ߞߊߕߘߍ߬ ߒ ߓߊߘߋ߲߫ ߛߏ߬ߛߏ ߟߎ߫ ߡߊ߬.

ߒ ߧߋ߫ ߞߎߡߊ߫ ߟߴߊߟߎ߫ ߦߋ߫ ߓߌ߬߹ ߓߊߏ߬߸ ߊߟߎ߫ ߘߋ߲ ߠߋ߬ ߒ ߘߌ߫߸ ߊߟߎ߫ ߡߊ߬ߡߊ߬ߙߋ߲ ߠߋ߬ ߒ ߘߌ߫߸ ߊߟߎ߫ ߕߟߏߡߌߣߊ߫ ߛߏ߬ߛߏ߬ ߘߋ߲ ߠߋ߬ ߞߊ߲߫ ߕߋ߲߬ ߖߐ߫.

ߒ ߧߋ߫ ߛߏ߬ߛߏ ߟߋ߬ ߘߌ߫ %߁߀߀ ߟߊ߫.

ߒ ߝߊ߬ ߦߋ߫ ߛߏ߬ߛߏ߫.

ߒ ߓߋ߲ߓߊ߫ ߦߋ߫ ߛߏ߬ߛߏ߫.

ߒ ߓߋ߲ߓߊ߫ ߞߘߐߞߘߐ ߟߎ߬ ߓߍ߯ ߦߋ߫ ߛߏ߬ߛߏ߬߸ ߣߌ߫ ߖߊ߰ߕߙߊ߬ߦߊ߬ ߕߍ߫.

 

ߊߟߊ߫ ߣߌ߫ ߒ ߥߟߏߓߊ߮ ߟߎ߫ ߞߊ߬ ߞߏߓߊ߫ ߓߟߋ߬ߓߟߋ ߡߍ߲ ߞߍ߫ ߒ ߧߋ߫߸ ߏ߬ ߟߋ ߞߍ߫ ߘߊ ߒ ߛߐ߬ߘߐ߲ ߘߌ߫ ߞߊ߬ ߒ ߞߍ߫ ߛߏ߬ߛߏ ߘߌ߫߸ ߒ ߧߋ߫ ߒ ߞߎ߲߬ߠߊ߬ߦߋߙߋ߲߫ ߠߴߏ߬ ߟߊ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬.

 

ߒ ߞߵߊ߲ ߠߊ߫ ߘߐ߬ߝߐ ߟߐ߲߫.
ߒ ߞߵߊ߬ ߟߐ߲߫ ߞߏ߫ ߊ߲ ߠߊ߫ ߛߌ߱ ߘߐ߫ ߖߌ߬ߣߍ߫ ߞߐ߰ߖߌ߬ߘߊ ߟߊ߫ ߦߊ߲߬߸ ߞߊ߲ ߞߙߎ߫ ߁߄ ߠߋ߬ ߛߌ߱ ߘߐ߫ ߢߐ߲߯ ߝߍ߬߸ ߞߊ߬ߦߌ߯ ߝߊ߯ߘߐߞߍ߫.
ߒ ߞߵߊ߲ ߟߊ߲߬ߓߋ ߟߐ߲߫.

 

ߒ ߘߏ߲߬ ߞߍ ߡߍ߲ ߞߍߣߍ߲߫ ߛߏ߬ߛߏ߬ߦߊ ߟߊ߲߬ߓߋ ߞߊ߬ߟߊߡߊ߬ ߏ߬ ߘߌ߫ ߖߐ߫߸ ߏ߬ ߟߋ ߘߐ߫ ߒ ߧߋ߫ ߒ ߘߊ ߘߏ߲߬ ߠߊ߫ ߣߌ߲߬ ߞߏ ߘߐ߫߸ ߓߏ߲߬ߧߊ ߣߌ߫ ߜߟߌߦߊ ߞߣߐ߫߸ ߛߊ߫ ߒ ߞߎߡߊߕߐߟߊ ߞߊߣߊ߬ ߘߏ߫ ߡߊߘߌߡߌ߲߫، ߊߟߎ߫ ߓߊ߯ ߡߍ߲ ߡߍ߲߫ ߒ ߘߊ߫ ߦߊ߲߬߸ ߒ ߟߊߣߍ߲߫ ߏ߬ ߟߋ ߟߊ߫߸ ߏ߬ ߟߋ ߒ ߞߣߐ߫، ߏ߬ ߞߘߐ߫ ߕߍ߫ ߞߏ߫ ߓߍ߯ ߟߋ߬ ߞߊ߲߫ ߏ߬ ߘߌ߫߸ ߒ ߞߋߟߋ߲߫ ߠߊ߫ ߞߎߡߊ ߣߌ߫ ߒ ߞߋߟߋ߲߫ ߡߙߌߦߊ ߟߵߏ߬ ߘߌ߫.

 

ߞߊ߬ߦߌ߯ ߟߊ߬ߕߍ߰ߦߊ ߕߊ߬ ߘߊ߫߸ ߡߍ߲ ߝߙߍߕߍ ߦߋ߫ ߟ/߂߀߂߆/߀߁߂߂/ߖߞߞ/ߞߝߞ ߂߀߂߆ ߞߏ߲ߞߏߘߓߌ ߁߇ ߡߊ߬߸ ߒ ߧߴߊ߲ ߓߊߘߋ߲ ߘߏ߫ ߟߎ߫ ߡߐߣߍߣߍ߲ ߦߋ߫ ߟߊ߫:

<<ߊ߬ߟߎ߬ ߓߘߊ߫ ߢߌ߬ߣߴߊ߲ ߞߐ߫.
ߊ߬ߟߎ߬ ߕߍ߫ ߝߋ߲߫ ߠߋ߬ ߦߋ߫ ߟߴߊ߲ ߘߐ߫.
ߊ߬ߟߎ߬ ߦߋ߫ ߕߐ߭ ߟߎ߫ ߟߋ߬ ߓߌ߬ߟߊ߬ ߟߊ߫ ߢߍ ߘߐ߫.>>

ߘߏ߫ ߟߎ߫ ߖߍ߬ߘߍ ߝߣߊ߫ ߦߴߏ߬ ߞߋߟߋ߲ ߠߋ߬ ߞߍ߫ ߟߊ߫ ߞߵߊ߲ ߢߊߞߘߐߡߊߢߊ߰ߙߌ߫.

 

ߕߎ߬ߢߊ ߟߋ߬߸ ߏ߬ ߘߌ߫ ߡߐ߰ ߘߌߡߌ߲߫، ߒ߬ߞߊ߬ ߣߴߊ߲ ߞߵߊ߲ ߕߟߏߡߊߟߐ߬ ߦߟߍߓߐߒߘߐ ߏ߬ ߟߎ߬ ߟߊ߫߸ ߏ߬ ߟߎ߬ ߡߍ߲ ߠߎ߬ ߦߋ߫ ߞߍ߫ ߟߊ߫ ߡߐ߰ ߟߎ߬ ߓߟߏ߫߸ ߥߊ߫ ߝߊ߲߫ ߞߋߟߋ߲߫ ߕߍ߫ ߡߍ߲ ߠߎ߬ ߟߊ߫߸ ߣߴߊ߲ ߝߣߊ߫ ߞߎߡߊ߫ ߘߴߏ߬ ߟߎ߫ ߝߍ߬߸ ߊ߲ ߘߌ߫ ߞߍ߫ ߞߙߍ ߘߌ߫ ߞߵߊ߲ ߖߘߍ߬ ߞߣߐ ߝߙߊ߫߸ ߞߵߊ߲ ߖߘߍ߬ ߟߊߜߊ߬ߛߌ߬.

 

ߏ߬ ߘߐ߫߸ ߒ ߧߋ߫ ߛߓߍߟߌ ߣߌ߲߬ ߞߍ߫ ߟߊ߫ ߟߋ߬߸ ߞߊ߬ ߖߎ߬ߛߎ ߟߎ߫ ߓߌ߬ߟߊ߬ ߞߎߘߎ߲߫ ߠߊ߫.
ߒ ߕߍ߫ ߡߐ߰ ߞߘߊߡߊ߫ ߟߊ߫ ߞߏ߫ ߝߏ߫ ߞߊ߬ ߛߐ߲߬ ߒ ߕߊ߫ ߝߐߕߊ ߣߌ߲߬ ߡߊ߬.
ߒ ߘߏ߲߬ ߕߴߊ߬ ߝߐ߫ ߟߊ߫ ߞߊ߬ ߘߏ߲߬ ߡߐ߰ ߞߊ߬ߛߌ߬ ߘߐ߫.
ߞߊ߬ ߒ ߡߙߌߦߊ ߦߌ߬ߘߊ߬ ߘߐߙߐ߲߫߸ ߣߴߊ߬ ߡߊ߬ ߢߊ߬ ߞߏ߫ ߒ ߝߣߊ߫ ߦߋ߫ ߛߏ߬ߛߏ ߟߋ߬ ߘߌ߫.

 

ߢߌ߬ߣߊ߬ ߡߊ߫ ߞߍ߫ ߛߏ߬ߛߏ ߟߎ߬ ߞߐ߫߸ ߊ߬ߟߎ߬ ߕߐ߮ ߦߋ߫ ߟߊ߬ߕߍ߰ߦߊ ߘߐ߫ ߖߐ߫

ߛߓߍߟߌ ߣߌ߲߬ ߞߵߊ߬ ߝߐ߫ ߟߋ߬߸ ߣߌ߫ ߓߎ߬ߘߎ߲߬ ߕߍ߫ ߝߋߎ߫߸ ߞߏ߫:

<<ߞߊ߬ߝߏ߬ ߞߎ߲ߕߌ߮ ߟߊ߫ ߛߙߊ߬ߣߎ߲ ߠߎ߬ ߓߍߣߊ߬ ߦߌ߬ߘߊ߫ ߛߏ߬ߛߏ߬ ߞߊ߲ ߘߐ߫߸ ߡߍ߲ ߛߓߍߣߍ߲߫ ߟߊ߬ߕߍ߲ ߘߐ߫>>

ߊ߲ ߠߊ߫ ߞߊ߲ ߞߏߝߐߣߍ߲߫.
ߊ߲ ߟߐ߬ߘߎ߮ ߟߐ߲ߣߍ߲߫.
ߡߐ߰ ߛߌ߫ ߡߊ߫ ߢߌ߬ߣߴߊ߲ ߞߐ߫.

 

ߡߎ߲߬ ߦߋ߫ ߛߏ߬ߛߏ߬ ߞߊ߲ ߛߓߍߣߍ߲ ߘߌ߫ ߟߊ߬ߕߍ߲ ߘߐ߫؟

ߏ߬ ߦߴߊ߲ ߠߊ߫ ߞߊ߲߫ ߠߋ߬ ߘߌ߫߸ ߡߍ߲ ߝߐ߫ ߟߴߊ߲ ߓߟߏ߫ ߛߎ ߣߌ߫ ߕߋ߬ߟߋ߸ ߣߴߊ߬ ߛߓߍߣߍ߲߫ ߟߊ߬ߕߍ߲߬ ߛߓߍߘߋ߲ ߊ ߣߌ߫ ߓߋ ߣߌ߫ ߛߋ ߘߐ߫ (A, B, C)߸ ߊ߲ ߓߍ߯ ߞߊ߬ ߛߓߍߛߎ߲ ߏ߬ ߡߍ߲ ߟߐ߲߫ ߞߊ߬ߣߌ߲߬.

 

߁߉߈߈ ߠߋ߬ ߟߊ߫߸ ߞߊ߲ߞߊ߲ߞߋߦߟߊ ߟߎ߬ ߣߌ߫ ߞߎ߲߬ߠߊ߬ߛߌ߮ ߞߊ߬ ߛߓߍߘߋ߲߫ ߣߊ߯ߣߌ߲߫ ߝߊ߬ߙߊ߫ ߟߊ߬ߕߍ߲߬ ߛߓߍߟߌ ߞߊ߲߬߸ ߛߴߊ߬ ߘߌ߫ ߛߋ߫ ߊ߲ ߠߊ߫ ߡߊ߲߬ߞߊ߲ ߠߎ߬ ߛߓߍ߫ ߟߊ߫.

 

ߛߓߍߛߎ߲ ߡߍ߲ ߏ߬ ߘߌ߫߸ ߊ߬ ߦߋ߫ ߞߊ߬ߙߊ߲߬ ߠߊ߫.
ߊ߬ ߦߋ߫ ߟߊߓߊ߯ߙߊ߫ ߟߴߊ߲ ߠߊ߫ ߘߋ߲ߓߦߊ ߟߎ߬ ߞߣߐ߫.
ߊ߬ ߞߊ߬ߝߊ ߟߎ߬ ߦߋ߫ ߦߋ߲߬.
ߊ߬ ߘߏ߲߬ ߦߋ߫ ߛߊ߬ߙߌ߬ߦߊ߬ ߞߣߐ߫.

 

ߡߎ߲߬ ߠߊ߫ ߞߎߡߊ߫ ߞߍߣߍ߲߫ ߒߞߏ ߣߌ߫ ߊߘߑߟߊߡ ߞߊ߲߬ ߞߊ߬ ߞߐ߲߰ ߊ߲ߠߎ߬ ߢߍ߫؟

ߊ߬ ߞߘߐ߫ ߕߍ߫߸ ߓߊ ߞߏ߫ ߊ߲ ߠߊ߫ ߞߏ߫ ߟߋ߬ ߡߊ߲߫ ߘߴߊ߬ߟߎ߬ ߦߋ߫ ߓߊߞߍ߫.
ߊ߬ ߞߘߐ ߟߋ߬߸ ߘߎߢߊ߫ ߛߌ߰ߝߊߘߌ ߘߌ߫߸ ߞߊ߬ ߓߍ߲߬ ߟߐ߲ߞߏ ߕߊ߯ߛߌߟߊ ߡߊ߬.

ߒߞߏ ߛߌ߲ߘߌ߫ ߘߊ߫ ߁߉߄߉ ߟߋ߬ ߟߊ߫߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫ ߡߊ߬ߣߋ߲߬ߞߊ ߟߎ߬ ߦߋ߫.
ߊߘߑߟߊߡ ߛߌ߲ߘߌ߫ ߘߊ߫ ߁߉߈߉ ߟߋ߬ ߟߊ߫ ߓߊߙߌߟߞߊ ߟߎ߬ ߓߟߏ߫ ߝߎߟߊ߫ ߞߊ߲ ߦߋ߫.

 

ߒߞߏ ߣߌ߫ ߊߘߑߟߊߡ ߓߊ߯ ߕߊ߬ ߓߊ߫ ߘߐ߫ ߞߎ߲߬ߠߊ߬ߛߌ߮ ߓߟߏ߫߸ ߞߘߐ߫ ߛߊ߬ߓߊ߫ ߟߵߏ߬ ߟߊ߫ ߒߠߋ ߓߟߏ߫:

߁߭ ߺ ߞߝߊ߬ ߛߓߍߣߍ߲ ߠߊ߫ ߛߌߦߊߦߊ
ߒߞߏ ߓߊ߬߸ ߊߘߑߟߊߡ ߓߊ߬߸ ߘߐ߬ߛߙߋ ߥߊ߯ ߦߙߌߞߊ ߓߘߊ߫ ߛߓߍ߫ ߊ߬ߟߎ߬ ߘߐ߫߸ ߞߊ߬ߝߊ ߟߎ߬߸ ߘߟߊߡߌߣߊߟߌ ߟߎ߬߸ ߊ߬ߟߎ߫ ߛߊ߲߬ ߦߙߌߞߊ߫ ߖߊ߲ ߠߋ߬ ߝߣߊ߫ ߦߋ߫ ߕߋ߲߬߸ ߊ߬ߟߎ߬ ߦߋ߫ ߟߊߓߊ߯ߙߊ߫ ߟߊ߫ ߡߐ߱ ߟߎ߬ ߓߟߏ߫، ߡߟߛߟ߃ ߡߊ߬ߞߏ ߦߋ߫ ߘߐ߬ߛߙߋ߬ ߛߓߍߣߍ߲ ߥߙߍߓߊߓߊ ߟߋ߬ ߟߊ߫ ߡߎߣߎ߲߬߸ ߞߣߊ߬ߕߏ߫ ߛߐ߲߬ ߠߊ߫ ߛߓߍߟߌ ߡߊ߬.

߂߲ ߺ ߓߌ߬ߡߴߊ߬ߟߎ߫ ߓߌ߬ߟߊ߬ ߘߎߢߊ߫ ߢߎߡߍߙߋ߲߫ ߕߟߋ ߣߌ߲߬ ߓߟߐߟߐ߫ ߞߊ߲ߠߊ ߟߎ߬ ߘߐ߫
ߒߞߏ ߘߏߝߙߍߕߍߦߊ߫ ߘߊ߫ ߘߏߝߙߍߕߍߘߊ ߟߊ߫ ߂߀߀߆ ߟߋ߬ ߟߊ߫.
ߊߘߑߟߊߡ ߘߏߝߙߍߕߍߦߊ߫ ߘߊ߫ ߂߀߁߆ ߟߋ߬ ߟߊ߫.
ߣߌ߫ ߘߏߝߙߍߕߍ ߘߏ߲߬ ߕߍ߫߸ ߛߓߍߟߌ ߕߴߛߋ߫ ߞߍ߫ ߟߊ߫ ߓߍߓߊ߮ ߘߌ߫ ߘߎߢߊ߫ ߢߎߡߍߙߋ߲߫ ߕߟߋ ߣߌ߲߬ ߘߐ߫.

߃߲ ߺ ߝߎ߬ߕߎ߲߬ߕߌ߬ ߞߘߐ ߟߎ߬ ߛߊߞߍ
ߊ߬ ߛߊ߲߬ ߦߙߌߞߊ߫ ߖߊ߲ ߠߋ߬ ߕߋ߲߬߸ ߖߌ߬ߣߍ߫ ߖߡߊ߬ߣߊ ߛߓߍߟߌ ߟߎ߬ ߡߊ߫ ߘߊ߲ߞߎ߲߫ ߞߎ߲߬ߠߊ߬ߛߌ߮ ߟߊ߫ ߓߘߍ߬ߓߘߍ߬ߟߌ߬ ߞߏ ߟߎ߬ ߘߐ߫، ߒ߬ߓߊ߬߸ ߞߘߐߕߏ ߣߌ߫ ߘߏ߲߰ߘߌ߬ߟߌ ߡߍ߲ ߏ߬ ߘߌ߫ ߖߐ߫߸ ߟߊ߬ߕߍ߰ߦߊ ߣߌ߲߬ ߣߊ߬ߣߍ߲߫ ߏ߬ ߟߋ ߓߊ߬ߟߊ߲ ߞߊߘߌ߫ ߟߊ߫.

 

ߛߏ߬ߛߏ ߦߋ߫ ߘߊߞߎ߲ ߡߍ߲ ߘߐ߫ ߡߎ߬ߕߎ߲߬ ߛߊ߫

ߛߏ߬ߛߏ߬ ߞߊ߲ ߣߌ߫ ߞߊ߲ ߕߐ߭ ߏ߬ ߟߎ߬ ߕߍ߫ ߛߌߟߊ߫ ߞߋߟߋ߲߫ ߣߌ߫ ߘߊߞߎ߲߫ ߞߋߟߋ߲߫ ߘߐ߫.

ߛߏ߬ߛߏ߬ ߞߊ߲ ߛߓߍ ߘߊߡߌ߬ߣߊ ߟߊ߬ߕߍ߲߬ ߛߓߍߟߌ ߘߐ߫߸ ߏ߬ ߘߌ߫ ߦߟߍ߬ߘߐ߬ߞߍ߬ ߘߊ߲ߘߐ߫ ߓߐ߫: ߛߓߍߛߎ߲ߧߊߟߌ ߓߘߊ߫ ߞߍ߫ ߊ߬ ߘߐ߫߸ ߞߏ߲ߞߏߘߐߕߊ ߥߎߢߊ߲ߖߍ߲ߛߍ߲ ߠߎ߬ ߟߊ߫߸ ߞߊ߬ ߜߋߙߋ߲ߜߋߙߋ߲ߧߊ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߠߎ߬ ߞߍ߫ ߊ߬ ߘߐ߫߸ ߞߊ߬ ߞߎ߲߬ߠߊ߬ߛߌ߮ ߟߊ߫ ߟߊ߬ߛߋ߬ߟߌ߬ ߛߌߦߊߡߊ߲߫ ߞߍ߫ ߊ߬ ߘߐ߫.

ߏ߬ ߘߐ߫߸ ߊ߲ ߕߴߊ߬ ߘߌߡߌ߬ߣߊ߬ ߟߴߊ߬ ߘߊߡߌߣߊ߫ ߦߙߐ ߡߎ߬ߕߎ߲߫ ߘߋ߬߸ ߊ߲ ߓߘߊ߫ ߝߏ߬ߘߏ ߣߌ߫ ߛߌ ߛߐ߬ߘߐ߲߬.

 

ߞߏߙߋߛߓߍߟߌ: ߊ߲ ߠߊ߫ ߛߍ߬ߘߏ߲ ߘߊߡߌ߬ߣߊ߬ߕߐ߫ ߦߋ߲߬ ߠߋ߬

ߡߐ߰ ߛߌߦߊߡߊ߲߫ ߦߋ߫ ߞߎߡߊ߫ ߟߊ߫ ߞߏߙߋߛߓߍߟߌ ߞߊ߲߬߸ ߡߍ߲ ߛߌ߲ߘߌߣߍ߲߫ ߒ ߞߊ߬ߙߊ߲߬ߡߐ߯ ߡߏ߬ߤߊ߬ߡߍߘ ߓߋ߲ߕߎߙߊ߫ ߓߊ߲߬ߜ߭ߎߙߊ߬ ߓߟߏ߫߸ ߛߏ߬ߛߏ߬ ߞߊ߲ ߛߓߍ߫ ߞߊ߲ߡߊ߬.

 

ߒ ߧߋ߫ ߕߎ߬ߢߊ߬ ߞߌߛߍ ߝߐ߫: ߢߊ ߞߊ߫ ߞߊ߲߫ ߞߊ߬ ߟߐ߬ ߞߏߙߋߛߓߍߟߌ ߟߋ߬ ߘߐ߫ ߡߎ߬ߕߎ߲߬.

 

ߞߏ߬ߣߌ߲߬߸ ߣߴߊ߲ ߧߴߊ߬ ߝߍ߬ ߞߎ߲߬ߠߊ߬ߛߌ߮ ߦߴߊ߬ ߢߊ ߟߐ߬ ߊ߬ ߘߐ߫߸ ߝߏ߫ ߞߏ߫ ߘߊ߲ߘߐ߫ ߦߋ߫ ߘߝߊ߫ ߛߓߍߟߌ ߟߊ߫ ߟߋ߬:

·       ߞߊ߲ߜߍ߫ ߓߎ߰ߓߎ߰ߣߍ߲ ߦߋ߫ ߛߐ߬ߘߐ߲߬.

·       ߞߊ߬ߝߊ߫ ߁߀߀ ߢߐ߲߰ ߦߋ߫ ߟߊߖߍ߲ߛߍ߲߫.

·       ߘߏߝߙߍߕߍ ߦߋ߫ ߛߐ߬ߘߐ߲߬ ߘߏߝߙߍߕߍߘߊ ߟߊ߫.

·       ߊ߬ ߦߋ߫ ߛߋ߫ ߟߊߘߏ߲߬ ߠߊ߫ ߞߊ߬ߙߊ߲߬ߕߊ ߟߎ߬ ߞߣߐ߫ ߛߊ߲߬ ߦߙߌߞߊ߫ ߞߘߐ߫.

 

ߒߞߏ ߓߘߊ߫ ߛߊ߲߬ ߅߇ ߞߍ߫ ߢߊ ߏ߬ ߡߊ߬ (ߝߎ߬ߕߎ߲߬ߕߌ߸ ߛߊ߲߬ ߇߇ ߟߋ߬)߸ ߊߘߑߟߊߡ ߓߘߊ߫ ߛߊ߲߭ ߂߇ ߛߐ߬ߘߐ߲߬.

ߏ߬ ߟߵߊ߬ ߦߌ߬ߘߊ߬ ߟߊ߫߸ ߞߏ߫ ߛߌߟߊ߫ ߡߊ߫ ߕߍ߰ ߡߐ߰ ߦߋ߫߸ ߛߌߟߊ߫ ߡߊ߫ ߕߍ߰ ߛߓߍߟߌ߫ ߦߋ߫: ߞߏ߬ߣߌ߲߬ ߞߏ ߓߍ߯ ߦߋ߫ ߟߊߘߊ߲߫ ߠߊ߫ ߟߋ߬.

ߏ߬ ߘߐ߫߸ ߦߊ߬ߣߴߊ߲ ߧߋ߫ ߢߐ߲߮ ߠߊ߫ ߘߙߌ߬ߞߌ ߝߙߊ߫ ߞߊ߬ ߛߓߍߟߌ߫ ߜߘߍ ߟߎ߬ ߟߊߜߏߦߊߢߍ߫߸ ߊ߲ ߧߴߊ߲ ߕߊ ߣߌ߲߬ ߞߣߐ ߘߐߓߍ߲߬ ߡߎߣߎ߲߬.

 

ߝߘߏ߬ߓߊ߬ ߢߌߣߌ߲ߞߏ

ߒ ߕߴߊ߬ ߝߍ߬ ߞߊ߬ ߘߏ߲߬ ߡߐ߰ ߞߊ߬ߛߌ߬ ߘߐ߫߸ ߡߊ߬ߣߌ߲߬ߞߊ߫ ߓߊ߬߸ ߝߎߟߊ߫ ߓߊ߬߸ ߜߙߍ߬ߛߍ߫ ߓߊ߬߸ ߞߌ߬ߛߌ߫ ߓߊ߬߸ ߒ ߕߴߊ߬ ߝߍ߬ ߞߊ߬ ߘߏ߲߬ ߊ߬ߟߎ߬ ߝߏߦߌ߬ ߞߊ߬ߛߌ߬ ߘߐ߫، ߊ߲ ߓߍ߯ ߦߋ߫ ߖߌ߬ߣߍ߬ߞߊ߬ߘߋ߲ ߠߋ߬ ߘߌ߫.

ߝߊ߬ߙߊ߲߬ߛߌ߬ ߞߊ߲ ߦߴߊ߲ ߠߊ߫ ߓߊ߯ߙߊ߫ ߞߊ߲ ߠߋ߬ ߘߌ߫ ߡߊ߲߬ߕߏ߲߬ߕߍ߬ ߞߎ߲ߘߊ߫.

ߊ߲ ߓߘߊ߫ ߞߊ߲ ߠߎ߬ ߟߋ߬ ߊ߲ ߕߊ ߘߌ߫ ߞߊ߬ ߞߎߡߊ߫ ߊ߲ ߜߊ߲߰ߛߊ߲ ߣߌ߫ ߢߐ߲߯ ߕߍ߫.

ߏ߬ ߘߐ߫߸ ߟߊ߬ߕߍ߰ߦߊ ߕߍ߫ ߡߌ߬ߙߌ߲߬ߘߌ ߘߏ߫ ߟߊߦߟߍ߬ ߟߊ߫ ߘߏ߫ ߛߊ߲ߘߐ߫߸ ߊ߬ ߕߍ߫ ߞߊ߲ ߘߏ߫ ߟߊߝߌ߬ߛߦߊ߬ ߟߊ߫ ߘߏ߫ ߘߌ߫، ߓߊ߬ߙߌ߬߸ ߊ߬ ߦߋ߫ ߟߐ߲ߞߏ ߟߊ߫ ߕߌ߯ߕߌ߯ߦߊ ߘߏ߫ ߟߋ߬ ߦߌ߬ߘߊ߬ ߟߊ߫߸ ߊ߬ ߣߌ߫ ߘߐ߬ߝߐ ߟߊ߫ ߕߎ߬ߢߊ߬ߦߊ.

 

ߛߏ߬ߛߏ߬ ߞߊ߲ ߝߊ߲߬ߞߊ

ߊ߲ ߝߊ߲߬ߞߊ ߦߋ߫ ߡߎ߲߬ ߘߌ߫߸ ߏ߬ ߟߋ ߊ߲ ߠߊ߫ ߞߊ߲ ߞߎߘߎ߲߫ ߁߄ ߘߌ߫ ߖߌ߬ߣߍ߫ ߞߐ߰ߖߌ߬ߘߊ ߟߊ߫߸ ߏ߬ ߟߎ߬ ߡߍ߲ ߠߎ߬ ߛߌ߰ߣߍ߲߫ ߓߍ߲߭ ߞߊ߲߬߸ ߝߎߣߎ߲ߛߙߋߦߊ ߞߊ߲߬߸ ߢߐ߯ ߢߊߦߋ ߞߊ߲߬߸ ߊ߬ ߣߌ߫ ߟߊ߬ߖߌ߰ߦߊ߬ߟߌ߬ ߞߏ߬ߢߌߡߊ ߞߊ߲߬، ߏ߬ ߟߋ ߊ߲ ߟߊ߲߬ߓߋ ߘߌ߫.

 

ߟߊ߬ߓߊ߲ ߘߐ߫

ߞߎ߲߬ߠߊ߬ߛߌ߮ ߡߊ߫ ߝߋ߲߫ ߛߎߥߊ߲ߘߌ߫ ߊ߬ ߖߘߍ߬ ߦߋ߫ ߘߕߐ߬ߡߐ߲߬ߠߌ߲߬ ߓߟߏ ߡߊ߬߸ ߊ߬ ߞߊ߬ ߛߊ߬ߙߌ߬ߦߊ ߟߋ߬ ߟߊߕߊ߯ߡߊ߫߸ ߞߏ ߦߋ߫ ߢߊ ߡߍ߲߸ ߞߵߊ߬ ߞߍ߫ ߕߋ߲߬.

ߡߍ߲ ߠߎ߬ ߓߘߊ߫ ߛߌߦߊߡߊ߲߫ ߞߍ߫߸ ߏ߬ ߟߎ߫ ߟߋ߬ ߓߌ߬ߟߊ߬ߣߍ߲߫ ߞߎ߲߬ߠߊ߬ߛߌ߮ ߟߊ߫ ߓߟߏ߫ ߞߊ߲߬.

ߊ߬ ߡߊߝߟߍ߫ ߞߍ߬߸ ߛߏ߬ߛߏ߬ ߞߊ߲ ߡߍ߲ ߦߋ߫ ߛߓߍ߫ ߟߊ߫ ߟߊ߬ߕߍ߲ ߘߐ߫߸ ߏ߬ ߦߋ߫ ߓߊ߯ߙߊ߫ ߟߊ߫، ߞߏߙߋߛߓߍߟߌ ߝߣߊ߫ ߘߌߣߊ߬ ߓߊ߯ߙߊ߫ ߏ߬ ߢߊ߫ ߞߋߟߋ߲ ߡߊ߬ ߟߏ߲߫ ߣߊ߬ߕߐ ߟߎ߬ ߘߐ߫.

ߡߐ߰ ߛߌ߫ ߕߴߊ߲ ߟߐ߬ ߦߙߐ ߓߐ߫ ߊ߲ ߓߟߏ߫߸ ߊ߲ߠߎ߬ ߟߋ߬ ߞߊ߫ ߞߊ߲߫ ߞߵߊ߬ ߘߐߓߍ߲߬ ߘߐߙߐ߲߫.

ߊ߲ ߟߐ߬ ߦߙߐ ߘߏ߲߬ ߞߊ߫ ߓߏ߲߬ ߓߊߟߋ߬، ߊߟߊߓߍ߫ ߖߌ߬ߣߍ߬ ߞߊ߲ߘߊ߫ ߘߊ߫.