ߛߌ߯ߙߌ߲߫: ߡߐ߰ߓߊ ߟߎ߬ ߞߊ߲߫ ߞߏ߫ ߊ߬ߟߎ߬ ߦߋ߫ ߛߏ ߘߋ߲ߡߌߛߍ߲ ߠߎ߬ ߞߐ߫ ߔߏߞߑߟߍ߲߫ ߞߏ ߞߍ߬ߟߍ ߛߍ߬ߘߏ߲ ߘߐ߫

ߞߊ߯ߙߌ ߣߌ߲߬ ߡߊ߬߸ ߂߀߂߆ ߞߏ߲ߞߏߜߍ ߕߟߋ߬ ߀߁߭ ߡߊ߬߸ ߟߊ߬ߘߍ ߘߏ߫ ߞߍ߫ ߘߊ߫ ߛߌ߯ߙߌ߲߫ ߖߡߊ߬ߣߊ߬ߕߌ߰ ߛߏ߬ ߁߃ ߡߐ߰ߓߊ ߟߎ߬ ߓߟߏ߫ ߣߎ߬ߜ߭ߊ߫ ߗߍ߬ߡߐ߰ ߓߏߟߏ߲ ߠߊ߫߸ ߞߊ߬ ߞߎߡߊߢߐ߲߯ߦߊ߫ ߞߵߊ߬ ߓߍ߲߬ ߓߐߘߊ߫ ߖߐ߲ߖߐ߲߫ ߛߐ߬ߘߐ߲߬ ߞߏ ߡߊ߬ ߔߏߞߑߟߍ߲ ߠߊ߫ ߓߊ߯ߙߊ߫ ߞߏ ߘߐ߫ ߛߌ߯ߙߌ߲߫ ߘߎ߰ߞߟߏ ߞߊ߲߬، ߟߊ߬ߘߍ ߣߌ߲߬ ߞߍ߫ ߡߐ߰ߓߊ ߡߍ߲ ߠߎ߬ ߓߟߏ߫߸ ߏ߬ ߟߎ߫ ߟߋ߬: <<ߣߎ߬ߜ߭ߊ߬߸ ߓߎ߬ߙߋ߬߸ ߛߞߍ߬߸ ߞߍ߬ߣߍߡߊ߲߬ߘߋ߲߫ ߢߊ߰ߛߏ߬ߟߊ߬߸ ߖߏ߬ߡߊ߬ߥߢߊ߫߸ ߖߏ߬ߡߊ߬ ߣߎ߲ߞߎ߲߸ ߓߘߌ߬ߞߊ߫߸ ߡߍ߰ߢߍ߫߸ ߞߏߟߏ߲ߞߊߟߊ߲߫߸ ߛߊ߬ߞߐ߬ߘߎ߯߸ ߜߐ߰ߙߐ߫߸ ߞߎ߬ߟߌ߬ߓߊ߬ߟߌ߬ߘߎ߯߸ ߞߊߢߐߜߐ߲߭߸ ߊ߬ ߣߌ߫ ߓߙߊߞߊ߫.>> ߏ߬ ߟߎ߫ ߓߌ߬ߟߊ߬ߛߌ߬ߟߊ߬ ߘߊ߫ ߖߐ߲߫ ߠߎ߫ ߝߣߊ߫ ߓߟߏ߫߸ ߏ߬ ߟߋ ߛߌ߬ߟߡߊ߬ߦߊ ߞߏߘߐߛߘߌߘߊ ߞߐߦߌߘߊ ߘߌ߫߸ ߊ߬ ߣߌ߫ ߖߋ߬ߟߌ߬ߕߐ߲߬ߓߊ.

ߛߙߊ߬ߣߎ߲ ߕߊ߬ߣߍ߲ ߣߎ߬ߜ߭ߊ߫ ߡߐ߰ߓߊ ߓߟߏ߫߸ ߣߊߟߌ߬ߡߎ߲߫ ߟߊ߱ߖߌ߬ ߘߙߊ߬ߡߊߣ ߡߊ߰ߛߎ߬ߓߊ߬ ߘߌ߫߸ ߏ߬ ߞߊ߬ ߞߟߌߟߌ ߞߍ߫ ߓߟߏ߫ ߘߌ߫ ߢߐ߲߰ ߡߊ ߡߊ߬߸ ߛߊ߫ ߘߊ߲߬ ߘߌ߫ ߛߌ߰ ߟߊ߬ߡߌߣߌ߲ ߘߐߖߊߛߌ ߟߊ߫.

<<ߖߡߊ߬ߣߊ߬ߕߌ߰ ߛߏ߬ ߁߃ ߡߍ߲ ߠߎ߬ ߓߍ߯ ߟߊ߫ ߡߐ߰ ߢߊ ߦߋ߫ ߜߐ ߘߐ߫ ߦߊ߲߬ ߣߌ߲߬ ߓߌ߬߸ ߛߌ߯ߙߌ߲߫ ߖߡߊ߬ߣߊ ߡߎ߰ߡߍ ߣߘߐ߬ߓߌߟߊ ߟߵߏ߬ ߘߌ߫ ߦߊ߲߬߸ ߏ߬ ߘߐ߫ ߊ߲ ߧߴߊ߲ ߖߌߖߊ߬߸ ߊ߲ ߧߋ߫ ߕߏ߫ ߊ߲ ߞߎߡߊ߫ ߞߊ߲ ߞߕߐ߫، ߡߍ߲ ߞߊ߫ ߢߌ߲߬߸ ߞߊ߲ߕߐ߲ ߡߍ߲ ߠߎ߬ ߢߊ ߦߋ߫ ߜߍ ߘߐ߫ ߦߊ߲߬߸ ߛߏ ߦߋ߫ ߛߏߕߌ߯ ߗߍߡߐ߮ ߣߌ߫ ߝߊ߰ߡߊ߬ ߘߎ߯ߕߌ߮ ߣߌ߫ ߘߋ߲ߡߌߛߍ߲߫ ߞߎ߲ߕߌ߮ ߡߍ߲ ߠߎ߬ ߓߟߏ߫߸ ߓߍ߯ ߦߋ߫ ߛߓߍ߫ ߘߐߓߍ߲߬߸ ߏ߬ ߦߋ߫ ߞߍ߫ ߖߊ߬ߡߊ ߓߍ߲߬ߞߊ߲߬ߡߊ ߘߌ߫߸ ߞߵߏ߬ ߟߊߕߊ߯ ߞߊ߲ߕߌ߮ ߡߊ߬، ߞߵߊ߬ ߦߌ߬ߘߊ߬ ߞߏ߫ ߊ߲ ߕߍ߫ ߔߏߞߑߟߍ߲߫ ߞߏ ߘߐ߫ ߒ߬ ߓߘߊ ߦߊ߲߬ ߡߎ߰ߡߍ߫.>> ߡߐ߰ߓߊ ߟߋ߬ ߞߊ߲߫ ߕߋ߲߬߸ ߊ߬ ߞߵߊ߬ ߝߊ߬ߙߴߊ߬ ߟߊ߫ ߛߙߊ߬ߣߎ߲ ߞߊ߲߬߸ ߞߏ߫ ߡߐ߰ߓߊ ߟߎ߬ ߦߋ߫ ߘߋ߲ߡߌߛߍ߲ ߠߎ߬ ߞߐߝߍ߬ ߝߛߊߦߌ߫߸ ߓߊ߬ߙߌ߬ ߘߋ߲ߡߌߛߍ߲ ߠߎ߬ ߝߣߊ߫ ߦߴߊ߬ߟߎ߬ ߘߐߖߊ߬߸ ߊ߬ߟߎ߬ ߦߋ߫ ߕߏ߫ ߡߐ߬ߓߊ ߟߎ߬ ߞߐ߫߸ ߊ߬ߟߎ߬ ߞߊߣߊ߬ ߕߊ߬ߡߌ߲߫ ߡߐ߰ߓߊ ߟߎ߬ ߟߊ߫.

ߡߊ߬ߓߏ߲߬ߧߊ߬ߕߊ ߛߋߞߎ߬ ߛߥߊ߬ߣߍ߫ ߡߍ߲ ߦߋ߫ ߞߍ߬ߣߍߡߊ߲߬ߘߋ߲߫ ߢߊ߰ߛߏ߬ߟߊ߫ ߡߐ߰ߓߊ ߘߌ߫߸ ߏ߬ ߞߊ߬ ߛߏߕߌ߮ ߟߎ߬ ߞߟߌ߫ ߘߋ߲ߡߌߛߍ߲ ߠߎ߬ ߞߐߡߊߓߌ߲ߓߌ߲ ߠߋ߬ ߡߊ߬߸ ߛߊ߫ ߛߌ߯ߙߌ߲߫ ߟߊ߬ߡߌߣߌ߲ ߞߊߣߊ߬ ߘߐߖߊߛߌ߫ ߢߊ ߡߍ߲ ߡߊ߬.

<<ߘߏ߫ ߟߎ߫ ߦߋ߫ ߘߋ߲ߡߌߛߍ߲ ߠߎ߬ ߖߙߊ߬ߞߌ߬ ߟߊ߫ߟ ߞߏ߫ ߊ߬ߟߎ߬ ߕߍ߫ ߛߊ߬ߙߌ߬ߦߊ ߡߊߓߏ߲߬ߧߊ߬ ߟߴߊ߬ߟߎ߬ ߟߊ߫ ߛߍ߬ߘߏ߲ ߞߍߢߊ ߘߐ߫، ߓߊ߬ߙߌ߬߸ ߝߏ߫ ߊ߲ ߧߴߊ߬ ߟߐ߲߫߸ ߞߏ߫ ߏ߬ ߟߎ߬ ߟߊ߫ ߛߍ߬ߘߏ߲ ߠߋ߬ ߞߏߛߐ߲߬ ߓߌ߬߸ ߛߌ߯ߙߌ߲߫ ߡߊ߬ߞߏ ߡߊ߫ ߛߊ߬ ߡߎߣߎ߲߬، ߣߴߏ߬ ߕߍ߫ ߛߌ߯ߙߌ߲߫ ߖߎ߮ ߟߎ߬ ߦߋ߫ ߥߊ ߞߊ߲߬ ߢߊ ߡߍ߲ ߡߊ߬ ߕߋ߲߬߸ ߞߵߊ߲ ߠߊ߫ ߟߊ߬ߡߌߣߌ߲ ߘߐߥߦߊ߬߸ ߊ߬ ߘߌ߫ ߡߊ߬ߞߏ߬ߛߊ ߟߊߛߴߊ߲ ߡߊ߬، ߣߴߏ߬ ߘߏ߲߬ ߞߍ߫ ߘߊ߫߸ ߊ߲ߠߎ߬ ߡߐ߰ߓߊ ߟߎ߫ ߟߋ߬ ߣߊ߬ߣߌ߲߬ߕߐ߫ ߊ߲ ߘߋ߲ ߠߎ߬ ߣߴߊ߲ ߡߊ߬ߡߊ߬ߙߋ߲ ߠߎ߬ ߓߟߏ߫، ߒ߬ߓߊ߬߸ ߛߓߍ ߟߋ߬ ߞߍߕߐ߫ ߓߍ߯ ߟߊߘߍ߬ߣߍ߲ ߓߟߏ߫߸ ߞߊ߬ ߝߘߊ߫ ߖߡߊ߬ߣߊ߬ߕߌ߰ ߛߏ ߓߍ߯ ߡߐ߰ߓߊ ߟߎ߬ ߟߊ߫߸ ߞߵߊ߬ ߞߍ߫ ߗߋߛߓߍ߫ ߘߌ߫ ߞߵߊ߬ ߟߊߕߊ߯ ߖߡߊ߬ߣߊ ߞߊ߲ߕߌ߮ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߞߏߟߊߘߍ߫ ߣߊ߯ߣߌ߲ ߡߍ߲ ߠߊߘߌ߬ߢߍ߬ߣߍ߲߫ ߖߌ߬ߣߍ߫ ߞߎ߲߬ߠߊ߬ߛߌ߮ ߓߟߏ߫ ߛߌ߯ߙߌ߲߫ ߞߣߐ߫߸ ߏ߬ ߟߎ߬ ߓߞߐߕߍ߫߸ ߊ߲ ߕߴߊ߲ ߝߍ߬ ߞߊ߬ ߡߐ߰ ߡߊ߬ߜߍ߬ߙߍ߲߬ߞߍ߬ ߞߏߟߊߘߍ ߝߋ߲߫ ߦߋ߫ ߒ߬ ߠߊ߫ ߘߎ߰ߞߟߏ ߞߊ߲߬ ߦߊ߲߬ ߡߎ߬ߕߎ߲߬߸ ߞߵߊ߬ ߘߐߕߌߢߍ߫.>> ߊ߬ ߞߵߏ߬ ߟߋ ߝߐ߫.

ߛߏߡߊ߫ ߕߎ߬ߙߋ߬ ߡߍ߲ ߦߋ߫ ߡߊ߲߬ߘߋ߲߬ ߓߏߟߏ߲ ߓߋߟߋ߲ߕߌ߮ ߘߌ߫߸ ߏ߬ ߞߊ߬ ߛߌ߯ߙߌ߲߫ ߡߊ߬ߞߟߐ ߘߏ߫ ߟߎ߫ ߖߙߊ߬ߞߌ߬߸ ߞߏ߫ ߊ߬ߟߎ߫ ߛߋ߲߬ ߦߋ߫ ߊ߬ߟߎ߫ ߝߊ߬ ߓߘߊ ߘߐߕߌߢߍ߫ ߓߊ߫ߙߊ ߣߌ߲߬ ߞߐߡߊߓߌ߲ߓߌ߲ ߘߐ߫.

<<ߣߴߊߟߎ߫ ߞߵߊ߬ ߦߋ߫߸ ߛߣߌߥߊ ߟߎ߬ ߣߴߊ߬ߟߎ߬ ߟߊ߫ ߡߊ߬ߛߌߣߌ߲ ߠߎ߬ ߦߋ߫ ߣߊ߬ ߟߊ߫ ߞߊ߬ ߣߊ߬ ߛߌ߯ߙߌ߲߫ ߘߐߕߌߢߍ߫ ߔߏߞߑߟߍ߲ ߠߊ߫߸ ߞߵߊ߲ ߠߊ߫ ߟߊ߬ߡߌߣߌ߲ ߘߐߥߦߊ߬߸ ߏ߬ ߞߎ߲߭ ߠߋ߬߸ ߊ߲ ߖߍ߬ߘߍ ߘߋ߲߫ ߡߊ߬ߞߟߐ ߟߎ߫ ߟߋ߬ ߦߴߊ߬ߟߎ߬ ߢߍ߫، ߊߟߎ߫ ߞߊ߬ ߘߐ߬ߝߘߊ߬ߟߌ߬ ߝߏߦߌ߬ ߦߋ߫ ߓߙߊߡߊߖߊ߲ߓߊ߲ ߥߊ߯ߕߌ ߟߊ߫߸ ߌ ߔߏߔߏ߫ ߓߊ߬߸ ߌ ߞߐ߲߬ߛߏ߫ ߓߊ߬߸ ߌ ߥߊߘߌ߫ ߓߊ߬߸ ߊ߬ ߓߍ߯ ߓߐߣߍ߲߫ ߔߏߞߑߟߍ߲߫ ߓߊ߫ߙߊ ߢߌ߲߬ ߠߋ߬ ߘߐ߫، ߊ߬ߟߎ߬ ߕߍ߫ ߝߏߦߌ߬ ߞߎ߲߬ߠߊ߫، ߏ߬ ߟߋ ߞߏߛߐ߲߬߸ ߘߋ߲ߡߌߛߍ߲ ߡߍ߲ ߠߎ߬ ߦߋ߫ ߛߍ߬ߘߏ߲ ߠߊ߫ ߦߊ߲߬߸ ߊ߬ߟߎ߬ ߣߴߏ߬ ߟߎ߬ ߕߍ߫ ߓߍ߲߬ ߠߊ߫، ߓߊߏ߬߸ ߏ߬ ߟߎ߬ ߕߴߊ߬ ߝߍ߬ ߟߊ߬ߡߌߣߌ߲ ߦߋ߫ ߕߌߢߍ߫، ߏ߬ ߘߐ߫߸ ߊ߲ߠߎ߬ ߡߐ߰ߓߊ ߟߎ߬ ߘߌ߫ ߘߋ߲ߡߌߛߍ߲ ߠߎ߬ ߡߊߘߍ߬ߡߍ߲߬ ߝߏ߫ ߊ߲ ߛߋߞߏ ߘߊ߲߭.>> ߊ߬ ߞߵߏ߬ ߟߋ ߡߊ߬ߝߌ߲߬ߠߌ߲ ߞߍ߫.

ߣߎ߬ߜ߭ߊ߫ ߡߐ߰ߓߊ ߞߏ߬ߣߌ߲ ߞߵߊ߬ ߡߊߜߟߍ߬ߦߊ߬߸ ߞߏ߫ ߓߍ߯ ߦߴߊ߬ ߞߊߘߊ߲߫ ߞߊ߬ ߛߋ߫ ߞߎߡߊ ߢߌ߲߬ ߡߊߓߏ߲߬ߧߊ߬ ߟߊ߫ ߞߵߊ߬ ߓߐ߫ ߊ߬ ߛߌߟߊ ߝߍ߬߸ ߛߊ߫ ߖߊ߬ߡߊ ߡߙߌߦߊ ߘߌ߫ ߟߊߕߊ߯ ߞߊ߲ߕߌ߮ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߕߍ߫ ߔߏߞߑߟߍ߲߫ ߞߏ ߘߐ߫ ߡߎ߰ߡߍ߫.

ߌߓߙߊߤߌߡߊ߬ ߝߙߊ߬ߓߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߞߐߦߌߘߊ ߛߌ߯ߙߌ߲߫