ߛߍߥߊ߫ ߞߏߓߊ߫ ߣߌ߫ ߞߎ߲߬ߠߊ߬ߦߋ߬ߙߋ߲߬ ߞߏ߬ߓߊ߫ ߟߋ߬ ߕߎ߲߬ ߦߴߌߘߐ߫ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ߫ ߞߐ߬ߓߊ߬ߟߏ߲ ߣߌ߲߬ ߡߊ߬߸ ߣߴߏ߬ ߦߋ߫ ߞߐ߲ߘߐ߲߫ ߠߕߊߡߌ߲߫ ߓߟߋߓߟߋ߫ ߘߌ߫߸ ߡߍ߲ ߛߐ߬ߘߐ߲߬ ߘߊ߫ ߝߊ߬ߛߏ ߟߐ߲ߠߌ߲ߦߊ ߟߎ߬ ߣߴߊ߬ ߞߎ߬ߛߊ߲߬ߧߊ ߟߎ߬ ߖߌ߲ߘߊ߲߫ ߓߟߋߓߟߋ ߘߐ߫، ߞߊ߬ߝߊ ߞߊ߬ߣߌ߲߬ߓߊ߮ ߟߎ߫ ߛߐ߬ߘߐ߲߬ ߞߏ߬ ߝߟߐ ߟߋ߬ ߞߍ߫ ߘߊ߫ ߖߊ߲߬ߖߏ߲ ߣߌ߲߬ ߘߐ߫߸ ߊ߬ߟߎ߫ ߘߏ߲߬ ߞߍ߫ ߘߊ߫ ߝߌߟߊߣߊ߲ ߘߌ߫ ߖߌ߬ߣߍ߫ ߡߎ߰ߡߍ ߞߣߐ߫، ߊ߬ߟߎ߬ ߟߊ߫ ߘߐ߬ߖߊ߬ ߞߍߣߍ߲ ߏ߬ ߟߋ ߞߏߛߐ߲߬߸ ߞߐ߲ߘߐ߲߫ ߓߟߋߓߟߋ߫ ߘߌ߫ ߘߴߊ߬ߟߎ߫ ߡߊ߬.

ߕߏ߲ߘߋ߫ ߁߀ ߘߐ߫߸ ߊ߬ߟߎ߫ ߞߊ߬ ߕߏ߲ߘߋ߫ ߇،߃߃ ߛߐ߬ߘߐ߲߫ ߡߙߊ߬ߘߊ߬ߓߊ ߟߊ߫ ߞߎ߲߬ߠߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߞߐߦߌ߬ߘߊ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߵߊ߬ߟߎ߬ ߘߐߖߊ߬ ߟߊ߬ߓߊ߲ ߝߍ߬ ߞߏߛߓߍ߫، ߏ߬ ߞߐߝߍ߬ ߊ߬ߟߎ߫ ߞߊ߬ ߢߐ߲߯ߓߍ߲߬ ߖߡߊ߬ߣߊ ߡߎ߰ߡߍ ߜߊ߬ߛߊ ߘߐ߫߸ ߞߊ߬ ߥߊ߫ ߛߎߘߊ߲߫ ߦߋ߲߬ ߕߏ߲ߘߋ߫ ߇،߇߈ ߠߊ߫ ߟߊ߬ߓߊ߲ ߝߍ߬߸ ߝߏ߫ ߊ߬ߟߎ߬ ߞߍ߫ ߘߊ߫ ߖߌ߬ߣߍ߫ ߡߎ߰ߡߍ ߡߐ߰ ߝߌߟߊߣߊ߲ ߘߌ߫ ߕߏ߬ߟߌ߬ߟߊ ߡߊ߬ߘߎ߮ ߘߐ߫.

ߛߣߊ߬ߛߌ߬ ߒߓߋ߲ߓߊ߬ ߞߡߊ߬ߙߊ߫ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫ ߞߏ߫: <<ߣߌ߲߬ ߦߋ߫ ߞߎ߲߬ߠߊ߬ߦߋ߬ߙߋ߲߬ ߞߏ߬ߓߊ߫ ߟߋ߬ ߘߌ߫߸ ߞߊ߬ ߓߐ߫ ߞߊ߬ ߥߊ߫ ߌ ߝߊ߬ ߓߘߊ ߞߐߦߌ߬ߘߊ߫߸ ߏ߬ ߦߋ߫ ߞߏߓߊ߫ ߟߋ߬ ߘߌ߫، ߊߟߎ߫ ߦߴߊ߬ ߟߐ߲߫߸ ߕߏ߬ߟߌ ߕߍ߫ ߝߋ߲߫ ߘߌ߫߸ ߓߍ߯ ߞߊ߬ ߡߍ߲ ߓߊߓߋ߬، ߕߏ߬ߟߌ߸ >> ߊ߬ ߞߵߏ߬ ߝߐ߫.

ߛߋ߲߬ߢߊ ߣߌ߲߬ ߘߐ߫߸ ߞߊ߲ߞߊ߲ߞߊ ߟߎ߬ ߟߊ߫ ߛߘߍ ߞߎߡߊ߫ ߘߊ߫ ߛߣߍ߬ߞߍ߬ߟߊ ߟߎ߬ ߣߌ߫ ߓߌߦߊ߲߫ ߡߙߊߟߊ ߟߎ߬ ߕߍ ߟߋ߬ ߞߊ߲߬ ߊ߬ߟߎ߬ ߟߊ߫ ߕߏ߬ߟߌ ߘߐ߫، ߞߊ߬ߕߎ߲߯߸ ߏ߬ ߦߋ߫ ߞߏ߫ ߟߋ߬ ߘߌ߫ ߓߌ߬߸ ߡߍ߲ ߕߐ߬ߣߐ ߓߏ߲߬ߓߊ߬ ߞߏߛߓߍ߫، ߏ߬ ߟߋ ߘߐ߫߸ ߊ߬ߟߎ߬ ߟߊ߫ ߕߏ߬ߟߌ ߣߌ߲߬ ߘߐ߫߸ ߊ߬ߟߎ߫ ߡߐ߰ ߛߊ߬ߓߊ߫ ߟߋ߬ ߞߊ߬ ߕߏ߬ߟߌ ߣߌ߲߬ ߖߊ߲߬ߖߏ߲ ߓߐߢߟߊ߫: ߡߊ߬ߡߊ߬ߘߌ߬ ߛߡߊߘߎ߬ ߞߐ߲ߘߍ߫߸ ߏ߬ ߞߍ߫ ߘߊ߫ ߛߣߍ߬ߞߍ߬ߟߊ ߘߌ߫߸ ߡߏ߬ߤߊ߬ߡߍߘ ߂߲ ߞߐ߲ߘߍ߫߸ ߏ߬ ߞߍ߫ ߘߊ߫ ߓߌߦߊ߲߫ ߡߙߊߟߊ ߘߌ߫߸ ߊ߬ ߣߴߊ߬ߟߋ߫ ߖߘߍ߬ߓߊ߬ߞߎ߲ ߛߣߊ߬ߛߌ߫ ߒߓߋ߲ߓߊ߬ ߞߡߊ߬ߙߊ߬߸ ߊ߬ߟߋ ߟߋ߬ ߕߍ߬ߘߍ߫ ߕߏ߬ߟߌ ߣߌ߲߬ ߟߊ ߕߏ߬ߕߍ߬ߡߊ߬ ߕߏ ߘߌ߫߸ ߊ߬ ߣߌ߫ ߟߊ߬ߟߌ߬ߟߌ߬ߟߊ ߕߏ߬ߟߌ ߞߣߐ߫.

ߊ߬ߟߎ߫ ߞߊ߬ ߓߏ߲߬ߓߊ߬ ߞߍ߫ ߣߌ߲߬ ߘߐ߫߸ ߓߊߏ߬ ߊ߬ߟߎ߬ ߥߊ߫ ߞߏ߫ ߝߟߐ ߟߋ߬ ߕߘߍ߬ ߖߌ߲ߘߊ߲ߓߊ ߣߌ߲߬ ߘߐ߫، ߊ߬ߟߎ߫ ߞߊ߬ ߥߟߊ߬ߘߊ߬ ߛߌߦߊߡߊ߲߫ ߕߊ߬ ߣߌ߲߬ ߘߐ߫߸ ߡߍ߲ ߘߴߊ߬ߟߎ߬ ߟߊߟߌ߫ ߊ߬ߟߎ߬ ߟߊ߫ ߞߏ ߟߎ߬ ߟߊߕߊ߯ߡߊ߫ ߢߊ ߟߎ߬ ߘߐ߫ ߥߊ߯ߕߌ߫ ߣߊ߬ߕߐ ߟߎ߬ ߘߐ߫، ߏ߬ ߟߋ ߞߏߛߐ߲߬߸ ߛߣߊ߬ߛߌ߬ ߒߓߋ߲ߓߊ߫ ߞߡߊ߬ߙߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߣߊ߬ߕߊ ߓߏ߲߬ߓߊ߫ ߣߌ߲߬ ߞߏ ߘߐ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬.

<<ߊ߲ ߢߌߣߌ߲ߞߏ ߓߏ߲߬ߓߊ߬ ߞߏߛߓߍ߫، ߓߊߏ߬߸ ߞߍߞߏ߫ ߂߂߲ ߡߍ߲ ߣߊ߬ߕߐ߫߸ ߊ߲ ߠߊ߫ ߟߊ߬ߢߌߣߌ߲ ߕߍ߫ ߘߋ߬߸ ߞߏ߫ ߊ߲ ߧߋ߫ ߞߍ߫ ߡߐ߰ ߝߟߐ߫ ߘߌ߫ ߦߋ߲߬߸ ߓߊ߬ߙߌ߬߸ ߞߐ߲ߘߐ߲߫ ߓߟߋߓߟߋ ߡߍ߲ ߝߣߊ߫ ߦߴߊ߬ ߘߐ߫߸ ߞߵߏ߬ ߟߋ ߕߊ߬ ߖߐ߫.>> ߊ߬ ߞߵߏ߬ ߦߌ߬ߘߊ߬.

ߞߊ߲ߞߊ߲߫ ߕߌ߲߬ߞߎߘߎ߲ ߟߐ߲ߠߌ߲ߦߊ ߝߊ߰ߡߊ ߟߎ߬ ߟߊ߫ ߞߎ߲߬ߠߊ߫߸ ߏ߬ ߟߎ߬ ߝߣߊ߫ ߛߍߥߊ߫ ߘߊ߫ ߟߋ߬ ߣߌ߲߬ ߞߏ ߟߊ߫߸ ߊ߬ ߢߊ ߖߍ߬ߘߍߖߍ߬ߘߍ ߡߊ߬، ߞߊ߬ߕߎ߲߯߸ ߝߏߘߋ߫ ߡߎߛߊ߬ ߞߙߎ߬ߡߊ߬ ߡߍ߲ ߦߋ߫ ߕߌ߲߬ߞߎߘߎ߲ ߟߐ߲ߠߌ߲ߦߊ ߣߌ߫ ߞߎ߲ߝߊ߲ߓߐߟߌ ߣߌ߫ ߞߎ߬ߛߊ߲߬ߧߊ ߜߋ߬ߟߎ߲߬ߠߌ߲߬ߠߊ ߘߌ߫߸ ߏ߬ ߞߊ߬ ߛߣߊ߬ߛߌ߬ ߣߴߊ߬ ߟߊ߫ ߖߊ߬ߡߊ ߕߊ߲߬ߘߏ߫ ߊ߬ߟߎ߬ ߟߊ߫ ߘߐ߬ߖߊ ߞߏߛߐ߲߬.

<<ߊ߬ߟߎ߬ ߛߎߘߊ߲ߣߍ߲߫ ߕߏ߬ߟߌ߬ߟߊ ߟߋ߬ ߘߐ߫߸ ߏ߬ ߘߏ߲߬ ߟߐ߲ߓߊ߮ ߡߊ߲߫ ߛߌߦߊ߫، ߊ߬ߟߋ ߦߋ߫ ߡߐ߱ ߖߏ߮ ߟߋ߬ ߘߏ߲߬ ߠߊ߫߸ ߡߐ߰ ߛߌߦߊߡߊ߲߫ ߘߏ߲߬ ߡߊ߫ ߥߊ߫ ߏ߬ ߘߌ߫، ߏ߬ ߟߋ ߞߊ߬ ߘߐ߬ߞߘߌ߬ߘߊ ߢߊߞߘߐߛߋ߫ ߞߏߛߓߍ߫، ߞߊ߬ߕߎ߲߯߸ ߊ߬ߟߎ߬ ߡߊ߫ ߥߊ߫ ߖߋ߲߬ߓߋ߬ ߝߐ߫ ߞߊ߲ߡߊ߬߸ ߊ߬ߟߎ߬ ߡߊ߫ ߥߊ߫ ߓߟߊߝߐ߫ ߞߊ߲ߡߊ߬، ߊ߬ߟߎ߬ ߥߊߣߍ߲߫ ߖߌ߬ߣߍ߬ߞߊ ߟߎ߬ ߖߏ߯ߘߏ߲߬ ߞߊ߲ ߠߋ߬ ߡߊ߬.>> ߝߏߘߋ߫ ߡߎߛߊ߬ ߞߙߎ߬ߡߊ߫ ߞߵߏ߬ ߦߌ߬ߘߊ߬.

ߡߊ߬ߡߊ߬ߘߌ߫ ߞߓߊ߬ ߡߍ߲ ߦߋ߫ ߡߙߊ߬ߘߊ߬ߓߊ ߟߐ߲ߠߌ߲ߦߊ ߣߌ߫ ߞߎ߲ߝߊ߲ߓߐߟߌ ߣߌ߫ ߞߎ߬ߛߊ߲߬ߧߊ߬ ߞߏ ߟߎ߬ ߗߋߕߌ߮ ߘߌ߫߸ ߏ߬ ߝߣߊ߫ ߞߊ߬ ߕߊ߲߬ߘߏ߬ߟߌ߬ ߞߋߟߋ߲ ߏ߬ ߢߐ߲߰ ߠߊߛߋ߫ ߞߊ߬ߝߊ ߞߊ߬ߣߌ߲߬ߓߊ߮ ߟߎ߫ ߡߊ߬߸ ߊ߬ߟߎ߬ ߟߊ߫ ߘߐ߬ߖߊ ߞߏߛߐ߲߬߸ ߝߏ߫ ߊ߬ߟߎ߬ ߛߋ߫ ߘߊ߫ ߥߊ߫ ߟߊ߫ ߟߊ߬ߓߊ߲ ߘߐ߫߸ ߞߊ߬ ߞߍ߫ ߝߌߟߊߣߊ߲ ߘߌ߫.

<<ߒ ߛߍߥߊߣߍ߲ߓߊ ߟߋ߬ ߕߋ߲߬߸ ߌ ߘߏ߲߬ ߓߊ߯ ߛߍߥߊߓߊ߯ߕߐ ߟߐ߬ ߕߊ ߟߊߝߍ߫ ߟߊ߫߸ ߊ߬ ߘߊߖߌ ߟߵߊ߬ ߟߊߛߊ߬ ߟߊ߫، ߒ ߧߴߊ߲ ߠߊ߫ ߢߊ߬ߙߊ ߟߎ߫ ߝߏ߬ ߟߊ߫߸ ߊ߬ߟߎ߬ ߞߍ ߘߐ߫ ߞߊ߬ ߥߴߊ߲ ߞߎ߲߬ߠߊ߬ߦߋߙߋ߲߫ ߖߌ߲ߘߊ߲ߓߊ ߣߌ߲߬ ߘߐ߫.>> ߊ߬ ߞߵߏ߬ ߦߌ߬ߘߊ߬.

ߖߌ߲ߘߊ߲ߓߊ ߣߌ߲߬ ߛߌ߲߬ߝߏ߲߬ߧߊ߬ ߘߊ߫ ߟߐ߲ߠߌ߲ߦߊ ߣߌ߫ ߞߎ߬ߛߊ߲߬ߧߊ ߞߏߕߌ߮ ߟߋ߬ ߓߟߏ߫߸ ߞߵߊ߬ ߝߐ߫ ߊ߬ ߡߊ߬ ߞߏ߫ ߟߐ߲ߠߌ߲ߦߊ ߣߌ߫ ߞߎ߬ߛߊ߲߬ߧߊ߬ ߞߏ ߟߎ߬ ߖߌ߲ߘߊ߲ߓߊ߫ ߝߊ߬ߛߏ߬ߟߊ߬ߞߊ߸ ߡߍ߲ ߗߋߘߋ߲ ߠߎ߬ ߓߐ߫ ߘߊ߫ ߖߡߊ߬ߣߊ ߡߙߊ߬ߘߓߊ߬ ߃߃ ߓߍ߯ ߞߣߐ߫߸ ߊ߬ ߣߌ߫ ߞߐߣߊߞߙߌ߫ ߞߊ߬ߝߏ߬ߙߋ߲߬ ߁߃ ߓߍ߯ ߟߊߘߍ߬ߣߍ߲ ߞߐߘߍ߫، ߞߍߞߏ ߂߀߲ ߣߌ߲߬ ߞߣߐ߫߸ ߡߐ߬ߟߐ߲ ߘߌ߫ ߘߊ߫ ߞߏ߫ ߛߌߦߊߡߊ߲߫ ߠߋ߬ ߡߊ߬߸ ߛߏߓߊ߫ ߞߣߐ߫ ߘߐ߲ߞߟߌ ߟߎ߬ ߕߍ߬ߘߍ߫ ߊ߬ ߘߐ߫߸ ߝߊ߬ ߓߘߊ ߘߐ߲߭ ߠߎ߬߸ ߓߙߊߘߐߦߊ߸ ߊ߬ ߣߌ߫ ߕߏ߬ߟߌ ߣߌ߫ ߘߏ߫ ߜߘߍ߫ ߟߎ߫.

ߏ߬ ߘߏ߲߬ ߞߎ߲߭ ߕߍ߫ ߘߏ߫ ߜߘߍ߫ ߘߌ߫߸ ߡߙߌߦߊ߫ ߓߘߍ߫ ߟߋ߬ ߕߊ߬ߣߍ߲߬ ߟߐ߲ߠߌ߲ߦߊ ߞߏߕߌ߮ ߡߎߛߊ߫ ߡߏ߬ߦߌߖ߭ ߛߌ߬ߟߊ ߓߟߏ߫߸ ߣߊߟߌ߬ߡߎ߲߬ ߕߊ߲ߓߊ߲ߓߐߟߌ ߘߌ߫، ߏ߬ ߟߋ ߞߏߛߐ߲߬߸ ߛߊ߲߭ ߣߊ߬ߕߐ ߕߊ ߓߍߣߊ߬ ߞߍ߫ ߖߡߊ߬ߣߊ ߞߣߐߟߊ ߟߋ߬ ߘߐ߫߸ ߛߊ߫ ߞߊ߬ ߡߐ߬ߟߐ߲ ߘߌ߫ ߊ߲ ߓߘߊ߫ ߞߏ ߟߎ߫ ߡߊ߬߸ ߊ߬ ߣߌ߫ ߡߍ߲ ߠߎ߬ ߝߣߊ߫ ߥߟߌ߬ߕߐ߬ߟߊ ߦߋ߫߸ ߞߵߏ߬ ߟߎ߬ ߛߐ߫ ߞߟߊߓߎ ߟߊ߫.