ߖߌ߬ߣߍ߫ ߜߊ߬ߕߌ߰ ߝߟߐ߫ ߞߘߐ߬ߡߊ߲߸ ߤߊߖߊ߬ ߊ߲ߘߙߋ߫ ߕߎ߬ߙߋ߬߸ ߛߋߞߎ߫ ߕߎ߬ߙߋ߫ ߡߛߏ߬ ߜߐ߮߸ ߏ߬ ߞߊ߬ ߡߊ߲߬ߛߊ߬ߓߊ ߟߊ߫ ߞߟߌߟߌ ߟߊߡߌ߬ߣߊ߫ ߓߌ߬ ߞߎߣߎ߲ߟߏ߲ ߣߌ߲߬ ߡߊ߬ ߂߀߂߆ ߞߊ߬ߙߌ߬ߝߐ ߕߟߋ߬ ߈ ߡߊ߬ ߡߊ߬ߙߐߞߎ߬߸ ߊ߬ ߞߊߙߏ߫ ߦߙߌߞߊ ߕߘߍ߬ ߘߊ߲ߘߊߟߌ ߘߊߞߘߐ߫ ߦߋ߲߬ ߡߍ߲ ߘߐ߫ ߕߋ߲߬، ߊ߬ ߟߊ߫ ߛߊ߬ߦߊ ߞߍߣߍ߲߫ ߖߌ߬ߣߍ߫ ߘߐ߬ߝߐ ߘߏ߫ ߟߋ߬ ߞߐߜߍ ߦߟߍ߬ߡߊ߲߬ߣߍ߲ ߘߌ߫߸ ߊ߬ ߜߎ ߟߊ߫ ߛߊ߬ߦߊ ߞߍߣߍ߲߫ ߕߐ߰ߡߊ߬ߛߙߋ ߘߏ߫ ߟߋ߬ ߞߎ߲߬ߝߊ߮ ߘߌ߫ ߕߋ߲߬.
ߊ߬ ߛߐ߬ߘߐ߲߬ ߘߊ߫ ߁߉߃߄ ߠߋ߬ ߟߊ߫ ߡߊ߬ߛߊ߲߬ߕߊ߲߬߸ ߊ߬ ߟߊߡߐ߬ ߘߊ߫ ߞߊ߲ߞߊ߲߫ ߠߋ߬߸ ߊ߲ߘߙߋ߫ ߛߌ߰ ߘߊ߫ ߛߋߞߎ߫ ߕߎ߬ߙߋ߫ ߞߎ߲߬ ߝߘߎ߫ ߟߊ߫ ߁߉߅߃ ߓߟߏߞߓߊ ߟߋ߬ ߟߊ߫، ߊ߬ ߟߊߡߐ߬ ߘߊ߫ ߟߊ߱ߖߌ߬ ߛߋߞߎ߬ ߞߓߊ߬ ߟߊ߫ ߟߎ ߟߋ߬ ߞߣߐ߫ ߞߊ߲ߞߊ߲߫، ߊ߲ߘߙߋ߫ ߕߎ߲߬ ߦߋ߫ ߘߊ߲ߘߊߟߌߟߊ߫ ߘߎ߳ߔߑߟߊ߲ߕߌߦߋ߫ ߘߋ߲ ߠߋ߬ ߦߴߊ߬ ߘߌ߫߸ ߏ߬ ߕߍ߬ߘߍ߫ ߝߊ߬ߙߊ߲߬ߛߌ߫ ߣߊ߲߬ߕߌ߰ ߘߊ߲ߘߊߟߌߟߊ ߟߋ߬ ߘߌ߫ ߖߌ߬ߣߍ߬ ߞߣߐ߫ ߦߊ߲߬، ߊ߬ ߣߊ߫ ߦߋ߫ ߓߐ߬ߟߐ߲߬ߞߊ߫ ߞߊ߬ߦߌߛߊ߬ ߞߙߎ߬ߡߊ߬ ߘߌ߫، ߊ߲ߘߙߋ߫ ߘߎ߰ߙߋ߲߬ ߕߐ߮ ߟߋ߬߸ ߞߏ߫ ߊ߲ߘߙߋ ߘߎ߳ߔߑߟߊ߲ߕߌߦߋ߫، ߊ߬ ߘߌ ߛߋߞߎ߫ ߕߎ߬ߙߋ߫ ߡߊ߬߸ ߊ߬ߟߎ߬ ߟߊ߫ ߝߘߎ ߛߘߌ߬ ߘߊ߫ ߓߟߏߞߓߊ ߟߋ߬ ߝߍ߬߸ ߁߉߅߃ ߛߊ߲߭ ߠߊ߫.
ߖߘߍ߬ߕߌ߰ߦߊ ߕߊ߭ ߞߐߝߍ߬߸ ߣߴߊ߬ ߟߊߥߊ߲߬ߞߊ߲߬ ߘߊ߫ ߁߉߅߈ ߠߊ߫߸ ߊ߲ߘߙߋ߫ ߞߍ߫ ߘߊ߫ ߖߌ߬ߣߍ߫ ߖߡߊ߬ߣߊ ߞߊ߲ߓߍ߲ ߜߊ߬ߕߌ߰ ߝߟߐ ߝߟߐߝߟߐ ߘߌ߫، ߊ߬ ߞߊ߬ ߛߊ߲߭ ߡߎ߬ߥߊ߲ ߣߌ߫ ߥߐ߯ߙߐ߫ ߞߍ߫߸ ߊ߬ ߦߴߊ߬ ߗߍ߬ ߞߐ߫ ߢߊ ߏ߬ ߡߊ߬ ߜߊ߬ߕߌ߰ ߝߟߐ߬ߦߊ ߡߐ߬ߟߐ߲ ߘߌ߫߸ ߊ߬ ߕߘߍ߬ ߞߏ߫ ߛߌߦߊߡߊ߲߫ ߞߍ߫ ߟߊ߫ ߊߘߡߊߦߊ ߡߊߘߍ߬ߡߍ߲ ߘߐ߫.
ߊ߬ ߗߍ߬ ߛߊ߭ ߡߍ߲ ߞߍ߫ ߘߊ߫ ߁߉߈߄ ߕߙߊߓߊ ߟߊ߫߸ ߊ߬ ߞߊ߬ ߘߎߢߊ߫ ߞߘߐߓߐߟߌ ߘߏ߫ ߦߋ߫ ߏ߬ ߟߏ߲ ߠߋ߬، ߛߊ߬ߦߊ ߏ߬ ߞߐߝߍ߬ ߕߟߋ߬ ߘߊ߲ߘߐ߫߸ ߖߡߊ߬ߣߊ ߓߌ߬ߟߊ߬ ߘߊ߫ ߓߟߏ߫ ߞߎߘߊ߫ ߘߐ߫ ߡߊ߬ߙߊ ߕߊ߫ ߓߟߏ ߡߊ߬߸ ߡߍ߲ ߣߌ߫ ߞߘߐ߬ߡߊ߲ ߕߍ߫ ߞߋߟߋ߲߫ ߘߌ߫، ߊ߬ ߣߴߊ߬ ߘߋ߲ߞߍ߫ ߊ߲ߘߙߋ߫ ߡߊ߯ߘߌ߫ ߡߌ߬ߣߊ߬ ߘߊ߫ ߛߋ߲߬ߢߊ ߏ߬ ߟߋ ߝߍ߬߸ ߊ߬ߟߎ߫ ߞߊ߬ ߛߊ߲߬ ߣߊ߯ߣߌ߲߫ ߞߍ߫ ߥߛߎ ߟߊ߫߸ ߊ߬ߟߎ߫ ߣߊ߬ ߘߊ߫ ߓߐ߫ ߥߛߎ ߟߊ߫ ߞߊ߬ ߥߊ߫ ߢߊߣߌ߲ߡߊߓߏߙߌ ߞߎߎ߲߬ߝߍ߬ ߕߊ߯ߟߌ ߘߐ߫، ߕߊ߯ߡߊ ߏ߬ ߘߐ߫߸ ߊ߬ߟߎ߫ ߞߊ߬ ߘߏ߫ ߞߍ߫ ߡߊ߬ߙߐߞߎ߬߸ ߞߊ߬ ߘߏ߫ ߞߍ߫ ߜߋ߲ߞߐ߰ߖߌ߬ߘߊ ߟߊ߫߸ ߞߊ߬ ߥߊ߫ ߘߏ߫ ߞߍ߫ ߛߣߍ߬ߜ߭ߊߟߌ߫، ߊ߬ ߣߊ߬ ߘߊ߫ ߖߌ߬ߣߍ߫ ߞߊ߬ ߣߵߊ߬ ߛߌ߰ ߞߊ߲ߡߊ߬ ߛߊ߲߭ ߂߀߀߀ ߟߋ߬ ߟߊ߫߸ ߊ߬ ߡߊ߫ ߓߐ߫ ߏ߬ ߞߐ߫ ߞߊ߬ ߥߴߊ߬ ߛߌ߰ ߝߊ߲߬ ߜߘߍ߫߸ ߝߏ߫ ߕߊ߯ߡߊ߫ ߞߋ߬ߟߋ߲߬ߞߋߟߋ߲ ߠߎ߬.
߂߀߂߃ ߟߊ߫߸ ߊ߬ ߞߊ߬ ߞߊ߬ߝߊ ߘߏ߫ ߟߊߓߐ߫߸ ߞߏ߫ <<ߒ ߠߊ߫ ߢߣߊߡߦߊ ߞߍߢߊ ߊߤߑߡߍߘ ߕߎ߬ߙߋ߫ ߞߍ߲߬ߠߊ߫.>> ߞߊ߬ߝߊ ߏ߬ ߖߍ߬ߘߍ ߘߟߊߡߌ߬ߣߊ ߦߴߌߘߐ߫ ߡߐ߰ߛߓߍ߫ ߞߋߕߊ߬ ߓߟߏ߫ ߕߋ߲߬߸ ߞߵߊ߬ ߓߌ߬ߟߊ߬ ߒߞߏ ߘߐ߫، ߞߊ߬ߝߊ ߏ߬ ߦߴߊ߬ ߖߍ߬ߘߍ ߜߋ߬ߙߋ ߟߋ߬ ߢߊߝߐ߫ ߟߊ߫߸ ߊ߬ ߣߴߊ߬ ߗߍ߬ ߞߊ߬ ߛߊ߲߬ ߦߙߌߞߊ ߡߍ߲ ߞߍ߫ ߢߐ߲߯ ߝߍ߬߸ ߊ߬ ߦߴߏ߬ ߓߍ߯ ߟߋ߬ ߘߐߥߍߘߍ߲ߞߍ߫ ߟߴߏ߬ ߞߣߐ߫.
ߊ߬ ߟߊ߫ ߛߦߊ߬ ߞߏ ߟߐ߲߸ ߡߐ߰ ߛߌߦߊߡߊ߲߫ ߞߎߡߊ߫ ߘߴߊ߬ ߞߊ߲߬، ߏ߬ ߘߏ߫ ߟߋ߬ ߖߌ߬ߣߍ߬ ߞߊ߲ߓߍ߲ ߞߊ߲ߕߌ߮ ߘߌ߫߸ ߡߊ߬ߡߊ߬ߘߌ߬ ߘߎ߲ߓߎߦߊ߫، ߏ߬ ߞߵߊ߬ ߡߊ߲߬ߞߕߎ߬ ߓߘߍ ߛߌߦߊߡߊ߲߫ ߝߐ߫߸ ߞߵߊ߬ ߦߌ߬ߘߊ߬ ߞߏ߫ ߡߏ߬ߛߏ߫ ߟߋ߬ ߕߎ߲߬ ߦߴߊ߬ ߘߌ߫ <<ߞߟߊߓߎ ߕߘߍ߬ ߡߍ߲ ߠߊ߫߸ ߕߡߌߣߊ߲ߘߌ ߟߋ߬ ߕߘߍ߬߸ ߊ߬ ߝߊ߬ ߓߘߊ ߘߌߦߊ߫ ߘߴߊ߬ ߦߋ߫.>>
ߓߌ߬ߟߊ߬ߢߐ߲߰ߡߊ ߞߏߟߊߕߍ߯ ߛߊ߲ߘߐ ߞߊ߲ߕߌ߮߸ ߓߎߓߞߊߙ ߦߊߛߌߣ ߖߊߟߏ߫ ߝߣߊ߫ ߞߊ߬ ߕߊ߰ߛߌ߬ߓߌߟߊ߫ ߞߍ߫ ߓߐ߬ߟߐ߲߬ߞߊ ߣߌ߲߬ ߡߊ߬߸ ߞߵߊ߬ ߦߌ߬ߘߊ߬ ߞߏ߫ <<ߓߏ߲߬ߘߏ߲߬ ߓߟߋߓߟߋ>> ߘߏ߫ ߟߋ߬ ߥߊߣߍ߲߫ ߣߌ߲߬߸ ߖߡߊ߬ߣߊ ߘߐ߬ߝߐ ߓߏ߲߬ߘߏ߲ ߞߊ߬ߣߌ߲߬߸ ߡߐ߰ ߕߎ߲߬ ߦߴߊ߬ ߥߊߛߏ߫ ߟߊ߫ ߡߍ߲ ߠߊ߫، ߦߊߛߌߣ ߞߊ߲߫ ߞߏ߫ ߊ߲ߘߙߋ߫ ߞߍ߫ ߘߊ߫ ߡߊ߲߬ߕߎ߬ߙߋ߬ߦߊ ߣߌ߫ ߞߎߒߖߘߍߡߊ ߕߐ߰ߡߊ߬ߛߙߋ ߟߋ߬ ߘߌ߫ ߟߊ߬ߦߙߊ߬ߓߌ߬ߟߌ ߟߎ߬ ߞߘߐ߫.
ߊ߬ ߛߎ߭ ߟߊߛߊ߬ߦߌ߲߬ ߞߏ ߣߴߊ߬ ߛߎ߬ߞߏߏ߬ߦߊ ߞߍߢߊ ߟߎ߬ ߡߊ߫ ߟߊߕߍ߰ ߞߎ߲߬ߠߊ߬ߛߌ߮ ߓߟߏ߫ ߡߎߣߎ߲߬.
Aucun commentaire pour le moment.