ߖߋ߲߬ߓߋ ߦߋ߫ ߊ߲ ߠߊ߫ ߝߋ߲߫ ߞߘߐ߫ ߟߋ߬ ߘߌ߫ ߡߊ߲߬ߘߋ߲߬ ߞߣߐ߫߸ ߡߍ߲ ߦߴߊ߲ ߠߊ߫ ߟߐ߲ߠߌ߲ߦߊ߫ ߟߊߞߎߣߎ߲ ߝߋ߲ ߘߏ߫ ߘߌ߫߸ ߖߋ߲߬ߓߋ ߦߋ߫ ߝߐ߫ ߟߊ߫ ߕߏߟߏ߲߫ ߘߐߞߏ ߟߎ߫ ߟߋ߬ ߘߐ߫߸ ߞߊ߬ ߕߏߟߏ߲ ߠߊ߫ ߟߎ߫ ߟߊߛߍߥߊ߫߸ ߞߊ߬ ߕߏߟߏ߲ ߖߍ߬ߘߍ ߝߣߊ߫ ߘߐߘߌߦߊ߫߸ ߖߋ߲߬ߓߋ ߟߎ߬ ߝߣߊ߫ ߛߎ߮ ߓߐߣߍ߲߫ ߢߐ߲߮ ߡߊ߬߸ ߦߏ߫ ߖߋ߲߬ߓߋ߬ ߝߐ߬ߟߊ ߟߎ߬ ߞߎߡߊ߫ ߘߴߊ߲ ߧߋ߫ ߏ߬ ߞߊ߲߬ ߢߊ߫ ߡߍ߲ ߡߊ߬߸ ߊ߬ߟߋ ߦߋ߫ ߝߐߟߌ߫ ߟߋ߬ ߘߌ߫߸ ߡߍ߲ ߦߋ߫ ߞߊ߬ߙߊ߲߬ ߠߴߊ߬ ߝߐߓߊ߮ ߟߎ߬ ߓߟߏ߫߸ ߞߊ߬ ߡߊ߲߬ߞߊ߲߬ ߓߐߣߍ߲ߢߐ߲߰ߡߊ ߟߎ߬ ߞߊ߬ߙߊ߲߬ ߊ߬ ߘߐ߫߸ ߛߋ߭ߘߎ߬ ߘߎ߲ߓߎߦߊ߫ ߡߍ߲ ߦߋ߫ ߖߋ߲߬ߓߋ߬ ߝߐ߬ߟߊ߬ ߘߌ߫ ߛߊ߬ߞߐ߬ߘߎ߯ ߞߎ߲ߖߊ߲߫߸ ߣߴߊ߬ ߡߊ߬ߟߐ߲߬ ߕߐ߮ ߦߋ߫ ߛߋ߭ߘߎ߬ ߖߋ߲߬ߓߋ ߘߌ߫߸ ߏ߬ ߛߋ߫ ߘߊ߫ ߘߊߘߐ߫ ߢߌ߬ߣߌ߲߬ߞߊ߬ ߟߴߊ߲ ߓߟߏ߫߸ ߞߊ߬ ߓߍ߲߬ ߊ߬ ߟߊ߫ ߖߋ߲߬ߓߋ߬ ߝߐ ߡߊ߬߸ ߊ߬ ߣߴߊ߬ ߓߘߊ߫ ߕߐ߬ߣߐ ߡߍ߲ ߠߊߛߴߊ߬ ߡߊ߬߸ ߊ߬ߟߋ ߡߍ߲ ߛߊ߲߬ ߦߙߌߞߊ߫ ߦߋ߫ ߖߋ߲߬ߓߋ߬ ߝߐ ߘߐ߫ ߣߌ߬.

 

<<ߒ ߝߊ߬ ߡߊ߫ ߒ ߠߊ߫ ߝߐߟߌ ߘߐߛߊ߬ ߒ ߡߊ߬߸ ߒ ߣߊ߬ ߡߊ߫ ߒ ߠߊ߫ ߝߐߟߌ ߘߐߛߊ߬ ߒ ߡߊ߬߸ ߤߊߟߌ߬ ߒ ߓߊߘߋ߲ߡߊ ߟߎ߬߸ ߏ߬ ߟߎ߫ ߖߍ߬ߘߍ ߦߴߊ߬ ߝߐ߫ ߟߊ߫ ߟߋ߬ ߒߠߋ ߡߊ߬ ߕߋ߲߬߸ ߞߏ߫ ߒ ߧߋ߫ ߥߊ߫ ߝߐߟߌ߫ ߦߙߐ، ߒߠߋ ߞߊ߬ ߓߊ߯ߙߊ ߢߌ߲߬ ߞߊ߬ߙߊ߲߫ ߒ ߘߍ߬ߢߐ߲߮ ߘߏ߫ ߟߋ߬ ߝߍ߬߸ ߒ ߕߘߍ߬ ߦߋ߫ ߓߐ߫ ߟߊ߫ ߞߊ߬ߙߊ߲߬ ߦߙߐ ߟߋ߬ ߘߐ߫߸ ߞߊ߬ ߥߊ߫ ߏ߬ ߟߎ߬ ߞߐ߫ ߝߐߟߌ߫ ߦߙߐ߸ ߕߏ߫ ߞߍ߫ ߘߊ߫ ߏ߬ ߟߋ߬ ߘߐ߫߸ ߊߟߊ߫ ߞߵߊ߬ ߞߍ߫߸ ߞߊ߬ߙߊ߲ ߡߊ߫ ߟߊߓߊ߲߫߸ ߊ߬ ߘߊߡߌ߬ߣߊ ߒ ߓߟߏ߫ ߊ߬ ߣߌ߫ ߛߌߛߍ߲߬ ߕߍ ߘߐ߫߸ ߏ߬ ߓߘߊ߫ ߛߊ߲߬ ߂߀ ߣߌ߫ ߘߏ߫ ߓߐ߫، ߒ ߓߘߊ߫ ߕߐ߬ߣߐ ߘߏ߫ ߛߐ߬ߘߐ߲߬ ߊ߬ ߘߐ߫.

 

ߓߊߏ߬߸ ߌ ߓߊ߯ ߒ ߠߊ߫ ߡߐ߱ ߟߎ߬ ߘߌ߬ߢߍ߬ߣߍ߲ ߦߋ߫ ߒ ߡߊ߬ ߓߊ߯ߙߊ ߢߌ߲߬ ߞߊ߲߬߸ ߏ߬ ߞߎ߲߭ ߦߴߊ߬ ߕߐ߬ߣߐ ߟߋ߬ ߘߌ߫߸ ߒ ߓߘߊ߫ ߡߕߏ ߛߐ߬ߘߐ߲߬ ߊ߬ ߘߐ߫߸ ߞߊ߬ ߝߋ߲߫ ߜߘߍ߫ ߟߎ߫ ߝߣߊ߫ ߛߐ߬ߘߐ߲߫ ߊ߬ ߘߐ߫.>> ߖߋ߲߬ߓߋ ߟߎ߬ ߝߣߊ߫ ߛߎ߮ ߟߎ߬ ߓߐߣߍ߲߫ ߠߋ߬ ߢߐ߲߮ ߡߊ߬߸ ߥߙߏ߬ ߖߋ߲ߓߋ߸ ߜߍ߲߭ ߕߊ߸ ߊ߬ ߣߌ߫ ߘߏ߫ ߜߘߍ߫ ߟߎ߫߸ ߦߙߐ߫ ߟߎ߬ ߘߏ߲߬ ߝߣߊ߫ ߖߋ߲߬ߓߋ߬ ߝߐ߬ߢߊ ߟߎ߬ ߕߍ߫ ߞߋߟߋ߲ߘߌ߫߸ ߊ߬ ߣߌ߫ ߓߍ߯ ߣߴߊ߬ ߟߊ߫ ߖߋ߲߬ߓߋ߬ ߓߟߏ ߟߋ߬߸ ߛߋ߭ߘߎ߬ ߖߋ߲߬ߓߋ ߛߋ߫ ߘߊ߫ ߏ߬ ߘߏ߫ ߟߎ߫ ߢߊߝߐ߫ ߟߴߊ߲ ߧߋ߫߸ ߞߊ߬ ߓߍ߲߬ ߖߋ߲߬ߓߋ ߛߎ߯ߦߊ ߟߎ߫ ߡߊ߬߸ ߊ߬ ߣߌ߫ ߛߏ ߟߎ߬ ߝߣߊ߫ ߟߊ߫ ߝߐߟߌ߫ ߢߊ ߟߎ߬ ߕߍ߫ ߞߋߟߋ߲ߘߌ߫<<ߖߋ߲߬ߓߋ ߡߍ߲ ߦߋ߫ ߒߠߋ ߓߟߏ߫ ߕߋ߲߬߸ ߊ߬ ߦߋ߫ ߝߐ߫ ߟߊ߫ ߢߌ߲߬ ߠߋ߬ ߡߊ߬ ߞߏ߫ ߥߙߏ߬ ߖߋ߲ߓߋ߸ ߖߋ߲߬ߓߋ ߓߍ߯ ߝߣߊ߫ ߘߐ߫߸ ߥߙߏ߬ ߖߋ߲ߓߋ ߟߋ߬ ߞߊ߫ ߢߌ߲߬ ߊ߬ ߓߍ߯ ߘߌ߫߸ ߊ߬ߟߋ ߓߊ߯ ߓߐ߫ ߦߋ߲߬߸ ߖߟߊ߸ ߟߍ߲߬ߞߍ߸ ߞߊ߬ ߜߍ߲߭ ߕߎ߲߰ ߏ߬ ߟߊ߫߸ ߦߙߌߟߞߊ ߏ߬ ߟߎ߫ ߟߋ߬ ߦߋ߫ ߘߐߓߍ߲߬ ߠߊ߫ ߞߊ߬ ߞߍ߫ ߖߋ߲߬ߓߋ ߘߌ߫߸ ߜߋ߲ߞߐ߰ߖߌ߬ߘߊ ߞߊ߲߫ ߞߏ߫ ߥߙߏ߬ߞߏ߸ ߏ߬ ߟߋ߬ ߦߋ߫ ߞߟߌ߫ ߟߊ߫ ߊ߲ߠߎ߬ ߓߟߏ߫ ߦߊ߲߬ ߞߏ߫ ߥߙߏ߬ ߖߋ߲ߓߋ.

 

ߒߠߋ ߞߏ߬ߣߌ߲ ߦߋ߫ ߛߋ߫ ߟߊ߫ ߖߋ߲߬ߓߋ ߛߎ߯ߦߊ߫ ߓߍ߯ ߝߐ߫ ߟߊ߫߸ ߥߊߛߏߟߏ߲߫ ߖߋ߲ߓߋ ߦߋ߲߬߸ ߝߎߟߊ߫ ߖߋ߲ߓߋ ߦߋ߲߬߸ ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫߸ ߓߊߏ߬߸ ߛߏ ߟߎ߬ ߝߐߟߌ ߟߎ߬ ߝߣߊ߫ ߕߍ߫ ߞߋߟߋ߲ߘߌ߫߸ ߣߴߌ ߦߴߊ߬ ߡߊߝߟߍ߫ ߟߊ߫߸ ߦߊ߲߬ ߝߐߟߌ ߣߌ߫ ߞߌ߬ߢߊ߬ߙߊ߲߬߸ ߝߐߟߌ ߕߍ߫ ߞߋߟߋ߲ߘߌ߫.>> ߊ߬ ߟߊ߫ ߝߐߟߌ߫ ߘߐ߫ ߊ߲ ߧߋ߫߸ ߞߊ߬ ߓߐ߫ ߥߊߛߏߟߏ߲߫ ߡߊ߬ ߞߊ߬ ߕߊ߯ ߛߌ߯ߙߌ߲߫߸ ߊ߬ߟߋ ߦߋ߫ ߘߏ߫ ߞߍ߫ ߟߊ߫ ߏ߬ ߟߎ߬ ߟߊ߫ ߝߐߟߌ߫ ߢߊ ߟߎ߬ ߘߐ߫߸ ߌ ߓߴߊ߬ߟߋ ߓߌ߬ߟߊ߬ ߏ߬ ߟߎ߬ ߕߍߡߊ߬߸ ߤߊߟߌ߬ ߣߴߊ߬ ߡߊ߫ ߞߍ߫ ߝߟߐߡߊ߫ ߘߌ߫߸ ߊ߬ ߞߏ߬ߣߌ߲ ߕߍ߫ ߓߌ߬ߟߊ߬ ߗߌߙߏ߲ߓߊ߯ߕߐ ߟߎ߬ ߛߙߍߘߍ ߘߐ߫߸ ߊ߬ ߞߍ߫ ߘߊ߫ ߖߋ߲߬ߓߋ߬ ߘߌ߫߸ ߊ߬ ߞߍ߫ ߘߊ߫ ߘߎ߬ߣߎ߲߬ ߘߌ߫߸ ߊ߬ ߘߴߊ߬ ߝߐ߫߸ ߊ߬ ߦߋ߫ ߝߐ߫ ߟߴߊ߬ߟߋ ߕߊ ߏ߬ ߟߋ߬ ߡߊ߬ ߞߏ߫ ߝ߭ߏߟߑߝ߭ߊߟߊ߲، ߛߋ߭ߘߎ߬ ߘߎ߲ߓߎߦߊ߫ ߞߊ߬ ߢߊߝߐߟߌߣߍ߲߫ ߞߍ߫ ߊ߲ ߧߋ߫ ߖߋ߲߬ߓߋ ߕߐ߬ߣߐ ߞߊ߲߬ ߛߏ ߞߣߐ߫߸ ߊ߬ ߣߴߊ߬ ߦߋ߫ ߟߊߘߊ߲߫ ߠߴߊ߬ߟߎ߬ ߓߟߏ߫ ߝߋ߲ ߡߍ߲ ߠߎ߬ ߝߣߊ߫ ߘߐ߫߸ ߊ߬ ߘߊ ߛߋ߫ ߘߊ߫ ߏ߬ ߡߊ߬ ߊ߲ ߧߋ߫.

 

<<ߖߋ߲߬ߓߋ ߕߐ߬ߣߐ ߘߏ߫ ߦߋ߫ ߡߍ߲ ߘߌ߫ ߛߏ ߞߣߐ߫߸ ߕߏߟߏ߲߫ ߘߐߞߏ ߘߏ߫ ߟߎ߫ ߓߊ߯ ߣߊ߬ ߛߏ ߞߣߐ߫߸ ߞߊ߬ ߖߋ߲߬ߓߋ ߟߊߓߐ߫ ߏ߬ ߘߐ߫߸ ߟߊߒߡߊ߫ ߘߐ߫߸ ߞߏ߲߬ߘߋ߲߬ ߟߊ߬ߓߐ ߡߍ߲ ߦߋ߫ ߞߍ߫ ߟߴߊ߲ ߝߍ߬ ߦߊ߲߬ ߕߋ߲߬߸ ߖߋ߲߬ߓߋ ߟߋ߬ ߦߋ߫ ߓߌ߬ߟߊ߬ ߟߊ߫ ߏ߬ ߞߐ߫߸ ߓߊߏ߬߸ ߣߌ߫ ߖߋ߲߬ߓߋ ߡߊ߫ ߓߌ߬ߟߊ߬ ߏ߬ ߞߐ߫߸ ߊ߬ ߕߍ߫ ߘߌߦߊ߫ ߟߊ߫߸ ߖߋ߲߬ߓߋ ߦߋ߫ ߟߊߘߊ߲߫ ߠߊ߫ ߝߋ߲߫ ߛߌߦߊߡߊ߲߫ ߠߋ߬ ߘߐ߫߸ ߞߊߙߌ߫ ߡߍ߲ ߦߋ߫ ߞߍ߫ ߟߊ߫ ߞߵߊ߬ ߛߘߌ߬ ߏ߬ ߛߐ߲߬ߞߐ ߦߴߊ߬ ߟߐ߬ ߟߊ߫ ߤߊ߲߯ ߞߋ߲߬ߥߟߎ߫ ߞߋߟߋ߲߫ ߢߐ߲߰߸ ߏ߬ ߘߏ߲߬ ߝߣߊ߫ ߕߍ߫ ߛߐ߬ߘߐ߲߬ ߠߴߊ߲ ߝߍ߬ ߦߊ߲߬߸ ߝߏ߫ ߜߋ߲ߞߐ߰ߖߌ߬ߘߊ ߟߊ߫߸ ߣߌ߫ ߓߌ߬ߟߊ߬ߢߐ߲߰ߡߊ߬ ߕߍ߫ ߏ߬ ߣߴߏ߬ ߕߍ߫߸ ߌ ߕߴߛߋ߫ ߝߐߟߌ ߞߍ߫ ߟߊ߫߸ ߓߊ߬ߜߟߏ ߡߍ߲ ߝߣߊ߫ ߦߋ߫ ߞߍ߫ ߟߴߊ߬ ߘߌ߫߸ ߓߊ߭ ߓߍ߯ ߝߣߊ߫ ߕߴߏ߬ ߘߌ߫߸ ߏ߬ ߦߋ߫ ߞߍ߫ ߟߊ߫ ߡߊߟߌߦߍ߲߫ ߓߊ ߏ߬ ߟߎ߫ ߟߋ߬ ߘߌ߫߸ ߓߊ߬ߖߊ߲ ߏ߬ ߟߎ߬.>>

 

ߡߊ߲߬ߞߊ߲ ߘߏ߫ ߟߎ߫ ߟߋ߬ ߦߋ߫ ߓߐ߫ ߟߊ߫ ߖߋ߲߬ߓߋ ߘߊ߫ ߟߊ߫ ߖߋ߲߬ߓߋ߬ ߝߐ߬ߟߊ ߟߎ߬ ߓߟߏ߫߸ ߓߍ߯ ߕߍ߫ ߡߍ߲ ߞߊ߬ߟߊߡߊ߬߸ ߣߴߌߟߋ ߡߍ߲ ߕߍ߫ ߖߋ߲߬ߓߋ߬ ߝߐ߬ߟߊ߬ ߘߌ߫߸ ߌ ߕߍ߫ ߏ߬ ߟߐ߲߫߸ ߤߊߟߌ߬ ߖߋ߲߬ߓߋ߬ ߝߐ߬ߟߊ ߓߍ߯ ߖߍ߬ߘߍ ߝߣߊ߫ ߕߍ߫ ߏ߬ ߞߊ߬ߟߊߡߊ߬ ߓߏ߲߬߸ ߛߋ߭ߘߎ߬ ߘߎ߲ߓߎߦߊ߫ ߟߋ߬ ߞߊ߲߫ ߕߋ߲߬߸ ߞߊ߬ ߓߍ߲߬ ߖߋ߲߬ߓߋ߫ ߞߏ ߡߊߘߐ߯ߦߊ߫ ߡߊ߬ ߛߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߖߋ߲߬ߓߋ ߝߐߓߊ߮ ߟߋ߬ ߡߊ߲߫ ߛߌߦߊ߫ ߏ߬ ߞߐ߫߸ ߓߊߏ߬߸ ߥߊߘߌ ߟߋ߬ ߕߘߍ߬ ߦߋ߫ ߛߐ߬ߘߐ߲߬ ߠߴߊ߬ ߘߐ߫ ߝߟߐ߫߸ ߓߊ߬ߙߌ߫߸ ߊ߬ ߕߍ߫ ߏ߬ ߢߊ ߓߎ߬ߕߎ߲߫߸ ߝߏ߫ ߌ ߓߊ߯ ߕߊ߯ ߛߏ߫ ߡߌߛߍ߲ ߠߎ߬ ߟߊ߫ ߖߋ߲߬ߓߋ߬ ߝߐ߫ ߞߊ߲ߡߊ߬߸ ߊ߬ߟߋ ߞߏ߬ߣߌ߲ ߡߴߊ߬ ߓߟߏߓߐ߫ ߊ߬ ߘߐ߫ ߝߟߐ߫߸ ߊ߬ߟߋ ߟߊ߫ ߝߐߟߌ ߣߴߊ߬ ߟߊ߫ ߝߐߟߌߓߊߟߌߦߊ ߦߋ߫ ߕߏ߫ ߟߴߊ߬ ߖߍ߬ߘߍ ߟߋ߬ ߟߊ߫߸ ߊ߬ ߣߴߊ߬ ߟߊ߫ ߓߊ߯ߙߊ߫ ߝߋ߲ ߠߎ߬ ߕߌߢߍ߸ ߣߴߏ߬ ߕߍ߫߸ ߡߐ߰ ߞߊ߬ߙߊ߲߬ߕߊ ߡߍ߲ ߦߴߊ߬ ߓߟߏ߫ ߕߋ߲߬ ߦߙߐ߫ ߜߘߍ߫ ߟߎ߫ ߘߐ߫߸ ߖߋ߲߬ߓߋ߬ ߝߐ ߟߊ߫߸ ߏ߬ ߞߊ߬ ߡߐ߰ ߥߐ߯ߙߐ߫ ߢߐ߲߰ ߓߐ߫߸ ߊ߬ ߟߊ߫ ߞߎߡߊ߫ ߘߐ߫.

 

ߡߐ߱ ߟߎ߬ ߕߍ߫ ߛߐ߲߬ ߠߴߊ߬ߟߎ߬ ߘߋ߲ ߠߎ߬ ߓߌ߬ߟߊ߬ ߟߊ߫ ߝߐߟߌ߫ ߟߊ߫߸ ߞߊ߬ ߛߐ߬ߘߐ߲߬ ߝߋ߲ ߓߍ߯ ߦߋ߫ ߛߐ߬ߘߐ߲߬ ߠߊ߫ ߝߐߟߌ ߘߐ߫߸ ߊ߬ߟߎ ߘߏ߲߬ ߓߊ߯ ߊ߬ߟߎ߬ ߓߟߏߓߐ߫ ߊ߬ ߘߐ߫ ߕߋ߲߬ ߌߞߘߐ߫߸ ߖߋ߲߬ߓߋ ߘߌ߫ ߕߎߣߎ߲߫ ߞߎ߲ߖߊ߲߫<<ߣߴߌ ߞߵߊ߬ ߝߐ߫ ߛߍ߲ ߞߏ߫ ߊ߬ߟߎ߬ ߦߴߊ߬ߟߎ߬ ߘߋ߲ ߠߎ߬ ߓߌ߬ߟߊ߬ ߝߐߟߌ ߟߊ߫߸ ߊ߬ߟߎ߬ ߘߴߊ߬ ߝߐ߫ ߞߏ߫ ߞߏ߫ ߢߌߡߊ߫ ߕߍ߫߸ ߊ߬ ߘߏ߲߬ ߝߋ߲ ߓߍ߯ ߦߋ߫ ߛߐ߬ߘߐ߲߬ ߠߊ߫ ߝߐߟߌ ߘߐ߫߸ ߤߊߟߌ߬ ߡߌ߬ߛߙߌ ߦߋ߫ ߛߐ߬ߘߐ߲߬ ߠߊ߫ ߝߐߟߌ ߘߐ߫߸ ߡߊ߲߬ߛߊ߬ߦߊ ߘߌ߫ ߛߐ߬ߘߐ߲߬ ߝߐߟߌ ߘߐ߫߸ ߡߊ߲߬ߛߊ ߛߍߥߊ߫ ߕߐ߫ ߘߎ߱ ߟߊ߫ ߟߋ߬ ߞߏ߫ ߕߏߟߏ߲ ߝߋ߲ ߡߍ߲ ߦߋ߫ ߦߊ߲߬ ߞߏ߫ ߊ߬ ߞߊ߫ ߢߌ߲߬߸ ߐ߲ ߣߴߏ߬ ߕߍ߫ ߦߋ߲߬ ߘߏ߲߬؟ߣߌ߫ ߊ߲ߠߎ߬ ߞߵߊ߲ ߓߟߏߓߐ߫ ߝߐߟߌ ߘߐ߫ ߦߊ߲߬ ߕߋ߲߬߸ ߝߐߟߌ ߓߘߊ߫ ߓߊ߲߫، ߓߊߏ߬߸ ߡߐ߰ ߕߍߣߵߊ߬ ߝߐ߫ ߟߊ߫ ߞߏ߫ ߌ ߟߐ߬ ߒ ߧߋ߫ ߒ ߘߋ߲ ߓߌ߬ߟߊ߬ ߝߐߟߌ ߟߊ߫.>>

 

 ߛߋ߭ߘߎ߬ ߘߎ߲ߓߎߦߊ߫ ߞߏ߬ߣߌ߲ ߞߵߊ߬ ߦߌ߬ߘߊ߬߸ ߞߏ߫ ߣߌ߫ ߝߊ߰ߡߊ ߟߎ߬ ߣߌ߫ ߓߐߒߖߘߍߘߐ߫ ߡߐ߮ ߟߎ߬ ߛߋ߫ ߘߴߊ߬ߟߎ߬ ߢߊ ߟߐ߬ ߟߊ߫ ߊ߬ߟߎ߬ ߘߐ߫߸ ߞߵߊ߬ߟߎ߬ ߡߊߘߍ߬ߡߍ߲߫ ߓߊ߯ߙߊ߫ ߡߎߙߊ߲߫ ߞߏ ߘߐ߫߸ ߊ߬ ߛߌߦߊߡߊ߲߫ ߘߐ߫߸ ߊ߬ߟߎ߬ ߟߊ߫ ߓߊ߯ߙߊ ߘߌ߫ ߡߊߦߟߍ߬.