ߡߙߊߡߊ߫ ߛߙߋ߫ ߞߊ߬ߓߊ ߡߍ߲ ߞߊ߲߬ߕߐ߮ ߦߋ߫ <<ߟߊ߬ ߟߌߦߐߣ>> ߘߌ߫߸ ߏ߬ ߟߋ ߞߵߊ߬ ߡߊߞߊߛߌ߬ ߜߍߞߊ߲ߠߊ ߘߐ߲߬ߞߟߌ߬ߟߊ߬ߟߊ߫ ߡߊ߲߬ߘߋ߲߬ ߝߏߘߋ߫ ߞߊ߲߬߸ ߏ߬ ߡߍ߲ ߕߐ߯ ߞߏ߫ ߝߏߘߋ߫ ߟߊ߲߱ߛߌ߬ߣߍ߬ ߞߋߕߊ߬، ߒ߬ߓߊ߬߸ ߖߊ߰ߘߏ ߞߵߊ߬ ߘߋ߲߫ ߞߎߘߊ߫ ߞߍ߫ ߊ߬ ߟߊ߫ ߏ߬ ߟߎ߬ ߟߊ߫ ߡߞߊ߬ߛߌ߬ߟߌ ߏ߬ ߘߐ߫ ߞߎߣߎ߲߬ ߛߌ߬ߣߌ߲߬ߟߏ߲ ߡߊ߬، ߊ߬ߟߎ߬ ߓߐ ߞߐ߫ ߞߕߌߘߊ ߦߌߟߡߊ߫ ߝߟߐ ߟߊ߫߸ ߊ߲ ߞߵߊ߬ ߟߊߢߌߣߌ߲߫ ߛߴߊ߲ ߘߌ߫ ߡߙߊߡߊ߫ ߛߌߙߋ߫ ߟߊ߬ ߟߌߦߐߣ ߞߊ߬ߓߊ ߘߟߊߛߎ߲ߓߎ߫߸ ߊ߬ߟߋ ߡߊ߫ ߘߌ߬ߢߍ߬ ߞߎߡߊ߫ ߞߏ ߡߊ߬، ߊߙߑߡߊ߯ߣ ߠߊ߫ ߡߣߊߖߋ ߛߍߣߍ߲߬߸ ߡߍ߲ ߦߋ߫ ߞߟߌ߫ ߟߊ߫ ߡߣߊ߬ߖߊ߬ ߜ߭ߊ߯ߖ߭ߊ߬߸ ߏ߬ ߟߋ ߞߵߊ߬ ߘߊ ߓߐ߫ ߓߊ߬ߘߊ ߞߣߐ߫ ߞߊ߬ ߘߏ߫ ߝߐ߫.

ߘߐ߲߬ߞߟߌ߬ߟߊ߬ߟߊ ߟߊ߫ ߡߣߊߖߋ߸ ߜ߭ߊ߯ߖ߭ߊ߬ ߛߐ߲߬ ߘߊ߫ ߞߊ߬ ߣߌ߲߬ ߞߏ ߕߊ߬ߡߌ߲߬ ߢߊ ߢߊߝߐ߫، ߊ߬ߟߋ ߟߊ߫ ߝߐߟߌ߫ ߘߐ߫߸ ߡߊ߲߬ߘߋ߲߬ ߝߏߘߋ߫ ߞߟߌ߫ ߘߊ߫ ߟߋ߬߸ ߞߏ߫ ߡߞߊ߬ߛߟߌ߬ ߓߘߊ߫ ߞߍ߫ ߊ߬ ߞߊ߲߬ ߖߊ߲߭ ߣߌ߫ ߖߏ߮ ߣߌ߫ ߘߋ߲ߣߍ߲ߧߊ߫ ߟߊߕߊ߲߬ߞߊ ߛߓߍߘߊ ߛߓߍߘߊ ߟߊ߫ (OPROGEM)، ߊ߬ ߕߊ߯ ߘߊ߫ ߦߋ߲߬ ߞߊ߬ ߥߴߊ߬ ߟߊ߫ ߡߞߊ߬ߛߟߌ߬ ߞߊ߲ ߏ߬ ߟߊߡߍ߲߫߸ ߕߎ߬ߡߊ߬ ߖߊ߲߫ ߢߊߝߐߟߌ ߟߎ߬ ߞߐ ߘߐ߫ ߦߋ߲߬߸ ߊ߬ ߝߐ߫ ߘߊ߫ ߞߏ߫ ߊ߬ߟߎ߬ ߦߴߊ߬ߟߎ߬ ߞߐߛߊ߬ߦߌ߲߬ ߟߎ ߡߊ߬߸ ߞߊ߬ ߣߊ߬ ߏ߬ ߘߎ߰ߛߊ߬ߜߍ ߡߊ߬߸ ߊ߬ߟߎ߬ ߣߴߊ߬ߟߎ߫ ߘߊ߬ߟߎ.

ߊ߬ߟߎ߫ ߣߊ߬ ߘߊ߫ ߣߊ߬ߟߌ߬ ߞߏ߬ ߝߌߟߊߣߊ߲ ߏ߬ ߟߋ ߘߐ߫ ߞߎߣߎ߲߬ ߛߌ߬ߣߌ߲߬ߟߏ߲ ߡߊ߬߸ ߕߐ߲ߕߌ߯ ߗߍ ߞߵߊ߬ ߦߌ߬ߘߴߊ߬ߟߎ߬ ߟߊ߫ ߞߏ߫ ߞߎߡߊ߫ ߕߴߊ߬ߟߋ ߓߟߏ߫߸ ߊ߬ߟߎ߬ ߦߋ߫ ߥߊ߫ ߞߊ߲ߞߊ߲߫ ߞߕߊߘߊ ߦߌߟߡߊ߫ ߝߟߐ ߟߊ߫، ߊ߬ߟߎ߬ ߛߋ ߦߋ߲߬߸ ߏ߬ ߟߎ߬ ߝߣߊ߫ ߞߵߊ߬ ߦߌ߬ߘߴߊ߬ߟߎ߬ ߟߊ߫ ߞߎߡߊ ߓߍ߯ ߞߐߝߍ߬߸ ߞߏ߫ ߊ߬ߟߎ߬ ߟߊ߫ ߟߊ߬ߥߟߍ߬ߟߌ ߘߌ߫ ߞߍ߫ ߞߐ߬ߟߏ߲߫ ߣߊ߬ߕߐ߸ ߞߊ߬ ߞߕߌ ߛߌ߰ ߛߋ߲߬ߠߊ߫.

ߌ ߓߴߌ ߢߊ ߡߊߖߌ߰ ߣߌ߲߬ ߞߏ ߞߘߐ߫߸ ߡߣߊߖߋ ߞߊ߲߫ ߞߏ߫ ߣߌ߲߬ ߞߎߡߊ ߡߊ߲߫ ߛߌߦߊ߫، ߞߊ߬ߕߎ߲߯߸ ߞߏ߫ ߘߐ߲߬ߞߟߌ ߡߍ߲ ߟߊߣߍ߲߫߸ ߊ߬ߟߎ߬ ߡߊ߫ ߡߐ߰ ߕߐ߯ ߝߐ߫߸ ߊ߬ߟߎ߬ ߡߊ߫ ߡߐ߰ ߞߘߐߡߊߕߍ߰، <<ߊ߬ ߡߊ߫ ߡߐ߰ ߕߐ߯ߘߐߕߍ߰߸ (ߘߐ߲߬ߞߟߌ߬ߟߊ߬ߟߊ) ߊߙߑߕߌߛ ߞߵߊ߬ ߟߊ߫ ߘߐ߲߬ߞߟߌ ߟߋ߬ ߟߊ߫، ߘߐ߲߬ߞߟߌ ߟߊߣߍ߲߫ ߞߵߊ߬ ߓߌ߬ߟߊ߫ ߙߋ߬ߖ߭ߏ (ߘߍ߬ߞߙߏߝߏ) ߟߋ߬ ߞߊ߲߬.>> ߊ߬ ߞߵߵߏ߬ ߝߐ߫، ߊ߬ ߞߵߊ߬ ߟߴߊ߬ ߞߊ߲߬߸ ߞߏ߫ ߣߌ߫ ߡߍ߲ ߞߵߊ߬ ߕߊ߬ ߛߍߣߍ߲߬ ߞߏ߫ ߌ ߕߊ߸ ߌߟߋ ߦߴߏ߬ ߖߌ߰ ߌ ߞߘߐߡߊߕߍ߰ ߞߊ߲ ߘߌ߫߸ ߌ ߕߌ߱ ߕߊ ߟߵߏ߬ ߘߌ߫. ߝߐߢߊ߫ ߜߘߍ߫ ߘߐ߫߸ ߏ߬ ߞߎ߲߬ߞߏ߫ ߟߵߊ߬ ߓߟߏ߫ ߏ߬ ߘߌ߫.

ߡߣߊߖߋ ߡߊ߫ ߘߊ߲߬ ߏ߬ ߘߐߙߐ߲߫ ߡߊ߬ ߘߋ߬߸ ߊ߬ ߞߵߊ߬ ߝߐ߫ ߞߵߊ߬ ߟߴߊ߬ ߞߊ߲߬ ߞߏ߫ ߖߊ߬ߡߊ ߣߐ߬ ߘߐ߲߬ߞߟߌ ߣߌ߲߬ ߕߊ߬ ߟߊ߫ ߞߵߊ߬ ߟߊߖߊ߲ߞߏ߫ ߘߊߡߌ߬ߣߊ߬ ߢߊ߫ ߛߌߦߊߡߊ߲߫ ߡߊ߬߸ ߡߊ߲߬ߘߋ߲߬ ߝߏߘߋ߫ ߞߵߊ߬ ߡߝߊ߫ ߟߋ߬߸ ߊ߬ ߡߴߊ߬ ߛߋ߲߭ߓߌ߬ߟߊ߬ ߛߊ߲ߡߊ߫ ߞߎߡߊ ߏ߬ ߟߎ߬ ߛߌ߫ ߘߐ߫، ߞߊ߬ߕߎ߲߯߸ <<ߊ߬ ߡߊ߫ ߡߐ߰ ߟߊ߫ ߝߋ߲߫ ߟߊߦߌߞߋ߫߸ ߊ߬ ߡߊ߫ ߡߐ߰ ߟߊ߫ ߝߌ߭ߘߏ߫ ߔߊߙߑߕߊߖ߭ߋ߫߸ ߞߎߡߊ߫ ߟߊߛߎߘߎ߲ߧߊ߫ ߘߐ߫߸ ߊ߬ ߡߊ߫ ߝߏߦߌ߬ߝߏߦߌ߬ ߟߋ߬ ߞߍ߫.>> ߡߣߊ߬ߖߊ߬ ߜ߭ߊ߯ߖ߭ߊ߬ ߟߋ߬ ߞߊ߲߫ ߕߋ߲߬، ߊ߬ ߞߵߊ߬ ߦߌ߬ߘߊ߬ ߞߏ߫ ߡߐ߰ ߛߓߊ߬ ߔߋ߫ ߟߋ߬ ߕߐ߮ ߝߐߣߍ߲߫ ߘߐ߲߬ߞߟߌ ߘߐ߫߸ ߏ߬ ߘߏ߲߬ ߓߍ߯ ߦߴߊ߬ ߞߙߍ߬ߝߍ߬ ߡߐ߮ ߟߎ߫ ߟߋ߬ ߘߌ߫. <<ߕߐ߯ ߛߊ߬ߓߊ߫ ߟߋ߬ ߝߐߣߴߊ߬ ߘߐ߫߸ ߞߋߟߋ߲ ߒߠߋ ߖߍ߬ߘߍ ߕߐ߮ ߟߵߏ߬ ߘߌ߫، ߝߌߟߊߣߊ߲߸ ߏ߬ ߟߋ ߟߐ߬ߣߍ߲߫ ߕߋ߲߬، ߊ߬ ߛߓߊߣߊ߲߸ ߏ߬ ߦߋ߫ ߟߎ ߡߊ߬.>> ߊ߬ ߞߵߏ߬ ߝߐ߫، ߞߊ߬ ߓߊ߲߫ ߞߵߊ߬ ߓߐ߱ ߘߐߘߐ߲߬ ߌߞߐ߫߸ ߞߏ߫ <<ߡߐ߰ ߜߘߍ߫ ߛߌ߫ ߕߐ߯ ߡߊ߫ ߝߐ߫ ߛߐ߲ ߘߐ߫.>>

ߞߏߢߊ ߣߌ߲߬ ߓߍ߯ ߣߴߊ߬ ߕߊ߫߸ ߝߏ߫ ߞߎߡߊ ߓߘߊ߫ ߛߋ߫ ߞߕߌߞߊ߲ߘߊ ߣߊ߰ߟߊ߫ ߞߕߌߘߊ ߦߌߟߡߊ߫ ߝߟߐ ߟߊ߫߸ ߡߊ߲߬ߘߋ߲߬ ߝߏߘߋ߫ ߟߊߡߌߣߌ߲ ߞߊ߲߫ ߞߏ߫ ߊ߬ߟߎ ߟߊߣߍ߲߫ ߛߊ߬ߙߌ߬ߦߊ߬ ߟߊ߫. <<ߓߍ߯ ߣߴߊ߬ ߓߊ߯ߙߊ߫ ߟߋ߬، ߊ߲ ߠߊ߫ ߟߊߒߠߦߊ ߦߋ߫ ߖߌ߬ߣߍ߫ ߛߊ߬ߙߌ߬ߦߊ߬ ߘߐ߫ ߝߛߊߦߌ߫.>> ߓߊ߬ߙߌ߬߸ ߟߊߒߠߦߊ ߏ߬ ߕߍ߫ ߟߊߒߠߦߊ ߜߊ߲ߛߊ߲߫ ߘߌ߫߸ ߊ߬ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ <<ߊ߲ ߠߊ߫ ߟߊߒߠߦߊ ߦߴߊ߬ߟߎ߬ ߘߐ߫ ߞߊ߬ ߕߎ߬ߢߊ ߟߊߓߐ߫ ߜߍ ߘߐ߫.>> ߞߊ߬ߕߎ߲߯߸ ߞߏ߫ ߊ߬ߟߎ߬ ߡߊ߫ ߝߏߦߌ߬ ߞߍ߫ ߖߎ߯ߡߊ߲߫ ߘߐ߫ ߣߌ߲߬ ߞߏ ߘߐ߫.

ߡߙߊߡߊ߫ ߛߙߋ߫ ߟߊ߬ ߟߌߦߐߣ ߞߏ߬ߣߌ߲ ߡߊ߫ ߛߐ߲߬ ߝߋ߲߫ ߝߐ߫ ߟߴߊ߲ ߠߊ߫ ߞߎߡߊߓߘߎ ߟߊ߫߸ ߊ߲ ߘߏ߲߬ ߕߴߊ߬ ߟߊ߫ ߜߍ߫ ߘߐ߫ ߞߎߡߊ߫ ߜߘߍ߫ ߞߊ߬ߟߊߡߊ߬ ߣߌ߲߬ ߞߏ ߞߊ߲߬ ߡߎߣߎ߲߬، ߊ߬ ߞߏ ߞߏ߬ߣߌ߲ ߞߎߡߊ ߓߘߊ߫ ߛߌߦߊߦߊ߫ ߘߍ߬ߞߙߏߝߏ ߟߎ߫ ߞߊ߲߬ ߞߏߛߓߍ߫، ߞߵߊ߬ ߕߊ߬ ߘߐ߲߬ߞߟߌ ߟߊߓߐ ߡߊ߬ ߞߵߊ߬ ߛߌ߰ ߛߌߛߍ߲߬ ߠߊ߫، ߞߐ߬ߟߏ߲ ߓߊ߯ ߣߌ߲߬ ߞߏ ߓߌ߬ߟߊ߫ ߝߊ߲߭ ߡߍ߲ ߘߐ߫߸ ߊ߲ ߘߴߏ߬ ߕߊ߬ ߢߐ߲߯ ߝߍ߬.