ߖߌ߬ߣߍ߬: ߡߊ߬ߞߐ߬ߣߐ߲߬ߠߌ߲߬ ߛߌߦߊߡߊ߲ ߠߎ߬ ߞߐߝߍ߬߸ ߞߑߟߏߘ ߔߌ߯ߝ߭ߌ߫ ߝߎ߬ߙߋ ߓߘߊ߫ ߟߊߕߊ߬ߡߌ߲߫ ߊ߬ ߞߐߙߍ ߡߊ߬

ߖߌ߬ߣߍ߫ ߣߊ߲߬ߕߌ߰ ߞߎ߲߬ߕߌ߰ ߞߘߐ ߡߍ߲ ߕߍ߬ߘߍ߫ ߟߊ߬ߡߙߊ ߘߐ߫ ߞߐߣߊߞߙߌ߫ ߥߛߎߖߌ߲ߓߊ ߟߊ߫߸ ߣߴߊ߬ ߕߐ߯ ߞߏ߫ ߞߑߟߏߘ ߔߌ߯ߝ߭ߌ߫߸ ߏ߬ ߝߎ߬ߙߋ ߓߘߊ߫ ߟߊߕߊ߬ߡߌ߲߫ ߊ߬ ߞߐߙߍ ߡߊ߬߸ ߕߟߋ߬ ߘߊ߲ߘߐ߫ ߕߊ߯ߡߊ߫ ߓߊ߲ߓߊ߲ߟߌ ߞߐߝߍ߬. ߟߌ߬ߤߟߊ ߏ߬ ߡߍ߲ ߔߘߋߔߘߋߟߊߕߍ߰ ߘߴߊ߬ ߟߊ߫ ߟߊ߬ߝߛߊ߬ߟߌ߬ߟߊ ߓߟߏ߫.

ߞߑߟߏߘ ߔߌ߯ߝ߭ߌ߫ ߡߍ߲ ߞߊ߲߬ߕߐ߮ ߦߋ߫ <<ߞߏߔߑߟߊ߲߫>> ߘߌ߫߸ ߣߴߊ߬ ߘߊ߫ ߛߊ߬ ߘߊ߫ ߂߀߂߆ ߓߌ߲ߠߊߥߎߟߋ߲ ߕߟߋ߬ ߆ ߡߊ߬ ߞߐߣߊߞߙߌ߫߸ ߊ߬ ߛߎ߭ ߟߊߕߊ߬ߡߌ߲߬ ߘߴߊ߬ ߟߊ߫ ߡߐ߱ ߟߎ߫ ߡߊ߬ ߞߎߣߎ߲ߟߏ߲ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߄ ߡߊ߬، ߊ߬ ߟߊߕߊ߬ߡߌ߲߬ ߘߴߊ߬ ߟߊ߫ ߞߐߙߍ ߡߊ߬ ߌߢߊߛ ߘߌߣ ߘߊ߲ߘߊߛߏ ߛߎ߬ߓߏ ߠߋ߬ ߟߊ߫߸ ߞߵߏ߬ ߞߍ߫ ߕߟߋ߬ ߦߙߌߞߊ߫ ߕߊ߫ߡߊ ߞߎ߲߬ߘߏ߲ ߘߌ߫ ߊ߬ ߟߊ߫ ߡߐ߱ ߟߎ߬ ߓߟߏ߫ ߡߎ߬ߕߎ߲߬ ߛߊ߫، ߏ߬ ߡߍ߲ ߞߎߡߊ ߕߌ߯ߕߌ߯ߦߊ ߛߐ߬ߘߐ߲߬ ߘߊ߫ ߖߌ߬ߣߋߡߊߕߍ߲ ߞߌ߬ߓߊ߬ߙߏ߬ߘߊ ߓߟߏ߫ ߞߊ߬ߣߌ߲߬.

ߘߋ߲ߓߦߊ ߟߊ߫ ߟߊ߬ߝߛߊ߬ߟߌ߬ߟߊ߸ ߞߊ߬ߙߊ߲߬ߡߐ߰ ߊߓߘߎߙߊߤߑߡߊߣߌ߲߬ ߘߊߓߏ߫ ߥߟߋߣߍ߲ ߜߋߟߋ߲ߜߋߟߋ߲ ߠߊ߫߸ ߏ߬ ߞߊ߬ ߕߡߊ߬ߖߌ ߓߐ߫ ߛߎ߭ ߟߊߕߊ߬ߡߌ߲߬ ߞߏ ߘߐ߫ ߝߛߊߦߌ߫، ߊ߬ ߞߵߊ߬ ߦߌ߬ߘߊ߬ ߞߏ߫: <<ߛߎ߭ ߓߘߊ߫ ߘߌ߫ (ߞߐߙߍ) ߡߊ߬ ߛߍߣߍ߲߬ ߝߋߝߋ߫، ߘߋ߲ߓߦߊ ߓߘߊ߫ ߝߎ߬ߙߋ ߟߊߛߐ߬ߘߐ߲߬߸ ߊ߬ ߦߴߊ߬ߟߎ߬ ߕߊ߫ ߓߟߏ ߟߋ߬ ߡߊ߬ ߡߎ߬ߕߎ߲߬߸ (ߏ߬ ߞߍ߫ ߘߊ߫) ߞߊ߬ߦߌ߯ ߞߎߣߎ߲߬ (ߠߋ߬).>> ߟߊ߬ߝߛߊ߬ߟߌ߬ߟߊ ߞߵߏ߬ ߟߋ ߦߌ߬ߘߊ߬߸ ߞߵߊ߬ ߦߌ߬ߘߊ߬ ߞߏ߫ ߕߊ߯ߡߊ ߡߍ߲ ߕߎ߲߬ ߦߴߌߘߐ߫ ߘߋ߲ߓߦߊ ߓߟߏ߫ ߛߊ߫ ߛߎ߭ ߘߌ߫ ߘߴߊ߬ߟߎ߫ ߡߊ߬߸ ߏ߬ ߕߊ߯ߡߊ ߓߘߊ߫ ߓߊ߲߫.

ߟߊ߬ߝߛߊ߬ߟߌ߬ߟߊ ߟߊ߫ ߝߐߟߌ߫ ߘߐ߫߸ ߣߊ߲߬ߕߌ߰ ߞߘߐ ߝߎ߬ߙߋ ߓߍߣߊ߬ ߕߊ߬ ߞߐߣߊߞߙߌ߫ ߞߵߊ߬ ߟߊߕߊ߯ ߊ߬ ߥߟߏߛߟߎ ߟߊ߫ ߛߌ߬ߣߌ߲߬ߟߏ߲ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߆ ߡߊ߬߸ ߏ߬ ߡߍ߲ ߦߴߊ߬ ߟߊ߫ ߡߐ߱ ߟߎ߬ ߘߌߦߊߣߊ߲ߞߏ ߘߌ߫ ߞߊ߬ߣߌ߲߬߸ ߛߴߊ߬ ߛߎ߭ ߘߌ߫ ߘߏ߲߬ ߦߋ߲߬، <<ߒ ߞߵߊ߬ ߟߐ߲߫ ߏ߬ ߦߋ߫ ߞߐߙߍ ߘߌߦߊߣߊ߲ ߠߋ߬ ߘߌ߫، ߊ߬ߟߎ߫ ߞߵߏ߬ ߟߋ ߝߐ߫ ߒ ߧߋ߫: ߞߏ߫ ߊ߬ߟߎ߬ ߘߌ߫ ߥߴߊ߬ߟߎ߬ ߟߊ߫ ߘߎ߰ߣߍ߲ ߠߊ߫ ߛߌߣߌ߲߫ ߛߌ߬ߣߌ߲߬ߟߏ߲ ߡߊ߬.>> ߞߊ߬ߙߊ߲߬ߡߐ߰ ߊߓߘߎߙߊߤߑߡߊߣߌ߲߬ ߘߊߓߏ߫ ߟߋ߬ ߞߊ߲߫ ߕߋ߲߬߸ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߛߎ߭ ߥߊߕߐ߫ ߘߎ߰ߣߍ߲ ߡߍ߲ ߠߊ߫߸ ߊ߬ ߕߴߏ߬ ߕߐ߯ ߞߏ ߞߊ߬ߟߊߡߊ߬ ߓߊߞߍ߫.

ߊߟߎ߫ ߦߴߊ߬ ߟߐ߲߫߸ ߞߑߟߏߘ ߔߌ߯ߝ߭ߌ߫ ߞߍ߫ ߘߊ߫ ߢߍߡߌߘߊ߫ ߡߎߛߊ߫ ߘߊ߬ߘߌߛ ߞߡߊ߬ߙߊ߬ ߟߊߞߊ߲ߘߊ ߞߏߕߌ߮ ߟߋ߬ ߘߌ߫، ߊ߬ߟߋ߫ ߛߊ߬ ߘߊ߫ ߞߵߊ߬ ߕߏ߫ ߥߛߎ ߟߋ߬ ߟߊ߫߸ ߟߌߞߐ߯ߘߐߦߊߕߜߋ ߟߋ߬ ߞߍ߫ ߘߴߊ߬ ߛߕߊ ߘߌ߫، ߊ߬ ߟߊ߫ ߛߊ߬ߦߊ ߞߎߡߊ ߛߌߦߊߦߊ߫ ߘߴߊ߬ ߟߊ߫ ߡߐ߱ ߟߎ߬ ߖߍ߬ߘߍ ߣߌ߫ ߡߐ߰ ߜߘߍ ߕߐ߭ ߟߎ߫ ߝߍ߬ ߞߏߛߓߍ߫߸ ߊ߬ ߞߎߡߊ ߟߊ߲߬ߓߏ߲ ߥߙߊ߬ ߘߊ߫ ߞߊ߬ ߦߙߐ ߓߍ߯ ߟߊߝߏ߬، ߞߵߊ߬ ߓߍ߲߬ ߊ߬ ߟߊߘߏ߲߬ ߢߊ ߡߊ߬ ߥߛߎ ߟߊ߫߸ ߞߵߊ߬ ߛߐ߬ߘߐ߲߬ ߊ߬ ߟߊ߫ ߞߍ߲ߘߍߦߊ ߟߊ߲߰ߝߏ߬ߣߍ߲߫߸ ߊ߬ ߣߴߊ߬ ߟߊ߫ ߘߊ߲ߘߊߟߌ ߞߍߢߊ ߟߎ߬ ߞߵߊ߬ ߕߏ߫ ߥߛߎ ߞߣߐ߫ ߦߋ߲߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.