ߘߐ߲߬ߞߌ߲ ߡߊߛߎ߬ߘߎ߲߬ߧߊ ߣߌ߲߬ ߘߐ߫߸ ߞߊ߲ߞߊ߲߫ ߞߙߊߟߌ߫ ߕߏ߲ߜߏ ߟߎ߬ ߦߴߊ߬ߟߎ߬ ߕߊ߲ߣߝߌߟߊߝߟߌ ߟߋ߬ ߘߐ߫ ߕߋ߲߬، ߝߊ߰ߣߌ߲߬ ߞߎߘߊ ߝߏߦߌ߬ ߦߋ߫ ߘߏ߲߬ ߠߊ߫߸ ߓߊ߯ߙߓߊ ߘߏ߫ ߟߋ߬ ߞߐߝߟߌ ߦߴߏ߬ ߘߌ߫߸ ߡߍ߲ ߦߋ߫ ߘߋ߲ߓߦߊ ߟߎ߬ ߟߊߛߍߥߊ߫ ߟߊ߫، ߞߐߝߟߌ߫ ߜߘߍ߫ ߘߏ߲߬ ߕߴߏ߬ ߘߌ߫: ߛߌ߬ߢߣߊ߸ ߓߊ߯ߙߊ ߞߍ ߜߟߍ߬ߦߊ ߘߐ߫߸ ߊ߬ ߣߌ߫ ߝߊ߰ߣߌ߲߬ ߕߌ߮ ߟߎ߬ ߞߐߜߊߟߌ߫ ߓߊ߲ߓߊߟߌ.

ߛߌ߬ߘߌߞߌ߬ ߞߐ߲ߘߍ߫ ߟߊ߫ ߞߙߊߟߌ߫ ߕߏ߲ߜߏ ߟߊ߫߸ ߊ߬ߟߋ ߡߍ߲ ߓߘߊ߫ ߛߊ߲߬ ߟߏ߯ߟߎ߫ ߞߍ߫ ߞߙߊߟߌ ߘߊߞߘߐ߫߸ ߊ߬ ߞߊ߲߫ ߞߏ߫ ߊ߬ߟߎ߬ ߝߣߊ߫ ߦߴߊ߬ߟߎ߬ ߣߊߥߛߎ ߟߋ߬ ߘߐ߫ ߕߋ߲߬، << ߊ߲ ߧߋ߫ ߥߊ߯ߕߌ ߡߍ߲ ߘߐ߫ ߕߋ߲߬ ߦߏ߫ ߓߌ߬ ߢߐ߲߰ ߟߏ߲߫߸ ߣߴߊ߬ ߦߋ߫ ߛߊߟߌ߫ ߢߊߞߘߐߟߊ ߓߊ߯ߙߊ ߘߌ߫߸ ߊ߲ ߓߊ߯ ߣߊ߬ ߛߐ߱ߡߊ߸ ߊ߲ ߘߴߊ߬ ߕߵߊ߲ ߢߣߊ߫ ߝߴߏ߬ ߟߏ߲ ߘߎ߰ߛߊ߬ߜߍ ߛߐ߱ߡߊ߬، ߊ߲ ߧߋ߫ ߛߋ߫ ߟߊ߫ ߕߎ߬ߡߊ߬ߙߋ߲߬ ߞߋߟߋ߲߫ ߢߐ߲ߢߐ߲ߠߌ߲ ߠߋ߬ ߞߍ߫ ߟߊ߫ ߕߋ߬ߟߋ ߞߘߐ߫.>> ߊ߬ ߞߵߏ߬ ߦߌ߬ߘߊ߬.

ߛߎ ߛߌ߬ߢߣߊ ߣߌ߫ ߕߟߋ߬ߓߊ߲߬ ߓߊ߯ߙߊ ߏ߬ ߘߏ߲߬ ߞߎ߲߭ ߕߍ߫ ߘߏ߫ ߜߘߍ߫ ߘߌ߫߸ ߘߊߦߟߌߡߍ ߛߐ߬ߘߐ߲߸ ߊ߬ ߣߌ߫ ߝߊ߰ߣߌ߲߬ ߕߌ߮ ߟߎ߫ ߞߊ߬ߛߌ ߡߊߕߊ߲߬ߞߊ. <<ߤߊ߲߯ ߕߋ߲߬ ߝߊ߰ߣߌ߲߬ ߕߌ߮ ߘߏ߫ ߟߎ߫ ߡߊ߫ ߓߊ߲߫ ߣߊ߬ ߟߊ߫ ߊ߬ߟߎ߬ ߟߊ߫ ߝߊ߰ߣߌ߲ ߘߌ߫ ߝߟߐ߫߸ ߊ߬ ߘߏ߲߬ ߣߴߊ߲ ߞߵߊ߬ ߝߐ߫ ߞߏ߫ ߊ߲ ߧߴߊ߲ ߓߟߏ ߓߐ߫ ߟߊ߫ ߏ߬ ߟߎ߬ ߞߘߐ߫߸ ߊ߬ߟߎ߬ ߘߌ߫ ߡߊ߬ߢߌ߲߬ߡߊ߬ߞߏ߬ ߞߊ߲ ߛߎ߮ ߓߍ߯ ߘߐ߫ ߝߐ߫߸ ߊ߲ ߝߣߊ߫ ߘߴߊ߲ ߓߟߏ߫ ߘߏ߲߬ ߊ߬ ߞߘߐ߫.>> ߊ߬ ߞߵߏ߬ ߟߴߊ߬ ߟߊ߫ ߞߎߡߊ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߞߐߜߊߟߌ ߏ߬ ߟߋ ߦߋ߫ ߞߙߊߟߌߟߊ ߛߌߦߊߡߊ߲߫ ߟߐ߬ ߟߊ߫ ߝߊ߰ߣߌ߲ ߘߏ߫ ߟߎ߫ ߟߊߡߌ߬ߣߊ߬ ߟߊ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߕߍ߫ ߛߴߊ߬ ߓߍ߯ ߞߍ߫ ߟߊ߫ ߝߋߎ߫.

ߓߊ߯ߙߊ߫ ߛߌߦߊߡߊ߲ ߏ߬ ߟߋ ߘߏ߫ ߟߎ߫ ߦߋ߫ ߥߟߏ߫ ߟߴߊ߬ߟߎ߫ ߞߊ߲߬ ߞߎߡߊ߫ ߛߌߦߊߡߊ߲ ߘߌ߫ ߛߐ߲߬. << ߊ߲ ߖߘߍ߬ ߦߋ߫ ߣߡߌߛߊ߫ ߟߊ߫ ߟߋ߬ ߏ߬ ߘߏ߫ ߟߎ߫ ߡߌ߬ߣߊ ߘߐ߫ (...)  ߝߊ߰ߣߌ߲߬ ߕߌ߰ ߞߋߟߋ߲߫ ߏ߬ ߟߋ߬ ߦߋ߫ ߓߊ߲߫ ߠߊ߫ ߞߣߊ߬ ߌߟߋ ߢߊߜߊ߬߸ ߞߏ߫ ߤߊߟߌ߬ ߛߌߣߌ߲߫ ߊ߬ ߟߊ߫ ߝߊ߰ߣߌ߲ ߡߊ߫ ߓߊ߲߫.>> ߛߌ߬ߘߌߞߌ߬ ߞߐ߲ߘߍ߫ ߞߵߏ߬ ߝߙߊ߬ ߞߎߡߊ ߞߊ߲߬.

ߛߍ߱ ߏ߬ ߟߎ߫ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߛߌ߬ߢߣߊ ߣߌ߲߬ ߞߐߝߟߌ ߦߋ߫ ߛߋ߫ ߟߊ߫ ߝߊ߬ߘߌ߬ߞߟߏ ߝߣߊ߫ ߡߊ߬ ߞߍ߲ߘߍߦߊ ߘߊߞߎ߲ ߘߐ߫. <<ߛߌ߬ߣߐ߰ߓߊߟߌߦߊ ߦߋ߫ ߖߊ߲߬ߞߊ߬ߙߏ߬ߓߊ ߟߋ߬ ߟߊߛߋ߫ ߟߴߊ߲ ߡߊ߬ ߛߊߟߌ ߞߐߝߍ߬߸ ߊ߬ ߘߌ߫ ߛߋ߫ ߞߍ߫ ߟߊ߫ ߖߍ߬ߘߍ߸ ߥߊߘߌ ߝߋ߲߫ ߺ ߋ߲߫ ߺ ߝߋ߲߫ ߡߌ߬ߣߊ߬ߣߍ߲ ߛߊߟߌ߫ ߞߘߐߟߊ ߘߐ߫߸ ߏ߬ ߝߊ߲߬ߓߊ ߘߌ߫ ߘߏ߲߬ ߓߊߛߌ ߟߊ߫ ߛߊߟߌ ߞߐߝߍ߬߸ ߞߵߊ߲ ߘߊ߲ߘߊ߫ ߏ߬ ߟߊ߫.>> ߊ߬ ߞߵߏ߬ ߢߊߝߐ߫ ߞߵߊ߬ ߦߌ߬ߘߊ߬ ߞߏ߫ ߞߏ߫ ߘߋ߲ߣߍ߲߫ ߕߴߊ߬ ߘߌ߫.

ߛߊߟߌ߫ ߢߊߞߘߐ ߣߌ߲߬ ߘߐ߫߸ ߓߊ߯ߙߊ ߦߋ߫ ߞߍ߫ ߟߊ߫ ߟߋ߬ ߕߋ߲߬ ߞߋߟߋ߲߫ ߌߞߏ߫ ߝߌ߬ߟߊ߬. <<ߊ߲ ߘߏ߲߬ ߦߋ߫ ߝߊ߰ߣߌ߲ ߡߍ߲ ߝߣߊ߫ ߞߙߊ߫ ߟߊ߫ ߕߋ߬ߟߋ ߞߘߐ߫߸ ߏ߬ ߞߊ߫ ߛߌߦߊ߫߸ ߓߊߏ߬߸ ߊ߲ ߘߌ߫ ߛߋ߫ ߕߋ߲߬ ߞߊ߬ ߛߎ߯ߞߋߟߋ߲߫ ߁߀ ߞߙߊ߫ ߕߋ߬ߟߋ ߞߘߐ߫߸ ߣߴߏ߬ ߕߍ߫߸ ߣߴߊ߲ ߕߍ߫ ߛߊߟߌ߫ ߘߐ߫߸ ߊ߲ ߘߌ߫ ߛߋ߫ ߂ ߢߐ߲߰ ߞߙߊ߫ ߟߊ߫ ߕߋ߲߬.>> ߞߙߊߟߌߟߊ ߞߵߏ߬ ߝߐ߫، ߏ߬ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߥߎߟߊ߫ ߖߊ߲ߓߊ߫ ߟߋ߬ ߛߊߟߌߡߊ߫ ߞߙߊߟߌ ߣߌ߫ ߛߊ߲߭ ߞߊߙߏ ߕߐ߭ ߟߎ߬ ߞߙߊߟߌ ߕߍ߫.

ߓߊ߯ߙߊ ߟߊ߫ ߛߌߦߊߦߊ ߏ߬ ߝߣߊ߫ ߓߊ߯ ߓߐ߫ ߊ߬ ߟߊ߫ ߛߌߛߍ߲߬߸ ߓߊ߯ߙߊ߫ ߡߎߙߊ߲߫ ߞߏ ߣߌ߫ ߓߊ߯ߙߊ ߞߍߝߊߘߌ ߟߎ߬ ߝߣߊ߫ ߟߊ߫ ߜߟߍ߬ߦߊ ߦߴߊ߬ ߘߐ߫، ߢߎߡߍ߫ ߞߏߖߊ ߦߴߊ߬ ߛߌߦߊߡߊ߲ ߟߐ߬ ߟߊ߫ ߘߏ߲߬ ߠߊ߫ ߘߊߖߎ߮ ߟߎ߬ ߝߍ߬߸ ߡߍ߲ ߦߋ߫ ߥߊߘߌ ߓߐ߫ ߟߴߊ߬ߟߎ߫ ߞߎ߲߬ ߞߏߛߓߍ߫. <<ߢߎߡߍߞߏ ߟߋ߬ ߛߓߊ߬ߕߌ߬ߣߍ߲߫ ߕߍ߫߸ ߝߏ߫ ߞߊ߬ ߖߌߥߎ ߟߋ߬ ߞߍ߫ ߣߌߘߐ ߘߐ߫߸ ߞߊ߬ ߏ߬ ߟߊߡߍߣߍ߲߫߸ ߊ߬ ߘߏ߲߬ ߖߌߥߎ߫ ߏ߬ ߝߣߊ߫ ߕߍ߫ ߦߋ߫ ߟߊ߫ ߢߊ ߟߊ߫ ߕߋ߲߬، ߖߌߥߎ߫ ߞߏ ߓߘߊ߫ ߜߟߍ߬ߦߊ߬.>> ߊߟߊߡߊ߬ ߕߙߊߥߟߋ߫ ߟߋ߬ ߞߊ߲߫ ߕߋ߲߬߸ ߏ߬ ߡߍ߲ ߕߊ߯ߣߍ߲߫ ߕߍ߬ߘߍ߫ ߊ߬ ߟߊ߫ ߝߊ߰ߣߌ߲ ߘߴߊ߬ ߞߙߊ߫ ߦߌߟߊ ߘߐ߫ ߦߋ߲߬.

ߜߟߍ߬ߦߊ ߏ߬ ߓߍ߯ ߣߴߊ߬ ߕߊ߫߸ ߝߊ߰ߣߌ߲߬ ߕߌ߮ ߟߎ߬ ߕߴߊ߬ߟߎ߬ ߟߊ߫ ߕߙߐߦߊ ߘߏ߲߰ ߠߊ߫ ߘߋ߬߸ ߏ߬ ߟߎ߬ ߞߊ߲߫ ߠߋ߬ ߞߏ߫ ߞߙߊߟߌߟߊ ߟߎ߬ ߦߋ߫ ߞߟߊߓߊߒߕߋ ߟߎ߫ ߟߋ߬ ߘߌ߫. <<ߞߟߊߓߊ߲ߒߕߋߦߊ ߦߴߊ߬ߟߎ߬ ߟߊ߫ ߓߊ߯ߙߊ ߘߐ߫߸ ߓߊ߬ߙߌ߫߸ ߣߴߌ ߛߋ߫ ߘߴߌ ߡߎ߬ߢߎ߲߬ ߠߊ߫ ߊ߬ߟߎ߬ ߟߊ߫ ߞߟߊߓߊ߲ߒߕߋߦߊ ߏ߬ ߞߘߐ߫߸ ߊ߬ ߛߌߦߊߡߊ߲ ߘߐ߫߸ ߌ ߘߴߌ ߢߌߣߌ߲ߞߏ ߟߊߛߐ߬ߘߐ߲߬.>> ߊ߬ ߞߏ߬ߣߌ߲ ߞߵߊ߬ ߟߴߊ߬ ߞߊ߲߬߸ ߞߏ߫ ߊ߬ ߛߌߦߊߡߊ߲ ߦߴߊ߬ߟߎ߬ ߡߊߛߐ߬ߘߐ߲߬ ߠߊ߫ ߝߊ߰ߣߌ߲ ߠߊ߫ ߛߌߦߊߦߊ ߟߋ߬ ߝߍ߬.

ߡߞߊ߬ߙߊ߲߬ߘߋ߲ ߠߎ߬ ߟߊ߫ ߞߎ߲߬ߠߊ߫߸ ߏ߬ ߘߏ߫ ߟߎ߫ ߦߋ߫ ߛߎ߫ ߘߐ߫ ߞߙߊߟߌ ߣߌ߲߬ ߦߋ߫ ߟߊ߫ ߛߍ߱ ߟߋ߬ ߘߌ߫߸ ߓߊ߬ߙߌ߬ ߛߍ߱ ߏ߬ ߟߋ ߝߣߊ߫ ߦߋ߫ ߞߟߊߓߎ ߘߌ߫ ߟߴߊ߬ߟߎ߫ ߡߊ߬. <<ߊ߲ ߧߋ߫ ߛߎ߫ ߘߐ߫ ߞߙߊߟߌ ߡߍ߲ ߠߊ߫ ߕߋ߲߬߸ ߊ߬ ߦߴߊ߲ ߛߍ߰ ߟߊ߫ ߞߏߛߓߍ߫، ߓߊߏ߬߸ ߊ߲ ߧߋ߫ ߛߎ ߓߊ߲߫ ߠߊ߫ ߟߋ߬ ߊ߲ ߢߣߊ߫، ߛߎ߫ ߘߐ߫ ߓߊ߯ߙߊ߫ ߢߌ߲߬ ߞߏ߬ߣߌ߲ ߦߋ߫ ߞߟߊߓߎ ߟߋ߬ ߘߌ߫ ߟߊ߫ ߒߠߋ ߡߊ߬߸ ߓߊߏ߬߸ ߓߊ߯ߙߊ ߟߋ߬ ߤߊߞߟߌ߫ ߛߐߘߐ߲ ߛߌߟߊ ߟߋ߬ ߝߣߊ߫ ߦߋ߫߸ ߏ߬ ߟߋ߬ ߓߍ߯ ߞߏߛߐ߲߬߸ ߊ߬ ߕߍ߫ ߒߠߋ ߕߙߐ߫ ߟߊ߫.>> ߕߌߙߊ߲ߞߍ߫ ߓߊ߰ߦߐ߮ ߟߋ߬ ߞߊ߲߫ ߕߋ߲߬.

ߎߛߑߡߊ߯ߣߌ߲߬ ߛߘߌ߬ߓߋ ߝߣߊ߫ ߞߵߊ߬ ߦߋ߫ ߢߊ߫ ߞߋߟߋ߲ ߏ߬ ߟߋ ߡߊ߬߸ ߞߏ߫ ߊ߬ߟߎ߬ ߦߋ߫ ߢߊߜߊ߬ ߟߊ߫ ߟߋ߬ ߛߊߟߌ ߝߍ߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬. <<ߊ߲ ߖߍ߬ߘߍ ߦߋ߫ ߛߋ߫ ߟߊ߫ ߛߎ߯ߞߋߟߋ߲ ߡߍ߲ ߞߙߊ߫ ߟߊ߫ ߕߋ߬ߟߋ ߞߘߐ߫߸ ߤߊߞߍߕߏ߫ ߊ߬ ߞߊ߫ ߛߌߦߊ߫ ߒߠߋ ߖߍ߬ߘߍ ߕߍ߫ ߛߋ߫ ߊ߬ ߘߊ߲߬ߠߊߕߍ߰ ߟߊ߫߸ ߓߊߏ߬߸ ߊ߲ ߧߋ߫ ߝߊ߰ߣߌ߲߬ ߞߙߊߕߊ ߛߐ߬ߘߐ߲߬ ߠߊ߫ ߝߋߝߋߝߋߝߋ߫.>> ߊ߬ ߞߵߏ߬ ߦߌ߬ߘߊ߬.

ߥߊߘߌ߫ ߛߐߘߐ߲ ߣߊ߬ߕߊ߸ ߝߊ߬ߘߌ߬ߞߟߏ ߟߊ߫ ߛߍ߱߸ ߞߊ߲ߞߊ߲߫ ߞߙߊߟߌߟߊ ߟߎ߬ ߦߴߏ߬ ߓߍ߯ ߟߋ߬ ߕߍߡߊ߬، ߛߊߟߌ ߓߊ߯ ߛߋ߫߸ ߊ߬ߟߎ߬ ߦߋ߫ ߢߊߜߊ߬ ߟߊ߫ ߟߋ߬ ߞߊ߬ ߛߴߊ߬ ߘߊ߲߭ ߠߊ߫.