ߊ߬ ߛߓߍߣߍ߲߫ ߕߍ߫ ߞߎ߬ߙߊ߬ߣߊ ߝߊ߲߬ ߛߌ߫߸ ߊ߬ ߘߏ߲߬ ߕߍ߫ ߛߙߊ߬ߣߎ߲ ߦߙߐ߫ ߛߌ߫߸ ߞߏ߫ ߛߊߟߌ ߕߍ߫ ߓߍ߲߬ ߞߊ߲߫ ߜߘߍ߫ ߝߏ߫ ߊߙߊߓߎ߫ ߞߊ߲، ߛߌ߬ߟߡߊ߬ߦߊ ߛߊ߬ߙߌ߬ߦߊ ߘߏ߲߬ ߘߐ߫߸ ߝߏߦߌ߬ ߡߊ߫ ߟߊߕߐ߲߫ ߏ߬ ߟߎ߬ ߞߣߐ߫߸ ߏ߬ ߓߍ߯ ߘߤߊ߬ߣߍ߲߫ ߠߋ߬، ߒ ߓߘߊ߫ ߘߊߘߐߖߊߥߏ ߡߍ߲ ߠߎ߬ ߞߍ߫ ߛߊߟߌ߫ ߞߏ ߣߌ߲߬ ߞߊ߬߸ ߒ ߧߋ߫ ߘߊ߬ߟߎ߫ ߟߎ߫ ߟߋ߬ ߦߌ߬ߘߊ߬ ߟߊ߫߸ ߡߍ߲ ߠߎ߬ ߦߋ߫ ߥߟߌߓߊߟߌ ߟߎ߬ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߛߊߟߌ ߘߌ߫ ߓߍ߲߬ ߞߊ߲ ߓߍ߯ ߘߐ߫߸ ߣߴߊ߬ ߡߊ߫ ߢߊ߬ ߞߏ߫ ߞߎ߬ߙߊ߬ߣߊ ߦߋ߫ ߊߟߊ߫ ߞߎߡߊ߫ ߞߊ߲ ߠߋ߬ ߘߌ߫ ߞߊ߲ ߓߍ߯ ߘߐ߫، ߞߊ߬ߕߎ߲߯߸ ߊ߬ ߦߋ߫ ߘߏ߫ ߟߎ߫ ߢߣߊ߫ ߟߋ߬߸ ߞߏ߫ ߞߎ߬ߙߊ߬ߣߊ ߓߊ߯ ߓߌ߬ߟߊ߬ ߞߊ߲߫ ߜߘߍ߫ ߘߐ߫߸ ߏ߬ ߕߍ߫ ߞߎ߬ߙߣߊ߬ ߘߌ߫߸ ߝߏ߫ ߊ߬ ߦߋ߫ ߛߓߍ߫ ߊߙߊߓߎ ߟߋ߬ ߘߐ߫߸ ߏ߬ ߟߋ ߞߎ߬ߙߊ߬ߣߊ ߘߌ߫، ߞߎߡߊ ߏ߬ ߦߋ߫ ߝߎ߬ߕߎ߲߬ߕߌ ߟߋ߬ ߘߌ߫߸ ߘߊ߬ߟߎ߫ ߘߏ߲߬ ߕߴߊ߬ ߟߊ߫ ߝߣߊ߫، ߒ ߘߴߏ߬ ߟߊߒߡߊ߫ ߘߊ߲ߘߐ߫ ߘߴߊߟߎ߫ ߡߊ߬߸ ߡߍ߲ ߦߋ߫ ߒ ߠߊ߫ ߞߎߡߊ ߢߌ߲߬ ߠߊߛߙߋߦߊ߫ ߟߊ߫:
ߞߎ߬ߙߊ߬ߣߊ ߦߋ߫ ߊߟߊ߫ ߞߎߡߊ߫ ߞߊ߲ ߠߋ߬ ߘߌ߫߸ ߞߵߊ߬ ߟߊߛߋ߫ ߘߎߢߊ߫ ߡߐ߱ ߓߍ߯ ߡߊ߬، ߞߎ߬ߙߊ߬ߣߊ ߡߊ߫ ߣߊ߬ ߘߏ߫ ߜߘߍ߫ ߞߊ߲ߡߊ߬߸ ߞߊ߬ ߡߐ߱ ߟߎ߬ ߞߊ߲ߘߊ߫ ߛߌߟߊ߫ ߕߋߟߋ߲ߣߍ߲ ߞߊ߲߬߸ ߞߵߊ߬ߟߎ߬ ߞߛߌ߫ ߞߵߊ߬ߟߎ߬ ߓߐ߫ ߛߋ߬ߕߣߊ߬ ߟߊ߫ ߛߌߟߊ ߞߊ߲߬، ߊߟߊ߫ ߘߏ߲߬ ߞߵߊ߬ ߝߐ߫ ߟߵߊ߲ ߧߋ߫ ߞߎ߬ߙߊ߬ߣߊ ߞߣߐ߫߸ ߞߏ߫: <<ߊ߬ߟߋ ߟߋ߬ ߟߝߊߙߌ߫ ߘߐߞߣߍߣߍ߲ ߠߎ߬ ߟߊߖߌ߰ ߟߴߊ߬ ߟߊ߫ ߖߐ߲߭ ߡߊ߬߸ ߛߴߊ߬ ߘߴߊߟߎ߫ ߟߊߓߐ߫ ߘߌ߬ߓߌ ߟߎ߬ ߘߐ߫߸ ߞߊߕߙߍ߬ ߦߋߟߋ߲ ߡߊ߬، ߊ߬ ߘߏ߲߬ ߖߊ߯ߕߋ߬߸ ߊߟߊ߫ ߦߋ߫ ߞߌ߬ߣߌ߲߬ߞߌ߬ߣߌ߲߬ߠߊ߫ ߤߌߣߟߊ߫ ߟߋ߬ ߘߴߊߟߎ߫ ߟߊ߫.>> ߣߍ߰ߝߌ߲ ߝߐߘߊ ߟߝߊߙߌ߫ ߉߲.
ߊߟߊ߫ ߓߊ߲߫ ߘߊ߫ ߞߵߊ߬ ߝߐ߫ ߊ߲ ߧߋ߫ ߝߣߊ߫߸ ߛ߫ ߝߐߘߊ ߟߝߊߙߌ߫ ߈߇߲ ߞߣߐ߫߸ ߞߏ߫: <<[ߞߎ߬ߙߊ߬ߣߊ] ߘߏ߲߬ ߕߍ߫ ߘߏ߫ ߜߘߍ߫ ߘߌ߫ ߖߊ߯ߓߊ ߟߎ߫ ߖߊ߲߬ߓߌߟߊ ߞߐ߫.>>
ߐ߲߬ߤߐ߲߫߸ ߣߌ߫ ߞߎ߬ߙߊ߬ߣߊ ߘߟߊߡߌߣߊ ߡߊ߫ ߞߍ߫ ߞߎ߬ߙߣߊ߬ ߘߌ߫߸ ߊ߲ ߛߋߕߐ߫ ߊߟߊ߫ ߟߊ߫ ߛߊ߬ߙߌ߬ߦߊ ߟߎ߬ ߢߊߝߐ߫ ߟߊ߫ ߡߐ߰ ߟߎ߬ ߦߋ߫ ߘߌ߬߸ ߡߍ߲ ߠߎ߬ ߡߴߊߙߊߓߎ߫ ߞߊ߲ ߟߐ߲߫؟
ߊߙߊߓߎ߫ ߞߊߙߊ߲ߡߐ߮ ߛߌߦߊߡߊ߲߫ ߦߴߊ߬ ߝߐ߫ ߟߊ߫ ߢߊ ߡߍ߲ ߡߊ߬߸ ߣߴߊ߬ ߛߐ߬ߘߐ߲߬ ߘߊ߫ ߞߏ߫ ߊ߬ ߦߋ߫ ߕߋ߲߬ ߠߋ߬߸ ߞߊ߬ ߝߐ߫ ߞߏ߫ ߞߎ߬ߙߊ߬ߣߊ ߓߊ߯ ߘߟߊߡߌ߬ߣߊ߬ ߞߊ߲߫ ߜߘߍ߫ ߘߐ߫߸ ߏ߬ ߦߋ߫ ߞߎ߬ߙߊ߬ߣߊ ߞߘߐ ߟߋ߬ ߘߌ߫߸ ߞߏ߬ߣߌ߲߬ ߞߎ߬ߙߣߊ߬ ߕߍ߫، ߣߴߏ߬ ߟߎ߬ ߟߊ߫ ߞߎߡߊ ߏ߬ ߞߍ߫ ߘߊ߫ ߕߎ߬ߢߊ߬ ߘߌ߫߸ ߡߎ߲߬ ߠߊ߫ ߏ߬ߘߐ߫߸ ߡߐ߱ ߡߍ߲ ߠߎ߬ ߕߍ߫ ߊߙߊߓߎ߫ ߘߌ߫߸ ߊߟߊ߫ ߘߴߏ߬ ߟߎ߫ ߟߐ߬ ߘߌ߯ߣߊ ߞߏ ߟߎ߬ ߞߍ߫ ߟߊ߫ ߞߵߊ߬ ߓߐ߫ ߊ߬ ߛߌߟߊ ߝߍ߬߸ ߞߵߊ߬ߟߎ߬ ߝߊߕߊ߲ߕߌ߫ ߊ߬ ߛߐ߬ߛߐ ߡߊ߬؟ ߟߊߒߡߊ߫ ߘߐ߫߸ ߡߐ߱ ߘߏ߫ ߦߴߊ߬ ߝߐ߫ ߡߊ߬ߣߌ߲߬ߞߊ߬ ߞߊ߲ ߘߐ߫ ߛߌߛߍ߲߬߸ ߞߏ߫ ߒ ߓߘߊ߫ ߒ ߡߏ߬ߛߏ ߟߊ߫ ߒ ߓߊ߫ ߞߊ߲߬، ߦߊ߯ߟߊ߫߸ ߏ߬ ߞߊ߫ ߞߊ߲߫ ߞߊ߬ ߞߊߙߏ߫ ߝߌ߬ߟߊ߬ ߛߎ߲߫ ߏ߬ ߘߐ߫ ߓߊ߬؟ ߥߟߊ߫ ߞߊ߬ ߘߐ߰ߕߐ߬ ߆߀ ߟߘߊߥߎ߲ߠߌ߲߫߸ ߦߏ߫ ߊߟߊ߫ ߞߵߏ߬ ߝߐ߫ ߘߊߘߐߝߙߊߢߐ߯ߦߊ ߝߐߘߊ ߟߝߊߙߌ߫ ߃߲ ߣߌ߫ ߄߲ ߘߐ߫ ߢߊ ߡߍ߲؟
ߊ߲ ߧߴߊ߬ ߢߊߦߋ߫ ߟߴߏ߬ ߟߋ ߡߊ߬߸ ߞߏ߫ ߞߎ߬ߙߊ߬ߣߊ ߦߋ߫ ߊߟߊ߫ ߟߊ߫ ߛߊ߬ߙߌ߬ߦߊ߬ ߟߊߘߍ߬ߣߍ߲ ߠߋ߬ ߘߌ߫߸ ߊ߬ ߞߍ߫ ߘߊ߫ ߊ߲߬ߜ߭ߌ߬ߟߋ߬ ߘߐ߫߸ ߒߞߏ ߘߐ߫߸ ߛߏ߬ߛߏ߬ ߞߊ߲߫ ߘߐ߫߸ ߥߟߊ߫ ߝߌߟߊ߫ ߞߊ߲߫ ߘߐ߫߸ ߛߊ߬ߙߌ߬ߦߊ ߓߍ߯ ߞߊ߫ ߞߊ߲߫߸ ߢߊ ߓߍ߯ ߡߊ߬، ߊߟߎ߫ ߦߴߊ߬ ߟߐ߲߫߸ ߞߏ߫ ߞߎ߬ߙߊ߬ߣߊ ߟߊߖߌ߱ ߊߙߊߓߎ߫ ߞߊ߲ ߘߐ߫߸ ߏ߬ ߞߍ߫ ߘߊ߫ ߟߋ߬ ߛߴߊߙߊߓߎ ߟߎ߬ ߘߴߊ߬ ߢߊߦߋ߫، ߞߎߡߊ ߏ߬ ߘߊ߬ߟߎ ߦߋ߫ ߞߎ߬ߙߊ߬ߣߊ ߘߐ߫߸ ߊ߬ ߝߐ߫ ߘߊ߫ ߦߛߎߝߎ߫ ߝߐߘߊ ߟߝߊߙߌ߫ ߂߲ ߘߐ߫߸ ߞߏ߫: <<ߒ߬ߠߎ߫ ߟߋ߬ ߞߊ߬ ߞߎ߬ߙߊ߬ߣߊ ߟߊߖߌ߰ ߘߐ߬ߛߊߙߌ ߘߌ߫ ߊߙߊߓߎ߫ (ߞߊ߲) ߘߐ߫߸ ߛߴߊߟߎ߫ ߘߴߊ߬ ߝߊ߰ߡߎ߲߬.>>
ߊ߬ ߦߋ߫ ߞߎ߬ߙߊ߬ߣߊ ߞߣߐ߫߸ ߖߎߙߎ߲ߖߎߙߎ߲ߠߌ߲ߠߊ ߝߐߘߊ ߟߝߊߙߌ߫ ߅߆߲ ߘߐ߫߸ ߞߏ߫: <<ߒߠߋ ߡߊ߫ ߥߐ߬ߞߎߟߐ ߣߌ߫ ߡߐ߱ ߘߊ߲߫ ߞߎ߲߬ ߛߌ߫ ߟߊ߫߸ ߝߏ߫ ߊ߬ߟߎ߬ ߦߋ߫ ߒ ߓߊ߬ߕߏ߫ ߟߋ߬.>> ߡߍ߲ ߠߎ߬ ߦߋ߫ ߊߙߊߓߎ߫ ߞߊ߲ ߠߊߝߊ߬ߛߊ ߞߊ߲߬߸ ߏ߬ ߟߎ߬ ߞߊ߲߫ ߞߏ߫ ߊߟߊ߫ ߘߌ߫ ߛߋ߫ ߓߊ߬ߕߏ߬ ߟߊ߫ ߞߊ߲ ߓߍ߯ ߘߐ߫߸ ߝߏ߫ ߛߊߟߌ ߝߊ߬ߙߌ߬ߟߊ߬ ߟߏ߯ߟߎ، ߦߊ߯ߟߊ߫߸ ߛߊߟߌ ߕߍ߫ ߓߊ߬ߕߏ ߏ߬ ߟߎ߬ ߘߐ߫ ߓߊ߬؟ ߓߊ߰ ߛߊߟߌ ߕߍ߫ ߓߊ߬ߕߏ߬ ߘߌ߫؟ ߡߎ߲߬ ߞߏߛߐ߲߬ ߊߟߊ߫ ߘߌ߫ ߛߐ߲߬ ߞߵߊ߬ ߓߊ߬ߕߏ߬ ߞߊ߲ ߓߍ߯ ߘߐ߫߸ ߞߏ߬ߣߵߊ߬ ߕߍ߫ ߛߐ߲߬ ߛߊߟߌ ߘߐ߫ ߞߊ߲߫ ߜߘߍ߫ ߘߐ߫ ߝߏ߫ ߊߙߊߓߎ߫ ߞߊ߲؟ ߊ߬ ߘߏ߲߬ ߜߎ߸ ߊߟߊ߫ ߏ߬ ߟߋ ߞߊ߲ ߓߍ߯ ߘߊ߲ߓߊ߮ ߘߌ߫.
ߊ߬ ߝߐߣߍ߲߫ ߦߋߟߋ߲ ߝߐߘߊ ߟߝߊߙߌ߫ ߄߁ ߘߐ߫߸ ߞߏ߫: <<ߌ ߡߴߊ߬ ߦߋ߫ ߓߊ߬ ߞߏ߫ ߊߟߊ߫߸ ߓߍ߯ ߟߋ߬ ߛߊߣߌ߲ߧߊ ߝߐ߫ ߟߴߊ߬ ߦߋ߫ ߛߊ߲ ߠߎ߬ ߣߌ߫ ߘߎ߱ ߘߐ߫߸ ߊ߬ ߣߌ߫ ߞߐ߬ߣߐ߫ ߝߍ߲߬ߝߍ߲߬ߣߍ߲ ߠߎ߬، ߊߟߊ߫ ߘߏ߲߬ ߞߵߏ߬ ߞߋ߬ߟߋ߲߬ߞߋ߬ߟߋ߲߬ߠߊ ߟߊ߫ ߛߊߟߌ ߣߴߊ߬ ߟߊ߫ ߛߊߣߌ߲ߧߊ߫ ߝߐ ߟߐ߲߫، ߓߊ߸ ߊ߬ ߞߵߊ߬ߟߎ߬ ߗߋߥߊߟߌ ߟߎ߬ ߟߐ߲߫ ߠߋ߬.>> ߐ߲߬ߤߐ߲߫߸ ߊߟߊ߫ ߛߋߕߐ߫ ߞߐ߬ߣߐ ߟߎ߬ ߟߊ߫ ߛߊߟߌ ߢߊߦߋ߫ ߟߴߊ߬ߟߎ߬ ߟߊ߫ (ߞߣߐ߬) ߞߊ߲ ߘߐ߫ ߘߌ߬߸ ߞߊ߬ ߞߊ߬ߢߊ߫ ߡߐ߱ ߕߊ ߢߊߦߋ߫ ߟߊ߫߸ ߞߏ߫ ߝߏ߫ ߊ߬ ߦߋ߫ ߝߐ߫ ߊߙߊߓߎ߫ ߞߊ߲ ߠߋ߬ ߘߐ߫؟
ߊ߬ ߝߐߣߍ߲߫ ߟߞߌߛߍ ߟߎ߬ ߝߐߘߊ ߟߝߊߙߌ߫ ߁߂߃ ߘߐ߫߸ ߞߏ߫: <<ߏ߬ ߟߋ ߞߐ߫ ߊ߲ ߞߵߌߟߋ ߦߟߌߘߏ߲߬߸ ߒ ߞߴߌ ߦߋ߫ ߕߎ߲߰ ߌߓߎ߬ߙߊ߬ߤߌߡߊ߫ ߟߊ߫ ߣߊߡߎ߲ ߠߋ߬ ߟߊ߫ ߖߐ߲ߖߐ߲߫߸ ߓߊ ߏ߬ ߡߊ߫ ߞߍ߫ ߛߏߡߊ ߟߎ߬ ߝߋ߲߫ ߘߌ߫.>> ߊ߬ ߞߵߏ߬ ߖߡߊ߬ߙߟߌ߬ ߞߋߟߋ߲ ߢߐ߲߰ ߝߐ߫ ߣߛߌ߬ߡߛߏ ߝߐߘߊ ߟߝߊߙߌ߫ ߁߃߀ ߘߐ߫ ߕߊ߲߬ ߠߋ߬ <<ߡߐ߰ ߛߌ߫ ߕߴߊ߬ ߖߍ߲߬ߞߍ߬ ߌߓߎ߬ߙߊ߬ߤߌߡߊ߫ ߟߊ߫ ߣߊߡߎ߲ ߡߊ߬ ߝߏ߫ ߡߍ߲ ߓߊ߯ ߊ߬ ߖߘߍ߬ ߞߍ߫ ߖߎߥߊ ߘߌ߫߸ ߊ߲ ߞߵߊ߬ ߛߎߥߊ߲ߘߌ߫ ߟߋ߬ ߞߌߢߍ߲߫ ߢߌ߲߬ ߘߐ߫߸ ߊ߬ ߘߏ߲߬ ߦߋ߫ ߛߎ߬ߟߊ߫ ߡߐ߰ ߢߌߡߊ ߟߎ߬ ߘߏ߫ ߟߋ߬ ߘߌ߫.>> ߊߟߊ߫ ߖߍ߬ߘߍ ߟߋ߬ ߞߊ߲߫ ߞߋߟߊ߫ ߡߊ߬ߡߊߘߌ߫ ߡߊ߬ ߏ߬ ߘߌ߫ (ߕ.ߖ)߸ ߞߏ߫ ߊ߬ ߦߋ߫ ߕߎ߰ ߌߓߎ߬ߙߊ߬ߤߌߡߊ߫ ߟߊ߫ ߛߌߟߊ ߟߋ߬ ߞߊ߲߬، ߊ߬ ߘߏ߲߬ ߜߎ߸ ߌߓߎ߬ߙߊ߬ߤߌߡߊ߫ ߡߴߊ߬ ߟߊ߫ ߓߊ߬ߕߏ ߞߍ߫ ߊߙߊߓߎ߫ ߞߊ߲߫ ߘߐ߫߸ ߊ߬ ߞߵߊ߬ ߟߊ߫ ߛߊߟߌ ߓߍ߯ ߞߍ߫ ߊ߬ ߟߊ߫ ߞߊ߲ ߠߋ߬ ߘߐ߫، ߊߟߊ߫ ߓߊ߲߫ ߘߊ߫ ߏ߬ ߓߍ߯ ߞߐ߫ ߞߊ߬ ߞߋߟߊ ߟߐ߬ ߌߓߎ߬ߙߊ߬ߤߌߡߊ߫ ߟߊߘߍ߲߰ ߠߊ߫߸ ߞߋߟߊ ߞߵߊ߬ ߕߊ ߓߍ߯ ߞߍ߫ ߊ߬ ߟߊ߫ ߞߊ߲ ߘߐ߫߸ ߣߊߟߌ߬ߡߎ߲߫ ߊߙߊߓߎ߫ ߞߊ߲ ߘߌ߫، ߏ߬ ߟߵߊ߬ ߦߌ߬ߘߊ߬ ߟߊ߫ ߒ߬ ߠߊ߫ ߜߍ ߘߐ߫ ߥߛߊߞߙߊ߫߸ ߞߏ߫ ߣߴߊ߬ ߝߐ߫ ߘߊ߫ ߞߏ߫ ߌ ߦߋ߫ ߕߎ߲߰ ߞߊ߬ߘߌ߬ߛߊ߫ ߞߐ߫߸ ߥߟߊ߫ ߌ ߦߋ߫ ߞߊ߬ߘߌ߬ߛߊ߬ ߟߊߘߍ߲߰߸ ߊ߬ ߟߊ߫ ߞߊ߲ ߛߋ߲߬ ߕߴߊ߬ ߘߐ߫ ߓߏ߲߬، ߊ߬ ߦߋ߫ ߡߍ߲ ߞߍ߫ ߟߊ߫߸ ߊ߬ ߞߍߥߊߟߌ ߏ߬ ߟߎ߫ ߟߋ߬ ߞߏ߫ ߦߋ߫ ߢߌ߬ߡߊ ߘߐ߫، ߒ߬ߓߊ߬߸ ߏ߬ ߢߊ߫ ߞߋߟߋ߲ ߠߋ߬ ߡߊ߬߸ ߞߋߟߓߊ߫ ߡߊ߬ߡߊߘߌ߫ ߕߎ߲߰ ߘߊ߫ ߌߓߎ߬ߙߊ߬ߤߌߡߊ߫ ߞߐ߫ ߊ߬ ߟߊ߫ ߞߍߕߊ ߟߎ߬ ߘߐ߫߸ ߓߊ߬ߙߌ߬ ߞߵߊ߬ ߟߊ߫ ߛߊߟߌ ߣߴߊ߬ ߟߊ߫ ߓߊ߬ߕߏ ߟߎ߬ ߞߍ߫ ߊ߬ ߖߍ߬ߘߍ ߟߊ߫ ߞߊ߲ ߘߐ߫߸ ߊ߬ ߡߴߊ߬ ߞߍ߫ ߌߓߎ߬ߙߊ߬ߤߌߡߊ߫ ߟߊ߫ ߞߊ߲ ߘߐ߫، ߣߴߏ߬ ߕߍ߫߸ ߊߟߊ߫ ߖߍ߬ߘߍ ߟߋ߬ ߞߵߊ߬ߟߋ ߟߐ߬ ߕߎ߲߰ ߠߊ߫ ߌߓߎ߬ߙߊ߬ߤߌߡߊ߫ ߞߐ߫، ߒ߬ߓߊ߬߸ ߊߟߎ߫ ߦߴߊ߬ ߟߐ߲߫ ߞߏ߫ ߣߊ߲߬ߝߏ߯ ߝߣߊ߫ ߣߴߊ߬ ߘߍ߬ߒߞߏ߬ߡߊ߬ߢߐ߲߮ ߠߎ߬ ߦߋ߫ ߞߋߟߓߊ߫ ߡߊ߬ߡߊ߬ߘߌ߬ ߟߊ߫ ߛߌߟߊ߫ ߞߋߟߋ߲ ߏ߬ ߟߋ ߞߊ߲߬، ߞߊ߬ ߕߎ߲߰ ߞߋߟߊ ߞߐ߫ ߊ߬ ߟߊ߫ ߞߏ ߓߍ߯ ߘߐ߫߸ ߞߊ߬ ߓߊ߬ߕߏ ߞߍ߫ ߊ߬ߟߎ߫ ߝߊ߬ ߞߊ߲ ߘߐ߫، ߦߏ߫ ߞߋߟߊ ߕߎ߲߰ ߘߊ߫ ߌߓߎ߬ߙߊ߬ߤߌߡߊ߫ ߞߐ߫ ߢߊ ߡߍ߲ ߡߊ߬߸ ߞߊ߬ ߓߊ߬ߕߏ ߞߍ߫ ߊߙߊߓߎ߫ ߞߊ߲ ߘߐ߫.
ߊߟߊ߫ ߞߊ߲߫ ߞߎ߬ߙߊ߬ߣߊ ߞߣߐ߫߸ ߘߍ߲߬ߞߣߍ߬ߦߊ߬ߓߊ߮ ߟߎ߬ ߝߐߘߊ ߟߝߊߙߌ߫ ߁߭ ߣߌ߫ ߂߲ ߘߐ߫߸ ߞߏ߫: <<ߘߍ߲߬ߞߣߍ߬ߦߊ߬ߓߊ߮ ߟߎ߬ ߓߘߊ߫ ߓߊ߲߫ ߛߎߘߊ߲߫ ߠߊ߫، ߢߍ߬ߣߍ߲ ߦߋ߫ ߞߍ߫ ߟߊ߫ ߡߍ߲ ߠߎ߬ ߟߴߊ߬ߟߎ߬ ߟߊ߫ ߛߊߟߌ ߘߐ߫.>> ߊ߲ ߛߋߕߐ߫ ߛߌߟߊ߲߫ ߠߴߊߟߊ߫ ߦߋ߫ ߛߊߟߌ ߘߐ߫ ߘߌ߬߸ ߞߵߊ߬ ߛߐ߬ߘߐ߲߬ ߊ߲ ߡߴߊ߬ ߟߐ߲߫ ߊ߲ ߧߋ߫ ߡߍ߲ ߝߐ߫ ߟߊ߫ ߛߊߟߌ ߘߐ߫؟ ߞߎ߬ߙߊ߬ߣߊ ߟߝߊߙߌ ߡߍ߲ ߠߎ߬ ߦߋ߫ ߞߊ߬ߙߊ߲߬ ߠߊ߫߸ ߣߴߊ߲ ߧߴߏ߬ ߞߘߐ ߢߊߦߋ߫ ߟߊ߫߸ ߢߍ߬ߣߍ߲ ߘߌ߫ ߞߍ߫ ߊ߲ ߠߊ߫، ߞߏ߬ߣߌ߲߬߸ ߣߴߊ߲ ߡߴߊ߬ ߟߐ߲߫ ߘߏ߲߬ ߊ߲ ߧߋ߫ ߡߍ߲ ߝߐ߫ ߟߊ߫؟
ߊߟߊ߫ ߖߍ߬ߘߍ ߟߋ߬ ߞߊ߲߫ ߕߊߟߏ߲ߕߊߟߏ߲ ߝߐߘߊ ߟߝߊߙߌ߫ ߄߅ ߕߍߡߊ߫ ߝߊ߲ ߝߍ߬ ߞߏ߫: <<....ߛߊߟߌ ߟߐ߬، ߓߊ߸ ߛߊߟߌ ߟߋߋ߬ ߝߊߕߊ߲ߕߟߌ ߞߍ߫ ߟߊ߫ ߞߏߙߏ߲ߧߊ ߣߌ߫ ߞߐ߲ߞߏ ߡߊ߬. ...>> ߐ߲߬ߤߐ߲߫߸ ߛߊߟߌ ߛߋߕߐ߫ ߡߐ߱ ߜߍ߲߫ ߠߊ߫ ߞߏߙߏ߲ߧߊ ߡߊ߬ ߘߌ߬߸ ߞߵߊ߬ ߛߐ߬ߘߐ߲߬ ߌ ߡߴߊ߬ ߟߐ߲߫ ߌ ߦߋ߫ ߡߍ߲ ߝߐ߫ ߟߊ߫ ߛߊߟߌ ߘߐ߫؟
ߖߏ߭ ߓߊ߬ߕߏ߬ ߘߊ߫ ߞߊ߲߫ ߛߌ߫ ߘߐ߫߸ ߏ߬ ߟߊߕߐ߲ߣߍ߲߫ ߠߋ߬ ߛߌ߬ߟߡߊ߬ߦߊ ߘߐ߫، ߡߎ߲߬ ߠߊ߫ ߏ߬ ߘߐ߫߸ ߛߊߟߌ ߓߊ߯ ߞߍ߫ ߞߊ߲߫ ߜߘߍ߫ ߘߐ߫߸ ߊߟߊ߫ ߕߴߏ߬ ߝߍ߬؟ ߡߍ߲ ߦߋ߫ ߕߎ߬ߢߊ ߘߌ߫߸ ߡߍ߲ ߜߍߣߍ߲߫߸ ߞߊ߲߫ ߛߌ߫ ߕߴߦߋ߲߬߸ ߖߎ߯ߡߊ߲ ߞߊ߫ ߞߊ߲߫ ߞߊ߬ ߞߍ߫ ߞߊ߲ ߡߍ߲ ߘߐ߫߸ ߞߊ߲߫ ߘߏ߲߬ ߝߣߊ߫ ߕߴߦߋ߲߬߸ ߛߌ߬ߟߡߊ߬ߦߊ ߛߊߟߌ ߦߋ߫ ߞߍ߫ ߟߊ߫ ߞߊ߲ ߡߍ߲ ߘߐ߫، ߊߟߊ߫ ߘߏ߲߬ ߦߋ߫ ߕߋߟߋ߲ߓߊ߮ ߟߋ߬ ߘߌ߫.
ߊ߬ ߦߋ߫ ߝߐ߫ ߟߊ߫ ߛߐ߲߬ ߞߏ߫ ߞߋߟߊ ߣߴߊ߬ ߟߊ߫ ߛߊ߰ߓߊ ߟߎ߫ ߞߵߊ߬ߟߎ߬ ߛߊߟߌ߫ ߊߙߊߓߎ߫ ߞߊ߲ ߠߋ߬ ߘߐ߫، ߕߎ߬ߢߊ ߟߵߏ߬ ߘߌ߫ ߞߍ߰، ߊ߫߹ ߒ ߞߏ߫ ߊ߬ ߣߴߊ߬ ߟߊ߫ ߛߊ߰ߓߊ ߏ߬ ߟߎ߬ ߓߍ߯ ߕߘߍ߬ ߊߙߊߓߎ ߟߋ߬ ߘߌ߫، ߏ߬ ߢߊ߫ ߞߋߟߋ߲ ߠߋ߬ ߡߊ߬߸ ߞߋߟߊ ߣߴߊ߬ ߟߊ߫ ߛߊ߰ߓߊ ߛߌ߫ ߡߊ߫ ߞߕߎ߬ߓߊ ߞߍ߫ ߞߊ߲߫ ߜߘߍ߫ ߘߐ߫ ߝߏ߫ ߊߙߊߓߎ߫ ߞߊ߲، ߐ߲߬ߤߐ߲߫߸ ߣߴߊߟߎ߫ ߞߊ߬ ߛߊߟߌ ߟߊߕߐ߲߫ ߞߊ߲߫ ߜߘߍ߫ ߘߐ߫߸ ߞߏ߫ ߞߋߟߊ ߡߴߊ߬ ߞߍ߫، ߊ߬ߝߐ߫ ߣߴߊߟߎ߫ ߞߊ߬ ߞߕߎ߬ߓߊ ߞߍ߫ ߞߊ߲߫ ߜߘߍ߫ ߘߐ߫ ߏ߬ ߘߐ߫ ߡߍ߲ ߣߌ߫ ߊߙߊߓߎ߫ ߞߊ߲ ߕߍ߫ ߞߋߟߋ߲߫ ߘߌ߫߸ ߊߟߎ߫ ߡߊߣߊ߬ ߞߋߟߊ ߛߐ߬ߛߐ߬ ߟߊ߫ ߟߵߏ߬ ߘߌ߫߸ ߞߵߊߟߊ߫ ߝߣߊ߫ ߛߐ߬ߛߐ߬ ߦߏ߫ ߊߟߎ߫ ߦߴߊ߬ ߝߐ߫ ߟߊ߫ ߢߊ ߡߍ߲ ߡߊ߬؟ ߘߏ߫ ߘߴߊ߬ ߝߐ߫ ߛߍ߲ ߞߏ߫ ߞߋߟߊ ߡߊ߫ ߛߐ߬ߛߐ߫ ߏ߬ ߘߐ߫، ߐ߲߹ ߡߎ߲߬ ߠߊ߫ ߏ߬ ߘߐ߫߸ ߣߌ߫ ߛߊߟߌ ߞߍ߫ ߘߊ߫ ߞߊ߲߫ ߜߘߍ߫߸ ߏ߬ ߦߋ߫ ߞߋߟߊ ߛߐ߬ߛߐ ߣߴߊߟߊ߫ ߛߐ߬ߛߐ ߟߋ߬ ߘߌ߫؟
ߘߏ߫ ߟߎ߫ ߦߴߊ߬ ߝߐ߫ ߟߊ߫ ߞߏ߫ ߓߌ߬ߟߊ߬ߟߌ߫ ߕߍ߬ߘߍ߫ ߝߘߊ߬ߝߌ߲ ߠߎ߬ ߘߌ߫߸ ߞߏ߫ ߓߌ߬ߟߊ߬ߟߌ߫ ߘߏ߲߬ ߡߊ߫ ߛߊߟߌ߫ ߊߙߊߓߎ߫ ߞߊ߲ ߘߐ߫، ߏ߬ ߟߎ߬ ߡߴߊ߬ ߢߊߦߋ߫ ߟߋ߬، ߞߊ߬ߕߎ߲߯߸ ߓߌ߬ߟߊ߬ߟߌ߫ ߝߊ߬ ߕߘߍ߬ ߦߋ߫ ߊߙߊߓߎ ߟߋ߬ ߘߌ߫߸ ߊ߬ ߣߊ߫ ߟߋ߬ ߤߌ߬ߡߊ߯ߡߊ߫ ߘߌ߫߸ ߏ߬ ߟߋ ߕߍ߬ߘߍ߫ ߝߘߊ߬ߝߌ߲ ߘߌ߫ ߞߊ߬ ߓߐ߫ ߋߗߏߔߌ߫، ߓߌ߬ߟߊ߬ߟߌ߫ ߛߐ߬ߘߐ߲߬ ߘߊ߫ ߡߞߊ߫ ߟߋ߬߸ ߞߊ߬ ߓߏ߲߬ߧߊ߬ ߡߞߊ߫߸ ߞߵߊ߬ ߟߊ߫ ߢߣߊߡߦߊ ߞߍ߫ ߦߋ߲߬߸ ߞߊ߬ ߥߊ߫ ߛߊ߬ ߛߙߌ߫، ߓߌ߬ߟߊ߬ߟߌ߬ ߡߊ߫ ߛߴߊ߬ ߓߊߙߌ߲ߠߊ ߘߐ߫، ߏ߬ ߘߐ߫߸ ߊ߬ ߝߊ߬ ߦߋ߫ ߊߙߊߓߎ ߟߋ߬ ߘߌ߫߸ ߏ߬ ߞߘߐ ߟߋ߬ ߞߏ߫ ߡߞߊߞߊ ߟߋ߬߸ ߊ߬ ߞߵߊߙߊߓߎ߫ ߞߊ߲ ߠߋ߬ ߟߐ߲߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬، ߏ߬ ߘߐ߫߸ ߞߵߊ߬ ߝߐ߫ ߞߏ߫ ߛߊ߰ߓߊ ߘߏ߫ ߟߎ߫ ߕߘߍ߬ ߛߌߦߊ߫ ߜߘߍ߫ ߘߌ߫߸ ߏ߬ ߟߎ߬ ߡߴߊ߬ߟߎ߬ ߛߊߟߌ߫ ߞߊ߲߫ ߜߘߍ߫ ߘߐ߫ ߝߏ߫ ߊ߬ߙߊ߬ߓߎ߬ ߞߊ߲، ߏ߬ ߝߐߓߊ߮ ߟߎ߬ ߞߊ߫ ߞߊ߲߫ ߞߵߊ߬ ߟߐ߲߫ ߞߏ߫ ߟߊ߬ߡߐ߮ ߕߌ߲߭ ߞߊ߫ ߓߏ߲߬ ߥߟߏ ߕߌ߲߭ ߘߌ߫، ߓߊߏ߬߸ ߊ߬ߟߎ߫ ߞߊ߬ ߊߙߊߓߎ߫ ߞߊ߲ ߟߐ߲߫ ߊ߬ߟߎ߬ ߟߊ߫ ߞߊ߲ ߘߌ߫.
ߊ߲ߠߎ߬ ߟߊ߫ ߞߎߡߊ ߦߋ߫ ߡߌ߲߫߸ ߌ ߛߊߟߌ߫ ߞߊ߲߫ ߘߐ߫߸ ߌ ߦߋ߫ ߡߍ߲ ߝߊ߰ߡߎ߲߬ ߠߊ߫، ߓߌ߬ߟߊ߬ߟߌ߫ ߕߍ߬ߘߍ߫ ߞߵߊ߬ߙߊ߬ߓߎ߬ ߞߊ߲ ߟߐ߲߫߸ ߛߎ߬ߟߋ߬ߡߊߣ ߝߊߙߛߌ߫ ߕߎ߲߬ ߞߵߊ߬ߙߊ߬ߓߎ߬ ߞߊ߲ ߟߐ߲߫، ߊ߲ߠߎ߬ ߘߏ߲߬ ߣߴߏ߬ ߟߎ߬ ߕߍ߫ ߞߋߟߋ߲߫ ߘߌ߫.
ߞߎߡߊ ߟߊߓߊ߲ ߦߋ߫ ߡߍ߲ ߘߌ߫߸ ߊ߬ ߛߓߍߣߍ߲߫ ߕߍ߫ ߞߎ߬ߙߊ߬ߣߊ ߦߙߐ߫ ߛߌ߫߸ ߞߏ߫ ߊߟߎ߫ ߦߋ߫ ߛߊߟߌ ߞߍ߫ ߊߙߊߓߎ߫ ߞߊ߲ ߠߋ߬ ߘߐߙߐ߲߫ ߘߐ߫، ߊ߬ ߛߓߍߣߍ߲߫ ߕߍ߫ ߤߊ߬ߘߌ߬ߛߌ ߦߙߐ߫ ߛߌ߫߸ ߞߏ߫ ߝߏ߫ ߞߊ߬ ߛߊߟߌ ߞߍ߫ ߊߙߊߓߎ߫ ߞߊ߲ ߠߋ߬ ߞߋߟߋ߲߫ ߘߐ߫، ߘߋ߬ߙߌ߬ ߓߘߊ߫ ߞߍ߫ ߊ߬ ߟߊ߫ ߟߋ߬ ߡߐ߰ ߛߌߦߊߡߊ߲߫ ߓߟߏ߫߸ ߞߏ߬ߣߵߊ߬ ߟߊߕߐ߲ߣߍ߲߫ ߕߍ߫ ߞߵߊ߬ ߞߍ߫ ߞߊ߲߫ ߜߘߍ߫ ߘߐ߫.
ߏ߬ ߟߋ ߘߐ߫߸ ߣߊ߲߬ߝߏ߯ ߌߛߎ߬ߡߊ߬ߌ߯ߟߊ߫ ߣߴߊ߬ ߟߊ߫ ߡߐ߱ ߟߎ߬ ߕߍ߫ ߝߟߌ߬ ߘߐ߫߸ ߊ߬ߟߎ߫ ߘߏ߲߬ ߡߊ߲߫ ߞߊ߲߫ ߞߊ߬ ߟߊߜߏߦߊߢߍ߫ ߡߐ߰ ߛߌ߫ ߓߟߏ߫ ߛߌ߬ߟߡߊ߬ߦߊ ߞߣߐ߫.
ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߊ߬ߓߊ ߓߟߏ߫߸ ߥߎ߬ߦߊ߲߬ߞߌ߬ߟߌ ߝߊ߬.
Aucun commentaire pour le moment.