ߛߊߣߌ߲߫ ߢߌߣߌ߲ߠߊ ߟߎ߫ ߟߋ߬ ߝߟߌ߬ߣߍ߲߫ ߢߐ߲߮ ߠߊ߫ ߞߙߌߛߌ ߘߐ߫߸ ߞߵߏ߬ ߟߊߓߊ߲߫ ߡߊ߬ߙߌ߬ߝߊ߬ߕߋ ߡߊ߬ ߓߌߟߏ߲߸ ߞߏ߲ߞߏߘߓߌ ߕߟߋ߬ ߃߀ ߡߊ߬ ߛߊ߬ߝߜ߭ߊ߫ ߞߙߎ߬ߞߊ߲߬ߠߊ ߘߏ߫ ߘߐ߫߸ ߡߌߛߌ߬ߙߊ߲߫ ߖߡߊ߬ߣߊ ߞߊ߲߬، ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫߸ ߊ߬ ߡߊ߲߬ߞߊ߲ ߞߍ߫ ߘߊ߫ ߡߐ߰ ߛߋߦߌ߲߫ ߝߊ߱ ߛߓߊߓߎ ߘߌ߫߸ ߞߊ߬ ߡߐ߰ ߞߋߟߋ߲߫ ߡߊߘߌߡߌ߲߫، ߞߊ߬ߕߎ߲߯߸ ߘߏ߫ ߟߋ߬ ߞߊ߬ ߡߊ߬ߙߌ߬ߝߊ߬ ߕߋ߬ ߖߊ߬ߡߊ ߘߐ߫ ߦߋ߲߬.

ߊ߬ ߞߏ ߟߐ߲߫ ߘߊ߫ ߟߊ߬ߖߍ߲߬ߛߍ߲߬ߠߌ߲ ߘߏ߫ ߟߎ߫ ߟߋ߬ ߝߍ߬ ߘߍ߬ߞߙߏߝߏ ߞߊ߲߬߸ ߖߌ߬ߦߊ ߟߎ߬ ߣߌ߫ ߟߊ߬ߛߙߋ߬ߦߊ߬ߟߌ ߟߎ߬ ߞߵߊ߬ ߦߌ߬ߘߊ߬ ߞߏ߫ ߞߙߎ߫ ߝߌ߬ߟߊ߬ ߦߋ߫ ߢߐ߲߯ ߠߊ߫߸ ߡߙߊ߬ߒ߬ߡߊ߬ߝߋ߲ ߦߋ߫ ߡߍ߲ ߠߎ߬ ߓߍ߯ ߓߟߏ߫، ߕߐ߲ߓߟߏߡߊ ߟߎ߬ ߟߊߟߐ߲ߠߌ߲ ߡߍ߲ ߞߍ߫ ߘߊ߫߸ ߏ߬ ߟߎ߫ ߞߊ߬ ߢߊߢߌߣߌ߲ߠߌ߲߫ ߛߌ߰ ߛߋ߲߬ߠߊ߫߸ ߞߵߊ߬ ߟߐ߲߫ ߣߌ߫ ߟߌ߬ߤߟߊ ߦߋ߫ ߕߎ߬ߢߊ߫ ߟߋ߬ ߘߌ߫߸ ߊ߬ ߣߌ߫ ߞߵߊ߬ ߞߍߓߊ߮ ߝߣߊ߫ ߟߐ߲߫ ߞߏ ߢߊߢߌߣߌ߲߫.

ߘߐ߬ߛߏ߰ߙߋ߬ߟߌ ߟߎ߫ ߞߵߊ߬ ߦߌ߬ߘߊ߬ ߞߏ߫ ߡߊ߬ߛߎߓߊ ߣߌ߲߬ ߥߟߌ߬ ߘߊ߫ ߝߐߢߐ߲߯ߞߐ ߘߏ߫ ߟߋ߬ ߘߐ߫߸ ߞߊ߬ ߓߍ߲߬ ߛߊߣߌ߲߫ ߛߋ߲߫ ߦߌߟߊ ߘߏ߫ ߕߌ߰ߦߊ߬ ߞߏ߬ ߞߎߡߊ ߡߊ߬߸ ߛߊߣߌ߲ߓߊ ߟߋ߬ ߘߏ߲߬ ߦߋ߫ ߓߐ߫ ߟߊ߫ ߦߋ߲߬، ߊ߬ߟߎ߬ ߟߊ߫ ߓߌ߬ߟߊ߬ߢߐ߲߰ߠߊ ߟߋ߬ ߘߐ߫߸ ߡߐ߰ ߞߋߟߋ߲߫ ߞߊ߬ ߡߊ߬ߙߌ߬ߝߊ ߟߊߓߐ߫߸ ߞߊ߬ ߡߎ߮ ߟߊߥߟߌ߬߸ ߞߵߏ߬ ߞߍ߫ ߡߐ߰ ߛߋߦߌ߲߫ ߝߊ߱ ߛߓߊߓߎ ߘߌ߫߸ ߞߣߊ߬ߕߏ߫ ߘߏ߲߬ ߠߊ߫ ߘߎ߰ߞߎߟߎ߲ ߘߏ߫ ߞߣߐ߫ ߞߵߊ߬ ߓߏ߬ߙߌ߬.

ߞߣߐߟߊ ߞߏߕߌ߯ߘߊ ߟߊ߫ ߟߊ߬ߛߋ߬ߟߌ ߘߐ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߊ߬ ߓߍߘߍ߲ߛߍߟߌ߫ ߦߙߍߞߍߟߌ߫ ߛߌߦߊߡߊ߲ ߡߍ߲ ߠߎ߬ ߛߌ߰ ߛߋ߲߬ߠߊ߫߸ ߊ߬ ߣߴߊ߬ߟߎ߫ ߞߊ߬ ߜߛߏ ߡߍ߲ ߠߎ߬ ߟߊߛߌ߰߸ ߊ߬ߟߎ߬ ߛߋ߫ ߘߴߊ߬ߟߎ߬ ߕߍ߯ ߞߍ߫ ߟߊ߫ ߛߌߞߊߒߡߊߓߊ߯ߕߐ ߘߏ߫ ߘߐ߫߸ ߊ߬ߟߋ ߡߍ߲ ߖߊ߬ߕߋ߬ߣߍ߲߫ ߞߎ߲߬ߞߏ߬ߘߐ߬ߕߍ߰ߟߊ ߘߌ߫، ߕߐ߲߫ ߓߟߏߡߊ ߟߎ߬ ߞߵߊ߬ ߟߊ߫ ߡߊ߬ߙߌ߬ߝߊ ߡߌ߬ߣߊ߬߸ ߊ߬ ߣߴߊ߬ ߘߏ߲߬ ߘߊ߫ ߘߎ߰ߞߎߟߎ߲ ߡߍ߲ ߞߣߐ߫ ߞߵߊ߬ ߓߏ߬ߙߌ߬.

ߞߕߌ ߝߊ߰ߡߊ ߟߎ߬ ߓߘߊ߫ ߞߕߌ߫ ߞߏߢߊ ߟߎ߫ ߛߌ߰ ߛߋ߲߬ߠߊ߫߸ ߞߊ߬ ߓߊ߲߫ ߞߊ߬ ߘߐ߬ߛߏ߰ߙߋ߬ߟߌ ߟߊ߫ ߏ߬ ߘߟߊ߫ ߖߐ߲߰ߛߊ߫ ߣߌ߲߬ ߞߏ ߞߍߢߊ߫ ߖߐ߲ߖߐ߲ ߘߌ߫ ߟߊ߫ ߕߋ߬ߟߋ ߟߊ߫، ߊ߬ ߞߏ߬ߣߌ߲ ߟߊߞߙߐ߬ߛߌ߬ ߘߊ߫߸ ߞߏ߫ ߛߊߣߌ߲߫ ߓߊ߯ߙߊ ߡߍ߲ ߦߋ߫ ߞߍ߫ ߟߊ߫ ߖߡߊ߬ߣߊ ߥߊ߬ ߞߣߐ߬ߟߊ ߟߎ߬ ߘߐ߫ ߖߐ߫߸ ߏ߬ ߡߊ߲߬ߞߊ߲ ߠߎ߬ ߟߋ߬ ߊ߬ ߛߓߊߓߎ ߘߌ߫.