ߞߏ߲ߞߏߘߓߌ ߕߋ߬ߟߋ߫ ߂߅ ߟߋ߬ ߡߊ߬߸ ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߡߙߊ߬ߒ߬ߡߊ߬ߟߌ ߞߐ߲߬ߛߏ߬ ߜߛߏߡߊ ߘߏ߫ ߕߊ߯ ߘߊ߫ ߛߊ߯ߖߐ߬ ߞߡߊ߬ߙߊ߬ ߟߊ߫ ߟߎ ߛߎߡߊ߲߫ ߖߐ߲ߖߐ߲ ߞߍ߫߸ ߞߵߊ߬ ߝߊ߰ ߘߏߦߌ߲߫، ߒ߬ߓߊ߬߸  ߞߏ߲ߞߏߘߓߌ ߕߟߋ߬ ߃߀ ߣߌ߲߬ ߡߊ߬ ߏ߬ ߘߐ߫߸ ߊߛߡߌ߫ ߞߙߍ߬ߝߍ߬ ߡߐ߰ ߜߐߞߎ ߡߍ߲ ߦߋ߫ ߣߌ߲߬߸ ߣߴߊ߬ ߕߎ߲߬ ߦߋ߫ ߖߡߊ߬ߣߊ ߡߊ߬ߞߊ߲߬ߞߊ߲߬ߠߌ߲ ߞߏߕߌ߯ ߘߌ߫߸ ߏ߬ ߓߊߘߍ ߞߍ߫ ߘߊ߫ ߖߌ߲ߘߊ߲ߓߊ߫ ߘߐ߫ ߓߡߊ߬ߞߐ߬ ߞߣߐ߫.

ߓߊߘߍ ߘߊߡߌ߬ߣߊ߬ ߘߊ߫ ߟߊ߬ߞߊ߲߬ߘߊ߬ߟߌ ߖߍ߬ߘߍߖߍ߬ߘߍ ߟߋ߬ ߞߣߐ߫߸ ߓߕߊߦߐ߲߫ ߘߎ߳ ߖ߭ߋߣߌ߫ ߡߟߌߕߍߙ ߜߍߞߣߍ ߘߐ߫߸ ߡߐ߰ ߥߊ߯ ߦߙߌߞߊ߫ ߢߊߞߘߐ߫߸ ߡߊ߬ߟߌ ߘߐ߬ߕߊߡߌ߲ ߞߊ߲ߕߌ߮߸ ߊߛߡߌ߫ ߜ߭ߏ߬ߦߌ߬ߕߊ߬߸ ߝߎ߬ߙߋ ߡߊ߬ߡߐ߮ ߟߎ߬ ߣߌ߫ ߞߐߞߊ߲߫ ߡߐ߯ ߣߊ߬ߣߍ߲ ߠߎ߬، ߓߙߎߞߌߣߊ߫ ߝߊ߬ߛߏ߬ ߣߌ߫ ߖߋ߬ߟߌ߬ߓߊ߬ߘߎ߯ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߟߎ߬ ߢߊ ߕߘߍ߬ ߜߍ ߘߐ߫.

ߖߌ߬ߣߍ߬ ߞߊ߲ߓߍ߲ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߓߟߏߝߘߊ߫ ߗߋߘߋ߲߫ ߜߌߟߌ߲ ߠߎ߬ ߟߊ߫߸ ߞߟߍ߬ߕߌ߰ ߊߡߙߊ߫ ߞߡߊ߬ߙߊ߫ ߕߘߍ߬ ߡߍ߲ ߘߐ߫߸ ߏ߬ ߡߍ߲ ߦߋ߫ ߝߘߏ߬ߓߊ߬ ߞߟߊ߬ߕߌ߯ ߘߌ߫ ߞߊ߲ߕߌ߯ߘߊ ߟߊ߫߸ ߊ߬ ߣߌ߫ ߞߐߞߊ߲ߞߏ ߟߎ߬ ߞߏߕߌ߮߸ ߞߏ߲߬ߓߏ߫ ߡߏ߬ߙߌ߬ߛߊ߲߬ߘߊ߫ ߞߎߦߊߕߍ߫.

ߡߊ߬ߟߌ ߞߎ߲߬ߠߊ߬ߛߌ߮ ߟߎ߬ ߟߊ߫ ߝߐߟߌ߫ ߘߐ߫߸ ߛߊ߯ߖߐ߬ ߞߡߊ߬ߙߊ߫ ߛߊ߬ ߘߴߊ߬ ߛߊ߲߬ ߄߇ ߟߋ߬ ߡߊ߬߸ ߊ߬ ߣߴߊ߬ ߡߏ߬ߛߏ ߓߍ߯ ߟߋ߬ ߕߏ߫ ߘߴߊ߬ ߘߐ߫߸ ߞߵߏ߬ ߟߴߊ߬ ߘߋ߲߫ ߡߐ߰ ߝߌ߬ߟߊ߫ ߞߊ߲߬، ߞߎ߲߬ߠߊ߬ߛߌ߮ ߞߊ߬ ߕߋ߬ߟߋ߫ ߝߙߌ߬ߦߊ߫ ߛߌ߰ ߟߋ߬ ߛߋ߲߬ߠߊ߫߸ ߊ߬ ߛߊ߲߬ߞߊ ߟߊߕߋ߬ ߟߏ߲.

ߊ߬ ߝߊ߰ ߘߊ߫ ߡߙߊ߬ߒ߬ߡߊ߬ߟߌ ߡߍ߲ ߘߐ߫ ߣߌ߲߬߸ ߊ߬ ߞߍ߫ ߘߊ߫ ߡߙߊ߬ߒ߬ߡߊ߬ߟߌ߬ ߓߟߋߓߟߋ߫ ߟߋ߬ ߘߌ߫߸ ߖߡߊ߬ߣߊ ߘߎ߰ߓߊ߬ ߛߌߦߊߡߊ߲߫ ߞߊ߬ ߡߍ߲ ߠߊߞߏߟߐ߲߫߸ ߞߊ߬ߕߌ߫ ߕߌ߲߬ߞߎߘߎ߲ ߦߴߏ߬ ߟߋ ߘߐ߫، ߡߙߊ߬ߒ߬ߡߊ߬ߟߌ ߣߌ߲߬ ߘߐ߫߸ ߊ߬ ߦߌ߬ߘߊ߬ ߘߊ߫ ߛߌ߬ߟߡߊ߬ߦߊ߬ ߣߌ߫ ߛߌ߬ߟߊ߬ߡߊ ߟߎ߬ ߞߐߡߊߓߌ߲ߓߌ߲߫ ߞߙߎ ߟߋ߬ ߓߟߏ߫ ߞߏ߫ ߊ߬ߟߎ߫ ߣߐ߭ ߟߋ߬߸ ߊ߬ߟߋ ߡߍ߲ ߦߋ߫ ߊߟߑߞߊߦߌߘߊ ߓߏߟߏ߲ߝߘߊ ߘߏ߫ ߘߌ߫، ߊ߬ߟߋ ߞߋߟߋ߲߫ ߘߏ߲߬ ߕߍ߫ ߘߋ߬߸ ߊ߬ߟߎ߬ ߣߌ߫ ߊߖ߭ߥߊߘ ߞߊ߲ߠߊߓߌߟߊ߫ ߞߟߊߘߊ ߟߋ߬ ߓߟߏ߫ ߦߋ߫ ߢߐ߲߯ ߓߟߏ߫߸ ߏ߬ ߦߋ߫ ߕߎߥߊߙߍߖߌ ߟߎ߬ ߟߊ߫ ߕߍߝߘߊߟߌ ߕߏ߰ߝߏ ߟߋ߬ ߘߌ߫ ߖߘߍ߬ߕߌ߰ߦߊ ߕߐ߯ ߘߐ߫.

ߞߎ߲߬ߠߊ߬ߛߌ߮ ߟߊ߫ ߝߐߟߌ߫ ߘߐ߫߸ ߡߐ߰ ߂߃ ߟߋ߬ ߝߊ߰ ߘߊ߫߸ ߣߊ߲߬ߒ߬ߕߊ߲ ߣߌ߫ ߣߊ߲߬ߕߌ߮ ߟߎ߬ ߘߐ߫.

ߓߊߘߍ ߣߌ߲߬ ߘߐ߫߸ ߛߊ߯ߖߐ߬ ߞߡߊ߬ߙߊ߫ ߛߎ߬ߞߌߙߊ ߡߊߘߏ߲߬ ߘߊ߫ ߖߡߊ߬ߣߊ ߖߏ߲߬ߖߏ߲ ߠߋ߬ ߟߊ߫߸ ߊ߬ ߣߴߊ߬ ߘߍ߬ߢߐ߲߮ ߡߍ߲ ߠߎ߬ ߦߋ߫ ߞߊ߬ߙߌ߬ߡߘߊ߬ ߞߋߟߋ߲߫ ߘߌ߫ ߣߊ߲߬ߕߌ߰ߦߊ ߞߊ߬ߙߊ߲߬ߕߊ ߟߊ߫߸ ߏ߬ ߟߎ߫ ߟߋ߬ ߞߵߊ߬ ߛߎ߬ߞߌߙߊ ߕߊ߬، ߞߍ߬ߕߌ߰ ߊߛߡߌ߫ ߞߵߊ߬ ߜߟߌߦߊ߫ ߊ߬ ߟߊ߫ ߛߊ߬ߦߊ ߞߏ ߣߌ߲߬ ߘߐ߫߸ ߞߵߊ߬ ߟߊ߫ ߖߊ߬ߟߊ ߞߘߐߕߊ߬ ߞߵߊ߬ ߞߍ߫ ߣߊ߲߬ߕߌ߰ߘߊ ߞߟߍ߬ߕߌ߮ ߘߌ߫.

ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ ߟߊ߫ ߛߦߊ߬ ߝߏߟߌ ߞߎߡߊ ߘߏ߲߬ ߘߊ߫ ߓߙߎߞߌߣߊ߫ ߞߍ߬ߟߍ ߣߌ߫ ߝߊ߬ߛߏ߬ ߞߊߣߌ߲ ߡߊߞߊ߲ߞߊ߲ ߞߏߕߌ߮ ߟߋ߬ ߘߊ߫߸ ߘߊ߯ߟߋ߲ ߞߟߍ߬ߕߌ߮ ߛߋߟߍߛߑߕߍ߲ ߛߍ߲ߔߏߙߋ߫، ߓߊߘߍ ߕߌ߲ߞߌ ߞߍ߫ ߘߊ߫ ߡߊ߬ߟߌ ߞߏߕߌ߯ ߝߟߐ ߟߋ߬ ߓߟߏ߫߸ ߘߊ߯ߓߊ ߞߟߍ߬ߕߌ߮ ߊߓߘߎߟߊߦߌ߬ ߡߊ߬ߦߌߜ߭ߊ߬، ߏ߬ ߟߋ ߞߐ߫߸ ߛߏ߬ߙߌ߬ߡߊ߬ߘߋ߲ ߠߎ߫ ߞߊ߬ ߓߙߊߓߐ ߞߍ߫߸ ߞߣߊ߬ߕߏ߫ ߝߎ߬ߙߋ ߘߌ߫ ߟߴߊ߬ ߞߐߙߍ ߡߊ߬ ߘߌ߯ߙߊ ߟߊ߲߬ߘߊ ߟߎ߬ ߟߊߕߋߟߋ߲߫ ߞߊ߲ߡߊ߬.

ߛߊ߯ߖߐ߬ ߞߡߊ߬ߙߊ߫ ߛߐ߬ߘߐ߲߬ ߘߊ߫ ߁߉߇߉ ߟߋ߬ ߟߊ߫ ߞߊ߬ߕߌ߬߸ ߊ߬ ߦߋ߫ ߡߊ߬ߟߌ ߘߐ߬ߕߊߡߌ߲ ߛߋߓߊ߯ߦߊ ߕߍߡߊߞߟߏ ߘߏ߫ ߟߋ߬ ߘߌ߫، ߡߏ߬ߛߏ ߕߎ߲߬ ߦߴߊ߬ ߞߎ߲߬߸ ߘߋ߲߫ ߟߏ߯ߟߎ߫ ߦߴߊ߬ ߓߟߏ߫، ߊ߬ ߞߏ߬ߣߌ߲ ߓߘߴߊ߬ ߕߐ߮ ߕߏ߫ ߡߊ߬ߟߌ ߟߊߞߊ߲ߘߊ ߘߐ߬ߝߐ ߞߣߐ߫߸ ߊ߬ߟߎ ߡߍ߲ ߠߎ߬ ߟߊ߫ ߖߡߊ߬ߣߊ ߛߊ߲߬ ߦߙߌߞߊ ߦߋ߫ ߟߊߞߊ߲ߘߊ ߓߊߛߌ߯ߓߊߟߌߦߊ ߕߍߡߊ߬ ߕߋ߲߬.