ߞߎ߲߬ߞߏ߬ߓߊ߬ߕߐ ߟߎ߬ ߟߊ߫ ߞߕߌ ߡߍ߲ ߘߊߦߟߍ߬ ߘߊ߫ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߊ߫ ߂߀߂߆ ߓߌ߲ߠߊߥߎߟߋ߲ ߕߋ߬ߟߋ߫ ߂߆ ߡߊ߬߸ ߏ߬ ߞߏ ߦߋ߫ ߞߎ߲߭ߝߊ߱ ߞߊ߲߬ ߡߙߌߘߐ߫ ߜߍߟߍ߲ ߠߎ߬ ߟߊ߫، ߏ߬ ߟߏ߲ ߠߊ߫߸ ߞߏߢߊ߫ ߛߋߦߌ߲߫ ߠߋ߬ ߞߕߌ ߛߌ߰ ߘߊ߫ ߛߋ߲߬ߠߊ߫، ߒ߬ߓߊ߬߸ ߓߌߟߏ߲ ߣߌ߲߬ ߡߊ߬ ߂߀߂߆ ߓߌ߲ߠߊߥߎߟߋ߲ ߕߟߋ߬ ߃߀߸ ߞߕߌߘߊ ߞߵߊ߬ ߞߏߢߊ߫ ߥߐߙߐ߲ߝߌ߬ߟߊ߬ ߞߕߌߕߍ߰ ߞߎ߲߬ߞߏ߬ߓߊ ߟߎ߬ ߘߐ߫ ߞߵߊ߬ ߓߍ߲߬ ߊ߬ߟߎ߬ ߞߛߊߞߊ ߡߊ߬߸ ߡߍ߲ ߠߎ߬ ߦߋ߫ ߞߍߥߊߟߌ߫ ߖߎ߮ ߟߎ߬ ߘߌ߫߸ ߦߏ߫ ߓߋ߬ߒ߬ߞߊ߲߬ߠߌ߲߸ ߓߋ߬ߒ߬ߞߊ߲߬ߠߌ߲ ߛߎߡߊߒߘߐ߸ ߛߏ߲߬ߧߊ߬ߟߌ߬ߖߎ߮߸ ߞߘߎ߬ߟߌ ߣߌ߫ ߖߐߞߟߌ ߟߊ߬ߥߟߌ߬ߡߊ߬ߟߌ.
ߘߐ߬ߛߙߋ߬ ߞߋߟߋ߲߫ ߔߋ߫ ߟߋ߬ ߕߏߣߍ߲߫ ߞߏߢߊ߫ ߛߋߦߌ߲ ߘߐ߫ ߡߎ߬ߕߎ߲߬߸ ߏ߬ ߟߋ ߜߙߋߘߎ߯ ߓߙߊߣߡߊ߬ ߞߏߢߊ ߘߌ߫߸ ߏ߬ ߟߋ ߡߊ߫ ߓߊ߲߫ ߡߎߣߎ߲߬.
ߡߙߌߘߐ ߡߍ߲ ߠߎ߬ ߕߊ߬ ߘߊ߫ ߞߕߌߕߍ߮ ߣߌ߲߬ ߘߐ߫߸ ߏ߬ ߟߎ߫ ߞߊ߬ߙߊ߲߬ ߘߊ߫ ߞߕߌߘߊ ߞߊ߲ߕߌ߮ ߟߋ߬ ߓߟߏ߫߸ ߡߊߡߊߘߎ߫ ߛߊߟߌߥߎ߬ ߖߊ߬ߞߌ߬ߕߋ߬.
ߊߘߡߊ߫ ߘߎ߲ߓߎߦߊ߫ ߟߊ߫ ߞߏߢߊ ߘߐ߫߸ ߊ߬ߟߋ ߡߍ߲ ߞߊ߲߬ߕߐ߮ ߦߋ߫ ߟߊ߱ߦߌ߬ ߘߌ߫߸ ߏ߬ ߟߊߣߊ߬ ߘߊ߫ ߞߕߌߘߊ ߟߊ߫ ߛߏ߲߬ߧߊ߬ߟߌ߬ ߞߏ ߟߋ߬ ߘߐ߫ ߡߙߊ߬ߒ߬ߡߊ߬ߝߋ߲ ߠߊ߫߸ ߊ߬ ߣߌ߫ ߡߐ߰ ߝߊ߰ ߞߏ ߣߌ߫ ߛߌߦߊߡߊ߲߫ ߜߘߍ߫ ߟߎ߫، ߞߕߌߘߊ ߞߵߊ߬ ߦߋ߫ ߛߐ߲߬ߡߊ߬ ߘߌ߫ ߞߵߊ߬ ߖߊ߲߬ߞߌ߫ ߛߊ߲߬ ߓߌߛߓߊ߬ ߥߛߎ ߟߊ߫߸ ߘߊ ߕߍ߫ ߓߌ߬ߟߴߊ߬ ߘߐ߫ ߝߏ߫ ߊ߬ ߓߊ߯ ߛߊ߲߬ ߕߊ߲߫ ߞߍ߫ ߡߎߣߎ߲߬.
ߊ߬ߟߋ ߣߌ߫ ߡߍ߲ ߠߎ߬ ߡߊߝߌ߲߬ߣߍ߲߫߸ ߏ߬ ߟߋ߬ ߦߋ߫ ߓߏ߬ߙߌ߬ ߥߊ ߟߊ߫ ߡߎߣߎ߲߬، ߏ߬ ߟߎ߬ ߟߊ߫ ߞߏߢߊ ߘߐ߫߸ ߞߕߌߘߊ ߞߊ߬ ߥߛߎ߫ ߘߎߡߊߣߍ߲ ߠߋ߬ ߟߊ߫ ߏ߬ ߟߎ߫ ߞߎ߲߬߸ ߞߊ߬ ߓߊ߲߫ ߞߊ߬ ߡߌ߬ߣߊ߬ߟߌ ߟߐ߬ߒ߬ߞߋ߬ߟߊ ߓߌ߬ߟߴߊ߬ߟߎ߬ ߞߐ߫.
ߡߍ߲ ߓߍ߲߬ߣߍ߲߫ ߏߦߋ ߞߏߦߌߝ߭ߏߖߌ߫ ߕߊ߫ ߝߊ߲߭ ߡߊ߬߸ ߏ߬ ߝߣߊ߫ ߣߐ߬ߝߍ߬ߜߍ߲߬ ߘߊ߫ ߛߏ߲߬ߧߊ߬ߟߌ߬ ߞߏ ߟߋ߬ ߘߐ߫ ߡߙߊ߬ߒ߬ߡߊ߬ߝߋ߲ ߠߊ߫߸ ߞߕߌߘߊ ߞߵߊ߬ ߟߊ߫ ߞߏ ߟߊߦߟߍ߬ ߛߏ߲߬ߧߊ߬ߟߌ߬ߓߊ ߟߎ߫ ߞߊ߬ߛߊ߲ ߘߐ߫، ߊ߬ ߛߐ߲߭ ߦߋ߫ ߘߴߊ߬ ߟߊ߫ ߞߏ߫ ߞߍߣߍ߲ ߠߎ߬ ߘߐ߫߸ ߛߊ߲߬ ߞߋߟߋ߲߫ ߠߋ߬ ߟߊ߫ ߘߴߊ߬ߟߋ ߞߎ߲߬، ߞߕߌ ߘߊߞߎ߲ ߘߐ߫߸ ߊ߬ ߟߊߞߙߐ߬ߛߌ߬ ߘߊ߫ ߞߏ߫ ߤߊ߲ߞߟߌ߫ ߞߏ ߖߐ߲ߖߐ߲߫ ߕߍ߫߸ ߏ߬ ߝߣߊ߫ ߕߊ߬ ߘߊ߫ ߓߊ߫ ߘߐ߫ ߛߊ߬ߙߌ߬ߦߊ߬ ߓߟߏ߫߸ ߏ߬ ߟߋ ߞߵߊ߬ ߟߊ߫ ߥߛߎ߫ ߞߏߝߐߣߍ߲ ߞߍ߫ ߢߊ ߏ߬ ߡߊ߬.
ߡߍ߲ ߘߏ߲߬ ߓߍ߲߬ߣߍ߲߫ ߖ߭ߋ߬ߙߐߡ ߞߏߦߌߝ߭ߏߖߌ߫ ߡߊ߬߸ ߏ߬ ߝߣߊ߫ ߡߌ߬ߣߊ߬ ߘߴߊ߬ߟߋ߬ ߞߏ߫ ߞߋߟߋ߲ ߠߋ߬ ߘߐ߫߸ ߛߊ߲߭ ߛߓߊ߬ ߥߛߎ߫ ߟߋ߬ ߟߊ߫ ߘߴߏ߬ ߞߎ߲߬߸ ߞߊ߬ ߓߊ߲߫ ߞߊ߬ ߡߌ߬ߣߊ߬ߟߌ ߟߐ߬ߒ߬ߞߋ߬ߟߊ ߓߌ߬ߟߴߊ߬ ߞߐ߫.
ߣߴߌ ߞߊ߬ ߊߟߌߝߊ߫ ߎ߬ߟߊ߬ߙߋ߫ ߕߊ߬߸ ߓߌ߬ߟߊ߬ ߞߍ߫ ߘߴߏ߬ ߞߐ߫ ߓߋ߬ߒ߬ߞߊ߲߬ߠߌ߲ ߛߎߡߊߒߘߐ ߟߋ߬ ߘߐ߫߸ ߞߕߌߘߊ ߞߵߏ߬ ߦߋ߫ ߛߐ߲߬ߡߊ߬ ߘߌ߫߸ ߞߊ߬ ߓߊ߲߫ ߞߵߊ߬ ߖߊ߲߬ߞߌ߲߫ ߛߊ߲߬ ߟߏ߯ߟߎ߫ ߥߛߎ ߟߊ߫ ߞߎ߲߬ߞߏ߬ߓߊ߬ߕߐ ߟߎ߬ ߕߊ߫ ߢߊ ߡߊ߬، ߣߊ߲߬ߒ߬ߕߊ߲߬ߧߊ߫ ߞߎ߲߬ߠߊ߫߸ ߣߊ߲߬ߒ߬ߕߊ߲߬ߧߊ߬ ߞߙߎ ߟߊ߫ ߘߛߊߛߌ߯ߟߌ ߘߐ߫ ߞߊ߬ ߝߘߊ߫ ߡߏ߬ߤߊ߬ߡߍߘ ߞߡߊ߬ߙߊ߬ ߟߊ߫߸ ߞߕߌߘߊ ߞߵߏ߬ ߟߊ߫ ߡߞߊ߬ߛߌ߬ߟߌ ߦߋ߫ ߡߌ߬ߣߊ߬ߕߊ߫߸ ߊ߬ ߣߌ߫ ߘߊ߬ߟߎ߬ ߖߐ߲ߖߐ߲߫ ߦߴߊ߬ ߟߊ߫، ߏ߬ ߟߋ ߘߐ߫߸ ߊ߬ ߝߐ߫ ߘߊ߫ ߞߏ߫ ߊߟߌߝߊ߫ ߥߎ߬ߟߊ߬ߙߋ߬ ߦߋ߫ ߖߕ ߂߈߅ ߀߀߀ ߛߊ߬ߙߊ߫ ߞߵߏ߬ ߞߍ߫ ߞߏߕߐ ߟߊ߫ ߓߊߛߌ߫ ߛߐ߲ߞߐ ߘߌ߫߸ ߡߎ߬ߛߊ߬ߞߊ ߣߌ߫ ߘߏ߲߬ߘߊ߬ߟߊ ߓߍ߯ ߦߴߊ߬ߟߋ ߟߋ߬ ߞߎ߲߬.
ߞߕߌߘߊ ߓߊ߲߫ ߘߊ߫ ߝߣߊ߫ ߞߊ߬ ߛߊߟߌߥߎ߬ ߝߏߝߣߊ߫ ߟߊ߫ ߞߕߌߕߍ߰߸ ߏ߬ ߦߋ߫ ߘߊ߫ ߛߐ߲߬ߡߊ߬ ߘߌ߫ ߓߋ߬ߒ߬ߞߊ߲߬ߠߌ߲ ߞߎ߲߬ߞߏ߬ߓߊ߬ߕߐ߬ߦߊ ߟߋ߬ ߘߐ߫߸ ߊ߬ ߖߊ߲߬ߞߌ߲߬ ߘߊ߫ ߛߊ߲߭ ߛߓߊ߬ ߥߟߎ߫ ߟߋ߬ ߟߊ߫، ߡߍ߲ ߓߍ߲߬ߕߐ߫ ߣߊ߲߬ߒ߬ߕߊ߲߬ߧߊ߬ ߞߎ߲ߘߊ߫ ߡߊ߬߸ ߣߊߞߊ߬ߣߌ߲߬ ߖߊߥߙߊ߫ ߡߍ߲ ߞߵߊ߬ ߡߊߞߊ߬ߛߌ߫ ߊ߬ ߞߊ߲߬ ߣߊ߲߬ߒ߬ߕߊ߲߬ߧߊ߬ ߞߎ߲ߘߊ߫߸ ߏ߬ ߞߵߊ߬ ߛߋ߲߬ߓߐ߫ ߟߋ߬߸ ߞߊ߬ ߡߎ߬ߛߊ߬ߞߊ ߣߌ߫ ߘߏ߲߬ߘߊ߬ߟߊ ߓߍ߯ ߕߏ߫ ߖߊ߲߬ߞߌ߬ߓߊ߰ߕߐ ߞߎ߲߬.
ߣߴߌ ߘߏ߲߬ ߞߊ߬ ߟߊ߲߱ߛߌ߬ߣߍ߬ ߕߙߊߥߟߋ߫ ߕߊ߬߬߸ ߏ߬ ߛߐ߲߭ ߦߋ߫ ߘߊ߫ ߗߍ߬ߣߌ߬ߡߛߏ߬ߦߊ ߓߋ߬ߒ߬ߞߊ߲߬ߠߌ߲߬ ߞߏ ߟߋ߬ ߘߐ߫߸ ߞߕߌߘߊ ߞߊ߬ ߞߎ߲߬ߞߏ߬ߓߊ߬ߕߐ߬ߦߊ ߓߌ߲ߓߊߥߏ ߛߊ߲߬ ߟߏ߰ߟߎ߬ ߥߛߎ ߟߋ߬ ߟߴߊ߬ߟߋ߫ ߞߎ߲߬߸ ߞߵߊ߬ ߛߐ߬ߘߐ߲߬ ߊ߬ ߓߋ߬ ߘߊ߫ ߡߍ߲ ߞߊ߲߬߸ ߏ߬ ߡߊ߫ ߛߐ߬ߘߐ߲߬ ߞߕߌ ߘߐ߫.
ߡߍ߲ ߘߏ߲߬ ߓߍ߲߬ߣߍ߲߫ ߓߊ߲߬ߖߎ߮ ߞߐ߲ߘߍ߫ ߡߊ߬߸ ߞߕߌߘߊ ߞߵߊ߬ ߦߌ߬ߘߊ߬ ߞߏ߫ ߗߍ߬ߣߌ߬ߡߛߏ߬ߦߊ ߛߎߡߊߒߘߐ߫ ߞߏ ߡߍ߲ ߝߐߣߴߏ߬ ߣߐ߬ ߘߐ߫߸ ߏ߬ ߞߕߌ߫ ߘߊ߫ ߞߵߊ߬ ߦߋ߫ ߞߏ߫ ߛߌߞߊ ߦߴߏ߬ ߘߐ߫߸ ߏ߬ ߡߊ߫ ߛߋ߫ ߕߊ߬ ߟߊ߫، ߓߊ߬ߙߌ߬߸ ߊ߬ ߦߋ߫ ߛߐ߲߬ߡߊ ߘߌ߫ ߛߏ߲߬ߧߊ߬ߟߌ߬ߖߎ߮ ߣߌ߫ ߛߏ߲߬ߧߊ߬ߟߌ ߞߏߟߊߛߘߌ ߟߋ߬ ߘߐ߫߸ ߏ߬ ߟߋ ߞߊ߬ ߛߊ߲߬ ߕߊ߲߫ ߥߛߎ߫ ߘߊߕߎ߲߯ߣߍ߲ ߟߴߊ߬ߟߋ ߞߎ߲߬.
ߞߕߌߘߊ ߞߊ߬ ߖߊ߬ߡߊߙߌ ߘߌ߫ ߝߣߊ߫߸ ߞߏ߫ ߞߵߊ߬ߟߋ ߟߊߕߊ߯ ߞߌ߲ߘߌߦߊ߫ ߥߛߎߖߌ߲ߓߊ ߟߊ߫߸ ߊ߬ ߦߋ߫ ߥߴߊ߬ ߟߊ߫ ߥߛߎ ߞߍ߫ ߦߋ߲߬، ߡߍ߲ ߘߏ߲߬ ߓߍ߲߬ߣߍ߲߫ ߣߊ߲߬ߒ߬ߕߊ߲߬ߧߊ߫ ߝߊ߲߬ߝߍ߬ߟߊ ߡߊ߬߸ ߊ߬ ߝߐ߫ ߘߊ߫ ߞߏ߫ ߊ߬ ߦߋ߫ ߖߕ ߈ ߃߀߀ ߀߀߀ ߟߋ߬ ߛߙߊ߬߸ ߞߵߏ߬ ߘߌ߫ ߡߏ߬ߤߊ߬ߡߍߘ ߞߐ߲ߘߍ߫ ߡߊ߬߸ ߏ߬ ߟߊ߫ ߔߏߔߏ ߡߍ߲ ߓߐ߫ ߘߴߊ߬ ߓߟߏ߫߸ ߣߊߟߌ߬ߡߎ߲߫ ߕߋߝ߭ߍߛ ߛߑߕߊߙ ߁߂߅ ߘߌ߫߸ ߥߊߘߌ ߏ߬ ߟߋ ߞߍߕߐ߫ ߏ߬ ߢߐ߲߱ ߘߌ߫.
ߝߏߘߋ߫ ߞߊ߬ߟߐ ߝߣߊ߫ ߕߊ߫ ߞߕߌ ߞߍ߫ ߘߊ߫߸ ߊ߬ ߝߐ߫ ߘߊ߫ ߞߏ߫ ߏ߬ ߞߊ߬ ߝߊ߰ߟߌ ߘߐ߬ߛߌ߬ߟߊ߲߬ߠߌ߲ ߞߍ߫߸ ߓߊ߬ߙߌ߬ ߛߊ߬ߙߌ߬ߦߊ߬ ߡߴߏ߬ ߦߋ߫ ߛߥߊ߬ߓߊ߬ ߘߊ߫߸ ߊ߬ߟߎ߫ ߞߵߊ߬ߟߎ߬ ߓߟߏߓߐ߫ ߊ߬ߟߋ߬ ߘߐ߫ ߦߙߐ ߏ߬ ߘߐ߫، ߒ߬ߞߊ߬߸ ߊ߬ ߦߋ߫ ߘߊ߫ ߞߏ߫ ߊ߬ ߛߐ߲߭ ߦߋ߫ ߗߍ߬ߣߌ߬ߡߛߏ߬ߦߊ ߓߋ߬ߒ߬ߞߊ߲߬ߠߌ߲߬ ߞߏ ߘߐ߫߸ ߊ߬ ߣߌ߫ ߞߘߎ߬ߟߌ ߣߌ߫ ߡߊ߬ߘߌ߬ߡߌ߲߬ߠߌ߲ ߟߊ߬ߥߟߌ߬ߡߊ߬ߟߌ߸ ߏ߬ ߟߋ ߞߊ߬ ߛߊ߲߬ ߟߏ߯ߟߎ߫ ߥߛߎߖߌ߲߫ ߓߊߟߊ߲ߣߍ߲ ߟߴߊ߬ߟߋ ߞߎ߲߬، ߡߍ߲ ߘߏ߲߬ ߓߍ߬ߕߐ߫ ߣߊ߲߬ߒ߬ߕߊ߲߬ߧߊ߫ ߝߊ߲߬ߝߍ߬ߟߊ ߡߊ߬߸ ߓߐ߬ߟߐ߲߬ߞߊ߬ ߕߊߦߌߓߊ߬ ߕߙߊߥߟߋ߫ ߟߋ߬ ߞߵߊ߬ ߡߊߞߊ߬ߛߌ߫ ߊ߬ߟߋ߫ ߞߊ߲߬߸ ߏ߬ ߡߊ߫ ߕߊߛߙߊߟߌ߫ ߝߏߦߌ߬ ߢߌߣߌ߲߫ ߊ߬ ߝߍ߬߸ ߞߕߌߘߊ ߝߣߊ߫ ߡߴߏ߬ ߞߏ ߘߐߖߊ߬.
ߞߕߌߕߍ߮ ߏ߬ ߟߋ ߓߊ߲ߣߍ߲߫߸ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߣߐ߬ߞߊ߲߬ߛߌ߮߸ ߓߊ߲߬ߜ߭ߊߟߌ߬ ߝߍ߲߬ߘߎ߬ߣߏ߫ ߞߎߡߊ߫ ߘߊ߫ ߝߘߏ߬ߓߊ߬ ߞߏߕߌ߮ ߟߊ߫ ߞߎߡߊ߫ ߘߐ߫:
<<ߊ߲ ߞߎ߲߬ߢߐ߯ ߝߌ߬ߟߊ ߟߋ߬ ߞߎ߲߬ߞߏ߬ߓߊ߬ߕߐ ߟߎ߬ ߟߊ߫ ߞߕߌ ߣߌ߲߬ ߞߊ߲߬ ߕߋ߲߬، ߘߐ߬ߛߙߋ߬ ߛߋߦߌ߲߫ ߠߋ߬ ߦߴߊ߬ ߞߣߐ߫߸ ߥߐߙߐ߲ߝߌ߬ߟߊ߬ ߓߘߊ߫ ߢߊߓߐ߫ ߏ߬ ߘߐ߫ ߕߋ߲߬، ߓߌ߬ ߢߐ߲߰ ߟߏ߲߫߸ ߞߕߌߘߊ ߞߊ߲ߕߌ߮߸ ߊ߬ߟߋ ߣߴߊ߬ ߘߊߝߍߛߌ߯ߟߊ ߟߎ߬߸ ߊ߬ߟߎ߫ ߞߊ߬ ߞߕߌ߫ ߟߎ߫ ߕߍ߰߸ ߡߍ߲ ߠߎ߬ ߘߊߘߐߖߊߥߏ ߓߘߊ߫ ߓߊ߲߫߸ ߡߌ߬ߣߊ߬ߞߊ߲߬ ߝߐ ߣߌ߫ ߡߞߊ߬ߘߊ߲߬ߞߊ߲߬ ߝߐ ߟߎ߬ ߞߐߝߍ߬ ߞߊ߬ߣߌ߲߬.>>
ߛߊ߬ߙߌ߬ߦߊ߬ߓߊ߰ߙߊ߬ߟߊ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߛߍߥߊߣߍ߲߫ ߠߋ߬ ߣߌ߲߬ ߞߏ ߡߎ߰ߡߍ ߘߐ߫ ߝߛߊߦߌ߫߸ ߞߵߊ߬ ߓߍ߲߬ ߡߙߌߘߐ߫ ߕߊ߬ߣߍ߲ ߡߊ߬:
<<ߞߕߌߘߊ ߞߵߊ߲ ߥߊ߫ ߦߙߐ ߦߋ߫߸ ߞߵߊ߬ ߡߌ߬ߣߊ߬، ߒ ߞߊ߬ ߡߙߌߣߊ߲ ߡߍ߲ ߦߌ߬ߘߊ߫ ߡߌ߬ߣߊ߬ߞߊ߲߬ ߝߐ ߥߊ߯ߕߌ ߟߊ߫߸ ߏ߬ ߟߎ߫ ߕߊ߬ ߘߊ߫ ߓߊ߫ ߘߐ߫، ߏ߬ ߦߋ߫ ߛߍߥߊ߫ ߞߏߓߊ߫ ߟߋ߬ ߘߌ߫߸ ߞߵߊ߬ ߓߍ߲߬ ߡߙߌߘߐ߫ ߕߊ߬ߣߍ߲ ߠߎ߬ ߡߊ߬ ߓߌ߬ ߞߕߌߕߍ߮ ߘߐ߫.>>
ߦߏ߫ ߊ߬ ߕߎ߲߬ ߓߘߊ߫ ߝߐ߫ ߢߊ ߡߍ߲ ߡߊ߬߸ ߘߐ߬ߛߙߋ߫ ߢߍ߬ߣߍ߲߬ߡߊ ߡߍ߲ ߦߴߊ߬ ߘߐ߫߸ ߞߕߌߞߊ߲ߘߊ ߣߐ߬ߞߊ߲߬ߛߌ߮ ߞߵߊ߬ ߦߌ߬ߘߊ߬ ߞߏ߫ ߊߘߡߊ߫ ߘߎ߲ߓߎߦߊ߫ ߡߍ߲ ߞߊ߲߬ߕߐ߮ ߦߋ߫ ߟߊ߱ߦߌ߬ ߘߌ߫߸ ߊ߬ ߣߌ߫ ߓߊ߲߬ߖߎ߮ ߞߐ߲ߘߍ߫߸ ߏ߬ ߟߎ߬ ߞߊ߫ ߞߊ߲߫ ߞߊ߬ ߟߊߕߊ߯ ߞߌ߲ߘߌߦߊ߫ ߟߋ߬߸ ߊ߬ߟߎ߬ ߦߋ߫ ߥߴߊ߬ߟߎ߬ ߟߊ߫ ߥߛߎ ߞߍ߫ ߦߋ߲߬، ߊ߲ ߞߊ߬ ߞߕߌߞߊ߲ߘߊ ߢߌ߬ߣߌ߲߬ߞߊ߫ ߞߌ߲ߘߌߦߊ߫ ߕߊ߯ߟߌ ߞߎ߲߭ ߡߊ߬߸ ߞߕߌߞߊ߲ߘߊ ߣߐ߬ߞߊ߲߬ߛߌ߮ ߞߵߏ߬ ߘߐߞߣߍ߫:
<< ߣߌ߫ ߡߐ߰ ߦߴߊ߲ ߓߟߏ߫߸ ߡߍ߲ ߠߎ߬ ߡߊߛߌߟߊ߲ߣߍ߲߫ ߊ߲ ߘߌ߬ߞߌߙߊ ߘߐ߫߸ ߊ߬ ߣߌ߫ ߥߛߎ ߟߊ߫߸ ߝߏ߫ ߞߵߏ߬ ߟߎ߬ ߡߊߕߊ߯ ߊ߲ ߠߊ߫ ߟߋ߬، ߣߴߊ߬ߟߎ߬ ߕߏ߫ ߘߊ߫ ߞߊ߲ߞߊ߲߫ ߦߊ߲߬߸ ߞߏ ߘߏ߫ ߘߌ߫ ߛߋ߫ ߞߍ߫ ߟߊ߫، ߏ߬ ߘߐ߫߸ ߊ߬ߟߎ߫ ߓߍ߲߬ߣߍ߲߫ ߦߙߐ ߡߍ߲ ߘߐ߫߸ ߏ߬ ߟߋ ߞߌ߲ߘߌߦߊ߫ ߥߛߎ ߘߌ߫، ߊ߲ ߞߵߏ߬ ߝߐ߫ ߊ߲ ߠߊ߫ ߡߌ߬ߣߊ߬ߞߊ߲߬ ߝߐ ߘߐ߫߸ ߞߕߌߘߊ ߘߏ߲߬ ߝߣߊ߫ ߓߍ߲߬ ߘߴߏ߬ ߡߊ߬.>>
ߒ߬ߓߊ߬߸ ߞߎ߲߬ߞߏ߬ߓߊ߬ߕߐ ߟߎ߬ ߟߊ߫ ߞߕߌ ߡߍ߲ ߦߴߌߘߐ߫߸ ߘߐ߬ߛߙߋ߬ ߞߋߟߋ߲ ߡߍ߲ ߕߏߣߍ߲߫ ߡߎ߬ߕߎ߲߬߸ ߏ߬ ߟߋ ߜߙߋߘߎ߯ ߓߙߊߣߡߊ߬ ߕߊ ߘߌ߫، ߏ߬ ߞߕߌ ߦߋ߫ ߛߋ߲߬ߠߊ߫ ߡߎߣߎ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.