸ ߊ߬ ߓߐ߫ ߟߊ߫ ߛߊ߬ߦߊ ߞߐ ߘߐ߫߸ ߘߋ߲ߡߛߏ ߟߊ߫ ߡߐ߱ ߟߎ߫ ߞߵߊ߬ ߦߌ߬ߘߊ߬ ߞߏ߫ ߣߴߊ߬ ߛߋ߫ ߘߊ߫ ߝߘߎ ߡߊ߬߸ ߊ߬ ߘߌߕߐ߫ ߎߛߑߡߊߣߌ߲߬ ߖߊ߰ߣߍ ߟߋ߬ ߡߊ߬.

<<ߘߋ߲ߕߛߏ ߓߏ߲߬ߧߊ ߡߍ߲ ߞߍߣߍ߲߫ ߏ߬ ߘߐ߫߸ ߊ߬ ߞߵߊ߬ ߓߊ߲߬ ߝߘߎ߫ ߞߏ ߏ߬ ߟߋ ߡߊ߬، ߊ߲ ߠߊ߫ ߘߎ߰ߣߍ߲ ߘߏ߲߬ ߞߣߐ߫߸ ߘߋ߲ߡߛߏߣߍ߲߫ ߛߌߦߊߡߊ߲߫ ߦߋ߫ ߘߌ߫ ߟߊ߫ ߟߋ߬ ߢߊ ߏ߬ ߡߊ߬، ߊ߬ ߘߏ߲߬ ߛߌߦߊߡߊ߲ ߦߋ߫ ߞߎ߲߫ ߠߴߊ߬ߟߎ߬ ߟߊ߫ ߝߘߎ ߞߣߐ߫، ߓߊ߬ߙߌ߬߸ ߘߐ ߣߌ߲߬ ߕߊ ߘߐ߫߸ ߊ߬ߟߋ ߡߊ߫ ߛߋ߫ ߞߎ߲߫ ߠߊ߫.>> ߊ߬ ߞߵߏ߬ ߢߊߝߐ߫.

ߣߌ߲߬ ߞߏ ߓߍ߯ ߓߊ߲ ߞߐ ߘߐߢߌߡߌ߲߫ ߠߊ߫ ߛߊ߬ߙߌ߬ߦߊ߬ ߓߟߏ߫߸ ߊ߬ߟߎ߫ ߞߵߊ߬ ߦߋ߫ ߞߏ߫ ߘߋ߲ߣߍ߲ ߠߋ߬ ߘߋ߲ߡߛߏ ߘߌ߫߸ ߊ߬ߟߎ߫ ߞߵߊ߬ ߦߋ߫ ߞߏ߫ ߊ߬ ߛߐ߲߭ ߦߋ߫ ߣߌ߲߬ ߞߏ ߘߐ߫، ߏ߬ ߘߐ߫߸ ߊ߬ߟߎ߫ ߞߊ߬ ߛߊ߲߭ ߝߌ߬ߟߊ߬ ߥߛߎ߫ ߟߋ߬ ߟߴߊ߬ ߞߎ߲߬، ߞߊ߬ߕߎ߲߯߸ ߞߏ߫ ߞߏ ߞߍ߫ ߕߎߡߊ ߞߵߊ߬ ߛߐ߬ߘߐ߲߫ ߠߋ߬߸ ߊ߬ ߦߋ߫ ߘߋ߲ߣߍ߲ ߖߍ߬ߘߍߖߍ߬ߘߍ ߟߋ߬ ߘߌ߫.

ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ߸ ߡߊ߬ߡߊ߬ߘߌ߬ ߂߲ ߞߋ߬ߓߋ ߞߊ߬ ߡߙߌߘߐ ߓߐ߫ ߦߙߐ ߝߐ߫:

<<ߓߌ߬ ߟߋ߬ ߕߘߍ߬ ߘߋ߲ߣߍ߲ ߠߊ߫ ߞߕߌ ߞߎ߲߬ߘߏ߲ ߘߌ߫ ߞߊ߬ ߓߍ߲߬ ߡߐ߰ ߝߊ߰ ߞߏ ߘߏ߫ ߡߊ߬، ߊ߬ ߖߊ߲߬ߞߌ߲߬ ߘߊ߫ ߛߊ߲߭ ߝߌ߬ߟߊ߬ ߥߛߎߖߌ߲߫ ߓߊߟߊ߲ߣߍ߲ ߠߋ߬ ߟߊ߫، ߞߊ߬ ߓߍ߲߬ ߊ߬ ߛߌ߬ߞߛߊߓߌ ߟߊ߫ ߘߐ߯ߦߊ ߡߊ߬ ߞߏ ߞߍ߫ ߥߊ߯ߕߌ ߟߊ߫߸ ߊ߬ ߛߊ߲߬ ߁߃ ߔߋ ߟߋ߬ ߕߘߍ߬، ߏ߬ ߟߋ ߘߐ߫߸ ߞߕߌߘߊ ߞߵߊ߬ ߞߏ ߘߐߝߍߦߊ߫ ߦߙߐ߫ ߛߌߦߊߡߊ߲߫ ߦߋ߫ ߞߕߌ ߞߎ߲߬ߕߊ߮ ߞߣߐ߫߸ ߦߝߊ߬ ߕߙߊ ߡߍ߲ ߝߣߊ߫ ߞߍ߫ ߘߴߊ߬ ߓߟߏ߫߸ ߏ߬ ߦߋ߫ ߓߏ߲߬ߓߊ߬ ߘߌ߫، ߏ߬ ߟߋ ߞߏߛߐ߲߬߸ ߛߊ߲߭ ߝߌ߬ߟߊ߬ ߟߊ߫ ߘߴߊ߬ ߞߎ߲߬.>> ߞߕߌߞߊ߲ߘߊ ߣߐ߬ߞߊ߲߬ߛߌ߮ ߞߵߏ߬ ߝߐ߫.

ߏ߬ ߘߐ߫߸ ߓߌ߬ߟߊ߬ ߞߍߣߍ߲߫ ߕߘߍ߬ ߓߐ߫ ߝߌ߬ߟߊ߬ߣߍ߲ ߞߐ߫ ߡߐ߰ ߝߊ߰ ߞߏ ߡߍ߲ ߘߐ߫߸ ߏ߬ ߞߕߌ ߘߊ߱ ߓߘߊ߫ ߖߌ߰، ߞߎߡߊ ߞߏ߬ߣߌ߲ ߦߋ߫ ߦߙߐ ߡߍ߲ ߘߐ߫ ߛߊ߫߸ ߏ߬ ߟߋ ߘߌߦߊߜߏߦߊ߫ ߝߘߎ ߘߌ߫߸ ߏ߬ ߡߍ߲ ߞߐߝߟߌ ߞߍߣߍ߲߫ ߝߙߋߞߋ ߣߌ߲߬ ߘߌ߫.