ߣߏߙߊߛߏߓߊ߫ ߡߙߊ߬ߘߊ߬ߙߋ߲ ߦߋ߫ ߛߌ߯ߙߌ߲߫ ߡߙߊ߬ߘߊ߬ߓߊ ߟߋ߬ ߘߐ߫߸ ߒ߬ߓߊ߬ ߟߊ߬ߞߐ߰ߟߌ߫ ߟߋ߬ ߛߌ߰ ߘߊ߫ ߛߋ߲߬ߠߊ߫ ߦߋ߲߬߸ ߡߍ߲ ߞߎ߲߭ ߕߘߍ߬ ߦߋ߫ ߓߜ߭ߐ߬ߟߊ߲ ߠߊߘߊ߲߫ ߢߊ ߞߊ߬ߙߊ߲ ߘߌ߫߸ ߞߊ߬ ߛߋ߫ ߝߊ߰ߣߌ߲ ߠߎ߬ ߞߟߎ߬ߦߊ߬ ߟߊ߫ ߝߊ߬ ߓߘߊ ߞߐ߬ߟߐ ߣߴߊ߬ ߛߌ߲ߞߐ߲ ߠߎ߬ ߟߊ߫، ߟߊ߬ߞߐ߰ߟߌ߬ߟߊ ߞߍ߫ ߘߊ߫ ߓߐ߬ߟߐ߲߬ߞߊ߫ ߕߌߙߊ߲ߞߋ߫ ߣߊ߬ߣߊ߬ߕߙߌߓߊ߲߫ ߞߊ߬ߓߊ ߟߋ߬ ߘߌ߫߸ ߊ߬ߟߋ ߡߍ߲ ߦߋ߫ ߞߙߊ߬ߘߏ߲ ߟߐ߲ߓߊ߯ ߥߣߊ߫ ߘߌ߫.


ߊ߬ ߓߐ߫ ߘߊ߫ ߞߐߣߊߞߙߌ߫ ߟߋ߬ ߥߊ߬ߛߌ߬ߥߙߊ ߕߋ߬ߟߋ߫ ߂߄ ߡߊ߬߸ ߞߊ߬ ߣߊ߬ ߣߏߙߊߛߏߓߊ߫، ߊ߬ ߘߏ߲߭ ߛߏ ߞߣߐ߫߸ ߊ߬ ߟߊߓߍ߲߬ ߢߊ ߣߴߊ߬ ߡߊߓߍ߲߬ ߢߊ ߞߵߊ߬ ߤߣߍ߫ ߞߏߛߓߍ߫، <<ߞߟߐ߬ߦߊ߬ߟߌ ߦߋ߫ ߞߍ߫ ߟߴߊ߲ ߓߟߏ߫ ߛߎ߲ߞߎ߲߫ ߞߣߐ߫ ߝߋ߲ ߠߎ߫ ߟߋ߬ ߟߊ߫߸ ߊ߰ ߝߐ߫ ߟߊ߫ ߦߙߌ ߡߍ߲ ߡߊ߬ ߞߏ߫ ߞߙߍߞߕߍ߸ ߓߜ߭ߐ߬ߟߊ߲ ߠߎ߬߸ ߓߎ߰ߘߌ߬ߜߍ߸ ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫ ߛߎ߲ߞߎ߲ ߘߐ߫.>> ߊ߬ ߞߵߏ߬ ߢߊߝߐ߫.

ߣߊ߬ߣߊ߬ߕߙߌߓߊ߲߫ ߕߍ߬ߘߍ߫ ߊ߬ ߟߊ߫ ߟߊ߬ߞߐ߰ߟߌ ߣߌ߲߬ ߝߊ߲߬ߓߊ ߞߍ߫ ߟߊ߫ ߝߌߛߙߌ ߟߋ߬ ߟߊ߫߸ ߊ߬ ߓߘߊ߫ ߕߎ߬ߡߊ߬ ߖߊ߲߫ ߞߍ߫ ߏ߬ ߘߐ߫، ߓߊ߬ߙߌ߬߸ ߌߞߏߡߌ߲߬ ߊ߬ ߡߊ߫ ߕߣߐ߬ ߦߴߏ߬ ߟߊ߫߸ ߏ߬ ߟߋ ߞߵߊ߬ ߟߐ߬ ߞߍߞߌߦߊ ߡߊߝߊ߬ߟߋ߲߬ ߠߊ߫ ߛߋ߲߬ߢߊ ߣߌ߲߬ ߘߐ߫.


<<ߒ ߓߘߊ߫ ߒߞߏ ߡߐ߮ ߡߍ߲ ߠߎ߬ ߟߊߞߐ߯߸ ߒ ߡߊ߫ ߜߍߓߟߎ߫ ߡߌ߬ߣߊ߫ ߡߐ߰ ߛߌ߫ ߟߊ߫߸ ߞߊ߬ߡߊߛߐ߬ߘߐ߲߬ ߒߞߏ ߟߊ߫ ߞߊ߬ߣߌ߲߬ߕߋ߬ߦߊ ߣߌ߫ ߒߞߏ ߟߊߘߌߦߊߢߍ ߝߍ߬، ߞߏ߬ߣߌ߲߬߸ ߒ ߡߊ߫ ߓߟߏߦߊߟߌߟߊ߫ ߦߋ߫، ߣߴߌ ߘߏ߲߬ ߡߴߌ ߟߊ߫ ߓߊ߯ߙߊ ߣߐ߬ ߦߋ߫߸ ߏ߬ ߕߍ߫ ߞߏ߫ ߘߌߦߊ߫ ߡߐ߰ ߓߟߏ߫، ߏ߬ ߟߋ ߘߐ߫߸ ߛߋ߲߬ߢߊ ߣߌ߲߬ ߕߊ ߘߐ߫߸ ߒ ߞߊ߬ ߥߊߘߌ ߟߋ߬ ߟߊߢߌߣߌ߲߫.>> ߊ߬ ߞߵߏ߬ ߝߣߊ߫ ߦߌ߬ߘߊ߬.


ߟߊ߬ߞߐ߰ߟߌ߬ߟߊ ߟߊ߫ ߝߐߟߌ߫ ߘߐ߫߸ ߟߊ߬ߞߐ߰ߟߌ ߞߍ ߞߵߊ߬ ߓߊ߲߫߸ ߏ߬ ߞߏ߫ ߕߍ߫، ߓߊ߬ߙߌ߬߸ ߟߊ߬ߞߐ߰ߟߌ ߞߐߝߍߟߊ ߕߐ߬ߣߐ ߓߊ߯ ߦߋ߫߸ ߡߐ߰ ߜߘߍ߫ ߦߋ߫ ߛߋ߫ ߟߊ߬ߞߐ߰ߟߌ ߓߟߏߦߊ߫ ߟߊ߫߸ ߞߵߊ߬ ߕߐ߬ߣߐ ߟߊߛߋ߫ ߡߐ߱ ߟߎ߬ ߡߊ߬߸ ߏ߬ ߟߋ ߛߎߘߊ߲ ߘߌ߫، ߏ߬ ߟߋ ߘߐ߫߸ ߊ߬ ߞߵߊ߬ ߘߍ߲߫ ߊ߬ ߟߊ߫ ߛߍߥߊ ߞߎߡߊ ߘߐ߫߸ ߞߏ߫ ߝߏ߫ ߟߊ߬ߞߐ߰ߟߌ ߦߋ߫ ߓߊ߲߫ ߡߎߣߎ߲߬، ߊ߬ ߞߊ߲߫ ߞߏ߫: <<ߊ߲ ߕߴߛߋ߫ ߊ߲ ߞߙߊ ߓߌ߬ߟߊ߬ ߟߴߊ߲ ߢߍ߫ ߞߊ߬ ߝߐ߫ ߞߏ߫ ߟߊ߬ߞߐ߰ߟߌ ߛߎߘߊ߲߫ ߘߊ߫߸ ߝߏ߫ ߣߌ߫ ߟߊ߬ߞߐ߰ߟߌ ߞߐߝߍ߬، ߕߎ߬ߡߊ߬ߘߐ߫ ߞߊߙߏ߫ ߛߊ߬ߓߊ߫߸ ߥߟߊ߫ ߛߊ߲߬ ߞߋߟߋ߲߫ ߞߐߝߍ߬. ߞߊ߬ߕߎ߲߯߸ ߒ ߧߴߊ߬ ߝߍ߬ ߞߊ߬ ߓߊ߯ߙߊ ߞߍ߫ ߢߊ ߡߍ߲߸ ߣߴߊ߬ ߡߊ߫ ߞߍ߫ ߕߋ߲߬߸ ߏ߬ ߦߋ߫ ߡߐ߱ ߞߟߊߓߎ ߝߊ߰ ߟߊ߫ ߟߋ߬. ߞߏ߬ߣߌ߲߬ ߞߘߊߎ߫߸ ߒߠߋ ߣߊ߭ߣߊ߬ ߘߊߘߐߞߊ߲ ߠߋ߬߸ ߞߏ߫ ߡߊ߲߬ߜߏߦߊ ߓߊߛߌ ߟߋ߬ ߘߐ߬ߖߊ ߘߌ߫.>> ߊ߬ ߞߵߏ߬ ߦߌ߬ߘߊ߬.


ߟߊ߬ߞߐ߰ߟߌ ߕߘߍ߬ߒ߬ߘߐ߬ߓߊ߮ ߟߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߕߐ߬ߣߐ ߖߍ߬ߘߍߖߍ߬ߘߍ ߛߐ߬ߘߐ߲߫ ߟߊ߬ߞߐ߰ߟߌ ߢߌ߲߬ ߠߊ߫، ߞߊ߬ߕߎ߲߯߸ ߊ߬ߟߎ߬ ߣߌ߫ ߝߋ߲ ߘߏ߫ ߟߎ߫ ߦߋ߫ ߢߐ߲߮ ߞߊ߲߬ ߛߎ ߣߌ߫ ߕߋ߬ߟߋ߸ ߊ߬ߟߎ߫ ߕߎ߲߬ ߡߊ߫ ߡߍ߲ ߠߎ߬ ߕߣߐ߬ ߟߐ߲߫߸ ߊ߬ߟߎ߬ ߓߘߴߊ߬ ߟߐ߲߫ ߞߏ߫ ߖߊ߰ ߕߐ߬ߣߐ ߦߴߏ߬ ߟߎ߬ ߓߍ߯ ߟߊ߫. <<ߊ߲ ߕߎ߲߬ ߡߊ߫ ߟߊ߬ߞߐ߰ߟߌ ߣߌ߲߬ ߢߐ߲߰ ߞߍ߫ ߡߎߣߎ߲߬ ߝߋߝߋ߫، ߊ߬ ߘߌߦߊ߫ ߘߴߊ߲ ߧߋ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬، ߊ߬ ߞߵߊ߲ ߠߊ߫ ߛߎ߲ߞߎ߲߫ ߞߣߐ߫ ߝߋ߲ ߠߎ߫ ߟߋ߬ ߦߌ߬ߘߊ߫ ߒ߬ ߠߊ߫߸ ߝߋ߲ ߏ߬ ߓߍ߯ ߦߴߊ߲ ߓߟߏ߫ ߦߊ߲߬߸ ߊ߲ ߡߴߊ߬ ߟߐ߲߫، ߞߊ߬ߕߎ߲߯߸ ߊ߲ ߕߘߍ߬ ߡߊ߫ ߡߍ߲ ߟߐ߲߫߸ ߊ߲ ߓߘߴߏ߬ ߟߐ߲߫.>> ߛߌ߬ߙߊ߫ ߘߊ߲߬ߛߐ߯ ߟߋ߬ ߞߊ߲߫ ߕߋ߲߬.


ߓߊ߲߬ߓߊ߬ߦߊ߫ ߓߊ߬ߟߊ߫ ߞߡߊ߬ߙߊ߫ ߞߵߊ߬ ߦߌ߬ߘߊ߬ ߞߏ߫ ߖߊ߰ ߓߊ߯ߙߊ ߦߋ߫ ߒ߬ ߓߘߊ ߦߊ߲߬ ߓߊ߲߫ ߢߊ߫ ߕߴߊ߬ ߟߊ߫، <<ߊ߲ ߛߌ߰ߣߍ߲߫ ߛߐ߲߬ ߞߵߊ߲ ߓߟߏ ߟߴߊ߲ ߛߋ߲߭ ߞߊ߲߬ ߞߏ߫ ߓߊ߯ߙߊ߫ ߕߴߦߋ߲߬߸ ߖߊ߰ ߊ߲ߠߎ߬ ߟߋ߬ ߖߍ߬ߘߍ ߛߓߍ߬ ߕߴߊ߲ ߖߍ߬ߘߍ߫ ߡߊ߬، ߣߴߏ߬ ߕߍ߫߸ ߓߊ߯ߙߊ ߦߋ߫ ߖߡߊ߬ߣߊ ߞߣߐ߫.>> ߏ߬ ߝߣߊ߫ ߞߵߏ߬ ߝߐ߫.


ߛߏ߬ߙߌ߫ ߞߏ߬ߣߊ߬ߕߍ߫ ߝߣߊ߫ ߟߊ߫ ߝߐߟߌ߫ ߘߐ߫߸ ߒߞߏ ߛߍ߬ߘߏ߲߬ߠߊ߸ ߞߏ߫ ߊ߬ߟߎ߫ ߞߊ߬ ߝߋ߲ ߡߍ߲ ߠߎ߬ ߟߊߓߊ߯ߙߊ߫ ߞߙߊ߬ߘߏ߲ ߣߌ߲߬ ߘߐ߫߸ ߊ߬ ߓߍ߯ ߦߋ߫ ߛߎ߲ߞߎ߲ ߞߣߐߝߋ߲ ߠߎ߫ ߟߋ߬߸ ߡߍ߲ ߓߍ߯ ߓߐ߫ ߘߊ߫ ߣߏߙߊߛߏߓߊ߫ ߛߏ ߞߣߐ߫߸ ߊ߬ ߝߋ߲߫ ߡߊ߫ ߓߐ߫ ߝߊ߲߬ ߜߘߍ߫ ߝߍ߬. <<ߊ߲ ߞߊ߬ ߓߊ߯ߙߊ ߝߏߦߌ߬ ߞߍ߫߸ ߊ߲ ߞߵߊ߬ ߓߍ߯ ߞߍ߫ ߛߎ߲ߞߎ߲ ߝߋ߲ ߠߎ߬ ߟߋ߬ ߟߊ߫، ߊ߬ ߞߋߟߋ߲߫ ߔߋ ߡߊ߫ ߓߐ߫ ߞߊ߲ߞߊ߲߫߸ ߒ ߕߍߣߊ߬ ߞߎߡߊ߫ ߦߙߐ߫ ߜߘߍ߫ ߡߊ߬، ߊ߬ ߓߍ߯ ߓߐߣߍ߲߫ ߣߏߙߊߛߏߓߊ߫ ߛߏ ߞߣߐ߫ ߦߊ߲߬ ߠߋ߬߸ ߊ߬ ߣߴߊ߬ ߛߏ߫ ߞߐߞߊ߲ߠߊ ߝߋ߲ ߠߎ߬ ߘߐ߫، ߊ߬ ߦߙߌ ߟߎ߬߸ ߊ߬ ߣߴߊ߬ ߓߐ߱ ߟߎ߬߸ ߊ߬ ߣߴߊ߬ ߝߌߘߊ ߟߎ߬߸ ߊ߲ ߞߵߏ߬ ߟߎ߫ ߟߋ߬ ߞߟߐ߬ߦߊ߫߸ ߞߵߏ߬ ߟߎ߬ ߞߍ߫ ߞߊ߬ ߝߊ߰ߣߌ߲ ߠߎ߫ ߞߟߐ߬ߦߊ߬.>> ߛߏ߬ߙߌ߫ ߞߏ߬ߣߊ߬ߕߍ߫ ߞߵߏ߬ ߟߊߛߙߋߦߊ߫.

ߕߎ߬ߡߊ ߘߏ߫ ߟߎ߫ ߟߊ߫߸ ߡߐ߱ ߟߎ߬ ߦߴߊ߬ߟߎ߬ ߡߊߞߊ߬ߛߌ߬ ߟߊ߫߸ ߞߵߏ߬ ߞߎ߲߭ ߞߍ߫ ߊ߬ߟߎ߫ ߛߐ߲߬ߞߐ ߟߊ߫ ߜߟߍ߬ߦߊ ߣߌ߫ ߊ߬ߟߎ߬ ߘߏ߫ ߟߎ߫ ߦߋߝߊߘߌ ߘߌ߫، ߓߊ߬ߙߌ߬߸ ߟߊ߬ߞߐ߰ߓߊ߰ߕߐ ߢߌ߲߬ ߠߎ߫ ߞߵߏ߬ ߕߡߊ߬ߖߌ ߓߊ߲߫߸ ߞߏ߫ ߊ߬ߟߎ߬ ߘߴߊ߬ ߟߊߗߋ߲߰ߧߊ߫߸ ߞߵߊ߬ ߛߐ߲߬ߞߐ ߟߊߣߐ߰ߦߊ߫߸ ߞߵߊ߬ ߛߐ߬ߘߐ߲߬ ߝߣߊ߫ ߟߊߣߐ߰ߦߊ߬ ߓߍ߯ ߡߊ߬.

ߞߊ߬ߕߎ߲߯߸ ߞߏ߫ ߟߊ߬ߢߌߣߌ߲ ߡߍ߲ ߦߴߊ߬ߟߎ߬ ߟߊ߫߸ ߊ߬ߟߎ߬ ߦߋ߫ ߝߊߘߌߦߊߓߐ߫ ߟߊߘߊ߲߫ ߠߊ߫߸ ߡߊ߲߬ߘߋ߲߬ ߘߌ߫ ߦߋ߫ ߡߍ߲ ߘߐ߫߸ ߞߵߊ߬ ߞߍ߫ ߞߟߐ߬ ߘߌ߫߸ ߞߊ߬ ߛߊߥߎߙߊ߫ ߟߴߊ߬ߟߎ߫ ߞߊ߲߬߸ ߡߍ߲ ߘߌ߫ ߡߊ߲߬ߘߋ߲߫ ߦߌ߬ߘߊ߬، ߦߏ߫ ߡߌ߬ߙߌ߲߬ߘߌ ߕߐ߭ ߓߍ߯ ߦߋ߫ ߦߋ߫ ߟߴߊ߬ߟߎ߬ ߟߊ߫ ߝߊߘߌߦߊߓߐ ߟߎ߬ ߘߐ߫ ߢߊ ߡߍ߲ ߡߊ߬.

ߟߊ߬ߞߐ߰ߟߌ ߞߎ߲߭ߝߊ߰ ߘߊ߫ ߛߍߥߊ ߟߋ߬ ߡߊ߬߸ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߟߊ߫ ߘߍ߰ߡߎ߲ ߠߊ߫، ߏ߬ ߡߍ߲ ߓߐ߫ ߘߊ߫ ߞߊ߲ߞߊ߲߫ ߞߊ߬  ߥߊ߫ ߏ߬ ߞߊ߲ߡߊ߬ ߦߋ߲߬، ߊ߬ ߟߊ߫ ߘߍ߰ߡߎ߲ ߓߎ߲ߓߎ߲߫ ߘߊ߫ ߓߊ߯ߙߊ ߟߋ߬ ߡߊ߬߸ ߘߍߒߖߘߍߟߦߊ ߟߋ߬ ߡߊ߬߸ ߖߐ߲߰ߛߊ߫ ߟߐ߲ߠߌ߲߫ ߛߐ߬ߘߐ߲߬ߣߍ߲ ߠߎ߬ ߘߌ߫ ߛߋ߫ ߕߣߐ߬ߓߐ߬ ߟߊ߫ ߢߊ ߡߍ߲ ߡߊ߬߸ ߞߊ߬ ߛߋ߫ ߟߐ߲ߠߌ߲ ߠߎ߫ ߕߊ߬ ߟߊ߫ ߗߍ ߘߐ߫، ߡߍ߲ ߓߊ߯ ߟߊߞߐ߯߸ ߏ߬ ߟߊ߫ ߟߊ߬ߞߐ߰ߟߌ ߏ߬ ߕߐ߬ߣߐ ߦߋ߫ ߛߐ߬ߘߐ߲߬، ߓߊߏ߬߸ ߞߵߊ߬ ߝߐ߫ ߞߏ߫ ߒ ߓߘߊ߫ ߡߐ߰ ߥߊ߯ ߦߙߌߞߊ߫ ߟߊߞߐ߯߸ ߡߐ߰ ߥߊ߯ ߦߙߌߞߊ ߏ߬ ߓߍ߯ ߝߣߊ߫ ߞߊ߫ ߞߊ߲߫ ߞߊ߬ ߛߴߊ߬ ߕߊ߫ ߡߐ߰ ߟߊߞߐ߯ ߟߊ߫߸ ߟߊ߬ߞߐ߰ߟߌ ߝߣߊ߫ ߞߐߝߟߌ ߦߋ߫ ߛߐ߬ߘߐ߲߫ ߡߌ߬ߙߌ߲߬ߘߌ ߓߟߏ߫.

ߏ߬ ߞߍ߫ ߘߊ߫ ߘߊ߰ߣߍ߲߫ ߥߋ߬ߘߋߥߋ߬ߘߋ ߘߌ߫߸ ߊ߬ ߣߌ߫ ߝߊ߰ߣߌ߲߬ ߟߊߘߊ߲ߣߍ߲ ߠߎ߬ ߞߎ߲ߝߊ߲ߓߐ ߘߌ߫ ߟߊ߬ߞߐ߰ߟߌ߬ ߞߣߍ ߞߊ߲߬.