ߛߟߏ߬ߡߣߊ߬ ߞߊ߲ߕߍ߫ ߡߏߦߌ߫ ߘߊ߫ ߓߏ߲ ߡߍ߲ ߠߊ߫߸ ߏ߬ ߕߍ߫ ߘߓߌ߬ ߘߐ߫ ߞߐ߬ߟߐ߲߬ߣߍ߲߬ ߞߣߐ߫ ߡߎ߬ߕߎ߲߬߸ ߞߎߡߊߕߍ߫ ߞߐ߬ߟߐ߲߬ߣߍ߲߬ ߕߌ߲ߓߌߘߌ߲ߘߊ ߘߊߞߘߐߟߊ ߣߌ߫ ߛߏ ߦߙߐ߫ ߛߌߦߊߡߊ߲߫ ߜߘߍ߫ ߟߎ߫ ߡߊ߬، ߞߵߏ߬ ߕߎ߬ߙߎ ߞߍ߫ ߊߙߊߓߎ߫ ߞߊߙߊ߲ߡߐ߮ ߣߌ߫ ߛߌ߬ߟߡߊ߬ߦߊ ߛߊ߬ߙߌ߬ߦߊ߬ߝߘߋ߬ߦߊ ߞߏ߲߬ߓߏ ߎߛߑߡߊ߯ߣ ߕߙߊߥߟߋ߫ ߟߊ߫ ߓߐߒߝߘߎߘߐ߫ ߞߍߟߌ ߘߏ߫ ߘߌ߫߸ ߞߊ߬ ߕߟߋ߬ߟߊ߬ߢߎߡߍ ߘߋ߲߫ ߥߐ߯ߙߐ߫ ߘߌ߫ ߞߐ߬ߟߐ߲߬ߣߍ߲߬ߞߊ ߟߎ߫ ߡߊ߬߸ ߞߵߏ߬ ߝߟߐߡߊ ߕߘߎ߫ ߒ ߡߊ߫ ߖߊ߰ߞߊ ߟߊ߫ ߓߏ߲ߓߊ ߘߊ ߞߘߐ߫߸ ߛߟߏ߬ߡߣߊ߬ ߞߊ߲ߕߍ߫ ߡߏߦߌ߫ ߘߊ߫ ߓߏ߲ ߏ߬ ߡߍ߲ ߞߣߐ߫ ߁߉߂߂ ߟߊ߫.
ߓߌ߬ ߞߊ߯ߙߌ ߢߌ߲߬ ߡߊ߬߸ ߂߀߂߆ ߘߓߊ߬ߓߌߟߊ ߕߟߋ߬ ߁߆߸ ߖߡߊ߬ ߛߌߦߊߡߊ߲߫ ߠߋ߬ ߓߐ߫ ߘߊ߫ ߞߊ߲ߞߊ߲߫߸ ߞߵߊ߬ߟߎ߫ ߞߎ߲߬ߛߌ߲߫ ߛߎߡߊ߲ߞߐ߬ߦߌ߫ ߞߐ߬ߟߐ߲߬ߣߍ߲߬ ߠߊ߫، ߞߐ߬ߟߐ߲߬ߣߍ߲߫ ߣߌ߲߬ ߦߋ߫ ߛߎߡߊ߲ߞߐ߬ߦߌ߫ ߣߐ߬ߘߎ߮ ߟߋ߬ ߘߐ߫߸ ߞߊ߬ߙߌ߬ߝߊ߬ߡߘߎ߬ߦߊ߫ ߡߙߊ߬ߘߊ߬ߙߋ߲ ߘߐ߫߸ ߞߊ߲ߞߊ߲߫ ߡߙߊ߬ߘߊ߬ߓߊ ߘߐ߫، ߒ߬ߓߊ߬߸ ߗߋߘߋ߲߫ ߥߙߍ ߟߋ߬ ߞߵߊ߬ ߞߎ߲߬ߛߌ߲߫ ߦߋ߲߬ ߠߊ߫߸ ߞߊ߬ ߥߊ߫ ߛߏ ߟߊߦߋߟߋ߲ߧߊ߫ ߞߊ߲ߡߊ߬ ߕߟߋ߬ߟߊ߬ߢߎߡߍ ߘߏ߫ ߟߎ߫ ߟߊ߫߸ ߡߍ߲ ߘߌ߫ ߛߎ߫ ߘߐ߫ ߓߊߘߏ ߣߐ߰ߦߊ߫ ߞߊ߬ ߛߎ ߘߌ߬ߓߌ ߞߟߍ߬.
ߡߐ߰ߓߊ ߟߎ߫ ߕߍ߰ߟߊ ߘߐ߫߸ ߞߏ߲߬ߓߏ ߎߛߑߡߊ߯ߣ ߕߙߊߥߟߋ߫ ߣߴߊ߬ ߟߊ߫ ߖߊ߬ߡߊ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߫ ߞߊ߬ <<ߟߊ߲ߔߊ߲ߘߍ߯ߙ ߥߐ߯ߙߐ߫ ߟߋ߬ ߛߐ߬ߘߐ߲߬߸ ߞߊ߬ ߛߏ ߡߊߜߍ߲߫ ߏ߬ ߟߊ߫߸ ߞߵߏ߬ ߓߏ߲߬ߧߊ ߘߌ߫ ߛߏߕߌ߮ ߡߊ߬߸ ߊ߬ߟߌ߬ߡߊ߬ߡߌ߲߬ߓߊ ߡߊ߬.>> ߏ߬ ߟߋ ߝߐ߫ ߘߊ߫ ߘߊ߲߬ߕߍ߰ߟߌ߬ߟߊ ߓߟߏ߫، ߞߏ߲߬ߓߏ ߖߍ߬ߘߍ ߞߊ߬ ߛߙߊ߬ߣߎ߲ ߕߊ߬߸ ߞߵߊ߬ ߦߌ߬ߘߊ߬ ߞߏ߫ <<ߢߎߡߍ ߦߋ߫ ߦߋߟߋ߲ ߠߋ߬ ߘߌ߫؛ ߛߋ߫ ߕߴߊ߲ ߧߋ߫ ߞߊ߬ ߢߎߡߍ ߓߌ߬ߟߊ߬ ߦߙߐ ߓߍ߯ ߘߐ߫߸ [...] ߊ߲ ߞߵߊ߲ ߦߋ߫߸ ߊ߲ ߞߊ߫ ߞߊ߲߫ ߞߊ߬ ߕߟߋ߬ߟߊ߬ߢߎߡߍ ߛߊ߲߬ ߞߊ߬ ߣߵߊ߬ ߘߌ߫.>> ߎߛߑߡߊ߯ߣ ߕߙߊߥߟߋ߫ ߟߋ߬ ߞߊ߲߫ ߕߋ߲߬.
ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߟߋ߬ ߟߊ߫ ߘߊ߫ ߊߙߊߓߎ߫ ߞߊߙߊ߲ߡߐ߯ ߞߏ߲߬ߓߏ ߎߛߑߡߊ߯ߣ ߕߙߊߥߟߋ߫ ߞߊ߲߬߸ ߞߊ߬ ߕߊ߯ ߢߍߥߟߊ ߣߌ߲߬ ߓߟߏߦߊ߫، ߛߐ߰ ߞߍ߫ ߘߊ߫ ߘߊ߲߬ߕߍ߰ߟߌ ߟߋ߬ ߡߊ߬ ߞߐ߬ߟߐ߲߬ߣߍ߲߬ ߛߏߕߌ߮ ߕߍ߰ߟߊ߫ ߡߎߣߎ߲߬߸ ߏ߬ ߡߍ߲ ߞߊ߬ ߘߎߓߊ߫ ߛߊߣߌ߲߫ ߜߊ߲߰ߛߊ߲ ߞߍ߫، ߞߵߊ߬ ߦߌ߬ߘߊ߬ ߛߍߥߊߣߊ߲߫ ߞߊ߲߫ ߘߐ߫߸ ߞߏ߫: <<ߒߞߏ ߞߊߙߊ߲ߘߋ߲ ߠߎ߬ ߓߘߊ߫ ߡߐߣߍ ߓߐ߫ ߊ߲ ߘߐ߫߸ ߊߟߊߡߊ߬ ߛߌ߬ ߘߌ߫ ߘߴߊߟߎ߫ ߡߊ߬، ߒߞߏ ߞߊߙߊ߲ߘߋ߲ ߠߎ߬߸ ߝߏߦߌ߬ ߕߴߊߟߎ߫ ߟߊ߫ ߘߎߢߊ߫ ߘߐ߫߸ ߟߊ߬ߖߌ߬ߣߍ߬ ߞߣߐ߫ ߦߊ߲߬، ߊߟߎ߫ ߡߊ߫ ߞߍ߫ ߥߊߟߢߌߡߊߟߐ߲ߓߊߟߌ߫ ߘߌ߫.>> ߊߡߙߊ߫ ߞߊ߲ߕߍ߫ ߟߋ߬ ߞߊ߲߫ ߕߋ߲߬߸ ߞߐ߬ߟߐ߲߬ߣߍ߲߬ ߛߏߕߌ߮.
ߞߊ߬ ߞߐ߲߰ ߡߐ߰ߓߊ ߟߊ߫ ߘߎߓߊ߫ ߛߊߣߌ߲ ߏ߬ ߦߋ߫߸ ߒߞߏ ߛߍ߲ߓߊ߫ ߞߊ߲ߕߌ߮߸ ߓߊߛߓߊ߬ߕߌ߫ ߛߘߌ߬ߓߋ߫ ߛߙߊ߬ߣߎ߲߬ ߘߊ߫ ߡߊ߲߬ߘߋ߲߬ ߞߎߡߊ߫ ߞߘߐߡߊ ߟߎ߬ ߘߐ߫߸ ߞߊ߬ ߛߏ ߟߊߦߋߟߋ߲ߧߊߓߊ߮ ߞߟߊߓߎߘߏ߲߬߸ ߞߵߊ߬ ߟߐ߬ ߞߐߝߍߣߍ߲ߓߊߟߌߦߊ ߟߊ߫.
<<ߤߊߞߟߌߡߊ ߺ ߤߊߞߟߌߡߊ߫߸ ߊ߬ ߓߍ߯ ߢߊ ߓߍ߲߬ߣߍ߲߫ ߖߌ߫ ߡߍߣߍ߲ ߘߏ߫ ߟߋ߬ ߡߊ߬، ߣߴߊ߬ ߞߵߊ߬ ߦߋ߫߸ ߊ߬ ߦߴߊ߬ ߓߐ߲߬ ߠߴߊ߬ ߞߊ߲߬ ߠߋ߬، ߞߏ߬ߣߵߊ߬ ߦߋ߫ ߘߐߛߊ߲߬ ߠߊ߫ ߤߊ߲ߞߟߌ ߘߏ߫ ߟߋ߬ ߟߊ߫، ߘߎ߬ߞߑߕߎ߯ߙ ߣߴߊ߬ ߣߐ߬ߟߊ ߟߎ߬ ߓߘߴߊ߬ߟߎ߫ ߓߐ߲߬ ߖߌ߫ ߡߍߣߍ߲ ߏ߬ ߟߋ ߞߊ߲߬، ߊ߬ߟߴߊ߬ߟߎ߬ ߘߐߖߊ߬߸ ߊ߬ߟߎ߬ ߟߊ߫ ߞߎߟߎ߲ ߞߊߣߊ߬ ߝߌߙߌ߲ߝߌߙߌ߲߫߸ ߊ߬ߟߎ߫ ߞߵߊ߬ ߟߊߛߌ߲߫ ߛߌߟߊ ߡߍ߲ ߡߊ߬߸ ߊ߬ߟߎ߬ ߞߊ߫ ߥߊ߫ ߓߟߏߡߊߙߊ߲߫߸ ߊ߬ߟߎ߬ ߞߊ߫ ߥߊ߫ ߓߟߏߞߌߣߌ߲߫߸ ߊ߬ߟߎ߬ ߦߋ߫ ߕߏ߫ ߞߎ߲߬ߕߋ߬ߟߋ߲߬ߡߊ߬ ߞߋߟߋ߲ ߏ߬ ߞߊ߲߬، ߘߐ߬ߝߐ ߘߌߣߵߊ߬ߟߎ߬ ߞߏߝߐ߫.>> ߓߊߛߓߊ߬ߕߌ߫ ߛߘߌ߬ߓߋ߫ ߟߋ߬ ߞߊ߲߫ ߕߋ߲߬.
ߊ߬ ߞߵߊ߬ ߦߌ߬ߘߴߊ߬ ߟߊ߫ ߛߙߊ߬ߣߎ߲ ߘߐ߫߸ ߞߏ߫ ߡߐ߰ ߛߌߦߊߡߊ߲߫ ߠߋ߬ ߓߘߊ߫ ߒߞߏ ߛߍ߬ߘߏ߲ ߘߊߡߌ߬ߣߊ߫ ߞߊ߬ ߘߛߍ߫، ߞߵߏ߬ ߞߎ߲߭ ߞߍ߫ ߞߏ ߟߎ߬ ߞߎ߲߭ ߕߎߣߎ߲ ߘߴߊ߬ ߛߌߦߊߡߊ߲߫ ߡߊ߬، ߏ߬ ߞߏߛߐ߲߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߡߐ߰ ߛߌ߫ ߓߘߊ߫ ߞߏ ߘߏ߫ ߞߍ߫ ߒߞߏ ߘߐ߫߸ ߥߟߊ߫ ߞߊ߬ ߞߏ ߘߏ߫ ߟߊߝߟߐ߫ ߒߞߏ ߘߐ߫߸ ߊ߬ ߓߍ߯ ߕߐ߮ ߛߓߍߣߍ߲߫ ߠߵߊ߬ߟߎ߬ ߓߟߏ߫، ߊ߬ ߖߍ߬ߘߍ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫߸ ߞߏ߫ ߞߏ߲߬ߓߏ ߕߐ߮ ߓߘߊ߫ ߓߌ߬ߟߊ߫ ߘߐ߬ߝߐ ߘߐ߫، ߓߊߏ߬߸ ߞߏ߫ ߊ߬ߟߎ߫ <<ߞߵߊ߬ߟߋ ߟߋ߬ ߟߐ߲߫ ߡߐ߰ ߝߟߐ ߘߌ߫߸ ߝߏߘߋ߫ ߛߟߏ߬ߡߣߊ߬ ߟߊ߫ ߛߊ߬ߦߊ ߛߊ߲߬ ߓߌ߫ ߦߙߌߞߊ ߞߐߝߍ߬߸ ߡߍ߲ ߞߵߊ߬ ߟߊ߫ ߟߌ߬ߦߊ߲ ߓߐ߫.>> ߓߊߛߓߊ߬ߕߌ߫ ߞߵߏ߬ ߟߋ ߞߍ߫ ߞߎߡߊ ߞߊ߲߬ߟߊ ߘߌ߫.
ߞߏ߲߬ߓߏ ߎߛߑߡߊ߯ߣ ߕߙߊߥߟߋ߫ ߞߵߊ߬ ߦߌ߬ߘߊ߬߸ ߞߏ߫ ߖߊ߬ߕߋ߬ߘߐ߬ߛߌ߰ ߛߌߦߊߡߊ߲߫ ߦߴߊ߬ߟߎ߬ ߓߟߏ߫ ߛߊ߲߭ ߝߌ߬ߟߊ ߣߌ߲߬ ߞߣߐ߫߸ ߞߵߊ߬ ߞߍ߫ ߛߟߏ߬ߡߣߊ߬ ߞߊ߲ߕߍ߫ ߞߐߙߍ ߦߋ߫، ߏ߬ ߟߎ߫ ߟߋ߬ ߓߌߦߊ߲ߠߊߡߐ߯ ߦߙߐ ߘߏ߫ ߟߐ߭ ߘߌ߫߸ ߡߍ߲ ߘߌ߫ ߛߏ ߡߊߘߍ߬ߡߍ߲߬߸ ߞߊ߬ ߞߐߙߍ ߡߊߘߍ߬ߡߍ߲߬، ߞߊ߬ ߓߊ߲߫ ߞߊ߬ ߞߕߊ߬ߞߕߊ߬ߣߍ߲ ߘߏ߫ ߢߌߣߌ߲߫ ߘߋ߲ߓߦߊ ߦߋ߫߸ ߡߍ߲ ߘߴߊ߬ߟߎ߬ ߡߊߘߍ߬ߡߍ߲߬ ߓߊߟߞߏ ߘߐ߫߸ ߊ߬ ߣߌ߫ ߛߣߍ߬ ߞߣߐ߬ ߓߊ߯ߙߊ ߟߎ߫ ߡߊ߬ߘߎ߮ ߘߐ߫، ߞߵߏ߬ ߛߓߊߣߊ߲ ߞߍ߫ ߛߌ߰ߟߊ߲߫ ߗߡߍ߬ ߦߙߌߞߊ ߢߌߣߌ߲ ߘߌ߫߸ ߡߍ߲ ߘߌ߫ ߖߡߊ߬ ߟߊ߬ߘߍ߬ ߞߏ ߟߎ߫ ߣߐ߰ߦߊ߫ ߞߐ߬ߟߐ߲߬ߣߍ߲߬ ߞߣߐ߫، ߞߵߊ߬ ߟߴߊ߬ ߞߊ߲߬߸ ߞߊ߬ ߕߊ߲߬ߕߊ߲ ߘߏ߫ ߟߎ߫ ߘߐߓߍ߲߬߸ ߡߍ߲ ߘߌ߫ ߖߡߊ߬ ߟߊ߬ߘߍ ߛߊ߲ߖߌ߫ ߞߏ ߣߴߊ߬ ߕߟߋ߬ ߞߏ ߟߎ߬ ߡߊߓߍ߲߬߸ ߊ߬ ߣߴߊ߬ ߘߌ߫ ߛߋ߫ ߛߎߝߙߎ߫ ߟߊ߫ ߞߵߏ߬ ߥߊߘߌ ߞߍ߫ ߞߐߙߍ ߡߊߜߍ߲ ߘߌ߫، ߖߊ߬ߕߋ߬ߘߐ߬ߛߌ߮ ߞߣߐ߫ ߢߍߥߟߊ ߟߏ߯ߟߎߣߊ߲ ߞߍ߫ ߘߊ߫ ߡߍ߲ ߘߌ߫߸ ߏ߬ ߟߋ ߖߌ߬ߦߊ߬ߝߟߍ ߘߏ߫ ߞߍ ߘߌ߫ ߞߐ߬ߟߐ߲߬ߣߍ߲߫ ߞߊ߲߬߸ ߞߊ߬ ߞߐ߬ߟߐ߲߬ߣߍ߲߫ ߕߐ߬ߝߍ߬ߦߊ߫ ߞߵߊ߬ ߢߊߝߐ߫ ߘߎߢߊ߫ ߦߋ߫، ߞߊ߬ ߓߊ߲߫ ߞߊ߬ ߛߟߏ߬ߡߣߊ߬ ߞߊ߲ߕߍ߫ ߟߊ߫ ߘߐ߬ߝߐ ߘߐߓߍ߲߬ ߦߟߌߟߊ߲ߘߌߦߊ߫ ߘߍ߲߰ߦߊ߬ߣߍ߲ ߘߐ߫߸ ߞߵߊ߬ ߞߍ߫ ߖߌ߬ߦߊ߬ߖߟߎ߬ ߓߘߍ߫ ߘߌ߫، ߏ߬ ߖߌ߬ߦߊ߬ߝߟߍ ߘߐ߫߸ ߞߊ߬ ߒߞߏ ߛߌ߲ߘߌ߫ ߞߎ߲ ߠߎ߬ ߢߊߝߐ߫߸ ߊ߬ ߣߌ߫ ߝߙߋߞߋ ߡߍ߲ ߠߎ߬ ߘߌ߫ ߒߞߏ ߟߊߣߐ߯߸ ߞߵߏ߬ ߟߊ߫ ߓߐߘߊ߫ ߛߐ߬ߘߐ߲߬ߣߍ߲ ߠߎ߬ ߞߊ߲߬.
ߢߍߥߟߊ ߥߐ߯ߙߐߣߊ߲ ߠߋ߬ ߝߟߐ߫ ߓߐߣߍ߲߫ ߜߍߟߊ߫ ߡߎߣߎ߲߬߸ ߣߴߏ߬ ߦߋ߫ ߛߏ ߟߊߦߋߟߋ߲ߧߊ ߘߌ߫، ߊ߬ߟߎ߬ ߞߊ߲߫ ߞߏ߫ ߊ߬ߟߎ߬ ߡߙߌߦߊ ߦߋ߫ ߛߏ ߡߎ߰ߡߍ ߟߊߦߋߟߋ߲ߧߊ ߟߋ߬ ߘߌ߫߸ ߊ߬ ߛߐ߰ߡߊ ߟߋ߬ ߝߟߐ߫ ߞߍߣߍ߲߫ ߣߌ߲߬ ߡߎߣߎ߲߬.
ߖߊ߬ߕߋ߬ߘߐ߬ߛߌ߮ ߟߊߓߊ߲ ߞߍߣߍ߲߫ ߡߍ߲ ߘߌ߫ ߛߊ߲߭ ߝߌ߬ߟߊ߬ ߢߍߥߟߊ ߣߌ߲߬ ߞߣߐ߫߸ ߏ߬ ߟߋ ߖߐ߬ߟߋ߲ ߣߌ߫ ߢߍߡߊ ߘߏ߫ ߟߎ߫ ߡߊߛߓߍ ߘߌ߫߸ ߞߵߏ߬ ߟߎ߫ ߓߌ߬ߟߊ߬ ߟߐ߮ ߘߐ߫߸ ߞߵߏ߬ ߗߡߍ߬ߘߐ߬ߦߊ ߘߏ߫ ߘߌ߫ ߞߊ߲ߕߍ߫ ߞߐߙߍ ߡߊ߬߸ ߛߊ߲߬ߣߍ߲ ߞߙߎߞߍ߬ߙߍ ߘߐ߫.
ߒ߬ߓߊ߬߸ ߢߌ߲߬ ߠߋ߬ ߟߊ߬ߡߊ߰ߓߊ ߕߍ߬ߘߍ߫ ߞߐ߬ߟߐ߲߬ߣߍ߲߬ ߛߏ ߞߣߐ߫ ߓߌ߬߸ ߡߍ߲ ߘߌߦߊ߫ ߘߊ߫ ߛߏ ߘߏ߲߬ߞߏ ߟߎ߬ ߦߋ߫߸ ߊ߬ ߣߌ߫ ߒߞߏ ߘߏ߲߬ߞߏ ߡߍ߲ ߠߎ߬ ߞߍ߫ ߘߊ߫ ߓߌ߬ߟߊ߬ߛߌ߬ߟߊ߬ߟߌ߬ߟߊ ߟߎ߬ ߘߌ߫، ߏ߬ ߟߋ ߘߐ߫߸ ߛߊ߬ߙߌ߬ߓߎ ߞߋߕߊ߬ ߡߍ߲ ߦߋ߫ ߛߍ߲ߓߊ߫ ߞߏ߲߬ߘߏ߬ߕߌ߮ ߘߌ߫߸ ߏ߬ ߞߊ߬ ߞߏ߲߬ߓߏ ߣߴߊ߬ ߟߊ߫ ߖߊ߬ߡߊ ߝߏ߬߸ ߞߵߊ߬ ߦߌ߬ߘߊ߬ ߞߏ߫ <<ߊ߲ߠߎ߬ ߡߍ߲ ߠߎ߬ ߞߟߌߣߍ߲߫ ߒߞߏ ߕߐ߮ ߟߊ߫ [...] ߊ߲ ߞߊ߫ ߞߊ߲߫ ߞߵߊ߲ ߢߌ߲߭ ߣߴߊ߲ ߖߎ߮ ߟߎ߬ ߓߐ߫ ߢߐ߲߮ ߘߐ߫، [...] ߕߎ߬ߡߊ ߡߍ߲ ߠߊ߫߸ ߘߏ ߟߎ߬ ߟߊ߫ ߞߍ߬ߟߍ ߓߘߊ߫ ߛߋ߫ ߛߊ߲ߡߊ߬߸ ߊ߲ ߢߊ߯ ߊ߬ ߟߊ߫߸ ߞߊ߬ߙߊ߲߬ߡߐ߰ ߎߛߑߡߊ߯ߣ ߦߴߊ߬ ߞߊ߲߬ ߓߊ߯ߙߊ ߞߍ߫ ߘߎ߱ ߡߊ߬ ߦߊ߲߬ߘߐ߫߸ ߓߍ߯ ߢߊ߯ ߏ߬ ߟߊ߫߸ ߏ߬ ߦߋ߫ ߜߍߘߐߞߏ ߟߎ߫ ߟߋ߬ ߘߌ߫߸ ߛߐ߬ߛߐ߬ߟߌ߬ ߕߴߏ߬ ߘߐ߫، ߏ߬ ߘߐ߫߸ ߒߠߋ ߟߊ߫ ߞߎߡߊ ߞߎ߲߭ ߦߋ߫ ߡߎ߲߬ ߘߌ߫߸ ߊ߲ ߢߌ߲߭ ߠߎ߬ ߣߴߊ߲ ߖߎ߮ ߟߎ߫ ߟߋ߬ ߡߌ߬ߣߊ߬ ߢߊ ߞߊߣߊ߬ ߞߍ߫ ߞߋߟߋ߲߫ ߘߌ߫ ߊ߲ ߓߟߏ߫.>> ߛߊ߬ߙߌ߬ߓߎ ߞߋߕߊ߬ ߞߵߏ߬ ߝߐ߫ ߞߵߊ߬ ߟߴߊ߬ ߞߊ߲߬ ߞߏ߫ ߒߞߏ ߛߍ߬ߘߏ߲߬ߠߊ ߟߎ߬ ߦߴߊ߬ߟߎ߬ ߞߊߘߊ߲߫ ߞߵߊ߬ ߟߐ߲߫ ߞߏ߫ ߊ߬ߟߎ߫ ߢߌ߲߭ ߠߋ߬ ߞߏ߲߬ߓߏ ߣߴߊ߬ ߞߐ ߘߌ߫߸ ߞߵߊ߬ߟߎ߫ ߘߍ߬ߡߍ߲߬ ߊ߬ߟߎ߬ ߟߊ߫ ߓߊ߯ߙߊ ߟߎ߬ ߞߍߟߌ ߟߊ߫ ߢߐ߲߮ ߝߍ߬.
ߣߌ߲߬ ߘߌߦߊ߫ ߘߊ߫ ߞߐ߬ߟߐ߲߬ߣߍ߲߬ߞߊ ߟߎ߬ ߦߋ߫ ߞߏߛߓߍ߫، ߊߟߎ߫ ߦߴߊ߬ ߟߐ߲߫߸ ߞߐ߬ߟߐ߲߬ߣߍ߲߬ ߛߏ ߢߌ߲߬ ߠߋ߬ ߞߣߐ߫߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߡߏߦߌ߫ ߘߊ߫߸ ߞߊ߬ ߒߞߏ ߛߓߍߛߎ߲ ߛߌ߲ߘߌ߫، ߏ߬ ߟߋ ߞߏߛߐ߲߬߸ ߊ߬ ߘߐ߬ߝߐ ߢߊߝߐ߫ ߘߴߊ߬ ߡߐ߰ߓߊ ߟߎ߬ ߓߟߏ߫ ߖߊ߲߬ߖߏ߲ ߣߌ߲߬ ߞߎ߲߬ߝߊ߮ ߘߐ߫، ߞߵߏ߬ ߞߍ߫ ߞߎ߲ߝߊ߲ߓߐߟߌ ߘߌ߫ ߞߊ߬ ߕߊ߯ ߛߋ߫ ߛߟߏ߬ߡߣߊ߬ ߞߊ߲ߕߍ߫ ߝߊ߬ ߣߴߊ߬ ߓߊߘߋ߲ ߠߎ߬ ߛߊ߬ߙߌ ߞߎ߲ߝߊ߲ߓߐ ߡߊ߬߸ ߊ߬ ߣߌ߫ ߞߐ߬ߟߐ߲߬ߣߍ߲߫ ߞߐ߬ߟߐ߲ ߖߍ߬ߘߍ.
Aucun commentaire pour le moment.