ߡߊ߬ߛߎ߬ߓߊ߬ ߞߏ ߘߏ߫ ߟߋ߬ ߕߍ߰ߣߍ߲߫ ߞߊ߲ߛߊߖߌߟ߸ ߟߋߟߎߡߊ߬ ߛߏ ߞߣߐ߫ ߓߌߟߏ߲ ߂߀߂߆ ߘߓߊ߬ߓߌߟߊ ߕߟߋ߬ ߁߃ ߡߊ߬، ߊ߬ߟߎ߬ ߟߊ߫ ߘߌ߲߬ߞߌߙߊ ߕߌ߲ߓߌߘߌ߲ߘߊ߫ ߝߟߐ ߢߍߓߊ߮ ߟߋ߬ ߝߊ߰ߣߍ߲߫ ߛߊ߲ߝߍߙߍ߲ ߓߟߏ߫߸ ߔߋߕߍߟ ߞߌ߲߬ߘߊ ߞߣߐ߫߸ ߞߎ߲߬ߘߊ ߦߙߐ ߡߍ߲ ߦߋ߫ ߞߟߌ߫ ߟߊ߫ ߞߏ߫ ߞߊߛߊ߲ߖߌߟ. ߣߌ߲߬ ߞߏ ߞߍߣߍ߲߫ ߕߋ߬ߟߋ ߘߐ߫ ߟߋ߬߸ ߞߵߊ߬ ߛߐ߬ߘߐ߲߬ ߗߍ߭ ߦߋ߫ ߛߍ߬ߣߍ ߘߐ߫ ߥߎߟߎ߲߫.

ߖߌ߬ߣߋߡߊߕߍ߲ ߞߐߦߌߘߊ ߡߍ߲ ߦߋ߫ ߛߌ߱ ߘߐ߫ ߟߊߓߋ߬߸ ߏ߬ ߟߊ߫߫ ߢߊߢߌߣߌ߲ߠߌ߲߫ ߘߐ߫߸ ߗߍ߭ ߡߍ߲ ߝߊ߰ߣߍ߲߫ ߛߊ߲ߝߍߙߍ߲ ߓߟߏ߫ ߣߌ߲߬߸ ߊ߬ ߕߐ߯ ߟߋ߬ ߞߏ߫ ߗߍߙߑߣߐ߫ ߌߓߙߊߤߌߡߊ߬ ߓߊߙߌ߫߸ ߊ߬ ߣߴߊ߬ ߘߍ߬ߢߐ߲߮ ߘߏ߫ ߟߋ߬ ߥߊߣߍ߲߫ ߕߍ߬ߘߍ߫ ߊ߬ ߟߊ߫ ߛߍ߬ߣߍ ߘߐ߫. ߛߊ߲ ߣߊ߭ ߘߊߡߌ߬ߣߊ߸ ߞߵߊ߬ ߛߐ߬ߘߐ߲߬ ߛߊߟߌߝߊ߬ߣߊ ߕߎ߲߬ ߓߘߊ߫ ߛߋ߫߸ ߡߐ߰ ߝߌ߬ߟߊ ߢߌ߲߬ ߠߎ߫ ߞߵߊ߬ߟߎ߬ ߡߊߘߏ߲߬ ߝߊߟߊ߲ ߘߏ߫ ߟߊ߫߸ ߞߵߊ߬ߟߎ߬ ߡߝߊ߫ ߦߋ߲߬، ߞߏ߬ߣߌ߲߬߸ ߊ߬ ߡߊ߫ ߛߋ߫ ߓߍ߲߬ ߠߊ߫߸ ߛߊ߲ߝߍߙߍ߲ ߞߊ߬ ߢߍߓߊ߮ ߜߊ߬ߛߌ߬߸ ߞߵߊ߬ ߓߐ߬ߣߐ߫ ߊ߬ ߣߌ ߘߐ߫.

ߛߊ߬ߓߊ߰ߕߐ ߞߙߍ߬ߝߍ߬ ߡߐ߮ ߡߏߘߌ߫ ߊߡߊߘߎ߬ ߖߊߟߏ߫ ߞߵߊ߬ ߦߌ߬ߘߊ߬ ߞߏ߫ <<ߛߊ߲ ߣߊ߭ ߘߊߡߌ߬ߣߊ߸ ߊ߬ ߣߌ߫ ߡߍ߲ ߕߘߍ߬ ߢߐ߲߮ ߞߐ߫߸ ߊ߬ߟߎ߫ ߞߵߊ߬ߟߎ߬ ߡߊߘߏ߲߬ ߝߊߟߊ߲ ߘߏ߫ ߟߊ߫߸ ߞߵߊ߬ߟߎ߫ ߞߊ߬ߙߌ߬ߝߊ߫ ߦߋ߲߬، ߒ߬ߓߊ߬߸ ߛߊ߲ߝߍߙߍ߲ ߖߌ߰ ߘߴߊ߬ߟߎ߫ ߞߊ߲߬ ߦߋ߲߬ ߠߋ߬ ߛߊ߫. ߊ߬ ߞߍߣߍ߲߫ ߦߏ߫ ߛߊ߲ߝߍߙߍ߲ ߛߋ߫ ߘߊ߫ ߡߏߘߌ߫ ߊߓߘߎߟߊߦߌ߬ ߟߋ߬ ߝߟߐ߫ ߡߊ߬، ߓߊߏ߬߸ ߞߏ߫ ߊ߬ ߞߵߊ߬ ߝߐ߫ ߊ߲ ߠߊ߫ ߢߍߓߊ߮ ߡߊ߬ ߟߋ߬ ߞߏ߫ <<ߒ ߓߘߊ߫ ߝߊ߰>>߸ ߞߣߊ߬ߕߏ߫ ߞߌ߬ߘߏ߲߬ ߠߴߊ߬ ߟߊ߫. ߊ߬ߟߋ ߓߌ߬ߟߴߊ߬ ߦߟߌ߫ ߘߐ߫߸ ߊ߬ ߞߵߊ߬ ߦߋ߫ ߢߍߓߊ߯ ߗߍߙߑߣߐ߫ ߌߓߙߊߤߌߡߊ߬ ߟߊߣߍ߲߫ ߞߵߊ߬ ߘߐߛߊ߬ߡߊ߲߬߸ ߊ߬ ߣߴߊ߬ ߖߍ߬ߘߍ߫ ߞߊ߬ߟߊߡߊ߬، ߊ߬ߟߋ ߓߐ߫ ߢߊ ߟߋ߬ ߞߍ߫ ߘߴߏ߬ ߘߌ߫ ߝߊߟߊ߲ ߞߣߐ߫߸ ߞߵߊ߬ ߞߊ߲ߠߊߓߐ߫ ߛߣߍ߬ߞߍ߬ߟߊ ߕߐ߭ ߟߎ߫ ߡߊ߬، ߏ߬ ߟߎ߫ ߣߊ߭ ߡߎ߬ߕߎ߲߬߸ ߊ߬ߟߎ߫ ߞߵߊ߬ ߛߐ߬ߘߐ߲߬ ߢߍߓߊ߮ ߓߘߊ߫ ߛߊ߬، ߊ߲ߠߎ߬ ߟߊߟߐ߲ߠߌ߲ ߡߍ߲ ߞߍ߫ ߘߊ߫߸ ߞߵߊ߬ ߛߐ߬ߘߐ߲߬ ߊ߲ ߧߋ߫ ߔߋߕߍߟ ߞߌ߲߬ߘߊ ߟߊ߫߸ ߊ߲ ߞߍߢߊ ߟߵߏ߬ ߘߌ߫ ߞߊ߬ ߘߎ߰ߞߎߟߎ߲ ߕߊ߬ ߞߊ߬ ߥߊ߫ ߛߎ߭ ߕߊ߬ ߛߍ߬ߣߍ ߘߐ߫ ߥߎߟߎ߲߫>> ߊ߬ ߞߙߍ߬ߝߍ߬ ߡߐ߮ ߏ߬ ߞߵߏ ߢߊߝߐ߫.

ߝߊ߰ ߡߊ ߟߎ߬ ߟߊ߫ ߖߊ߬ߡߊߙߌ ߟߊ߫ ߡߎ߬ߕߎ߲߬ ߛߊ߫߸ ߢߍߓߊ߮ ߝߎ߬ߙߋ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߊ߫ ߛߊ߬ߦߊ ߞߍߢߊ߫ ߖߐ߲ߖߐ߲ ߟߐ߲߫ ߞߊ߲ߡߊ߬، ߘߊ߲ߘߊߟߌ ߡߊ߬ߝߟߍ߬ߟߌ ߏ߬ ߞߐߝߍ߬߸ ߛߎ߭ ߘߌ߫ ߘߊ߫ ߛߎ߬ ߕߌ߮ ߟߎ߫ ߡߊ߬، ߊ߬ ߛߎ߭ ߘߏ߲߬ߣߍ߲߫ ߖߎߡߊ߫ ߛߊߟߌ߫ ߞߐ ߢߌ߲߬ ߠߋ߬ ߘߐ߫ ߣߌ߲߬ ߞߊߛߊ߲ߖߌߟ. ߢߍߓߊ߯ ߗߍߙߑߣߐ߫ ߌߓߙߊߤߌߡߊ߬ ߓߊߙߌ߫ ߛߊ߬ ߘߊ߫ ߞߊ߬ ߡߏ߬ߛߏ߫ ߛߊ߬ߓߊ߫ ߟߋ߬ ߕߏ߫߸ ߊ߬ ߣߌ߫ ߘߋ߲߫ ߛߌߦߊߡߊ߲߫.