ߊ߲ߕߊ ߍߛ.ߏ.ߍߛ ߞߌ߲߬ߘߊ ߦߋ߫ ߛߎ߬ߣߎ߲ ߠߋ߬ ߘߐ߫ ߕߋ߲߬߸ ߕߍ߬ߣߍ߲߫ ߞߡߊ߬ߙߊ߬ ߟߊ߫ ߓߙߊ߬ߒ߬ߘߐ߬ ߛߦߊ ߞߏߛߐ߲߬߸ ߊ߬ߟߋ ߡߍ߲ ߝߘߎߡߊ ߦߋ߫ ߕߙߊߥߟߋ߫ ߘߌ߫، ߞߊ߬ ߓߍ߲߬ ߡߋߘߌߦߊߖߌߣߋ ߟߊ߫ ߟߌ߬ߤߟߊ߬ ߟߊߞߊ߬ߟߌ߬ߣߍ߲ ߡߊ߬߸ ߡߏ߬ߛߏ ߣߌ߲߬ ߛߌ߭ ߦߋ߫ ߛߊ߲߬ ߃߅ ߟߋ߬ ߘߐ߫߸ ߊ߬ ߞߣߐߡߊ ߟߋ߬ ߕߘߍ߬ ߞߊߙߏ߫ ߛߋߦߌ߲߫ ߖߊ߬ߕߋ߬ ߘߐ߫߸ ߘߋ߲߫ ߥߐ߯ߙߐ߫ ߦߴߊ߬ ߓߟߏ߫߸ ߞߌ߬ߛߍ ߛߋߣߴߏ߬ ߟߋ ߡߊ߬ ߛߐ߰ߡߘߊ߬ ߖߏߣߊ ߢߌ߲߬ ߠߊ߫ ߞߵߊ߬ ߝߊ߰.

ߛߙߋߦߊ ߡߍ߲ ߠߎ߬ ߛߋ߫ ߘߊ߫ ߡߊߛߐ߬ߘߐ߲߬ ߠߊ߫ ߘߌ߲߬ߞߌߙߊ ߘߐ߫ ߦߋ߲߬߸ ߣߌ߲߬ ߞߏ ߞߍ߫ ߘߊ߫ ߅ߕߎߡߊ ߝߊ߲߭ ߝߍ߬ ߟߋ߬، ߡߏ߬ߛߏ ߣߌ߲߬ ߦߋ߫ ߘߏ߲߬ߞߊ߬ߝߟߍ߬ ߝߙߋ߬ߟߊ ߟߋ߬ ߘߌ߫ ߡߊ߬ߘߌߣߊ߬߸ ߊ߬ ߥߊ߯ߕߌ ߏ߬ ߞߵߊ߬ ߛߐ߬ߘߐ߲߬ ߊ߬ ߦߴߊ߬ ߘߐߓߍ߲߭ ߠߋ߬ ߞߊ߲߬ ߞߊ߬ ߥߊ߫ ߟߐ߮ ߘߐ߫، ߕߙߍ߫߸ ߡߊ߬ߙߌ߬ߝߊ߬ ߞߊ߲ ߓߐ߫ ߘߴߊ߬ߟߎ߬ ߟߊ߫ ߟߎ ߘߊߝߍ߬، ߊ߬ ߛߌ߰ߢߐ߲߰ ߡߛߏ ߟߊ߫ ߝߐߟߌ߫ ߘߐ߫߸ ߣߊߟߌ߬ߡߎ߲߫ ߓߐ߬ߟߐ߲߬ߞߊ߫ ߞߊ߬ߓߊ ߘߌ߫߸ ߡߊߙߌߦߊߡ ߞߐ߲ߘߍ߫߸ ߞߏ߫ ߗߍ߭ ߘߏ߫ ߟߋ߬ ߣߌ߫ ߕߏ߲ߕߊߟߊ߲ ߟߐ߬ߣߍ߲߫ ߕߍ߬ߘߍ߫ ߡߏ߬ߛߏ ߟߊ߫ ߘߊ ߟߊ߫߸ ߞߊ߬ ߡߊ߬ߙߌ߬ߝߊ ߕߋߢߐ߲߮ ߞߐ߫ ߛߋ߲߬ߢߊ߫ ߛߓߊ߬، <<ߛߓߊߣߊ߲ ߏ߬ ߟߋ ߞߊ߬ ߞߏ߲ ߛߐ߰ ߞߊ߬ ߘߏ߲߬߸ ߞߊ߬ ߡߏ߬ߛߏ ߡߌ߬ߘߴߊ߬ ߞߊ߬ߡߊ߲߬ߞߎ߲ ߞߊ߲߬ ߞߊ߬ ߓߐ߫ ߊ߬ ߞߐߝߍ߬.>> ߊ߬ ߞߵߏ߬ ߦߌ߬ߘߊ߬.

ߡߏ߬ߛߏ ߢߌ߲߬ ߠߊ߫ ߛߊ߬ߦߊ ߞߊ߬ ߞߌ߲߬ߘߊ ߞߣߐ߫ ߡߐ߮ ߟߎ߬ ߡߐߣߍ߫، ߘߋ߲ߡߌߛߍ߲ ߠߎ߬ ߓߐ߫ ߘߊ߫ ߞߊ߬ ߛߌߟߊ ߕߍ߰߸ ߞߟߍ߬ߡߐ߮ ߟߎ߬ ߣߌ߫ ߕߐ߲ߓߟߏߡߊ ߟߎ߬ ߖߌ߰ ߘߊ߫ ߞߊ߬ ߥߊ߫ ߝߛߏ߬ߝߛߊ߬ ߞߏ ߓߍ߯ ߟߊߕߊ߲߬ߞߌ߲߬، ߛߋߞߎ߬ ߕߎ߬ߙߋ ߡߍ߲ ߦߋ߫ ߛߊ߬ߓߊ߰ߕߐ ߣߌ߲߬ ߞߙߍ߬ߝߍ߬ ߡߐ߮ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߕߍ߬ߣߍ߲߫ ߞߡߊ߬ߙߊ߫ ߕߎ߲߬ ߦߋ߫ ߡߛߏ߬ ߛߓߊߙߌߣߍ߲߫ ߠߋ߬ ߘߌ߫߸ ߡߍ߲ ߕߍ߬ߘߍ߫ ߡߐ߰ ߓߏ߲߬ߧߊ߬ ߟߊ߫ ߞߏߛߓߍ߫߸ ߊ߬ ߝߎߣߎ߲ߛߙߋ߫ ߕߘߍ߬ ߝߣߊ߫، ߊ߬ ߛߎ߭ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߊ߲ߕߊ ߘߊ߲ߘߊߛߏ ߛߎ߬ߓߏ߲ ߠߋ߬ ߟߊ߫߸ ߞߊ߬ ߓߍ߲߬ ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߫ ߡߊ߬ ߡߋߘߌߦߊߖߌߣߋ ߞߊ߲߬، ߟߌ߬ߤߟߊ߬ ߜߘߍ߫ ߞߏ߬ߣߌ߲߬ ߡߊ߫ ߛߐ߬ߘߐ߲߬ ߊ߲ ߓߟߏ߫ ߞߊ߬ ߓߍ߲߬ ߊ߬ ߛߎ߬ߘߏ߲߬ ߞߏ ߡߊ߬.