ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߓߘߴߊ߬ ߟߊ߫ ߞߕߌߕߍ߮ ߞߍ߫ ߓߌ߬ ߛߌ߬ߣߌ߲߬ߟߏ߲ ߣߌ߲߬ ߡߊ߬ ߂߀߂߆ ߕߙߊߓߊ ߕߟߋ߬ ߆߸ ߞߵߊ߬ ߓߍ߲߬ ߊߓߘߎߟߊߦߌ߬ ߖߊ߬ߞߌ߬ߕߋ߬ ߟߊ߫ ߞߏ ߡߊ߬߸ ߊ߬ߟߋ ߡߍ߲ ߦߋ߫ ߞߊ߲ߞߊ߲߫ ߡߙߊ߬ߓߊ߰ߘߊ ߡߊ߬ߞߍ߬ ߦߙߐ ߟߎ߬ ߗߋߕߌ߮ ߘߌ߫، ߓߌ߬ߟߊ߬ ߞߍߣߴߊ߬ ߞߐ߫ ߛߊ߬ߙߌ߬ߦߊ߬ ߓߟߏ߫߸ ߊ߬ ߣߴߊ߬ ߛߋ߲߬ߘߏ߲߬ߢߐ߲߰ ߜߘߍ߫߸ ߞߏ߫ ߊ߬ߓߎ߫ ߛߌ߬ߛߋ߸ ߏ߬ ߦߋ߫ ߞߌ߲߬ߕߌ߰ ߞߘߐ ߟߋ߬ ߘߌ߫ ߞߊ߲ߞߊ߲߫ ߞߓߊߘߊ ߁߭ ߞߌ߲߬ߘߊ ߟߊ߫، ߊ߬ߟߎ߫ ߣߐ߬ߝߍ߬ߜߍ߲߬ߣߍ߲߫ ߝߙߋ߬ߝߌ߬ߟߡߊ߬ߦߊ ߟߋ߬ ߞߏߛߐ߲߬߸ ߊ߬ ߣߌ߫ ߥߎߦߊ ߣߌ߫ ߥߎߦߊ ߟߊߓߊ߯ߙߊ ߊ߬ߟߎ߬ ߓߟߏ߫.
ߟߊ߬ߥߟߍ߬ߟߌ߬ ߛߌߦߊߡߊ߲ ߠߎ߬ ߞߐ ߘߐ߫߸ ߝߘߏ߬ߓߊ߬ ߞߏߕߌ߯ߘߊ ߣߌ߫ ߟߊ߬ߝߛߊ߬ߟߌ߬ߟߊ ߟߎ߬ ߕߍ߫߸ ߞߕߌߘߊ ߓߘߊ߫ ߟߊߓߊ߲߫ ߊ߬ ߦߌ߬ߘߊ ߡߊ߬ ߞߏ߫ ߡߐ߰ ߝߌ߬ߟߊ ߢߌ߲߬ ߠߎ߬ ߓߍ߯ ߛߐ߲߭ ߦߋ߫ ߝߙߋ߬ߝߌ߬ߟߡߊ߬ߦߊ ߘߐ߫߸ ߊ߬ ߣߌ߫ ߥߎߦߊ ߟߊߓߊ߯ߙߊ ߘߐ߬ߛߙߋ ߘߏ߫ ߘߐ߫، ߘߐ߬ߛߙߋ ߏ߬ ߦߋ߫ ߘߎ߱ ߘߏ߫ ߟߋ߬ ߛߓߍ߫ ߘߌ߫߸ ߛߓߍ߫ ߜߘߍ߫ ߕߘߍ߬ ߡߍ߲ ߠߊ߫ ߞߘߐ߬ߡߊ߲߬߸ ߓߊ߬ߙߌ߬ ߗߋߕߌ߮ ߞߊ߬ ߛߓߍ߫ ߞߎߘߊ߫ ߟߋ߬ ߟߊߘߊ߲߫ ߏ߬ ߟߊ߫ ߂߀߂߂ ߟߊ߫߸ ߞߌ߲߬ߕߌ߮ ߟߊ߫ ߟߊ߬ߛߙߋ߬ߦߊ߬ߟߌ ߞߐ ߘߐ߫ ߛߓߍ߫ ߘߐ߫߸ ߏ߬ ߖߍ߬ߘߍ ߞߵߊ߬ ߓߟߏ ߓߌ߬ߟߊ߬ ߡߍ߲ ߘߐ߫.
ߞߕߌ ߣߌ߲߬ ߘߐ߫߸ ߞߎߡߊ߫ ߞߍ߫ ߘߊ߫ ߞߏ ߡߍ߲ ߠߎ߬ ߞߊ߲߬߸ ߟߎߕߌ߯ ߝߌ߬ߟߊ߫ ߟߋ߬ ߘߋ߲ ߠߎ߬ ߦߋ߫ ߥߐ߬ߦߐ ߟߊ߫ ߘߎ߱ ߘߏ߫ ߝߍ߬ ߞߓߊߘߊ ߞߌ߲߬ߘߊ ߟߊ߫، ߛߓߍ ߦߋ߫ ߝߊ߲߬ ߞߋߟߋ߲ ߓߟߏ߫߸ ߊ߬ߟߎ߫ ߝߊ߬ ߞߊ߬ ߡߍ߲ ߠߊߘߊ߲߫ ߞߊ߬ߦߌ߯ ߁߉߆߈ ߠߊ߫، ߝߊ߲߬ ߞߋߟߋ߲ ߠߋ߬ ߕߊ߯ ߘߊ߫ ߞߌ߲߬ߕߌ߮ ߓߘߊ ߛߊ߫߸ ߏ߬ ߞߊ߬ ߛߓߍ ߘߏ߫ ߟߊߘߊ߲߫ ߞߵߊ߬ ߦߌ߬ߘߊ߬ ߞߏ߫ ߘߎ߱ ߦߋ߫ ߏ߬ ߟߎ߬ ߕߊ ߟߋ߬ ߘߌ߫߸ ߞߏ߫ ߡߊ߬ߞߍ߬ߦߙߐ ߘߌ߫ ߛߋ߫ ߛߓߍ ߟߊߘߊ߲߫ ߠߴߏ߬ ߟߊ߫ ߝߛߊߦߌ߫، ߏ߬ ߟߋ ߞߵߊ߬ ߞߍ߫߸ ߗߋߕߌ߮ ߝߣߊ߫ ߞߊ߬ ߛߓߍ߫ ߜߘߍ߫ ߞߟߊ߬ߣߐ߬ߦߊ߬ ߂߀߂߂ ߟߊ߫߸ ߞߵߊ߬ ߛߊߓߎ ߞߍ߫ ߞߌ߲߬ߕߌ߮ ߟߊ߫ ߟߊ߬ߛߙߋ߬ߦߊ߬ߟߌ߬ ߞߊ߲ ߘߌ߫، ߖߊ߰ ߛߓߍ ߦߋ߫ ߘߎ߱ ߏ߬ ߟߊ߫ ߞߘߐ߬ߡߊ߲߬߸ ߓߊ߬ߙߌ߬ ߏ߬ ߡߊ߫ ߛߋ߫ ߦߋ߫ ߟߊ߫ ߡߊ߬ߞߍ߬ߦߙߐ ߟߊ߫ ߛߓߍߞߘߐ ߟߎ߬ ߘߐ߫.
ߏ߬ ߟߋ ߞߏߢߊ ߘߐߢߌߡߌ߲߫ ߘߊ߫ ߞߕߌߓߋߟߋ߲ ߓߟߏ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߛߓߍ߫ ߝߟߐ ߦߋ߫ ߡߍ߲ ߠߎ߬ ߓߟߏ߫߸ ߏ߬ ߟߎ߫ ߟߋ߬ ߕߊ߫ ߦߋ߫ ߦߙߐ ߘߌ߫، ߏ߬ ߘߐ߫߸ ߊߓߘߎߟߊߦߌ߬ ߖߊ߬ߞߌ߬ߕߋ߫ ߣߐ߬ ߓߊ߯ߙߊ߫ ߟߋ߬ ߞߍ߫ ߟߊ߫ ߏ߬ ߘߌ߫߸ ߊ߬ߟߋ ߞߵߊ߬ ߝߐ߫ ߡߍ߲ ߡߊ߬ ߞߏ߫ <<ߞߊ߬ ߛߓߍ߫ ߟߊ߫ ߛߓߍ߫ ߞߊ߲߬>> ߏ߬ ߞߏߛߐ߲߬߸ ߞߕߌߓߋߟߋ߲ ߞߊ߬ ߛߊ߲߬ ߟߏ߯ߟߎ߫ ߥߛߎ ߟߊߢߌߣߌ߲߫߸ ߞߵߏ߬ ߘߐ߲ߘߐ߫ ߡߙߊ߬ߓߊ߰ߘߊ ߡߊ߬ߞߍ߬ ߦߙߐ ߗߋߕߌ߮ ߡߊ߬.
ߡߍ߲ ߓߍ߲߬ߣߍ߲߫ ߞߌ߲߬ߕߌ߮ ߟߊ߫ ߞߏ ߡߊ߬߸ ߊ߬ߓߎ߫ ߛߌ߬ߛߋ߸ ߊ߬ߟߋ ߦߋ߫ ߞߓߊߘߊ ߁߭ ߞߌ߲߬ߘߊ ߞߌ߲߬ߕߌ߰߰ ߞߘߐ ߟߋ߬ ߘߌ߫، ߏ߬ ߓߟߏߣߐ ߟߋ߬ ߦߋ߫ ߘߊ߫ ߛߓߍ߫ ߘߐ߫߸ ߡߍ߲ ߞߵߊ߬ ߦߌ߬ߘߊ߬ ߞߏ߫ ߊߓߘߎߟߊߦߌ߬ ߖߊ߬ߞߌ߬ߕߋ߬ ߟߊ߫ ߓߊ߯ߙߊ߫ ߦߙߐ ߘߌ߫ ߛߋ߫ ߛߓߍ ߘߌ߫ ߟߊ߫ ߡߐ߰ ߝߌߟߊߣߊ߲ ߡߊ߬ ߝߛߊߦߌ߫߸ ߞߏ߫ ߊ߬ߟߎ߫ ߝߊ߬ ߗߍ ߟߋ߬، ߏ߬ ߝߣߊ߫ ߣߐ߬ ߛߓߍ߫ ߟߋ߬ ߞߟߊ߬ߣߐ߬ߦߊ߬ ߟߊ߫ ߏ߬ ߘߌ߫߸ ߊ߬ ߡߊ߲߫ ߞߊ߲߫ ߞߵߊ߬ ߘߊ߫ ߓߌ߬ߟߊ߬ ߡߍ߲ ߘߐ߫߸ ߞߎߡߊߕߍ߫ ߞߵߊ߬ ߓߟߏߣߐ ߓߌ߬ߟߴߊ߬ ߘߐ߫، ߞߕߌߓߋߟߋ߲ ߞߊ߬ ߛߊ߲߬ ߣߊ߯ߣߌ߲߫ ߥߛߎ ߞߏߝߐ߫ ߏ߬ ߝߣߊ߫ ߝߍ߬ ߘߐ߲ߘߐߟߌ߫ ߓߟߏ ߡߊ߬߸ ߊ߬ ߣߌ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߛߊ߬ߓߊ߫ ߢߍ߬ߢߌ߲߬ߘߐ߬ߓߍ߲.
ߢߌ߲߬ ߠߎ߬ ߓߍ߯ ߘߐߢߌߡߌ߲ ߞߐߝߍ߬ ߞߕߌߘߊ ߓߟߏ߫߸ ߞߵߊ߬ ߕߟߏߡߊߟߐ߬ ߝߊ߲߭ ߓߍ߯ ߟߊ߫߸ ߡߊߡߊߘߎ߫ ߛߊߟߌߥߎ߬ ߖߊ߬ߞߌ߬ߕߋ߫ ߞߊ߬ ߡߙߌߘߐ ߕߊ߬.
<<ߞߕߌߘߊ ߦߋ߫ ߞߕߌ ߣߌ߲߬ ߕߍ߰ ߟߊ߫ ߓߍ߯ ߟߊߘߍ߬ߣߍ߲ ߢߊߞߘߐ߫߸ ߞߵߊ߬ ߓߍ߲߬ ߖߏ߯ߘߏ߲ ߕߊ߫ ߝߊ߲߭ ߡߊ߬߸ ߞߕߌ ߞߛߊߞߊ߫ ߝߟߐ ߘߐ߫، ߊ߲ ߓߊ߲ ߞߐ ߞߎ߲߬ߞߏ ߞߣߐߘߐ ߟߊߛߐ߬ߘߐ߲߬ ߠߊ߫߸ ߏ߬ ߡߍ߲ ߞߵߊ߬ ߦߌ߬ߘߊ߬ ߞߏ߫ ߓߌ߬ߟߊ߬ ߞߍߣߍ߲߫ ߡߐ߱ ߘߏ߫ ߟߎ߫ ߞߐ߫ ߝߙߋ߬ߝߌ߬ߟߡߊ߬ߦߊ ߣߌ߫ ߥߎߦߊ ߣߌ߫ ߥߎߦߊ ߟߊߓߊ߯ߙߊ ߘߐ߫، ߒ߬ߓߊ߬߸ ߞߕߌߘߊ ߦߴߊ߬ ߟߊߛߋ߫ ߟߊ߫߸ ߞߏ߫ ߊߓߘߎߟߊߦߌ߬ ߖߊ߬ߞߌ߬ߕߋ߬ ߣߌ߫ ߊ߬ߓߎ߫ ߛߌ߬ߛߋ߬ ߛߐ߲߭ ߓߘߊ߫ ߦߋ߫ ߞߏ߫ ߘߐ߫߸ ߡߍ߲ ߦߋ߫ ߝߙߋ߬ߝߌ߬ߟߡߊ߬ߦߊ ߘߌ߫߸ ߊ߬ ߣߌ߫ ߥߎߦߊ ߣߌ߫ ߥߎߦߊ ߟߊߓߊ߯ߙߊ، ߞߵߊ߬ ߓߍ߲߬ ߏ߬ ߕߊߢߐ߲߯ߓߐ ߡߊ߬ ߛߊ߫߸ ߊߓߘߎߟߊߦߌ߬ ߖߊ߬ߞߌ߬ߕߋ߬ ߓߘߊ߫ ߖߊ߲߬ߞߌ߲߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߁߅ ߛߊ߬ߙߊ ߟߊ߫߸ ߊ߬ ߣߌ߫ ߊ߬ߓߎ߫ ߛߌ߬ߛߋ߬ ߝߣߊ߫ ߖߊ߲߬ߞߌ߬ߣߍ߲߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߛߊ߬ߓߊ߫ ߟߋ߬ ߛߊ߬ߙߊ ߟߊ߫.>> ߏ߬ ߝߐ߫ ߘߊ߫ ߖߏߓߊ߮ ߟߋ߬ ߓߟߏ߫.
ߞߕߌ ߓߊ߲ ߞߐ ߕߍ߰ ߟߊ߫߸ ߡߊ߬ߞߊ߲߬ߞߊ߲߬ߠߌ߲߬ߠߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߓߊ߬ߟߌ߬ߣߍ߲߫ ߠߋ߬ ߞߕߌ ߣߌ߲߬ ߕߍ߰ ߢߊ ߘߐ߫߸ ߊ߬ߟߎ߬ ߡߴߊ߬ ߢߊߦߋ߫ ߝߣߊ߫، ߞߊ߬ߕߎ߲߯߸ ߞߏ߫ ߞߕߌߘߊ ߣߐ߬ ߓߟߏߞߍߦߙߌ ߡߍ߲ ߝߐ߫ ߟߊ߫߸ ߏ߬ ߡߊ߫ ߡߐ߰ ߘߊ߬ߟߎ߬ ߓߐ߫ ߖߊ߲߬ߞߌ߬ߟߌ ߞߍߢߊ߫ ߛߎ߮ ߣߌ߲߬ ߘߐ߫ ߝߋߎ߫.
<<ߊ߲ ߣߌߘߐߜߏߦߊߣߍ߲ ߠߋ߬ ߕߋ߲߬ ߞߏߛߓߍ߫، ߊ߲ߠߎ߬ ߣߐ߬ ߞߊ߲ ߡߍ߲ ߓߍ߯ ߝߐ߫ ߟߊ߫ ߘߊ߬ߟߎ ߘߌ߫߸ ߊ߲ ߣߐ߬ ߞߊ߲ ߡߍ߲ ߓߍ߯ ߝߐ߫ ߟߊ߫ ߓߟߏߞߍߦߙߌ߫ ߘߌ߫ ߞߏߢߊ ߣߌ߲߬ ߘߐ߫߸ ߞߊ߬ ߣߵߊ߬ ߦߋ߫ ߏ߬ ߘߐ߫ ߞߏ߫ ߞߕߌߘߊ ߡߴߏ߬ ߛߌ߫ ߘߊ߲ߞߎ߲߫߸ ߊ߬ ߓߘߊ߫ ߛߟߊߕߌ߯ ߊߓߘߎߟߊߦߌ߬ ߖߊ߬ߞߌ߬ߕߋ߫ ߖߊ߲߬ߞߌ߲߫، ߊ߲ ߘߴߊ߬ ߦߌ߬ߘߊ߬ ߞߏ߫ ߊ߲ ߡߊ߫ ߥߛߊ߬߸ ߊ߬ ߡߊ߫ ߓߍ߲߬ ߊ߲ ߡߊ߬، ߞߊ߬ߕߎ߲߯߸ ߘߊ߬ߟߎ ߡߍ߲ ߝߐߣߴߊ߬ߟߎ߬ ߓߟߏ߫߸ ߏ߬ ߡߴߊ߬ ߞߎ߲߬ ߓߐ߫.>> ߞߊ߬ߙߊ߲߬ߡߐ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߋ߬ ߞߵߏ߬ ߝߐ߫߸ ߊ߬ߟߋ ߡߍ߲ ߦߋ߫ ߊߓߘߎߟߊߦߌ߬ ߖߊ߬ߞߌ߬ߕߋ߬ ߟߊ߫ ߟߊ߬ߝߛߊ߬ߟߌ߬ߟߊ ߘߏ߫ ߘߌ߫.
ߟߊ߬ߝߛߊ߬ߟߌ߬ߟߊ ߞߵߊ߬ ߦߌ߬ߘߊ߬ ߞߏ߫ ߊ߬ ߣߴߊ߬ ߟߊ߫ ߟߊ߬ߝߛߊ߬ߕߊ ߓߊ߲ ߞߐ ߢߐ߲߮ ߦߋ߫ ߟߊ߫߸ ߊ߬ߟߎ߫ ߓߘߊ߫ ߓߍ߲߬ ߊ߬ ߡߊ߬ ߞߏ߫ ߊ߬ߟߎ߬ ߦߋ߫ ߡߙߌߘߐ ߣߌ߲߬ ߡߊߛߊ߬ߦߌ߲߬ ߞߏ ߟߊߢߌߣߌ߲߫.
ߊ߬ ߞߵߊ߬ ߟߴߊ߬ ߟߊ߫ ߞߎߡߊ ߞߊ߲߬ ߏ߬ ߟߋ ߘߐ߫߸ ߞߏ߫ <<ߌߞߏߡߌ߲߬ ߞߕߌߘߊ ߦߋ߫ ߖߘߍ߬ߕߌ߮ ߟߋ߬ ߘߴߊ߬ ߟߊ߫ ߡߙߌߘߐ߫ ߕߊ߬ߣߍ߲ ߠߎ߬ ߘߐ߫߸ ߊ߬ ߣߌ߫ ߛߊ߬ߙߌ߬ߦߊ߬ ߓߟߏ ߖߍ߬ߘߍ ߡߊ߬، ߊ߲ߠߎ߬ ߝߣߊ߫ ߞߵߊ߬ ߝߐ߫ ߞߕߌ߫ ߘߊߞߎ߲ ߘߐ߫ ߦߋ߲߬߸ ߞߏ߫ ߊ߲ ߡߊ߫ ߥߛߊ߬ ߞߕߌ ߕߍ߰ ߢߊ ߣߌ߲߬ ߘߐ߫، ߏ߬ ߘߐ߫߸ ߊ߲ ߣߴߊ߲ ߠߊ߫ ߟߊ߬ߝߛߊ߬ߕߊ ߟߊ߫ ߢߐ߲߯ ߦߋ ߞߐ ߘߐ߫߸ ߊ߲ ߓߍ߲߬ ߘߴߊ߬ ߡߊ߬ ߞߏ߫ ߊ߲ ߧߋ߫ ߞߕߌ ߡߊߛߊ߬ߦߌ߲߬ ߞߏ ߟߊߢߌߣߌ߲߫.>> ߊ߬ ߞߵߏ߬ ߟߋ ߦߌ߬ߘߊ߬.
ߝߘߏ߬ߓߊ߬ ߞߏߕߌ߯ߘߊ ߞߵߊ߬ ߦߌ߬ߘߊ߫ ߟߋ߬ ߞߏ߫ ߊ߬ߟߎ ߛߍߥߊߣߍ߲߫ ߠߋ߬ ߞߕߌ ߣߌ߲߬ ߕߍ߰ ߢߊ ߟߊ߫ ߝߋߝߋ߫، ߞߊ߬ߕߎ߲߯߸ ߞߏ߫ ߞߕߌ ߣߌ߲߬ ߡߍ߲ ߞߎߡߊ ߛߌߦߊߦߊ߫ ߘߊ߫ ߞߊ߲ߞߊ߲߫ ߣߊ߬ߓߊ߰ߦߊ߬ ߞߣߐ߫߸ ߊ߬ߟߋ߬ ߞߕߌ ߕߍ߰ ߢߊ ߓߘߴߊ߬ ߦߌ߬ߘߊ߬ ߞߏ߫ ߊ߬ߟߋ ߣߴߊ߬ ߟߊ߫ ߡߐ߱ ߟߎ߬ ߕߍ߫ ߞߕߌ߫ ߘߐߞߏߟߏ߲߫ ߓߌ߬ߟߊ߬ ߟߊ߫ ߡߐ߰ ߞߐ߫.
ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ߸ ߝߏߘߋ߬ ߓߌ߲ߕߎ߬ ߞߋߕߊ߬ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߬ ߡߊ߫ ߞߕߌ ߣߌ߲߬ ߘߊߡߌ߬ߣߊ߫ ߞߎ߲߬ߝߍ߬߬ߞߏ߫ ߞߊ߲߬، ߊ߬ߟߎ߫ ߛߐ߰ ߘߊ߫ ߢߊߢߌߣߌ߲ߠߌ߲߫ ߞߎ߲߬ߝߟߐ ߟߎ߫ ߟߋ߬ ߡߊ߬߸ ߊ߬ ߣߌ߫ ߞߊ߬ ߢߊ ߡߊߖߌ߰ ߊ߬ ߞߘߐ߫ ߞߏߛߓߍ߫.
ߊ߬ ߞߵߊ߬ ߦߌ߬ߘߊ߬ ߞߏ߫ ߡߐ߱ ߟߎ߬ ߦߴߊ߬ ߟߐ߲߫߸ ߓߌ߲߬ߓߊߥߏ ߟߊ ߡߐ߱ ߞߎ߲߬߸ ߏ߬ ߦߋ߫ ߞߕߌߘߊ ߟߊ߫ ߓߊ߯ߙߊ ߟߋ߬ ߘߌ߫߸ ߞߕߌߓߋߟߋ߲ ߕߴߏ߬ ߞߍ߫ ߟߊ߫، ߓߊߏ߬߸ ߓߍ߯ ߣߴߊ߬ ߟߊ߫ ߓߊ߯ߙߊ߫ ߟߋ߬.
ߊ߬ ߞߊ߬ ߓߍ߬ߒ߬ߛߋ߲߬ߡߊ ߕߣߐ߬ߓߐ߫ ߞߵߊ߬ ߞߊ߲߬ߞߊߙߌ ߟߊ߫ ߘߎ߰ ߞߏ߬ ߥߦߐ߬ ߟߊ߬ߘߊ߲߬ߠߊ ߟߎ߬ ߦߋ߫، <<ߣߌ߲߬ ߦߋ߫ ߞߎߡߊ߫ ߞߊ߲߫ ߛߊߣߌ߲ߡߊ߫ ߠߋ߬ ߘߌ߫ ߞߵߊ߬ ߟߊߛߋ ߓߍ߯ ߟߊߘߍ߬ߣߍ߲ ߡߊ߬߸ ߡߍ߲ ߠߎ߬ ߦߋ߫ ߘߎ߰ ߞߏ߬ ߓߊ߯ߙߊ ߟߊ߫، ߡߐ߰ ߛߌ߫ ߞߵߊ߬ ߢߐ߲߰ ߕߌߢߍߟߌ߫ ߞߍ߫߸ ߊ߬ ߞߍ߫ ߘߊ߫ ߝߙߋ߬ߝߌ߬ߟߊ߬ߡߊ߫ ߘߌ߫ ߓߊ߬߸ ߥߎߦߊ ߥߟߊ߫ ߥߎߦߊ ߟߊߓߊ߯ߙߊ ߘߌ߫ ߓߊ߬߸ ߞߕߌߓߋߟߋ߲ ߘߴߊ߬ ߟߐ߬ ߊ߬ ߟߐ߬ ߦߌߟߊ߸ ߞߊ߬ ߞߏ߫ ߟߊߕߐ߲߫ ߊ߬ߟߎ߬ ߟߊ߫ ߦߏ߫ ߊ߬ߟߎ߬ ߣߌ߫ ߡߍ߲ ߞߊ߫ ߞߊ߲߫.>> ߞߕߌߞߊ߲ߘߊ ߞߵߏ߬ ߟߋ ߞߊ߲߬ߞߊߙߌ ߟߊ߫.
ߏ߬ ߘߐ߫߸ ߞߕߌ ߣߌ߲߬ ߕߐ߭ ߓߍߣߊ߬ ߟߊߦߟߍ߬ ߛߊ߲ߝߍ߬ ߟߋ߬ ߡߎ߬ߕߎ߲߬، ߓߊߏ߬߸ ߟߊ߬ߝߛߊ߬ߟߌ߬ߟߊ ߟߎ߬ ߓߘߴߊ߬ ߦߌ߬ߘߊ߫ ߞߊ߬ ߓߊ߲߫߸ ߞߏ߫ ߊ߬ߟߎ߬ ߞߍߕߐ߫ ߟߋ߬ ߞߕߌ ߣߌ߲߬ ߡߊߛߊ߬ߦߌ߲߬ ߠߊ߫߸ ߞߵߏ߬ ߞߎ߲߭ ߞߍ߫ ߊ߬ߟߎ߫ ߓߍ߲߬ߓߊߟߌߦߊ ߘߌ߫ ߡߙߌߘߐ ߣߌ߲߬ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬߸ ߛߌߕߊ߲߬ ߞߊ߬ߓߊ߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.