ߓߍ߯ ߛߌ߰ߣߍ߲߫ ߕߍ߬ߘߍ߫ ߞߊ߬ ߞߕߌ ߡߍ߲ ߡߊߞߐ߬ߣߐ߲߬߸ ߣߴߏ߬ ߦߋ߫ ߡߎߛߊ߫ ߞߐ߲ߘߍ߫ ߟߊ߫ ߞߕߌ ߘߌ߫، ߒ߬ߓߊ߬߸ ߏ߬ ߟߋ ߞߍ߫ ߘߊ߫ ߡߊ߲߬ߖߊ߲߬ߠߊ߫ ߓߌ߬ ߓߌߟߏ߲ ߣߌ߲߬ ߡߊ߬ ߂߀߂߆ ߞߊ߬ߙߌ߬ߝߐ ߕߟߋ߬ ߃߀߸ ߞߊ߬ ߓߍ߲߬ ߓߋ߬ߒ߬ߞߊ߲߬ߠߌ߲߬ ߞߏ ߘߏ߫ ߡߊ߬߸ ߡߍ߲ ߞߍ߫ ߘߊ߫ ߖߏ߬ߡߊ߬ ߓߊߟߊ߲ߘߎ߯، ߒ߬ߓߊ߬߸ ߡߍ߲ ߕߐ߮ ߡߊߜߍ߬ߟߍ߲߬ߡߊ߲߫ ߣߌ߲߬ ߞߏ ߘߐ߫߸ ߏ߬ ߟߋ ߡߎߛߊ߫ ߞߐ߲ߘߍ߫ ߘߌ߫߸ ߞߕߌߘߊ ߞߊ߬ ߛߊ߲߬ ߁߅ ߥߛߎ߫ ߟߋ߬ ߟߴߊ߬ߟߋ ߞߎ߲߬ ߞߎ߲߬ߞߏ߬ߓߊ߬ߕߐ ߟߎ߬ ߛߙߊ߬ ߢߊ ߡߊ߬߸ ߞߵߏ߬ ߟߊ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߇߀߀ ߛߊ߬ߙߊ ߞߊ߲߬ ߢߍ߬ߢߌ߲߬ߘߐ߬ߓߍ߲ ߘߌ߫.

ߞߕߌ ߣߌ߲߬ ߘߊߡߌ߬ߣߊ߬ ߘߊ߫ ߛߐ߰ߡߊ߬ߘߊ ߟߋ߬ ߟߊ߫߸ ߓߍ߯ ߞߎ߲ߝߊ߲ߣߍ߲߫ ߕߘߍ߬ ߞߕߌ ߢߌ߲߬ ߠߊ߫ ߘߌ߲߬ߞߌߙߊ ߓߍ߯ ߘߐ߫، ߞߵߏ߬ ߞߎ߲߭ ߞߍ߫ ߞߏߢߊ ߣߌ߲߬ ߡߊ߲߬ߞߊ߲ ߥߊ߬ߙߊ ߘߌ߫߸ ߊ߬ߟߎ߬ ߕߐ߮ ߟߎ߬ ߣߴߊ߬ߟߎ߬ ߟߊ߫ ߖߌ߬ߦߊ߬ߖߟߎ ߥߊ߯ߕߌ߫ ߖߊ߲ ߠߋ߬ ߕߋ߲߬߸ ߊ߬ ߦߋ߫ ߝߌߙߌ߲ߝߌߙߌ߲߫ ߠߊ߫ ߡߐ߱ ߟߎ߬ ߓߟߏ߫ ߘߍ߬ߞߙߏߝߏ ߟߎ߫ ߞߊ߲߬.

ߡߎߛߊ߫ ߞߐ߲ߘߍ߫ ߦߋ߫ ߘߊ߫ ߛߐ߲߬ߡߊ߬ ߘߌ߫ ߞߕߌ ߢߌ߲߬ ߘߐ߫߸ ߊ߬ ߛߐ߲߭ ߦߋ߫ ߘߊ߫ ߓߋ߬ߒ߬ߞߊ߲߬ߠߌ߲߬ ߞߏ ߘߐ߫߸ ߊ߬ ߣߌ߫ ߢߋ߰ߓߎ߬ ߖߌߦߊߖߟߎ ߟߊߞߎ߲߬ߘߎ ߞߍߟߊ߲ ߘߏ߫ ߟߊ߫ ߞߵߊ߬ ߟߊߖߍ߲ߛߍ߲߫ ߕߟߋ߬ߓߊ߰ ߞߊ߲ߞߋ ߘߏ߫ ߛߌߟߊ ߝߍ߬.

ߊ߬ ߕߐ߬ߢߐ߲߯ ߝߌ߬ߟߊ߸ ߎߡߊߙ ߞߐ߲ߘߍ߫߸ ߊ߬ ߣߌ߫ ߟߊ߲߬ߛߋߦߌ߫ ߞߋߕߊ߬߸ ߏ߬ ߟߎ߬ ߦߋ߫ ߘߊ߫ ߘߋ߲ߣߍ߲߫ ߘߌ߫߸ ߊ߬ߟߎ߬ ߟߊ߫ ߞߏ ߘߏ߲߬ ߘߊ߫ ߘߋ߲ߣߍ߲ ߠߎ߬ ߟߊ߫ ߞߕߌߘߊ ߓߟߏ߫߸ ߞߵߊ߬ߟߎ߬ ߣߌ߫ ߡߎߛߊ߫ ߟߊ߫ ߞߕߌ߫ ߟߢߊ ߟߎ߬ ߓߐ߫ ߢߐ߲߮ ߡߊ߬.

ߞߕߌߘߊ ߞߵߊ߬ ߦߌ߬ߘߊ߬ ߞߏ߫ ߡߍ߲ ߠߎ߬ ߞߵߊ߬ߟߎ߬ ߡߊߞߊ߬ߛߌ߬ ߡߎߛߊ߫ ߣߴߊ߬ ߕߐ߬ߢߐ߲߮ ߠߎ߬ ߞߊ߲߬߸ ߏ߬ ߟߎ߫ ߞߵߊ߬ߟߎ߬ ߓߟߏߓߐ߫ ߣߌ߲߬ ߞߏ ߘߐ߫ ߞߊ߬ߦߌ߯ ߘߓߊ߬ߕߊ ߕߟߋ߬ ߆ ߕߊ߬ߡߌ߲߬ߣߍ߲ ߠߋ߬ ߡߊ߬߸ ߣߴߊ߬ ߟߊߞߎ߲߬ߘߎ߬ ߘߊ߫ ߞߕߌߘߊ ߟߊ߫ ߞߕߌߛߓߍߟߊ ߟߎ߬ ߓߟߏ߫ ߂߀߂߆ ߘߓߊ߬ߕߊ ߕߟߋ߬ ߇ ߡߊ߬.

ߒ߬ߓߊ߬߸ ߞߕߌ߫ ߘߊߞߎ߲ ߢߌ߲߬ ߘߐ߫߸ ߡߎߛߊ߫ ߞߐ߲ߘߍ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߛߐ߲߭ ߦߋ߫ ߣߌ߲߬ ߞߏ߫߸ ߊ߬ ߕߍ߫ ߘߏ߫ ߜߘߍ߫ ߝߐ߫ ߟߊ߫ ߝߏ߫ ߦߝߊ߬ ߕߙߊ، ߊ߬ ߟߊ߫ ߟߊ߬ߝߛߊ߬ߟߌ߬ߟߊ ߞߊ߬ߙߊ߲߬ߡߐ߯ ߌߓߙߊߤߌߡߊ߫ ߞߊߟߌߟ ߞߊ߲ߕߍ߫ ߞߵߊ߬ ߦߌ߬ߘߊ߬ ߞߏ߫ ߞߊ߬ ߤߌߣߊ߫ ߊ߬ ߟߊ߫ ߡߞߊ߬ߘߊ߲߬ߓߊ߰ߕߐ ߟߊ߫ ߖߊ߱ߣߌ߲߬ <<ߘߋ߲ߡߌߛߍ߲ ߠߋ߬ ߦߴߊ߬ ߘߌ߫߸ ߡߍ߲ ߡߊ߫ ߛߊ߲߭ ߡߎ߬ߥߊ߲߫ ߖߍ߬ߘߍ ߛߐ߬ߘߐ߲߬ ߡߎߣߎ߲߬، ߊ߬ ߞߍߕߐ߫ ߊ߬ ߛߎ߯ ߢߌ߬ߡߊ߲߬ ߘߌ߫ ߛߌߣߌ߲߫؟ ߊ߬ ߘߏ߲߬߸ ߊ߲ ߠߊ߫ ߖߡߊ߬ߣߊ ߛߊ߬ߙߌ߬ߦߊ߬ ߕߍ߫ ߡߐߣߍߦߊ߫ ߟߊߓߐߟߊ߫ ߘߌ߫، ߛߊ߬ߙߌ߬ߦߊ߬ ߦߋ߫ ߦߊ߲߬ ߖߏ߯ߘߏ߲߫ ߞߊ߲ ߠߋ߬ ߡߊ߬߸ ߞߊ߬ߙߊ߲߬ ߞߊ߲ ߠߋ߬ ߡߊ߬߸ ߊ߬ ߣߌ߫ ߛߊߞߍߟߌ.>>

ߝߘߏ߬ߓߊ߬ ߞߏߕߌ߯ߘߊ ߞߊ߬ ߛߊ߲߭ ߂߀ ߠߋ߬ ߝߐ߫ ߡߎߛߊ߫ ߞߐ߲ߘߍ߫ ߝߍ߬߸ ߊ߬ ߣߌ߫ ߖߌ߬ߣߍ߬ ߥߟߎ߬ߡߊ߬ ߞߋߟߋ߲߫ ߢߍ߬ߢߌ߲߬ߘߐ߬ߓߍ߲، ߏ߬ ߝߐ ߞߐ ߘߐ߫߸ ߞߊ߬ߙߊ߲߬ߡߐ߰ ߞߊ߲ߕߍ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߕߊ߫ ߖߊ߬ߕߋ߬ ߘߐ߫߸ ߞߕߌߘߊ ߥߊߣߴߊ߬ߟߋ ߟߋ߬ ߞߐߛߌߟߊ ߞߊ߲߬، ߓߊߏ߬߸ ߊ߬ߟߋ߫ ߞߵߊ߬ ߝߐ߫ ߟߋ߬ ߞߏ߫ ߞߊ߬ ߡߎߛߊ߫ ߞߎ߲߬ߘߏߣߌ߲ ߘߐߝߍߦߊ߫، ߛߊ߬ߙߌ߬ߦߊ߫ ߘߏ߲߬ ߞߊ߬ ߛߊ߲߬ ߁߀ ߤߊ߲߯ ߛߊ߲߭ ߂߀ ߠߋ߬ ߝߐ߫ ߞߏ߫ ߛߎ߮ ߏ߬ ߘߐ߫، ߣߌ߫ ߞߕߌߘߊ ߞߊ߬ ߛߊ߲߬ ߁߅ ߝߐ߫ ߏ߬ ߘߐ߫߸ ߡߐ߰ ߘߴߊ߬ ߝߐ߫ ߞߏ߫ ߊ߬ ߥߊߣߴߊ߬ߟߋ ߟߋ߬ ߞߎ߲߬ߕߋߟߋ߲ ߝߍ߬.

ߞߕߌߘߊ ߞߵߊ߬ ߦߌ߬ߘߊ߫ ߏ߬ ߓߍ߯ ߞߐ߫߸ ߞߏ߫ ߊ߬ ߓߍߣߊ߬ ߞߏߢߊ ߣߌ߲߬ ߡߊߛߊ߬ߦߌ߲߬ ߞߊ߲ߞߊ߲߫ ߞߕߌ߫ ߡߛߊߦߌ߲ߘߊ ߟߊ߫߸ ߊ߬ ߘߏ߲߬ ߟߊߣߴߊ߬ ߟߊ߫߸ ߣߌ߫ ߞߕߌ  ߛߋ߫ ߘߴߏ߬ ߟߎ߬ ߢߊߞߘߐ߫߸ <<ߊ߬ ߘߌ߫ ߟߊߣߊ߬ ߛߊ߲߬ ߁߀ ߘߐ߫>>

ߡߊ߲߬ߖߊ߲߬ߠߊ߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ߸ ߊߓߘߎߟߊߦߌ߬ ߛߎߡߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߛߍߥߊߣߍ߲߫ ߠߋ߬ ߞߕߌ ߕߍ߰ ߢߊ ߟߊ߫، <<ߊ߲ ߛߍߥߊߣߍ߲߫ ߠߋ߬ ߡߙߌߘߐ߫ ߕߊ߬ߣߍ߲ ߠߊ߫، ߞߊ߬ߕߎ߲߯߸ ߊ߲ ߞߊ߬ ߛߊ߲߭ ߂߀ ߠߋ߬ ߝߐ߫߸ ߞߏ߬ߣߌ߲߬ ߞߕߌߘߊ ߞߊ߬ ߛߊ߲߬ ߁߅ ߟߋ߬ ߟߴߊ߬ ߞߎ߲߬߸ ߊ߬ ߣߌ߫ ߖߕ ߞߋ߲߬ߥߟߎ߫ ߇߀߀، ߏ߬ ߦߋ߫ ߓߟߏ ߟߋ߬ ߟߋ߯ߟߋ߯ߣߍ߲ ߘߌ߫ ߡߐ߰ ߟߎ߬ ߢߊߞߘߐ߫ ߏ߬ ߘߌ߫߸ ߡߍ߲ ߠߎ߬ ߓߴߊ߬ߟߎ߬ ߛߎߡߊ߲߫ ߣߌ߲߬ ߞߏ ߛߎ߮ ߘߐ߫.>>

ߞߕߌߘߊ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߋ ߕߍߣߊ߬ ߞߕߌ ߣߌ߲߬ ߡߊߛߊ߬ߦߌ߲߬ ߞߏ߫ ߢߊߢߌߣߌ߲߫ ߠߊ߫ ߡߎ߬ߕߎ߲߬، ߓߊߏ߬߸ ߊ߬ ߡߙߌߦߊ ߣߴߊ߬ ߛߊ߬ߥߏ ߓߘߊ߫ ߞߍ߫ ߊ߬ ߦߋ߫. <<ߒ ߟߊߣߴߊ߬ ߟߊ߫߸ ߊ߲ ߧߴߊ߬ ߝߍ߬ ߡߐ߱ ߟߎ߬ ߦߋ߫ ߡߍ߲ ߢߊߦߋ߫߸ ߏ߬ ߓߘߊ߫ ߢߊߦߋ߫، ߞߊ߬ߕߎ߲߯߸ ߡߐ߰ ߛߌ߫ ߞߵߊ߬ ߛߎߡߊ߲߫ ߣߌ߲߬ ߞߏ߫ ߛߎ߮ ߘߐ߫߸ ߏ߬ ߓߍ߯ ߘߌ߫ ߣߐ߬ߝߍ߬ߜߍ߲߫߸ ߊ߬ ߘߏ߲߬ ߕߍߣߊ߬ ߕߏ߫ ߟߊ߫ ߟߊ߬ߕߐ߲߬ߓߊߟߌߦߊ ߘߐ߫.>>

ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߏ߫ ߡߐ߱ ߟߎ߬ ߦߋ߫ ߓߋ߬ߒ߬ߞߊ߲߬ߠߌ߲߬ ߞߏ ߟߐ߲߫، ߞߊ߬ߕߎ߲߯߸ ߞߏ ߓߊ߯ ߘߏ߲߬ ߌ ߣߌ߫ ߡߐ߰ ߛߌ߫ ߕߍ߫ ߞߵߊ߬ ߛߐ߬ߘߐ߲߬ ߊ߬ ߛߊ߬ߥߏ߬ ߕߍ߫߸ ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߓߋ߬ߒ߬ߞߊ߲߬ߠߌ߲ ߠߋ߬، <<ߌ ߕߴߛߋ߫ ߡߐ߱ ߞߘߊߡߊ߫ ߟߊ߫ ߢߊߙ߫ ߛߌ߫ ߡߊ߬߸ ߞߵߊ߬ ߛߐ߬ߘߐ߲߬ ߊ߬ ߟߐ߯ ߕߴߊ߬ ߟߊ߫.>> ߞߕߌߞߊ߲ߘߊ ߞߵߏ߬ ߦߌ߬ߘߊ߬.