ߜߟߊ߬ߜߟߊ߫ ߅߀߀ ߟߋ߬ ߕߊ߯ߡߊ߫ ߞߐ߬ߖߎ ߛߌ߰ߓߊ߮ ߟߎ߬ ߓߟߏ߫߸ ߞߊ߬ ߥߊ߫ ߞߟߌߟߌ߫ ߞߊ߲ߡߊ߬، ߏ߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߥߊ߫ߕߌ߫ ߟߊߕߍ߰ߣߍ߲߫ ߠߋ߬ ߝߣߊ߫ ߦߋ߫ ߞߟߌߟߌ ߞߍ߫ ߥߊ߫߯ߕߌ߫ ߖߐ߲ߖߐ߲ ߠߊ߫߸ ߞߊ߲ ߦߋ߫ ߛߌ߰ ߟߊ߫ ߥߊ߯ߕߌ ߡߍ߲ ߠߊ߫ ߞߊ߬ߣߌ߲߬߸ ߏ߬ ߟߋ ߁߂ ߕߎߡߊ ߣߌ߫ ߁߄ ߕߎߡߊ ߕߍߟߊ ߘߌ߫، ߒ߬ߓߊ߬߸ ߕߎ߬ߡߊ߬ߙߋ߲߫ ߝߌ߬ߟߊ ߏ߬ ߕߍߟߊߞߎߘߎ߲ ߠߋ߬ ߞߐ߬ߖߎ ߛߌ߰ߓߊ߮ ߟߎ߫ ߛߊ߬ߥߏ߬ߣߊ߲߬ ߞߟߌߟߌ ߞߍ߫ ߥߊ߯ߕߌ ߘߌ߫ ߞߎߘߍ߫ ߕߟߊ߫ ߕߊ߯ߡߊ ߞߐߝߍ߬، ߣߴߏ߬ ߕߊ߬ߡߌ߲߬ ߘߴߌ ߞߊ߲߬߸ ߝߏ߫ ߣߴߌ ߞߵߏ߬ ߘߎ߰ߛߊ߬ߜߍ ߡߊߞߐ߬ߣߐ߲߬߸ ߥߟߊ߫ ߌ ߦߋ߫ ߞߟߌߟߌ ߞߍ߫ ߞߵߊ߬ ߛߐ߬ߘߐ߲߬ ߌ ߞߊ߲ ߕߍ߫ ߡߍ߲߫ ߠߊ߫ ߖߐ߲ߖߐ߲߫.

ߞߊߛߌߡ ߛߊ߬ߞߐ߬ ߡߍ߲ ߦߋ߫ ߞߐ߬ߖߎ ߘߎ߰ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߙߏ߬ߝߏ߬ ߞߏ ߣߌ߲߬ ߓߘߊ߫ ߘߌ߯ ߊ߬ߟߎ߬ ߟߊ߫ ߞߏߛߓߍ߫߸ ߞߊ߬ ߘߌ߯ ߛߏ߫ ߞߣߐ߫ ߡߐ߮ ߟߎ߬ ߟߊ߫ ߞߏߛߓߍ߫.

<<ߊ߲ ߛߊ߲߬ ߞߋߟߋ߲ ߠߋ߬ ߜߟߍ߬ߦߊ ߣߌ߲߬ ߕߍߡߊ߬ ߕߋ߲߬.>> ߊ߬ ߞߵߏ߬ ߘߟߊߥߊߦߌ߲ ߞߍ߫߸ ߞߵߊ߬ ߛߐ߬ߘߐ߲߬ ߊ߬ ߣߌ߫ ߛߌߟߊߓߐߛߐ߯ߣߊ߫ ߛߍߝߍ߲ߘߊ ߞߎߡߊ߫ ߘߊ߫ ߞߵߊ߬ ߕߏ߫ ߥߎߟߊ߫ ߖߊ߲ ߠߋ߬ ߟߊ߫ ߏ߬ ߘߌ߫ ߞߟߌߟߌ ߏ߬ ߞߊ߲ߡߊ߬.

ߊ߬ ߞߵߊ߬ ߝߙߊ߬ ߞߎߡߊ ߞߊ߲߬ ߏ߬ ߟߋ ߘߐ߫߸ ߞߏ߫: <<ߟߐ߲ ߡߍ߲ ߠߎ߬ ߟߐ߬ߣߍ߲߫߸ ߏ߬ ߟߎ߬ ߦߋ߫ ߕߐ߰ߡߊ߬ߛߙߋ߬ߦߊ߬ ߜߊ߲ߛ߲ߊ ߠߋ߬ ߟߊ߫ ߦߋ߲߬߸ ߞߵߊ߬ ߞߍ߫ ߣߍ߰ ߞߎ߬ߘߎ߲߬ ߠߊߟߐ߬ߣߍ߲ ߘߌ߫.>>

ߞߊ߬ ߓߍ߲߬ ߞߙߏ߬ߝߏ߬ ߞߏ߬ߖߊ ߏ߬ ߟߋ ߡߊ߬ ߛߊ߫߸ ߘߎ߰ߕߌ߮ ߞߵߊ߬ ߦߌ߬ߘߊ߬ ߞߏ߫ ߝߏ߫ ߡߙߌߦߊ߫ ߜߘߍ߫ ߓߘߊ߫ ߣߊ߬ ߛߏ߫ ߞߣߐ߫ ߡߐ߮ ߟߎ߬ ߟߊ߫، ߓߊߏ߬߸ ߌߞߏߡߌ߲߬ ߞߙߏ߬ߝߏ ߟߐ߲ ߏ߬ ߟߐ߬ߣߍ߲߫ ߦߋ߲߬߸ ߊ߬ ߕߣߐ߬ ߕߴߊ߬ߟߎ߫ ߞߊ߲߬߸ <<ߞߊ߬ ߓߍ߲߬ ߘߎ߰ߘߋ߲ ߠߎ߫ ߖߎ߬ߛߎߞߊ߬ߛߌ ߡߊ߬ ߣߌ߲߬ ߞߏ ߘߐ߫߸ ߊ߬ ߦߴߊ߬ߟߎ߫ ߞߎ߲߭ ߘߐ߫ ߟߋ߬ ߡߎ߬ߕߎ߲߬ ߞߏ߫ ߊ߬ߟߎ߬ ߦߋ߫ ߥߊ߫ ߟߐ߲ ߏ߬ ߓߐ߬ ߦߋ߲߬ ߛߍߣߍ߲߬߸ ߣߴߊ߬ ߡߊ߫ ߢߊ߬ ߞߏ߫ ߊ߬ ߕߍ߫ ߕߣߐ߬ ߟߊߛߋ߫ ߟߴߊ߬ߟߎ߫ ߡߊ߬ ߦߋ߲߬.>> ߊ߬ ߞߵߏ߬ ߟߊߛߋ߫.

ߞߐ߬ߖߎ ߣߌ߲߬ ߦߋ߫ ߖߌ߬ߣߍ߬ ߣߌ߫ ߡߊ߬ߟߌ ߓߐߕߏ߲ ߠߋ߬ ߟߊ߫߸ ߛߏ߫ ߞߣߐ߫ ߡߐ߮ ߟߎ߬ ߞߊ߲߫ ߞߏ߫ ߊ߬ߟߎ߬ ߓߘߊ߫ ߛߋ߲߬ߝߊ߬ ߛߌߦߊߡߊ߲߫ ߞߍ߫ ߞߊ߬ ߥߊ߫ ߛߋ߫ ߞߙߏ߬ߝߏ߬ ߞߏߟߊߘߍ ߝߍ߬߸ ߓߊ߬ߙߌ߬ ߢߊ߫ ߛߐ߬ߘߐ߲߬ߣߍ߲߬ ߕߴߊ߬ ߡߊ߬ ߤߊߟߌ߬ߛߊ߫، ߘߎ߰ߕߌ߮ ߞߊ߲߫ ߏ߬ ߟߋ ߘߐ߫ ߞߏ߫: <<ߊ߲ ߓߘߴߊ߲ ߞߊ߲ߠߊߘߌ߫ ߘߐ߬ߓߍ߲߬ߠߌ߲߬ߠߊ ߟߎ߫ ߡߊ߬ ߞߊ߬ ߛߍ߰߸ ߞߏ߬ߣߵߊ߲ ߡߊ߫ ߡߐ߰ ߛߌ߫ ߦߋ߫ ߡߎߣߎ߲߬ ߡߍ߲ ߣߊ߬ߣߍ߲߫ ߟߐ߲ ߢߌ߲߬ ߘߐߓߍ߲߬ ߞߊ߲ߡߊ߬.>>

ߊ߬ߟߎ߫ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߡߊ߫ ߛߋ߫ ߝߊ߰ߡߊ ߟߎ߫ ߝߍ߬ ߡߎߣߎ߲߬߸ ߞߊ߬ ߢߊ߫ ߢߌߣߌ߲߫ ߊ߬ ߞߏ ߡߊ߬ ߡߙߊ߬ߦߊ߬ ߞߎ߲ߘߊ߫، ߞߐ߬ߖߎ ߛߌ߬ߓߊ߮ ߟߎ߫ ߞߏ߬ߣߌ߲ ߞߵߊ߬ߟߎ߬ ߞߊ߲ߠߊߘߌ߫ ߓߍ߯ ߡߊ߬ ߛߋ߲߬ߢߊ ߣߌ߲߬ ߘߐ߫߸ ߞߏ߫ ߞߵߊ߬ߟߎ߬ ߡߊߘߍ߬ߡߍ߲߬ ߞߊߟߌߦߊ߫ ߘߐ߫.

<<ߊ߲ ߧߴߊ߲ ߞߊ߲ߠߊߘߌ߫ ߟߊ߫ ߞߎ߲߬ߠߊ߬ߛߌ߮ ߡߊ߬߸ ߞߵߊ߲ ߡߊߘߍ߬ߡߍ߲߬ ߞߊߟߌߦߊ߫ ߘߐ߫.>> ߞߊߛߌߡ ߛߊ߬ߞߐ߫ ߞߵߏ߬ ߡߞߊ߬ߛߌ߬ߟߌ ߞߍ߫.

ߏ߬ ߘߐ߫߸ ߣߌ߫ ߞߐ߬ߖߎ ߟߊ߫ ߞߙߏ߬ߝߏ߬ ߞߏ ߣߌ߲߬ ߢߊߓߐ߫ ߘߊ߫ ߕߋ߲߬߸ ߡߐ߰ ߥߊ߯ <<ߛߓߊ߬ ߣߌ߫ ߞߐ߫>> ߟߋ߬ ߓߌ߬ߟߊ߬ߕߐ߫ ߦߋߟߋ߲ ߘߐ߫ ߏ߬ ߘߌ߫߸ ߞߵߊ߬ߟߎ߬ ߣߌ߫ ߘߎߢߊ߫ ߕߐ߭ ߓߌ߬ߟߊ߬ ߢߐ߲߮ ߡߊ߬، ߞߙߏ߬ߝߏ ߟߋ߬ ߘߏ߲߬ ߦߋ߫ ߖߎ߬ߟߊ߬ߦߊ ߟߊߣߐ߰ߦߊ߬ ߟߊ߫߸ ߞߊ߬ ߞߏ ߓߍ߯ ߣߐ߰ߦߊ߫ ߛߏ߫ ߞߣߐ߫ ߡߐ߮ ߟߎ߬ ߓߟߏ߫، ߓߊߏ߬߸ ߊ߬ ߓߘߊ߫ ߞߍ߫ ߢߊ߬ߒ߬ߞߐ߬ߓߊߟߌ ߟߎ߬ ߘߏ߫ ߘߌ߫ ߕߋ߲߬.