ߓߌ߬ ߞߐ߬ߟߏ߲ ߂߀߂߅ ߘߓߊ߬ߓߌߟߊ ߕߟߋ߬ ߁߂ ߡߊ߬߸ ߡߊ߬ߟߌ ߞߏߕߌ߯ ߝߟߐ߫ ߞߘߐ ߛ߭ߏߖߍߟ ߞߏߞߟߊ߫ ߡߊ߬ߦߌߜ߭ߊ߬ ߡߌ߬ߘߊ߬ ߘߊ߫ ߞߵߊ߬ ߓߌ߬ߟߊ߬ ߢߟߊߥߛߎ ߟߊ߫، ߡߎ߲߬ ߞߏߛߐ߲߬߸ ߞߏߘߐߛߏ߯ߙߋ ߘߏ߫ ߟߋ߬ ߦߋ߫ ߛߋ߲߬ߠߊ߫ ߖߊ߯ߓߊ ߟߊ߬ߛߐ߬ߘߐ߲߬ ߡߊߣߊ߲ߞߎ߲ ߣߌ߫ ߞߏߕߌ߯ ߝߟߐߘߊ ߞߊ߲߬߸ ߣߊ߲߬ߝߟߏ ߘߏ߫ ߟߎ߫ ߟߋ߬ ߢߊߞߍߣߍ߲߫ ߦߋ߲߬ (ߞߵߊ߬ߟߎ߬ ߞߊ߲ߛߏ߲߫)߸ ߏ߬ ߟߋ ߞߏ ߘߐߛߏ߯ߙߋ ߦߴߌߘߐ߫، ߊ߬ ߡߊߞߟߌ߫ ߞߏ߫ ߝߟߐ ߞߍ߫ ߘߊ߫ ߞߎߡߊ ߣߌ߲߬ ߞߎ߲߬ߠߊ߫ ߘߓߊ߬ߓߌߟߊ ߕߟߋ߬ ߁߭ ߕߊ߬ߡߌ߲߬ߣߍ߲ ߠߋ߬ ߡߊ߬߸ ߊ߲ ߧߴߏ߬ ߡߍ߲ ߞߎ߲߬ߢߐ߲߯ ߝߌ߬ߟߊ ߘߐ߫ ߣߌ߲߬ ߞߊ߬ߣߌ߲߬، ߏ߬ ߞߍ߫ ߘߊ߫ ߝߊ߬ߛߏ ߣߊ߲߬ߝߟߏ߬ߦߊ߬ߟߌ ߣߴߊ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߓߏ߬ߟߏ߲ ߠߋ߬ ߟߊ߫.
ߊ߬ ߟߊ߫ ߟߊ߬ߝߛߊ߬ߟߌ߬ߟߊ߸ ߞߊ߬ߙߊ߲߬ߡߐ߰ ߛ߭ߍߞ ߎߡߊߙ ߞߏ߬ߣߊ߬ߙߋ߬ ߟߊ߫ ߝߐߟߌ߫ ߘߐ߫߸ ߞߏ߫ ߞߏߕߌ߯ ߝߟߐ߫ ߞߘߐ ߡߊߞߟߌ߫ ߘߊ߫ ߞߐ߬ߟߏ߲ ߠߋ߬ ߡߊ߬߸ ߊ߬ ߣߴߊ߬ ߓߊ߯ߙߊߢߐ߲߯ ߞߘߐ ߘߏ߫ ߟߎ߫ ߟߊ߫ ߜߍߘߐߢߐ߲߯ߦߊ ߞߊ߲ߡߊ߬߸ ߓߊ߬ߙߌ߬ ߜߍߘߐߢߐ߲߯ߦߊ ߏ߬ ߡߊ߫ ߛߋ߫ ߞߍ߫ ߟߊ߫، ߕߋ߬ߟߋ ߕߐ߬ߟߊ߬ߓߊ߲ ߣߌ߲߬ ߘߐ߫ ߡߎ߬ߕߎ߲߬ ߛߊ߫߸ ߊ߬ ߟߊߛߏ߬ߓߌ߬ ߘߊ߫ ߞߏ߫ ߞߵߊ߬ ߓߌ߬ߟߊ߬ ߢߟߊߥߛߎ ߟߊ߫߸ ߛ߭ߏߖߍߟ ߘߏ߲߬ ߞߋߟߋ߲߫ ߡߊ߫ ߓߌ߬ߟߊ߬ ߢߟߊߥߛߎ ߢߌ߲߬ ߠߊ߫ ߘߋ߬߸ ߊ߬ ߓߊ߯ߙߊߢߐ߲߯ ߞߘߐ ߛߌߦߊߡߊ߲߫ ߦߴߊ߬ ߘߐ߫߸ ߦߏ߫: ߞߊ߬ߙߊ߲߬ߝߊ ߌߛߌߦߊߞߊ߬ ߊߤߑߡߊߘߎ߬ ߛߌ߲ߜ߭ߊߙߋ߫߸ ߊ߬ߟߋ ߡߍ߲ ߕߘߍ߬ ߞߎߓߋߘߐ ߗߋߕߌ߮ ߘߌ߫߸ ߊ߬ ߣߌ߫ ߡߊ߬ߡߙߊ߬ߟߌ ߗߋߕߌ߯ ߛߓߊ߬ ߣߌ߫ ߞߏߕߌ߯ ߝߟߐߘߊ ߣߊ߲߬ߝߟߏ߬ߦߊ߬ߟߌ ߗߋߕߌ߮ ߘߏ߫.
ߢߊߢߌߣߌ߲ߠߌ߲ ߣߌ߲߬ ߛߓߊߓߎ ߞߍߣߍ߲߫ ߝߘߏ߬ߓߊ߬ ߛߍ߯ߛߍ߯ߟߌ ߛߓߍߘߊ ߟߊ߫ ߞߊ߲߬ߞߎߡߊ ߘߏ߫ ߟߋ߬ ߘߌ߫߸ ߏ߬ ߡߍ߲ ߞߊ߬ ߛߌߞߊ ߓߌ߬ߟߊ߬ ߝߘߏ߬ߓߊ߬ ߣߊ߲ߝߟߏ ߟߎ߬ ߟߊߕߊ߯ߡߊ߫ ߢߊ ߘߐ߫ ߛ߭ߏߖߍߟ ߡߊ߬ߦߌߜ߭ߊ߬ ߕߋ߬ߟߋ ߘߐ߫، ߊ߬ߟߎ߬ ߟߊ߫ ߘߐ߬ߛߙߋ ߏ߬ ߟߊ߫ ߝߐߟߌ߫ ߘߐ߫߸ ߞߏ߫ ߗߋߦߊߟߌ ߘߏ߫ ߞߍ߫ ߘߊ߫߸ ߡߍ߲ ߥߊߘߌ߫ ߞߏ ߘߊ߲߬ߠߊߕߊ߬ߡߌ߲߬ ߘߊ߫، ߏ߬ ߞߍ߫ ߘߊ߫ ߕߎ߬ߡߊ߫ ߢߌ߬ߡߊ߲߬߸ ߊ߬ߟߎ߬ ߟߊ߫ ߗߋߦߊߟߌ ߡߍ߲ ߠߎ߬ ߕߊ߯ ߘߊ߫ ߞߣߐߓߜ߭ߎ߫߸ ߏ߬ ߟߎ߬ ߟߊ߫ ߗߋߦߊߟߌ߫ ߥߊߘߌ ߏ߬ ߟߋ ߥߊߣߍ߲߫ ߤߊ߲߯ ߛߍߝߊ ߞߋ߲߬ߥߟߎ߬ ߁߅ ߢߐ߲߰، ߕߟߋ߬ ߞߋߟߋ߲߫ ߔߋ߫ ߕߊ߯ߡߊ߫ ߟߋ߬ ߘߏ߲߬ ߕߍ߬ߘߍ߫ ߏ߬ ߘߌ߫ ߖߊ߲߬ߖߏ߲ ߘߏ߫ ߢߣߊߓߊ߯ߦߊ߫ ߞߊ߲ߡߊ߬، ߞߵߊ߬ ߛߐ߬ߘߐ߲߬߸ ߊ߬ ߝߐߣߍ߲߫ ߛߊ߬ߙߌ߬ߦߊ߬ ߘߐ߫ ߟߋ߬߸ ߞߏ߫ ߗߋߦߊߟߌ߫ ߥߊߘߌ ߕߍ߫ ߕߊ߬ߡߌ߲߬ ߠߊ߫ ߇߅ ߀߀߀ ߕߋ߬ߟߋ ߞߘߐ߫، ߊ߬ߟߎ߫ ߞߊ߬ ߛߊߛߋ߫ ߞߏ ߘߏ߫ ߟߎ߫ ߝߐ߫߸ ߡߍ߲ ߠߎ߬ ߜߘߌߛߌ߰ߣߍ߲߫ ߕߍ߫ ߞߏ߫ ߘߐߞߣߍߣߍ߲߫ ߞߊ߲߬.
ߣߴߊ߬ ߡߊ߫ ߢߊ߬ ߏ߬ ߘߐ߫ ߞߏ߫ ߛ߭ߏߖߍߟ ߡߊ߬ߦߌߜ߭ߊ߬ ߟߋ߬ ߡߊ߬ߡߙߊ߬ߟߌ߬ ߞߏߟߊߕߍ߯ߘߊ ߞߊ߲ߕߌ߮ ߘߌ߫߸ ߓߌ߬ߟߊ߬ ߞߍߣߴߊ߬ ߞߐ߫ ߏ߬ ߟߋ ߘߐ߫ ߞߏ߫ ߊ߬ ߓߘߊ߫ ߥߊߘߌ ߖߊߛߌ߫߸ ߞߊ߬ ߗߋߦߊߟߌ߫ ߖߐ߯ߣߍ ߏ߬ ߟߎ߬ ߟߊߥߙߊ߬ ߢߊ߫ ߡߊ߬߸ <<ߊ߬ߟߎ߬ ߣߌ߫ ߡߍ߲ ߡߊ߲߫ ߞߊ߲߫>>߸ ߞߊ߬ ߓߊ߲߫ ߞߊ߬ ߖߐ߰ߣߍ߬ߦߊ߬ߟߌ߬ ߜߘߍ߫ ߟߎ߫ ߞߍ߫߸ ߘߊ߬ߟߎ߬ ߖߐ߲ߖߐ߲߫ ߕߍ߫ ߡߍ߲ ߠߎ߬ ߟߊ߫.
ߞߊ߬ ߞߐ߲߰ ߊ߬ ߜߍ߲ ߢߍ߫ ߞߏߕߌ߯ ߝߟߐߦߊ ߟߊ߫ ߂߀߂߄ ߣߍߣߍߓߊ ߟߊ߫߸ ߞߏߕߌ߯ ߝߟߐ߫ ߞߘߐ ߕߎ߲߬ ߓߘߊ߫ ߝߟߐ߫ ߡߊ߬ߞߕߌ߬ߟߌ߬ ߓߊ߲ߓߊߟߌ ߟߎ߬ ߘߊߡߌ߬ߣߊ߬ ߟߊ߫ ߣߊ߲߬ߕߌ߰ ߝߊ߲ߞߊ ߞߊ߲ߡߊ߬߸ ߦߏ߫ ߊ߬ߟߎ߬ ߞߍ ߞߊ߬ ߘߐ߬ߕߊߡߌ߲ ߟߊߖߊ߲߰ߧߊ߫ ߞߵߊ߬ ߛߐ߬ߘߐ߲߬ ߊ߬ߟߎ߬ ߡߊ߫ ߞߎ߲߬ߠߊ߬ߛߌ߮ ߞߏߟߊߒߞߘߐߢߐ߲߯ߦߊ߫، ߊ߬ ߞߏ߬ߣߌ߲߸ ߞߏ ߟߎ߬ ߦߋ߫ ߛߋ߲߬ߠߊ߫ ߡߎߣߎ߲߬߸ ߡߊ߬ߦߌߜ߭ߊ߬ ߞߊ߲߫ ߞߏ߫ ߊ߬ ߟߊߣߴߊ߬ ߟߊ߫ ߖߡߊ߬ߣߊ ߞߕߌߘߊ ߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.