ߓߌ߬ ߛߌ߬ߣߌ߲߬ߟߏ߲ ߣߌ߲߬ ߡߊ߬ ߂߀߂߆ ߘߓߊ߬ߕߊ ߕߋ߬ߟߋ߫ ߂߉߸ ߟߊ߬ߞߐ߰ߟߌ߬ ߛߌߦߊߡߊ߲߫ ߠߋ߬ ߘߊߡߌ߬ߣߊ߬ ߘߊ߫ ߞߊ߲ߞߊ߲߫ ߖߊ߯ߓߘߊ߫ ߗ߭ߎ߳ߟߌߛ ߒߢߙߋߙߋ߫ ߟߊ߫߸ ߞߊ߬ ߓߍ߲߬ ߛߎߥߊ߲ߘߟߌ ߕߊ߲ߓߊ߲ߘߏ߲ߠߌ߲ ߡߊ߬ߡߙߊ߬ߟߌ ߥߛߊ߬ߓߊ߰ߦߊ ߛߌ߲߬ߝߏ߲ ߠߎ߬ ߟߊߞߐ߯ ߞߏ ߡߊ߬ (CACV)، ߊ߬ ߣߌ߫ ߘߊߘߐߛߓߍ ߟߎ߬ ߟߊߛߐ߬ߘߐ߲ ߣߴߊ߬ߟߎ߬ ߟߊߕߊ߬ߡߌ߲ ߥߛߊ߬ߓߊ߰ߦߊ (CRTPV)߸ ߞߵߏ߬ ߟߊ߫ ߢߣߊߕߊߟߌ߫ ߛߓߍߘߊ ߛߌ߲߬ߝߏ߲ ߠߎ߫ ߞߊ߲߬، ߏ߬ ߟߎ߫ ߟߋ߬ ߟߊߞߐ߮ ߘߊߡߌ߬ߣߊ߬ ߘߊ߫ ߘߓߊ߬ߕߊ ߃߁ ߢߣߊߕߊߟߌ ߢߊߞߘߐߟߊ ߣߌ߲߬ ߘߐ߫.

ߞߊ߲ߞߊ߲߫ ߕߌ߲߬ߞߎߘߎ߲ ߢߣߊߕߊߟߌ ߝߘߏ߬ߓߊ߬ ߗߋߕߌ߮߸ ߞߊ߬ߓߊ߫ ߛߘߌ߬ߓߋ߬ ߟߊ߫ ߝߐߟߌ߫ ߘߐ߫߸ ߟߊ߬ߞߐ߰ߟߌ߫ ߛߊ߬ߓߊ ߢߌ߲߬ ߠߎ߫ ߕߐ߬ߣߐ ߞߊ߫ ߓߏ߲߬ ߓߊߟߋ߬ ߢߣߊߕߊߟߌ ߓߊ߯ߙߊ ߟߎ߬ ߘߐ߫.

<<ߊ߲ ߣߐ߬ ߟߊ߬ߞߐ߰ߟߌ߫ ߛߊ߬ߓߊ߫ ߟߋ߬ ߢߍߥߟߊߦߊ߫ ߟߊ߫: ߞߊ߬ ߛߋߊߛߝ߭ߋ ߡߐ߱ ߟߎ߬ ߕߊ ߞߍ߫ ߕߌ߲߬ߞߎߘߎ߲ ߠߊ߫ ߞߎ߲߬ߠߊ߫߸ ߞߊ߬ ߛߋߍߙߑߕߔߋߝ߭ߋ ߡߐ߱ ߟߎ߬ ߕߊ ߞߍ߫ ߡߙߊ߬ߓߊ߰ߘߊ ߟߊ߫ ߞߎ߲߬ߠߊ߫߸ ߊ߬ ߣߌ߫ ߢߣߊߕߊߟߌ߫ ߛߓߍߘߊ ߛߌ߲߬ߝߏ߲ ߠߎ߬߸ ߞߵߏ߬ ߟߎ߬ ߝߣߊ߫ ߕߊ ߞߍ߫ ߞߊ߬ߝߏ߬ߙߋ߲ ߠߊ߫ ߞߎ߲߬ߠߊ߫، ߊ߲ ߕߴߛߋ߫ ߥߊ߫ ߟߊ߫ ߢߣߊߕߊߟߌ ߘߐ߫ ߝߋߎ߫߸ ߣߴߊ߲ ߡߊ߫ ߟߊ߬ߞߐ߰ߟߌ߫ ߞߘߎ߬ߜߍߟߍ߲ ߣߌ߲߬ ߞߍ߫ ߡߎߣߎ߲߬.>> ߊ߬ ߞߵߏ߬ ߟߊߛߋ߫.

ߕߌ߲߬ߞߎߘߎ߲ ߗߋߕߌ߮ ߣߌ߲߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߊ߬ ߘߌ߫ ߕߡߊ߬ߖߌ ߓߐ߫ ߡߐ߱ ߟߎ߬ ߘߐ߫߸ ߊ߬ߟߎ߬ ߓߘߊ߫ ߛߋ߲߬ߕߊ߬ߓߊ߫ ߓߟߏߘߐߓߍ߲ ߠߎ߬ ߘߐ߫ ߢߣߊߕߊߟߌ߫ ߡߎߙߊ߲ ߠߎ߬ ߟߊ߫ ߞߏ ߘߐ߫.

<<ߓߌ߬ ߢߐ߲߰ ߟߏ߲߫ ߕߋ߲߬߸ ߢߣߊߕߊߟߌ߫ ߖߐ߯ߙߊ߲ %߉߈ ߓߘߊ߫ ߛߴߊ߬ ߛߋ߫ ߦߙߐ ߘߐ߫ ߡߙߊ߬ߘߊ߬ߓߊ ߝߊ߲߭ ߠߎ߬ ߘߐ߫، ߘߏ߬ߣߌ߲߬ ߠߊ߬ߓߊ߲ ߘߌ߫ ߘߏ߲߬ ߓߌ߬߸ ߊ߬ ߘߏ߲߬ ߓߊ߯ ߘߏ߲߬ ߢߊ ߡߍ߲ ߌߞߘߐ߫߸ ߊ߬ ߟߊߕߊ߯ߕߐ߫ ߊ߬ ߥߊ߫ ߦߙߐ ߘߐ߫ ߕߋ߲߬ ߠߋ߬.>> ߊ߬ ߞߵߏ߬ ߦߌ߬ߘߊ߬.

ߞߊ߬ߓߊ߫ ߛߘߌ߬ߓߋ߬ ߟߊ߫ ߞߎߡߊ߫ ߘߐ߫߸ ߛߋߊߛߝ߭ߋ ߛߌ߲߬ߝߏ߲ ߠߎ߬ ߘߏ߬ߣߌ߲ ߞߊ߫ ߜߌߟߌ߲߫ ߓߊߟߋ߬. <<ߊ߬ߟߎ߬ ߟߊ߫ ߓߊ߯ߙߊ ߕߍ߫ ߖߊ߬ߕߋ߬ߓߐ ߘߐߙߐ߲߫ ߘߌ߫ ߘߋ߬، ߝߏ߫ ߞߊ߬ ߖߡߊ߬ߣߊ߬ߘߋ߲ ߠߎ߬ ߛߊ߬ߥߏ߬ ߝߐߣߍ߲ ߠߋ߬ ߝߣߊ߫ ߡߊߓߏ߲߬ߧߊ߬ ߢߣߊߕߊߟߌ߫ ߞߏ߲ߘߏ ߞߣߐ߫، ߏ߬ ߘߐ߫߸ ߊ߬ߟߎ߬ ߞߊ߫ ߞߊ߲߫ ߞߵߊ߬ߟߎ߬ ߟߊ߫ ߓߊ߯ߙߊ ߟߎ߬ ߞߍ߫ ߕߍߕߋߟߋ߲ ߠߊ߫߸ ߟߊ߬ߛߐ߲ ߠߊ߫߸ ߢߊߟߐ߲ ߣߌ߫ ߞߎ߬ߛߊ߲߬ߧߊ ߟߊ߫.>> ߊ߬ ߞߵߏ߬ ߡߊߜߟߍ߬ߦߊ߬.

ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߞߐߦߌߘߊ߸ ߊ߬ߟߋ ߡߍ߲ ߦߋ߫ ߞߎ߲߬ߠߊ߬ߛߌ߰ߟߊ߫ ߞߎߓߋߘߐ ߗߋߕߌ߮ ߘߌ߫߸ ߊ߬ߟߌ߬ߡߊߡߌ߲߬ ߊ߬ߟߌ߫ ߞߡߊ߬ߙߊ߬߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߏ߫ ߘߋ߲ߣߍ߲߫ ߕߍ߫ ߢߣߊߕߊߟߌ߫ ߣߊ߬ߕߐ ߢߌ߲߬ ߠߎ߬ ߘߌ߫. <<ߞߊ߬ߝߏ߬ߙߋ߲߬ ߛߎߥߊ߲ߘߟߌ ߣߌ߫ ߥߛߊ߬ߘߋ߲߬ ߛߎߥߊ߲ߘߟߌ ߡߍ߲ ߠߎ߬ ߦߋ߫ ߢߊߡߌߟߏ ߘߐ߫ ߣߌ߲߬߸ ߞߏ߫ ߘߋ߲ߣߍ߲߫ ߕߴߊ߬ߟߎ߬ ߘߌ߫، ߞߊ߲ߞߊ߲߫ ߘߏ߲߬ ߡߊߟߐ߲ߣߍ߲߫ ߖߛߎ߬ߛߎߡߊ ߟߋ߬ ߘߐ߫، ߒ߬ߓߊ߬߸ ߊ߲ ߘߴߊ߲ ߢߊ ߕߏ߫ ߖߛߎ߬ߛߎ߬ߡߊ߬ ߞߋߟߋ߲ ߏ߬ ߝߍ߬߸ ߓߊߏ߬߬ ߖߛߎ߬ߛߎߡߊ ߛߐ߲߬ߞߐ߬ ߕߍ߫ ߛߐ߬ߘߐ߲߬ ߠߊ߫.>> ߊ߬ ߞߵߏ߬ ߦߌ߬ߘߊ߬

ߞߏ߲߬ߓߏ ߌߓߙߊߤߌߡߊ߫ ߞߊߟߌߟ ߞߋߕߊ߬ ߡߍ߲ ߦߋ߫ ߕߊ߲ߓߊ߲ߓߐߟߌ ߣߌ߫ ߘߎ߰ߞߣߍ ߡߊ߬ߡߙߊ߬ߟߌ ߞߏߕߌ߯ߘߊ ߞߕߌ߫ ߞߏ ߟߎ߬ ߞߏߟߊߕߍ߮ ߘߌ߫߸ ߏ߬ ߞߊ߬ ߟߊ߬ߞߐ߬ߓߊ߰ߕߐ ߟߎ߬ ߞߟߌ߫ ߕߋߟߋ߲ ߣߌ߫ ߓߘߊߟߊߝߛߊߓߊߟߌߦߊ ߟߋ߬ ߡߊ߬߸ ߊ߬ߟߎ߬ ߟߊ߫ ߓߊ߯ߙߊ ߘߐ߫.

<<ߢߊ ߟߐ߬ߣߴߊߟߎ߫ ߘߐ߫ ߞߏ߫ ߊߟߎ߫ ߦߋ߫ ߞߍ߫ ߖߛߎ߬ߛߎߡߊ ߓߟߏߡߊ ߟߋ߬ ߘߌ߫ ߊ߲ ߠߊ߫ ߖߡߊ߬ߣߊ ߞߣߐ߫، ߊ߲ ߕߍ߫ ߦߊ߲߬ ߞߊ߬ ߞߙߎߞߊ ߘߏ߫ ߞߐߦߌ߬ߘߊ߬ ߥߟߊ߫ ߦߙߐ ߘߏ߫߸ ߓߊ߬ߙߌ߬ ߖߡߊ߬ߣߊ ߟߊ߫ ߣߊ߬ߝߊ߸ ߊ߲ ߧߋ߫ ߦߊ߲߬ ߏ߬ ߟߋ ߡߞߊߘߊ߲߫ ߞߊ߲ߡߊ߬.>> ߊ߬ ߞߵߏ߬ ߦߟߌߓߌߟߊߟߌ ߞߍ߫.

ߞߏߕߌ߯ߘߊ ߞߐߦߌߘߊ ߣߌ߲߬ ߞߵߊ߬ ߦߌ߬ߘߊ߬߸ ߞߏ߫ ߟߊ߬ߞߐ߰ߟߌ ߛߌߓߟߏߡߊ ߡߍ߲ ߠߎ߬ ߞߍߕߐ߫߸ ߓߍ߯ ߦߴߊ߬ ߥߟߍߡߊߟߐ߬ ߓߘߍߓߘߍߞߍ߬߸ ߞߊ߬ ߛߴߊ߬ ߢߊߦߋ߫ ߟߊ߫، ߣߌ߫ ߦߙߐ ߡߍ߲ ߠߎ߬ ߡߊ߫ ߢߊߦߋ߫߸ ߞߊ߬ ߛߋ߫ ߢߌ߬ߣߌ߲߬ߞߊ߬ߟߌ ߞߍ߫ ߟߊ߫߸ ߛߴߊ߬ ߘߌ߫ ߢߊߦߋ߫، ߓߊߏ߬߸ ߞߏ߫ ߛߌߦߊߡߊ߲߫ ߠߋ߬ ߢߣߊߕߊߟߌ߫ ߝߌ߬ߟߊ߬ߣߍ߲ ߣߌ߲߬ ߘߐ߫߸ ߡߍ߲ ߠߎ߬ ߡߊ߲߫ ߣߐ߲߰.

ߟߊ߬ߞߐ߰ߟߌ ߣߌ߲߬ ߦߋ߫ ߕߟߋ߬ ߝߌ߬ߟߊ߬ ߟߐߞߐ߯ߟߌ߫ ߟߋ߬ ߘߌ߫߸ ߘߓߊ߬ߕߊ ߕߋ߬ߟߋ߫ ߂߉ ߣߴߊ߬ ߕߟߋ߬ ߃߀߸ ߣߊߟߌ߬ߡߎ߲߬ ߢߣߊߕߊߟߌ߫ ߝߌ߬ߟߊ߬ߣߍ߲ ߘߎ߰ߛߊ߬ߝߌ߲ ߘߌ߫ ߖߡߊ߬ߣߊ ߡߎ߰ߡߍ ߞߣߐ߫.